| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
४. उपचिकावग्गो
4. Upacikāvaggo
१. उपचिकङ्गपञ्हो
1. Upacikaṅgapañho
१. ‘‘भन्ते नागसेन, ‘उपचिकाय एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, उपचिका उपरि छदनं कत्वा अत्तानं पिदहित्वा गोचराय चरति, एवमेव खो, महाराज, योगिना योगावचरेन सीलसंवरछदनं कत्वा मानसं पिदहित्वा पिण्डाय चरितब्बं, सीलसंवरछदनेन खो, महाराज, योगी योगावचरो सब्बभयसमतिक्कन्तो होति। इदं, महाराज, उपचिकाय एकं अङ्गं गहेतब्बं, भासितम्पेतं, महाराज, थेरेन उपसेनेन वङ्गन्तपुत्तेन –
1. ‘‘Bhante nāgasena, ‘upacikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, upacikā upari chadanaṃ katvā attānaṃ pidahitvā gocarāya carati, evameva kho, mahārāja, yoginā yogāvacarena sīlasaṃvarachadanaṃ katvā mānasaṃ pidahitvā piṇḍāya caritabbaṃ, sīlasaṃvarachadanena kho, mahārāja, yogī yogāvacaro sabbabhayasamatikkanto hoti. Idaṃ, mahārāja, upacikāya ekaṃ aṅgaṃ gahetabbaṃ, bhāsitampetaṃ, mahārāja, therena upasenena vaṅgantaputtena –
‘‘‘सीलसंवरछदनं, योगी कत्वान मानसं।
‘‘‘Sīlasaṃvarachadanaṃ, yogī katvāna mānasaṃ;
अनुपलित्तो लोकेन, भया च परिमुच्चती’’’ति॥
Anupalitto lokena, bhayā ca parimuccatī’’’ti.
उपचिकङ्गपञ्हो पठमो।
Upacikaṅgapañho paṭhamo.
