| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
5. ஊனவீஸதிவஸ்ஸஸிக்கா²பத³ங்
5. Ūnavīsativassasikkhāpadaṃ
402. பஞ்சமே அங்கு³லியோதி கரஸாகா²யோ. தா ஹி அங்க³ந்தி ஹத்த²தோ பஞ்சதா⁴ பி⁴ஜ்ஜித்வா உக்³க³ச்ச²ந்தீதி அங்கு³லியோதி வுச்சந்தி. லிக²ந்தஸ்ஸ உபாலிஸ்ஸாதி ஸம்ப³ந்தோ⁴. தேனாதி ப³ஹுசிந்தேதப்³ப³காரணேன. அஸ்ஸாதி உபாலிஸ்ஸ. உரோதி ஹத³யங். தஞ்ஹி உஸதி சித்ததாபோ த³ஹதி எத்தா²தி உரோதி வுச்சதி. ரூபஸுத்தந்தி ஹேரஞ்ஞிகானங் ரூபஸுத்தங், யதா² ஹத்தா²சரியானங் ஹத்தி²ஸுத்தந்தி. அக்கீ²னீதி சக்கூ²னி. தானி ஹி அக்க²ந்தி விஸயேஸு ப்³யாபீப⁴வந்தி, ரூபங் வா பஸ்ஸதி இமேஹீதி அக்கீ²னீதி வுச்சந்தி. மகஸேன ஸூசிமுகா²னங் க³ஹிதத்தா ட³ங்ஸேன பிங்க³லமக்கி²காயோவ க³ஹேதப்³பா³தி ஆஹ ‘‘ட³ங்ஸாதி பிங்க³லமக்கி²காயோ’’தி. பிங்க³லமக்கி²காயோ ஹி ட³ங்ஸனட்டே²ன கா²த³னட்டே²ன ட³ங்ஸாதி வுச்சந்தி. து³க்கரோ க²மோ ஏதாஸந்தி து³க்கா²தி த³ஸ்ஸெந்தோ ஆஹ ‘‘து³க்க²மான’’ந்தி. வேத³னானந்தி ஸம்ப³ந்தோ⁴. அஸாதஸ்ஸ காரணங் த³ஸ்ஸேதுங் வுத்தங் ‘‘அமது⁴ரான’’ந்தி. இமினா அமது⁴ரத்தா ந ஸாதி³தப்³பா³தி அஸாதாதி அத்த²ங் த³ஸ்ஸேதி. பாணஸத்³த³ஜீவிதஸத்³தா³னங் பரியாயபா⁴வங் த³ஸ்ஸேதுங் வுத்தங் ‘‘ஜீவிதஹரான’’ந்தி. பாணங் ஹரந்தி அபனெந்தீதி பாணஹரா, தாஸங் வேத³னானந்தி ஸம்ப³ந்தோ⁴.
402. Pañcame aṅguliyoti karasākhāyo. Tā hi aṅganti hatthato pañcadhā bhijjitvā uggacchantīti aṅguliyoti vuccanti. Likhantassa upālissāti sambandho. Tenāti bahucintetabbakāraṇena. Assāti upālissa. Uroti hadayaṃ. Tañhi usati cittatāpo dahati etthāti uroti vuccati. Rūpasuttanti heraññikānaṃ rūpasuttaṃ, yathā hatthācariyānaṃ hatthisuttanti. Akkhīnīti cakkhūni. Tāni hi akkhanti visayesu byāpībhavanti, rūpaṃ vā passati imehīti akkhīnīti vuccanti. Makasena sūcimukhānaṃ gahitattā ḍaṃsena piṅgalamakkhikāyova gahetabbāti āha ‘‘ḍaṃsāti piṅgalamakkhikāyo’’ti. Piṅgalamakkhikāyo hi ḍaṃsanaṭṭhena khādanaṭṭhena ḍaṃsāti vuccanti. Dukkaro khamo etāsanti dukkhāti dassento āha ‘‘dukkhamāna’’nti. Vedanānanti sambandho. Asātassa kāraṇaṃ dassetuṃ vuttaṃ ‘‘amadhurāna’’nti. Iminā amadhurattā na sāditabbāti asātāti atthaṃ dasseti. Pāṇasaddajīvitasaddānaṃ pariyāyabhāvaṃ dassetuṃ vuttaṃ ‘‘jīvitaharāna’’nti. Pāṇaṃ haranti apanentīti pāṇaharā, tāsaṃ vedanānanti sambandho.
404. விஜாயனகாலதோ பட்டா²ய பரிபுண்ணவீஸதிவஸ்ஸோ ந க³ஹேதப்³போ³, க³ப்³ப⁴க³ஹணகாலதோ பன பட்டா²யாதி த³ஸ்ஸெந்தோ ஆஹ ‘‘படிஸந்தி⁴க்³க³ஹணதோ பட்டா²யா’’தி. க³ப்³பே⁴ ஸயிதகாலேன ஸத்³தி⁴ங் வீஸதிமங் வஸ்ஸங் பரிபுண்ணமஸ்ஸாதி க³ப்³ப⁴வீஸோ புக்³க³லோ. ஹீதி ஸச்சங். யதா²ஹாதி யேனாகாரேன ஸங்க்²யங் க³ச்ச²தி, தேனாகாரேன ப⁴க³வா ஆஹாதி யோஜனா. அத² வா யதா² கிங் வசனங் ப⁴க³வா ஆஹாதி யோஜனா.
404. Vijāyanakālato paṭṭhāya paripuṇṇavīsativasso na gahetabbo, gabbhagahaṇakālato pana paṭṭhāyāti dassento āha ‘‘paṭisandhiggahaṇato paṭṭhāyā’’ti. Gabbhe sayitakālena saddhiṃ vīsatimaṃ vassaṃ paripuṇṇamassāti gabbhavīso puggalo. Hīti saccaṃ. Yathāhāti yenākārena saṅkhyaṃ gacchati, tenākārena bhagavā āhāti yojanā. Atha vā yathā kiṃ vacanaṃ bhagavā āhāti yojanā.
க³ப்³ப⁴வீஸோ ஹுத்வா உபஸம்பன்னோதி ஸம்ப³ந்தோ⁴. அம்ஹீதி அஸ்மி. நுஸத்³தோ³ பரிவிதக்கத்தே² நிபாதோ. யந்தி யாதி³ஸங் பட²மங் சித்தந்தி ஸம்ப³ந்தோ⁴. இமினா படிஸந்தி⁴சித்தங் த³ஸ்ஸேதி. ‘‘பட²மங் விஞ்ஞாண’’ந்தி தஸ்ஸேவ வேவசனங். தந்தி பட²மங் சித்தங் பட²மங் விஞ்ஞாணங். அஸ்ஸாதி ஸத்தஸ்ஸ. ஸாவ ஜாதீதி ஸா ஏவ படிஸந்தி⁴, க³ப்³போ⁴ நாம ஹோதீதி ஸம்ப³ந்தோ⁴.
Gabbhavīso hutvā upasampannoti sambandho. Amhīti asmi. Nusaddo parivitakkatthe nipāto. Yanti yādisaṃ paṭhamaṃ cittanti sambandho. Iminā paṭisandhicittaṃ dasseti. ‘‘Paṭhamaṃ viññāṇa’’nti tasseva vevacanaṃ. Tanti paṭhamaṃ cittaṃ paṭhamaṃ viññāṇaṃ. Assāti sattassa. Sāva jātīti sā eva paṭisandhi, gabbho nāma hotīti sambandho.
தத்தா²தி பாளியங், வினிச்ச²யோ ஏவங் வேதி³தப்³போ³தி யோஜனா. யோதி புக்³க³லோ. மஹாபவாரணாயாதி அஸ்ஸயுஜபுண்ணமியங். ஸா ஹி பூஜிதபவாரணத்தா மஹாபவாரணாதி வுச்சதி. ததோதி பவாரணாய ஜாதகாலதோ. தந்தி மஹாபவாரணங். பாடிபதே³ சாதி எத்த² சஸத்³தோ³ அனியமவிகப்பத்தோ², பவாரணதி³வஸபாடிபத³தி³வஸேஸு அஞ்ஞதரஸ்மிங் தி³வஸே உபஸம்பாதே³தப்³போ³தி அத்தோ². ஹாயனவட்³ட⁴னந்தி குச்சி²ம்ஹி வஸிதமாஸேஸு அதி⁴கேஸு ஹாயனஞ்ச ஊனேஸு வட்³டு⁴னஞ்ச வேதி³தப்³ப³ங்.
Tatthāti pāḷiyaṃ, vinicchayo evaṃ veditabboti yojanā. Yoti puggalo. Mahāpavāraṇāyāti assayujapuṇṇamiyaṃ. Sā hi pūjitapavāraṇattā mahāpavāraṇāti vuccati. Tatoti pavāraṇāya jātakālato. Tanti mahāpavāraṇaṃ. Pāṭipade cāti ettha casaddo aniyamavikappattho, pavāraṇadivasapāṭipadadivasesu aññatarasmiṃ divase upasampādetabboti attho. Hāyanavaḍḍhananti kucchimhi vasitamāsesu adhikesu hāyanañca ūnesu vaḍḍhunañca veditabbaṃ.
போராணகத்தே²ரா பன உபஸம்பாதெ³ந்தீதி ஸம்ப³ந்தோ⁴. ஏகூனவீஸதிவஸ்ஸந்தி அனந்தரே வுத்தங் ஏகூனவீஸதிவஸ்ஸங். நிக்க²மனீயோதி ஸாவணமாஸோ. ஸோ ஹி அந்தோவீதி²தோ பா³ஹிரவீதி²ங் நிக்க²மதி ஸூரியோ அஸ்மிந்தி ‘‘நிக்க²மனீயோ’’தி வுச்சதி. பாடிபத³தி³வஸேதி பச்சி²மிகாய வஸ்ஸூபக³மனதி³வஸே. தங் உபஸம்பாத³னங். கஸ்மாதி புச்சா². எத்த² ட²த்வா பரிஹாரோ வுச்சதே மயாதி யோஜனா. வீஸதியா வஸ்ஸேஸூதி உபஸம்பன்னபுக்³க³லஸ்ஸ வீஸதியா வஸ்ஸேஸு. திங்ஸரத்திதி³வஸ்ஸ ஏகமாஸத்தா ‘‘சத்தாரோ மாஸா பரிஹாயந்தீ’’தி வுத்தங். உக்கட்³ட⁴ந்தீதி ஏகஸ்ஸ அதி⁴கமாஸஸ்ஸ நாஸனத்தா²ய வஸ்ஸங் உபரி கட்³ட⁴ந்தி. ததோதி ச²மாஸதோ அபனெத்வாதி ஸம்ப³ந்தோ⁴. எத்தா²தி ‘‘ஏகூனவீஸதிவஸ்ஸ’’ந்திஆதி³வசனே. பன-ஸத்³தோ³ ஹிஸத்³த³த்தோ², ஸச்சந்தி அத்தோ². யோதி புக்³க³லோ. தஸ்மாதி யஸ்மா க³ப்³ப⁴மாஸானம்பி க³ணனூபக³த்தா க³ஹெத்வா உபஸம்பாதெ³ந்தி, தஸ்மா ச² மாஸே வஸித்வாதி ஸம்ப³ந்தோ⁴. அட்ட² மாஸே வஸித்வா ஜாதோபி ந ஜீவதீதி ஸுத்தந்தஅட்ட²கதா²ஸு (தீ³॰ நி॰ அட்ட²॰ 2.24-25; ம॰ நி॰ அட்ட²॰ 3.205) வுத்தங்.
Porāṇakattherā pana upasampādentīti sambandho. Ekūnavīsativassanti anantare vuttaṃ ekūnavīsativassaṃ. Nikkhamanīyoti sāvaṇamāso. So hi antovīthito bāhiravīthiṃ nikkhamati sūriyo asminti ‘‘nikkhamanīyo’’ti vuccati. Pāṭipadadivaseti pacchimikāya vassūpagamanadivase. Taṃ upasampādanaṃ. Kasmāti pucchā. Ettha ṭhatvā parihāro vuccate mayāti yojanā. Vīsatiyā vassesūti upasampannapuggalassa vīsatiyā vassesu. Tiṃsarattidivassa ekamāsattā ‘‘cattāro māsā parihāyantī’’ti vuttaṃ. Ukkaḍḍhantīti ekassa adhikamāsassa nāsanatthāya vassaṃ upari kaḍḍhanti. Tatoti chamāsato apanetvāti sambandho. Etthāti ‘‘ekūnavīsativassa’’ntiādivacane. Pana-saddo hisaddattho, saccanti attho. Yoti puggalo. Tasmāti yasmā gabbhamāsānampi gaṇanūpagattā gahetvā upasampādenti, tasmā cha māse vasitvāti sambandho. Aṭṭha māse vasitvā jātopi na jīvatīti suttantaaṭṭhakathāsu (dī. ni. aṭṭha. 2.24-25; ma. ni. aṭṭha. 3.205) vuttaṃ.
406. த³ஸவஸ்ஸச்சயேனாதி உபஸம்பத³தோ த³ஸவஸ்ஸாதிக்கமேன. உபஸம்பாதே³தீதி உபஜ்ஜா²யோ வா கம்மவாசாசரியோ வா ஹுத்வா உபஸம்பாதே³தி. தந்தி உபஜ்ஜா²சரியபூ⁴தங் அனுபஸம்பன்னபுக்³க³லங். கம்மவாசாசரியோ ஹுத்வா உபஸம்பாதெ³ந்தோ தங் முஞ்சித்வா ஸசே அஞ்ஞோபி கம்மவாசாசரியோ அத்தி², ஸூபஸம்பன்னோ. ஸோவ ஸசே கம்மவாசங் ஸாவேதி, நுபஸம்பன்னோ. ஞத்வா பன புன அனுபஸம்பாதெ³ந்தே ஸக்³க³ந்தராயோபி மக்³க³ந்தராயோபி ஹோதியேவாதி த³ட்ட²ப்³ப³ந்தி. பஞ்சமங்.
406.Dasavassaccayenāti upasampadato dasavassātikkamena. Upasampādetīti upajjhāyo vā kammavācācariyo vā hutvā upasampādeti. Tanti upajjhācariyabhūtaṃ anupasampannapuggalaṃ. Kammavācācariyo hutvā upasampādento taṃ muñcitvā sace aññopi kammavācācariyo atthi, sūpasampanno. Sova sace kammavācaṃ sāveti, nupasampanno. Ñatvā pana puna anupasampādente saggantarāyopi maggantarāyopi hotiyevāti daṭṭhabbanti. Pañcamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ஸப்பாணகவக்³கோ³ • 7. Sappāṇakavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. ஊனவீஸதிவஸ்ஸஸிக்கா²பத³வண்ணனா • 5. Ūnavīsativassasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. ஊனவீஸதிவஸ்ஸஸிக்கா²பத³வண்ணனா • 5. Ūnavīsativassasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. ஊனவீஸதிவஸ்ஸஸிக்கா²பத³வண்ணனா • 5. Ūnavīsativassasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. ஊனவீஸதிவஸ்ஸஸிக்கா²பத³வண்ணனா • 5. Ūnavīsativassasikkhāpadavaṇṇanā
