| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៧. ឧបចាលាសុត្តំ
7. Upacālāsuttaṃ
១៦៨. សាវត្ថិនិទានំ ។ អថ ខោ ឧបចាលា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន ឧបចាលា ភិក្ខុនី តេនុបសង្កមិ; ឧបសង្កមិត្វា ឧបចាលំ ភិក្ខុនិំ ឯតទវោច – ‘‘កត្ថ នុ ត្វំ, ភិក្ខុនិ, ឧប្បជ្ជិតុកាមា’’តិ? ‘‘ន ខ្វាហំ, អាវុសោ, កត្ថចិ ឧប្បជ្ជិតុកាមា’’តិ។
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘តាវតិំសា ច យាមា ច, តុសិតា ចាបិ ទេវតា;
‘‘Tāvatiṃsā ca yāmā ca, tusitā cāpi devatā;
និម្មានរតិនោ ទេវា, យេ ទេវា វសវត្តិនោ;
Nimmānaratino devā, ye devā vasavattino;
តត្ថ ចិត្តំ បណិធេហិ, រតិំ បច្ចនុភោស្សសី’’តិ។
Tattha cittaṃ paṇidhehi, ratiṃ paccanubhossasī’’ti.
‘‘តាវតិំសា ច យាមា ច, តុសិតា ចាបិ ទេវតា;
‘‘Tāvatiṃsā ca yāmā ca, tusitā cāpi devatā;
និម្មានរតិនោ ទេវា, យេ ទេវា វសវត្តិនោ;
Nimmānaratino devā, ye devā vasavattino;
កាមពន្ធនពទ្ធា តេ, ឯន្តិ មារវសំ បុន។
Kāmabandhanabaddhā te, enti māravasaṃ puna.
អគតិ យត្ថ មារស្ស, តត្ថ មេ និរតោ មនោ’’តិ។
Agati yattha mārassa, tattha me nirato mano’’ti.
អថ ខោ មារោ បាបិមា ‘‘ជានាតិ មំ ឧបចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧. ឧបចាលាសុត្តវណ្ណនា • 7. Upacālāsuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៧. ឧបចាលាសុត្តវណ្ណនា • 7. Upacālāsuttavaṇṇanā
