| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. උණ්‌ණාභබ්‍රාහ්‌මණසුත්‌තං
5. Uṇṇābhabrāhmaṇasuttaṃ
827. එවං මෙ සුතං – එකං සමයං ආයස්‌මා ආනන්‌දො කොසම්‌බියං විහරති ඝොසිතාරාමෙ. අථ ඛො උණ්‌ණාභො බ්‍රාහ්‌මණො යෙනායස්‌මා ආනන්‌දො තෙනුපසඞ්‌කමි; උපසඞ්‌කමිත්‌වා ආයස්‌මතා ආනන්‌දෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො උණ්‌ණාභො බ්‍රාහ්‌මණො ආයස්‌මන්‌තං ආනන්‌දං එතදවොච – ‘‘කිමත්‌ථියං නු ඛො, භො ආනන්‌ද, සමණෙ ගොතමෙ බ්‍රහ්‌මචරියං වුස්‌සතී’’ති? ‘‘ඡන්‌දප්‌පහානත්‌ථං ඛො, බ්‍රාහ්‌මණ, භගවති බ්‍රහ්‌මචරියං වුස්‌සතී’’ති.
827. Evaṃ me sutaṃ – ekaṃ samayaṃ āyasmā ānando kosambiyaṃ viharati ghositārāme. Atha kho uṇṇābho brāhmaṇo yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uṇṇābho brāhmaṇo āyasmantaṃ ānandaṃ etadavoca – ‘‘kimatthiyaṃ nu kho, bho ānanda, samaṇe gotame brahmacariyaṃ vussatī’’ti? ‘‘Chandappahānatthaṃ kho, brāhmaṇa, bhagavati brahmacariyaṃ vussatī’’ti.
‘‘අත්‌ථි පන, භො ආනන්‌ද, මග්‌ගො අත්‌ථි පටිපදා එතස්‌ස ඡන්‌දස්‌ස පහානායා’’ති? ‘‘අත්‌ථි ඛො, බ්‍රාහ්‌මණ, මග්‌ගො අත්‌ථි පටිපදා එතස්‌ස ඡන්‌දස්‌ස පහානායා’’ති.
‘‘Atthi pana, bho ānanda, maggo atthi paṭipadā etassa chandassa pahānāyā’’ti? ‘‘Atthi kho, brāhmaṇa, maggo atthi paṭipadā etassa chandassa pahānāyā’’ti.
‘‘කතමො පන, භො ආනන්‌ද, මග්‌ගො කතමා පටිපදා එතස්‌ස ඡන්‌දස්‌ස පහානායා’’ති? ‘‘ඉධ, බ්‍රාහ්‌මණ, භික්‌ඛු ඡන්‌දසමාධිප්‌පධානසඞ්‌ඛාරසමන්‌නාගතං ඉද්‌ධිපාදං භාවෙති, වීරියසමාධි…පෙ.… චිත්‌තසමාධි…පෙ.… වීමංසාසමාධිප්‌පධානසඞ්‌ඛාරසමන්‌නාගතං ඉද්‌ධිපාදං භාවෙති – අයං ඛො, බ්‍රාහ්‌මණ, මග්‌ගො අයං පටිපදා එතස්‌ස ඡන්‌දස්‌ස පහානායා’’ති.
‘‘Katamo pana, bho ānanda, maggo katamā paṭipadā etassa chandassa pahānāyā’’ti? ‘‘Idha, brāhmaṇa, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ayaṃ kho, brāhmaṇa, maggo ayaṃ paṭipadā etassa chandassa pahānāyā’’ti.
‘‘එවං සන්‌තෙ, භො ආනන්‌ද, සන්‌තකං හොති නො අසන්‌තකං. ඡන්‌දෙනෙව ඡන්‌දං පජහිස්‌සතීති – නෙතං ඨානං විජ්‌ජති’’. ‘‘තෙන හි, බ්‍රාහ්‌මණ, තඤ්‌ඤෙවෙත්‌ථ පටිපුච්‌ඡිස්‌සාමි. යථා තෙ ඛමෙය්‍ය තථා තං බ්‍යාකරෙය්‍යාසි. තං කිං මඤ්‌ඤසි, බ්‍රාහ්‌මණ, අහොසි තෙ පුබ්‌බෙ ඡන්‌දො ‘ආරාමං ගමිස්‌සාමී’ති? තස්‌ස තෙ ආරාමගතස්‌ස යො තජ්‌ජො ඡන්‌දො සො පටිප්‌පස්‌සද්‌ධො’’ති? ‘‘එවං , භො’’. ‘‘අහොසි තෙ පුබ්‌බෙ වීරියං ‘ආරාමං ගමිස්‌සාමී’ති? තස්‌ස තෙ ආරාමගතස්‌ස යං තජ්‌ජං වීරියං තං පටිප්‌පස්‌සද්‌ධ’’න්‌ති? ‘‘එවං, භො’’. ‘‘අහොසි තෙ පුබ්‌බෙ චිත්‌තං ‘ආරාමං ගමිස්‌සාමී’ති? තස්‌ස තෙ ආරාමගතස්‌ස යං තජ්‌ජං චිත්‌තං තං පටිප්‌පස්‌සද්‌ධ’’න්‌ති? ‘‘එවං, භො’’. ‘‘අහොසි තෙ පුබ්‌බෙ වීමංසා ‘ආරාමං ගමිස්‌සාමී’ති? තස්‌ස තෙ ආරාමගතස්‌ස යා තජ්‌ජා වීමංසා සා පටිප්‌පස්‌සද්‌ධා’’ති? ‘‘එවං, භො’’.
‘‘Evaṃ sante, bho ānanda, santakaṃ hoti no asantakaṃ. Chandeneva chandaṃ pajahissatīti – netaṃ ṭhānaṃ vijjati’’. ‘‘Tena hi, brāhmaṇa, taññevettha paṭipucchissāmi. Yathā te khameyya tathā taṃ byākareyyāsi. Taṃ kiṃ maññasi, brāhmaṇa, ahosi te pubbe chando ‘ārāmaṃ gamissāmī’ti? Tassa te ārāmagatassa yo tajjo chando so paṭippassaddho’’ti? ‘‘Evaṃ , bho’’. ‘‘Ahosi te pubbe vīriyaṃ ‘ārāmaṃ gamissāmī’ti? Tassa te ārāmagatassa yaṃ tajjaṃ vīriyaṃ taṃ paṭippassaddha’’nti? ‘‘Evaṃ, bho’’. ‘‘Ahosi te pubbe cittaṃ ‘ārāmaṃ gamissāmī’ti? Tassa te ārāmagatassa yaṃ tajjaṃ cittaṃ taṃ paṭippassaddha’’nti? ‘‘Evaṃ, bho’’. ‘‘Ahosi te pubbe vīmaṃsā ‘ārāmaṃ gamissāmī’ti? Tassa te ārāmagatassa yā tajjā vīmaṃsā sā paṭippassaddhā’’ti? ‘‘Evaṃ, bho’’.
‘‘එවමෙව ඛො, බ්‍රාහ්‌මණ, යො සො භික්‌ඛු අරහං ඛීණාසවො වුසිතවා කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, තස්‌ස යො පුබ්‌බෙ ඡන්‌දො අහොසි අරහත්‌තප්‌පත්‌තියා, අරහත්‌තප්‌පත්‌තෙ 1 යො තජ්‌ජො ඡන්‌දො සො පටිප්‌පස්‌සද්‌ධො; යං පුබ්‌බෙ වීරියං අහොසි අරහත්‌තප්‌පත්‌තියා, අරහත්‌තප්‌පත්‌තෙ යං තජ්‌ජං වීරියං තං පටිප්‌පස්‌සද්‌ධං; යං පුබ්‌බෙ චිත්‌තං අහොසි අරහත්‌තප්‌පත්‌තියා, අරහත්‌තප්‌පත්‌තෙ යං තජ්‌ජං චිත්‌තං තං පටිප්‌පස්‌සද්‌ධං; යා පුබ්‌බෙ වීමංසා අහොසි අරහත්‌තප්‌පත්‌තියා, අරහත්‌තප්‌පත්‌තෙ යා තජ්‌ජා වීමංසා සා පටිප්‌පස්‌සද්‌ධා. තං කිං මඤ්‌ඤසි, බ්‍රාහ්‌මණ, ඉති එවං සන්‌තෙ, සන්‌තකං වා හොති නො අසන්‌තකං වා’’ති?
‘‘Evameva kho, brāhmaṇa, yo so bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, tassa yo pubbe chando ahosi arahattappattiyā, arahattappatte 2 yo tajjo chando so paṭippassaddho; yaṃ pubbe vīriyaṃ ahosi arahattappattiyā, arahattappatte yaṃ tajjaṃ vīriyaṃ taṃ paṭippassaddhaṃ; yaṃ pubbe cittaṃ ahosi arahattappattiyā, arahattappatte yaṃ tajjaṃ cittaṃ taṃ paṭippassaddhaṃ; yā pubbe vīmaṃsā ahosi arahattappattiyā, arahattappatte yā tajjā vīmaṃsā sā paṭippassaddhā. Taṃ kiṃ maññasi, brāhmaṇa, iti evaṃ sante, santakaṃ vā hoti no asantakaṃ vā’’ti?
‘‘අද්‌ධා, භො ආනන්‌ද, එවං සන්‌තෙ, සන්‌තකං හොති නො අසන්‌තකං. අභික්‌කන්‌තං, භො ආනන්‌ද, අභික්‌කන්‌තං, භො ආනන්‌ද! සෙය්‍යථාපි, භො ආනන්‌ද, නික්‌කුජ්‌ජිතං වා උක්‌කුජ්‌ජෙය්‍ය, පටිච්‌ඡන්‌නං වා විවරෙය්‍ය, මූළ්‌හස්‌ස වා මග්‌ගං ආචික්‌ඛෙය්‍ය, අන්‌ධකාරෙ වා තෙලපජ්‌ජොතං ධාරෙය්‍ය – චක්‌ඛුමන්‌තො රූපානි දක්‌ඛන්‌තීති; එවමෙවං භොතා ආනන්‌දෙන අනෙකපරියායෙන ධම්‌මො පකාසිතො. එසාහං, භො ආනන්‌ද, තං භවන්‌තං ගොතමං සරණං ගච්‌ඡාමි ධම්‌මඤ්‌ච භික්‌ඛුසඞ්‌ඝඤ්‌ච. උපාසකං මං භවං ආනන්‌දො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති. පඤ්‌චමං.
‘‘Addhā, bho ānanda, evaṃ sante, santakaṃ hoti no asantakaṃ. Abhikkantaṃ, bho ānanda, abhikkantaṃ, bho ānanda! Seyyathāpi, bho ānanda, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhotā ānandena anekapariyāyena dhammo pakāsito. Esāhaṃ, bho ānanda, taṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ ānando dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. උණ්‌ණාභබ්‍රාහ්‌මණසුත්‌තවණ්‌ණනා • 5. Uṇṇābhabrāhmaṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. උණ්‌ණාභබ්‍රාහ්‌මණසුත්‌තවණ්‌ණනා • 5. Uṇṇābhabrāhmaṇasuttavaṇṇanā
