| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༢. ཨཱུནཔཉྩབནྡྷནསིཀྑཱཔདཾ
2. Ūnapañcabandhanasikkhāpadaṃ
༦༠༩. ཏེན སམཡེན བུདྡྷོ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཏེན ཁོ པན སམཡེན ཨཉྙཏརེན ཀུམྦྷཀཱརེན བྷིཀྑཱུ པཝཱརིཏཱ ཧོནྟི – ‘‘ཡེསཾ ཨཡྻཱནཾ པཏྟེན ཨཏྠོ ཨཧཾ པཏྟེནཱ’’ཏི། ཏེན ཁོ པན སམཡེན བྷིཀྑཱུ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེནྟི། ཡེསཾ ཁུདྡཀཱ པཏྟཱ ཏེ མཧནྟེ པཏྟེ ཝིཉྙཱཔེནྟི། ཡེསཾ མཧནྟཱ པཏྟཱ ཏེ ཁུདྡཀེ པཏྟེ ཝིཉྙཱཔེནྟི། ཨཐ ཁོ སོ ཀུམྦྷཀཱརོ བྷིཀྑཱུནཾ བཧཱུ པཏྟེ ཀརོནྟོ ན སཀྐོཏི ཨཉྙཾ ཝིཀྐཱཡིཀཾ བྷཎྜཾ ཀཱཏུཾ, ཨཏྟནཱཔི ན ཡཱཔེཏི, པུཏྟདཱརཱཔིསྶ ཀིལམནྟི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེསྶནྟི! ཨཡཾ ཨིམེསཾ བཧཱུ པཏྟེ ཀརོནྟོ ན སཀྐོཏི ཨཉྙཾ ཝིཀྐཱཡིཀཾ བྷཎྜཾ ཀཱཏུཾ, ཨཏྟནཱཔི ན ཡཱཔེཏི, པུཏྟདཱརཱཔིསྶ ཀིལམནྟཱི’’ཏི།
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑཱུ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེསྶནྟཱི’’ཏི! ཨཐ ཁོ ཏེ བྷིཀྑཱུ ཏེ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ, བྷིཀྑཱུ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེནྟཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏེ, བྷིཀྑཝེ, མོགྷཔུརིསཱ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, པཏྟོ ཝིཉྙཱཔེཏབྦོ། ཡོ ཝིཉྙཱཔེཡྻ, ཨཱཔཏྟི དུཀྐཊསྶཱ’’ཏི།
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
༦༡༠. ཏེན ཁོ པན སམཡེན ཨཉྙཏརསྶ བྷིཀྑུནོ པཏྟོ བྷིནྣོ ཧོཏི། ཨཐ ཁོ སོ བྷིཀྑུ – ‘‘བྷགཝཏཱ པཊིཀྑིཏྟཾ པཏྟཾ ཝིཉྙཱཔེཏུ’’ནྟི ཀུཀྐུཙྩཱཡནྟོ ན ཝིཉྙཱཔེཏི། ཧཏྠེསུ པིཎྜཱཡ ཙརཏི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ ཧཏྠེསུ པིཎྜཱཡ ཙརིསྶནྟི, སེཡྻཐཱཔི ཏིཏྠིཡཱ’’ཏི! ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ནཊྛཔཏྟསྶ ཝཱ བྷིནྣཔཏྟསྶ ཝཱ པཏྟཾ ཝིཉྙཱཔེཏུ’’ནྟི།
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
༦༡༡. ཏེན ཁོ པན སམཡེན ཚབྦགྒིཡཱ བྷིཀྑཱུ – ‘‘བྷགཝཏཱ ཨནུཉྙཱཏཾ ནཊྛཔཏྟསྶ ཝཱ བྷིནྣཔཏྟསྶ ཝཱ པཏྟཾ ཝིཉྙཱཔེཏུ’’ནྟི ཨཔྤམཏྟཀེནཔི བྷིནྣེན ཨཔྤམཏྟཀེནཔི ཁཎྜེན ཝིལིཁིཏམཏྟེནཔི བཧཱུ པཏྟེ ཝིཉྙཱཔེནྟི ། ཨཐ ཁོ སོ ཀུམྦྷཀཱརོ བྷིཀྑཱུནཾ ཏཐེཝ བཧཱུ པཏྟེ ཀརོནྟོ ན སཀྐོཏི ཨཉྙཾ ཝིཀྐཱཡིཀཾ བྷཎྜཾ ཀཱཏུཾ, ཨཏྟནཱཔི ན ཡཱཔེཏི, པུཏྟདཱརཱཔིསྶ ཀིལམནྟི། མནུསྶཱ ཏཐེཝ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ ན མཏྟཾ ཛཱནིཏྭཱ བཧཱུ པཏྟེ ཝིཉྙཱཔེསྶནྟི! ཨཡཾ ཨིམེསཾ བཧཱུ པཏྟེ ཀརོནྟོ ན སཀྐོཏི ཨཉྙཾ ཝིཀྐཱཡིཀཾ བྷཎྜཾ ཀཱཏུཾ, ཨཏྟནཱཔི ན ཡཱཔེཏི, པུཏྟདཱརཱཔིསྶ ཀིལམནྟཱི’’ཏི།
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཨཔྤམཏྟཀེནཔི བྷིནྣེན ཨཔྤམཏྟཀེནཔི ཁཎྜེན ཝིལིཁིཏམཏྟེནཔི བཧཱུ པཏྟེ ཝིཉྙཱཔེསྶནྟཱི’’ཏི! ཨཐ ཁོ ཏེ བྷིཀྑཱུ ཚབྦགྒིཡེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏུམྷེ, བྷིཀྑཝེ, ཨཔྤམཏྟཀེནཔི བྷིནྣེན ཨཔྤམཏྟཀེནཔི ཁཎྜེན ཝིལིཁིཏམཏྟེནཔི བཧཱུ པཏྟེ ཝིཉྙཱཔེཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཨཔྤམཏྟཀེནཔི བྷིནྣེན ཨཔྤམཏྟཀེནཔི ཁཎྜེན ཝིལིཁིཏམཏྟེནཔི བཧཱུ པཏྟེ ཝིཉྙཱཔེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༦༡༢. ‘‘ཡོ པན བྷིཀྑུ ཨཱུནཔཉྩབནྡྷནེན པཏྟེན ཨཉྙཾ ནཝཾ པཏྟཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ། ཏེན བྷིཀྑུནཱ སོ པཏྟོ བྷིཀྑུཔརིསཱཡ ནིསྶཛྫིཏབྦོ། ཡོ ཙ ཏསྶཱ བྷིཀྑུཔརིསཱཡ པཏྟཔརིཡནྟོ སོ ཏསྶ བྷིཀྑུནོ པདཱཏབྦོ – ‘ཨཡཾ ཏེ, བྷིཀྑུ, པཏྟོ ཡཱཝ བྷེདནཱཡ དྷཱརེཏབྦོ’ཏི། ཨཡཾ ཏཏྠ སཱམཱིཙཱི’’ཏི།
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
༦༡༣. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨཱུནཔཉྩབནྡྷནོ ནཱམ པཏྟོ ཨབནྡྷནོ ཝཱ ཨེཀབནྡྷནོ ཝཱ དྭིབནྡྷནོ ཝཱ ཏིབནྡྷནོ ཝཱ ཙཏུབནྡྷནོ ཝཱ། ཨབནྡྷནོཀཱསོ ནཱམ པཏྟོ ཡསྶ དྭངྒུལཱ རཱཛི ན ཧོཏི། བནྡྷནོཀཱསོ ནཱམ པཏྟོ ཡསྶ དྭངྒུལཱ རཱཛི ཧོཏི། ནཝོ ནཱམ པཏྟོ ཝིཉྙཏྟིཾ ཨུཔཱདཱཡ ཝུཙྩཏི།
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
ཙེཏཱཔེཡྻཱཏི ཝིཉྙཱཔེཏི, པཡོགེ དུཀྐཊཾ། པཊིལཱབྷེན ནིསྶགྒིཡོ ཧོཏི། སངྒྷམཛ྄ཛྷེ ནིསྶཛྫིཏབྦོ། སབྦེཧེཝ ཨདྷིཊྛིཏཔཏྟཾ གཧེཏྭཱ སནྣིཔཏིཏབྦཾ། ན ལཱམཀོ པཏྟོ ཨདྷིཊྛཱཏབྦོ – ‘‘མཧགྒྷཾ པཏྟཾ གཧེསྶཱམཱི’’ཏི། སཙེ ལཱམཀཾ པཏྟཾ ཨདྷིཊྛེཏི – ‘‘མཧགྒྷཾ པཏྟཾ གཧེསྶཱམཱི’’ཏི, ཨཱཔཏྟི དུཀྐཊསྶ། ཨེཝཉྩ པན, བྷིཀྑཝེ, ནིསྶཛྫིཏབྦོ། ཏེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘‘ཨཡཾ མེ, བྷནྟེ, པཏྟོ ཨཱུནཔཉྩབནྡྷནེན པཏྟེན ཙེཏཱཔིཏོ ནིསྶགྒིཡོ། ཨིམཱཧཾ སངྒྷསྶ ནིསྶཛྫཱམཱི’’ཏི། ནིསྶཛྫིཏྭཱ ཨཱཔཏྟི དེསེཏབྦཱ། བྱཏྟེན བྷིཀྑུནཱ པཊིབལེན ཨཱཔཏྟི པཊིགྒཧེཏབྦཱ། པཉྩཧངྒེཧི སམནྣཱགཏོ བྷིཀྑུ པཏྟགྒཱཧཱཔཀོ སམྨནྣིཏབྦོ – ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ན བྷཡཱགཏིཾ གཙྪེཡྻ, གཱཧིཏཱགཱཧིཏཉྩ ཛཱནེཡྻ ། ཨེཝཉྩ པན, བྷིཀྑཝེ, སམྨནྣིཏབྦོ། པཋམཾ བྷིཀྑུ ཡཱཙིཏབྦོ། ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
༦༡༤. ‘‘སུཎཱཏུ མེ, བྷནྟེ, སངྒྷོ། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ པཏྟགྒཱཧཱཔཀཾ སམྨནྣེཡྻ། ཨེསཱ ཉཏྟི།
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘སུཎཱཏུ མེ, བྷནྟེ, སངྒྷོ། སངྒྷོ ཨིཏྠནྣཱམཾ བྷིཀྑུཾ པཏྟགྒཱཧཱཔཀཾ སམྨནྣཏི། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ པཏྟགྒཱཧཱཔཀསྶ སམྨུཏི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘སམྨཏོ སངྒྷེན ཨིཏྠནྣཱམོ བྷིཀྑུ པཏྟགྒཱཧཱཔཀོ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
༦༡༥. ཏེན སམྨཏེན བྷིཀྑུནཱ པཏྟོ གཱཧེཏབྦོ། ཐེརོ ཝཏྟབྦོ – ‘‘གཎྷཱཏུ, བྷནྟེ, ཐེརོ པཏྟ’’ནྟི། སཙེ ཐེརོ གཎྷཱཏི, ཐེརསྶ པཏྟོ དུཏིཡསྶ གཱཧེཏབྦོ། ན ཙ ཏསྶ ཨནུདྡཡཏཱཡ ན གཧེཏབྦོ། ཡོ ན གཎྷེཡྻ, ཨཱཔཏྟི དུཀྐཊསྶ། ཨཔཏྟཀསྶ ན གཱཧེཏབྦོ། ཨེཏེནེཝ ཨུཔཱཡེན ཡཱཝ སངྒྷནཝཀཱ གཱཧེཏབྦཱ། ཡོ ཙ ཏསྶཱ བྷིཀྑུཔརིསཱཡ པཏྟཔརིཡནྟོ, སོ ཏསྶ བྷིཀྑུནོ པདཱཏབྦོ – ‘‘ཨཡཾ ཏེ, བྷིཀྑུ, པཏྟོ ཡཱཝ བྷེདནཱཡ དྷཱརེཏབྦོ’’ཏི།
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
ཏེན བྷིཀྑུནཱ སོ པཏྟོ ན ཨདེསེ ནིཀྑིཔིཏབྦོ, ན ཨབྷོགེན བྷུཉྫིཏབྦོ, ན ཝིསྶཛྫེཏབྦོ – ‘‘ཀཐཱཡཾ པཏྟོ ནསྶེཡྻ ཝཱ ཝིནསྶེཡྻ ཝཱ བྷིཛྫེཡྻ ཝཱ’’ཏི? སཙེ ཨདེསེ ཝཱ ནིཀྑིཔཏི ཨབྷོགེན ཝཱ བྷུཉྫཏི ཝིསྶཛྫེཏི ཝཱ, ཨཱཔཏྟི དུཀྐཊསྶ།
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
ཨཡཾ ཏཏྠ སཱམཱིཙཱིཏི ཨཡཾ ཏཏྠ ཨནུདྷམྨཏཱ།
Ayaṃ tattha sāmīcīti ayaṃ tattha anudhammatā.
༦༡༦. ཨབནྡྷནེན པཏྟེན ཨབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནེན པཏྟེན ཨེཀབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནེན པཏྟེན དྭིབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནེན པཏྟེན ཏིབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནེན པཏྟེན ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ཨེཀབནྡྷནེན པཏྟེན ཨབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨེཀབནྡྷནེན པཏྟེན ཨེཀབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨེཀབནྡྷནེན པཏྟེན དྭིབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨེཀབནྡྷནེན པཏྟེན ཏིབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨེཀབནྡྷནེན པཏྟེན ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
དྭིབནྡྷནེན པཏྟེན ཨབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། དྭིབནྡྷནེན པཏྟེན ཨེཀབནྡྷནཾ པཏྟཾ…པེ॰… དྭིབནྡྷནཾ པཏྟཾ… ཏིབནྡྷནཾ པཏྟཾ… ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ཏིབནྡྷནེན པཏྟེན ཨབནྡྷནཾ པཏྟཾ…པེ॰… ཨེཀབནྡྷནཾ པཏྟཾ…པེ॰… དྭིབནྡྷནཾ པཏྟཾ… ཏིབནྡྷནཾ པཏྟཾ… ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ཙཏུབནྡྷནེན པཏྟེན ཨབནྡྷནཾ པཏྟཾ…པེ॰… ཨེཀབནྡྷནཾ པཏྟཾ… དྭིབནྡྷནཾ པཏྟཾ… ཏིབནྡྷནཾ པཏྟཾ… ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ཨབནྡྷནེན པཏྟེན ཨབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནེན པཏྟེན ཨེཀབནྡྷནོཀཱསཾ པཏྟཾ…པེ॰… དྭིབནྡྷནོཀཱསཾ པཏྟཾ … ཏིབནྡྷནོཀཱསཾ པཏྟཾ… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ཨེཀབནྡྷནེན པཏྟེན ཨབནྡྷནོཀཱསཾ པཏྟཾ…པེ॰… ཨེཀབནྡྷནོཀཱསཾ པཏྟཾ… དྭིབནྡྷནོཀཱསཾ པཏྟཾ… ཏིབནྡྷནོཀཱསཾ པཏྟཾ… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
དྭིབནྡྷནེན པཏྟེན ཨབནྡྷནོཀཱསཾ པཏྟཾ…པེ॰… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
ཏིབནྡྷནེན པཏྟེན ཨབནྡྷནོཀཱསཾ པཏྟཾ…པེ॰… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
ཙཏུབནྡྷནེན པཏྟེན ཨབནྡྷནོཀཱསཾ པཏྟཾ…པེ॰… ཨེཀབནྡྷནོཀཱསཾ པཏྟཾ… དྭིབནྡྷནོཀཱསཾ པཏྟཾ… ཏིབནྡྷནོཀཱསཾ པཏྟཾ… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ཨབནྡྷནོཀཱསེན པཏྟེན ཨབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཨབནྡྷནོཀཱསེན པཏྟེན ཨེཀབནྡྷནཾ པཏྟཾ…པེ॰… དྭིབནྡྷནཾ པཏྟཾ… ཏིབནྡྷནཾ པཏྟཾ… ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ཙཏུབནྡྷནོཀཱསེན པཏྟེན ཨབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ། ཙཏུབནྡྷནོཀཱསེན པཏྟེན ཨེཀབནྡྷནཾ པཏྟཾ…པེ॰… དྭིབནྡྷནཾ པཏྟཾ… ཏིབནྡྷནཾ པཏྟཾ… ཙཏུབནྡྷནཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ཨབནྡྷནོཀཱསེན པཏྟེན ཨབནྡྷནོཀཱསཾ པཏྟཾ…པེ॰… ཨེཀབནྡྷནོཀཱསཾ པཏྟཾ… དྭིབནྡྷནོཀཱསཾ པཏྟཾ… ཏིབནྡྷནོཀཱསཾ པཏྟཾ… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ཙཏུབནྡྷནོཀཱསེན པཏྟེན ཨབནྡྷནོཀཱསཾ པཏྟཾ…པེ॰… ཨེཀབནྡྷནོཀཱསཾ པཏྟཾ… དྭིབནྡྷནོཀཱསཾ པཏྟཾ… ཏིབནྡྷནོཀཱསཾ པཏྟཾ… ཙཏུབནྡྷནོཀཱསཾ པཏྟཾ ཙེཏཱཔེཏི, ནིསྶགྒིཡཾ པཱཙིཏྟིཡཾ།
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
༦༡༧. ཨནཱཔཏྟི ནཊྛཔཏྟསྶ, བྷིནྣཔཏྟསྶ, ཉཱཏཀཱནཾ པཝཱརིཏཱནཾ, ཨཉྙསྶཏྠཱཡ, ཨཏྟནོ དྷནེན, ཨུམྨཏྟཀསྶ, ཨཱདིཀམྨིཀསྶཱཏི།
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ཨཱུནཔཉྩབནྡྷནསིཀྑཱཔདཾ ནིཊྛིཏཾ དུཏིཡཾ།
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. ཨཱུནཔཉྩབནྡྷནསིཀྑཱཔདཝཎྞནཱ • 2. Ūnapañcabandhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཨཱུནཔཉྩབནྡྷནསིཀྑཱཔདཝཎྞནཱ • 2. Ūnapañcabandhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. ཨཱུནཔཉྩབནྡྷནསིཀྑཱཔདཝཎྞནཱ • 2. Ūnapañcabandhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཨཱུནཔཉྩབནྡྷནསིཀྑཱཔདཝཎྞནཱ • 2. Ūnapañcabandhanasikkhāpadavaṇṇanā
