| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
2. ун̣н̣аабхаб̣раахман̣асуд̇д̇ам̣
2. Uṇṇābhabrāhmaṇasuttaṃ
512. саавад̇т̇инид̣̇аанам̣. ат̇а ко ун̣н̣аабхо б̣раахман̣о язна бхаг̇аваа д̇знубасан̇гами; убасан̇гамид̇ваа бхаг̇авад̇аа сад̣̇д̇хим̣ саммод̣̇и. саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ нисийд̣̇и. згаманд̇ам̣ нисинно ко ун̣н̣аабхо б̣раахман̣о бхаг̇аванд̇ам̣ зд̇ад̣̇авожа –
512. Sāvatthinidānaṃ. Atha kho uṇṇābho brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uṇṇābho brāhmaṇo bhagavantaṃ etadavoca –
‘‘бан̃жимаани, бхо г̇од̇ама, инд̣̇рияаани наанаависаяаани наанааг̇ожараани, на ан̃н̃аман̃н̃асса г̇ожарависаяам̣ бажжанубхонд̇и. гад̇амаани бан̃жа? жагкунд̣̇рияам̣, сод̇инд̣̇рияам̣, гхаанинд̣̇рияам̣, ж̇ивхинд̣̇рияам̣, гааяинд̣̇рияам̣ . имзсам̣ ну ко, бхо г̇од̇ама, бан̃жаннам̣ инд̣̇рияаанам̣ наанаависаяаанам̣ наанааг̇ожараанам̣ на ан̃н̃аман̃н̃асса г̇ожарависаяам̣ бажжанубхонд̇аанам̣ гим̣ бадисаран̣ам̣, го жа нзсам̣ г̇ожарависаяам̣ бажжанубход̇ий’’д̇и?
‘‘Pañcimāni, bho gotama, indriyāni nānāvisayāni nānāgocarāni, na aññamaññassa gocaravisayaṃ paccanubhonti. Katamāni pañca? Cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ . Imesaṃ nu kho, bho gotama, pañcannaṃ indriyānaṃ nānāvisayānaṃ nānāgocarānaṃ na aññamaññassa gocaravisayaṃ paccanubhontānaṃ kiṃ paṭisaraṇaṃ, ko ca nesaṃ gocaravisayaṃ paccanubhotī’’ti?
‘‘бан̃жимаани, б̣раахман̣а, инд̣̇рияаани наанаависаяаани наанааг̇ожараани на ан̃н̃аман̃н̃асса г̇ожарависаяам̣ бажжанубхонд̇и. гад̇амаани бан̃жа? жагкунд̣̇рияам̣, сод̇инд̣̇рияам̣ , гхаанинд̣̇рияам̣, ж̇ивхинд̣̇рияам̣, гааяинд̣̇рияам̣. имзсам̣ ко, б̣раахман̣а, бан̃жаннам̣ инд̣̇рияаанам̣ наанаависаяаанам̣ наанааг̇ожараанам̣ на ан̃н̃аман̃н̃асса г̇ожарависаяам̣ бажжанубхонд̇аанам̣ мано бадисаран̣ам̣, манова нзсам̣ г̇ожарависаяам̣ бажжанубход̇ий’’д̇и.
‘‘Pañcimāni, brāhmaṇa, indriyāni nānāvisayāni nānāgocarāni na aññamaññassa gocaravisayaṃ paccanubhonti. Katamāni pañca? Cakkhundriyaṃ, sotindriyaṃ , ghānindriyaṃ, jivhindriyaṃ, kāyindriyaṃ. Imesaṃ kho, brāhmaṇa, pañcannaṃ indriyānaṃ nānāvisayānaṃ nānāgocarānaṃ na aññamaññassa gocaravisayaṃ paccanubhontānaṃ mano paṭisaraṇaṃ, manova nesaṃ gocaravisayaṃ paccanubhotī’’ti.
‘‘манасса бана, бхо г̇од̇ама, гим̣ бадисаран̣а’’нд̇и? ‘‘манасса ко, б̣раахман̣а, сад̇и бадисаран̣а’’нд̇и. ‘‘сад̇ияаа бана, бхо г̇од̇ама, гим̣ бадисаран̣а’’нд̇и? ‘‘сад̇ияаа ко, б̣раахман̣а, вимуд̇д̇и бадисаран̣а’’нд̇и. ‘‘вимуд̇д̇ияаа бана, бхо г̇од̇ама, гим̣ бадисаран̣а’’нд̇и? ‘‘вимуд̇д̇ияаа ко, б̣раахман̣а, ниб̣б̣аанам̣ бадисаран̣а’’нд̇и. ‘‘ниб̣б̣аанасса бана, бхо г̇од̇ама, гим̣ бадисаран̣а’’нд̇и? ‘‘ажжаяааси 1, б̣раахман̣а, бан̃хам̣, наасагки бан̃хасса барияанд̇ам̣ г̇ахзд̇ум̣. ниб̣б̣ааног̇ад̇хан̃хи, б̣раахман̣а, б̣рахмажарияам̣ вуссад̇и ниб̣б̣аанабарааяан̣ам̣ ниб̣б̣аанабарияосаана’’нд̇и.
‘‘Manassa pana, bho gotama, kiṃ paṭisaraṇa’’nti? ‘‘Manassa kho, brāhmaṇa, sati paṭisaraṇa’’nti. ‘‘Satiyā pana, bho gotama, kiṃ paṭisaraṇa’’nti? ‘‘Satiyā kho, brāhmaṇa, vimutti paṭisaraṇa’’nti. ‘‘Vimuttiyā pana, bho gotama, kiṃ paṭisaraṇa’’nti? ‘‘Vimuttiyā kho, brāhmaṇa, nibbānaṃ paṭisaraṇa’’nti. ‘‘Nibbānassa pana, bho gotama, kiṃ paṭisaraṇa’’nti? ‘‘Accayāsi 2, brāhmaṇa, pañhaṃ, nāsakkhi pañhassa pariyantaṃ gahetuṃ. Nibbānogadhañhi, brāhmaṇa, brahmacariyaṃ vussati nibbānaparāyaṇaṃ nibbānapariyosāna’’nti.
ат̇а ко ун̣н̣аабхо б̣раахман̣о бхаг̇авад̇о бхаасид̇ам̣ абхинанд̣̇ид̇ваа анумод̣̇ид̇ваа удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаами.
Atha kho uṇṇābho brāhmaṇo bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
ат̇а ко бхаг̇аваа ажирабагганд̇з ун̣н̣аабхз б̣раахман̣з бхигкуу ааманд̇зси – ‘‘сзяяат̇ааби, бхигкавз, гуудааг̇аарз ваа гуудааг̇аарасаалааяам̣ ваа 3 баажийнаваад̇абаанаа суурияз уг̇г̇ажчанд̇з ваад̇абаанзна расми 4 бависид̇ваа гваасса 5 бад̇идтид̇аа’’д̇и? ‘‘бажчимааяам̣, бханд̇з, бхид̇д̇ияа’’нд̇и. ‘‘звамзва ко, бхигкавз, ун̣н̣аабхасса б̣раахман̣асса д̇ат̇ааг̇ад̇з сад̣̇д̇хаа нивидтаа муулаж̇аад̇аа бад̇идтид̇аа д̣̇ал̣хаа асам̣хаарияаа саман̣зна ваа б̣раахман̣зна ваа д̣̇звзна ваа маарзна ваа б̣рахмунаа ваа гзнажи ваа логасмим̣. имамхи жз, бхигкавз, самаяз ун̣н̣аабхо б̣раахман̣о гаалан̇гарзяяа, над̇т̇и сам̣яож̇анам̣ язна сам̣яож̇анзна сам̣яуд̇д̇о ун̣н̣аабхо б̣раахман̣о буна имам̣ логам̣ ааг̇ажчзяяаа’’д̇и. д̣̇уд̇ияам̣.
Atha kho bhagavā acirapakkante uṇṇābhe brāhmaṇe bhikkhū āmantesi – ‘‘seyyathāpi, bhikkhave, kūṭāgāre vā kūṭāgārasālāyaṃ vā 6 pācīnavātapānā sūriye uggacchante vātapānena rasmi 7 pavisitvā kvāssa 8 patiṭṭhitā’’ti? ‘‘Pacchimāyaṃ, bhante, bhittiya’’nti. ‘‘Evameva kho, bhikkhave, uṇṇābhassa brāhmaṇassa tathāgate saddhā niviṭṭhā mūlajātā patiṭṭhitā daḷhā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Imamhi ce, bhikkhave, samaye uṇṇābho brāhmaṇo kālaṅkareyya, natthi saṃyojanaṃ yena saṃyojanena saṃyutto uṇṇābho brāhmaṇo puna imaṃ lokaṃ āgaccheyyā’’ti. Dutiyaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. ун̣н̣аабхаб̣раахман̣асуд̇д̇аван̣н̣анаа • 2. Uṇṇābhabrāhmaṇasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 2. ун̣н̣аабхаб̣раахман̣асуд̇д̇аван̣н̣анаа • 2. Uṇṇābhabrāhmaṇasuttavaṇṇanā
