| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೭. ಉಪಚಾಲಾಸುತ್ತಂ
7. Upacālāsuttaṃ
೧೬೮. ಸಾವತ್ಥಿನಿದಾನಂ । ಅಥ ಖೋ ಉಪಚಾಲಾ ಭಿಕ್ಖುನೀ ಪುಬ್ಬಣ್ಹಸಮಯಂ ನಿವಾಸೇತ್ವಾ…ಪೇ॰… ಅಞ್ಞತರಸ್ಮಿಂ ರುಕ್ಖಮೂಲೇ ದಿವಾವಿಹಾರಂ ನಿಸೀದಿ। ಅಥ ಖೋ ಮಾರೋ ಪಾಪಿಮಾ ಯೇನ ಉಪಚಾಲಾ ಭಿಕ್ಖುನೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಉಪಚಾಲಂ ಭಿಕ್ಖುನಿಂ ಏತದವೋಚ – ‘‘ಕತ್ಥ ನು ತ್ವಂ, ಭಿಕ್ಖುನಿ, ಉಪ್ಪಜ್ಜಿತುಕಾಮಾ’’ತಿ? ‘‘ನ ಖ್ವಾಹಂ, ಆವುಸೋ, ಕತ್ಥಚಿ ಉಪ್ಪಜ್ಜಿತುಕಾಮಾ’’ತಿ।
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘ತಾವತಿಂಸಾ ಚ ಯಾಮಾ ಚ, ತುಸಿತಾ ಚಾಪಿ ದೇವತಾ।
‘‘Tāvatiṃsā ca yāmā ca, tusitā cāpi devatā;
ನಿಮ್ಮಾನರತಿನೋ ದೇವಾ, ಯೇ ದೇವಾ ವಸವತ್ತಿನೋ।
Nimmānaratino devā, ye devā vasavattino;
ತತ್ಥ ಚಿತ್ತಂ ಪಣಿಧೇಹಿ, ರತಿಂ ಪಚ್ಚನುಭೋಸ್ಸಸೀ’’ತಿ॥
Tattha cittaṃ paṇidhehi, ratiṃ paccanubhossasī’’ti.
‘‘ತಾವತಿಂಸಾ ಚ ಯಾಮಾ ಚ, ತುಸಿತಾ ಚಾಪಿ ದೇವತಾ।
‘‘Tāvatiṃsā ca yāmā ca, tusitā cāpi devatā;
ನಿಮ್ಮಾನರತಿನೋ ದೇವಾ, ಯೇ ದೇವಾ ವಸವತ್ತಿನೋ।
Nimmānaratino devā, ye devā vasavattino;
ಕಾಮಬನ್ಧನಬದ್ಧಾ ತೇ, ಏನ್ತಿ ಮಾರವಸಂ ಪುನ॥
Kāmabandhanabaddhā te, enti māravasaṃ puna.
ಅಗತಿ ಯತ್ಥ ಮಾರಸ್ಸ, ತತ್ಥ ಮೇ ನಿರತೋ ಮನೋ’’ತಿ॥
Agati yattha mārassa, tattha me nirato mano’’ti.
ಅಥ ಖೋ ಮಾರೋ ಪಾಪಿಮಾ ‘‘ಜಾನಾತಿ ಮಂ ಉಪಚಾಲಾ ಭಿಕ್ಖುನೀ’’ತಿ ದುಕ್ಖೀ ದುಮ್ಮನೋ ತತ್ಥೇವನ್ತರಧಾಯೀತಿ।
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಉಪಚಾಲಾಸುತ್ತವಣ್ಣನಾ • 7. Upacālāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೭. ಉಪಚಾಲಾಸುತ್ತವಣ್ಣನಾ • 7. Upacālāsuttavaṇṇanā
