| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. உண்ணாப⁴ப்³ராஹ்மணஸுத்தவண்ணனா
2. Uṇṇābhabrāhmaṇasuttavaṇṇanā
512. து³தியே கோ³சரவிஸயந்தி கோ³சரபூ⁴தங் விஸயங். அஞ்ஞமஞ்ஞஸ்ஸாதி சக்கு² ஸோதஸ்ஸ, ஸோதங் வா சக்கு²ஸ்ஸாதி ஏவங் ஏகங் ஏகஸ்ஸ கோ³சரவிஸயங் ந பச்சனுபோ⁴தி. ஸசே ஹி நீலாதி³பே⁴த³ங் ரூபாரம்மணங் ஸமோதா⁴னெத்வா ஸோதிந்த்³ரியஸ்ஸ உபனெய்ய – ‘‘இங்க⁴ த்வங் தாவ நங் வவத்த²பேஹி விபா⁴வேஹி ‘கின்னாமேதங் ஆரம்மண’’’ந்தி. சக்கு²விஞ்ஞாணங் வினாபி முகே²ன அத்தனோ த⁴ம்மதாய ஏவங் வதெ³ய்ய – ‘‘அரே, அந்த⁴பா³ல, வஸ்ஸஸதம்பி வஸ்ஸஸஹஸ்ஸம்பி வஸ்ஸஸதஸஹஸ்ஸம்பி பரிதா⁴வமானோ அஞ்ஞத்ர மயா குஹிங் ஏதஸ்ஸ ஜானநகங் லபி⁴ஸ்ஸஸி, தங் ஆஹர, சக்கு²பஸாதே³ உபனேஹி, அஹமேதங் ஆரம்மணங் ஜானிஸ்ஸாமி – யதி³ வா நீலங், யதி³ வா பீதகங். ந ஹி ஏஸோ அஞ்ஞஸ்ஸ விஸயோ, மய்ஹமேவேஸோ விஸயோ’’தி. ஸேஸத்³வாரேஸுபி ஏஸேவ நயோ. ஏவமேதானி அஞ்ஞமஞ்ஞஸ்ஸ கோ³சரவிஸயங் ந பச்சனுபொ⁴ந்தி நாம.
512. Dutiye gocaravisayanti gocarabhūtaṃ visayaṃ. Aññamaññassāti cakkhu sotassa, sotaṃ vā cakkhussāti evaṃ ekaṃ ekassa gocaravisayaṃ na paccanubhoti. Sace hi nīlādibhedaṃ rūpārammaṇaṃ samodhānetvā sotindriyassa upaneyya – ‘‘iṅgha tvaṃ tāva naṃ vavatthapehi vibhāvehi ‘kinnāmetaṃ ārammaṇa’’’nti. Cakkhuviññāṇaṃ vināpi mukhena attano dhammatāya evaṃ vadeyya – ‘‘are, andhabāla, vassasatampi vassasahassampi vassasatasahassampi paridhāvamāno aññatra mayā kuhiṃ etassa jānanakaṃ labhissasi, taṃ āhara, cakkhupasāde upanehi, ahametaṃ ārammaṇaṃ jānissāmi – yadi vā nīlaṃ, yadi vā pītakaṃ. Na hi eso aññassa visayo, mayhameveso visayo’’ti. Sesadvāresupi eseva nayo. Evametāni aññamaññassa gocaravisayaṃ na paccanubhonti nāma.
கிங் படிஸரணந்தி ஏதேஸங் கிங் படிஸரணங், கிங் ஏதானி படிஸரந்தீதி புச்ச²தி. மனோ படிஸரணந்தி ஜவனமனோ படிஸரணங். மனோவ நேஸந்தி மனொத்³வாரிகஜவனமனோவ ஏதேஸங் கோ³சரவிஸயங் ரஜ்ஜனாதி³வஸேன அனுபோ⁴தி. சக்கு²விஞ்ஞாணஞ்ஹி ரூபத³ஸ்ஸனமத்தமேவ, எத்த² ரஜ்ஜனங் வா து³ஸ்ஸனங் வா முய்ஹனங் வா நத்தி². ஏகஸ்மிங் பன த்³வாரே ஜவனங் ரஜ்ஜதி வா து³ஸ்ஸதி வா முய்ஹதி வா. ஸோதவிஞ்ஞாணாதீ³ஸுபி ஏஸேவ நயோ.
Kiṃ paṭisaraṇanti etesaṃ kiṃ paṭisaraṇaṃ, kiṃ etāni paṭisarantīti pucchati. Mano paṭisaraṇanti javanamano paṭisaraṇaṃ. Manova nesanti manodvārikajavanamanova etesaṃ gocaravisayaṃ rajjanādivasena anubhoti. Cakkhuviññāṇañhi rūpadassanamattameva, ettha rajjanaṃ vā dussanaṃ vā muyhanaṃ vā natthi. Ekasmiṃ pana dvāre javanaṃ rajjati vā dussati vā muyhati vā. Sotaviññāṇādīsupi eseva nayo.
தத்ராயங் உபமா – பஞ்ச கிர து³ப்³ப³லபோ⁴ஜகா ராஜானங் ஸேவித்வா கிச்சே²ன கஸிரேன ஏகஸ்மிங் பஞ்சகுலிகே கா³மே பரித்தகங் ஆயங் லபி⁴ங்ஸு. தேஸங் தத்த² மச்ச²பா⁴கோ³ மங்ஸபா⁴கோ³, அத்³து³கஹாபணோ வா யொத்தகஹாபணோ வா மாஸகஹாபணோ வா அட்ட²கஹாபணோ வா ஸோளஸகஹாபணோ வா சதுஸட்டி²கஹாபணோ வா த³ண்டோ³தி எத்தகமத்தமேவ பாபுணாதி, ஸதவத்து²கங் பஞ்சஸதவத்து²கங் ஸஹஸ்ஸவத்து²கங் மஹாப³லிங் ராஜாவ க³ண்ஹாதி.
Tatrāyaṃ upamā – pañca kira dubbalabhojakā rājānaṃ sevitvā kicchena kasirena ekasmiṃ pañcakulike gāme parittakaṃ āyaṃ labhiṃsu. Tesaṃ tattha macchabhāgo maṃsabhāgo, addukahāpaṇo vā yottakahāpaṇo vā māsakahāpaṇo vā aṭṭhakahāpaṇo vā soḷasakahāpaṇo vā catusaṭṭhikahāpaṇo vā daṇḍoti ettakamattameva pāpuṇāti, satavatthukaṃ pañcasatavatthukaṃ sahassavatthukaṃ mahābaliṃ rājāva gaṇhāti.
தத்த² பஞ்சகுலிககா³மா விய பஞ்சபஸாதா³ த³ட்ட²ப்³பா³, பஞ்ச து³ப்³ப³லபோ⁴ஜகா விய பஞ்சவிஞ்ஞாணானி; ராஜா விய ஜவனங், து³ப்³ப³லபோ⁴ஜகானங் பரித்தகஆயபாபுணனங் விய சக்கு²விஞ்ஞாணாதீ³னங் ரூபத³ஸ்ஸனாதி³மத்தங், ரஜ்ஜனாதி³ பன ஏதேஸு நத்தி² . ரஞ்ஞோ மஹாப³லிக்³க³ஹணங் விய தேஸு த்³வாரேஸு ஜவனஸ்ஸ ரஜ்ஜனாதீ³னி வேதி³தப்³பா³னி. ஏவமெத்த² மனோதி குஸலாகுஸலஜவனங் வுத்தங்.
Tattha pañcakulikagāmā viya pañcapasādā daṭṭhabbā, pañca dubbalabhojakā viya pañcaviññāṇāni; rājā viya javanaṃ, dubbalabhojakānaṃ parittakaāyapāpuṇanaṃ viya cakkhuviññāṇādīnaṃ rūpadassanādimattaṃ, rajjanādi pana etesu natthi . Rañño mahābaliggahaṇaṃ viya tesu dvāresu javanassa rajjanādīni veditabbāni. Evamettha manoti kusalākusalajavanaṃ vuttaṃ.
ஸதி படிஸரணந்தி மக்³க³ஸதி படிஸரணங். ஜவனமனோ ஹி மக்³க³ஸதிங் படிஸரதி. விமுத்தீதி ப²லவிமுத்தி. படிஸரணந்தி ப²லவிமுத்தியா நிப்³பா³னங் படிஸரணங். தஞ்ஹி ஸா படிஸரதி. நாஸக்கி² பஞ்ஹஸ்ஸ பரியந்தங் க³ஹேதுந்தி பஞ்ஹஸ்ஸ பரிச்சே²த³ங் பமாணங் க³ஹேதுங் நாஸக்கி², அப்படிஸரணங் த⁴ம்மங் ‘‘ஸப்படிஸரண’’ந்தி புச்சி². நிப்³பா³னங் நாமேதங் அப்படிஸரணங், ந கிஞ்சி படிஸரதி. நிப்³பா³னோக³த⁴ந்தி நிப்³பா³னப்³ப⁴ந்தரங் நிப்³பா³னங் அனுபவிட்ட²ங். ப்³ரஹ்மசரியந்தி மக்³க³ப்³ரஹ்மசரியங். நிப்³பா³னபராயணந்தி நிப்³பா³னங் பரங் அயனமஸ்ஸ பரா க³தி, ந ததோ பரங் க³ச்ச²தீதி அத்தோ². நிப்³பா³னங் பரியோஸானங் அவஸானங் அஸ்ஸாதி நிப்³பா³னபரியோஸானங்.
Sati paṭisaraṇanti maggasati paṭisaraṇaṃ. Javanamano hi maggasatiṃ paṭisarati. Vimuttīti phalavimutti. Paṭisaraṇanti phalavimuttiyā nibbānaṃ paṭisaraṇaṃ. Tañhi sā paṭisarati. Nāsakkhi pañhassa pariyantaṃ gahetunti pañhassa paricchedaṃ pamāṇaṃ gahetuṃ nāsakkhi, appaṭisaraṇaṃ dhammaṃ ‘‘sappaṭisaraṇa’’nti pucchi. Nibbānaṃ nāmetaṃ appaṭisaraṇaṃ, na kiñci paṭisarati. Nibbānogadhanti nibbānabbhantaraṃ nibbānaṃ anupaviṭṭhaṃ. Brahmacariyanti maggabrahmacariyaṃ. Nibbānaparāyaṇanti nibbānaṃ paraṃ ayanamassa parā gati, na tato paraṃ gacchatīti attho. Nibbānaṃ pariyosānaṃ avasānaṃ assāti nibbānapariyosānaṃ.
மூலஜாதா பதிட்டி²தாதி மக்³கே³ன ஆக³தஸத்³தா⁴ வுச்சதி. இமம்ஹி சே, பி⁴க்க²வே, ஸமயேதி கிங் ஸந்தா⁴யாஹ? ஜா²னஅனாகா³மிதங். தஸ்மிஞ்ஹி ஸமயே ப்³ராஹ்மணஸ்ஸ பட²மமக்³கே³ன பஞ்ச அகுஸலசித்தானி பஹீனானி, பட²மஜ்ஜா²னேன பஞ்ச நீவரணானீதி ஜா²னஅனாகா³மிட்டா²னே டி²தோ. ஸோ அபரிஹீனஜ்ஜா²னோ காலங் கத்வா தத்தே²வ பரினிப்³பா³யெய்ய. ஸசே பனஸ்ஸ புத்ததா³ரங் அனுஸாஸந்தஸ்ஸ கம்மந்தே விசாரெந்தஸ்ஸ ஜா²னங் நஸ்ஸதி, நட்டே² ஜா²னே க³தி அனிப³த்³தா⁴ ஹோதி, அனட்டே² பன நிப³த்³தா⁴தி இமங் ஜா²னஅனாகா³மிதங் ஸந்தா⁴ய ஏவமாஹ.
Mūlajātā patiṭṭhitāti maggena āgatasaddhā vuccati. Imamhi ce, bhikkhave, samayeti kiṃ sandhāyāha? Jhānaanāgāmitaṃ. Tasmiñhi samaye brāhmaṇassa paṭhamamaggena pañca akusalacittāni pahīnāni, paṭhamajjhānena pañca nīvaraṇānīti jhānaanāgāmiṭṭhāne ṭhito. So aparihīnajjhāno kālaṃ katvā tattheva parinibbāyeyya. Sace panassa puttadāraṃ anusāsantassa kammante vicārentassa jhānaṃ nassati, naṭṭhe jhāne gati anibaddhā hoti, anaṭṭhe pana nibaddhāti imaṃ jhānaanāgāmitaṃ sandhāya evamāha.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. உண்ணாப⁴ப்³ராஹ்மணஸுத்தங் • 2. Uṇṇābhabrāhmaṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. உண்ணாப⁴ப்³ராஹ்மணஸுத்தவண்ணனா • 2. Uṇṇābhabrāhmaṇasuttavaṇṇanā
