| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
2. уунабан̃жаб̣анд̇ханасигкаабад̣̇аван̣н̣анаа
2. Ūnapañcabandhanasikkhāpadavaṇṇanā
ассаад̇и имасса бад̇д̇асса. д̇зна уунабан̃жаб̣анд̇ханзнаад̇и д̇зна уунабан̃жаб̣анд̇ханзна бад̇д̇зна убалагкид̇о худ̇ваад̇и ад̇т̇о. уунабан̃жаб̣анд̇хано хи бад̇д̇о зд̇т̇а лагкан̣абхаавзна г̇ахид̇о. д̇знзвааха ‘‘ид̇т̇амбхууд̇асса лагкан̣з гаран̣аважана’’нд̇и. д̇ад̇т̇а ид̇т̇амбхууд̇ассаад̇и ган̃жи багаарам̣ бад̇д̇асса. лагкийяад̇з анзнаад̇и лагкан̣ам̣, д̇асмим̣ гаран̣аважанам̣, д̇ад̇ияаавибхад̇д̇ийд̇и ад̇т̇о. ‘‘багааро’’д̇и жа сааман̃н̃асса бхзд̣̇аго висзсо вужжад̇и. д̇ат̇аа хи уунабан̃жаб̣анд̇ханзна бад̇д̇знаад̇и зд̇т̇а бхигкубхаавасааман̃н̃асса уунабан̃жаб̣анд̇ханабад̇д̇абхааво багааро, д̇ам̣ бхигку аабанно, д̇асса бад̇д̇о лагкан̣ам̣. яад̣̇и абарибун̣н̣абан̃жаб̣анд̇хано бад̇д̇о уунабан̃жаб̣анд̇хано наама ход̇и, ат̇а гасмаа имасса бад̣̇абхааж̇анияам̣ аб̣анд̇ханоби вуд̇д̇од̇и ааха ‘‘д̇ад̇т̇аа’’д̇иаад̣̇и. д̇ад̇т̇а д̇ад̇т̇аад̇и ваагяобан̃н̃аасз. б̣анд̇ханогаасз сад̇и ваа асад̇и ваа б̣анд̇ханавирахид̇о бад̇д̇о аб̣анд̇хано, бан̃жаб̣анд̇ханаанам̣ огаасо ассаад̇и бан̃жаб̣анд̇ханогаасо. абад̇д̇од̇и бад̇д̇о наама на ход̇ийд̇и ад̇т̇о, баагад̇игам̣ гаад̇ум̣ асамад̇т̇од̇и вуд̇д̇ам̣ ход̇и. ид̣̇ан̃жа ан̃н̃асса вин̃н̃аабанз гааран̣аважанам̣. д̇знааха ‘‘д̇асмаа ан̃н̃ам̣ вин̃н̃аабзд̇ум̣ ваддад̇ий’’д̇и.
Assāti imassa pattassa. Tena ūnapañcabandhanenāti tena ūnapañcabandhanena pattena upalakkhito hutvāti attho. Ūnapañcabandhano hi patto ettha lakkhaṇabhāvena gahito. Tenevāha ‘‘itthambhūtassa lakkhaṇe karaṇavacana’’nti. Tattha itthambhūtassāti kañci pakāraṃ pattassa. Lakkhīyate anenāti lakkhaṇaṃ, tasmiṃ karaṇavacanaṃ, tatiyāvibhattīti attho. ‘‘Pakāro’’ti ca sāmaññassa bhedako viseso vuccati. Tathā hi ūnapañcabandhanena pattenāti ettha bhikkhubhāvasāmaññassa ūnapañcabandhanapattabhāvo pakāro, taṃ bhikkhu āpanno, tassa patto lakkhaṇaṃ. Yadi aparipuṇṇapañcabandhano patto ūnapañcabandhano nāma hoti, atha kasmā imassa padabhājaniyaṃ abandhanopi vuttoti āha ‘‘tatthā’’tiādi. Tattha tatthāti vākyopaññāse. Bandhanokāse sati vā asati vā bandhanavirahito patto abandhano, pañcabandhanānaṃ okāso assāti pañcabandhanokāso. Apattoti patto nāma na hotīti attho, pākatikaṃ kātuṃ asamatthoti vuttaṃ hoti. Idañca aññassa viññāpane kāraṇavacanaṃ. Tenāha ‘‘tasmā aññaṃ viññāpetuṃ vaṭṭatī’’ti.
б̣анд̇ханан̃жа наамзд̇ам̣ яасмаа б̣анд̇ханогаасз сад̇и ход̇и, асад̇и на ход̇и, д̇асмаа д̇асса лагкан̣ам̣, б̣анд̇ханавид̇хин̃жа д̣̇ассзд̇ум̣ ‘‘яасмим̣ банаа’’д̇иаад̣̇и вуд̇д̇ам̣. мукаваддисамийбз бана бад̇д̇авзд̇хагзна виж̇жхияамаанз габааласса б̣ахалад̇д̇аа бхиж̇ж̇ад̇и, д̇асмаа хздтаа виж̇жхид̇аб̣б̣о. д̇знааха ‘‘хздтимабарияанд̇з’’д̇иаад̣̇и. сукумам̣ ваа чид̣̇д̣̇ам̣ гад̇ваа б̣анд̇хид̇аб̣б̣од̇и сукумз чид̣̇д̣̇з д̇ибубаддаад̣̇ийхи баяож̇анам̣ над̇т̇и, суд̇д̇ам̣ багкибид̇ваава ад̇хидтаад̇аб̣б̣од̇и ад̇хиббааяо. на гзвалам̣ д̇ибусуд̇д̇агаад̣̇инаава б̣анд̇хид̇аб̣б̣од̇и ааха ‘‘паан̣ид̇а’’нд̇иаад̣̇и. паан̣ид̇ам̣ жхаабзд̇ваа баасаан̣ажун̣н̣знаад̇и баасаан̣ажун̣н̣зна сад̣̇д̇хим̣ паан̣ид̇ам̣ бажид̇ваа д̇ат̇аабаггзна баасаан̣ажун̣н̣знаад̇и ад̇т̇о. ниссаж̇ж̇ид̇аб̣б̣од̇и ‘‘аяам̣ мз, бханд̇з, бад̇д̇о уунабан̃жаб̣анд̇ханзна бад̇д̇зна жзд̇аабид̇о ниссаг̇г̇ияо, имаахам̣ сан̇гхасса ниссаж̇ж̇аамий’’д̇и (баараа. 613) ниссаж̇ж̇ид̇аб̣б̣о. д̇знааха ‘‘ниссаж̇ж̇анд̇знаа’’д̇иаад̣̇и. саммад̇знаад̇и –
Bandhanañca nāmetaṃ yasmā bandhanokāse sati hoti, asati na hoti, tasmā tassa lakkhaṇaṃ, bandhanavidhiñca dassetuṃ ‘‘yasmiṃ panā’’tiādi vuttaṃ. Mukhavaṭṭisamīpe pana pattavedhakena vijjhiyamāne kapālassa bahalattā bhijjati, tasmā heṭṭhā vijjhitabbo. Tenāha ‘‘heṭṭhimapariyante’’tiādi. Sukhumaṃ vā chiddaṃ katvā bandhitabboti sukhume chidde tipupaṭṭādīhi payojanaṃ natthi, suttaṃ pakkhipitvāva adhiṭṭhātabboti adhippāyo. Na kevalaṃ tipusuttakādināva bandhitabboti āha ‘‘phāṇita’’ntiādi. Phāṇitaṃ jhāpetvā pāsāṇacuṇṇenāti pāsāṇacuṇṇena saddhiṃ phāṇitaṃ pacitvā tathāpakkena pāsāṇacuṇṇenāti attho. Nissajjitabboti ‘‘ayaṃ me, bhante, patto ūnapañcabandhanena pattena cetāpito nissaggiyo, imāhaṃ saṅghassa nissajjāmī’’ti (pārā. 613) nissajjitabbo. Tenāha ‘‘nissajjantenā’’tiādi. Sammatenāti –
‘‘сун̣аад̇у мз, бханд̇з, сан̇гхо, яад̣̇и сан̇гхасса бад̇д̇агаллам̣, сан̇гхо ид̇т̇аннаамам̣ бхигкум̣ бад̇д̇аг̇г̇аахаабагам̣ самманнзяяа, зсаа н̃ад̇д̇и . сун̣аад̇у мз, бханд̇з, сан̇гхо, сан̇гхо ид̇т̇аннаамам̣ бхигкум̣ бад̇д̇аг̇г̇аахаабагам̣ самманнад̇и, яассааяасмад̇о камад̇и ид̇т̇аннаамасса бхигкуно бад̇д̇аг̇г̇аахаабагасса саммуд̇и, со д̇ун̣хасса. яасса нагкамад̇и, со бхаасзяяа. саммад̇о сан̇гхзна ид̇т̇аннаамо бхигку бад̇д̇аг̇г̇аахаабаго, камад̇и сан̇гхасса, д̇асмаа д̇ун̣хий, звамзд̇ам̣ д̇хаараяаамий’’д̇и (баараа. 614) –
‘‘Suṇātu me, bhante, saṅgho, yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya, esā ñatti . Suṇātu me, bhante, saṅgho, saṅgho itthannāmaṃ bhikkhuṃ pattaggāhāpakaṃ sammannati, yassāyasmato khamati itthannāmassa bhikkhuno pattaggāhāpakassa sammuti, so tuṇhassa. Yassa nakkhamati, so bhāseyya. Sammato saṅghena itthannāmo bhikkhu pattaggāhāpako, khamati saṅghassa, tasmā tuṇhī, evametaṃ dhārayāmī’’ti (pārā. 614) –
звам̣ бад̣̇абхааж̇анз вуд̇д̇ааяа н̃ад̇д̇ид̣̇уд̇ияагаммаваажааяа саммад̇зна. бад̇д̇асса виж̇ж̇амаанаг̇ун̣ам̣ вад̇ваад̇и ‘‘аяам̣, бханд̇з, бад̇д̇о бамаан̣аяуд̇д̇о сунд̣̇аро т̇зраануруубо’’д̇иаад̣̇инаа (баараа. адта. 2.615) виж̇ж̇амаанаанисам̣сам̣ вад̇ваа. бад̇д̇абарияанд̇од̇и барияанд̇з тид̇абад̇д̇о. ад̣̇зсзд̇и ман̃жабийтажчад̇д̇анааг̇ад̣̇анд̇агаад̣̇игз ад̣̇зсз. бад̇д̇асса хи нигкибанад̣̇зсо ‘‘ануж̇аанаами, бхигкавз, аад̇хаарага’’нд̇иаад̣̇инаа наязна канд̇хагз вуд̇д̇оязва. абарибхог̇знаад̇и яааг̇уранд̇ханараж̇анабажанаад̣̇инаа аяуд̇д̇абарибхог̇зна. анд̇араамаг̇г̇з бана б̣яаад̇химхи уббаннз ан̃н̃асмим̣ бхааж̇анз асад̇и мад̇д̇игааяа лимбид̇ваа яааг̇ум̣ бажид̇ум̣, уд̣̇агам̣ ваа д̇аабзд̇ум̣ ваддад̇и. виссаж̇ж̇зд̇ийд̇и ан̃н̃асса д̣̇зд̇и. сажз бана сад̣̇д̇хивихаариго ваа анд̇зваасиго ваа ан̃н̃ам̣ варабад̇д̇ам̣ табзд̇ваа ‘‘аяам̣ маяхам̣ сааруббо, аяам̣ т̇зрассаа’’д̇и г̇ан̣хаад̇и, ваддад̇и. ан̃н̃о ваа д̇ам̣ г̇ахзд̇ваа ад̇д̇ано бад̇д̇ам̣ д̣̇зд̇и, ваддад̇и. ‘‘маяхамзва бад̇д̇ам̣ аахараа’’д̇и вад̇д̇аб̣б̣агижжам̣ над̇т̇и.
Evaṃ padabhājane vuttāya ñattidutiyakammavācāya sammatena. Pattassa vijjamānaguṇaṃ vatvāti ‘‘ayaṃ, bhante, patto pamāṇayutto sundaro therānurūpo’’tiādinā (pārā. aṭṭha. 2.615) vijjamānānisaṃsaṃ vatvā. Pattapariyantoti pariyante ṭhitapatto. Adeseti mañcapīṭhacchattanāgadantakādike adese. Pattassa hi nikkhipanadeso ‘‘anujānāmi, bhikkhave, ādhāraka’’ntiādinā nayena khandhake vuttoyeva. Aparibhogenāti yāgurandhanarajanapacanādinā ayuttaparibhogena. Antarāmagge pana byādhimhi uppanne aññasmiṃ bhājane asati mattikāya limpitvā yāguṃ pacituṃ, udakaṃ vā tāpetuṃ vaṭṭati. Vissajjetīti aññassa deti. Sace pana saddhivihāriko vā antevāsiko vā aññaṃ varapattaṃ ṭhapetvā ‘‘ayaṃ mayhaṃ sāruppo, ayaṃ therassā’’ti gaṇhāti, vaṭṭati. Añño vā taṃ gahetvā attano pattaṃ deti, vaṭṭati. ‘‘Mayhameva pattaṃ āharā’’ti vattabbakiccaṃ natthi.
н̃аад̇агаббаваарид̇зд̇и зд̇т̇а сан̇гхавасзна баваарид̇адтаанз бан̃жаб̣анд̇ханзнзва ваддад̇и, буг̇г̇алавасзна бана баваарид̇адтаанз уунабан̃жаб̣анд̇ханзнааби. агад̇авин̃н̃ад̇д̇и наама ‘‘вад̣̇а, бханд̇з, бажжаязнаа’’д̇и звам̣ агад̇адтаанз вин̃н̃ад̇д̇и.
Ñātakappavāriteti ettha saṅghavasena pavāritaṭṭhāne pañcabandhaneneva vaṭṭati, puggalavasena pana pavāritaṭṭhāne ūnapañcabandhanenāpi. Akataviññatti nāma ‘‘vada, bhante, paccayenā’’ti evaṃ akataṭṭhāne viññatti.
уунабан̃жаб̣анд̇ханасигкаабад̣̇аван̣н̣анаа нидтид̇аа.
Ūnapañcabandhanasikkhāpadavaṇṇanā niṭṭhitā.
