| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. උපචාලාසුත්‌තං
7. Upacālāsuttaṃ
168. සාවත්‌ථිනිදානං . අථ ඛො උපචාලා භික්‌ඛුනී පුබ්‌බණ්‌හසමයං නිවාසෙත්‌වා…පෙ.… අඤ්‌ඤතරස්‌මිං රුක්‌ඛමූලෙ දිවාවිහාරං නිසීදි. අථ ඛො මාරො පාපිමා යෙන උපචාලා භික්‌ඛුනී තෙනුපසඞ්‌කමි; උපසඞ්‌කමිත්‌වා උපචාලං භික්‌ඛුනිං එතදවොච – ‘‘කත්‌ථ නු ත්‌වං, භික්‌ඛුනි, උප්‌පජ්‌ජිතුකාමා’’ති? ‘‘න ඛ්‌වාහං, ආවුසො, කත්‌ථචි උප්‌පජ්‌ජිතුකාමා’’ති.
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘තාවතිංසා ච යාමා ච, තුසිතා චාපි දෙවතා;
‘‘Tāvatiṃsā ca yāmā ca, tusitā cāpi devatā;
නිම්‌මානරතිනො දෙවා, යෙ දෙවා වසවත්‌තිනො;
Nimmānaratino devā, ye devā vasavattino;
තත්‌ථ චිත්‌තං පණිධෙහි, රතිං පච්‌චනුභොස්‌සසී’’ති.
Tattha cittaṃ paṇidhehi, ratiṃ paccanubhossasī’’ti.
‘‘තාවතිංසා ච යාමා ච, තුසිතා චාපි දෙවතා;
‘‘Tāvatiṃsā ca yāmā ca, tusitā cāpi devatā;
නිම්‌මානරතිනො දෙවා, යෙ දෙවා වසවත්‌තිනො;
Nimmānaratino devā, ye devā vasavattino;
කාමබන්‌ධනබද්‌ධා තෙ, එන්‌ති මාරවසං පුන.
Kāmabandhanabaddhā te, enti māravasaṃ puna.
අගති යත්‌ථ මාරස්‌ස, තත්‌ථ මෙ නිරතො මනො’’ති.
Agati yattha mārassa, tattha me nirato mano’’ti.
අථ ඛො මාරො පාපිමා ‘‘ජානාති මං උපචාලා භික්‌ඛුනී’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. උපචාලාසුත්‌තවණ්‌ණනා • 7. Upacālāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. උපචාලාසුත්‌තවණ්‌ණනා • 7. Upacālāsuttavaṇṇanā
