| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
2. ඌනපඤ්‌චබන්‌ධනසික්‌ඛාපදං
2. Ūnapañcabandhanasikkhāpadaṃ
609. තෙන සමයෙන බුද්‌ධො භගවා සක්‌කෙසු විහරති කපිලවත්‌ථුස්‌මිං නිග්‍රොධාරාමෙ. තෙන ඛො පන සමයෙන අඤ්‌ඤතරෙන කුම්‌භකාරෙන භික්‌ඛූ පවාරිතා හොන්‌ති – ‘‘යෙසං අය්‍යානං පත්‌තෙන අත්‌ථො අහං පත්‌තෙනා’’ති. තෙන ඛො පන සමයෙන භික්‌ඛූ න මත්‌තං ජානිත්‌වා බහූ පත්‌තෙ විඤ්‌ඤාපෙන්‌ති. යෙසං ඛුද්‌දකා පත්‌තා තෙ මහන්‌තෙ පත්‌තෙ විඤ්‌ඤාපෙන්‌ති. යෙසං මහන්‌තා පත්‌තා තෙ ඛුද්‌දකෙ පත්‌තෙ විඤ්‌ඤාපෙන්‌ති. අථ ඛො සො කුම්‌භකාරො භික්‌ඛූනං බහූ පත්‌තෙ කරොන්‌තො න සක්‌කොති අඤ්‌ඤං වික්‌කායිකං භණ්‌ඩං කාතුං, අත්‌තනාපි න යාපෙති, පුත්‌තදාරාපිස්‌ස කිලමන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සමණා සක්‍යපුත්‌තියා න මත්‌තං ජානිත්‌වා බහූ පත්‌තෙ විඤ්‌ඤාපෙස්‌සන්‌ති! අයං ඉමෙසං බහූ පත්‌තෙ කරොන්‌තො න සක්‌කොති අඤ්‌ඤං වික්‌කායිකං භණ්‌ඩං කාතුං, අත්‌තනාපි න යාපෙති, පුත්‌තදාරාපිස්‌ස කිලමන්‌තී’’ති.
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛූ න මත්‌තං ජානිත්‌වා බහූ පත්‌තෙ විඤ්‌ඤාපෙස්‌සන්‌තී’’ති! අථ ඛො තෙ භික්‌ඛූ තෙ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… සච්‌චං කිර, භික්‌ඛවෙ, භික්‌ඛූ න මත්‌තං ජානිත්‌වා බහූ පත්‌තෙ විඤ්‌ඤාපෙන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තෙ, භික්‌ඛවෙ, මොඝපුරිසා න මත්‌තං ජානිත්‌වා බහූ පත්‌තෙ විඤ්‌ඤාපෙස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… විගරහිත්‌වා ධම්‌මිං කථං කත්‌වා භික්‌ඛූ ආමන්‌තෙසි – ‘‘න, භික්‌ඛවෙ, පත්‌තො විඤ්‌ඤාපෙතබ්‌බො. යො විඤ්‌ඤාපෙය්‍ය, ආපත්‌ති දුක්‌කටස්‌සා’’ති.
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
610. තෙන ඛො පන සමයෙන අඤ්‌ඤතරස්‌ස භික්‌ඛුනො පත්‌තො භින්‌නො හොති. අථ ඛො සො භික්‌ඛු – ‘‘භගවතා පටික්‌ඛිත්‌තං පත්‌තං විඤ්‌ඤාපෙතු’’න්‌ති කුක්‌කුච්‌චායන්‌තො න විඤ්‌ඤාපෙති. හත්‌ථෙසු පිණ්‌ඩාය චරති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සමණා සක්‍යපුත්‌තියා හත්‌ථෙසු පිණ්‌ඩාය චරිස්‌සන්‌ති, සෙය්‍යථාපි තිත්‌ථියා’’ති! අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. අථ ඛො තෙ භික්‌ඛූ භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, නට්‌ඨපත්‌තස්‌ස වා භින්‌නපත්‌තස්‌ස වා පත්‌තං විඤ්‌ඤාපෙතු’’න්‌ති.
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
611. තෙන ඛො පන සමයෙන ඡබ්‌බග්‌ගියා භික්‌ඛූ – ‘‘භගවතා අනුඤ්‌ඤාතං නට්‌ඨපත්‌තස්‌ස වා භින්‌නපත්‌තස්‌ස වා පත්‌තං විඤ්‌ඤාපෙතු’’න්‌ති අප්‌පමත්‌තකෙනපි භින්‌නෙන අප්‌පමත්‌තකෙනපි ඛණ්‌ඩෙන විලිඛිතමත්‌තෙනපි බහූ පත්‌තෙ විඤ්‌ඤාපෙන්‌ති . අථ ඛො සො කුම්‌භකාරො භික්‌ඛූනං තථෙව බහූ පත්‌තෙ කරොන්‌තො න සක්‌කොති අඤ්‌ඤං වික්‌කායිකං භණ්‌ඩං කාතුං, අත්‌තනාපි න යාපෙති, පුත්‌තදාරාපිස්‌ස කිලමන්‌ති. මනුස්‌සා තථෙව උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සමණා සක්‍යපුත්‌තියා න මත්‌තං ජානිත්‌වා බහූ පත්‌තෙ විඤ්‌ඤාපෙස්‌සන්‌ති! අයං ඉමෙසං බහූ පත්‌තෙ කරොන්‌තො න සක්‌කොති අඤ්‌ඤං වික්‌කායිකං භණ්‌ඩං කාතුං, අත්‌තනාපි න යාපෙති, පුත්‌තදාරාපිස්‌ස කිලමන්‌තී’’ති.
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ අප්‌පමත්‌තකෙනපි භින්‌නෙන අප්‌පමත්‌තකෙනපි ඛණ්‌ඩෙන විලිඛිතමත්‌තෙනපි බහූ පත්‌තෙ විඤ්‌ඤාපෙස්‌සන්‌තී’’ති! අථ ඛො තෙ භික්‌ඛූ ඡබ්‌බග්‌ගියෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර තුම්‌හෙ, භික්‌ඛවෙ, අප්‌පමත්‌තකෙනපි භින්‌නෙන අප්‌පමත්‌තකෙනපි ඛණ්‌ඩෙන විලිඛිතමත්‌තෙනපි බහූ පත්‌තෙ විඤ්‌ඤාපෙථා’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තුම්‌හෙ, මොඝපුරිසා, අප්‌පමත්‌තකෙනපි භින්‌නෙන අප්‌පමත්‌තකෙනපි ඛණ්‌ඩෙන විලිඛිතමත්‌තෙනපි බහූ පත්‌තෙ විඤ්‌ඤාපෙස්‌සථ! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
612. ‘‘යො පන භික්‌ඛු ඌනපඤ්‌චබන්‌ධනෙන පත්‌තෙන අඤ්‌ඤං නවං පත්‌තං චෙතාපෙය්‍ය, නිස්‌සග්‌ගියං පාචිත්‌තියං. තෙන භික්‌ඛුනා සො පත්‌තො භික්‌ඛුපරිසාය නිස්‌සජ්‌ජිතබ්‌බො. යො ච තස්‌සා භික්‌ඛුපරිසාය පත්‌තපරියන්‌තො සො තස්‌ස භික්‌ඛුනො පදාතබ්‌බො – ‘අයං තෙ, භික්‌ඛු, පත්‌තො යාව භෙදනාය ධාරෙතබ්‌බො’ති. අයං තත්‌ථ සාමීචී’’ති.
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
613. යො පනාති යො යාදිසො…පෙ.… භික්‌ඛූති…පෙ.… අයං ඉමස්‌මිං අත්‌ථෙ අධිප්‌පෙතො භික්‌ඛූති.
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ඌනපඤ්‌චබන්‌ධනො නාම පත්‌තො අබන්‌ධනො වා එකබන්‌ධනො වා ද්‌විබන්‌ධනො වා තිබන්‌ධනො වා චතුබන්‌ධනො වා. අබන්‌ධනොකාසො නාම පත්‌තො යස්‌ස ද්‌වඞ්‌ගුලා රාජි න හොති. බන්‌ධනොකාසො නාම පත්‌තො යස්‌ස ද්‌වඞ්‌ගුලා රාජි හොති. නවො නාම පත්‌තො විඤ්‌ඤත්‌තිං උපාදාය වුච්‌චති.
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
චෙතාපෙය්‍යාති විඤ්‌ඤාපෙති, පයොගෙ දුක්‌කටං. පටිලාභෙන නිස්‌සග්‌ගියො හොති. සඞ්‌ඝමජ්‌ඣෙ නිස්‌සජ්‌ජිතබ්‌බො. සබ්‌බෙහෙව අධිට්‌ඨිතපත්‌තං ගහෙත්‌වා සන්‌නිපතිතබ්‌බං. න ලාමකො පත්‌තො අධිට්‌ඨාතබ්‌බො – ‘‘මහග්‌ඝං පත්‌තං ගහෙස්‌සාමී’’ති. සචෙ ලාමකං පත්‌තං අධිට්‌ඨෙති – ‘‘මහග්‌ඝං පත්‌තං ගහෙස්‌සාමී’’ති, ආපත්‌ති දුක්‌කටස්‌ස. එවඤ්‌ච පන, භික්‌ඛවෙ, නිස්‌සජ්‌ජිතබ්‌බො. තෙන භික්‌ඛුනා සඞ්‌ඝං උපසඞ්‌කමිත්‌වා එකංසං උත්‌තරාසඞ්‌ගං කරිත්‌වා වුඩ්‌ඪානං භික්‌ඛූනං පාදෙ වන්‌දිත්‌වා උක්‌කුටිකං නිසීදිත්‌වා අඤ්‌ජලිං පග්‌ගහෙත්‌වා එවමස්‌ස වචනීයො – ‘‘අයං මෙ, භන්‌තෙ, පත්‌තො ඌනපඤ්‌චබන්‌ධනෙන පත්‌තෙන චෙතාපිතො නිස්‌සග්‌ගියො. ඉමාහං සඞ්‌ඝස්‌ස නිස්‌සජ්‌ජාමී’’ති. නිස්‌සජ්‌ජිත්‌වා ආපත්‌ති දෙසෙතබ්‌බා. බ්‍යත්‌තෙන භික්‌ඛුනා පටිබලෙන ආපත්‌ති පටිග්‌ගහෙතබ්‌බා. පඤ්‌චහඞ්‌ගෙහි සමන්‌නාගතො භික්‌ඛු පත්‌තග්‌ගාහාපකො සම්‌මන්‌නිතබ්‌බො – යො න ඡන්‌දාගතිං ගච්‌ඡෙය්‍ය, න දොසාගතිං ගච්‌ඡෙය්‍ය, න මොහාගතිං ගච්‌ඡෙය්‍ය, න භයාගතිං ගච්‌ඡෙය්‍ය, ගාහිතාගාහිතඤ්‌ච ජානෙය්‍ය . එවඤ්‌ච පන, භික්‌ඛවෙ, සම්‌මන්‌නිතබ්‌බො. පඨමං භික්‌ඛු යාචිතබ්‌බො. යාචිත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
614. ‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමං භික්‌ඛුං පත්‌තග්‌ගාහාපකං සම්‌මන්‌නෙය්‍ය. එසා ඤත්‌ති.
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘සුණාතු මෙ, භන්‌තෙ, සඞ්‌ඝො. සඞ්‌ඝො ඉත්‌ථන්‌නාමං භික්‌ඛුං පත්‌තග්‌ගාහාපකං සම්‌මන්‌නති. යස්‌සායස්‌මතො ඛමති ඉත්‌ථන්‌නාමස්‌ස භික්‌ඛුනො පත්‌තග්‌ගාහාපකස්‌ස සම්‌මුති, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘සම්‌මතො සඞ්‌ඝෙන ඉත්‌ථන්‌නාමො භික්‌ඛු පත්‌තග්‌ගාහාපකො. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
615. තෙන සම්‌මතෙන භික්‌ඛුනා පත්‌තො ගාහෙතබ්‌බො. ථෙරො වත්‌තබ්‌බො – ‘‘ගණ්‌හාතු, භන්‌තෙ, ථෙරො පත්‌ත’’න්‌ති. සචෙ ථෙරො ගණ්‌හාති, ථෙරස්‌ස පත්‌තො දුතියස්‌ස ගාහෙතබ්‌බො. න ච තස්‌ස අනුද්‌දයතාය න ගහෙතබ්‌බො. යො න ගණ්‌හෙය්‍ය, ආපත්‌ති දුක්‌කටස්‌ස. අපත්‌තකස්‌ස න ගාහෙතබ්‌බො. එතෙනෙව උපායෙන යාව සඞ්‌ඝනවකා ගාහෙතබ්‌බා. යො ච තස්‌සා භික්‌ඛුපරිසාය පත්‌තපරියන්‌තො, සො තස්‌ස භික්‌ඛුනො පදාතබ්‌බො – ‘‘අයං තෙ, භික්‌ඛු, පත්‌තො යාව භෙදනාය ධාරෙතබ්‌බො’’ති.
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
තෙන භික්‌ඛුනා සො පත්‌තො න අදෙසෙ නික්‌ඛිපිතබ්‌බො, න අභොගෙන භුඤ්‌ජිතබ්‌බො, න විස්‌සජ්‌ජෙතබ්‌බො – ‘‘කථායං පත්‌තො නස්‌සෙය්‍ය වා විනස්‌සෙය්‍ය වා භිජ්‌ජෙය්‍ය වා’’ති? සචෙ අදෙසෙ වා නික්‌ඛිපති අභොගෙන වා භුඤ්‌ජති විස්‌සජ්‌ජෙති වා, ආපත්‌ති දුක්‌කටස්‌ස.
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
අයං තත්‌ථ සාමීචීති අයං තත්‌ථ අනුධම්‌මතා.
Ayaṃ tattha sāmīcīti ayaṃ tattha anudhammatā.
616. අබන්‌ධනෙන පත්‌තෙන අබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනෙන පත්‌තෙන එකබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනෙන පත්‌තෙන ද්‌විබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනෙන පත්‌තෙන තිබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනෙන පත්‌තෙන චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
එකබන්‌ධනෙන පත්‌තෙන අබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. එකබන්‌ධනෙන පත්‌තෙන එකබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. එකබන්‌ධනෙන පත්‌තෙන ද්‌විබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. එකබන්‌ධනෙන පත්‌තෙන තිබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. එකබන්‌ධනෙන පත්‌තෙන චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ද්‌විබන්‌ධනෙන පත්‌තෙන අබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. ද්‌විබන්‌ධනෙන පත්‌තෙන එකබන්‌ධනං පත්‌තං…පෙ.… ද්‌විබන්‌ධනං පත්‌තං… තිබන්‌ධනං පත්‌තං… චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
තිබන්‌ධනෙන පත්‌තෙන අබන්‌ධනං පත්‌තං…පෙ.… එකබන්‌ධනං පත්‌තං…පෙ.… ද්‌විබන්‌ධනං පත්‌තං… තිබන්‌ධනං පත්‌තං… චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
චතුබන්‌ධනෙන පත්‌තෙන අබන්‌ධනං පත්‌තං…පෙ.… එකබන්‌ධනං පත්‌තං… ද්‌විබන්‌ධනං පත්‌තං… තිබන්‌ධනං පත්‌තං… චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
අබන්‌ධනෙන පත්‌තෙන අබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනෙන පත්‌තෙන එකබන්‌ධනොකාසං පත්‌තං…පෙ.… ද්‌විබන්‌ධනොකාසං පත්‌තං … තිබන්‌ධනොකාසං පත්‌තං… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
එකබන්‌ධනෙන පත්‌තෙන අබන්‌ධනොකාසං පත්‌තං…පෙ.… එකබන්‌ධනොකාසං පත්‌තං… ද්‌විබන්‌ධනොකාසං පත්‌තං… තිබන්‌ධනොකාසං පත්‌තං… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ද්‌විබන්‌ධනෙන පත්‌තෙන අබන්‌ධනොකාසං පත්‌තං…පෙ.… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
තිබන්‌ධනෙන පත්‌තෙන අබන්‌ධනොකාසං පත්‌තං…පෙ.… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
චතුබන්‌ධනෙන පත්‌තෙන අබන්‌ධනොකාසං පත්‌තං…පෙ.… එකබන්‌ධනොකාසං පත්‌තං… ද්‌විබන්‌ධනොකාසං පත්‌තං… තිබන්‌ධනොකාසං පත්‌තං… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
අබන්‌ධනොකාසෙන පත්‌තෙන අබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. අබන්‌ධනොකාසෙන පත්‌තෙන එකබන්‌ධනං පත්‌තං…පෙ.… ද්‌විබන්‌ධනං පත්‌තං… තිබන්‌ධනං පත්‌තං… චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
චතුබන්‌ධනොකාසෙන පත්‌තෙන අබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං. චතුබන්‌ධනොකාසෙන පත්‌තෙන එකබන්‌ධනං පත්‌තං…පෙ.… ද්‌විබන්‌ධනං පත්‌තං… තිබන්‌ධනං පත්‌තං… චතුබන්‌ධනං පත්‌තං චෙතාපෙති, නිස්‌සග්‌ගියං පාචිත්‌තියං.
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
අබන්‌ධනොකාසෙන පත්‌තෙන අබන්‌ධනොකාසං පත්‌තං…පෙ.… එකබන්‌ධනොකාසං පත්‌තං… ද්‌විබන්‌ධනොකාසං පත්‌තං… තිබන්‌ධනොකාසං පත්‌තං… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
චතුබන්‌ධනොකාසෙන පත්‌තෙන අබන්‌ධනොකාසං පත්‌තං…පෙ.… එකබන්‌ධනොකාසං පත්‌තං… ද්‌විබන්‌ධනොකාසං පත්‌තං… තිබන්‌ධනොකාසං පත්‌තං… චතුබන්‌ධනොකාසං පත්‌තං චෙතාපෙති, නිස්‌සග්‌ගියං පාචිත්‌තියං.
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
617. අනාපත්‌ති නට්‌ඨපත්‌තස්‌ස, භින්‌නපත්‌තස්‌ස, ඤාතකානං පවාරිතානං, අඤ්‌ඤස්‌සත්‌ථාය, අත්‌තනො ධනෙන, උම්‌මත්‌තකස්‌ස, ආදිකම්‌මිකස්‌සාති.
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ඌනපඤ්‌චබන්‌ධනසික්‌ඛාපදං නිට්‌ඨිතං දුතියං.
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 2. ඌනපඤ්‌චබන්‌ධනසික්‌ඛාපදවණ්‌ණනා • 2. Ūnapañcabandhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. ඌනපඤ්‌චබන්‌ධනසික්‌ඛාපදවණ්‌ණනා • 2. Ūnapañcabandhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. ඌනපඤ්‌චබන්‌ධනසික්‌ඛාපදවණ්‌ණනා • 2. Ūnapañcabandhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. ඌනපඤ්‌චබන්‌ධනසික්‌ඛාපදවණ්‌ණනා • 2. Ūnapañcabandhanasikkhāpadavaṇṇanā
