| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၅. ဦနဝီသတိဝသ္သသိက္ခာပဒဝဏ္ဏနာ
5. Ūnavīsativassasikkhāpadavaṇṇanā
၄၀၂. ပဉ္စမေ ရူပသိပ္ပန္တိ ဟေရညိကသိပ္ပံ။ ဂဗ္ဘေ သယိတကာလေန သဒ္ဓိံ ဝီသတိမံ ဝသ္သံ ပရိပုဏ္ဏမသ္သာတိ ဂဗ္ဘဝီသော။
402. Pañcame rūpasippanti heraññikasippaṃ. Gabbhe sayitakālena saddhiṃ vīsatimaṃ vassaṃ paripuṇṇamassāti gabbhavīso.
၄၀၄. နိက္ခမနီယပုဏ္ဏမာသီတိ သာဝဏမာသသ္သ ပုဏ္ဏမိယာ အာသာဠ္ဟီပုဏ္ဏမိယာ အနန္တရပုဏ္ဏမီ။ ပာဋိပဒဒိဝသေတိ ပစ္ဆိမိကာယ ဝသ္သူပနာယိကာယ။ ဒ္ဝာဒသ မာသေ မာတု ကုစ္ဆိသ္မိံ ဝသိတ္ဝာ မဟာပဝာရဏာယ ဇာတံ ဥပသမ္ပာဒေန္တီတိ အတ္ထော။ ‘‘တိံသ ရတ္တိန္ဒိဝော မာသော, ဒ္ဝာဒသမာသိကော သံဝစ္ဆရော’’တိ (အ. နိ. ၃.၇၁; ၈.၄၃; ဝိဘ. ၁၀၂၃) ဝစနတော ‘‘စတ္တာရော မာသာ ပရိဟာယန္တီ’’တိ ဝုတ္တံ။ ဝသ္သံ ဥက္ကဍ္ဎန္တီတိ ဝသ္သံ ဥဒ္ဓံ ကဍ္ဎန္တိ, ‘‘ဧကမာသံ အဓိကမာသော’’တိ ဆဍ္ဍေတ္ဝာ ဝသ္သံ ဥပဂစ္ဆန္တီတိ အတ္ထော။ တသ္မာ တတိယော တတိယော သံဝစ္ဆရော တေရသမာသိကော ဟောတိ။ တေ ဒ္ဝေ မာသေ ဂဟေတ္ဝာတိ နိက္ခမနီယပုဏ္ဏမာသတော ယာဝ ဇာတဒိဝသဘူတာ မဟာပဝာရဏာ။ တာဝ ယေ ဒ္ဝေ မာသာ အနာဂတာ, တေသံ အတ္ထာယ အဓိကမာသတော လဒ္ဓေ ဒ္ဝေ မာသေ ဂဟေတ္ဝာ။ တေနာဟ ‘‘ယော ပဝာရေတ္ဝာ ဝီသတိဝသ္သော ဘဝိသ္သတီ’’တိအာဒိ။ ‘‘နိက္ကင္ခာ ဟုတ္ဝာ’’တိ ဣဒံ အဋ္ဌာရသန္နံ ဝသ္သာနံ ဧကအဓိကမာသေ ဂဟေတ္ဝာ တတော ဝီသတိယာ ဝသ္သေသုပိ စာတုဒ္ဒသီအတ္ထာယ စတုန္နံ မာသာနံ ပရိဟာပနေန သဗ္ဗဒာ ပရိပုဏ္ဏဝီသတိဝသ္သတံ သန္ဓာယ ဝုတ္တံ။ ပဝာရေတ္ဝာ ဝီသတိဝသ္သော ဘဝိသ္သတီတိ မဟာပဝာရဏာဒိဝသေ အတိက္ကန္တေ ဂဗ္ဘဝသ္သေန သဟ ဝီသတိဝသ္သော ဘဝိသ္သတီတိ အတ္ထော။ တသ္မာတိ ယသ္မာ ဂဗ္ဘမာသာပိ ဂဏနူပဂာ ဟောန္တိ, တသ္မာ။ ဧကဝီသတိဝသ္သောတိ ဇာတိယာ ဝီသတိဝသ္သံ သန္ဓာယ ဝုတ္တံ။
404.Nikkhamanīyapuṇṇamāsīti sāvaṇamāsassa puṇṇamiyā āsāḷhīpuṇṇamiyā anantarapuṇṇamī. Pāṭipadadivaseti pacchimikāya vassūpanāyikāya. Dvādasa māse mātu kucchismiṃ vasitvā mahāpavāraṇāya jātaṃ upasampādentīti attho. ‘‘Tiṃsa rattindivo māso, dvādasamāsiko saṃvaccharo’’ti (a. ni. 3.71; 8.43; vibha. 1023) vacanato ‘‘cattāro māsā parihāyantī’’ti vuttaṃ. Vassaṃ ukkaḍḍhantīti vassaṃ uddhaṃ kaḍḍhanti, ‘‘ekamāsaṃ adhikamāso’’ti chaḍḍetvā vassaṃ upagacchantīti attho. Tasmā tatiyo tatiyo saṃvaccharo terasamāsiko hoti. Te dve māse gahetvāti nikkhamanīyapuṇṇamāsato yāva jātadivasabhūtā mahāpavāraṇā. Tāva ye dve māsā anāgatā, tesaṃ atthāya adhikamāsato laddhe dve māse gahetvā. Tenāha ‘‘yo pavāretvā vīsativasso bhavissatī’’tiādi. ‘‘Nikkaṅkhā hutvā’’ti idaṃ aṭṭhārasannaṃ vassānaṃ ekaadhikamāse gahetvā tato vīsatiyā vassesupi cātuddasīatthāya catunnaṃ māsānaṃ parihāpanena sabbadā paripuṇṇavīsativassataṃ sandhāya vuttaṃ. Pavāretvā vīsativasso bhavissatīti mahāpavāraṇādivase atikkante gabbhavassena saha vīsativasso bhavissatīti attho. Tasmāti yasmā gabbhamāsāpi gaṇanūpagā honti, tasmā. Ekavīsativassoti jātiyā vīsativassaṃ sandhāya vuttaṃ.
၄၀၆. အညံ ဥပသမ္ပာဒေတီတိ ဥပဇ္ဈာယော, အာစရိယော ဝာ ဟုတ္ဝာ ဥပသမ္ပာဒေတိ။ သောပီတိ ဥပသမ္ပာဒေန္တောပိ အနုပသမ္ပန္နော။ ဦနဝီသတိဝသ္သတာ, တံ ဉတ္ဝာ ဥပဇ္ဈာယေန ဟုတ္ဝာ ဥပသမ္ပာဒနန္တိ ဒ္ဝေ အင္ဂာနိ။
406.Aññaṃ upasampādetīti upajjhāyo, ācariyo vā hutvā upasampādeti. Sopīti upasampādentopi anupasampanno. Ūnavīsativassatā, taṃ ñatvā upajjhāyena hutvā upasampādananti dve aṅgāni.
ဦနဝီသတိဝသ္သသိက္ခာပဒဝဏ္ဏနာ နိဋ္ဌိတာ။
Ūnavīsativassasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၇. သပ္ပာဏကဝဂ္ဂော • 7. Sappāṇakavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၅. ဦနဝီသတိဝသ္သသိက္ခာပဒဝဏ္ဏနာ • 5. Ūnavīsativassasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၅. ဦနဝီသတိဝသ္သသိက္ခာပဒဝဏ္ဏနာ • 5. Ūnavīsativassasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၅. ဦနဝီသတိဝသ္သသိက္ခာပဒဝဏ္ဏနာ • 5. Ūnavīsativassasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅. ဦနဝီသတိဝသ္သသိက္ခာပဒံ • 5. Ūnavīsativassasikkhāpadaṃ
