| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ • Mahāvibhaṅga |
੨. ਊਨਪਞ੍ਚਬਨ੍ਧਨਸਿਕ੍ਖਾਪਦਂ
2. Ūnapañcabandhanasikkhāpadaṃ
੬੦੯. ਤੇਨ ਸਮਯੇਨ ਬੁਦ੍ਧੋ ਭਗવਾ ਸਕ੍ਕੇਸੁ વਿਹਰਤਿ ਕਪਿਲવਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ। ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਕੁਮ੍ਭਕਾਰੇਨ ਭਿਕ੍ਖੂ ਪવਾਰਿਤਾ ਹੋਨ੍ਤਿ – ‘‘ਯੇਸਂ ਅਯ੍ਯਾਨਂ ਪਤ੍ਤੇਨ ਅਤ੍ਥੋ ਅਹਂ ਪਤ੍ਤੇਨਾ’’ਤਿ। ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਨ੍ਤਿ। ਯੇਸਂ ਖੁਦ੍ਦਕਾ ਪਤ੍ਤਾ ਤੇ ਮਹਨ੍ਤੇ ਪਤ੍ਤੇ વਿਞ੍ਞਾਪੇਨ੍ਤਿ। ਯੇਸਂ ਮਹਨ੍ਤਾ ਪਤ੍ਤਾ ਤੇ ਖੁਦ੍ਦਕੇ ਪਤ੍ਤੇ વਿਞ੍ਞਾਪੇਨ੍ਤਿ। ਅਥ ਖੋ ਸੋ ਕੁਮ੍ਭਕਾਰੋ ਭਿਕ੍ਖੂਨਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ વਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਸ੍ਸਨ੍ਤਿ! ਅਯਂ ਇਮੇਸਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ વਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤੀ’’ਤਿ।
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਤੇ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ਸਚ੍ਚਂ ਕਿਰ, ਭਿਕ੍ਖવੇ, ਭਿਕ੍ਖੂ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਨ੍ਤੀਤਿ? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ…ਪੇ॰… ਕਥਞ੍ਹਿ ਨਾਮ ਤੇ, ਭਿਕ੍ਖવੇ, ਮੋਘਪੁਰਿਸਾ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਸ੍ਸਨ੍ਤਿ! ਨੇਤਂ, ਭਿਕ੍ਖવੇ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… વਿਗਰਹਿਤ੍વਾ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖવੇ, ਪਤ੍ਤੋ વਿਞ੍ਞਾਪੇਤਬ੍ਬੋ। ਯੋ વਿਞ੍ਞਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
੬੧੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਤ੍ਤੋ ਭਿਨ੍ਨੋ ਹੋਤਿ। ਅਥ ਖੋ ਸੋ ਭਿਕ੍ਖੁ – ‘‘ਭਗવਤਾ ਪਟਿਕ੍ਖਿਤ੍ਤਂ ਪਤ੍ਤਂ વਿਞ੍ਞਾਪੇਤੁ’’ਨ੍ਤਿ ਕੁਕ੍ਕੁਚ੍ਚਾਯਨ੍ਤੋ ਨ વਿਞ੍ਞਾਪੇਤਿ। ਹਤ੍ਥੇਸੁ ਪਿਣ੍ਡਾਯ ਚਰਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹਤ੍ਥੇਸੁ ਪਿਣ੍ਡਾਯ ਚਰਿਸ੍ਸਨ੍ਤਿ, ਸੇਯ੍ਯਥਾਪਿ ਤਿਤ੍ਥਿਯਾ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਅਥ ਖੋ ਤੇ ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਨਟ੍ਠਪਤ੍ਤਸ੍ਸ વਾ ਭਿਨ੍ਨਪਤ੍ਤਸ੍ਸ વਾ ਪਤ੍ਤਂ વਿਞ੍ਞਾਪੇਤੁ’’ਨ੍ਤਿ।
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
੬੧੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ‘‘ਭਗવਤਾ ਅਨੁਞ੍ਞਾਤਂ ਨਟ੍ਠਪਤ੍ਤਸ੍ਸ વਾ ਭਿਨ੍ਨਪਤ੍ਤਸ੍ਸ વਾ ਪਤ੍ਤਂ વਿਞ੍ਞਾਪੇਤੁ’’ਨ੍ਤਿ ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ વਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ વਿਞ੍ਞਾਪੇਨ੍ਤਿ । ਅਥ ਖੋ ਸੋ ਕੁਮ੍ਭਕਾਰੋ ਭਿਕ੍ਖੂਨਂ ਤਥੇવ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ વਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤਿ। ਮਨੁਸ੍ਸਾ ਤਥੇવ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍વਾ ਬਹੂ ਪਤ੍ਤੇ વਿਞ੍ਞਾਪੇਸ੍ਸਨ੍ਤਿ! ਅਯਂ ਇਮੇਸਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ વਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤੀ’’ਤਿ।
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ વਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ વਿਞ੍ਞਾਪੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖવੇ, ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ વਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ વਿਞ੍ਞਾਪੇਥਾ’’ਤਿ? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ…ਪੇ॰… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ વਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ વਿਞ੍ਞਾਪੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… ਏવਞ੍ਚ ਪਨ, ਭਿਕ੍ਖવੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
੬੧੨. ‘‘ਯੋ ਪਨ ਭਿਕ੍ਖੁ ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਅਞ੍ਞਂ ਨવਂ ਪਤ੍ਤਂ ਚੇਤਾਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਤੇਨ ਭਿਕ੍ਖੁਨਾ ਸੋ ਪਤ੍ਤੋ ਭਿਕ੍ਖੁਪਰਿਸਾਯ ਨਿਸ੍ਸਜ੍ਜਿਤਬ੍ਬੋ। ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯ ਪਤ੍ਤਪਰਿਯਨ੍ਤੋ ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ – ‘ਅਯਂ ਤੇ, ਭਿਕ੍ਖੁ, ਪਤ੍ਤੋ ਯਾવ ਭੇਦਨਾਯ ਧਾਰੇਤਬ੍ਬੋ’ਤਿ। ਅਯਂ ਤਤ੍ਥ ਸਾਮੀਚੀ’’ਤਿ।
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
੬੧੩. ਯੋ ਪਨਾਤਿ ਯੋ ਯਾਦਿਸੋ…ਪੇ॰… ਭਿਕ੍ਖੂਤਿ…ਪੇ॰… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ।
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ਊਨਪਞ੍ਚਬਨ੍ਧਨੋ ਨਾਮ ਪਤ੍ਤੋ ਅਬਨ੍ਧਨੋ વਾ ਏਕਬਨ੍ਧਨੋ વਾ ਦ੍વਿਬਨ੍ਧਨੋ વਾ ਤਿਬਨ੍ਧਨੋ વਾ ਚਤੁਬਨ੍ਧਨੋ વਾ। ਅਬਨ੍ਧਨੋਕਾਸੋ ਨਾਮ ਪਤ੍ਤੋ ਯਸ੍ਸ ਦ੍વਙ੍ਗੁਲਾ ਰਾਜਿ ਨ ਹੋਤਿ। ਬਨ੍ਧਨੋਕਾਸੋ ਨਾਮ ਪਤ੍ਤੋ ਯਸ੍ਸ ਦ੍વਙ੍ਗੁਲਾ ਰਾਜਿ ਹੋਤਿ। ਨવੋ ਨਾਮ ਪਤ੍ਤੋ વਿਞ੍ਞਤ੍ਤਿਂ ਉਪਾਦਾਯ વੁਚ੍ਚਤਿ।
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
ਚੇਤਾਪੇਯ੍ਯਾਤਿ વਿਞ੍ਞਾਪੇਤਿ, ਪਯੋਗੇ ਦੁਕ੍ਕਟਂ। ਪਟਿਲਾਭੇਨ ਨਿਸ੍ਸਗ੍ਗਿਯੋ ਹੋਤਿ। ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬੋ। ਸਬ੍ਬੇਹੇવ ਅਧਿਟ੍ਠਿਤਪਤ੍ਤਂ ਗਹੇਤ੍વਾ ਸਨ੍ਨਿਪਤਿਤਬ੍ਬਂ। ਨ ਲਾਮਕੋ ਪਤ੍ਤੋ ਅਧਿਟ੍ਠਾਤਬ੍ਬੋ – ‘‘ਮਹਗ੍ਘਂ ਪਤ੍ਤਂ ਗਹੇਸ੍ਸਾਮੀ’’ਤਿ। ਸਚੇ ਲਾਮਕਂ ਪਤ੍ਤਂ ਅਧਿਟ੍ਠੇਤਿ – ‘‘ਮਹਗ੍ਘਂ ਪਤ੍ਤਂ ਗਹੇਸ੍ਸਾਮੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ। ਏવਞ੍ਚ ਪਨ, ਭਿਕ੍ਖવੇ, ਨਿਸ੍ਸਜ੍ਜਿਤਬ੍ਬੋ। ਤੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍વਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍વਾ વੁਡ੍ਢਾਨਂ ਭਿਕ੍ਖੂਨਂ ਪਾਦੇ વਨ੍ਦਿਤ੍વਾ ਉਕ੍ਕੁਟਿਕਂ ਨਿਸੀਦਿਤ੍વਾ ਅਞ੍ਜਲਿਂ ਪਗ੍ਗਹੇਤ੍વਾ ਏવਮਸ੍ਸ વਚਨੀਯੋ – ‘‘ਅਯਂ ਮੇ, ਭਨ੍ਤੇ, ਪਤ੍ਤੋ ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਚੇਤਾਪਿਤੋ ਨਿਸ੍ਸਗ੍ਗਿਯੋ। ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ। ਨਿਸ੍ਸਜ੍ਜਿਤ੍વਾ ਆਪਤ੍ਤਿ ਦੇਸੇਤਬ੍ਬਾ। ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਆਪਤ੍ਤਿ ਪਟਿਗ੍ਗਹੇਤਬ੍ਬਾ। ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਪਤ੍ਤਗ੍ਗਾਹਾਪਕੋ ਸਮ੍ਮਨ੍ਨਿਤਬ੍ਬੋ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗਾਹਿਤਾਗਾਹਿਤਞ੍ਚ ਜਾਨੇਯ੍ਯ । ਏવਞ੍ਚ ਪਨ, ਭਿਕ੍ਖવੇ, ਸਮ੍ਮਨ੍ਨਿਤਬ੍ਬੋ। ਪਠਮਂ ਭਿਕ੍ਖੁ ਯਾਚਿਤਬ੍ਬੋ। ਯਾਚਿਤ੍વਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
੬੧੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ। ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਪਤ੍ਤਗ੍ਗਾਹਾਪਕਂ ਸਮ੍ਮਨ੍ਨੇਯ੍ਯ। ਏਸਾ ਞਤ੍ਤਿ।
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ। ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਪਤ੍ਤਗ੍ਗਾਹਾਪਕਂ ਸਮ੍ਮਨ੍ਨਤਿ। ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਪਤ੍ਤਗ੍ਗਾਹਾਪਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ।
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਪਤ੍ਤਗ੍ਗਾਹਾਪਕੋ। ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏવਮੇਤਂ ਧਾਰਯਾਮੀ’’ਤਿ।
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
੬੧੫. ਤੇਨ ਸਮ੍ਮਤੇਨ ਭਿਕ੍ਖੁਨਾ ਪਤ੍ਤੋ ਗਾਹੇਤਬ੍ਬੋ। ਥੇਰੋ વਤ੍ਤਬ੍ਬੋ – ‘‘ਗਣ੍ਹਾਤੁ, ਭਨ੍ਤੇ, ਥੇਰੋ ਪਤ੍ਤ’’ਨ੍ਤਿ। ਸਚੇ ਥੇਰੋ ਗਣ੍ਹਾਤਿ, ਥੇਰਸ੍ਸ ਪਤ੍ਤੋ ਦੁਤਿਯਸ੍ਸ ਗਾਹੇਤਬ੍ਬੋ। ਨ ਚ ਤਸ੍ਸ ਅਨੁਦ੍ਦਯਤਾਯ ਨ ਗਹੇਤਬ੍ਬੋ। ਯੋ ਨ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਪਤ੍ਤਕਸ੍ਸ ਨ ਗਾਹੇਤਬ੍ਬੋ। ਏਤੇਨੇવ ਉਪਾਯੇਨ ਯਾવ ਸਙ੍ਘਨવਕਾ ਗਾਹੇਤਬ੍ਬਾ। ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯ ਪਤ੍ਤਪਰਿਯਨ੍ਤੋ, ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ – ‘‘ਅਯਂ ਤੇ, ਭਿਕ੍ਖੁ, ਪਤ੍ਤੋ ਯਾવ ਭੇਦਨਾਯ ਧਾਰੇਤਬ੍ਬੋ’’ਤਿ।
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
ਤੇਨ ਭਿਕ੍ਖੁਨਾ ਸੋ ਪਤ੍ਤੋ ਨ ਅਦੇਸੇ ਨਿਕ੍ਖਿਪਿਤਬ੍ਬੋ, ਨ ਅਭੋਗੇਨ ਭੁਞ੍ਜਿਤਬ੍ਬੋ, ਨ વਿਸ੍ਸਜ੍ਜੇਤਬ੍ਬੋ – ‘‘ਕਥਾਯਂ ਪਤ੍ਤੋ ਨਸ੍ਸੇਯ੍ਯ વਾ વਿਨਸ੍ਸੇਯ੍ਯ વਾ ਭਿਜ੍ਜੇਯ੍ਯ વਾ’’ਤਿ? ਸਚੇ ਅਦੇਸੇ વਾ ਨਿਕ੍ਖਿਪਤਿ ਅਭੋਗੇਨ વਾ ਭੁਞ੍ਜਤਿ વਿਸ੍ਸਜ੍ਜੇਤਿ વਾ, ਆਪਤ੍ਤਿ ਦੁਕ੍ਕਟਸ੍ਸ।
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ।
Ayaṃ tattha sāmīcīti ayaṃ tattha anudhammatā.
੬੧੬. ਅਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੇਨ ਪਤ੍ਤੇਨ ਦ੍વਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੇਨ ਪਤ੍ਤੇਨ ਤਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੇਨ ਪਤ੍ਤੇਨ ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ਏਕਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਏਕਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਏਕਬਨ੍ਧਨੇਨ ਪਤ੍ਤੇਨ ਦ੍વਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਏਕਬਨ੍ਧਨੇਨ ਪਤ੍ਤੇਨ ਤਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਏਕਬਨ੍ਧਨੇਨ ਪਤ੍ਤੇਨ ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ਦ੍વਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਦ੍વਿਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ॰… ਦ੍વਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ਤਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ…ਪੇ॰… ਏਕਬਨ੍ਧਨਂ ਪਤ੍ਤਂ…ਪੇ॰… ਦ੍વਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ਚਤੁਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ…ਪੇ॰… ਏਕਬਨ੍ਧਨਂ ਪਤ੍ਤਂ… ਦ੍વਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ਅਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨੋਕਾਸਂ ਪਤ੍ਤਂ…ਪੇ॰… ਦ੍વਿਬਨ੍ਧਨੋਕਾਸਂ ਪਤ੍ਤਂ … ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ਏਕਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍વਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ਦ੍વਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
ਤਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
ਚਤੁਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍વਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ਅਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਬਨ੍ਧਨੋਕਾਸੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ॰… ਦ੍વਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ॰… ਦ੍વਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ਅਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍વਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ॰… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍વਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
੬੧੭. ਅਨਾਪਤ੍ਤਿ ਨਟ੍ਠਪਤ੍ਤਸ੍ਸ, ਭਿਨ੍ਨਪਤ੍ਤਸ੍ਸ, ਞਾਤਕਾਨਂ ਪવਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ।
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ਊਨਪਞ੍ਚਬਨ੍ਧਨਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ।
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੨. ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ • 2. Ūnapañcabandhanasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੨. ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ • 2. Ūnapañcabandhanasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੨. ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ • 2. Ūnapañcabandhanasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੨. ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ • 2. Ūnapañcabandhanasikkhāpadavaṇṇanā
