| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. ஊனபஞ்சப³ந்த⁴னஸிக்கா²பத³வண்ணனா
2. Ūnapañcabandhanasikkhāpadavaṇṇanā
அஸ்ஸாதி இமஸ்ஸ பத்தஸ்ஸ. தேன ஊனபஞ்சப³ந்த⁴னேனாதி தேன ஊனபஞ்சப³ந்த⁴னேன பத்தேன உபலக்கி²தோ ஹுத்வாதி அத்தோ². ஊனபஞ்சப³ந்த⁴னோ ஹி பத்தோ எத்த² லக்க²ணபா⁴வேன க³ஹிதோ. தேனேவாஹ ‘‘இத்த²ம்பூ⁴தஸ்ஸ லக்க²ணே கரணவசன’’ந்தி. தத்த² இத்த²ம்பூ⁴தஸ்ஸாதி கஞ்சி பகாரங் பத்தஸ்ஸ. லக்கீ²யதே அனேனாதி லக்க²ணங், தஸ்மிங் கரணவசனங், ததியாவிப⁴த்தீதி அத்தோ². ‘‘பகாரோ’’தி ச ஸாமஞ்ஞஸ்ஸ பே⁴த³கோ விஸேஸோ வுச்சதி. ததா² ஹி ஊனபஞ்சப³ந்த⁴னேன பத்தேனாதி எத்த² பி⁴க்கு²பா⁴வஸாமஞ்ஞஸ்ஸ ஊனபஞ்சப³ந்த⁴னபத்தபா⁴வோ பகாரோ, தங் பி⁴க்கு² ஆபன்னோ, தஸ்ஸ பத்தோ லக்க²ணங். யதி³ அபரிபுண்ணபஞ்சப³ந்த⁴னோ பத்தோ ஊனபஞ்சப³ந்த⁴னோ நாம ஹோதி, அத² கஸ்மா இமஸ்ஸ பத³பா⁴ஜனியங் அப³ந்த⁴னோபி வுத்தோதி ஆஹ ‘‘தத்தா²’’திஆதி³. தத்த² தத்தா²தி வாக்யோபஞ்ஞாஸே. ப³ந்த⁴னோகாஸே ஸதி வா அஸதி வா ப³ந்த⁴னவிரஹிதோ பத்தோ அப³ந்த⁴னோ, பஞ்சப³ந்த⁴னானங் ஓகாஸோ அஸ்ஸாதி பஞ்சப³ந்த⁴னோகாஸோ. அபத்தோதி பத்தோ நாம ந ஹோதீதி அத்தோ², பாகதிகங் காதுங் அஸமத்தோ²தி வுத்தங் ஹோதி. இத³ஞ்ச அஞ்ஞஸ்ஸ விஞ்ஞாபனே காரணவசனங். தேனாஹ ‘‘தஸ்மா அஞ்ஞங் விஞ்ஞாபேதுங் வட்டதீ’’தி.
Assāti imassa pattassa. Tena ūnapañcabandhanenāti tena ūnapañcabandhanena pattena upalakkhito hutvāti attho. Ūnapañcabandhano hi patto ettha lakkhaṇabhāvena gahito. Tenevāha ‘‘itthambhūtassa lakkhaṇe karaṇavacana’’nti. Tattha itthambhūtassāti kañci pakāraṃ pattassa. Lakkhīyate anenāti lakkhaṇaṃ, tasmiṃ karaṇavacanaṃ, tatiyāvibhattīti attho. ‘‘Pakāro’’ti ca sāmaññassa bhedako viseso vuccati. Tathā hi ūnapañcabandhanena pattenāti ettha bhikkhubhāvasāmaññassa ūnapañcabandhanapattabhāvo pakāro, taṃ bhikkhu āpanno, tassa patto lakkhaṇaṃ. Yadi aparipuṇṇapañcabandhano patto ūnapañcabandhano nāma hoti, atha kasmā imassa padabhājaniyaṃ abandhanopi vuttoti āha ‘‘tatthā’’tiādi. Tattha tatthāti vākyopaññāse. Bandhanokāse sati vā asati vā bandhanavirahito patto abandhano, pañcabandhanānaṃ okāso assāti pañcabandhanokāso. Apattoti patto nāma na hotīti attho, pākatikaṃ kātuṃ asamatthoti vuttaṃ hoti. Idañca aññassa viññāpane kāraṇavacanaṃ. Tenāha ‘‘tasmā aññaṃ viññāpetuṃ vaṭṭatī’’ti.
ப³ந்த⁴னஞ்ச நாமேதங் யஸ்மா ப³ந்த⁴னோகாஸே ஸதி ஹோதி, அஸதி ந ஹோதி, தஸ்மா தஸ்ஸ லக்க²ணங், ப³ந்த⁴னவிதி⁴ஞ்ச த³ஸ்ஸேதுங் ‘‘யஸ்மிங் பனா’’திஆதி³ வுத்தங். முக²வட்டிஸமீபே பன பத்தவேத⁴கேன விஜ்ஜி²யமானே கபாலஸ்ஸ ப³ஹலத்தா பி⁴ஜ்ஜதி, தஸ்மா ஹெட்டா² விஜ்ஜி²தப்³போ³. தேனாஹ ‘‘ஹெட்டி²மபரியந்தே’’திஆதி³. ஸுகு²மங் வா சி²த்³த³ங் கத்வா ப³ந்தி⁴தப்³போ³தி ஸுகு²மே சி²த்³தே³ திபுபட்டாதீ³ஹி பயோஜனங் நத்தி², ஸுத்தங் பக்கி²பித்வாவ அதி⁴ட்டா²தப்³போ³தி அதி⁴ப்பாயோ. ந கேவலங் திபுஸுத்தகாதி³னாவ ப³ந்தி⁴தப்³போ³தி ஆஹ ‘‘பா²ணித’’ந்திஆதி³. பா²ணிதங் ஜா²பெத்வா பாஸாணசுண்ணேனாதி பாஸாணசுண்ணேன ஸத்³தி⁴ங் பா²ணிதங் பசித்வா ததா²பக்கேன பாஸாணசுண்ணேனாதி அத்தோ². நிஸ்ஸஜ்ஜிதப்³போ³தி ‘‘அயங் மே, ப⁴ந்தே, பத்தோ ஊனபஞ்சப³ந்த⁴னேன பத்தேன சேதாபிதோ நிஸ்ஸக்³கி³யோ, இமாஹங் ஸங்க⁴ஸ்ஸ நிஸ்ஸஜ்ஜாமீ’’தி (பாரா॰ 613) நிஸ்ஸஜ்ஜிதப்³போ³. தேனாஹ ‘‘நிஸ்ஸஜ்ஜந்தேனா’’திஆதி³. ஸம்மதேனாதி –
Bandhanañca nāmetaṃ yasmā bandhanokāse sati hoti, asati na hoti, tasmā tassa lakkhaṇaṃ, bandhanavidhiñca dassetuṃ ‘‘yasmiṃ panā’’tiādi vuttaṃ. Mukhavaṭṭisamīpe pana pattavedhakena vijjhiyamāne kapālassa bahalattā bhijjati, tasmā heṭṭhā vijjhitabbo. Tenāha ‘‘heṭṭhimapariyante’’tiādi. Sukhumaṃ vā chiddaṃ katvā bandhitabboti sukhume chidde tipupaṭṭādīhi payojanaṃ natthi, suttaṃ pakkhipitvāva adhiṭṭhātabboti adhippāyo. Na kevalaṃ tipusuttakādināva bandhitabboti āha ‘‘phāṇita’’ntiādi. Phāṇitaṃ jhāpetvā pāsāṇacuṇṇenāti pāsāṇacuṇṇena saddhiṃ phāṇitaṃ pacitvā tathāpakkena pāsāṇacuṇṇenāti attho. Nissajjitabboti ‘‘ayaṃ me, bhante, patto ūnapañcabandhanena pattena cetāpito nissaggiyo, imāhaṃ saṅghassa nissajjāmī’’ti (pārā. 613) nissajjitabbo. Tenāha ‘‘nissajjantenā’’tiādi. Sammatenāti –
‘‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் பத்தக்³கா³ஹாபகங் ஸம்மன்னெய்ய, ஏஸா ஞத்தி . ஸுணாது மே, ப⁴ந்தே, ஸங்கோ⁴, ஸங்கோ⁴ இத்த²ன்னாமங் பி⁴க்கு²ங் பத்தக்³கா³ஹாபகங் ஸம்மன்னதி, யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பத்தக்³கா³ஹாபகஸ்ஸ ஸம்முதி, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய. ஸம்மதோ ஸங்கே⁴ன இத்த²ன்னாமோ பி⁴க்கு² பத்தக்³கா³ஹாபகோ, க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (பாரா॰ 614) –
‘‘Suṇātu me, bhante, saṅgho, yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya, esā ñatti . Suṇātu me, bhante, saṅgho, saṅgho itthannāmaṃ bhikkhuṃ pattaggāhāpakaṃ sammannati, yassāyasmato khamati itthannāmassa bhikkhuno pattaggāhāpakassa sammuti, so tuṇhassa. Yassa nakkhamati, so bhāseyya. Sammato saṅghena itthannāmo bhikkhu pattaggāhāpako, khamati saṅghassa, tasmā tuṇhī, evametaṃ dhārayāmī’’ti (pārā. 614) –
ஏவங் பத³பா⁴ஜனே வுத்தாய ஞத்திது³தியகம்மவாசாய ஸம்மதேன. பத்தஸ்ஸ விஜ்ஜமானகு³ணங் வத்வாதி ‘‘அயங், ப⁴ந்தே, பத்தோ பமாணயுத்தோ ஸுந்த³ரோ தே²ரானுரூபோ’’திஆதி³னா (பாரா॰ அட்ட²॰ 2.615) விஜ்ஜமானானிஸங்ஸங் வத்வா. பத்தபரியந்தோதி பரியந்தே டி²தபத்தோ. அதே³ஸேதி மஞ்சபீட²ச்ச²த்தனாக³த³ந்தகாதி³கே அதே³ஸே. பத்தஸ்ஸ ஹி நிக்கி²பனதே³ஸோ ‘‘அனுஜானாமி, பி⁴க்க²வே, ஆதா⁴ரக’’ந்திஆதி³னா நயேன க²ந்த⁴கே வுத்தோயேவ. அபரிபோ⁴கே³னாதி யாகு³ரந்த⁴னரஜனபசனாதி³னா அயுத்தபரிபோ⁴கே³ன. அந்தராமக்³கே³ பன ப்³யாதி⁴ம்ஹி உப்பன்னே அஞ்ஞஸ்மிங் பா⁴ஜனே அஸதி மத்திகாய லிம்பித்வா யாகு³ங் பசிதுங், உத³கங் வா தாபேதுங் வட்டதி. விஸ்ஸஜ்ஜேதீதி அஞ்ஞஸ்ஸ தே³தி. ஸசே பன ஸத்³தி⁴விஹாரிகோ வா அந்தேவாஸிகோ வா அஞ்ஞங் வரபத்தங் ட²பெத்வா ‘‘அயங் மய்ஹங் ஸாருப்போ, அயங் தே²ரஸ்ஸா’’தி க³ண்ஹாதி, வட்டதி. அஞ்ஞோ வா தங் க³ஹெத்வா அத்தனோ பத்தங் தே³தி, வட்டதி. ‘‘மய்ஹமேவ பத்தங் ஆஹரா’’தி வத்தப்³ப³கிச்சங் நத்தி².
Evaṃ padabhājane vuttāya ñattidutiyakammavācāya sammatena. Pattassa vijjamānaguṇaṃ vatvāti ‘‘ayaṃ, bhante, patto pamāṇayutto sundaro therānurūpo’’tiādinā (pārā. aṭṭha. 2.615) vijjamānānisaṃsaṃ vatvā. Pattapariyantoti pariyante ṭhitapatto. Adeseti mañcapīṭhacchattanāgadantakādike adese. Pattassa hi nikkhipanadeso ‘‘anujānāmi, bhikkhave, ādhāraka’’ntiādinā nayena khandhake vuttoyeva. Aparibhogenāti yāgurandhanarajanapacanādinā ayuttaparibhogena. Antarāmagge pana byādhimhi uppanne aññasmiṃ bhājane asati mattikāya limpitvā yāguṃ pacituṃ, udakaṃ vā tāpetuṃ vaṭṭati. Vissajjetīti aññassa deti. Sace pana saddhivihāriko vā antevāsiko vā aññaṃ varapattaṃ ṭhapetvā ‘‘ayaṃ mayhaṃ sāruppo, ayaṃ therassā’’ti gaṇhāti, vaṭṭati. Añño vā taṃ gahetvā attano pattaṃ deti, vaṭṭati. ‘‘Mayhameva pattaṃ āharā’’ti vattabbakiccaṃ natthi.
ஞாதகப்பவாரிதேதி எத்த² ஸங்க⁴வஸேன பவாரிதட்டா²னே பஞ்சப³ந்த⁴னேனேவ வட்டதி, புக்³க³லவஸேன பன பவாரிதட்டா²னே ஊனபஞ்சப³ந்த⁴னேனாபி. அகதவிஞ்ஞத்தி நாம ‘‘வத³, ப⁴ந்தே, பச்சயேனா’’தி ஏவங் அகதட்டா²னே விஞ்ஞத்தி.
Ñātakappavāriteti ettha saṅghavasena pavāritaṭṭhāne pañcabandhaneneva vaṭṭati, puggalavasena pana pavāritaṭṭhāne ūnapañcabandhanenāpi. Akataviññatti nāma ‘‘vada, bhante, paccayenā’’ti evaṃ akataṭṭhāne viññatti.
ஊனபஞ்சப³ந்த⁴னஸிக்கா²பத³வண்ணனா நிட்டி²தா.
Ūnapañcabandhanasikkhāpadavaṇṇanā niṭṭhitā.
