| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. උපචිකාවග්‌ගො
4. Upacikāvaggo
1. උපචිකඞ්‌ගපඤ්‌හො
1. Upacikaṅgapañho
1. ‘‘භන්‌තෙ නාගසෙන, ‘උපචිකාය එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, උපචිකා උපරි ඡදනං කත්‌වා අත්‌තානං පිදහිත්‌වා ගොචරාය චරති, එවමෙව ඛො, මහාරාජ, යොගිනා යොගාවචරෙන සීලසංවරඡදනං කත්‌වා මානසං පිදහිත්‌වා පිණ්‌ඩාය චරිතබ්‌බං, සීලසංවරඡදනෙන ඛො, මහාරාජ, යොගී යොගාවචරො සබ්‌බභයසමතික්‌කන්‌තො හොති. ඉදං, මහාරාජ, උපචිකාය එකං අඞ්‌ගං ගහෙතබ්‌බං, භාසිතම්‌පෙතං, මහාරාජ, ථෙරෙන උපසෙනෙන වඞ්‌ගන්‌තපුත්‌තෙන –
1. ‘‘Bhante nāgasena, ‘upacikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, upacikā upari chadanaṃ katvā attānaṃ pidahitvā gocarāya carati, evameva kho, mahārāja, yoginā yogāvacarena sīlasaṃvarachadanaṃ katvā mānasaṃ pidahitvā piṇḍāya caritabbaṃ, sīlasaṃvarachadanena kho, mahārāja, yogī yogāvacaro sabbabhayasamatikkanto hoti. Idaṃ, mahārāja, upacikāya ekaṃ aṅgaṃ gahetabbaṃ, bhāsitampetaṃ, mahārāja, therena upasenena vaṅgantaputtena –
‘‘‘සීලසංවරඡදනං, යොගී කත්‌වාන මානසං;
‘‘‘Sīlasaṃvarachadanaṃ, yogī katvāna mānasaṃ;
අනුපලිත්‌තො ලොකෙන, භයා ච පරිමුච්‌චතී’’’ති.
Anupalitto lokena, bhayā ca parimuccatī’’’ti.
උපචිකඞ්‌ගපඤ්‌හො පඨමො.
Upacikaṅgapañho paṭhamo.
