| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. උණ්‌ණාභබ්‍රාහ්‌මණසුත්‌තං
2. Uṇṇābhabrāhmaṇasuttaṃ
512. සාවත්‌ථිනිදානං. අථ ඛො උණ්‌ණාභො බ්‍රාහ්‌මණො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො උණ්‌ණාභො බ්‍රාහ්‌මණො භගවන්‌තං එතදවොච –
512. Sāvatthinidānaṃ. Atha kho uṇṇābho brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uṇṇābho brāhmaṇo bhagavantaṃ etadavoca –
‘‘පඤ්‌චිමානි, භො ගොතම, ඉන්‌ද්‍රියානි නානාවිසයානි නානාගොචරානි, න අඤ්‌ඤමඤ්‌ඤස්‌ස ගොචරවිසයං පච්‌චනුභොන්‌ති. කතමානි පඤ්‌ච? චක්‌ඛුන්‌ද්‍රියං, සොතින්‌ද්‍රියං, ඝානින්‌ද්‍රියං, ජිව්‌හින්‌ද්‍රියං, කායින්‌ද්‍රියං . ඉමෙසං නු ඛො, භො ගොතම, පඤ්‌චන්‌නං ඉන්‌ද්‍රියානං නානාවිසයානං නානාගොචරානං න අඤ්‌ඤමඤ්‌ඤස්‌ස ගොචරවිසයං පච්‌චනුභොන්‌තානං කිං පටිසරණං, කො ච නෙසං ගොචරවිසයං පච්‌චනුභොතී’’ති?
‘‘Pañcimāni, bho gotama, indriyāni nānāvisayāni nānāgocarāni, na aññamaññassa gocaravisayaṃ paccanubhonti. Katamāni pañca? Cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ . Imesaṃ nu kho, bho gotama, pañcannaṃ indriyānaṃ nānāvisayānaṃ nānāgocarānaṃ na aññamaññassa gocaravisayaṃ paccanubhontānaṃ kiṃ paṭisaraṇaṃ, ko ca nesaṃ gocaravisayaṃ paccanubhotī’’ti?
‘‘පඤ්‌චිමානි, බ්‍රාහ්‌මණ, ඉන්‌ද්‍රියානි නානාවිසයානි නානාගොචරානි න අඤ්‌ඤමඤ්‌ඤස්‌ස ගොචරවිසයං පච්‌චනුභොන්‌ති. කතමානි පඤ්‌ච? චක්‌ඛුන්‌ද්‍රියං, සොතින්‌ද්‍රියං , ඝානින්‌ද්‍රියං, ජිව්‌හින්‌ද්‍රියං, කායින්‌ද්‍රියං. ඉමෙසං ඛො, බ්‍රාහ්‌මණ, පඤ්‌චන්‌නං ඉන්‌ද්‍රියානං නානාවිසයානං නානාගොචරානං න අඤ්‌ඤමඤ්‌ඤස්‌ස ගොචරවිසයං පච්‌චනුභොන්‌තානං මනො පටිසරණං, මනොව නෙසං ගොචරවිසයං පච්‌චනුභොතී’’ති.
‘‘Pañcimāni, brāhmaṇa, indriyāni nānāvisayāni nānāgocarāni na aññamaññassa gocaravisayaṃ paccanubhonti. Katamāni pañca? Cakkhundriyaṃ, sotindriyaṃ , ghānindriyaṃ, jivhindriyaṃ, kāyindriyaṃ. Imesaṃ kho, brāhmaṇa, pañcannaṃ indriyānaṃ nānāvisayānaṃ nānāgocarānaṃ na aññamaññassa gocaravisayaṃ paccanubhontānaṃ mano paṭisaraṇaṃ, manova nesaṃ gocaravisayaṃ paccanubhotī’’ti.
‘‘මනස්‌ස පන, භො ගොතම, කිං පටිසරණ’’න්‌ති? ‘‘මනස්‌ස ඛො, බ්‍රාහ්‌මණ, සති පටිසරණ’’න්‌ති. ‘‘සතියා පන, භො ගොතම, කිං පටිසරණ’’න්‌ති? ‘‘සතියා ඛො, බ්‍රාහ්‌මණ, විමුත්‌ති පටිසරණ’’න්‌ති. ‘‘විමුත්‌තියා පන, භො ගොතම, කිං පටිසරණ’’න්‌ති? ‘‘විමුත්‌තියා ඛො, බ්‍රාහ්‌මණ, නිබ්‌බානං පටිසරණ’’න්‌ති. ‘‘නිබ්‌බානස්‌ස පන, භො ගොතම, කිං පටිසරණ’’න්‌ති? ‘‘අච්‌චයාසි 1, බ්‍රාහ්‌මණ, පඤ්‌හං, නාසක්‌ඛි පඤ්‌හස්‌ස පරියන්‌තං ගහෙතුං. නිබ්‌බානොගධඤ්‌හි, බ්‍රාහ්‌මණ, බ්‍රහ්‌මචරියං වුස්‌සති නිබ්‌බානපරායණං නිබ්‌බානපරියොසාන’’න්‌ති.
‘‘Manassa pana, bho gotama, kiṃ paṭisaraṇa’’nti? ‘‘Manassa kho, brāhmaṇa, sati paṭisaraṇa’’nti. ‘‘Satiyā pana, bho gotama, kiṃ paṭisaraṇa’’nti? ‘‘Satiyā kho, brāhmaṇa, vimutti paṭisaraṇa’’nti. ‘‘Vimuttiyā pana, bho gotama, kiṃ paṭisaraṇa’’nti? ‘‘Vimuttiyā kho, brāhmaṇa, nibbānaṃ paṭisaraṇa’’nti. ‘‘Nibbānassa pana, bho gotama, kiṃ paṭisaraṇa’’nti? ‘‘Accayāsi 2, brāhmaṇa, pañhaṃ, nāsakkhi pañhassa pariyantaṃ gahetuṃ. Nibbānogadhañhi, brāhmaṇa, brahmacariyaṃ vussati nibbānaparāyaṇaṃ nibbānapariyosāna’’nti.
අථ ඛො උණ්‌ණාභො බ්‍රාහ්‌මණො භගවතො භාසිතං අභිනන්‌දිත්‌වා අනුමොදිත්‌වා උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි.
Atha kho uṇṇābho brāhmaṇo bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
අථ ඛො භගවා අචිරපක්‌කන්‌තෙ උණ්‌ණාභෙ බ්‍රාහ්‌මණෙ භික්‌ඛූ ආමන්‌තෙසි – ‘‘සෙය්‍යථාපි, භික්‌ඛවෙ, කූටාගාරෙ වා කූටාගාරසාලායං වා 3 පාචීනවාතපානා සූරියෙ උග්‌ගච්‌ඡන්‌තෙ වාතපානෙන රස්‌මි 4 පවිසිත්‌වා ක්‌වාස්‌ස 5 පතිට්‌ඨිතා’’ති? ‘‘පච්‌ඡිමායං, භන්‌තෙ, භිත්‌තිය’’න්‌ති. ‘‘එවමෙව ඛො, භික්‌ඛවෙ, උණ්‌ණාභස්‌ස බ්‍රාහ්‌මණස්‌ස තථාගතෙ සද්‌ධා නිවිට්‌ඨා මූලජාතා පතිට්‌ඨිතා දළ්‌හා අසංහාරියා සමණෙන වා බ්‍රාහ්‌මණෙන වා දෙවෙන වා මාරෙන වා බ්‍රහ්‌මුනා වා කෙනචි වා ලොකස්‌මිං. ඉමම්‌හි චෙ, භික්‌ඛවෙ, සමයෙ උණ්‌ණාභො බ්‍රාහ්‌මණො කාලඞ්‌කරෙය්‍ය, නත්‌ථි සංයොජනං යෙන සංයොජනෙන සංයුත්‌තො උණ්‌ණාභො බ්‍රාහ්‌මණො පුන ඉමං ලොකං ආගච්‌ඡෙය්‍යා’’ති. දුතියං.
Atha kho bhagavā acirapakkante uṇṇābhe brāhmaṇe bhikkhū āmantesi – ‘‘seyyathāpi, bhikkhave, kūṭāgāre vā kūṭāgārasālāyaṃ vā 6 pācīnavātapānā sūriye uggacchante vātapānena rasmi 7 pavisitvā kvāssa 8 patiṭṭhitā’’ti? ‘‘Pacchimāyaṃ, bhante, bhittiya’’nti. ‘‘Evameva kho, bhikkhave, uṇṇābhassa brāhmaṇassa tathāgate saddhā niviṭṭhā mūlajātā patiṭṭhitā daḷhā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Imamhi ce, bhikkhave, samaye uṇṇābho brāhmaṇo kālaṅkareyya, natthi saṃyojanaṃ yena saṃyojanena saṃyutto uṇṇābho brāhmaṇo puna imaṃ lokaṃ āgaccheyyā’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. උණ්‌ණාභබ්‍රාහ්‌මණසුත්‌තවණ්‌ණනා • 2. Uṇṇābhabrāhmaṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. උණ්‌ණාභබ්‍රාහ්‌මණසුත්‌තවණ්‌ණනා • 2. Uṇṇābhabrāhmaṇasuttavaṇṇanā
