| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
७. उपचालासुत्तं
7. Upacālāsuttaṃ
१६८. सावत्थिनिदानं । अथ खो उपचाला भिक्खुनी पुब्बण्हसमयं निवासेत्वा…पे॰… अञ्ञतरस्मिं रुक्खमूले दिवाविहारं निसीदि। अथ खो मारो पापिमा येन उपचाला भिक्खुनी तेनुपसङ्कमि; उपसङ्कमित्वा उपचालं भिक्खुनिं एतदवोच – ‘‘कत्थ नु त्वं, भिक्खुनि, उप्पज्जितुकामा’’ति? ‘‘न ख्वाहं, आवुसो, कत्थचि उप्पज्जितुकामा’’ति।
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘तावतिंसा च यामा च, तुसिता चापि देवता।
‘‘Tāvatiṃsā ca yāmā ca, tusitā cāpi devatā;
निम्मानरतिनो देवा, ये देवा वसवत्तिनो।
Nimmānaratino devā, ye devā vasavattino;
तत्थ चित्तं पणिधेहि, रतिं पच्चनुभोस्ससी’’ति॥
Tattha cittaṃ paṇidhehi, ratiṃ paccanubhossasī’’ti.
‘‘तावतिंसा च यामा च, तुसिता चापि देवता।
‘‘Tāvatiṃsā ca yāmā ca, tusitā cāpi devatā;
निम्मानरतिनो देवा, ये देवा वसवत्तिनो।
Nimmānaratino devā, ye devā vasavattino;
कामबन्धनबद्धा ते, एन्ति मारवसं पुन॥
Kāmabandhanabaddhā te, enti māravasaṃ puna.
अगति यत्थ मारस्स, तत्थ मे निरतो मनो’’ति॥
Agati yattha mārassa, tattha me nirato mano’’ti.
अथ खो मारो पापिमा ‘‘जानाति मं उपचाला भिक्खुनी’’ति दुक्खी दुम्मनो तत्थेवन्तरधायीति।
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. उपचालासुत्तवण्णना • 7. Upacālāsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ७. उपचालासुत्तवण्णना • 7. Upacālāsuttavaṇṇanā
