| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. ஊனபஞ்சப³ந்த⁴னஸிக்கா²பத³வண்ணனா
2. Ūnapañcabandhanasikkhāpadavaṇṇanā
610. து³தியஸிக்கா²பதே³ ஹத்தே²ஸு பிண்டா³ய சரதீதி பாளிபத³ஸ்ஸ ஹத்தே²ஸு லபி⁴தப்³ப³பிண்ட³த்தா²ய சரதீதி அத்தோ² வேதி³தப்³போ³.
610. Dutiyasikkhāpade hatthesu piṇḍāya caratīti pāḷipadassa hatthesu labhitabbapiṇḍatthāya caratīti attho veditabbo.
612-613. ‘‘தஸ்ஸ ஸோ அபத்தோதி வசனதோ ஸோ பத்தோ அதி⁴ட்டா²னம்பி விஜஹதி அபத்தத்தா. அபத்தபா⁴வதோயேவ ஹி ‘பஞ்சப³ந்த⁴னங் பத்தங் சேதாபேதீ’தி பாளியங் ந வுத்த’’ந்தி தீஸுபி க³ண்டி²பதே³ஸு வுத்தங். கேசி பன ‘‘அபத்தோதி இத³ங் ‘அஞ்ஞங் பத்தங் விஞ்ஞாபேதுங் வட்டதீ’தி த³ஸ்ஸனத்த²ங் வுத்தங், ஸோ பன பத்தோ அதி⁴ட்டா²னங் ந விஜஹதீ’’தி வத³ந்தி, தங் யுத்தங் விய தி³ஸ்ஸதி ‘‘யஸ்ஸ பஞ்ச ஏகாயேவ வா த³ஸங்கு³லா, ஸோ ப³த்³தோ⁴பி அப³த்³தோ⁴பி அபத்தோயேவா’’தி வக்க²மானத்தா. ந ஹி முக²வட்டியா பஞ்சஸு டா²னேஸு த்³வங்கு³லமத்தாஹி ராஜீஹி அதி⁴ட்டா²னங் விஜஹதீதி ஸக்கா வத்துங், ஏகாய பன ராஜியா த³ஸங்கு³லாய ஸசே தத்த² வுத்தப்பமாணோ சி²த்³தோ³ பஞ்ஞாயதி, சி²த்³தே³னேவ அதி⁴ட்டா²னவிஜஹனங் ஸியாதி யுத்தங் வத்துங். ப³ந்த⁴னோகாஸே ஸதி அஸதி வா ப³ந்த⁴னவிரஹிதோ பத்தோ அப³ந்த⁴னோதி வுத்தோ, ப³ந்த⁴னோகாஸவிரஹிதோயேவ பன அப³ந்த⁴னோகாஸோதி வுத்தோ.
612-613.‘‘Tassaso apattoti vacanato so patto adhiṭṭhānampi vijahati apattattā. Apattabhāvatoyeva hi ‘pañcabandhanaṃ pattaṃ cetāpetī’ti pāḷiyaṃ na vutta’’nti tīsupi gaṇṭhipadesu vuttaṃ. Keci pana ‘‘apattoti idaṃ ‘aññaṃ pattaṃ viññāpetuṃ vaṭṭatī’ti dassanatthaṃ vuttaṃ, so pana patto adhiṭṭhānaṃ na vijahatī’’ti vadanti, taṃ yuttaṃ viya dissati ‘‘yassa pañca ekāyeva vā dasaṅgulā, so baddhopi abaddhopi apattoyevā’’ti vakkhamānattā. Na hi mukhavaṭṭiyā pañcasu ṭhānesu dvaṅgulamattāhi rājīhi adhiṭṭhānaṃ vijahatīti sakkā vattuṃ, ekāya pana rājiyā dasaṅgulāya sace tattha vuttappamāṇo chiddo paññāyati, chiddeneva adhiṭṭhānavijahanaṃ siyāti yuttaṃ vattuṃ. Bandhanokāse sati asati vā bandhanavirahito patto abandhanoti vutto, bandhanokāsavirahitoyeva pana abandhanokāsoti vutto.
திபுஸுத்தகேன வா ப³ந்தி⁴த்வாதி எத்த² ‘‘ப³ந்தி⁴தப்³போ³’’தி பாடோ² க³ஹேதப்³போ³. புராணபொத்த²கேபி ஹி அயமேவ பாடோ² தி³ஸ்ஸதி. ஸுத்³தே⁴ஹி…பே॰… ந வட்டதீதி இத³ங் உண்ஹபோ⁴ஜனே பக்கி²த்தே விலீயமானத்தா வுத்தங். பா²ணிதங் ஜா²பெத்வா பாஸாணசுண்ணேன ப³ந்தி⁴துங் வட்டதீதி பாஸாணசுண்ணேன ஸத்³தி⁴ங் பா²ணிதங் பசித்வா ததா²பக்கேன பாஸாணசுண்ணேன ப³ந்தி⁴துங் வட்டதி.
Tipusuttakena vā bandhitvāti ettha ‘‘bandhitabbo’’ti pāṭho gahetabbo. Purāṇapotthakepi hi ayameva pāṭho dissati. Suddhehi…pe… na vaṭṭatīti idaṃ uṇhabhojane pakkhitte vilīyamānattā vuttaṃ. Phāṇitaṃ jhāpetvā pāsāṇacuṇṇena bandhituṃ vaṭṭatīti pāsāṇacuṇṇena saddhiṃ phāṇitaṃ pacitvā tathāpakkena pāsāṇacuṇṇena bandhituṃ vaṭṭati.
615. அனுகம்பாய ந க³ண்ஹந்தஸ்ஸ து³க்கடந்தி வுத்தத்தா யஸ்ஸ ஸோ பத்தோ ந ருச்சதி, தஸ்ஸபி அக³ண்ஹந்தஸ்ஸ அனாபத்தி. தேனேவ மாதிகாட்ட²கதா²யங் (கங்கா²॰ அட்ட²॰ ஊனபஞ்சப³ந்த⁴னஸீக்கா²பத³வண்ணனா) வுத்தங் ‘‘ஸசே தே²ரஸ்ஸ பத்தோ ந ருச்சதி, அப்பிச்ச²தாய வா ந க³ண்ஹாதி, வட்டதீ’’தி. பத்தபரியந்தோதி பரியந்தபத்தோ, அவஸானபத்தோதி அத்தோ². ‘‘ஸங்க⁴மஜ்ஜே² பத்தங் கா³ஹாபெந்தேன அலஜ்ஜிங் அகா³ஹாபேதுங் வட்டதீ’’தி வத³ந்தி. ‘‘அனுஜானாமி பி⁴க்க²வே ஆதா⁴ரகந்தி வுத்தத்தா பீடா²தீ³ஸு யத்த² கத்த²சி ஆதா⁴ரங் ட²பெத்வா தத்த² பத்தங் ட²பேதுங் வட்டதி ஆதா⁴ரட²பனோகாஸஸ்ஸ அனியமிதத்தா’’தி வத³ந்தி. அபரிபோ⁴கே³னாதி அயுத்தபரிபோ⁴கே³ன.
615.Anukampāya na gaṇhantassa dukkaṭanti vuttattā yassa so patto na ruccati, tassapi agaṇhantassa anāpatti. Teneva mātikāṭṭhakathāyaṃ (kaṅkhā. aṭṭha. ūnapañcabandhanasīkkhāpadavaṇṇanā) vuttaṃ ‘‘sace therassa patto na ruccati, appicchatāya vā na gaṇhāti, vaṭṭatī’’ti. Pattapariyantoti pariyantapatto, avasānapattoti attho. ‘‘Saṅghamajjhe pattaṃ gāhāpentena alajjiṃ agāhāpetuṃ vaṭṭatī’’ti vadanti. ‘‘Anujānāmi bhikkhave ādhārakanti vuttattā pīṭhādīsu yattha katthaci ādhāraṃ ṭhapetvā tattha pattaṃ ṭhapetuṃ vaṭṭati ādhāraṭhapanokāsassa aniyamitattā’’ti vadanti. Aparibhogenāti ayuttaparibhogena.
616. பாளியங் ‘‘அப³ந்த⁴னேன பத்தேன அப³ந்த⁴னங் பத்தங். ஏகப³ந்த⁴னங் பத்தங்… த்³விப³ந்த⁴னங் பத்தங்… திப³ந்த⁴னங்… சதுப³ந்த⁴னங்… அப³ந்த⁴னோகாஸங்… ஏக… த்³வி… தி… சதுப³ந்த⁴னோகாஸங் பத்தங் சேதாபேதீ’’தி ஏவங் ஏகேகேன பத்தேன த³ஸதா⁴ த³ஸவித⁴ங் பத்தங் சேதாபனவஸேன ஏகனிஸ்ஸக்³கி³யபாசித்தியஸதங் வுத்தங். இமஸ்மிங் ஸிக்கா²பதே³ பமாணயுத்தங் அக்³க³ஹிதகாளவண்ணம்பி பத்தங் விஞ்ஞாபெந்தஸ்ஸ ஆபத்தியேவாதி த³ட்ட²ப்³ப³ங். அதி⁴ட்டா²னுபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, அகதவிஞ்ஞத்தி, தாய ச படிலாபோ⁴தி இமானெத்த² சத்தாரி அங்கா³னி.
616. Pāḷiyaṃ ‘‘abandhanena pattena abandhanaṃ pattaṃ. Ekabandhanaṃ pattaṃ… dvibandhanaṃ pattaṃ… tibandhanaṃ… catubandhanaṃ… abandhanokāsaṃ… eka… dvi… ti… catubandhanokāsaṃ pattaṃ cetāpetī’’ti evaṃ ekekena pattena dasadhā dasavidhaṃ pattaṃ cetāpanavasena ekanissaggiyapācittiyasataṃ vuttaṃ. Imasmiṃ sikkhāpade pamāṇayuttaṃ aggahitakāḷavaṇṇampi pattaṃ viññāpentassa āpattiyevāti daṭṭhabbaṃ. Adhiṭṭhānupagapattassa ūnapañcabandhanatā, attuddesikatā, akataviññatti, tāya ca paṭilābhoti imānettha cattāri aṅgāni.
ஊனபஞ்சப³ந்த⁴னஸிக்கா²பத³வண்ணனா நிட்டி²தா.
Ūnapañcabandhanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. ஊனபஞ்சப³ந்த⁴னஸிக்கா²பத³ங் • 2. Ūnapañcabandhanasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
