Library / Tipiṭaka / ཏིཔིཊཀ • Tipiṭaka / དྷམྨསངྒཎི-ཨཊྛཀཐཱ • Dhammasaṅgaṇi-aṭṭhakathā

    དུཀནིདྡེསཝཎྞནཱ

    Dukaniddesavaṇṇanā

    ཨུཔཱདཱབྷཱཛནཱིཡཀཐཱ

    Upādābhājanīyakathā

    ༥༩༥. ཨིདཱནི དུཝིདྷསངྒཧཱདཱིསུ ‘ཨཏྠི རཱུཔཾ ཨུཔཱདཱ, ཨཏྠི རཱུཔཾ ནོཨུཔཱདཱ’ཏི ཨེཝཾ བྷེདསབྦྷཱཝཏོ པུཙྪཱཔུབྦངྒམཾ པདབྷཱཛནཾ དསྶེནྟོ ཀཏམཾ ཏཾ རཱུཔཾ ཨུཔཱདཱཏིཨཱདིམཱཧ། ཏཏྠ ཨུཔཱདིཡཏཱིཏི ‘ཨུཔཱདཱ’; མཧཱབྷཱུཏཱནི གཧེཏྭཱ, ཨམུཉྩིཏྭཱ, ཏཱནི ནིསྶཱཡ པཝཏྟཏཱིཏི ཨཏྠོ། ཨིདཱནི ཏཾ པབྷེདཏོ དསྶེནྟོ ཙཀྑཱཡཏནནྟིཨཱདིམཱཧ།

    595. Idāni duvidhasaṅgahādīsu ‘atthi rūpaṃ upādā, atthi rūpaṃ noupādā’ti evaṃ bhedasabbhāvato pucchāpubbaṅgamaṃ padabhājanaṃ dassento katamaṃ taṃ rūpaṃ upādātiādimāha. Tattha upādiyatīti ‘upādā’; mahābhūtāni gahetvā, amuñcitvā, tāni nissāya pavattatīti attho. Idāni taṃ pabhedato dassento cakkhāyatanantiādimāha.

    ༥༩༦. ཨེཝཾ ཏེཝཱིསཏིཝིདྷཾ ཨུཔཱདཱརཱུཔཾ སངྑེཔཏོ ཨུདྡིསིཏྭཱ པུན ཏདེཝ ཝིཏྠཱརཏོ ནིདྡིསནྟོ ཀཏམཾ ཏཾ རཱུཔཾ ཙཀྑཱཡཏནནྟིཨཱདིམཱཧ། ཏཏྠ དུཝིདྷཾ ཙཀྑུ – མཾསཙཀྑུ པཉྙཱཙཀྑུ ཙ། ཨེཏེསུ ‘བུདྡྷཙཀྑུ སམནྟཙཀྑུ ཉཱཎཙཀྑུ དིབྦཙཀྑུ དྷམྨཙཀྑཱུ’ཏི པཉྩཝིདྷཾ པཉྙཱཙཀྑུ། ཏཏྠ ‘‘ཨདྡསཾ ཁོ ཨཧཾ, བྷིཀྑཝེ, བུདྡྷཙཀྑུནཱ ལོཀཾ ཝོལོཀེནྟོ སཏྟེ ཨཔྤརཛཀྑེ…པེ॰… དུཝིཉྙཱཔཡེ’’ཏི (མ॰ ནི॰ ༡.༢༨༣) ཨིདཾ བུདྡྷཙཀྑུ ནཱམ། ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི ཨིདཾ སམནྟཙཀྑུ ནཱམ། ‘‘ཙཀྑུཾ ཨུདཔཱདི ཉཱཎཾ ཨུདཔཱདཱི’’ཏི (སཾ॰ ནི॰ ༥.༡༠༨༡; མཧཱཝ॰ ༡༥) ཨིདཾ ཉཱཎཙཀྑུ ནཱམ། ‘‘ཨདྡསཾ ཁོ ཨཧཾ, བྷིཀྑཝེ, དིབྦེན ཙཀྑུནཱ ཝིསུདྡྷེནཱ’’ཏི (མ॰ ནི॰ ༡.༢༨༤) ཨིདཾ དིབྦཙཀྑུ ནཱམ། ‘‘ཏསྨིཾ ཡེཝཱསནེ ཝིརཛཾ ཝཱིཏམལཾ དྷམྨཙཀྑུཾ ཨུདཔཱདཱི’’ཏི (མ॰ ནི॰ ༢.༣༩༥) ཨིདཾ ཧེཊྛིམམགྒཏྟཡསངྑཱཏཾ ཉཱཎཾ དྷམྨཙཀྑུ ནཱམ།

    596. Evaṃ tevīsatividhaṃ upādārūpaṃ saṅkhepato uddisitvā puna tadeva vitthārato niddisanto katamaṃ taṃ rūpaṃ cakkhāyatanantiādimāha. Tattha duvidhaṃ cakkhu – maṃsacakkhu paññācakkhu ca. Etesu ‘buddhacakkhu samantacakkhu ñāṇacakkhu dibbacakkhu dhammacakkhū’ti pañcavidhaṃ paññācakkhu. Tattha ‘‘addasaṃ kho ahaṃ, bhikkhave, buddhacakkhunā lokaṃ volokento satte apparajakkhe…pe… duviññāpaye’’ti (ma. ni. 1.283) idaṃ buddhacakkhu nāma. ‘‘Samantacakkhu vuccati sabbaññutaññāṇa’’nti idaṃ samantacakkhu nāma. ‘‘Cakkhuṃ udapādi ñāṇaṃ udapādī’’ti (saṃ. ni. 5.1081; mahāva. 15) idaṃ ñāṇacakkhu nāma. ‘‘Addasaṃ kho ahaṃ, bhikkhave, dibbena cakkhunā visuddhenā’’ti (ma. ni. 1.284) idaṃ dibbacakkhu nāma. ‘‘Tasmiṃ yevāsane virajaṃ vītamalaṃ dhammacakkhuṃ udapādī’’ti (ma. ni. 2.395) idaṃ heṭṭhimamaggattayasaṅkhātaṃ ñāṇaṃ dhammacakkhu nāma.

    མཾསཙཀྑུཔི པསཱདཙཀྑུ སསམྦྷཱརཙཀྑཱུཏི དུཝིདྷཾ ཧོཏི། ཏཏྠ ཡོཡཾ ཨཀྑིཀཱུཔཀེ པཏིཊྛིཏོ ཧེཊྛཱ ཨཀྑིཀཱུཔཀཊྛིཀེན, ཨུཔརི བྷམུཀཊྛིཀེན, ཨུབྷཏོ ཨཀྑིཀཱུཊེཧི, ཨནྟོ མཏྠལུངྒེན, བཧིདྡྷཱ ཨཀྑིལོམེཧི པརིཙྪིནྣོ མཾསཔིཎྜོ། སངྑེཔཏོ ‘ཙཏསྶོ དྷཱཏུཡོ, ཝཎྞོ གནྡྷོ རསོ ཨོཛཱ, སམྦྷཝོ སཎྛཱནཾ, ཛཱིཝིཏཾ བྷཱཝོ ཀཱཡཔསཱདོ ཙཀྑུཔསཱདོ’ཏི ཙུདྡསསམྦྷཱརོ། ཝིཏྠཱརཏོ ‘ཙཏསྶོ དྷཱཏུཡོ, ཏཾསནྣིསྶིཏཝཎྞགནྡྷརསཨོཛཱསཎྛཱནསམྦྷཝཱ ཙཱ’ཏི ཨིམཱནི དས ཙཏུསམུཊྛཱནིཀཏྟཱ ཙཏྟཱལཱིསཾ ཧོནྟི། ཛཱིཝིཏཾ བྷཱཝོ ཀཱཡཔསཱདོ ཙཀྑུཔསཱདོཏི ཙཏྟཱརི ཨེཀནྟཀམྨསམུཊྛཱནཱནེཝཱཏི ཨིམེསཾ ཙཏུཙཏྟཱལཱིསཱཡ རཱུཔཱནཾ ཝསེན ཙཏུཙཏྟཱལཱིསསམྦྷཱརོ། ཡཾ ལོཀོ སེཏཾ ཙཀྑུཾ པུཐུལཾ ཝིསཊཾ ཝིཏྠིཎྞཾ ‘ཙཀྑུ’ནྟི སཉྫཱནནྟོ ན ཙཀྑུཾ སཉྫཱནཱཏི, ཝཏྠུཾ ཙཀྑུཏོ སཉྫཱནཱཏི, སོ མཾསཔིཎྜོ ཨཀྑིཀཱུཔེ པཏིཊྛིཏོ, ནྷཱརུསུཏྟཀེན མཏྠལུངྒེ ཨཱབདྡྷོ, ཡཏྠ སེཏམྤི ཨཏྠི, ཀཎྷམྤི ལོཧིཏཀམྤི, པཐཝཱིཔི ཨཱཔོཔི ཏེཛོཔི ཝཱཡོཔི, ཡཾ སེམྷཱུསྶདཏྟཱ སེཏཾ, པིཏྟུསྶདཏྟཱ ཀཎྷཾ, རུཧིརུསྶདཏྟཱ ལོཧིཏཀཾ, པཐཝུསྶདཏྟཱ པཏྠིཎྞཾ ཧོཏི, ཨཱཔུསྶདཏྟཱ པགྒྷརཏི, ཏེཛུསྶདཏྟཱ པརིདཡ྄ཧཏི, ཝཱཡུསྶདཏྟཱ སམྦྷམཏི, ཨིདཾ སསམྦྷཱརཙཀྑུ ནཱམ།

    Maṃsacakkhupi pasādacakkhu sasambhāracakkhūti duvidhaṃ hoti. Tattha yoyaṃ akkhikūpake patiṭṭhito heṭṭhā akkhikūpakaṭṭhikena, upari bhamukaṭṭhikena, ubhato akkhikūṭehi, anto matthaluṅgena, bahiddhā akkhilomehi paricchinno maṃsapiṇḍo. Saṅkhepato ‘catasso dhātuyo, vaṇṇo gandho raso ojā, sambhavo saṇṭhānaṃ, jīvitaṃ bhāvo kāyapasādo cakkhupasādo’ti cuddasasambhāro. Vitthārato ‘catasso dhātuyo, taṃsannissitavaṇṇagandharasaojāsaṇṭhānasambhavā cā’ti imāni dasa catusamuṭṭhānikattā cattālīsaṃ honti. Jīvitaṃ bhāvo kāyapasādo cakkhupasādoti cattāri ekantakammasamuṭṭhānānevāti imesaṃ catucattālīsāya rūpānaṃ vasena catucattālīsasambhāro. Yaṃ loko setaṃ cakkhuṃ puthulaṃ visaṭaṃ vitthiṇṇaṃ ‘cakkhu’nti sañjānanto na cakkhuṃ sañjānāti, vatthuṃ cakkhuto sañjānāti, so maṃsapiṇḍo akkhikūpe patiṭṭhito, nhārusuttakena matthaluṅge ābaddho, yattha setampi atthi, kaṇhampi lohitakampi, pathavīpi āpopi tejopi vāyopi, yaṃ semhūssadattā setaṃ, pittussadattā kaṇhaṃ, ruhirussadattā lohitakaṃ, pathavussadattā patthiṇṇaṃ hoti, āpussadattā paggharati, tejussadattā paridayhati, vāyussadattā sambhamati, idaṃ sasambhāracakkhu nāma.

    ཡོ པནེཏྠ སིཏོ ཨེཏྠ པཊིབདྡྷོ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ, ཨིདཾ པསཱདཙཀྑུ ནཱམ། ཏདེཏཾ ཏསྶ སསམྦྷཱརཙཀྑུནོ སེཏམཎྜལཔརིཀྑིཏྟསྶ ཀཎྷམཎྜལསྶ མཛ྄ཛྷེ, ཨབྷིམུཁེ ཋིཏཱནཾ སརཱིརསཎྛཱནུཔྤཏྟིདེསབྷཱུཏེ དིཊྛིམཎྜལེ, སཏྟསུ པིཙུཔཊལེསུ ཨཱསིཏྟཏེལཾ པིཙུཔཊལཱནི ཝིཡ, སཏྟཀྑིཔཊལཱནི བྱཱཔེཏྭཱ, དྷཱརཎནྷཱཔནམཎྜནབཱིཛནཀིཙྩཱཧི ཙཏཱུཧི དྷཱཏཱིཧི ཁཏྟིཡཀུམཱརོ ཝིཡ, སནྡྷཱརཎཨཱབནྡྷནཔརིཔཱཙནསམུདཱིརཎཀིཙྩཱཧི ཙཏཱུཧི དྷཱཏཱུཧི ཀཏཱུཔཀཱརཾ, ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ, ཨཱཡུནཱ ཨནུཔཱལིཡམཱནཾ, ཝཎྞགནྡྷརསཱདཱིཧི པརིཝུཏཾ, པམཱཎཏོ ཨཱུཀཱསིརམཏྟཾ, ཙཀྑུཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི། ཝུཏྟམྤི ཙེཏཾ དྷམྨསེནཱཔཏིནཱ –

    Yo panettha sito ettha paṭibaddho catunnaṃ mahābhūtānaṃ upādāya pasādo, idaṃ pasādacakkhu nāma. Tadetaṃ tassa sasambhāracakkhuno setamaṇḍalaparikkhittassa kaṇhamaṇḍalassa majjhe, abhimukhe ṭhitānaṃ sarīrasaṇṭhānuppattidesabhūte diṭṭhimaṇḍale, sattasu picupaṭalesu āsittatelaṃ picupaṭalāni viya, sattakkhipaṭalāni byāpetvā, dhāraṇanhāpanamaṇḍanabījanakiccāhi catūhi dhātīhi khattiyakumāro viya, sandhāraṇaābandhanaparipācanasamudīraṇakiccāhi catūhi dhātūhi katūpakāraṃ, utucittāhārehi upatthambhiyamānaṃ, āyunā anupāliyamānaṃ, vaṇṇagandharasādīhi parivutaṃ, pamāṇato ūkāsiramattaṃ, cakkhuviññāṇādīnaṃ yathārahaṃ vatthudvārabhāvaṃ sādhayamānaṃ tiṭṭhati. Vuttampi cetaṃ dhammasenāpatinā –

    ‘‘ཡེན ཙཀྑུཔྤསཱདེན, རཱུཔཱནི མནུཔསྶཏི།

    ‘‘Yena cakkhuppasādena, rūpāni manupassati;

    པརིཏྟཾ སུཁུམཾ ཨེཏཾ, ཨཱུཀཱསིརསམཱུཔམ’’ནྟི༎

    Parittaṃ sukhumaṃ etaṃ, ūkāsirasamūpama’’nti.

    ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ། ཡཾ ཙཀྑུ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོཏི ཨིདྷཱཔི ཨུཔཡོགཏྠེཡེཝ སཱམིཝཙནཾ; ཙཏྟཱརི མཧཱབྷཱུཏཱནི ཨུཔཱདིཡིཏྭཱ པཝཏྟཔྤསཱདོཏི ཨཏྠོ། ཨིམིནཱ པསཱདཙཀྑུམེཝ གཎྷཱཏི, སེསཙཀྑུཾ པཊིཀྑིཔཏི། ཡཾ པན ཨིནྡྲིཡགོཙརསུཏྟེ ‘‘ཨེཀཾ མཧཱབྷཱུཏཾ ཨུཔཱདཱཡ པསཱདོ པཐཝཱིདྷཱཏུཡཱ ཏཱིཧི མཧཱབྷཱུཏེཧི སངྒཧིཏོ ཨཱཔོདྷཱཏུཡཱ ཙ ཏེཛོདྷཱཏུཡཱ ཙ ཝཱཡོདྷཱཏུཡཱ ཙ,’’ ཙཏུཔརིཝཏྟསུཏྟེ ‘‘དྭིནྣཾ མཧཱབྷཱུཏཱནཾ ཨུཔཱདཱཡ པསཱདོ པཐཝཱིདྷཱཏུཡཱ ཙ ཨཱཔོདྷཱཏུཡཱ ཙ དྭཱིཧི མཧཱབྷཱུཏེཧི སངྒཧིཏོ ཏེཛོདྷཱཏུཡཱ ཙ ཝཱཡོདྷཱཏུཡཱ ཙཱ’’ཏི ཝུཏྟཾ, ཏཾ པརིཡཱཡེན ཝུཏྟཾ། ཨཡཉྷི སུཏྟནྟིཀཀཐཱ ནཱམ པརིཡཱཡདེསནཱ ། ཡོ ཙ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ སོ ཏེསུ ཨེཀེཀསྶཱཔི དིནྣཾ དྭིནྣམྤི པསཱདོཡེཝཱཏི ཨིམིནཱ པརིཡཱཡེན ཏཏྠ དེསནཱ ཨཱགཏཱ། ཨབྷིདྷམྨོ པན ནིཔྤརིཡཱཡདེསནཱ ནཱམ། ཏསྨཱ ཨིདྷ ‘ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ’ཏི ཝུཏྟཾ།

    Cakkhu ca taṃ āyatanañcāti cakkhāyatanaṃ. Yaṃ cakkhu catunnaṃ mahābhūtānaṃ upādāya pasādoti idhāpi upayogattheyeva sāmivacanaṃ; cattāri mahābhūtāni upādiyitvā pavattappasādoti attho. Iminā pasādacakkhumeva gaṇhāti, sesacakkhuṃ paṭikkhipati. Yaṃ pana indriyagocarasutte ‘‘ekaṃ mahābhūtaṃ upādāya pasādo pathavīdhātuyā tīhi mahābhūtehi saṅgahito āpodhātuyā ca tejodhātuyā ca vāyodhātuyā ca,’’ catuparivattasutte ‘‘dvinnaṃ mahābhūtānaṃ upādāya pasādo pathavīdhātuyā ca āpodhātuyā ca dvīhi mahābhūtehi saṅgahito tejodhātuyā ca vāyodhātuyā cā’’ti vuttaṃ, taṃ pariyāyena vuttaṃ. Ayañhi suttantikakathā nāma pariyāyadesanā . Yo ca catunnaṃ mahābhūtānaṃ upādāya pasādo so tesu ekekassāpi dinnaṃ dvinnampi pasādoyevāti iminā pariyāyena tattha desanā āgatā. Abhidhammo pana nippariyāyadesanā nāma. Tasmā idha ‘catunnaṃ mahābhūtānaṃ upādāya pasādo’ti vuttaṃ.

    ‘ཨཡཾ མེ ཨཏྟཱ’ཏི བཱལཛནེན པརིགྒཧིཏཏྟཱ ཨཏྟབྷཱཝོ ཝུཙྩཏི སརཱིརམྤི ཁནྡྷཔཉྩཀམྤི། ཏསྨིཾ པརིཡཱཔནྣོ ཏནྣིསྶིཏོཏི ཨཏྟབྷཱཝཔརིཡཱཔནྣོ ཙཀྑུཝིཉྙཱཎེན པསྶིཏུཾ ན སཀྐཱཏི ཨནིདསྶནོ། པཊིགྷཊྚནཱནིགྷཾསོ ཨེཏྠ ཛཱཡཏཱིཏི སཔྤཊིགྷོ།

    ‘Ayaṃ me attā’ti bālajanena pariggahitattā attabhāvo vuccati sarīrampi khandhapañcakampi. Tasmiṃ pariyāpanno tannissitoti attabhāvapariyāpanno cakkhuviññāṇena passituṃ na sakkāti anidassano. Paṭighaṭṭanānighaṃso ettha jāyatīti sappaṭigho.

    ཡེནཱཏིཨཱདཱིསུ ཨཡཾ སངྑེཔཏྠོ – ཡེན ཀརཎབྷཱུཏེན ཙཀྑུནཱ ཨཡཾ སཏྟོ ཨིདཾ ཝུཏྟཔྤཀཱརཾ རཱུཔཾ ཨཏཱིཏེ པསྶི ཝཱ, ཝཏྟམཱནེ པསྶཏི ཝཱ, ཨནཱགཏེ པསྶིསྶཏི ཝཱ, སཙསྶ ཨཔརིབྷིནྣཾ ཙཀྑུ བྷཝེཡྻ, ཨཐཱནེན ཨཱཔཱཐགཏཾ རཱུཔཾ པསྶེ ཝཱ, ཨཏཱིཏཾ ཝཱ རཱུཔཾ ཨཏཱིཏེན ཙཀྑུནཱ པསྶི, པཙྩུཔྤནྣཾ པཙྩུཔྤནྣེན པསྶཏི, ཨནཱགཏཾ ཨནཱགཏེན པསྶིསྶཏི, སཙེ ཏཾ རཱུཔཾ ཙཀྑུསྶ ཨཱཔཱཐཾ ཨཱགཙྪེཡྻ ཙཀྑུནཱ ཏཾ རཱུཔཾ པསྶེཡྻཱཏི ཨིདམེཏྠ པརིཀཔྤཝཙནཾ། དསྶནཔརིཎཱཡཀཊྛེན ཙཀྑུཾཔེཏཾ, སཉྫཱཏིསམོསརཎཊྛེན ཙཀྑཱཡཏནཾཔེཏཾ, སུཉྙཏབྷཱཝནིསྶཏྟཊྛེན ཙཀྑུདྷཱཏུཔེསཱ། དསྶནལཀྑཎེ ཨིནྡཊྛཾ ཀཱརེཏཱིཏི ཙཀྑུནྡྲིཡཾཔེཏཾ། ལུཛྫནཔལུཛྫནཊྛེན ལོཀོཔེསོ། ཝལ༹ཉྫནཊྛེན དྭཱརཱཔེསཱ། ཨཔཱུརཎཱིཡཊྛེན སམུདྡོཔེསོ། པརིསུདྡྷཊྛེན པཎྜརཾཔེཏཾ། ཕསྶཱདཱིནཾ ཨབྷིཛཱཡནཊྛེན ཁེཏྟཾཔེཏཾ། ཏེསཾཡེཝ པཏིཊྛཱནཊྛེན ཝཏྠུཾཔེཏཾ། སམཝིསམཾ དསྶེནྟཾ ཨཏྟབྷཱཝཾ ནེཏཱིཏི ནེཏྟཾཔེཏཾ། ཏེནེཝཊྛེན ནཡནཾཔེཏཾ ། སཀྐཱཡཔརིཡཱཔནྣཊྛེན ཨོརིམཾ ཏཱིརཾཔེཏཾ། བཧུསཱདྷཱརཎཊྛེན ཨསྶཱམིཀཊྛེན ཙ སུཉྙོ གཱམོཔེསོཏི།

    Yenātiādīsu ayaṃ saṅkhepattho – yena karaṇabhūtena cakkhunā ayaṃ satto idaṃ vuttappakāraṃ rūpaṃ atīte passi vā, vattamāne passati vā, anāgate passissati vā, sacassa aparibhinnaṃ cakkhu bhaveyya, athānena āpāthagataṃ rūpaṃ passe vā, atītaṃ vā rūpaṃ atītena cakkhunā passi, paccuppannaṃ paccuppannena passati, anāgataṃ anāgatena passissati, sace taṃ rūpaṃ cakkhussa āpāthaṃ āgaccheyya cakkhunā taṃ rūpaṃ passeyyāti idamettha parikappavacanaṃ. Dassanapariṇāyakaṭṭhena cakkhuṃpetaṃ, sañjātisamosaraṇaṭṭhena cakkhāyatanaṃpetaṃ, suññatabhāvanissattaṭṭhena cakkhudhātupesā. Dassanalakkhaṇe indaṭṭhaṃ kāretīti cakkhundriyaṃpetaṃ. Lujjanapalujjanaṭṭhena lokopeso. Vaḷañjanaṭṭhena dvārāpesā. Apūraṇīyaṭṭhena samuddopeso. Parisuddhaṭṭhena paṇḍaraṃpetaṃ. Phassādīnaṃ abhijāyanaṭṭhena khettaṃpetaṃ. Tesaṃyeva patiṭṭhānaṭṭhena vatthuṃpetaṃ. Samavisamaṃ dassentaṃ attabhāvaṃ netīti nettaṃpetaṃ. Tenevaṭṭhena nayanaṃpetaṃ. Sakkāyapariyāpannaṭṭhena orimaṃ tīraṃpetaṃ. Bahusādhāraṇaṭṭhena assāmikaṭṭhena ca suñño gāmopesoti.

    ཨེཏྟཱཝཏཱ ‘པསྶི ཝཱ’ཏིཨཱདཱིཧི ཙཏཱུཧི པདེཧི ཙཀྑུཾཔེཏནྟིཨཱདཱིནི ཙུདྡས ནཱམཱནི ཡོཛེཏྭཱ ཙཀྑཱཡཏནསྶ ཙཏྟཱརོ ཝཝཏྠཱཔནནཡཱ ཝུཏྟཱཏི ཝེདིཏབྦཱ། ཀཐཾ? ཨེཏྠ ཧི ཡེན ཙཀྑུནཱ ཨནིདསྶནེན སཔྤཊིགྷེན རཱུཔཾ སནིདསྶནཾ སཔྤཊིགྷཾ པསྶི ཝཱ ཙཀྑུཾཔེཏཾ…པེ॰… སུཉྙོ གཱམོཔེསོ, ཨིདཾ ཏཾ རཱུཔཾ ཙཀྑཱཡཏནནྟི ཨཡམེཀོ ནཡོ། ཨེཝཾ སེསཱཔི ཝེདིཏབྦཱ།

    Ettāvatā ‘passi vā’tiādīhi catūhi padehi cakkhuṃpetantiādīni cuddasa nāmāni yojetvā cakkhāyatanassa cattāro vavatthāpananayā vuttāti veditabbā. Kathaṃ? Ettha hi yena cakkhunā anidassanena sappaṭighena rūpaṃ sanidassanaṃ sappaṭighaṃ passi vā cakkhuṃpetaṃ…pe… suñño gāmopeso, idaṃ taṃ rūpaṃ cakkhāyatananti ayameko nayo. Evaṃ sesāpi veditabbā.

    ༥༩༧. ཨིདཱནི ཡསྨཱ ཝིཛྫུནིཙྪརཎཱདིཀཱལེསུ ཨནོལོཀེཏུཀཱམསྶཱཔི རཱུཔཾ ཙཀྑུཔསཱདཾ གྷཊྚེཏི, ཏསྨཱ ཏཾ ཨཱཀཱརཾ དསྶེཏུཾ དུཏིཡོ ནིདྡེསཝཱརོ ཨཱརདྡྷོ། ཏཏྠ ཡམྷི ཙཀྑུམྷཱིཏི ཡམྷི ཨདྷིཀརཎབྷཱུཏེ ཙཀྑུམྷི། རཱུཔནྟི པཙྩཏྟཝཙནམེཏཾ། ཏཏྠ པཊིཧཉྙི ཝཱཏི ཨཏཱིཏཏྠོ། པཊིཧཉྙཏི ཝཱཏི པཙྩུཔྤནྣཏྠོ། པཊིཧཉྙིསྶཏི ཝཱཏི ཨནཱགཏཏྠོ། པཊིཧཉྙེ ཝཱཏི ཝིཀཔྤནཏྠོ། ཨཏཱིཏཉྷི རཱུཔཾ ཨཏཱིཏེ ཙཀྑུསྨིཾ པཊིཧཉྙི ནཱམ། པཙྩུཔྤནྣཾ པཙྩུཔྤནྣེ པཊིཧཉྙཏི ནཱམ། ཨནཱགཏཾ ཨནཱགཏེ པཊིཧཉྙིསྶཏི ནཱམ། སཙེ ཏཾ རཱུཔཾ ཙཀྑུསྶ ཨཱཔཱཐཾ ཨཱགཙྪེཡྻ, ཙཀྑུམྷི པཊིཧཉྙེཡྻ ཏཾ རཱུཔནྟི ཨཡམེཏྠ པརིཀཔྤོ། ཨཏྠཏོ པན པསཱདཾ གྷཊྚཡམཱནམེཝ རཱུཔཾ པཊིཧཉྙཏི ནཱམ། ཨིདྷཱཔི པུརིམནཡེནེཝ ཙཏྟཱརོ ཝཝཏྠཱཔནནཡཱ ཝེདིཏབྦཱ།

    597. Idāni yasmā vijjuniccharaṇādikālesu anoloketukāmassāpi rūpaṃ cakkhupasādaṃ ghaṭṭeti, tasmā taṃ ākāraṃ dassetuṃ dutiyo niddesavāro āraddho. Tattha yamhi cakkhumhīti yamhi adhikaraṇabhūte cakkhumhi. Rūpanti paccattavacanametaṃ. Tattha paṭihaññi vāti atītattho. Paṭihaññativāti paccuppannattho. Paṭihaññissati vāti anāgatattho. Paṭihaññe vāti vikappanattho. Atītañhi rūpaṃ atīte cakkhusmiṃ paṭihaññi nāma. Paccuppannaṃ paccuppanne paṭihaññati nāma. Anāgataṃ anāgate paṭihaññissati nāma. Sace taṃ rūpaṃ cakkhussa āpāthaṃ āgaccheyya, cakkhumhi paṭihaññeyya taṃ rūpanti ayamettha parikappo. Atthato pana pasādaṃ ghaṭṭayamānameva rūpaṃ paṭihaññati nāma. Idhāpi purimanayeneva cattāro vavatthāpananayā veditabbā.

    ༥༩༨. ཨིདཱནི ཡསྨཱ ཨཏྟནོ ཨིཙྪཱཡ ཨོལོཀེཏུཀཱམསྶ རཱུཔེ ཙཀྑུཾ ཨུཔསཾཧརཏོ ཙཀྑུ རཱུཔསྨིཾ པཊིཧཉྙཏི, ཏསྨཱ ཏཾ ཨཱཀཱརཾ དསྶེཏུཾ ཏཏིཡོ ནིདྡེསཝཱརོ ཨཱརདྡྷོ། སོ ཨཏྠཏོ པཱཀཊོཡེཝ། ཨེཏྠ པན ཙཀྑུ ཨཱརམྨཎཾ སམྤཊིཙྪམཱནམེཝ རཱུཔམྷི པཊིཧཉྙཏི ནཱམ། ཨིདྷཱཔི པུརིམནཡེནེཝ ཙཏྟཱརོ ཝཝཏྠཱཔནནཡཱ ཝེདིཏབྦཱ།

    598. Idāni yasmā attano icchāya oloketukāmassa rūpe cakkhuṃ upasaṃharato cakkhu rūpasmiṃ paṭihaññati, tasmā taṃ ākāraṃ dassetuṃ tatiyo niddesavāro āraddho. So atthato pākaṭoyeva. Ettha pana cakkhu ārammaṇaṃ sampaṭicchamānameva rūpamhi paṭihaññati nāma. Idhāpi purimanayeneva cattāro vavatthāpananayā veditabbā.

    ༥༩༩. ཨིཏོ པརཾ ཕསྶཔཉྩམཀཱནཾ ཨུཔྤཏྟིདསྶནཝསེན པཉྩ, ཏེསཾཡེཝ ཨཱརམྨཎཔཊིབདྡྷཨུཔྤཏྟིདསྶནཝསེན པཉྩཱཏི, དས ཝཱརཱ དསྶིཏཱ། ཏཏྠ ཙཀྑུཾ ནིསྶཱཡཱཏི ཙཀྑུཾ ནིསྶཱཡ, པཙྩཡཾ ཀཏྭཱ། རཱུཔཾ ཨཱརབྦྷཱཏི རཱུཔཱརམྨཎཾ ཨཱགམྨ, སནྡྷཱཡ, པཊིཙྩ། ཨིམིནཱ ཙཀྑུཔསཱདཝཏྠུཀཱནཾ ཕསྶཱདཱིནཾ པུརེཛཱཏཔཙྩཡེན ཙཀྑུདྭཱརཛཝནཝཱིཐིཔརིཡཱཔནྣཱནཾ ཨཱརམྨཎཱདྷིཔཏིཨཱརམྨཎཱུཔནིསྶཡཔཙྩཡེཧི རཱུཔསྶ པཙྩཡབྷཱཝོ དསྶིཏོ། ཨིཏརེསུ པཉྩསུ ཝཱརེསུ རཱུཔཾ ཨཱརམྨཎམསྶཱཏི རཱུཔཱརམྨཎོཏི ཨེཝཾ ཨཱརམྨཎཔཙྩཡམཏྟེནེཝ པཙྩཡབྷཱཝོ དསྶིཏོ། ཡཐཱ པན པུརིམེསུ ཏཱིསུ, ཨེཝཾ ཨིམེསུཔི དསསུ ཝཱརེསུ ཙཏྟཱརོ ཙཏྟཱརོ ཝཝཏྠཱཔནནཡཱ ཝེདིཏབྦཱ། ཨེཝཾ ཀཏམཾ ཏཾ རཱུཔཾ ཙཀྑཱཡཏནནྟི པུཙྪཱཡ ཨུདྡྷཊཾ ཙཀྑུཾ ‘ཨིདཾ ཏ’ནྟི ནཱནཔྤཀཱརཏོ དསྶེཏུཾ, པུརིམཱ ཏཡོ, ཨིམེ དསཱཏི, ཏེརས ནིདྡེསཝཱརཱ དསྶིཏཱ། ཨེཀེཀསྨིཉྩེཏྠ ཙཏུནྣཾ ཙཏུནྣཾ ཝཝཏྠཱཔནནཡཱནཾ ཨཱགཏཏྟཱ དྭིཔཉྙཱསཱཡ ནཡེཧི པཊིམཎྜེཏྭཱཝ དསྶིཏཱཏི ཝེདིཏབྦཱ།

    599. Ito paraṃ phassapañcamakānaṃ uppattidassanavasena pañca, tesaṃyeva ārammaṇapaṭibaddhauppattidassanavasena pañcāti, dasa vārā dassitā. Tattha cakkhuṃ nissāyāti cakkhuṃ nissāya, paccayaṃ katvā. Rūpaṃ ārabbhāti rūpārammaṇaṃ āgamma, sandhāya, paṭicca. Iminā cakkhupasādavatthukānaṃ phassādīnaṃ purejātapaccayena cakkhudvārajavanavīthipariyāpannānaṃ ārammaṇādhipatiārammaṇūpanissayapaccayehi rūpassa paccayabhāvo dassito. Itaresu pañcasu vāresu rūpaṃ ārammaṇamassāti rūpārammaṇoti evaṃ ārammaṇapaccayamatteneva paccayabhāvo dassito. Yathā pana purimesu tīsu, evaṃ imesupi dasasu vāresu cattāro cattāro vavatthāpananayā veditabbā. Evaṃ katamaṃ taṃ rūpaṃ cakkhāyatananti pucchāya uddhaṭaṃ cakkhuṃ ‘idaṃ ta’nti nānappakārato dassetuṃ, purimā tayo, ime dasāti, terasa niddesavārā dassitā. Ekekasmiñcettha catunnaṃ catunnaṃ vavatthāpananayānaṃ āgatattā dvipaññāsāya nayehi paṭimaṇḍetvāva dassitāti veditabbā.

    ༦༠༠. ཨིཏོ པརེསུ སོཏཱཡཏནཱདིནིདྡེསེསུཔི ཨེསེཝ ནཡོ། ཝིསེསམཏྟཾ པནེཏྠ ཨེཝཾ ཝེདིཏབྦཾ – སུཎཱཏཱིཏི སོཏཾ། ཏཾ སསམྦྷཱརསོཏབིལསྶ ཨནྟོ ཏནུཏམྦལོམཱཙིཏེ ཨངྒུལིཝེདྷཀསཎྛཱནེ པདེསེ ཝུཏྟཔྤཀཱརཱཧི དྷཱཏཱུཧི ཀཏཱུཔཀཱརཾ, ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ, ཨཱཡུནཱ ཨནུཔཱལིཡམཱནཾ, ཝཎྞཱདཱིཧི པརིཝུཏཾ སོཏཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི།

    600. Ito paresu sotāyatanādiniddesesupi eseva nayo. Visesamattaṃ panettha evaṃ veditabbaṃ – suṇātīti sotaṃ. Taṃ sasambhārasotabilassa anto tanutambalomācite aṅgulivedhakasaṇṭhāne padese vuttappakārāhi dhātūhi katūpakāraṃ, utucittāhārehi upatthambhiyamānaṃ, āyunā anupāliyamānaṃ, vaṇṇādīhi parivutaṃ sotaviññāṇādīnaṃ yathārahaṃ vatthudvārabhāvaṃ sādhayamānaṃ tiṭṭhati.

    གྷཱཡཏཱིཏི གྷཱནཾ། ཏཾ སསམྦྷཱརགྷཱནབིལསྶ ཨནྟོ ཨཛཔྤདསཎྛཱནེ པདེསེ ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརཾ ཧུཏྭཱ གྷཱནཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི།

    Ghāyatīti ghānaṃ. Taṃ sasambhāraghānabilassa anto ajappadasaṇṭhāne padese yathāvuttappakāraupakārupatthambhanānupālanaparivāraṃ hutvā ghānaviññāṇādīnaṃ yathārahaṃ vatthudvārabhāvaṃ sādhayamānaṃ tiṭṭhati.

    སཱཡནཊྛེན ཛིཝ྄ཧཱ། སཱ སསམྦྷཱརཛིཝ྄ཧཱམཛ྄ཛྷསྶ ཨུཔརི ཨུཔྤལདལགྒསཎྛཱནེ པདེསེ ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརཱ ཧུཏྭཱ ཛིཝ྄ཧཱཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཱ ཏིཊྛཏི།

    Sāyanaṭṭhena jivhā. Sā sasambhārajivhāmajjhassa upari uppaladalaggasaṇṭhāne padese yathāvuttappakāraupakārupatthambhanānupālanaparivārā hutvā jivhāviññāṇādīnaṃ yathārahaṃ vatthudvārabhāvaṃ sādhayamānā tiṭṭhati.

    ཡཱཝཏཱ པན ཨིམསྨིཾ ཀཱཡེ ཨུཔཱདིཎྞཀརཱུཔཾ ནཱམ ཨཏྠི, སབྦཏྠ ཀཱཡཱཡཏནཾ, ཀཔྤཱསཔཊལེ སྣེཧོ ཝིཡ, ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརམེཝ ཧུཏྭཱ ཀཱཡཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི། ཨཡམེཏྠ ཝིསེསོ། སེསོ པཱལི༹པྤབྷེདོ ཙ ཨཏྠོ ཙ ཙཀྑུནིདྡེསེ ཝུཏྟནཡེནེཝ ཝེདིཏབྦོ། ཀེཝལཉྷི ཨིདྷ ཙཀྑུཔདསྶ ཋཱནེ སོཏཔདཱདཱིནི, རཱུཔཔདསྶ ཋཱནེ སདྡཔདཱདཱིནི, པསྶཱིཏི ཨཱདཱིནཾ ཋཱནེ སུཎཱིཏིཨཱདིཔདཱནི ཙ ཨཱགཏཱནི། ‘ནེཏྟཾཔེཏཾ , ནཡནཾཔེཏ’ནྟི ཨིམསྶ ཙ པདདྭཡསྶ ཨབྷཱཝཱ དྭཱདས དྭཱདས ནཱམཱནི ཧོནྟི། སེསཾ སབྦཏྠ ཝུཏྟསདིསམེཝ།

    Yāvatā pana imasmiṃ kāye upādiṇṇakarūpaṃ nāma atthi, sabbattha kāyāyatanaṃ, kappāsapaṭale sneho viya, yathāvuttappakāraupakārupatthambhanānupālanaparivārameva hutvā kāyaviññāṇādīnaṃ yathārahaṃ vatthudvārabhāvaṃ sādhayamānaṃ tiṭṭhati. Ayamettha viseso. Seso pāḷippabhedo ca attho ca cakkhuniddese vuttanayeneva veditabbo. Kevalañhi idha cakkhupadassa ṭhāne sotapadādīni, rūpapadassa ṭhāne saddapadādīni, passīti ādīnaṃ ṭhāne suṇītiādipadāni ca āgatāni. ‘Nettaṃpetaṃ , nayanaṃpeta’nti imassa ca padadvayassa abhāvā dvādasa dvādasa nāmāni honti. Sesaṃ sabbattha vuttasadisameva.

    ཏཏྠ སིཡཱ – ཡདི ཡཱཝཏཱ ཨིམསྨིཾ ཀཱཡེ ཨུཔཱདིཎྞཀརཱུཔཾ ནཱམ ཨཏྠི, སབྦཏྠ ཀཱཡཱཡཏནཾ, ཀཔྤཱསཔཊལེ སྣེཧོ ཝིཡ། ‘ཨེཝཾ སནྟེ ལཀྑཎསམྨིསྶཏཱ ཨཱཔཛྫཏཱི’ཏི། ‘ནཱཔཛྫཏཱི’ཏི། ‘ཀསྨཱ’? ‘ཨཉྙསྶ ཨཉྙཏྠ ཨབྷཱཝཏོ’། ‘ཡདི ཨེཝཾ, ན སབྦཏྠ ཀཱཡཱཡཏན’ནྟི? ‘ནེཝ པརམཏྠཏོ སབྦཏྠ། ཝིནིབྦྷུཛིཏྭཱ པནསྶ ནཱནཱཀརཎཾ པཉྙཱཔེཏུཾ ན སཀྐཱ, ཏསྨཱ ཨེཝཾ ཝུཏྟཾ། ཡཐཱ ཧི རཱུཔརསཱདཡོ, ཝཱལིཀཱཙུཎྞཱནི ཝིཡ, ཝིཝེཙེཏུཾ ཨསཀྐུཎེཡྻཏཱཡ ཨཉྙམཉྙབྱཱཔིནོཏི ཝུཙྩནྟི, ན ཙ པརམཏྠཏོ རཱུཔེ རསོ ཨཏྠི། ཡདི སིཡཱ རཱུཔགྒཧཎེནེཝ རསགྒཧཎཾ གཙྪེཡྻ། ཨེཝཾ ཀཱཡཱཡཏནམྤི པརམཏྠཏོ ནེཝ སབྦཏྠ ཨཏྠི, ན ཙ སབྦཏྠ ནཏྠི, ཝིཝེཙེཏུཾ ཨསཀྐུཎེཡྻཏཱཡཱཏི། ཨེཝམེཏྠ ན ལཀྑཎསམྨིསྶཏཱ ཨཱཔཛྫཏཱིཏི ཝེདིཏབྦཱ’།

    Tattha siyā – yadi yāvatā imasmiṃ kāye upādiṇṇakarūpaṃ nāma atthi, sabbattha kāyāyatanaṃ, kappāsapaṭale sneho viya. ‘Evaṃ sante lakkhaṇasammissatā āpajjatī’ti. ‘Nāpajjatī’ti. ‘Kasmā’? ‘Aññassa aññattha abhāvato’. ‘Yadi evaṃ, na sabbattha kāyāyatana’nti? ‘Neva paramatthato sabbattha. Vinibbhujitvā panassa nānākaraṇaṃ paññāpetuṃ na sakkā, tasmā evaṃ vuttaṃ. Yathā hi rūparasādayo, vālikācuṇṇāni viya, vivecetuṃ asakkuṇeyyatāya aññamaññabyāpinoti vuccanti, na ca paramatthato rūpe raso atthi. Yadi siyā rūpaggahaṇeneva rasaggahaṇaṃ gaccheyya. Evaṃ kāyāyatanampi paramatthato neva sabbattha atthi, na ca sabbattha natthi, vivecetuṃ asakkuṇeyyatāyāti. Evamettha na lakkhaṇasammissatā āpajjatīti veditabbā’.

    ཨཔིཙ ལཀྑཎཱདིཝཝཏྠཱཔནཏོཔེཏེསཾ ཨསམྨིསྶཏཱ ཝེདིཏབྦཱ – ཨེཏེསུ ཧི རཱུཔཱབྷིགྷཱཏཱརཧབྷཱུཏཔྤསཱདལཀྑཎཾ དཊྛུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ ཙཀྑུ, རཱུཔེསུ ཨཱཝིཉྪནརསཾ, ཙཀྑུཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, དཊྛུཀཱམཏཱནིདཱནཀམྨཛབྷཱུཏཔདཊྛཱནཾ།

    Apica lakkhaṇādivavatthāpanatopetesaṃ asammissatā veditabbā – etesu hi rūpābhighātārahabhūtappasādalakkhaṇaṃ daṭṭhukāmatānidānakammasamuṭṭhānabhūtappasādalakkhaṇaṃ vā cakkhu, rūpesu āviñchanarasaṃ, cakkhuviññāṇassa ādhārabhāvapaccupaṭṭhānaṃ, daṭṭhukāmatānidānakammajabhūtapadaṭṭhānaṃ.

    སདྡཱབྷིགྷཱཏཱརཧབྷཱུཏཔྤསཱདལཀྑཎཾ སོཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ སོཏཾ, སདྡེསུ ཨཱཝིཉྪནརསཾ, སོཏཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, སོཏུཀཱམཏཱནིདཱནཀམྨཛབྷཱུཏཔདཊྛཱནཾ།

    Saddābhighātārahabhūtappasādalakkhaṇaṃ sotukāmatānidānakammasamuṭṭhānabhūtappasādalakkhaṇaṃ vā sotaṃ, saddesu āviñchanarasaṃ, sotaviññāṇassa ādhārabhāvapaccupaṭṭhānaṃ, sotukāmatānidānakammajabhūtapadaṭṭhānaṃ.

    གནྡྷཱབྷིགྷཱཏཱརཧབྷཱུཏཔྤསཱདལཀྑཎཾ གྷཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ གྷཱནཾ, གནྡྷེསུ ཨཱཝིཉྪནརསཾ, གྷཱནཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ གྷཱཡིཏུཀཱམཏཱནིདཱནཀམྨཛབྷཱུཏཔདཊྛཱནཾ།

    Gandhābhighātārahabhūtappasādalakkhaṇaṃ ghāyitukāmatānidānakammasamuṭṭhānabhūtappasādalakkhaṇaṃ vā ghānaṃ, gandhesu āviñchanarasaṃ, ghānaviññāṇassa ādhārabhāvapaccupaṭṭhānaṃ ghāyitukāmatānidānakammajabhūtapadaṭṭhānaṃ.

    རསཱབྷིགྷཱཏཱརཧབྷཱུཏཔྤསཱདལཀྑཎཱ སཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཱ ཝཱ ཛིཝ྄ཧཱ, རསེསུ ཨཱཝིཉྪནརསཱ, ཛིཝ྄ཧཱཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཱ, སཱཡིཏུཀཱམཏཱནིདཱནཀམྨཛབྷཱུཏཔདཊྛཱནཱ།

    Rasābhighātārahabhūtappasādalakkhaṇā sāyitukāmatānidānakammasamuṭṭhānabhūtappasādalakkhaṇā vā jivhā, rasesu āviñchanarasā, jivhāviññāṇassa ādhārabhāvapaccupaṭṭhānā, sāyitukāmatānidānakammajabhūtapadaṭṭhānā.

    ཕོཊྛབྦཱབྷིགྷཱཏཱརཧབྷཱུཏཔྤསཱདལཀྑཎོ ཕུསིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎོ ཝཱ ཀཱཡོ, ཕོཊྛབྦེསུ ཨཱཝིཉྪནརསོ, ཀཱཡཝིཉྙཱཎསྶ ཨཱདྷཱརབྷཱཝཔཙྩུཔཊྛཱནོ, ཕུསིཏུཀཱམཏཱནིདཱནཀམྨཛབྷཱུཏཔདཊྛཱནོ།

    Phoṭṭhabbābhighātārahabhūtappasādalakkhaṇo phusitukāmatānidānakammasamuṭṭhānabhūtappasādalakkhaṇo vā kāyo, phoṭṭhabbesu āviñchanaraso, kāyaviññāṇassa ādhārabhāvapaccupaṭṭhāno, phusitukāmatānidānakammajabhūtapadaṭṭhāno.

    ཀེཙི པན ‘ཏེཛཱདྷིཀཱནཾ བྷཱུཏཱནཾ པསཱདོ ཙཀྑུ, ཝཱཡུཔཐཝཱིཨཱཔཱདྷིཀཱནཾ བྷཱུཏཱནཾ པསཱདཱ སོཏགྷཱནཛིཝ྄ཧཱ, ཀཱཡོ སབྦེས’ནྟི ཝདནྟི། ཨཔརེ ‘ཏེཛཱདྷིཀཱནཾ པསཱདོ ཙཀྑུ, ཝིཝརཝཱཡུཨཱཔཔཐཝཱདྷིཀཱནཾ པསཱདཱ སོཏགྷཱནཛིཝ྄ཧཱཀཱཡཱ’ཏི ཝདནྟི། ཏེ ཝཏྟབྦཱ – ‘སུཏྟཾ ཨཱཧརཐཱ’ཏི། ཨདྡྷཱ སུཏྟམེཝ ན དཀྑིསྶནྟི། ཀེཙི པནེཏྠ ‘ཏེཛཱདཱིནཾ གུཎེཧི རཱུཔཱདཱིཧི ཨནུགྒཡ྄ཧབྷཱཝཏོ’ཏི ཀཱརཎཾ ཝདནྟི། ཏེ ཙ ཝཏྟབྦཱ – ‘ཀོ པནེཝམཱཧ – རཱུཔཱདཡོ ཏེཛཱདཱིནཾ གུཎཱ’ཏི? ཨཝིནིབྦྷོགེསུ ཧི རཱུཔེསུ ‘ཨཡཾ ཨིམསྶ གུཎོ, ཨཡཾ ཨིམསྶ གུཎོ’ཏི ན ལབྦྷཱ ཝཏྟུཾ། ཨཐཱཔི ཝདེཡྻུཾ – ‘ཡཐཱ ཏེསུ ཏེསུ སམྦྷཱརེསུ ཏསྶ ཏསྶ བྷཱུཏསྶ ཨདྷིཀཏཱཡ པཐཝཱིཨཱདཱིནཾ སནྡྷཱརཎཱདཱིནི ཀིཙྩཱནི ཨིཙྪཐ, ཨེཝཾ ཏེཛཱདིཨདྷིཀེསུ སམྦྷཱརེསུ རཱུཔཱདཱིནཾ ཨདྷིཀབྷཱཝདསྶནཏོ ཨིཙྪིཏབྦམེཏཾ རཱུཔཱདཡོ ཏེསཾ གུཎཱ’ཏི། ཏེ ཝཏྟབྦཱ – ཨིཙྪེཡྻཱམ , ཡདི ཨཱཔཱདྷིཀསྶ ཨཱསཝསྶ གནྡྷཏོ པཐཝཱིཨདྷིཀེ ཀཔྤཱསེ གནྡྷོ ཨདྷིཀཏརོ སིཡཱ, ཏེཛཱདྷིཀསྶ ཙ ཨུཎྷོདཀསྶ ཝཎྞཏོཔི སཱིཏཱུདཀསྶ ཝཎྞོ པརིཧཱཡེཐ། ཡསྨཱ པནེཏཾ ཨུབྷཡམྤི ནཏྠི, ཏསྨཱ པཧཱཡེཐེཏཾ ཨེཏེསཾ ནིསྶཡབྷཱུཏཱནཾ ཝིསེསཀཔྤནཾ, ཡཐཱ ཨཝིསེསེཔི ཨེཀཀལཱཔེ བྷཱུཏཱནཾ རཱུཔརསཱདཡོ ཨཉྙམཉྙཾ ཝིསདིསཱ ཧོནྟི, ཨེཝཾ ཙཀྑུཔསཱདཱདཡོ, ཨཝིཛྫམཱནེཔི ཨཉྙསྨིཾ ཝིསེསཀཱརཎེཏི གཧེཏབྦམེཏཾ།

    Keci pana ‘tejādhikānaṃ bhūtānaṃ pasādo cakkhu, vāyupathavīāpādhikānaṃ bhūtānaṃ pasādā sotaghānajivhā, kāyo sabbesa’nti vadanti. Apare ‘tejādhikānaṃ pasādo cakkhu, vivaravāyuāpapathavādhikānaṃ pasādā sotaghānajivhākāyā’ti vadanti. Te vattabbā – ‘suttaṃ āharathā’ti. Addhā suttameva na dakkhissanti. Keci panettha ‘tejādīnaṃ guṇehi rūpādīhi anuggayhabhāvato’ti kāraṇaṃ vadanti. Te ca vattabbā – ‘ko panevamāha – rūpādayo tejādīnaṃ guṇā’ti? Avinibbhogesu hi rūpesu ‘ayaṃ imassa guṇo, ayaṃ imassa guṇo’ti na labbhā vattuṃ. Athāpi vadeyyuṃ – ‘yathā tesu tesu sambhāresu tassa tassa bhūtassa adhikatāya pathavīādīnaṃ sandhāraṇādīni kiccāni icchatha, evaṃ tejādiadhikesu sambhāresu rūpādīnaṃ adhikabhāvadassanato icchitabbametaṃ rūpādayo tesaṃ guṇā’ti. Te vattabbā – iccheyyāma , yadi āpādhikassa āsavassa gandhato pathavīadhike kappāse gandho adhikataro siyā, tejādhikassa ca uṇhodakassa vaṇṇatopi sītūdakassa vaṇṇo parihāyetha. Yasmā panetaṃ ubhayampi natthi, tasmā pahāyethetaṃ etesaṃ nissayabhūtānaṃ visesakappanaṃ, yathā avisesepi ekakalāpe bhūtānaṃ rūparasādayo aññamaññaṃ visadisā honti, evaṃ cakkhupasādādayo, avijjamānepi aññasmiṃ visesakāraṇeti gahetabbametaṃ.

    ཀིཾ པན ཏཾ ཡཾ ཨཉྙམཉྙསྶ ཨསཱདྷཱརཎཾ? ཀམྨམེཝ ནེསཾ ཝིསེསཀཱརཎཾ། ཏསྨཱ ཀམྨཝིསེསཏོ ཨེཏེསཾ ཝིསེསོ, ན བྷཱུཏཝིསེསཏོ། བྷཱུཏཝིསེསེ ཧི སཏི པསཱདོཝ ནུཔྤཛྫཏི། སམཱནཱནཉྷི པསཱདོ, ན ཝིསམཱནཱནནྟི པོརཱཎཱ། ཨེཝཾ ཀམྨེཝིསསཏོ ཝིསེསཝནྟེསུ ཙ ཨེཏེསུ ཙཀྑུསོཏཱནི ཨསམྤཏྟཝིསཡགྒཱཧཀཱནི ཨཏྟནོ ནིསྶཡཾ ཨནལླཱིནནིསྶཡེ ཨེཝ ཝིསཡེ ཝིཉྙཱཎཧེཏུཏྟཱ། གྷཱནཛིཝ྄ཧཱཀཱཡཱ སམྤཏྟཝིསཡགྒཱཧཀཱ, ནིསྶཡཝསེན ཙེཝ སཡཉྩ ཨཏྟནོ ནིསྶཡཾ ཨལླཱིནེཡེཝ ཝིསཡེ ཝིཉྙཱཎཧེཏུཏྟཱ།

    Kiṃ pana taṃ yaṃ aññamaññassa asādhāraṇaṃ? Kammameva nesaṃ visesakāraṇaṃ. Tasmā kammavisesato etesaṃ viseso, na bhūtavisesato. Bhūtavisese hi sati pasādova nuppajjati. Samānānañhi pasādo, na visamānānanti porāṇā. Evaṃ kammevisasato visesavantesu ca etesu cakkhusotāni asampattavisayaggāhakāni attano nissayaṃ anallīnanissaye eva visaye viññāṇahetuttā. Ghānajivhākāyā sampattavisayaggāhakā, nissayavasena ceva sayañca attano nissayaṃ allīneyeva visaye viññāṇahetuttā.

    ཨཊྛཀཐཱཡཾ པན ‘‘ཨཱཔཱཐགཏཏྟཱཝ ཨཱརམྨཎཾ སམྤཏྟཾ ནཱམ། ཙནྡམཎྜལསཱུརིཡམཎྜལཱནཉྷི དྭཱཙཏྟཱལཱིསཡོཛནསཧསྶམཏྠཀེ ཋིཏཱནཾ ཝཎྞོ ཙཀྑུཔསཱདཾ གྷཊྚེཏི། སོ དཱུརེ ཋཏྭཱ པཉྙཱཡམཱནོཔི སམྤཏྟོཡེཝ ནཱམ། ཏཾགོཙརཏྟཱ ཙཀྑུ སམྤཏྟགོཙརམེཝ ནཱམ། དཱུརེ རུཀྑཾ ཚིནྡནྟཱནམྤི, རཛཀཱནཉྩ ཝཏྠཾ དྷོཝནྟཱནཾ དཱུརཏོཝ ཀཱཡཝིཀཱརོ པཉྙཱཡཏི། སདྡོ པན དྷཱཏུཔརམྤརཱཡ ཨཱགནྟྭཱ སོཏཾ གྷཊྚེཏྭཱ སཎིཀཾ ཝཝཏྠཱནཾ གཙྪཏཱི’’ཏི ཝུཏྟཾ།

    Aṭṭhakathāyaṃ pana ‘‘āpāthagatattāva ārammaṇaṃ sampattaṃ nāma. Candamaṇḍalasūriyamaṇḍalānañhi dvācattālīsayojanasahassamatthake ṭhitānaṃ vaṇṇo cakkhupasādaṃ ghaṭṭeti. So dūre ṭhatvā paññāyamānopi sampattoyeva nāma. Taṃgocarattā cakkhu sampattagocarameva nāma. Dūre rukkhaṃ chindantānampi, rajakānañca vatthaṃ dhovantānaṃ dūratova kāyavikāro paññāyati. Saddo pana dhātuparamparāya āgantvā sotaṃ ghaṭṭetvā saṇikaṃ vavatthānaṃ gacchatī’’ti vuttaṃ.

    ཏཏྠ ཀིཉྩཱཔི ཨཱཔཱཐགཏཏྟཱ ཨཱརམྨཎཾ སམྤཏྟནྟི ཝུཏྟཾ, ཙནྡམཎྜལཱདིཝཎྞོ པན ཙཀྑུཾ ཨསམྤཏྟོ དཱུརེ ཋིཏོཝ པཉྙཱཡཏི། སདྡོཔི སཙེ སཎིཀཾ ཨཱགཙྪེཡྻ, དཱུརེ ཨུཔྤནྣོ ཙིརེན སུཡྻེཡྻ, པརམྤརགྷཊྚནཱཡ ཙ ཨཱགནྟྭཱ སོཏཾ གྷཊྚེནྟོ ཨསུཀདིསཱཡ ནཱམཱཏི ན པཉྙཱཡེཡྻ། ཏསྨཱ ཨསམྤཏྟགོཙརཱནེཝ ཏཱནི།

    Tattha kiñcāpi āpāthagatattā ārammaṇaṃ sampattanti vuttaṃ, candamaṇḍalādivaṇṇo pana cakkhuṃ asampatto dūre ṭhitova paññāyati. Saddopi sace saṇikaṃ āgaccheyya, dūre uppanno cirena suyyeyya, paramparaghaṭṭanāya ca āgantvā sotaṃ ghaṭṭento asukadisāya nāmāti na paññāyeyya. Tasmā asampattagocarāneva tāni.

    ཨཧིཨཱདིསམཱནཱནི ཙེཏཱནི། ཡཐཱ ཧི ཨཧི ནཱམ བཧི སིཏྟསམྨཊྛཊྛཱནེ ནཱབྷིརམཏི, སངྐཱརཊྛཱནཏིཎཔཎྞགཧནཝམྨིཀཱནིཡེཝ པན པཝིསིཏྭཱ ནིཔནྣཀཱལེ ཨབྷིརམཏི, ཨེཀགྒཏཾ ཨཱཔཛྫཏི, ཨེཝམེཝ ཙཀྑུཔེཏཾ ཝིསམཛ྄ཛྷཱསཡཾ མཊྛེསུ སུཝཎྞབྷིཏྟིཨཱདཱིསུ ནཱབྷིརམཏི, ཨོལོཀེཏུམྤི ན ཨིཙྪཏི, རཱུཔཙིཏྟཔུཔྥལཏཱདིཙིཏྟེསུཡེཝ པན ཨབྷིརམཏི། ཏཱདིསེསུ ཧི ཋཱནེསུ ཙཀྑུམྷི ཨཔྤཧོནྟེ མུཁམྤི ཝིཝརིཏྭཱ ཨོལོཀེཏུཀཱམཱ ཧོནྟི།

    Ahiādisamānāni cetāni. Yathā hi ahi nāma bahi sittasammaṭṭhaṭṭhāne nābhiramati, saṅkāraṭṭhānatiṇapaṇṇagahanavammikāniyeva pana pavisitvā nipannakāle abhiramati, ekaggataṃ āpajjati, evameva cakkhupetaṃ visamajjhāsayaṃ maṭṭhesu suvaṇṇabhittiādīsu nābhiramati, oloketumpi na icchati, rūpacittapupphalatādicittesuyeva pana abhiramati. Tādisesu hi ṭhānesu cakkhumhi appahonte mukhampi vivaritvā oloketukāmā honti.

    སུསུམཱརོཔི བཧི ནིཀྑནྟོ གཧེཏབྦཾ ན པསྶཏི, ཨཀྑཱིནི ནིམྨཱིལེཏྭཱཝ ཙརཏི། ཡདཱ པན བྱཱམསཏམཏྟཾ ཨུདཀཾ ཨོགཱཧིཏྭཱ བིལཾ པཝིསིཏྭཱ ནིཔནྣོ ཧོཏི, ཏདཱ ཏསྶ ཙིཏྟཾ ཨེཀགྒཾ ཧོཏི སུཁཾ སུཔཏི, ཨེཝམེཝ སོཏཾ ཏམྤེ བིལཛ྄ཛྷཱསཡཾ ཨཱཀཱསསནྣིསྶིཏཾ ཀཎྞཙྪིདྡཀཱུཔཀེཡེཝ ཨཛ྄ཛྷཱསཡཾ ཀརོཏི། ཀཎྞཙྪིདྡཱཀཱསོཡེཝ ཏསྶ སདྡསཝནེ པཙྩཡོ ཧོཏི། ཨཛཊཱཀཱསོཔི ཝཊྚཏིཡེཝ། ཨནྟོལེཎསྨིཉྷི སཛ྄ཛྷཱཡེ ཀརིཡམཱནེ ན ལེཎཙྪདནཾ བྷིནྡིཏྭཱ སདྡོ བཧི ནིཀྑམཏི, དྭཱརཝཱཏཔཱནཙྪིདྡེཧི པན ནིཀྑམིཏྭཱ དྷཱཏུཔརམྤརཱཡེཝ གྷཊྚེནྟོ གནྟྭཱ སོཏཔསཱདཾ གྷཊྚེཏི། ཨཐ ཏསྨིཾ ཀཱལེ ‘ཨསུཀོ ནཱམ སཛ྄ཛྷཱཡཏཱི’ཏི ལེཎཔིཊྛེ ནིསིནྣཱ ཛཱནནྟི།

    Susumāropi bahi nikkhanto gahetabbaṃ na passati, akkhīni nimmīletvāva carati. Yadā pana byāmasatamattaṃ udakaṃ ogāhitvā bilaṃ pavisitvā nipanno hoti, tadā tassa cittaṃ ekaggaṃ hoti sukhaṃ supati, evameva sotaṃ tampe bilajjhāsayaṃ ākāsasannissitaṃ kaṇṇacchiddakūpakeyeva ajjhāsayaṃ karoti. Kaṇṇacchiddākāsoyeva tassa saddasavane paccayo hoti. Ajaṭākāsopi vaṭṭatiyeva. Antoleṇasmiñhi sajjhāye kariyamāne na leṇacchadanaṃ bhinditvā saddo bahi nikkhamati, dvāravātapānacchiddehi pana nikkhamitvā dhātuparamparāyeva ghaṭṭento gantvā sotapasādaṃ ghaṭṭeti. Atha tasmiṃ kāle ‘asuko nāma sajjhāyatī’ti leṇapiṭṭhe nisinnā jānanti.

    ཨེཝཾ སནྟེ སམྤཏྟགོཙརཏཱ ཧོཏི། ‘ཀིཾ པནེཏཾ སམྤཏྟགོཙར’ནྟི? ‘ཨཱམ, སམྤཏྟགོཙརཾ’། ‘ཡདི ཨེཝཾ, དཱུརེ བྷེརཱིཨཱདཱིསུ ཝཛྫམཱནེསུ དཱུརེ སདྡོཏི ཛཱནནཾ ན བྷཝེཡྻཱ’ཏི? ‘ནོ ན བྷཝཏི། སོཏཔསཱདསྨིཉྷི གྷཊྚིཏེ དཱུརེ སདྡོ ཨཱསནྣེ སདྡོ, པརཏཱིརེ ཨོརིམཏཱིརེཏི ཏཐཱ ཏཐཱ ཛཱནནཱཀཱརོ ཧོཏི། དྷམྨཏཱ ཨེསཱ’ཏི། ‘ཀིཾ ཨེཏཱཡ དྷམྨཏཱཡ? ཡཏོ ཡཏོ ཚིདྡཾ ཏཏོ ཏཏོ སཝནཾ ཧོཏི, ཙནྡིམསཱུརིཡཱདཱིནཾ དསྶནཾ ཝིཡཱཏི ཨསམྤཏྟགོཙརམེཝེཏཾ’།

    Evaṃ sante sampattagocaratā hoti. ‘Kiṃ panetaṃ sampattagocara’nti? ‘Āma, sampattagocaraṃ’. ‘Yadi evaṃ, dūre bherīādīsu vajjamānesu dūre saddoti jānanaṃ na bhaveyyā’ti? ‘No na bhavati. Sotapasādasmiñhi ghaṭṭite dūre saddo āsanne saddo, paratīre orimatīreti tathā tathā jānanākāro hoti. Dhammatā esā’ti. ‘Kiṃ etāya dhammatāya? Yato yato chiddaṃ tato tato savanaṃ hoti, candimasūriyādīnaṃ dassanaṃ viyāti asampattagocaramevetaṃ’.

    པཀྑཱིཔི རུཀྑེ ཝཱ བྷཱུམིཡཾ ཝཱ ན རམཏི། ཡདཱ པན ཨེཀཾ ཝཱ དྭེ ཝཱ ལེཌྜུཔཱཏེ ཨཏིཀྐམྨ ཨཛཊཱཀཱསཾ པཀྑནྡོ ཧོཏི, ཏདཱ ཨེཀགྒཙིཏྟཏཾ ཨཱཔཛྫཏི, ཨེཝམེཝ གྷཱནམྤི ཨཱཀཱསཛ྄ཛྷཱསཡཾ ཝཱཏཱུཔནིསྶཡགནྡྷགོཙརཾ། ཏཐཱ ཧི གཱཝོ ནཝཝུཊྛེ དེཝེ བྷཱུམིཡཾ གྷཱཡིཏྭཱ གྷཱཡིཏྭཱ ཨཱཀཱསཱབྷིམུཁཱ ཧུཏྭཱ ཝཱཏཾ ཨཱཀཌྜྷནྟི། ཨངྒུལཱིཧི གནྡྷཔིཎྜཾ གཧེཏྭཱཔི ཙ ཨུཔསིངྒྷནཀཱལེ ཝཱཏཾ ཨནཱཀཌྜྷནྟོ ནེཝ ཏསྶ གནྡྷཾ ཛཱནཱཏི།

    Pakkhīpi rukkhe vā bhūmiyaṃ vā na ramati. Yadā pana ekaṃ vā dve vā leḍḍupāte atikkamma ajaṭākāsaṃ pakkhando hoti, tadā ekaggacittataṃ āpajjati, evameva ghānampi ākāsajjhāsayaṃ vātūpanissayagandhagocaraṃ. Tathā hi gāvo navavuṭṭhe deve bhūmiyaṃ ghāyitvā ghāyitvā ākāsābhimukhā hutvā vātaṃ ākaḍḍhanti. Aṅgulīhi gandhapiṇḍaṃ gahetvāpi ca upasiṅghanakāle vātaṃ anākaḍḍhanto neva tassa gandhaṃ jānāti.

    ཀུཀྐུརོཔི བཧི ཝིཙརནྟོ ཁེམཊྛཱནཾ ན པསྶཏི ལེཌྜུཔཧཱརཱདཱིཧི ཨུཔདྡུཏོ ཧོཏི། ཨནྟོགཱམཾ པཝིསིཏྭཱ ཨུདྡྷནཊྛཱནེ ཚཱརིཀཾ བྱཱུཧིཏྭཱ ནིཔནྣསྶ པན ཕཱསུཀཾ ཧོཏི, ཨེཝམེཝ ཛིཝ྄ཧཱཔི གཱམཛ྄ཛྷཱསཡཱ ཨཱཔོསནྣིསྶིཏརསཱརམྨཎཱ། ཏཐཱ ཧི ཏིཡཱམརཏྟིཾ སམཎདྷམྨཾ ཀཏྭཱཔི པཱཏོཝ པཏྟཙཱིཝརམཱདཱཡ གཱམོ པཝིསིཏབྦོ ཧོཏི། སུཀྑཁཱདནཱིཡསྶ ཙ ན སཀྐཱ ཁེལེ༹ན ཨཏེམིཏསྶ རསཾ ཛཱནིཏུཾ།

    Kukkuropi bahi vicaranto khemaṭṭhānaṃ na passati leḍḍupahārādīhi upadduto hoti. Antogāmaṃ pavisitvā uddhanaṭṭhāne chārikaṃ byūhitvā nipannassa pana phāsukaṃ hoti, evameva jivhāpi gāmajjhāsayā āposannissitarasārammaṇā. Tathā hi tiyāmarattiṃ samaṇadhammaṃ katvāpi pātova pattacīvaramādāya gāmo pavisitabbo hoti. Sukkhakhādanīyassa ca na sakkā kheḷena atemitassa rasaṃ jānituṃ.

    སིངྒཱལོཔི བཧི ཙརནྟོ རཏིཾ ན ཝིནྡཏི, ཨཱམཀསུསཱནེ མནུསྶམཾསཾ ཁཱདིཏྭཱ ནིཔནྣསྶེཝ པནསྶ ཕཱསུཀཾ ཧོཏི, ཨེཝམེཝ ཀཱཡོཔི ཨུཔཱདིཎྞཀཛ྄ཛྷཱསཡོ པཐཝཱིནིསྶིཏཕོཊྛབྦཱརམྨཎོ། ཏཐཱ ཧི ཨཉྙཾ ཨུཔཱདིཎྞཀཾ ཨལབྷམཱནཱ སཏྟཱ ཨཏྟནོཝ ཧཏྠཏལེ སཱིསཾ ཀཏྭཱ ནིཔཛྫནྟི། ཨཛ྄ཛྷཏྟིཀབཱཧིརཱ ཙསྶ པཐཝཱི ཨཱརམྨཎགྒཧཎེ པཙྩཡོ ཧོཏི། སུསནྠཏསྶཔི ཧི སཡནསྶ, ཧཏྠེ ཋཔིཏཱནམྤི ཝཱ ཕལཱནཾ, ན སཀྐཱ ཨནིསཱིདནྟེན ཝཱ ཨནིཔྤཱིལེ༹ནྟེན ཝཱ ཐདྡྷམུདུབྷཱཝོ ཛཱནིཏུནྟི། ཨཛ྄ཛྷཏྟིཀབཱཧིརཱཔཐཝཱི ཨེཏསྶ ཀཱཡཔསཱདསྶ ཕོཊྛབྦཛཱནནེ པཙྩཡོ ཧོཏི། ཨེཝཾ ལཀྑཎཱདིཝཝཏྠཱནཏོཔེཏེསཾ ཨསམྨིསྶཏཱ ཝེདིཏབྦཱ། ཨཉྙེཡེཝ ཧི ཙཀྑུཔསཱདསྶ ལཀྑཎརསཔཙྩུཔཊྛཱནཔདཊྛཱནགོཙརཛ྄ཛྷཱསཡནིསྶཡཱ ཨཉྙེ སོཏཔསཱདཱདཱིནནྟི ཨསམྨིསྶཱནེཝ ཙཀྑཱཡཏནཱདཱིནི།

    Siṅgālopi bahi caranto ratiṃ na vindati, āmakasusāne manussamaṃsaṃ khāditvā nipannasseva panassa phāsukaṃ hoti, evameva kāyopi upādiṇṇakajjhāsayo pathavīnissitaphoṭṭhabbārammaṇo. Tathā hi aññaṃ upādiṇṇakaṃ alabhamānā sattā attanova hatthatale sīsaṃ katvā nipajjanti. Ajjhattikabāhirā cassa pathavī ārammaṇaggahaṇe paccayo hoti. Susanthatassapi hi sayanassa, hatthe ṭhapitānampi vā phalānaṃ, na sakkā anisīdantena vā anippīḷentena vā thaddhamudubhāvo jānitunti. Ajjhattikabāhirāpathavī etassa kāyapasādassa phoṭṭhabbajānane paccayo hoti. Evaṃ lakkhaṇādivavatthānatopetesaṃ asammissatā veditabbā. Aññeyeva hi cakkhupasādassa lakkhaṇarasapaccupaṭṭhānapadaṭṭhānagocarajjhāsayanissayā aññe sotapasādādīnanti asammissāneva cakkhāyatanādīni.

    ཨཔིཙ ནེསཾ ཨསམྨིསྶཏཱཡ ཨཡཾ ཨུཔམཱཔི ཝེདིཏབྦཱ – ཡཐཱ ཧི པཉྩཝཎྞཱནཾ དྷཛཱནཾ ཨུསྶཱཔིཏཱནཾ ཀིཉྩཱཔི ཚཱཡཱ ཨེཀཱབདྡྷཱ ཝིཡ ཧོཏི, ཏསྶ ཏསྶ པན ཨཉྙམཉྙཾ ཨསམྨིསྶཱཝ ཡཐཱ ཙ པཉྩཝཎྞེན ཀཔྤཱསེན ཝཊྚིཾ ཀཏྭཱ དཱིཔེ ཛཱལིཏེ ཀིཉྩཱཔི ཛཱལཱ ཨེཀཱབདྡྷཱ ཝིཡ ཧོཏི, ཏསྶ ཏསྶ པན ཨཾསུནོ པཱཊིཡེཀྐཱ པཱཊིཡེཀྐཱ ཛཱལཱ ཨསམྨིསྶཱ ཨེཝ, ཨེཝམེཝ ཀིཉྩཱཔི ཨིམཱནི པཉྩཱཡཏནཱནི ཨེཀསྨིཾ ཨཏྟབྷཱཝེ སམོསཊཱནི ཨཉྙམཉྙཾ པན ཨསམྨིསྶཱནེཝ། ན ཀེཝལཉྩ ཨིམཱནེཝ པཉྩ, སེསརཱུཔཱནིཔི ཨསམྨིསྶཱནེཝ། ཨིམསྨིཉྷི སརཱིརེ ཧེཊྛིམཀཱཡོ མཛ྄ཛྷིམཀཱཡོ ཨུཔརིམཀཱཡོཏི ཏཡོ ཀོཊྛཱསཱ། ཏཏྠ ནཱབྷིཏོ པཊྛཱཡ ཧེཊྛཱ ཧེཊྛིམཀཱཡོ ནཱམ། ཏསྨིཾ ཀཱཡདསཀཾ, བྷཱཝདསཀཾ, ཨཱཧཱརསམུཊྛཱནཱནི ཨཊྛ, ཨུཏུསམུཊྛཱནཱནི ཨཊྛ, ཙིཏྟསམུཊྛཱནཱནི ཨཊྛཱཏི ཙཏུཙཏྟཱལཱིས རཱུཔཱནི། ནཱབྷིཏོ ཨུདྡྷཾ ཡཱཝ གལཝཱཊཀཱ མཛ྄ཛྷིམཀཱཡོ ནཱམ། ཏཏྠ ཙ ཀཱཡདསཀཾ, བྷཱཝདསཀཾ, ཝཏྠུདསཀཾ, ཨཱཧཱརསམུཊྛཱནཱདཱིནི ཏཱིཎི ཨཊྛཀཱནཱིཏི ཙཏུཔཉྙཱས རཱུཔཱནི། གལཝཱཊཀཏོ ཨུདྡྷཾ ཨུཔརིམཀཱཡོ ནཱམ། ཏཏྠ ཙཀྑུདསཀཾ, སོཏདསཀཾ, གྷཱནདསཀཾ, ཛིཝ྄ཧཱདསཀཾ, ཀཱཡདསཀཾ, བྷཱཝདསཀཾ, ཨཱཧཱརསམུཊྛཱནཱདཱིནི ཏཱིཎི ཨཊྛཀཱནཱིཏི ཙཏུརཱསཱིཏི རཱུཔཱནི།

    Apica nesaṃ asammissatāya ayaṃ upamāpi veditabbā – yathā hi pañcavaṇṇānaṃ dhajānaṃ ussāpitānaṃ kiñcāpi chāyā ekābaddhā viya hoti, tassa tassa pana aññamaññaṃ asammissāva yathā ca pañcavaṇṇena kappāsena vaṭṭiṃ katvā dīpe jālite kiñcāpi jālā ekābaddhā viya hoti, tassa tassa pana aṃsuno pāṭiyekkā pāṭiyekkā jālā asammissā eva, evameva kiñcāpi imāni pañcāyatanāni ekasmiṃ attabhāve samosaṭāni aññamaññaṃ pana asammissāneva. Na kevalañca imāneva pañca, sesarūpānipi asammissāneva. Imasmiñhi sarīre heṭṭhimakāyo majjhimakāyo uparimakāyoti tayo koṭṭhāsā. Tattha nābhito paṭṭhāya heṭṭhā heṭṭhimakāyo nāma. Tasmiṃ kāyadasakaṃ, bhāvadasakaṃ, āhārasamuṭṭhānāni aṭṭha, utusamuṭṭhānāni aṭṭha, cittasamuṭṭhānāni aṭṭhāti catucattālīsa rūpāni. Nābhito uddhaṃ yāva galavāṭakā majjhimakāyo nāma. Tattha ca kāyadasakaṃ, bhāvadasakaṃ, vatthudasakaṃ, āhārasamuṭṭhānādīni tīṇi aṭṭhakānīti catupaññāsa rūpāni. Galavāṭakato uddhaṃ uparimakāyo nāma. Tattha cakkhudasakaṃ, sotadasakaṃ, ghānadasakaṃ, jivhādasakaṃ, kāyadasakaṃ, bhāvadasakaṃ, āhārasamuṭṭhānādīni tīṇi aṭṭhakānīti caturāsīti rūpāni.

    ཏཏྠ ཙཀྑུཔསཱདསྶ པཙྩཡཱནི ཙཏྟཱརི མཧཱབྷཱུཏཱནི, ཝཎྞོ གནྡྷོ རསོ ཨོཛཱ, ཛཱིཝིཏིནྡྲིཡཾ ཙཀྑུཔསཱདོཏི ཨིདཾ ཨེཀནྟཏོ ཨཝིནིབྷུཏྟཱནཾ དསནྣཾ ནིཔྥནྣརཱུཔཱནཾ ཝསེན ཙཀྑུདསཀཾ ནཱམ། ཨིམིནཱ ནཡེན སེསཱནིཔི ཝེདིཏབྦཱནི། ཏེསུ ཧེཊྛིམཀཱཡེ རཱུཔཾ མཛ྄ཛྷིམཀཱཡཨུཔརིམཀཱཡརཱུཔེཧི སདྡྷིཾ ཨསམྨིསྶཾ། སེསཀཱཡདྭཡེཔི རཱུཔཾ ཨིཏརེཧི སདྡྷིཾ ཨསམྨིསྶམེཝ། ཡཐཱ ཧི སཱཡནྷསམཡེ པབྦཏཙྪཱཡཱ ཙ རུཀྑཙྪཱཡཱ ཙ ཀིཉྩཱཔི ཨེཀཱབདྡྷཱ ཝིཡ ཧོནྟི ཨཉྙམཉྙཾ པན ཨསམྨིསྶཱཝ ཨེཝཾ ཨིམེསུཔི ཀཱཡེསུ ཙཏུཙཏྟཱལཱིས ཙཏུཔཉྙཱས ཙཏུརཱསཱིཏི རཱུཔཱནི ཙ ཀིཉྩཱཔི ཨེཀཱབདྡྷཱནི ཝིཡ ཧོནྟི, ཨཉྙམཉྙཾ པན ཨསམྨིསྶཱནེཝཱཏི།

    Tattha cakkhupasādassa paccayāni cattāri mahābhūtāni, vaṇṇo gandho raso ojā, jīvitindriyaṃ cakkhupasādoti idaṃ ekantato avinibhuttānaṃ dasannaṃ nipphannarūpānaṃ vasena cakkhudasakaṃ nāma. Iminā nayena sesānipi veditabbāni. Tesu heṭṭhimakāye rūpaṃ majjhimakāyauparimakāyarūpehi saddhiṃ asammissaṃ. Sesakāyadvayepi rūpaṃ itarehi saddhiṃ asammissameva. Yathā hi sāyanhasamaye pabbatacchāyā ca rukkhacchāyā ca kiñcāpi ekābaddhā viya honti aññamaññaṃ pana asammissāva evaṃ imesupi kāyesu catucattālīsa catupaññāsa caturāsīti rūpāni ca kiñcāpi ekābaddhāni viya honti, aññamaññaṃ pana asammissānevāti.

    ༦༡༦. རཱུཔཱཡཏནནིདྡེསེ ཝཎྞོཝ ཝཎྞནིབྷཱ; ནིབྷཱཏཱིཏི ཝཱ ནིབྷཱ། ཙཀྑུཝིཉྙཱཎསྶ པཱཀཊཱ ཧོཏཱིཏི ཨཏྠོ། ཝཎྞོཝ ནིབྷཱ ཝཎྞནིབྷཱ། སདྡྷིཾ ནིདསྶནེན སནིདསྶནཾ, ཙཀྑུཝིཉྙཱཎེན པསྶིཏབྦནྟི ཨཏྠོ། སདྡྷིཾ པཊིགྷེན སཔྤཊིགྷཾ, པཊིགྷཊྚནནིགྷཾསཛནཀནྟི ཨཏྠོ། ནཱིལཱདཱིསུ ཨུམཱཔུཔྥསམཱནཾ ནཱིལཾ, ཀཎིཀཱརཔུཔྥསམཱནཾ པཱིཏཀཾ, བནྡྷུཛཱིཝཀཔུཔྥསམཱནཾ ལོཧིཏཀཾ, ཨོསདྷིཏཱརཀསམཱནཾ ཨོདཱཏཾ། ཛྷཱམངྒཱརསམཱནཾ ཀཱལ༹ཀཾ, མནྡརཏྟཾ སིནྡུཝཱརཀརཝཱིརམཀུལ༹སམཱནཾ མཉྫིཊྛཀཾ། ‘‘ཧརིཏྟཙཧེམཝཎྞཀཱམཾསུམུཁཔཀྐམཱ’’ཏི (ཛཱ॰ ༡.༡༥.༡༣༣) ཨེཏྠ པན ཀིཉྩཱཔི ‘ཧརཱི’ཏི སུཝཎྞཾ ཝུཏྟཾ, པརཏོ པནསྶ ཛཱཏརཱུཔགྒཧཎེན གཧིཏཏྟཱ ཨིདྷ སཱམཾ ཧརི ནཱམ། ཨིམཱནི སཏྟ ཝཏྠུཾ ཨནཱམསིཏྭཱ སབྷཱཝེནེཝ དསྶིཏཱནི།

    616. Rūpāyatananiddese vaṇṇova vaṇṇanibhā; nibhātīti vā nibhā. Cakkhuviññāṇassa pākaṭā hotīti attho. Vaṇṇova nibhā vaṇṇanibhā. Saddhiṃ nidassanena sanidassanaṃ, cakkhuviññāṇena passitabbanti attho. Saddhiṃ paṭighena sappaṭighaṃ, paṭighaṭṭananighaṃsajanakanti attho. Nīlādīsu umāpupphasamānaṃ nīlaṃ, kaṇikārapupphasamānaṃ pītakaṃ, bandhujīvakapupphasamānaṃ lohitakaṃ, osadhitārakasamānaṃ odātaṃ. Jhāmaṅgārasamānaṃ kāḷakaṃ, mandarattaṃ sinduvārakaravīramakuḷasamānaṃ mañjiṭṭhakaṃ. ‘‘Harittacahemavaṇṇakāmaṃsumukhapakkamā’’ti (jā. 1.15.133) ettha pana kiñcāpi ‘harī’ti suvaṇṇaṃ vuttaṃ, parato panassa jātarūpaggahaṇena gahitattā idha sāmaṃ hari nāma. Imāni satta vatthuṃ anāmasitvā sabhāveneva dassitāni.

    ཧརིཝཎྞནྟི ཧརིཏསདྡལཝཎྞཾ། ཨམྦངྐུརཝཎྞནྟི ཨམྦངྐུརེན སམཱནཝཎྞཾ། ཨིམཱནི དྭེ ཝཏྠུཾ ཨཱམསིཏྭཱ དསྶིཏཱནི། དཱིགྷཱདཱིནི དྭཱདས ཝོཧཱརཏོ དསྶིཏཱནི། སོ ཙ ནེསཾ ཝོཧཱརོ ཨུཔནིདྷཱཡསིདྡྷོ ཙེཝ སནྣིཝེསསིདྡྷོ ཙ། དཱིགྷཱདཱིནི ཧི ཨཉྙམཉྙཾ ཨུཔནིདྷཱཡསིདྡྷཱནི, ཝཊྚཱདཱིནི སནྣིཝེསཝིསེསེན། ཏཏྠ རསྶཾ ཨུཔནིདྷཱཡ ཏཏོ ཨུཙྩཏརཾ དཱིགྷཾ, ཏཾ ཨུཔནིདྷཱཡ ཏཏོ ནཱིཙཏརཾ རསྶཾ། ཐཱུལཾ ཨུཔནིདྷཱཡ ཏཏོ ཁུདྡཀཏརཾ ཨཎུཾ, ཏཾ ཨུཔནིདྷཱཡ ཏཏོ མཧནྟཏརཾ ཐཱུལཾ། ཙཀྐསཎྛཱནཾ ཝཊྚཾ, ཀུཀྐུཊཎྜསཎྛཱནཾ པརིམཎྜལཾ། ཙཏཱུཧི ཨཾསེཧི ཡུཏྟཾ ཙཏུརཾསཾ། ཚལ༹ཾསཱདཱིསུཔི ཨེསེཝ ནཡོ། ནིནྣནྟི ཨོནཏཾ, ཐལནྟི ཨུནྣཏཾ།

    Harivaṇṇanti haritasaddalavaṇṇaṃ. Ambaṅkuravaṇṇanti ambaṅkurena samānavaṇṇaṃ. Imāni dve vatthuṃ āmasitvā dassitāni. Dīghādīni dvādasa vohārato dassitāni. So ca nesaṃ vohāro upanidhāyasiddho ceva sannivesasiddho ca. Dīghādīni hi aññamaññaṃ upanidhāyasiddhāni, vaṭṭādīni sannivesavisesena. Tattha rassaṃ upanidhāya tato uccataraṃ dīghaṃ, taṃ upanidhāya tato nīcataraṃ rassaṃ. Thūlaṃ upanidhāya tato khuddakataraṃ aṇuṃ, taṃ upanidhāya tato mahantataraṃ thūlaṃ. Cakkasaṇṭhānaṃ vaṭṭaṃ, kukkuṭaṇḍasaṇṭhānaṃ parimaṇḍalaṃ. Catūhi aṃsehi yuttaṃ caturaṃsaṃ. Chaḷaṃsādīsupi eseva nayo. Ninnanti onataṃ, thalanti unnataṃ.

    ཏཏྠ ཡསྨཱ དཱིགྷཱདཱིནི ཕུསིཏྭཱ སཀྐཱ ཛཱནིཏུཾ, ནཱིལཱདཱིནི པནེཝཾ ན སཀྐཱ, ཏསྨཱ ན ནིཔྤརིཡཱཡེན དཱིགྷཾ རཱུཔཱཡཏནཾ; ཏཐཱ རསྶཱདཱིནི། ཏཾ ཏཾ ནིསྶཱཡ པན ཏཐཱ ཏཐཱ ཋིཏཾ དཱིགྷཾ རསྶནྟི ཏེན ཏེན ཝོཧཱརེན རཱུཔཱཡཏནམེཝེཏྠ བྷཱསིཏནྟི ཝེདིཏབྦཾ། ཚཱཡཱ ཨཱཏཔོཏི ཨིདཾ ཨཉྙམཉྙཔརིཙྪིནྣཾ; ཏཐཱ ཨཱལོཀོ ཨནྡྷཀཱརོ ཙ། ཨབྦྷཱ མཧིཀཱཏིཨཱདཱིནི ཙཏྟཱརི ཝཏྠུནཱཝ དསྶིཏཱནི། ཏཏྠ ‘ཨབྦྷཱ’ཏི ཝལཱཧཀོ། ‘མཧིཀཱ’ཏི ཧིམཾ། ཨིམེཧི ཙཏཱུཧི ཨབྦྷཱདཱིནཾ ཝཎྞཱ དསྶིཏཱ། ཙནྡམཎྜལསྶ ཝཎྞནིབྷཱཏིཨཱདཱིཧི ཏེསཾ ཏེསཾ པབྷཱཝཎྞཱ དསྶིཏཱ།

    Tattha yasmā dīghādīni phusitvā sakkā jānituṃ, nīlādīni panevaṃ na sakkā, tasmā na nippariyāyena dīghaṃ rūpāyatanaṃ; tathā rassādīni. Taṃ taṃ nissāya pana tathā tathā ṭhitaṃ dīghaṃ rassanti tena tena vohārena rūpāyatanamevettha bhāsitanti veditabbaṃ. Chāyā ātapoti idaṃ aññamaññaparicchinnaṃ; tathā āloko andhakāro ca. Abbhā mahikātiādīni cattāri vatthunāva dassitāni. Tattha ‘abbhā’ti valāhako. ‘Mahikā’ti himaṃ. Imehi catūhi abbhādīnaṃ vaṇṇā dassitā. Candamaṇḍalassa vaṇṇanibhātiādīhi tesaṃ tesaṃ pabhāvaṇṇā dassitā.

    ཏཏྠ ཙནྡམཎྜལཱདཱིནཾ ཝཏྠཱུནཾ ཨེཝཾ ཝིསེསོ ཝེདིཏབྦོ – མཎིམཡཾ རཛཏཔཊིཙྪནྣཾ ཨེཀཱུནཔཉྙཱསཡོཛནཱཡཱམཝིཏྠཱརཾ ཙནྡསྶ དེཝཔུཏྟསྶ ཝིམཱནཾ ཙནྡམཎྜལཾ ནཱམ། སོཝཎྞམཡཾ ཕལིཀཔཊིཙྪནྣཾ སམཔཎྞཱསཡོཛནཱཡཱམཝིཏྠཱརཾ སཱུརིཡསྶ དེཝཔུཏྟསྶ ཝིམཱནཾ སཱུརིཡམཎྜལཾ ནཱམ། སཏྟརཏནམཡཱནི སཏྟཊྛདསདྭཱདསཡོཛནཱཡཱམཝིཏྠཱརཱནི ཏེསཾ ཏེསཾ དེཝཔུཏྟཱནཾ ཝིམཱནཱནི ཏཱརཀརཱུཔཱནི ནཱམ།

    Tattha candamaṇḍalādīnaṃ vatthūnaṃ evaṃ viseso veditabbo – maṇimayaṃ rajatapaṭicchannaṃ ekūnapaññāsayojanāyāmavitthāraṃ candassa devaputtassa vimānaṃ candamaṇḍalaṃ nāma. Sovaṇṇamayaṃ phalikapaṭicchannaṃ samapaṇṇāsayojanāyāmavitthāraṃ sūriyassa devaputtassa vimānaṃ sūriyamaṇḍalaṃ nāma. Sattaratanamayāni sattaṭṭhadasadvādasayojanāyāmavitthārāni tesaṃ tesaṃ devaputtānaṃ vimānāni tārakarūpāni nāma.

    ཏཏྠ ཧེཊྛཱ ཙནྡོ, སཱུརིཡོ ཨུཔརི, ཨུབྷིནྣམནྟརཾ ཡོཛནཾ ཧོཏི། ཙནྡསྶ ཧེཊྛིམནྟཏོ སཱུརིཡསྶ ཨུཔརིམནྟོ ཡོཛནསཏཾ ཧོཏི། དྭཱིསུ པསྶེསུ ནཀྑཏྟཏཱརཀཱ གཙྪནྟི། ཨེཏེསུ པན ཏཱིསུ ཙནྡོ དནྡྷགམནོ, སཱུརིཡོ སཱིགྷགམནོ, ནཀྑཏྟཏཱརཀཱ སབྦསཱིགྷགམནཱ། ཀཱལེན ཙནྡིམསཱུརིཡཱནཾ པུརཏོ ཧོནྟི ཀཱལེན པཙྪཱ།

    Tattha heṭṭhā cando, sūriyo upari, ubhinnamantaraṃ yojanaṃ hoti. Candassa heṭṭhimantato sūriyassa uparimanto yojanasataṃ hoti. Dvīsu passesu nakkhattatārakā gacchanti. Etesu pana tīsu cando dandhagamano, sūriyo sīghagamano, nakkhattatārakā sabbasīghagamanā. Kālena candimasūriyānaṃ purato honti kālena pacchā.

    ཨཱདཱསམཎྜལནྟི ཀཾསམཡཾ། མཎཱིཏི ཋཔེཏྭཱ ཝེལུ༹རིཡཾ སེསོ ཛོཏིརསཱདིཨནེཀཔྤབྷེདོ། སངྑོཏི སཱམུདྡིཀོ; མུཏྟཱ སཱམུདྡིཀཱཔི, སེསཱཔི། ཝེལུ༹རིཡོཏི ཝེལུ༹ཝཎྞམཎི། ཛཱཏརཱུཔཾ ཝུཙྩཏི སཏྠུཝཎྞོ། སཏྠཱ ཧི སུཝཎྞཝཎྞོ, སུཝཎྞམྤི སཏྠུཝཎྞཾ། རཛཏཾ ཝུཙྩཏི ཀཧཱཔཎོ – ལོཧམཱསཀོ དཱརུམཱསཀོ ཛཏུམཱསཀོ, ཡེ ‘ཝོཧཱརཾ གཙྪནྟཱི’ཏི (པཱརཱ॰ ༥༨༤) ཝུཏྟཾ ཏཾ སབྦམྤི ཨིདྷ གཧིཏཾ།

    Ādāsamaṇḍalanti kaṃsamayaṃ. Maṇīti ṭhapetvā veḷuriyaṃ seso jotirasādianekappabhedo. Saṅkhoti sāmuddiko; muttā sāmuddikāpi, sesāpi. Veḷuriyoti veḷuvaṇṇamaṇi. Jātarūpaṃ vuccati satthuvaṇṇo. Satthā hi suvaṇṇavaṇṇo, suvaṇṇampi satthuvaṇṇaṃ. Rajataṃ vuccati kahāpaṇo – lohamāsako dārumāsako jatumāsako, ye ‘vohāraṃ gacchantī’ti (pārā. 584) vuttaṃ taṃ sabbampi idha gahitaṃ.

    ཡཾ ཝཱ པནཉྙམྤཱིཏི ཨིམིནཱ པཱལི༹ཨཱགཏཾ ཋཔེཏྭཱ སེསཾ ཏཊྚིཀཔིལོཏིཀཀཎྞིཀཝཎྞཱདིབྷེདཾ རཱུཔཾ གཧིཏཾ། ཏཉྷི སབྦཾ ཡེཝཱཔནཀེསུ པཝིཊྛཾ།

    Yaṃ vā panaññampīti iminā pāḷiāgataṃ ṭhapetvā sesaṃ taṭṭikapilotikakaṇṇikavaṇṇādibhedaṃ rūpaṃ gahitaṃ. Tañhi sabbaṃ yevāpanakesu paviṭṭhaṃ.

    ཨེཝམེཏཾ ནཱིལཱདིནཱ བྷེདེན བྷིནྣམྤི རཱུཔཾ སབྦཾ ལཀྑཎཱདཱིཧི ཨབྷིནྣམེཝ། སབྦཉྷེཏཾ ཙཀྑུཔཊིཧནནལཀྑཎཾ རཱུཔཾ, ཙཀྑུཝིཉྙཱཎསྶ ཝིསཡབྷཱཝརསཾ, ཏསྶེཝ གོཙརཔཙྩུཔཊྛཱནཾ, ཙཏུམཧཱབྷཱུཏཔདཊྛཱནཾ། ཡཐཱ ཙེཏཾ ཏཐཱ སབྦཱནིཔི ཨུཔཱདཱརཱུཔཱནི། ཡཏྠ པན ཝིསེསོ ཨཏྠི ཏཏྠ ཝཀྑཱམ། སེསམེཏྠ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ། ཀེཝལཉྷི ཏཏྠ ཙཀྑུཔུབྦངྒམོ ནིདྡེསོ ཨིདྷ རཱུཔཔུབྦངྒམོ། ཏཏྠ ‘ཙཀྑུཾ པེཏ’ནྟིཨཱདཱིནི ཙུདྡས ནཱམཱནི, ཨིདྷ ‘རཱུཔཾཔེཏ’ནྟིཨཱདཱིནི ཏཱིཎི། སེསཾ ཏཱདིསམེཝ། ཡཐཱ ཧི ཙཏཱུཧི ཙཏཱུཧི ནཡེཧི པཊིམཎྜེཏྭཱ ཙཀྑུཾ ཝཝཏྠཱཔེཏུཾ ཏེརས ཝཱརཱ ཝུཏྟཱ, ཨིདྷཱཔི ཏེ ཏཐེཝ ཝུཏྟཱཏི།

    Evametaṃ nīlādinā bhedena bhinnampi rūpaṃ sabbaṃ lakkhaṇādīhi abhinnameva. Sabbañhetaṃ cakkhupaṭihananalakkhaṇaṃ rūpaṃ, cakkhuviññāṇassa visayabhāvarasaṃ, tasseva gocarapaccupaṭṭhānaṃ, catumahābhūtapadaṭṭhānaṃ. Yathā cetaṃ tathā sabbānipi upādārūpāni. Yattha pana viseso atthi tattha vakkhāma. Sesamettha cakkhāyatananiddese vuttanayeneva veditabbaṃ. Kevalañhi tattha cakkhupubbaṅgamo niddeso idha rūpapubbaṅgamo. Tattha ‘cakkhuṃ peta’ntiādīni cuddasa nāmāni, idha ‘rūpaṃpeta’ntiādīni tīṇi. Sesaṃ tādisameva. Yathā hi catūhi catūhi nayehi paṭimaṇḍetvā cakkhuṃ vavatthāpetuṃ terasa vārā vuttā, idhāpi te tatheva vuttāti.

    ༦༢༠. སདྡཱཡཏནནིདྡེསེ བྷེརིསདྡོཏི མཧཱབྷེརཱིཔཧཊབྷེརཱིནཾ སདྡོ། མུདིངྒསངྑཔཎཝསདྡཱཔི མུདིངྒཱདིཔཙྩཡཱ སདྡཱ། གཱིཏསངྑཱཏོ སདྡོ གཱིཏསདྡོ ། ཝུཏྟཱཝསེསཱནཾ ཝཱིཎཱདཱིནཾ ཏནྟིབདྡྷཱནཾ སདྡོ ཝཱདིཏསདྡོ། སམྨསདྡོཏི ཀཾསཏཱལཀཊྛཏཱལསདྡོ། པཱཎིསདྡོཏི པཱཎིཔྤཧཱརསདྡོ། སཏྟཱནཾ ནིགྒྷོསསདྡོཏི བཧཱུནཾ སནྣིཔཏིཏཱནཾ ཨཔཉྙཱཡམཱནཔདབྱཉྫནནིགྒྷོསསདྡོ། དྷཱཏཱུནཾ སནྣིགྷཱཏསདྡོཏི རུཀྑཱནཾ ཨཉྙམཉྙནིགྷཾསནགྷཎྚིཀཱཀོཊནཱདིསདྡོ། ཝཱཏསྶ ཝཱཡཏོ སདྡོ ཝཱཏསདྡོ། ཨུདཀསྶ སནྡམཱནསྶ ཝཱ པཊིཧཏསྶ ཝཱ སདྡོ ཨུདཀསདྡོ། མནུསྶཱནཾ སལླཱཔཱདིསདྡོ མནུསྶསདྡོ། ཏཾ ཋཔེཏྭཱ སེསོ སབྦོཔི ཨམནུསྶསདྡོ། ཨིམིནཱ པདདྭཡེན སབྦོཔི སདྡོ པརིཡཱདིནྣོ། ཨེཝཾ སནྟེཔི ཝཾསཕཱལནཔིལོཏིཀཕཱལནཱདཱིསུ པཝཏྟོ པཱལི༹ཡཾ ཨནཱགཏསདྡོ ཡེཝཱཔནཀཊྛཱནཾ པཝིཊྛོཏི ཝེདིཏབྦོ།

    620. Saddāyatananiddese bherisaddoti mahābherīpahaṭabherīnaṃ saddo. Mudiṅgasaṅkhapaṇavasaddāpi mudiṅgādipaccayā saddā. Gītasaṅkhāto saddo gītasaddo. Vuttāvasesānaṃ vīṇādīnaṃ tantibaddhānaṃ saddo vāditasaddo. Sammasaddoti kaṃsatālakaṭṭhatālasaddo. Pāṇisaddoti pāṇippahārasaddo. Sattānaṃ nigghosasaddoti bahūnaṃ sannipatitānaṃ apaññāyamānapadabyañjananigghosasaddo. Dhātūnaṃ sannighātasaddoti rukkhānaṃ aññamaññanighaṃsanaghaṇṭikākoṭanādisaddo. Vātassa vāyato saddo vātasaddo. Udakassa sandamānassa vā paṭihatassa vā saddo udakasaddo. Manussānaṃ sallāpādisaddo manussasaddo. Taṃ ṭhapetvā seso sabbopi amanussasaddo. Iminā padadvayena sabbopi saddo pariyādinno. Evaṃ santepi vaṃsaphālanapilotikaphālanādīsu pavatto pāḷiyaṃ anāgatasaddo yevāpanakaṭṭhānaṃ paviṭṭhoti veditabbo.

    ཨེཝམཡཾ བྷེརཱིསདྡཱདིནཱ བྷེདེན བྷིནྣོཔི སདྡོ ལཀྑཎཱདཱིཧི ཨབྷིནྣོཡེཝ། སབྦོཔི ཧེས སོཏཔཊིཧནནལཀྑཎོ སདྡོ སོཏཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ། སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ། ཨིདྷཱཔི ཧི ཙཏཱུཧི ཙཏཱུཧི ནཡེཧི པཊིམཎྜིཏཱ ཏེརས ཝཱརཱ ཝུཏྟཱ། ཏེསཾ ཨཏྠོ སཀྐཱ ཝུཏྟནཡེནེཝ ཛཱནིཏུནྟི ན ཝིཏྠཱརིཏོ།

    Evamayaṃ bherīsaddādinā bhedena bhinnopi saddo lakkhaṇādīhi abhinnoyeva. Sabbopi hesa sotapaṭihananalakkhaṇo saddo sotaviññāṇassa visayabhāvaraso, tasseva gocarapaccupaṭṭhāno. Sesaṃ cakkhāyatananiddese vuttanayeneva veditabbaṃ. Idhāpi hi catūhi catūhi nayehi paṭimaṇḍitā terasa vārā vuttā. Tesaṃ attho sakkā vuttanayeneva jānitunti na vitthārito.

    ༦༢༤. གནྡྷཱཡཏནནིདྡེསེ མཱུལགནྡྷོཏི ཡཾ ཀིཉྩི མཱུལཾ པཊིཙྩ ནིབྦཏྟོ གནྡྷོ། སཱརགནྡྷཱདཱིསུཔི ཨེསེཝ ནཡོ། ཨསིདྡྷདུསིདྡྷཱནཾ ཌཱཀཱདཱིནཾ གནྡྷོ ཨཱམཀགནྡྷོ། མཙྪསཀལིཀཱཔཱུཏིམཾསསཾཀིལིཊྛསཔྤིཨཱདཱིནཾ གནྡྷོ ཝིསྶགནྡྷོ། སུགནྡྷོཏི ཨིཊྛགནྡྷོ། དུགྒནྡྷོཏི ཨནིཊྛགནྡྷོ། ཨིམིནཱ པདདྭཡེན སབྦོཔི གནྡྷོ པརིཡཱདིནྣོ། ཨེཝཾ སནྟེཔི ཀཎྞཀགནྡྷཔིལོཏིཀགནྡྷཱདཡོ པཱལི༹ཡཾ ཨནཱགཏཱ སབྦེཔི གནྡྷཱ ཡེཝཱཔནཀཊྛཱནཾ པཝིཊྛཱཏི ཝེདིཏབྦཱ།

    624. Gandhāyatananiddese mūlagandhoti yaṃ kiñci mūlaṃ paṭicca nibbatto gandho. Sāragandhādīsupi eseva nayo. Asiddhadusiddhānaṃ ḍākādīnaṃ gandho āmakagandho. Macchasakalikāpūtimaṃsasaṃkiliṭṭhasappiādīnaṃ gandho vissagandho. Sugandhoti iṭṭhagandho. Duggandhoti aniṭṭhagandho. Iminā padadvayena sabbopi gandho pariyādinno. Evaṃ santepi kaṇṇakagandhapilotikagandhādayo pāḷiyaṃ anāgatā sabbepi gandhā yevāpanakaṭṭhānaṃ paviṭṭhāti veditabbā.

    ཨེཝམཡཾ མཱུལགནྡྷཱདིནཱ བྷེདེན བྷིནྣོཔི གནྡྷོ ལཀྑཎཱདཱིཧི ཨབྷིནྣོཡེཝ། སབྦོཔི ཧེས གྷཱནཔཊིཧནནལཀྑཎོ གནྡྷོ, གྷཱནཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ། སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ། ཨིདྷཱཔི ཧི ཏཐེཝ དྭིཔཉྙཱསནཡཔཊིམཎྜིཏཱ ཏེརས ཝཱརཱ ཝུཏྟཱ། ཏེ ཨཏྠཏོ པཱཀཊཱཡེཝ།

    Evamayaṃ mūlagandhādinā bhedena bhinnopi gandho lakkhaṇādīhi abhinnoyeva. Sabbopi hesa ghānapaṭihananalakkhaṇo gandho, ghānaviññāṇassa visayabhāvaraso, tasseva gocarapaccupaṭṭhāno. Sesaṃ cakkhāyatananiddese vuttanayeneva veditabbaṃ. Idhāpi hi tatheva dvipaññāsanayapaṭimaṇḍitā terasa vārā vuttā. Te atthato pākaṭāyeva.

    ༦༢༨. རསཱཡཏནནིདྡེསེ མཱུལརསོཏི ཡཾཀིཉྩི མཱུལཾ པཊིཙྩ ནིབྦཏྟརསོ། ཁནྡྷརསཱདཱིསུཔི ཨེསེཝ ནཡོ། ཨམྦིལནྟི ཏཀྐམྦིལཱདི། མདྷུརནྟི ཨེཀནྟཏོ གོསཔྤིཨཱདི། མདྷུ པན ཀསཱཝཡུཏྟཾ ཙིརནིཀྑིཏྟཾ ཀསཱཝཾ ཧོཏི། ཕཱཎིཏཾ ཁཱརིཡུཏྟཾ ཙིརནིཀྑིཏྟཾ ཁཱརིཡཾ ཧོཏི། སཔྤི པན ཙིརནིཀྑིཏྟཾ ཝཎྞགནྡྷེ ཛཧནྟམྤི རསཾ ན ཛཧཏཱིཏི ཏདེཝ ཨེཀནྟམདྷུརཾ། ཏིཏྟཀནྟི ནིམྦཔཎྞཱདི། ཀཊུཀནྟི སིངྒིཝེརམརིཙཱདི། ལོཎིཀནྟི སཱམུདྡིཀལོཎཱདི། ཁཱརིཀནྟི ཝཱཏིངྒཎཀལཱི༹རཱདི། ལམྦིལནྟི བདརཱམལཀཀཔིཊྛསཱལཝཱདི། ཀསཱཝནྟི ཧརིཏཀཱདི། ཨིམེ སབྦེཔི རསཱ ཝཏྠུཝསེན ཝུཏྟཱ། ཏཾཏཾཝཏྠུཏོ པནེཏྠ རསོཝ ཨམྦིལཱདཱིཧི ནཱམེཧི ཝུཏྟོཏི ཝེདིཏབྦོ། སཱདཱུཏི ཨིཊྛརསོ, ཨསཱདཱུཏི ཨནིཊྛརསོ། ཨིམིནཱ པདདྭཡེན སབྦོཔི རསོ པརིཡཱདིནྣོ། ཨེཝཾ སནྟེཔི ལེཌྜུརསབྷིཏྟིརསཔིལོཏིཀརསཱདཡོ པཱལི༹ཡཾ ཨནཱགཏཱ སབྦེཔི རསཱ ཡེཝཱཔནཀཊྛཱནཾ པཝིཊྛཱཏི ཝེདིཏབྦཱ།

    628. Rasāyatananiddese mūlarasoti yaṃkiñci mūlaṃ paṭicca nibbattaraso. Khandharasādīsupi eseva nayo. Ambilanti takkambilādi. Madhuranti ekantato gosappiādi. Madhu pana kasāvayuttaṃ ciranikkhittaṃ kasāvaṃ hoti. Phāṇitaṃ khāriyuttaṃ ciranikkhittaṃ khāriyaṃ hoti. Sappi pana ciranikkhittaṃ vaṇṇagandhe jahantampi rasaṃ na jahatīti tadeva ekantamadhuraṃ. Tittakanti nimbapaṇṇādi. Kaṭukanti siṅgiveramaricādi. Loṇikanti sāmuddikaloṇādi. Khārikanti vātiṅgaṇakaḷīrādi. Lambilanti badarāmalakakapiṭṭhasālavādi. Kasāvanti haritakādi. Ime sabbepi rasā vatthuvasena vuttā. Taṃtaṃvatthuto panettha rasova ambilādīhi nāmehi vuttoti veditabbo. Sādūti iṭṭharaso, asādūti aniṭṭharaso. Iminā padadvayena sabbopi raso pariyādinno. Evaṃ santepi leḍḍurasabhittirasapilotikarasādayo pāḷiyaṃ anāgatā sabbepi rasā yevāpanakaṭṭhānaṃ paviṭṭhāti veditabbā.

    ཨེཝམཡཾ མཱུལརསཱདིནཱབྷེདེན བྷིནྣོཔི རསོ ལཀྑཎཱདཱིཧི ཨབྷིནྣོཡེཝ། སབྦོཔི ཧེས ཛིཝ྄ཧཱཔཊིཧནནལཀྑཎོ རསོ, ཛིཝ྄ཧཱཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ། སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ། ཨིདྷཱཔི ཧི ཏཐེཝ དྭིཔཉྙཱསནཡཔཊིམཎྜིཏཱ ཏེརས ཝཱརཱ ཝུཏྟཱ།

    Evamayaṃ mūlarasādinābhedena bhinnopi raso lakkhaṇādīhi abhinnoyeva. Sabbopi hesa jivhāpaṭihananalakkhaṇo raso, jivhāviññāṇassa visayabhāvaraso, tasseva gocarapaccupaṭṭhāno. Sesaṃ cakkhāyatananiddese vuttanayeneva veditabbaṃ. Idhāpi hi tatheva dvipaññāsanayapaṭimaṇḍitā terasa vārā vuttā.

    ༦༣༢. ཨིཏྠིནྡྲིཡནིདྡེསེ ཡནྟི ཀརཎཝཙནཾ། ཡེན ཀཱརཎེན ཨིཏྠིཡཱ ཨིཏྠིལིངྒཱདཱིནི ཧོནྟཱིཏི ཨཡམེཏྠ ཨཏྠོ། ཏཏྠ ‘ལིངྒ’ནྟི སཎྛཱནཾ། ཨིཏྠིཡཱ ཧི ཧཏྠཔཱདགཱིཝཱཨུརཱདཱིནཾ སཎྛཱནཾ ན པུརིསསྶ ཝིཡ ཧོཏི། ཨིཏྠཱིནཉྷི ཧེཊྛིམཀཱཡོ ཝིསདོ ཧོཏི, ཨུཔརིམཀཱཡོ ཨཝིསདོ། ཧཏྠཔཱདཱ ཁུདྡཀཱ, མུཁཾ ཁུདྡཀཾ། ནིམིཏྟནྟི སཉྫཱནནཾ། ཨིཏྠཱིནཉྷི ཨུརམཾསཾ ཨཝིསདཾ ཧོཏི, མུཁཾ ནིམྨསྶུདཱཋིཀཾ། ཀེསབནྡྷཝཏྠགྒཧཎམྤི ན པུརིསཱནཾ ཝིཡ ཧོཏི། ཀུཏྟནྟི ཀིརིཡཱ། ཨིཏྠིཡོ ཧི དཧརཀཱལེ སུཔྤཀམུསལཀེཧི ཀཱིལ༹ནྟི, ཙིཏྟདྷཱིཏལིཀཱཡ ཀཱིལ༹ནྟི, མཏྟིཀཝཱཀེན སུཏྟཀཾ ནཱམ ཀནྟནྟི། ཨཱཀཔྤོཏི གམནཱདིཨཱཀཱརོ། ཨིཏྠིཡོ ཧི གཙྪམཱནཱ ཨཝིསདཱ གཙྪནྟི, ཏིཊྛམཱནཱ ནིཔཛྫམཱནཱ ནིསཱིདམཱནཱ ཁཱདམཱནཱ བྷུཉྫམཱནཱ ཨཝིསདཱ བྷུཉྫནྟི། པུརིསམྤི ཧི ཨཝིསདཾ དིསྭཱ མཱཏུགཱམོ ཝིཡ གཙྪཏི ཏིཊྛཏི ནིཔཛྫཏི ནིསཱིདཏི ཁཱདཏི བྷུཉྫཏཱིཏི ཝདནྟི།

    632. Itthindriyaniddese yanti karaṇavacanaṃ. Yena kāraṇena itthiyā itthiliṅgādīni hontīti ayamettha attho. Tattha ‘liṅga’nti saṇṭhānaṃ. Itthiyā hi hatthapādagīvāurādīnaṃ saṇṭhānaṃ na purisassa viya hoti. Itthīnañhi heṭṭhimakāyo visado hoti, uparimakāyo avisado. Hatthapādā khuddakā, mukhaṃ khuddakaṃ. Nimittanti sañjānanaṃ. Itthīnañhi uramaṃsaṃ avisadaṃ hoti, mukhaṃ nimmassudāṭhikaṃ. Kesabandhavatthaggahaṇampi na purisānaṃ viya hoti. Kuttanti kiriyā. Itthiyo hi daharakāle suppakamusalakehi kīḷanti, cittadhītalikāya kīḷanti, mattikavākena suttakaṃ nāma kantanti. Ākappoti gamanādiākāro. Itthiyo hi gacchamānā avisadā gacchanti, tiṭṭhamānā nipajjamānā nisīdamānā khādamānā bhuñjamānā avisadā bhuñjanti. Purisampi hi avisadaṃ disvā mātugāmo viya gacchati tiṭṭhati nipajjati nisīdati khādati bhuñjatīti vadanti.

    ཨིཏྠཏྟཾ ཨིཏྠིབྷཱཝོཏི ཨུབྷཡམྤི ཨེཀཏྠཾ; ཨིཏྠིསབྷཱཝོཏི ཨཏྠོ། ཨཡཾ ཀམྨཛོ པཊིསནྡྷིསམུཊྛིཏོ། ཨིཏྠིལིངྒཱདཱིནི པན ཨིཏྠིནྡྲིཡཾ པཊིཙྩ པཝཏྟེ སམུཊྛིཏཱནི། ཡཐཱ ཧི བཱིཛེ སཏི, བཱིཛཾ པཊིཙྩ, བཱིཛཔཙྩཡཱ རུཀྑོ ཝཌྜྷིཏྭཱ སཱཁཱཝིཊཔསམྤནྣོ ཧུཏྭཱ ཨཱཀཱསཾ པཱུརེཏྭཱ ཏིཊྛཏི, ཨེཝམེཝ ཨིཏྠིབྷཱཝསངྑཱཏེ ཨིཏྠིནྡྲིཡེ སཏི ཨིཏྠིལིངྒཱདཱིནི ཧོནྟི། བཱིཛཾ ཝིཡ ཧི ཨིཏྠིནྡྲིཡཾ, བཱིཛཾ པཊིཙྩ ཝཌྜྷིཏྭཱ ཨཱཀཱསཾ པཱུརེཏྭཱ ཋིཏརུཀྑོ ཝིཡ ཨིཏྠིནྡྲིཡཾ པཊིཙྩ ཨིཏྠིལིངྒཱདཱིནི པཝཏྟེ སམུཊྛཧནྟི། ཏཏྠ ཨིཏྠིནྡྲིཡཾ ན ཙཀྑུཝིཉྙེཡྻཾ, མནོཝིཉྙེཡྻམེཝ། ཨིཏྠིལིངྒཱདཱིནི ཙཀྑུཝིཉྙེཡྻཱནིཔི མནོཝིཉྙེཡྻཱནིཔི།

    Itthattaṃ itthibhāvoti ubhayampi ekatthaṃ; itthisabhāvoti attho. Ayaṃ kammajo paṭisandhisamuṭṭhito. Itthiliṅgādīni pana itthindriyaṃ paṭicca pavatte samuṭṭhitāni. Yathā hi bīje sati, bījaṃ paṭicca, bījapaccayā rukkho vaḍḍhitvā sākhāviṭapasampanno hutvā ākāsaṃ pūretvā tiṭṭhati, evameva itthibhāvasaṅkhāte itthindriye sati itthiliṅgādīni honti. Bījaṃ viya hi itthindriyaṃ, bījaṃ paṭicca vaḍḍhitvā ākāsaṃ pūretvā ṭhitarukkho viya itthindriyaṃ paṭicca itthiliṅgādīni pavatte samuṭṭhahanti. Tattha itthindriyaṃ na cakkhuviññeyyaṃ, manoviññeyyameva. Itthiliṅgādīni cakkhuviññeyyānipi manoviññeyyānipi.

    ཨིདཾ ཏཾ རཱུཔཾ ཨིཏྠིནྡྲིཡནྟི ཨིདཾ ཏཾ རཱུཔཾ, ཡཐཱ ཙཀྑུནྡྲིཡཱདཱིནི པུརིསསྶཱཔི ཧོནྟི, ན ཨེཝཾ; ནིཡམཏོ པན ཨིཏྠིཡཱ ཨེཝ ཨིནྡྲིཡཾ ‘ཨིཏྠིནྡྲིཡཾ’།

    Idaṃ taṃ rūpaṃ itthindriyanti idaṃ taṃ rūpaṃ, yathā cakkhundriyādīni purisassāpi honti, na evaṃ; niyamato pana itthiyā eva indriyaṃ ‘itthindriyaṃ’.

    ༦༣༣. པུརིསིནྡྲིཡེཔི ཨེསེཝ ནཡོ། པུརིསལིངྒཱདཱིནི པན ཨིཏྠིལིངྒཱདཱིནཾ པཊིཔཀྑཏོ ཝེདིཏབྦཱནི། པུརིསསྶ ཧི ཧཏྠཔཱདགཱིཝཱཨུརཱདཱིནཾ སཎྛཱནཾ ན ཨིཏྠིཡཱ ཝིཡ ཧོཏི། པུརིསཱནཉྷི ཨུཔརིམཀཱཡོ ཝིསདོ ཧོཏི ཧེཊྛིམཀཱཡོ ཨཝིསདོ, ཧཏྠཔཱདཱ མཧནྟཱ, མུཁཾ མཧནྟཾ, ཨུརམཾསཾ ཝིསདཾ, མསྶུདཱཋིཀཱ ཨུཔྤཛྫནྟི། ཀེསབནྡྷནཝཏྠགྒཧཎཾ ན ཨིཏྠཱིནཾ ཝིཡ ཧོཏི། དཧརཀཱལེ རཐནངྒལཱདཱིཧི ཀཱིལ༹ནྟི, ཝཱལིཀཔཱལི༹ཾ ཀཏྭཱ ཝཱཔིཾ ནཱམ ཁནནྟི, གམནཱདཱིནི ཝིསདཱནི ཧོནྟི། ཨིཏྠིམྤི གམནཱདཱིནི ཝིསདཱནི ཀུརུམཱནཾ དིསྭཱ ‘པུརིསོ ཝིཡ གཙྪཏཱི’ཏིཨཱདཱིནི ཝདནྟི། སེསཾ ཨིཏྠིནྡྲིཡེ ཝུཏྟསདིསམེཝ།

    633. Purisindriyepi eseva nayo. Purisaliṅgādīni pana itthiliṅgādīnaṃ paṭipakkhato veditabbāni. Purisassa hi hatthapādagīvāurādīnaṃ saṇṭhānaṃ na itthiyā viya hoti. Purisānañhi uparimakāyo visado hoti heṭṭhimakāyo avisado, hatthapādā mahantā, mukhaṃ mahantaṃ, uramaṃsaṃ visadaṃ, massudāṭhikā uppajjanti. Kesabandhanavatthaggahaṇaṃ na itthīnaṃ viya hoti. Daharakāle rathanaṅgalādīhi kīḷanti, vālikapāḷiṃ katvā vāpiṃ nāma khananti, gamanādīni visadāni honti. Itthimpi gamanādīni visadāni kurumānaṃ disvā ‘puriso viya gacchatī’tiādīni vadanti. Sesaṃ itthindriye vuttasadisameva.

    ཏཏྠ ཨིཏྠིབྷཱཝལཀྑཎཾ ཨིཏྠིནྡྲིཡཾ, ཨིཏྠཱིཏི པཀཱསནརསཾ, ཨིཏྠིལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ། པུརིསབྷཱཝལཀྑཎཾ པུརིསིནྡྲིཡཾ, པུརིསོཏི པཀཱསནརསཾ, པུརིསལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ། ཨུབྷཡམྤེཏཾ པཋམཀཔྤིཀཱནཾ པཝཏྟེ སམུཊྛཱཏི། ཨཔརབྷཱགེ པཊིསནྡྷིཡཾ། པཊིསནྡྷིསམུཊྛིཏམྤི པཝཏྟེ ཙལཏི པརིཝཏྟཏི།

    Tattha itthibhāvalakkhaṇaṃ itthindriyaṃ, itthīti pakāsanarasaṃ, itthiliṅganimittakuttākappānaṃ kāraṇabhāvapaccupaṭṭhānaṃ. Purisabhāvalakkhaṇaṃ purisindriyaṃ, purisoti pakāsanarasaṃ, purisaliṅganimittakuttākappānaṃ kāraṇabhāvapaccupaṭṭhānaṃ. Ubhayampetaṃ paṭhamakappikānaṃ pavatte samuṭṭhāti. Aparabhāge paṭisandhiyaṃ. Paṭisandhisamuṭṭhitampi pavatte calati parivattati.

    ཡཐཱཧ –

    Yathāha –

    ‘‘ཏེན ཁོ པན སམཡེན ཨཉྙཏརསྶ བྷིཀྑུནོ ཨིཏྠིལིངྒཾ པཱཏུབྷཱུཏཾ ཧོཏི། ཏེན ཁོ པན སམཡེན ཨཉྙཏརིསྶཱ བྷིཀྑུནིཡཱ པུརིསལིངྒཾ པཱཏུབྷཱུཏཾ ཧོཏཱི’’ཏི (པཱརཱ॰ ༦༩)།

    ‘‘Tena kho pana samayena aññatarassa bhikkhuno itthiliṅgaṃ pātubhūtaṃ hoti. Tena kho pana samayena aññatarissā bhikkhuniyā purisaliṅgaṃ pātubhūtaṃ hotī’’ti (pārā. 69).

    ཨིམེསུ པན དྭཱིསུ པུརིསལིངྒཾ ཨུཏྟམཾ, ཨིཏྠིལིངྒཾ ཧཱིནཾ། ཏསྨཱ པུརིསལིངྒཾ བལཝཨཀུསལེན ཨནྟརདྷཱཡཏི, ཨིཏྠིལིངྒཾ དུབྦལཀུསལེན པཏིཊྛཱཏི། ཨིཏྠིལིངྒཾ པན ཨནྟརདྷཱཡནྟཾ དུབྦལཨཀུསལེན ཨནྟརདྷཱཡཏི, པུརིསལིངྒཾ བལཝཀུསལེན པཏིཊྛཱཏི། ཨེཝཾ ཨུབྷཡམྤི ཨཀུསལེན ཨནྟརདྷཱཡཏི, ཀུསལེན པཏིཊྛཱཏཱིཏི ཝེདིཏབྦཾ།

    Imesu pana dvīsu purisaliṅgaṃ uttamaṃ, itthiliṅgaṃ hīnaṃ. Tasmā purisaliṅgaṃ balavaakusalena antaradhāyati, itthiliṅgaṃ dubbalakusalena patiṭṭhāti. Itthiliṅgaṃ pana antaradhāyantaṃ dubbalaakusalena antaradhāyati, purisaliṅgaṃ balavakusalena patiṭṭhāti. Evaṃ ubhayampi akusalena antaradhāyati, kusalena patiṭṭhātīti veditabbaṃ.

    ཨུབྷཏོབྱཉྫནཀསྶ པན ཀིཾ ཨེཀཾ ཨིནྡྲིཡཾ ཨུདཱཧུ དྭེཏི? ཨེཀཾ། ཏཉྩ ཁོ ཨིཏྠིཨུབྷཏོབྱཉྫནཀསྶ ཨིཏྠིནྡྲིཡཾ, པུརིསཨུབྷཏོབྱཉྫནཀསྶ པུརིསིནྡྲིཡཾ། ‘ཨེཝཾ སནྟེ དུཏིཡབྱཉྫནཀསྶ ཨབྷཱཝོ ཨཱཔཛྫཏི། ཨིནྡྲིཡཉྷི བྱཉྫནཀཱརཎཾ ཝུཏྟཾ། ཏཉྩསྶ ནཏྠཱི’ཏི? ‘ན ཏསྶ ཨིནྡྲིཡཾ བྱཉྫནཀཱརཎཾ’། ‘ཀསྨཱ’? ‘སདཱ ཨབྷཱཝཏོ། ཨིཏྠིཨུབྷཏོབྱཉྫནཀསྶ ཧི ཡདཱ ཨིཏྠིཡཱ རཱགཙིཏྟཾ ཨུཔྤཛྫཏི, ཏདཱཝ པུརིསབྱཉྫནཾ པཱཀཊཾ ཧོཏི, ཨིཏྠིབྱཉྫནཾ པཊིཙྪནྣཾ གུལ༹ྷཾ ཧོཏི། ཏཐཱ ཨིཏརསྶ ཨིཏརཾ།

    Ubhatobyañjanakassa pana kiṃ ekaṃ indriyaṃ udāhu dveti? Ekaṃ. Tañca kho itthiubhatobyañjanakassa itthindriyaṃ, purisaubhatobyañjanakassa purisindriyaṃ. ‘Evaṃ sante dutiyabyañjanakassa abhāvo āpajjati. Indriyañhi byañjanakāraṇaṃ vuttaṃ. Tañcassa natthī’ti? ‘Na tassa indriyaṃ byañjanakāraṇaṃ’. ‘Kasmā’? ‘Sadā abhāvato. Itthiubhatobyañjanakassa hi yadā itthiyā rāgacittaṃ uppajjati, tadāva purisabyañjanaṃ pākaṭaṃ hoti, itthibyañjanaṃ paṭicchannaṃ guḷhaṃ hoti. Tathā itarassa itaraṃ.

    ཡདི ཙ ཏེསཾ ཨིནྡྲིཡཾ དུཏིཡབྱཉྫནཀཱརཎཾ བྷཝེཡྻ, སདཱཔི བྱཉྫནདྭཡཾ ཏིཊྛེཡྻ། ན པན ཏིཊྛཏི། ཏསྨཱ ཝེདིཏབྦམེཏཾ ན ཏསྶ ཏཾ བྱཉྫནཀཱརཎཾ། ཀམྨསཧཱཡཾ པན རཱགཙིཏྟམེཝེཏྠ ཀཱརཎཾ། ཡསྨཱ ཙསྶ ཨེཀམེཝ ཨིནྡྲིཡཾ ཧོཏི, ཏསྨཱ ཨིཏྠིཨུབྷཏོབྱཉྫནཀོ སཡམྤི གབྦྷཾ གཎྷཱཏི, པརམྤི གཎྷཱཔེཏི། པུརིསཨུབྷཏོབྱཉྫནཀོ པརཾ གབྦྷཾ གཎྷཱཔེཏི, སཡཾ པན ན གཎྷཱཏཱིཏི།

    Yadi ca tesaṃ indriyaṃ dutiyabyañjanakāraṇaṃ bhaveyya, sadāpi byañjanadvayaṃ tiṭṭheyya. Na pana tiṭṭhati. Tasmā veditabbametaṃ na tassa taṃ byañjanakāraṇaṃ. Kammasahāyaṃ pana rāgacittamevettha kāraṇaṃ. Yasmā cassa ekameva indriyaṃ hoti, tasmā itthiubhatobyañjanako sayampi gabbhaṃ gaṇhāti, parampi gaṇhāpeti. Purisaubhatobyañjanako paraṃ gabbhaṃ gaṇhāpeti, sayaṃ pana na gaṇhātīti.

    ༦༣༤. ཛཱིཝིཏིནྡྲིཡནིདྡེསེ ཡཾ ཝཏྟབྦཾ ཏཾ ཧེཊྛཱ ཨརཱུཔཛཱིཝིཏིནྡྲིཡེ ཝུཏྟམེཝ། ཀེཝལཉྷི ཏཏྠ ཡོ ཏེསཾ ཨརཱུཔཱིནཾ དྷམྨཱནནྟི ཝུཏྟཾ, ཨིདྷ རཱུཔཛཱིཝིཏིནྡྲིཡཏྟཱ ཡོ ཏེསཾ རཱུཔཱིནཾ དྷམྨཱནནྟི ཨཡམེཝ ཝིསེསོ། ལཀྑཎཱདཱིནི པནསྶ ཨེཝཾ ཝེདིཏབྦཱནི – སཧཛཱཏརཱུཔཱནུཔཱལནལཀྑཎཾ ཛཱིཝིཏིནྡྲིཡཾ, ཏེསཾ པཝཏྟནརསཾ, ཏེསཾ ཡེཝ ཋཔནཔཙྩུཔཊྛཱནཾ, ཡཱཔཡིཏབྦབྷཱུཏཔདཊྛཱནནྟི།

    634. Jīvitindriyaniddese yaṃ vattabbaṃ taṃ heṭṭhā arūpajīvitindriye vuttameva. Kevalañhi tattha yo tesaṃ arūpīnaṃ dhammānanti vuttaṃ, idha rūpajīvitindriyattā yo tesaṃ rūpīnaṃ dhammānanti ayameva viseso. Lakkhaṇādīni panassa evaṃ veditabbāni – sahajātarūpānupālanalakkhaṇaṃ jīvitindriyaṃ, tesaṃ pavattanarasaṃ, tesaṃ yeva ṭhapanapaccupaṭṭhānaṃ, yāpayitabbabhūtapadaṭṭhānanti.

    ༦༣༥. ཀཱཡཝིཉྙཏྟིནིདྡེསེ ཀཱཡཝིཉྙཏྟཱིཏི ཨེཏྠ ཏཱཝ ཀཱཡེན ཨཏྟནོ བྷཱཝཾ ཝིཉྙཱཔེནྟཱནཾ ཏིརཙྪཱནེཧིཔི པུརིསཱནཾ, པུརིསེཧི ཝཱ ཏིརཙྪཱནཱནམྤི ཀཱཡགཧཎཱནུསཱརེན གཧིཏཱཡ ཨེཏཱཡ བྷཱཝོ ཝིཉྙཱཡཏཱིཏི ‘ཝིཉྙཏྟི’། སཡཾ ཀཱཡགཧཎཱནུསཱརེན ཝིཉྙཱཡཏཱིཏིཔི ‘ཝིཉྙཏྟི’། ‘‘ཀཱཡེན སཾཝརོ སཱདྷཱུ’’ཏིཨཱདཱིསུ (དྷ॰ པ॰ ༣༦༡) ཨཱགཏོ ཙོཔནསངྑཱཏོ ཀཱཡོཝ ཝིཉྙཏྟི ‘ཀཱཡཝིཉྙཏྟི’། ཀཱཡཝིཔྥནྡནེན ཨདྷིཔྤཱཡཝིཉྙཱཔནཧེཏུཏྟཱ, སཡཉྩ ཏཐཱ ཝིཉྙེཡྻཏྟཱ ཀཱཡེན ཝིཉྙཏྟཱིཏིཔི ‘ཀཱཡཝིཉྙཏྟི’།

    635. Kāyaviññattiniddese kāyaviññattīti ettha tāva kāyena attano bhāvaṃ viññāpentānaṃ tiracchānehipi purisānaṃ, purisehi vā tiracchānānampi kāyagahaṇānusārena gahitāya etāya bhāvo viññāyatīti ‘viññatti’. Sayaṃ kāyagahaṇānusārena viññāyatītipi ‘viññatti’. ‘‘Kāyena saṃvaro sādhū’’tiādīsu (dha. pa. 361) āgato copanasaṅkhāto kāyova viññatti ‘kāyaviññatti’. Kāyavipphandanena adhippāyaviññāpanahetuttā, sayañca tathā viññeyyattā kāyena viññattītipi ‘kāyaviññatti’.

    ཀུསལཙིཏྟསྶ ཝཱཏིཨཱདཱིསུ ཨཊྛཧི ཀཱམཱཝཙརེཧི ཨབྷིཉྙཱཙིཏྟེན ཙཱཏི ནཝཧི ཀུསལཙིཏྟེཧི ཀུསལཙིཏྟསྶ ཝཱ, དྭཱདསཧིཔི ཨཀུསལཙིཏྟེཧི ཨཀུསལཙིཏྟསྶ ཝཱ, ཨཊྛཧི མཧཱཀིརིཡེཧི དྭཱིཧི ཨཧེཏུཀཀིརིཡེཧི ཨབྷིཉྙཱཔྤཏྟེན ཨེཀེན རཱུཔཱཝཙརཀིརིཡེནཱཏི ཨེཀཱདསཧི ཀིརིཡཙིཏྟེཧི ཨབྱཱཀཏཙིཏྟསྶ ཝཱ། ཨིཏོ ཨཉྙཱནི ཧི ཙིཏྟཱནི ཝིཉྙཏྟིཾ ན ཛནེནྟི། སེཀྑཱསེཀྑཔུཐུཛྫནཱནཾ པན ཨེཏྟཀེཧེཝ ཙིཏྟེཧི ཝིཉྙཏྟི ཧོཏཱིཏི ཨེཏེསཾ ཀུསལཱདཱིནཾ ཝསེན ཏཱིཧི པདེཧི ‘ཧེཏུཏོ’ དསྶིཏཱ།

    Kusalacittassa vātiādīsu aṭṭhahi kāmāvacarehi abhiññācittena cāti navahi kusalacittehi kusalacittassa vā, dvādasahipi akusalacittehi akusalacittassa vā, aṭṭhahi mahākiriyehi dvīhi ahetukakiriyehi abhiññāppattena ekena rūpāvacarakiriyenāti ekādasahi kiriyacittehi abyākatacittassa vā. Ito aññāni hi cittāni viññattiṃ na janenti. Sekkhāsekkhaputhujjanānaṃ pana ettakeheva cittehi viññatti hotīti etesaṃ kusalādīnaṃ vasena tīhi padehi ‘hetuto’ dassitā.

    ཨིདཱནི ཚཧི པདེཧི ‘ཕལཏོ’ དསྶེཏུཾ ཨབྷིཀྐམནྟསྶ ཝཱཏིཨཱདི ཝུཏྟཾ། ཨབྷིཀྐམཱདཡོ ཧི ཝིཉྙཏྟིཝསེན པཝཏྟཏྟཱ ཝིཉྙཏྟིཕལཾ ནཱམ། ཏཏྠ ‘ཨབྷིཀྐམནྟསྶཱ’ཏི པུརཏོ ཀཱཡཾ ཨབྷིཧརནྟསྶ། པཊིཀྐམནྟསྶཱཏི པཙྪཏོ པཙྩཱཧརནྟསྶ། ཨཱལོཀེནྟསྶཱཏི ཨུཛུཀཾ པེཀྑནྟསྶ། ཝིལོཀེནྟསྶཱཏི ཨིཏོ ཙིཏོ ཙ པེཀྑནྟསྶ། སམིཉྫེནྟསྶཱཏི སནྡྷཡོ སངྐོཙེནྟསྶ། པསཱརེནྟསྶཱཏི སནྡྷཡོ པཊིཔཎཱམེནྟསྶ།

    Idāni chahi padehi ‘phalato’ dassetuṃ abhikkamantassa vātiādi vuttaṃ. Abhikkamādayo hi viññattivasena pavattattā viññattiphalaṃ nāma. Tattha ‘abhikkamantassā’ti purato kāyaṃ abhiharantassa. Paṭikkamantassāti pacchato paccāharantassa. Ālokentassāti ujukaṃ pekkhantassa. Vilokentassāti ito cito ca pekkhantassa. Samiñjentassāti sandhayo saṅkocentassa. Pasārentassāti sandhayo paṭipaṇāmentassa.

    ཨིདཱནི ཚཧི པདེཧི ‘སབྷཱཝཏོ’ དསྶེཏུཾ ཀཱཡསྶ ཐམྦྷནཱཏི ཨཱདི ཝུཏྟཾ། ཏཏྠ ‘ཀཱཡསྶཱ’ཏི སརཱིརསྶ། ཀཱཡཾ ཐམྦྷེཏྭཱ ཐདྡྷཾ ཀརོཏཱིཏི ཐམྦྷནཱ། ཏམེཝ ཨུཔསགྒེན ཝཌྜྷེཏྭཱ སནྠམྦྷནཱཏི ཨཱཧ། བལཝཏརཱ ཝཱ ཐམྦྷནཱ ‘སནྠམྦྷནཱ’། སནྠམྦྷིཏཏྟནྟི སནྠམྦྷིཏབྷཱཝོ། ཝིཉྙཱཔནཝསེན ཝིཉྙཏྟི། ཝིཉྙཱཔནཱཏི ཝིཉྙཱཔནཱཀཱརོ། ཝིཉྙཱཔིཏབྷཱཝོ ཝིཉྙཱཔིཏཏྟཾ། སེསམེཏྠ ཡཾ ཝཏྟབྦཾ ཏཾ ཧེཊྛཱ དྭཱརཀཐཱཡཾ ཝུཏྟམེཝ། ཏཐཱ ཝཙཱིཝིཉྙཏྟིཡཾ།

    Idāni chahi padehi ‘sabhāvato’ dassetuṃ kāyassa thambhanāti ādi vuttaṃ. Tattha ‘kāyassā’ti sarīrassa. Kāyaṃ thambhetvā thaddhaṃ karotīti thambhanā. Tameva upasaggena vaḍḍhetvā santhambhanāti āha. Balavatarā vā thambhanā ‘santhambhanā’. Santhambhitattanti santhambhitabhāvo. Viññāpanavasena viññatti. Viññāpanāti viññāpanākāro. Viññāpitabhāvo viññāpitattaṃ. Sesamettha yaṃ vattabbaṃ taṃ heṭṭhā dvārakathāyaṃ vuttameva. Tathā vacīviññattiyaṃ.

    ༦༣༦. ཝཙཱིཝིཉྙཏྟཱིཏིཔདསྶ པན ནིདྡེསཔདཱནཉྩ ཨཏྠོ ཏཏྠ ན ཝུཏྟོ, སོ ཨེཝཾ ཝེདིཏབྦོ – ཝཱཙཱཡ ཨཏྟནོ བྷཱཝཾ ཝིཉྙཱཔེནྟཱནཾ ཏིརཙྪཱནེཧིཔི པུརིསཱནཾ, པུརིསེཧི ཝཱ ཏིརཙྪཱནཱནམྤི , ཝཙཱིགཧཎཱནུསཱརེན གཧིཏཱཡ ཨེཏཱཡ བྷཱཝོ ཝིཉྙཱཡཏཱིཏི ཝིཉྙཏྟི། སཡཉྩ ཝཙཱིགཧཎཱནུསཱརེན ཝིཉྙཱཡཏཱིཏིཔི ཝིཉྙཏྟི། ‘‘སཱདྷུ ཝཱཙཱཡ སཾཝརོ’’ཏིཨཱདཱིསུ (དྷ॰ པ॰ ༣༦༡) ཨཱགཏཱ ཙོཔནསངྑཱཏཱ ཝཙཱི ཨེཝ ཝིཉྙཏྟི ‘ཝཙཱིཝིཉྙཏྟི’། ཝཙཱིགྷོསེན ཨདྷིཔྤཱཡཝིཉྙཱཔནཧེཏུཏྟཱ སཡཉྩ ཏཐཱཝིཉྙེཡྻཏྟཱ ཝཱཙཱཡ ཝིཉྙཏྟཱིཏིཔི ‘ཝཙཱིཝིཉྙཏྟི’། ཝཱཙཱ གིརཱཏིཨཱདཱིསུ ཝུཙྩཏཱིཏི ‘ཝཱཙཱ’། གིརིཡཏཱིཏི ‘གིརཱ’། བྱཔྤཐོཏི ཝཱཀྱབྷེདོ། ཝཱཀྱཉྩ ཏཾ པཐོ ཙ ཨཏྠཾ ཉཱཏུཀཱམཱནཾ ཉཱཔེཏུཀཱམཱནཉྩཱཏིཔི ‘བྱཔྤཐོ’། ཨུདཱིརིཡཏཱིཏི ཨུདཱིརཎཾ། གྷུསྶཏཱིཏི གྷོསོ། ཀརིཡཏཱིཏི ཀམྨཾ། གྷོསོཝ ཀམྨཾ གྷོསཀམྨཾ། ནཱནཔྤཀཱརེཧི ཀཏོ གྷོསོཏི ཨཏྠོ། ཝཙིཡཱ བྷེདོ ཝཙཱིབྷེདོ། སོ པན ‘ན བྷངྒོ, པབྷེདགཏཱ ཝཱཙཱ ཨེཝཱ’ཏི ཉཱཔནཏྠཾ ཝཱཙཱ ཝཙཱིབྷེདོཏི ཝུཏྟཾ། ཨིམེཧི སབྦེཧིཔི པདེཧི ‘སདྡཝཱཙཱཝ’ དསྶིཏཱ། ཨིདཱནི ཏཱཡ ཝཱཙཱཡ སདྡྷིཾ ཡོཛེཏྭཱ ཧེཊྛཱ ཝུཏྟཏྠཱནཾ ཝིཉྙཏྟིཨཱདཱིནཾ པདཱནཾ ཝསེན ཏཱིཧཱཀཱརེཧི སབྷཱཝཏོ ཏཾ དསྶེཏུཾ ཡཱ ཏཱཡ ཝཱཙཱཡ ཝིཉྙཏྟཱིཏིཨཱདི ཝུཏྟཾ། ཏཾ ཧེཊྛཱ ཝུཏྟནཡཏྟཱ ཨུཏྟཱནཏྠམེཝ།

    636. Vacīviññattītipadassa pana niddesapadānañca attho tattha na vutto, so evaṃ veditabbo – vācāya attano bhāvaṃ viññāpentānaṃ tiracchānehipi purisānaṃ, purisehi vā tiracchānānampi , vacīgahaṇānusārena gahitāya etāya bhāvo viññāyatīti viññatti. Sayañca vacīgahaṇānusārena viññāyatītipi viññatti. ‘‘Sādhu vācāya saṃvaro’’tiādīsu (dha. pa. 361) āgatā copanasaṅkhātā vacī eva viññatti ‘vacīviññatti’. Vacīghosena adhippāyaviññāpanahetuttā sayañca tathāviññeyyattā vācāya viññattītipi ‘vacīviññatti’. Vācā girātiādīsu vuccatīti ‘vācā’. Giriyatīti ‘girā’. Byappathoti vākyabhedo. Vākyañca taṃ patho ca atthaṃ ñātukāmānaṃ ñāpetukāmānañcātipi ‘byappatho’. Udīriyatīti udīraṇaṃ. Ghussatīti ghoso. Kariyatīti kammaṃ. Ghosova kammaṃ ghosakammaṃ. Nānappakārehi kato ghosoti attho. Vaciyā bhedo vacībhedo. So pana ‘na bhaṅgo, pabhedagatā vācā evā’ti ñāpanatthaṃ vācā vacībhedoti vuttaṃ. Imehi sabbehipi padehi ‘saddavācāva’ dassitā. Idāni tāya vācāya saddhiṃ yojetvā heṭṭhā vuttatthānaṃ viññattiādīnaṃ padānaṃ vasena tīhākārehi sabhāvato taṃ dassetuṃ yā tāya vācāya viññattītiādi vuttaṃ. Taṃ heṭṭhā vuttanayattā uttānatthameva.

    ཨིདཱནི ཝིཉྙཏྟིསམུཊྛཱཔཀཙིཏྟེསུ ཨསམྨོཧཏྠཾ དྭཏྟིཾས ཚབྦཱིས ཨེཀཱུནཝཱིསཏི སོལ༹ས པཙྪིམཱནཱིཏི ཨིདཾ པཀིཎྞཀཾ ཝེདིཏབྦཾ – དྭཏྟིཾས ཙིཏྟཱནི ཧི རཱུཔཾ སམུཊྛཱཔེནྟི, ཨིརིཡཱཔཐམྤི ཨུཔཏྠམྦྷེནྟི, དུཝིདྷམྤི ཝིཉྙཏྟིཾ ཛནེནྟི། ཚབྦཱིསཏི ཝིཉྙཏྟིམེཝ ན ཛནེནྟི, ཨིཏརདྭཡཾ ཀརོནྟི། ཨེཀཱུནཝཱིསཏི རཱུཔམེཝ སམུཊྛཱཔེནྟི, ཨིཏརདྭཡཾ ན ཀརོནྟི། སོལ༹ས ཨིམེསུ ཏཱིསུ ཨེཀམྤི ན ཀརོནྟི།

    Idāni viññattisamuṭṭhāpakacittesu asammohatthaṃ dvattiṃsa chabbīsa ekūnavīsati soḷasa pacchimānīti idaṃ pakiṇṇakaṃ veditabbaṃ – dvattiṃsa cittāni hi rūpaṃ samuṭṭhāpenti, iriyāpathampi upatthambhenti, duvidhampi viññattiṃ janenti. Chabbīsati viññattimeva na janenti, itaradvayaṃ karonti. Ekūnavīsati rūpameva samuṭṭhāpenti, itaradvayaṃ na karonti. Soḷasa imesu tīsu ekampi na karonti.

    ཏཏྠ དྭཏྟིཾསཱཏི ཧེཊྛཱ ཝུཏྟཱནེཝ ཀཱམཱཝཙརཏོ ཨཊྛ ཀུསལཱནི, དྭཱདས ཨཀུསལཱནི, ཀིརིཡཏོ དས ཙིཏྟཱནི, སེཀྑཔུཐུཛྫནཱནཾ ཨབྷིཉྙཱཙིཏྟཾ, ཁཱིཎཱསཝཱནཾ ཨབྷིཉྙཱཙིཏྟནྟི། ཚབྦཱིསཱཏི རཱུཔཱཝཙརཏོ པཉྩ ཀུསལཱནི, པཉྩ ཀིརིཡཱནི, ཨརཱུཔཱཝཙརཏོ ཙཏྟཱརི ཀུསལཱནི, ཙཏྟཱརི ཀིརིཡཱནི, ཙཏྟཱརི མགྒཙིཏྟཱནི, ཙཏྟཱརི ཕལཙིཏྟཱནཱིཏི། ཨེཀཱུནཝཱིསཏཱིཏི ཀཱམཱཝཙརཀུསལཝིཔཱཀཏོ ཨེཀཱདས, ཨཀུསལཝིཔཱཀཏོ དྭེ , ཀིརིཡཏོ ཀིརིཡམནོདྷཱཏུ, རཱུཔཱཝཙརཏོ པཉྩ ཝིཔཱཀཙིཏྟཱནཱིཏི། སོལ༹སཱཏི དྭེ པཉྩཝིཉྙཱཎཱནི, སབྦསཏྟཱནཾ པཊིསནྡྷིཙིཏྟཾ, ཁཱིཎཱསཝཱནཾ ཙུཏིཙིཏྟཾ, ཨརཱུཔེ ཙཏྟཱརི ཝིཔཱཀཙིཏྟཱནཱིཏི། ཨིམཱནི སོལ༹ས རཱུཔིརིཡཱཔཐཝིཉྙཏྟཱིསུ ཨེཀམྤི ན ཀརོནྟི། ཨཉྙཱནིཔི བཧཱུནི ཨརཱུཔེ ཨུཔྤནྣཱནི ཨནོཀཱསགཏཏྟཱ རཱུཔཾ ན སམུཊྛཱཔེནྟི། ན ཏཱནེཝ, ཀཱཡཝཙཱིཝིཉྙཏྟིཡོཔི།

    Tattha dvattiṃsāti heṭṭhā vuttāneva kāmāvacarato aṭṭha kusalāni, dvādasa akusalāni, kiriyato dasa cittāni, sekkhaputhujjanānaṃ abhiññācittaṃ, khīṇāsavānaṃ abhiññācittanti. Chabbīsāti rūpāvacarato pañca kusalāni, pañca kiriyāni, arūpāvacarato cattāri kusalāni, cattāri kiriyāni, cattāri maggacittāni, cattāri phalacittānīti. Ekūnavīsatīti kāmāvacarakusalavipākato ekādasa, akusalavipākato dve , kiriyato kiriyamanodhātu, rūpāvacarato pañca vipākacittānīti. Soḷasāti dve pañcaviññāṇāni, sabbasattānaṃ paṭisandhicittaṃ, khīṇāsavānaṃ cuticittaṃ, arūpe cattāri vipākacittānīti. Imāni soḷasa rūpiriyāpathaviññattīsu ekampi na karonti. Aññānipi bahūni arūpe uppannāni anokāsagatattā rūpaṃ na samuṭṭhāpenti. Na tāneva, kāyavacīviññattiyopi.

    ༦༣༧. ཨཱཀཱསདྷཱཏུནིདྡེསེ ན ཀསྶཏི, ན ནིཀསྶཏི, ཀསིཏུཾ ཝཱ ཚིནྡིཏུཾ ཝཱ བྷིནྡིཏུཾ ཝཱ ན སཀྐཱཏི ཨཱཀཱསོ། ཨཱཀཱསོཝ ཨཱཀཱསགཏཾ , ཁེལ༹གཏཱདི ཝིཡ། ཨཱཀཱསོཏི ཝཱ གཏནྟི ‘ཨཱཀཱསགཏཾ’། ན ཧཉྙཏཱིཏི ཨགྷཾ, ཨགྷཊྚནཱིཡནྟི ཨཏྠོ། ཨགྷམེཝ ཨགྷགཏཾ། ཚིདྡཊྛེན ཝིཝརོ། ཝིཝརོཝ ཝིཝརགཏཾ། ཨསམྥུཊྛཾ ཙཏཱུཧི མཧཱབྷཱུཏེཧཱིཏི ཨེཏེཧི ཨསམྥུཊྛཾ ནིཛྫཊཱཀཱསཾཝ ཀཐིཏཾ། ལཀྑཎཱདིཏོ པན རཱུཔཔརིཙྪེདལཀྑཎཱ ཨཱཀཱསདྷཱཏུ, རཱུཔཔརིཡནྟཔྤཀཱསནརསཱ, རཱུཔམརིཡཱདཔཙྩུཔཊྛཱནཱ ཨསམྥུཊྛབྷཱཝཚིདྡཝིཝརབྷཱཝཔཙྩུཔཊྛཱནཱ ཝཱ, པརིཙྪིནྣརཱུཔཔདཊྛཱནཱ, ཡཱཡ པརིཙྪིནྣེསུ རཱུཔེསུ ‘ཨིདམིཏོ ཨུདྡྷཾ ཨདྷོ ཏིརིཡ’ནྟི ཙ ཧོཏི།

    637. Ākāsadhātuniddese na kassati, na nikassati, kasituṃ vā chindituṃ vā bhindituṃ vā na sakkāti ākāso. Ākāsova ākāsagataṃ, kheḷagatādi viya. Ākāsoti vā gatanti ‘ākāsagataṃ’. Na haññatīti aghaṃ, aghaṭṭanīyanti attho. Aghameva aghagataṃ. Chiddaṭṭhena vivaro. Vivarova vivaragataṃ. Asamphuṭṭhaṃ catūhi mahābhūtehīti etehi asamphuṭṭhaṃ nijjaṭākāsaṃva kathitaṃ. Lakkhaṇādito pana rūpaparicchedalakkhaṇā ākāsadhātu, rūpapariyantappakāsanarasā, rūpamariyādapaccupaṭṭhānā asamphuṭṭhabhāvachiddavivarabhāvapaccupaṭṭhānā vā, paricchinnarūpapadaṭṭhānā, yāya paricchinnesu rūpesu ‘idamito uddhaṃ adho tiriya’nti ca hoti.

    ༦༣༨. ཨིཏོ པརེ རཱུཔསྶལཧུཏཱདཱིནཾ ནིདྡེསཱ ཙིཏྟསྶལཧུཏཱདཱིསུ ཝུཏྟནཡེནེཝ ཝེདིཏབྦཱ། ལཀྑཎཱདིཏོ པནེཏྠ ཨདནྡྷཏཱལཀྑཎཱ རཱུཔསྶ ལཧུཏཱ, རཱུཔཱནཾ གརུབྷཱཝཝིནོདནརསཱ, ལཧུཔརིཝཏྟིཏཱཔཙྩུཔཊྛཱནཱ, ལཧུརཱུཔཔདཊྛཱནཱ། ཨཐདྡྷཏཱལཀྑཎཱ རཱུཔསྶ མུདུཏཱ, རཱུཔཱནཾ ཐདྡྷབྷཱཝཝིནོདནརསཱ, སབྦཀིརིཡཱསུ ཨཝིརོདྷིཏཱཔཙྩུཔཊྛཱནཱ, མུདུརཱུཔཔདཊྛཱནཱ། སརཱིརཀིརིཡཱནུཀཱུལཀམྨཉྙབྷཱཝལཀྑཎཱ རཱུཔསྶ ཀམྨཉྙཏཱ, ཨཀམྨཉྙཏཱཝིནོདནརསཱ, ཨདུབྦལབྷཱཝཔཙྩུཔཊྛཱནཱ, ཀམྨཉྙརཱུཔཔདཊྛཱནཱ།

    638. Ito pare rūpassalahutādīnaṃ niddesā cittassalahutādīsu vuttanayeneva veditabbā. Lakkhaṇādito panettha adandhatālakkhaṇā rūpassa lahutā, rūpānaṃ garubhāvavinodanarasā, lahuparivattitāpaccupaṭṭhānā, lahurūpapadaṭṭhānā. Athaddhatālakkhaṇā rūpassa mudutā, rūpānaṃ thaddhabhāvavinodanarasā, sabbakiriyāsu avirodhitāpaccupaṭṭhānā, mudurūpapadaṭṭhānā. Sarīrakiriyānukūlakammaññabhāvalakkhaṇā rūpassa kammaññatā, akammaññatāvinodanarasā, adubbalabhāvapaccupaṭṭhānā, kammaññarūpapadaṭṭhānā.

    ཨེཏཱ པན ཏིསྶོ ན ཨཉྙམཉྙཾ ཝིཛཧནྟི། ཨེཝཾ སནྟེཔི ཡོ ཨརོགིནོ ཝིཡ རཱུཔཱནཾ ལཧུབྷཱཝོ, ཨདནྡྷཏཱལཧུཔརིཝཏྟིཔྤཀཱརོ, རཱུཔདནྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ ‘རཱུཔསྶལཧུཏཱ’། ཡོ སུཔརིམདྡིཏཙམྨསྶེཝ རཱུཔཱནཾ མུདུབྷཱཝོ སབྦཀིརིཡཱཝིསེསེསུ སརསཝཏྟནབྷཱཝོ ཝསཝཏྟནབྷཱཝམདྡཝཔྤཀཱརོ རཱུཔཐདྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ , སོ རཱུཔཝིཀཱརོ ‘རཱུཔསྶ མུདུཏཱ’། ཡོ པན སུདྷནྟསུཝཎྞསྶེཝ རཱུཔཱནཾ ཀམྨཉྙབྷཱཝོ སརཱིརཀིརིཡཱནུཀཱུལབྷཱཝཔྤཀཱརོ སརཱིརཀིརིཡཱནཾ ཨནནུཀཱུལཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ ‘རཱུཔསྶ ཀམྨཉྙཏཱ’ཏི། ཨེཝམེཏཱསཾ ཝིསེསོ ཝེདིཏབྦོ།

    Etā pana tisso na aññamaññaṃ vijahanti. Evaṃ santepi yo arogino viya rūpānaṃ lahubhāvo, adandhatālahuparivattippakāro, rūpadandhattakaradhātukkhobhapaṭipakkhapaccayasamuṭṭhāno, so rūpavikāro ‘rūpassalahutā’. Yo suparimadditacammasseva rūpānaṃ mudubhāvo sabbakiriyāvisesesu sarasavattanabhāvo vasavattanabhāvamaddavappakāro rūpathaddhattakaradhātukkhobhapaṭipakkhapaccayasamuṭṭhāno , so rūpavikāro ‘rūpassa mudutā’. Yo pana sudhantasuvaṇṇasseva rūpānaṃ kammaññabhāvo sarīrakiriyānukūlabhāvappakāro sarīrakiriyānaṃ ananukūlakaradhātukkhobhapaṭipakkhapaccayasamuṭṭhāno, so rūpavikāro ‘rūpassa kammaññatā’ti. Evametāsaṃ viseso veditabbo.

    ཨེཏཱ པན ཏིསྶོཔི ཀམྨཾ ཀཱཏུཾ ན སཀྐོཏི, ཨཱཧཱརཱདཡོཝ ཀརོནྟི། ཏཐཱ ཧི ཡོགིནོ ‘ཨཛྫ ཨམྷེཧི བྷོཛནསཔྤཱཡཾ ལདྡྷཾ, ཀཱཡོ ནོ ལཧུ མུདུ ཀམྨཉྙོ’ཏི ཝདནྟི། ‘ཨཛྫ ཨུཏུསཔྤཱཡཾ ལདྡྷཾ, ཨཛྫ ཨམྷཱཀཾ ཙིཏྟཾ ཨེཀགྒཾ, ཀཱཡོ ནོ ལཧུ མུདུ ཀམྨཉྙོ’ཏི ཝདནྟཱིཏི།

    Etā pana tissopi kammaṃ kātuṃ na sakkoti, āhārādayova karonti. Tathā hi yogino ‘ajja amhehi bhojanasappāyaṃ laddhaṃ, kāyo no lahu mudu kammañño’ti vadanti. ‘Ajja utusappāyaṃ laddhaṃ, ajja amhākaṃ cittaṃ ekaggaṃ, kāyo no lahu mudu kammañño’ti vadantīti.

    ༦༤༡. ཨུཔཙཡསནྟཏིནིདྡེསེསུ ཨཱཡཏནཱནནྟི ཨཌྜྷེཀཱདསནྣཾ རཱུཔཱཡཏནཱནཾ། ཨཱཙཡོཏི ནིབྦཏྟི། སོ རཱུཔསྶ ཨུཔཙཡོཏི ཡོ ཨཱཡཏནཱནཾ ཨཱཙཡོ པུནཔྤུནཾ ནིབྦཏྟམཱནཱནཾ, སོཝ རཱུཔསྶ ཨུཔཙཡོ ནཱམ ཧོཏི; ཝཌྜྷཱིཏི ཨཏྠོ། ཡོ རཱུཔསྶ ཨུཔཙཡོ སཱ རཱུཔསྶ སནྟཏཱིཏི ཡཱ ཨེཝཾ ཨུཔཙིཏཱནཾ རཱུཔཱནཾ ཝཌྜྷི, ཏཏོ ཨུཏྟརིཏརཾ པཝཏྟིཀཱལེ སཱ རཱུཔསྶ སནྟཏི ནཱམ ཧོཏི; པཝཏྟཱིཏི ཨཏྠོ། ནདིཏཱིརེ ཁཏཀཱུཔསྨིཉྷི ཨུདཀུགྒམནཀཱལོ ཝིཡ ཨཱཙཡོ, ནིབྦཏྟི; པརིཔུཎྞཀཱལོ ཝིཡ ཨུཔཙཡོ, ཝཌྜྷི; ཨཛ྄ཛྷོཏྠརིཏྭཱ གམནཀཱལོ ཝིཡ སནྟཏི, པཝཏྟཱིཏི ཝེདིཏབྦཱ།

    641. Upacayasantatiniddesesu āyatanānanti aḍḍhekādasannaṃ rūpāyatanānaṃ. Ācayoti nibbatti. So rūpassa upacayoti yo āyatanānaṃ ācayo punappunaṃ nibbattamānānaṃ, sova rūpassa upacayo nāma hoti; vaḍḍhīti attho. Yo rūpassa upacayo sā rūpassa santatīti yā evaṃ upacitānaṃ rūpānaṃ vaḍḍhi, tato uttaritaraṃ pavattikāle sā rūpassa santati nāma hoti; pavattīti attho. Naditīre khatakūpasmiñhi udakuggamanakālo viya ācayo, nibbatti; paripuṇṇakālo viya upacayo, vaḍḍhi; ajjhottharitvā gamanakālo viya santati, pavattīti veditabbā.

    ཨེཝཾ ཀིཾ ཀཐིཏཾ ཧོཏཱིཏི? ཨཱཡཏནེན ཧི ཨཱཙཡོ ཀཐིཏོ, ཨཱཙཡེན ཨཱཡཏནཾ ཀཐིཏཾ། ཨཱཙཡོཝ ཀཐིཏོ ཨཱཡཏནམེཝ ཀཐིཏཾ། ཨེཝམྤི ཀིཾ ཀཐིཏཾ ཧོཏཱིཏི? ཙཏུསནྟཏིརཱུཔཱནཾ ཨཱཙཡོ ཨུཔཙཡོ ནིབྦཏྟི ཝཌྜྷི ཀཐིཏཱ། ཨཏྠཏོ ཧི ཨུབྷཡམྤེཏཾ ཛཱཏིརཱུཔསྶེཝ ཨདྷིཝཙནཾ། ཨཱཀཱརནཱནཏྟེན པན ཝེནེཡྻཝསེན ཙ ཨུཔཙཡོ སནྟཏཱིཏི ཨུདྡེསདེསནཾ ཀཏྭཱ ཡསྨཱ ཨེཏྠ ཨཏྠཏོ ནཱནཏྟཾ ནཏྠི, ཏསྨཱ ནིདྡེསེ ‘‘ཡོ ཨཱཡཏནཱནཾ ཨཱཙཡོ སོ རཱུཔསྶ ཨུཔཙཡོ, ཡོ རཱུཔསྶ ཨུཔཙཡོ སཱ རཱུཔསྶ སནྟཏཱི’’ཏི ཝུཏྟཾ།

    Evaṃ kiṃ kathitaṃ hotīti? Āyatanena hi ācayo kathito, ācayena āyatanaṃ kathitaṃ. Ācayova kathito āyatanameva kathitaṃ. Evampi kiṃ kathitaṃ hotīti? Catusantatirūpānaṃ ācayo upacayo nibbatti vaḍḍhi kathitā. Atthato hi ubhayampetaṃ jātirūpasseva adhivacanaṃ. Ākāranānattena pana veneyyavasena ca upacayo santatīti uddesadesanaṃ katvā yasmā ettha atthato nānattaṃ natthi, tasmā niddese ‘‘yo āyatanānaṃ ācayo so rūpassa upacayo, yo rūpassa upacayo sā rūpassa santatī’’ti vuttaṃ.

    ཡསྨཱ ཙ ཨུབྷཡམྤེཏཾ ཛཱཏིརཱུཔསྶེཝ ཨདྷིཝཙནཾ ཏསྨཱ ཨེཏྠ ཨཱཙཡལཀྑཎོ རཱུཔསྶ ཨུཔཙཡོ, པུབྦནྟཏོ རཱུཔཱནཾ ཨུམྨུཛྫཱཔནརསོ, ནིཡྻཱཏནཔཙྩུཔཊྛཱནོ པརིཔུཎྞབྷཱཝཔཙྩུཔཊྛཱནོ ཝཱ, ཨུཔཙིཏརཱུཔཔདཊྛཱནོ། པཝཏྟིལཀྑཎཱ རཱུཔསྶ སནྟཏི, ཨནུཔྤབནྡྷརསཱ, ཨནུཔཙྪེདཔཙྩུཔཊྛཱནཱ, ཨནུཔྤབནྡྷརཱུཔཔདཊྛཱནཱཏི ཝེདིཏབྦཱ།

    Yasmā ca ubhayampetaṃ jātirūpasseva adhivacanaṃ tasmā ettha ācayalakkhaṇo rūpassa upacayo, pubbantato rūpānaṃ ummujjāpanaraso, niyyātanapaccupaṭṭhāno paripuṇṇabhāvapaccupaṭṭhāno vā, upacitarūpapadaṭṭhāno. Pavattilakkhaṇā rūpassa santati, anuppabandharasā, anupacchedapaccupaṭṭhānā, anuppabandharūpapadaṭṭhānāti veditabbā.

    ༦༤༣. ཛརཏཱནིདྡེསེ ཛཱིརཎཀཝསེན ཛརཱ; ཨཡམེཏྠ སབྷཱཝནིདྡེསོ ། ཛཱིརཎཱཀཱརོ ཛཱིརཎཏཱ། ཁཎྜིཙྩནྟི ཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ། པཙྪིམཱ དྭེ པཀཏིནིདྡེསཱ། ཨཡཉྷི ‘ཛརཱ’ཏི ཨིམིནཱ པདེན སབྷཱཝཏོ དཱིཔིཏཱ; ཏེནསྶཱཡཾ སབྷཱཝནིདྡེསོ། ‘ཛཱིརཎཏཱ’ཏི ཨིམིནཱ ཨཱཀཱརཏོ; ཏེནསྶཱཡཾ ཨཱཀཱརནིདྡེསོ། ཁཎྜིཙྩནྟི ཨིམིནཱ ཀཱལཱཏིཀྐམེ དནྟནཁཱནཾ ཁཎྜིཏབྷཱཝཀརཎཀིཙྩཏོ། པཱལིཙྩནྟི ཨིམིནཱ ཀེསལོམཱནཾ པལིཏབྷཱཝཀརཎཀིཙྩཏོ། ཝལིཏྟཙཏཱཏི ཨིམིནཱ མཾསཾ མིལཱཔེཏྭཱ ཏཙེ ཝལིབྷཱཝཀརཎཀིཙྩཏོ དཱིཔིཏཱ། ཏེནསྶཱ ཨིམེ ‘ཁཎྜིཙྩ’ནྟིཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ། ཏེཧི ཨིམེསཾ ཝིཀཱརཱནཾ དསྶནཝསེན པཱཀཊཱིབྷཱུཏཱ པཱཀཊཛརཱ དསྶིཏཱ། ཡཐེཝ ཧི ཨུདཀསྶ ཝཱ ཨགྒིནོ ཝཱ ཏིཎརུཀྑཱདཱིནཾ སཾབྷགྒཔལིབྷགྒཏཱཡ ཝཱ ཛྷཱམཏཱཡ ཝཱ གཏམགྒོ པཱཀཊོ ཧོཏི, ན ཙ སོ གཏམགྒོ ཏཱནེཝ ཨུདཀཱདཱིནི, ཨེཝམེཝ ཛརཱཡ དནྟཱདཱིསུ ཁཎྜིཙྩཱདིཝསེན གཏམགྒོ པཱཀཊོ, ཙཀྑུཾ ཨུམྨཱིལེཏྭཱཔི གཡ྄ཧཏི, ན ཙ ཁཎྜིཙྩཱདཱིནེཝ ཛརཱ། ན ཧི ཛརཱ ཙཀྑུཝིཉྙེཡྻཱ ཧོཏི།

    643. Jaratāniddese jīraṇakavasena jarā; ayamettha sabhāvaniddeso . Jīraṇākāro jīraṇatā. Khaṇḍiccanti ādayo tayo kālātikkame kiccaniddesā. Pacchimā dve pakatiniddesā. Ayañhi ‘jarā’ti iminā padena sabhāvato dīpitā; tenassāyaṃ sabhāvaniddeso. ‘Jīraṇatā’ti iminā ākārato; tenassāyaṃ ākāraniddeso. Khaṇḍiccanti iminā kālātikkame dantanakhānaṃ khaṇḍitabhāvakaraṇakiccato. Pāliccanti iminā kesalomānaṃ palitabhāvakaraṇakiccato. Valittacatāti iminā maṃsaṃ milāpetvā tace valibhāvakaraṇakiccato dīpitā. Tenassā ime ‘khaṇḍicca’ntiādayo tayo kālātikkame kiccaniddesā. Tehi imesaṃ vikārānaṃ dassanavasena pākaṭībhūtā pākaṭajarā dassitā. Yatheva hi udakassa vā aggino vā tiṇarukkhādīnaṃ saṃbhaggapalibhaggatāya vā jhāmatāya vā gatamaggo pākaṭo hoti, na ca so gatamaggo tāneva udakādīni, evameva jarāya dantādīsu khaṇḍiccādivasena gatamaggo pākaṭo, cakkhuṃ ummīletvāpi gayhati, na ca khaṇḍiccādīneva jarā. Na hi jarā cakkhuviññeyyā hoti.

    ཨཱཡུནོ སཾཧཱནི ཨིནྡྲིཡཱནཾ པརིཔཱཀོཏི ཨིམེཧི པན པདེཧི ཀཱལཱཏིཀྐམེཡེཝ ཨབྷིབྱཏྟཱཡ ཨཱཡུཀྑཡཙཀྑཱདིཨིནྡྲིཡཔརིཔཱཀསཉྙིཏཱཡ པཀཏིཡཱ དཱིཔིཏཱ། ཏེནསྶིམེ པཙྪིམཱ དྭེ པཀཏིནིདྡེསཱཏི ཝེདིཏབྦཱ། ཏཏྠ ཡསྨཱ ཛརཾ པཏྟསྶ ཨཱཡུ ཧཱཡཏི, ཏསྨཱ ཛརཱ ‘ཨཱཡུནོ སཾཧཱནཱི’ཏི ཕལཱུཔཙཱརེན ཝུཏྟཱ། ཡསྨཱ ཙ དཧརཀཱལེ སུཔྤསནྣཱནི, སུཁུམམྤི ཨཏྟནོ ཝིསཡཾ སུཁེནེཝ གཎྷནསམཏྠཱནི ཙཀྑཱདཱིནི ཨིནྡྲིཡཱནི ཛརཾ པཏྟསྶ པརིཔཀྐཱནི ཨཱལུལི༹ཏཱནི ཨཝིསདཱནི, ཨོལཱ༹རིཀམྤི ཨཏྟནོ ཝིསཡཾ གཧེཏུཾ ཨསམཏྠཱནི ཧོནྟི, ཏསྨཱ ‘ཨིནྡྲིཡཱནཾ པརིཔཱཀོ’ཏིཔི ཕལཱུཔཙཱརེནེཝ ཝུཏྟཱ།

    Āyuno saṃhāni indriyānaṃ paripākoti imehi pana padehi kālātikkameyeva abhibyattāya āyukkhayacakkhādiindriyaparipākasaññitāya pakatiyā dīpitā. Tenassime pacchimā dve pakatiniddesāti veditabbā. Tattha yasmā jaraṃ pattassa āyu hāyati, tasmā jarā ‘āyuno saṃhānī’ti phalūpacārena vuttā. Yasmā ca daharakāle suppasannāni, sukhumampi attano visayaṃ sukheneva gaṇhanasamatthāni cakkhādīni indriyāni jaraṃ pattassa paripakkāni āluḷitāni avisadāni, oḷārikampi attano visayaṃ gahetuṃ asamatthāni honti, tasmā ‘indriyānaṃ paripāko’tipi phalūpacāreneva vuttā.

    སཱ པནཱཡཾ ཨེཝཾ ནིདྡིཊྛཱ སབྦཱཔི ཛརཱ པཱཀཊཱ པཊིཙྪནྣཱཏི དུཝིདྷཱ ཧོཏི། ཏཏྠ དནྟཱདཱིསུ ཁཎྜབྷཱཝཱདིདསྶནཏོ རཱུཔདྷམྨེསུ ཛརཱ པཱཀཊཛརཱ ནཱམ ། ཨརཱུཔདྷམྨེསུ པན ཛརཱ ཏཱདིསསྶ ཝིཀཱརསྶ ཨདསྶནཏོ པཊིཙྪནྣཛརཱ ནཱམ། པུན ཨཝཱིཙི སཝཱིཙཱིཏི ཨེཝམྤི དུཝིདྷཱ ཧོཏི། ཏཏྠ མཎིཀནཀརཛཏཔཝཱལ༹ཙནྡིམསཱུརིཡཱདཱིནཾ ཝིཡ, མནྡདསཀཱདཱིསུ པཱཎཱིནཾ ཝིཡ ཙ, པུཔྥཕལཔལླཝཱདཱིསུ ཙ ཨཔཱཎཱིནཾ ཝིཡ, ཨནྟརནྟརཱ ཝཎྞཝིསེསཱདཱིནཾ དུཝིཉྙེཡྻཏྟཱ ཛརཱ ཨཝཱིཙིཛརཱ ནཱམ; ནིརནྟརཛརཱཏི ཨཏྠོ། ཏཏོ ཨཉྙེསུ པན ཡཐཱཝུཏྟེསུ ཨནྟརནྟརཱ ཝཎྞཝིསེསཱདཱིནཾ སུཝིཉྙེཡྻཏྟཱ ཛརཱ སཝཱིཙིཛརཱ ནཱམཱཏི ཝེདིཏབྦཱ།

    Sā panāyaṃ evaṃ niddiṭṭhā sabbāpi jarā pākaṭā paṭicchannāti duvidhā hoti. Tattha dantādīsu khaṇḍabhāvādidassanato rūpadhammesu jarā pākaṭajarā nāma . Arūpadhammesu pana jarā tādisassa vikārassa adassanato paṭicchannajarā nāma. Puna avīci savīcīti evampi duvidhā hoti. Tattha maṇikanakarajatapavāḷacandimasūriyādīnaṃ viya, mandadasakādīsu pāṇīnaṃ viya ca, pupphaphalapallavādīsu ca apāṇīnaṃ viya, antarantarā vaṇṇavisesādīnaṃ duviññeyyattā jarā avīcijarā nāma; nirantarajarāti attho. Tato aññesu pana yathāvuttesu antarantarā vaṇṇavisesādīnaṃ suviññeyyattā jarā savīcijarā nāmāti veditabbā.

    ལཀྑཎཱདིཏོཔི རཱུཔཔརིཔཱཀལཀྑཎཱ རཱུཔསྶ ཛརཏཱ, ཨུཔནཡནརསཱ, སབྷཱཝཱནཔགམེཔི ནཝབྷཱཝཱཔགམཔཙྩུཔཊྛཱནཱ, ཝཱིཧིཔུརཱཎབྷཱཝོ ཝིཡ པརིཔཙྩམཱནརཱུཔཔདཊྛཱནཱཏི ཝེདིཏབྦཱ།

    Lakkhaṇāditopi rūpaparipākalakkhaṇā rūpassa jaratā, upanayanarasā, sabhāvānapagamepi navabhāvāpagamapaccupaṭṭhānā, vīhipurāṇabhāvo viya paripaccamānarūpapadaṭṭhānāti veditabbā.

    ༦༤༤. ཨནིཙྩཏཱནིདྡེསེ ཁཡགམནཝསེན ཁཡོ, ཝཡགམནཝསེན ཝཡོ, བྷིཛྫནཝསེན བྷེདོ། ཨཐ ཝཱ, ཡསྨཱ ཏཾ པཏྭཱ རཱུཔཾ ཁཱིཡཏི, ཝེཏི, བྷིཛྫཏི ཙ, ཏསྨཱ ཁཱིཡཏི ཨེཏསྨིནྟི ‘ཁཡོ’, ཝེཏི ཨེཏསྨིནྟི ‘ཝཡོ’, བྷིཛྫཏི ཨེཏསྨིནྟི ‘བྷེདོ’། ཨུཔསགྒཝསེན པདཾ ཝཌྜྷེཏྭཱ བྷེདོཝ པརིབྷེདོ། ཧུཏྭཱ ཨབྷཱཝཊྛེན, ན ནིཙྩནྟི ཨནིཙྩཾ། ཏསྶ བྷཱཝོ ཨནིཙྩཏཱ ། ཨནྟརདྷཱཡཏི ཨེཏྠཱཏི ཨནྟརདྷཱནཾ། མརཎཉྷི པཏྭཱ རཱུཔཾ ཨནྟརདྷཱཡཏི, ཨདསྶནཾ གཙྪཏི། ན ཀེཝལཉྩ རཱུཔམེཝ, སབྦེཔི པཉྩཀྑནྡྷཱ། ཏསྨཱ པཉྩནྣམྤི ཁནྡྷཱནཾ ཨནིཙྩཏཱཡ ཨིདམེཝ ལཀྑཎནྟི ཝེདིཏབྦཾ། ལཀྑཎཱདིཏོ པན པརིབྷེདལཀྑཎཱ རཱུཔསྶ ཨནིཙྩཏཱ, སཾསཱིདནརསཱ, ཁཡཝཡཔཙྩུཔཊྛཱནཱ, པརིབྷིཛྫམཱནརཱུཔཔདཊྛཱནཱཏི ཝེདིཏབྦཱ།

    644. Aniccatāniddese khayagamanavasena khayo, vayagamanavasena vayo, bhijjanavasena bhedo. Atha vā, yasmā taṃ patvā rūpaṃ khīyati, veti, bhijjati ca, tasmā khīyati etasminti ‘khayo’, veti etasminti ‘vayo’, bhijjati etasminti ‘bhedo’. Upasaggavasena padaṃ vaḍḍhetvā bhedova paribhedo. Hutvā abhāvaṭṭhena, na niccanti aniccaṃ. Tassa bhāvo aniccatā. Antaradhāyati etthāti antaradhānaṃ. Maraṇañhi patvā rūpaṃ antaradhāyati, adassanaṃ gacchati. Na kevalañca rūpameva, sabbepi pañcakkhandhā. Tasmā pañcannampi khandhānaṃ aniccatāya idameva lakkhaṇanti veditabbaṃ. Lakkhaṇādito pana paribhedalakkhaṇā rūpassa aniccatā, saṃsīdanarasā, khayavayapaccupaṭṭhānā, paribhijjamānarūpapadaṭṭhānāti veditabbā.

    ཧེཊྛཱ ཛཱཏི གཧིཏཱ ཛརཱ གཧིཏཱ, ཨིམསྨིཾ ཋཱནེ མརཎཾ གཧིཏཾ། ཨིམེ ཏཡོ དྷམྨཱ ཨིམེསཾ སཏྟཱནཾ ཨུཀྑིཏྟཱསིཀཔཙྩཱམིཏྟསདིསཱ། ཡཐཱ ཧི པུརིསསྶ ཏཡོ པཙྩཱམིཏྟཱ ཨོཏཱརཾ གཝེསམཱནཱ ཝིཙརེཡྻུཾ། ཏེསུ ཨེཀོ ཨེཝཾ ཝདེཡྻ – ‘ཨེཏཾ ནཱིཧརིཏྭཱ ཨཊཝིཔཝེསནཾ མཡ྄ཧཾ བྷཱརོ ཧོཏཱུ’ཏི། དུཏིཡོ ‘ཨཊཝིགཏཀཱལེ པོཐེཏྭཱ པཐཝིཡཾ པཱཏནཾ མཡ྄ཧཾ བྷཱརོ’ཏི། ཏཏིཡོ ‘པཐཝིགཏཀཱལཏོ པཊྛཱཡ ཨསིནཱ སཱིསཙྪེདནཾ མཡ྄ཧཾ བྷཱརོ’ཏི། ཨེཝརཱུཔཱ ཨིམེ ཛཱཏི ཨཱདཡོ། ནཱིཧརིཏྭཱ ཨཊཝིཔཝེསནཔཙྩཱམིཏྟསདིསཱ ཧེཏྠ ཛཱཏི, ཏསྨིཾ ཏསྨིཾ ཋཱནེ ནིབྦཏྟཱཔནཏོ། ཨཊཝིགཏཾ པོཐེཏྭཱ པཐཝིཡཾ པཱཏནཔཙྩཱམིཏྟསདིསཱ ཛརཱ , ནིབྦཏྟཀྑནྡྷཱནཾ དུབྦལཔརཱདྷཱིནམཉྩཔརཱཡཎབྷཱཝཀརཎཏོ། པཐཝིགཏསྶ ཨསིནཱ སཱིསཙྪེདཀཔཙྩཱམིཏྟསདིསཾ མརཎཾ, ཛརཱཔྤཏྟཱནཾ ཁནྡྷཱནཾ ཛཱིཝིཏཀྑཡཔཱཔནཏོཏི།

    Heṭṭhā jāti gahitā jarā gahitā, imasmiṃ ṭhāne maraṇaṃ gahitaṃ. Ime tayo dhammā imesaṃ sattānaṃ ukkhittāsikapaccāmittasadisā. Yathā hi purisassa tayo paccāmittā otāraṃ gavesamānā vicareyyuṃ. Tesu eko evaṃ vadeyya – ‘etaṃ nīharitvā aṭavipavesanaṃ mayhaṃ bhāro hotū’ti. Dutiyo ‘aṭavigatakāle pothetvā pathaviyaṃ pātanaṃ mayhaṃ bhāro’ti. Tatiyo ‘pathavigatakālato paṭṭhāya asinā sīsacchedanaṃ mayhaṃ bhāro’ti. Evarūpā ime jāti ādayo. Nīharitvā aṭavipavesanapaccāmittasadisā hettha jāti, tasmiṃ tasmiṃ ṭhāne nibbattāpanato. Aṭavigataṃ pothetvā pathaviyaṃ pātanapaccāmittasadisā jarā , nibbattakkhandhānaṃ dubbalaparādhīnamañcaparāyaṇabhāvakaraṇato. Pathavigatassa asinā sīsacchedakapaccāmittasadisaṃ maraṇaṃ, jarāppattānaṃ khandhānaṃ jīvitakkhayapāpanatoti.

    ༦༤༥. ཀབལཱི༹ཀཱརཱཧཱརནིདྡེསེ ཀབལ༹ཾ ཀརཱིཡཏཱིཏི ཀབལཱི༹ཀཱརོ། ཨཱཧརཱིཡཏཱིཏི ཨཱཧཱརོ། ཀབལ༹ཾ ཀཏྭཱ ཨཛ྄ཛྷོཧརཱིཡཏཱིཏི ཨཏྠོ། རཱུཔཾ ཝཱ ཨཱཧརཏཱིཏིཔི ‘ཨཱཧཱརོ’། ཨེཝཾ ཝཏྠུཝསེན ནཱམཾ ཨུདྡྷརིཏྭཱ པུན ཝཏྠུཝསེནེཝེཏཾ པབྷེདཏོ དསྶེཏུཾ ཨོདནོ ཀུམྨཱསོཏིཨཱདི ཝུཏྟཾ། ཨོདནཱདཱིནི ཧི ཕཱཎིཏཔརིཡནྟཱནི དྭཱདས ཨིདྷཱདྷིཔྤེཏསྶ ཨཱཧཱརསྶ ཝཏྠཱུནི། པཱལི༹ཡཾ ཨནཱགཏཱནི མཱུལཕལཱདཱིནི ཡེཝཱཔནཀཾ པཝིཊྛཱནི།

    645. Kabaḷīkārāhāraniddese kabaḷaṃ karīyatīti kabaḷīkāro. Āharīyatīti āhāro. Kabaḷaṃ katvā ajjhoharīyatīti attho. Rūpaṃ vā āharatītipi ‘āhāro’. Evaṃ vatthuvasena nāmaṃ uddharitvā puna vatthuvasenevetaṃ pabhedato dassetuṃ odano kummāsotiādi vuttaṃ. Odanādīni hi phāṇitapariyantāni dvādasa idhādhippetassa āhārassa vatthūni. Pāḷiyaṃ anāgatāni mūlaphalādīni yevāpanakaṃ paviṭṭhāni.

    ཨིདཱནི ཏཱནི མཱུལཕལཱདཱིནི ཀཏྟབྦཏོ དསྶེཏུཾ ཡམྷི ཡམྷི ཛནཔདེཏིཨཱདིམཱཧ། ཏཏྠ མུཁེན ཨསིཏབྦཾ བྷུཉྫིཏབྦནྟི མུཁཱསིཡཾ། དནྟེཧི ཝིཁཱདིཏབྦནྟི དནྟཝིཁཱདནཾ། གལེན ཨཛ྄ཛྷོཧརིཏབྦནྟི གལཛ྄ཛྷོཧརཎཱིཡཾ། ཨིདཱནི ཏཾ ཀིཙྩཝསེན དསྶེཏུཾ ཀུཙྪིཝིཏྠམྦྷནནྟི ཨཱཧ། ཏཉྷི མཱུལཕལཱདི ཨོདནཀུམྨཱསཱདི ཝཱ ཨཛ྄ཛྷོཧཊཾ ཀུཙྪིཾ ཝིཏྠམྦྷེཏི། ཨིདམསྶ ཀིཙྩཾ། ཡཱཡ ཨོཛཱཡ སཏྟཱ ཡཱཔེནྟཱིཏི ཧེཊྛཱ སབྦཔདེཧི སཝཏྠུཀཾ ཨཱཧཱརཾ དསྶེཏྭཱ ཨིདཱནི ནིབྦཊྚིཏཨོཛམེཝ དསྶེཏུཾ ཨིདཾ ཝུཏྟཾ།

    Idāni tāni mūlaphalādīni kattabbato dassetuṃ yamhi yamhi janapadetiādimāha. Tattha mukhena asitabbaṃ bhuñjitabbanti mukhāsiyaṃ. Dantehi vikhāditabbanti dantavikhādanaṃ. Galena ajjhoharitabbanti galajjhoharaṇīyaṃ. Idāni taṃ kiccavasena dassetuṃ kucchivitthambhananti āha. Tañhi mūlaphalādi odanakummāsādi vā ajjhohaṭaṃ kucchiṃ vitthambheti. Idamassa kiccaṃ. Yāya ojāya sattā yāpentīti heṭṭhā sabbapadehi savatthukaṃ āhāraṃ dassetvā idāni nibbaṭṭitaojameva dassetuṃ idaṃ vuttaṃ.

    ཀིཾ པནེཏྠ ཝཏྠུསྶ ཀིཙྩཾ? ཀིཾ ཨོཛཱཡ? པརིསྶཡཧརཎཔཱལནཱནི། ཝཏྠུཧི པརིསྶཡཾ ཧརཏི པཱལེཏུཾ ན སཀྐོཏི, ཨོཛཱ པཱལེཏི པརིསྶཡཾ ཧརིཏུཾ ན སཀྐོཏི། དྭེཔི ཨེཀཏོ ཧུཏྭཱ པཱལེཏུམྤི སཀྐོནྟི པརིསྶཡམྤི ཧརིཏུཾ། ཀོ པནེས པརིསྶཡོ ནཱམ? ཀམྨཛཏེཛོ། ཨནྟོཀུཙྪིཡཉྷི ཨོདནཱདིཝཏྠུསྨིཾ ཨསཏི, ཀམྨཛཏེཛོ ཨུཊྛཧིཏྭཱ ཨུདརཔཊལཾ གཎྷཱཏི, ‘ཚཱཏོམྷི, ཨཱཧཱརཾ མེ དེཐཱ’ཏི ཝདཱཔེཏི། བྷུཏྟཀཱལེ ཨུདརཔཊལཾ མུཉྩིཏྭཱ ཝཏྠུཾ གཎྷཱཏི། ཨཐ སཏྟོ ཨེཀགྒོ ཧོཏི།

    Kiṃ panettha vatthussa kiccaṃ? Kiṃ ojāya? Parissayaharaṇapālanāni. Vatthuhi parissayaṃ harati pāletuṃ na sakkoti, ojā pāleti parissayaṃ harituṃ na sakkoti. Dvepi ekato hutvā pāletumpi sakkonti parissayampi harituṃ. Ko panesa parissayo nāma? Kammajatejo. Antokucchiyañhi odanādivatthusmiṃ asati, kammajatejo uṭṭhahitvā udarapaṭalaṃ gaṇhāti, ‘chātomhi, āhāraṃ me dethā’ti vadāpeti. Bhuttakāle udarapaṭalaṃ muñcitvā vatthuṃ gaṇhāti. Atha satto ekaggo hoti.

    ཡཐཱ ཧི ཚཱཡཱརཀྑསོ ཚཱཡཾ པཝིཊྛཾ གཧེཏྭཱ དེཝསངྑལིཀཱཡ བནྡྷིཏྭཱ ཨཏྟནོ བྷཝནེ མོདནྟོ ཚཱཏཀཱལེ ཨཱགནྟྭཱ སཱིསེ ཌཾསཏི། སོ ཌཊྛཏྟཱ ཝིརཝཏི། ཏཾ ཝིརཝཾ སུཏྭཱ ‘དུཀྑཔྤཏྟོ ཨེཏྠ ཨཏྠཱི’ཏི ཏཏོ ཏཏོ མནུསྶཱ ཨཱགཙྪནྟི། སོ ཨཱགཏཱགཏེ གཧེཏྭཱ ཁཱདིཏྭཱ བྷཝནེ མོདཏི། ཨེཝཾསམྤདམིདཾ ཝེདིཏབྦཾ། ཚཱཡཱརཀྑསོ ཝིཡ ཧི ཀམྨཛཏེཛོ, དེཝསངྑལིཀཱཡ བནྡྷིཏྭཱ ཋཔིཏསཏྟོ ཝིཡ ཨུདརཔཊལཾ, པུན ཨཱགཏམནུསྶཱ ཝིཡ ཨོདནཱདིཝཏྠུ, ཨོཏརིཏྭཱ སཱིསེ ཌཾསནཾ ཝིཡ ཀམྨཛཏེཛསྶ ཝཏྠུཏོ མུཏྟསྶ ཨུདརཔཊལགྒཧཎཾ, ཌཊྛསྶ ཝིརཝནཀཱལོ ཝིཡ ‘ཨཱཧཱརཾ དེཐཱ’ཏི ཝཙནཀཱལོ, ཏཱཡ སཉྙཱཡ ཨཱགཏཱགཏེ གཧེཏྭཱ ཁཱདིཏྭཱ བྷཝནེ མོདནཀཱལོ ཝིཡ ཀམྨཛཏེཛེན ཨུདརཔཊལཾ མུཉྩིཏྭཱ ཝཏྠུསྨིཾ གཧིཏེ ཨེཀགྒཙིཏྟཏཱ།

    Yathā hi chāyārakkhaso chāyaṃ paviṭṭhaṃ gahetvā devasaṅkhalikāya bandhitvā attano bhavane modanto chātakāle āgantvā sīse ḍaṃsati. So ḍaṭṭhattā viravati. Taṃ viravaṃ sutvā ‘dukkhappatto ettha atthī’ti tato tato manussā āgacchanti. So āgatāgate gahetvā khāditvā bhavane modati. Evaṃsampadamidaṃ veditabbaṃ. Chāyārakkhaso viya hi kammajatejo, devasaṅkhalikāya bandhitvā ṭhapitasatto viya udarapaṭalaṃ, puna āgatamanussā viya odanādivatthu, otaritvā sīse ḍaṃsanaṃ viya kammajatejassa vatthuto muttassa udarapaṭalaggahaṇaṃ, ḍaṭṭhassa viravanakālo viya ‘āhāraṃ dethā’ti vacanakālo, tāya saññāya āgatāgate gahetvā khāditvā bhavane modanakālo viya kammajatejena udarapaṭalaṃ muñcitvā vatthusmiṃ gahite ekaggacittatā.

    ཏཏྠ ཨོལཱ༹རིཀེ ཝཏྠུསྨིཾ ཨོཛཱ མནྡཱ ཧོཏི། སུཁུམེ བལཝཏཱི། ཀུདྲཱུསཀབྷཏྟཱདཱིནི ཧི བྷུཉྫིཏྭཱ མུཧུཏྟེནེཝ ཚཱཏོ ཧོཏི། སཔྤིཨཱདཱིནི པིཝིཏྭཱ ཋིཏསྶ དིཝསམྤི བྷཏྟཾ ན རུཙྩཏི། ཨེཏྠ ཙ ཨུཔཱདཱཡུཔཱདཱཡ ཨོལཱ༹རིཀསུཁུམཏཱ ཝེདིཏབྦཱ། ཀུམྦྷཱིལཱནཉྷི ཨཱཧཱརཾ ཨུཔཱདཱཡ མོརཱནཾ ཨཱཧཱརོ སུཁུམོ། ཀུམྦྷཱིལཱ ཀིར པཱསཱཎེ གིལནྟི། ཏེ ཙ ནེསཾ ཀུཙྪིཔྤཏྟཱ ཝིལཱིཡནྟི། མོརཱ སཔྤཝིཙྪིཀཱདིཔཱཎེ ཁཱདནྟི། མོརཱནཾ པན ཨཱཧཱརཾ ཨུཔཱདཱཡ ཏརཙྪཱནཾ ཨཱཧཱརོ སུཁུམོ། ཏེ ཀིར ཏིཝསྶཚཌྜིཏཱནི ཝིསཱཎཱནི ཙེཝ ཨཊྛཱིནི ཙ ཁཱདནྟི། ཏཱནི ཙ ནེསཾ ཁེལེ༹ན ཏེམིཏམཏྟཱནེཝ ཀནྡམཱུལཾ ཝིཡ མུདུཀཱནི ཧོནྟི། ཏརཙྪཱནམྤི ཨཱཧཱརམུཔཱདཱཡ ཧཏྠཱིནཾ ཨཱཧཱརོ སུཁུམོ། ཏེ ཧི ནཱནཱརུཀྑསཱཁཱདཡོ ཁཱདནྟི། ཧཏྠཱིནཾ ཨཱཧཱརཏོ གཝཡགོཀཎྞམིགཱདཱིནཾ ཨཱཧཱརོ སུཁུམོ། ཏེ ཀིར ནིསྶཱརཱནི ནཱནཱརུཀྑཔཎྞཱདཱིནི ཁཱདནྟི། ཏེསམྤི ཨཱཧཱརཏོ གུནྣཾ ཨཱཧཱརོ སུཁུམོ། ཏེ ཨལླསུཀྑཏིཎཱནི ཁཱདནྟི། ཏེསམྤི ཨཱཧཱརཏོ སསཱནཾ ཨཱཧཱརོ སུཁུམོ། སསཱནཾ ཨཱཧཱརཏོ སཀུཎཱནཾ ཨཱཧཱརོ སུཁུམོ། སཀུཎཱནཾ ཨཱཧཱརཏོ པཙྩནྟཝཱསཱིནཾ ཨཱཧཱརོ སུཁུམོ། པཙྩནྟཝཱསཱིནཾ ཨཱཧཱརཏོ གཱམབྷོཛཀཱནཾ ཨཱཧཱརོ སུཁུམོ། གཱམབྷོཛཀཱནཾ ཨཱཧཱརཏོ རཱཛརཱཛམཧཱམཏྟཱནཾ ཨཱཧཱརོ སུཁུམོ། ཏེསམྤི ཨཱཧཱརཏོ ཙཀྐཝཏྟིནོ ཨཱཧཱརོ སུཁུམོ། ཙཀྐཝཏྟིནོ ཨཱཧཱརཏོ བྷུམྨདེཝཱནཾ ཨཱཧཱརོ སུཁུམོ། བྷུམྨདེཝཱནཾ ཨཱཧཱརཏོ ཙཱཏུམཧཱརཱཛིཀཱནཾ ཨཱཧཱརོ སུཁུམོ། ཨེཝཾ ཡཱཝ པརནིམྨིཏཝསཝཏྟཱིནཾ ཨཱཧཱརོ ཝིཏྠཱརེཏབྦོ། ཏེསཾ པནཱཧཱརོ སུཁུམོཏྭེཝ ནིཊྛཾ པཏྟོ།

    Tattha oḷārike vatthusmiṃ ojā mandā hoti. Sukhume balavatī. Kudrūsakabhattādīni hi bhuñjitvā muhutteneva chāto hoti. Sappiādīni pivitvā ṭhitassa divasampi bhattaṃ na ruccati. Ettha ca upādāyupādāya oḷārikasukhumatā veditabbā. Kumbhīlānañhi āhāraṃ upādāya morānaṃ āhāro sukhumo. Kumbhīlā kira pāsāṇe gilanti. Te ca nesaṃ kucchippattā vilīyanti. Morā sappavicchikādipāṇe khādanti. Morānaṃ pana āhāraṃ upādāya taracchānaṃ āhāro sukhumo. Te kira tivassachaḍḍitāni visāṇāni ceva aṭṭhīni ca khādanti. Tāni ca nesaṃ kheḷena temitamattāneva kandamūlaṃ viya mudukāni honti. Taracchānampi āhāramupādāya hatthīnaṃ āhāro sukhumo. Te hi nānārukkhasākhādayo khādanti. Hatthīnaṃ āhārato gavayagokaṇṇamigādīnaṃ āhāro sukhumo. Te kira nissārāni nānārukkhapaṇṇādīni khādanti. Tesampi āhārato gunnaṃ āhāro sukhumo. Te allasukkhatiṇāni khādanti. Tesampi āhārato sasānaṃ āhāro sukhumo. Sasānaṃ āhārato sakuṇānaṃ āhāro sukhumo. Sakuṇānaṃ āhārato paccantavāsīnaṃ āhāro sukhumo. Paccantavāsīnaṃ āhārato gāmabhojakānaṃ āhāro sukhumo. Gāmabhojakānaṃ āhārato rājarājamahāmattānaṃ āhāro sukhumo. Tesampi āhārato cakkavattino āhāro sukhumo. Cakkavattino āhārato bhummadevānaṃ āhāro sukhumo. Bhummadevānaṃ āhārato cātumahārājikānaṃ āhāro sukhumo. Evaṃ yāva paranimmitavasavattīnaṃ āhāro vitthāretabbo. Tesaṃ panāhāro sukhumotveva niṭṭhaṃ patto.

    ལཀྑཎཱདིཏོཔི ཨོཛཱལཀྑཎོ ཀབལཱི༹ཀཱརོ ཨཱཧཱརོ, རཱུཔཱཧརཎརསོ, ཨུཔཏྠམྦྷནཔཙྩུཔཊྛཱནོ, ཀབལ༹ཾ ཀཏྭཱ ཨཱཧརིཏབྦཝཏྠུཔདཊྛཱནོཏི ཝེདིཏབྦོ།

    Lakkhaṇāditopi ojālakkhaṇo kabaḷīkāro āhāro, rūpāharaṇaraso, upatthambhanapaccupaṭṭhāno, kabaḷaṃ katvā āharitabbavatthupadaṭṭhānoti veditabbo.

    ༦༤༦. ནོཨུཔཱདཱནིདྡེསེ ཡཐཱ ཨུཔཱདཱརཱུཔཾ ཨུཔཱདིཡཏེཝ, ན ཨཉྙེན ཨུཔཱདིཡཏི, ཨེཝམེཏཾ ན ཨུཔཱདིཡཏེཝཱཏི ནོཨུཔཱདཱ།

    646. Noupādāniddese yathā upādārūpaṃ upādiyateva, na aññena upādiyati, evametaṃ na upādiyatevāti noupādā.

    ༦༤༧. ཕུསིཏབྦནྟི ཕོཊྛབྦཾ། ཕུསིཏྭཱ ཛཱནིཏབྦནྟི ཨཏྠོ། ཕོཊྛབྦཉྩ ཏཾ ཨཱཡཏནཉྩཱཏི ཕོཊྛབྦཱཡཏནཾ། ཨཱཔོ ཙ ཏཾ ནིསྶཏྟསུཉྙཏསབྷཱཝཊྛེན དྷཱཏུ ཙཱཏི ཨཱཔོདྷཱཏུ། ཨིདཱནི ཡསྨཱ ཏཱིཎི རཱུཔཱནི ཕུསིཏྭཱ ཛཱནིཏབྦཱནི ཏསྨཱ ཏཱནི བྷཱཛེཏྭཱ དསྶེཏུཾ ཀཏམཾ ཏཾ རཱུཔཾ ཕོཊྛབྦཱཡཏནཾ? པཐཝཱིདྷཱཏཱུཏིཨཱདིམཱཧ། ཏཏྠ ཀཀྑལ༹ཏྟལཀྑཎཱ པཐཝཱིདྷཱཏུ, པཏིཊྛཱནརསཱ, སམྤཊིཙྪནཔཙྩུཔཊྛཱནཱ། ཏེཛོདྷཱཏུ ཨུཎྷཏྟལཀྑཎཱ, པརིཔཱཙནརསཱ, མདྡཝཱནུཔྤདཱནཔཙྩུཔཊྛཱནཱ། ཝཱཡོདྷཱཏུ ཝིཏྠམྦྷནལཀྑཎཱ, སམུདཱིརཎརསཱ, ཨབྷིནཱིཧཱརཔཙྩུཔཊྛཱནཱ། པུརིམཱ པན ‘ཨཱཔོདྷཱཏུ’ པགྒྷརཎལཀྑཎཱ, བྲཱུཧནརསཱ, སངྒཧཔཙྩུཔཊྛཱནཱ། ཨེཀེཀཱ ཙེཏྠ སེསཏྟཡཔདཊྛཱནཱཏི ཝེདིཏབྦཱ།

    647. Phusitabbanti phoṭṭhabbaṃ. Phusitvā jānitabbanti attho. Phoṭṭhabbañca taṃ āyatanañcāti phoṭṭhabbāyatanaṃ. Āpo ca taṃ nissattasuññatasabhāvaṭṭhena dhātu cāti āpodhātu. Idāni yasmā tīṇi rūpāni phusitvā jānitabbāni tasmā tāni bhājetvā dassetuṃ katamaṃ taṃ rūpaṃ phoṭṭhabbāyatanaṃ? Pathavīdhātūtiādimāha. Tattha kakkhaḷattalakkhaṇā pathavīdhātu, patiṭṭhānarasā, sampaṭicchanapaccupaṭṭhānā. Tejodhātu uṇhattalakkhaṇā, paripācanarasā, maddavānuppadānapaccupaṭṭhānā. Vāyodhātu vitthambhanalakkhaṇā, samudīraṇarasā, abhinīhārapaccupaṭṭhānā. Purimā pana ‘āpodhātu’ paggharaṇalakkhaṇā, brūhanarasā, saṅgahapaccupaṭṭhānā. Ekekā cettha sesattayapadaṭṭhānāti veditabbā.

    ཀཀྑལ༹ནྟི ཐདྡྷཾ། མུདུཀནྟི ཨཐདྡྷཾ། སཎྷནྟི མཊྛཾ། ཕརུསནྟི ཁརཾ། སུཁསམྥསྶནྟི སུཁཝེདནཱཔཙྩཡཾ ཨིཊྛཕོཊྛབྦཾ། དུཀྑསམྥསྶནྟི དུཀྑཝེདནཱཔཙྩཡཾ ཨནིཊྛཕོཊྛབྦཾ། གརུཀནྟི བྷཱརིཡཾ། ལཧུཀནྟི ཨབྷཱརིཡཾ, སལླཧུཀནྟི ཨཏྠོ། ཨེཏྠ ཙ ‘ཀཀྑལ༹ཾ མུདུཀཾ སཎྷཾ ཕརུསཾ གརུཀཾ ལཧུཀ’ནྟི པདེཧི པཐཝཱིདྷཱཏུ ཨེཝ བྷཱཛིཏཱ། ‘‘ཡདཱཡཾ ཀཱཡོ ཨཱཡུསཧགཏོ ཙ ཧོཏི ཨུསྨཱསཧགཏོ ཙ ཝིཉྙཱཎསཧགཏོ ཙ ཏདཱ ལཧུཏརོ ཙ ཧོཏི མུདུཏརོ ཙ ཀམྨཉྙཏརོ ཙཱ’’ཏི (དཱི॰ ནི॰ ༢.༤༢༤) སུཏྟེཔི ལཧུམུདུབྷཱུཏཾ པཐཝཱིདྷཱཏུམེཝ སནྡྷཱཡ ཝུཏྟཾ།

    Kakkhaḷanti thaddhaṃ. Mudukanti athaddhaṃ. Saṇhanti maṭṭhaṃ. Pharusanti kharaṃ. Sukhasamphassanti sukhavedanāpaccayaṃ iṭṭhaphoṭṭhabbaṃ. Dukkhasamphassanti dukkhavedanāpaccayaṃ aniṭṭhaphoṭṭhabbaṃ. Garukanti bhāriyaṃ. Lahukanti abhāriyaṃ, sallahukanti attho. Ettha ca ‘kakkhaḷaṃ mudukaṃ saṇhaṃ pharusaṃ garukaṃ lahuka’nti padehi pathavīdhātu eva bhājitā. ‘‘Yadāyaṃ kāyo āyusahagato ca hoti usmāsahagato ca viññāṇasahagato ca tadā lahutaro ca hoti mudutaro ca kammaññataro cā’’ti (dī. ni. 2.424) suttepi lahumudubhūtaṃ pathavīdhātumeva sandhāya vuttaṃ.

    ‘སུཁསམྥསྶཾ དུཀྑསམྥསྶ’ནྟི པདདྭཡེན པན ཏཱིཎིཔི མཧཱབྷཱུཏཱནི བྷཱཛིཏཱནི། པཐཝཱིདྷཱཏུ ཧི སུཁསམྥསྶཱཔི ཨཏྠི དུཀྑསམྥསྶཱཔི། ཏཐཱ ཏེཛོདྷཱཏུཝཱཡོདྷཱཏུཡོ། ཏཏྠ སུཁསམྥསྶཱ པཐཝཱིདྷཱཏུ མུདུཏལུཎཧཏྠེ དཧརེ པཱདེ སམྦཱཧནྟེ ཨསྶཱདེཏྭཱ ཨསྶཱདེཏྭཱ ‘སམྦཱཧ ཏཱཏ, སམྦཱཧ ཏཱཏཱ’ཏི ཝདཱཔནཱཀཱརཾ ཀརོཏི། སུཁསམྥསྶཱ ཏེཛོདྷཱཏུ སཱིཏསམཡེ ཨངྒཱརཀཔལླཾ ཨཱཧརིཏྭཱ གཏྟཾ སེདེནྟེ ཨསྶཱདེཏྭཱ ཨསྶཱདེཏྭཱ ‘སེདེཧི ཏཱཏ, སེདེཧི ཏཱཏཱ’ཏི ཝདཱཔནཱཀཱརཾ ཀརོཏི། སུཁསམྥསྶཱ ཝཱཡོདྷཱཏུ ཨུཎྷསམཡེ ཝཏྟསམྤནྣེ དཧརེ བཱིཛནེན བཱིཛནྟེ ཨསྶཱདེཏྭཱ ཨསྶཱདེཏྭཱ ‘བཱིཛ ཏཱཏ, བཱིཛ ཏཱཏཱ’ཏི ཝདཱཔནཱཀཱརཾ ཀརོཏི། ཐདྡྷཧཏྠེ པན དཧརེ པཱདེ སམྦཱཧནྟེ ཨཊྛཱིནཾ བྷིཛྫནཀཱལོ ཝིཡ ཧོཏི། སོཔི ‘ཨཔེཧཱི’ཏི ཝཏྟབྦཏཾ ཨཱཔཛྫཏི། ཨུཎྷསམཡེ ཨངྒཱརཀཔལླེ ཨཱབྷཏེ ‘ཨཔནེཧི ན’ནྟི ཝཏྟབྦཾ ཧོཏི། སཱིཏསམཡེ བཱིཛནེན བཱིཛནྟེ ‘ཨཔེཧི, མཱ བཱིཛཱ’ཏི ཝཏྟབྦཾ ཧོཏི། ཨེཝམེཏཱསཾ སུཁསམྥསྶཏཱ དུཀྑསམྥསྶཏཱ ཙ ཝེདིཏབྦཱ།

    ‘Sukhasamphassaṃ dukkhasamphassa’nti padadvayena pana tīṇipi mahābhūtāni bhājitāni. Pathavīdhātu hi sukhasamphassāpi atthi dukkhasamphassāpi. Tathā tejodhātuvāyodhātuyo. Tattha sukhasamphassā pathavīdhātu mudutaluṇahatthe dahare pāde sambāhante assādetvā assādetvā ‘sambāha tāta, sambāha tātā’ti vadāpanākāraṃ karoti. Sukhasamphassā tejodhātu sītasamaye aṅgārakapallaṃ āharitvā gattaṃ sedente assādetvā assādetvā ‘sedehi tāta, sedehi tātā’ti vadāpanākāraṃ karoti. Sukhasamphassā vāyodhātu uṇhasamaye vattasampanne dahare bījanena bījante assādetvā assādetvā ‘bīja tāta, bīja tātā’ti vadāpanākāraṃ karoti. Thaddhahatthe pana dahare pāde sambāhante aṭṭhīnaṃ bhijjanakālo viya hoti. Sopi ‘apehī’ti vattabbataṃ āpajjati. Uṇhasamaye aṅgārakapalle ābhate ‘apanehi na’nti vattabbaṃ hoti. Sītasamaye bījanena bījante ‘apehi, mā bījā’ti vattabbaṃ hoti. Evametāsaṃ sukhasamphassatā dukkhasamphassatā ca veditabbā.

    ཡཾ ཕོཊྛབྦཾ ཨནིདསྶནཾ སཔྤཊིགྷནྟིཨཱདིནཱ ནཡེན ཝུཏྟཱ པན ཙཏཱུཧི ཙཏཱུཧི ནཡེཧི པཊིམཎྜིཏཱ ཏེརས ཝཱརཱ ཧེཊྛཱ རཱུཔཱཡཏནཱདཱིསུ ཝུཏྟནཡེནེཝ ཝེདིཏབྦཱ།

    Yaṃ phoṭṭhabbaṃ anidassanaṃ sappaṭighantiādinā nayena vuttā pana catūhi catūhi nayehi paṭimaṇḍitā terasa vārā heṭṭhā rūpāyatanādīsu vuttanayeneva veditabbā.

    ཀིཾ པནེཏཱནི ཏཱིཎི མཧཱབྷཱུཏཱནི ཨེཀཔྤཧཱརེནེཝ ཨཱཔཱཐཾ ཨཱགཙྪནྟི ཨུདཱཧུ ནོཏི? ཨཱགཙྪནྟི། ཨེཝཾ ཨཱགཏཱནི ཀཱཡཔསཱདཾ གྷཊྚེནྟི ན གྷཊྚེནྟཱིཏི? གྷཊྚེནྟི། ཨེཀཔྤཧཱརེནེཝ ཏཱནི ཨཱརམྨཎཾ ཀཏྭཱ ཀཱཡཝིཉྙཱཎཾ ཨུཔྤཛྫཏི ནུཔྤཛྫཏཱིཏི? ནུཔྤཛྫཏི། ཨཱབྷུཛིཏཝསེན ཝཱ ཧི ཨུསྶདཝསེན ཝཱ ཨཱརམྨཎཀརཎཾ ཧོཏི།

    Kiṃ panetāni tīṇi mahābhūtāni ekappahāreneva āpāthaṃ āgacchanti udāhu noti? Āgacchanti. Evaṃ āgatāni kāyapasādaṃ ghaṭṭenti na ghaṭṭentīti? Ghaṭṭenti. Ekappahāreneva tāni ārammaṇaṃ katvā kāyaviññāṇaṃ uppajjati nuppajjatīti? Nuppajjati. Ābhujitavasena vā hi ussadavasena vā ārammaṇakaraṇaṃ hoti.

    ཏཏྠ ཨཱབྷུཛིཏཝསེན ཏཱཝ, པཏྟསྨིཉྷི ཨོདནེན པཱུརེཏྭཱ ཨཱབྷཏེ ཨེཀཾ སིཏྠཾ གཧེཏྭཱ ཐདྡྷཾ ཝཱ མུདུཀཾ ཝཱཏི ཝཱིམཾསནྟོ ཀིཉྩཱཔི ཏཏྠ ཏེཛོཔི ཨཏྠི ཝཱཡོཔི ཨཏྠི, པཐཝཱིདྷཱཏུམེཝ པན ཨཱབྷུཛཏི། ཨུཎྷོདཀེ ཧཏྠཾ ཨོཏཱརེཏྭཱ ཝཱིམཾསནྟོ ཀིཉྩཱཔི ཏཏྠ པཐཝཱིཔི ཨཏྠི ཝཱཡོཔི ཨཏྠི, ཏེཛོདྷཱཏུམེཝ པན ཨཱབྷུཛཏི། ཨུཎྷསམཡེ ཝཱཏཔཱནཾ ཝིཝརིཏྭཱ ཝཱཏེན སརཱིརཾ པཧརཱཔེནྟོ ཋིཏོ མནྡམནྡེ ཝཱཏེ པཧརནྟེ ཀིཉྩཱཔི ཏཏྠ པཐཝཱིཔི ཨཏྠི ཏེཛོཔི ཨཏྠི, ཝཱཡོདྷཱཏུམེཝ པན ཨཱབྷུཛཏི། ཨེཝཾ ཨཱབྷུཛིཏཝསེན ཨཱརམྨཎཾ ཀརོཏི ནཱམ།

    Tattha ābhujitavasena tāva, pattasmiñhi odanena pūretvā ābhate ekaṃ sitthaṃ gahetvā thaddhaṃ vā mudukaṃ vāti vīmaṃsanto kiñcāpi tattha tejopi atthi vāyopi atthi, pathavīdhātumeva pana ābhujati. Uṇhodake hatthaṃ otāretvā vīmaṃsanto kiñcāpi tattha pathavīpi atthi vāyopi atthi, tejodhātumeva pana ābhujati. Uṇhasamaye vātapānaṃ vivaritvā vātena sarīraṃ paharāpento ṭhito mandamande vāte paharante kiñcāpi tattha pathavīpi atthi tejopi atthi, vāyodhātumeva pana ābhujati. Evaṃ ābhujitavasena ārammaṇaṃ karoti nāma.

    ཡོ པན ཨུཔཀྑལཏི ཝཱ སཱིསེན ཝཱ རུཀྑཾ པཧརཏི བྷུཉྫནྟོ ཝཱ སཀྑརཾ ཌཾསཏི, སོ ཀིཉྩཱཔི ཏཏྠ ཏེཛོཔི ཨཏྠི ཝཱཡོཔི ཨཏྠི, ཨུསྶདཝསེན པན པཐཝཱིདྷཱཏུམེཝ ཨཱརམྨཎཾ ཀརོཏི། ཨགྒིཾ ཨཀྐམནྟོཔི ཀིཉྩཱཔི ཏཏྠ པཐཝཱིཔི ཨཏྠི ཝཱཡོཔི ཨཏྠི, ཨུསྶདཝསེན པན ཏེཛོདྷཱཏུམེཝ ཨཱརམྨཎཾ ཀརོཏི། བལཝཝཱཏེ ཀཎྞསཀྑལིཾ པཧརིཏྭཱ བདྷིརབྷཱཝཾ ཀརོནྟེ། ཀིཉྩཱཔི ཏཏྠ པཐཝཱིཔི ཨཏྠི ཏེཛོཔི ཨཏྠི, ཨུསྶདཝསེན པན ཝཱཡོདྷཱཏུམེཝ ཨཱརམྨཎཾ ཀརོཏི།

    Yo pana upakkhalati vā sīsena vā rukkhaṃ paharati bhuñjanto vā sakkharaṃ ḍaṃsati, so kiñcāpi tattha tejopi atthi vāyopi atthi, ussadavasena pana pathavīdhātumeva ārammaṇaṃ karoti. Aggiṃ akkamantopi kiñcāpi tattha pathavīpi atthi vāyopi atthi, ussadavasena pana tejodhātumeva ārammaṇaṃ karoti. Balavavāte kaṇṇasakkhaliṃ paharitvā badhirabhāvaṃ karonte. Kiñcāpi tattha pathavīpi atthi tejopi atthi, ussadavasena pana vāyodhātumeva ārammaṇaṃ karoti.

    ཡཾཀིཉྩི དྷཱཏུཾ ཨཱརམྨཎཾ ཀརོནྟསྶ ཀཱཡཝིཉྙཱཎམྤི ཨེཀཔྤཧཱརེན ནུཔྤཛྫཏི། སཱུཙིཀལཱཔེན ཝིདྡྷསྶ ཨེཀཔྤཧཱརེན ཀཱཡོ གྷཊྚིཡཏི། ཡསྨིཾ ཡསྨིཾ པན ཋཱནེ ཀཱཡཔསཱདོ ཨུསྶནྣོ ཧོཏི, ཏཏྠ ཏཏྠ ཀཱཡཝིཉྙཱཎཾ ཨུཔྤཛྫཏི། ཡཏྠ ཡཏྠཱཔི པཊིགྷཊྚནནིགྷཾསོ བལཝཱ ཧོཏི ཏཏྠ ཏཏྠ པཋམཾ ཨུཔྤཛྫཏི། ཀུཀྐུཊཔཏྟེན ཝཎེ དྷོཝིཡམཱནེ ཨཾསུཨཾསུ ཀཱཡཔསཱདཾ གྷཊྚེཏི། ཡཏྠ ཡཏྠ པན པསཱདོ ཨུསྶནྣོ ཧོཏི, ཏཏྠ ཏཏྠེཝ ཀཱཡཝིཉྙཱཎཾ ཨུཔྤཛྫཏི། ཨེཝཾ ཨུསྶདཝསེན ཨཱརམྨཎཾ ཀརོཏི། ཨུསྶདཝསེནེཝ ཙ ཀཱཡཝིཉྙཱཎཾ ཨུཔྤཛྫཏི ནཱམ།

    Yaṃkiñci dhātuṃ ārammaṇaṃ karontassa kāyaviññāṇampi ekappahārena nuppajjati. Sūcikalāpena viddhassa ekappahārena kāyo ghaṭṭiyati. Yasmiṃ yasmiṃ pana ṭhāne kāyapasādo ussanno hoti, tattha tattha kāyaviññāṇaṃ uppajjati. Yattha yatthāpi paṭighaṭṭananighaṃso balavā hoti tattha tattha paṭhamaṃ uppajjati. Kukkuṭapattena vaṇe dhoviyamāne aṃsuaṃsu kāyapasādaṃ ghaṭṭeti. Yattha yattha pana pasādo ussanno hoti, tattha tattheva kāyaviññāṇaṃ uppajjati. Evaṃ ussadavasena ārammaṇaṃ karoti. Ussadavaseneva ca kāyaviññāṇaṃ uppajjati nāma.

    ཀཐཾ པན ཙིཏྟསྶ ཨཱརམྨཎཏོ སངྐནྟི ཧོཏཱིཏི? དྭཱིཧཱཀཱརེཧི ཧོཏི – ཨཛ྄ཛྷཱསཡཏོ ཝཱ ཝིསཡཱདྷིམཏྟཏོ ཝཱ། ཝིཧཱརཔཱུཛཱདཱིསུ ཧི ‘ཏཱནི ཏཱནི ཙེཏིཡཱནི ཙེཝ པཊིམཱཡོ ཙ ཝནྡིསྶཱམི, པོཏྠཀམྨཙིཏྟཀམྨཱནི ཙ ཨོལོཀེསྶཱམཱི’ཏི ཨཛ྄ཛྷཱསཡེན གཏོ ཨེཀཾ ཝནྡིཏྭཱ ཝཱ པསྶིཏྭཱ ཝཱ ཨིཏརསྶ ཝནྡནཏྠཱཡ ཝཱ དསྶནཏྠཱཡ ཝཱ མནཾ ཀཏྭཱ ཝནྡིཏུམྤི པསྶིཏུམྤི གཙྪཏིཡེཝ, ཨེཝཾ ཨཛ྄ཛྷཱསཡཏོ སངྐམཏི ནཱམ།

    Kathaṃ pana cittassa ārammaṇato saṅkanti hotīti? Dvīhākārehi hoti – ajjhāsayato vā visayādhimattato vā. Vihārapūjādīsu hi ‘tāni tāni cetiyāni ceva paṭimāyo ca vandissāmi, potthakammacittakammāni ca olokessāmī’ti ajjhāsayena gato ekaṃ vanditvā vā passitvā vā itarassa vandanatthāya vā dassanatthāya vā manaṃ katvā vanditumpi passitumpi gacchatiyeva, evaṃ ajjhāsayato saṅkamati nāma.

    ཀེལཱསཀཱུཊཔཊིབྷཱགཾ པན མཧཱཙེཏིཡཾ ཨོལོཀེནྟོ ཋིཏོཔི ཨཔརབྷཱགེ སབྦཏཱུརིཡེསུ པགྒཧིཏེསུ རཱུཔཱརམྨཎཾ ཝིསྶཛྫེཏྭཱ སདྡཱརམྨཎཾ སངྐམཏི། མནུཉྙགནྡྷེསུ པུཔྥེསུ ཝཱ གནྡྷེསུ ཝཱ ཨཱབྷཏེསུ སདྡཱརམྨཎཾ ཝིསྶཛྫེཏྭཱ གནྡྷཱརམྨཎཾ སངྐམཏི། ཨེཝཾ ཝིསཡཱདྷིམཏྟཏོ སངྐམཏི ནཱམ།

    Kelāsakūṭapaṭibhāgaṃ pana mahācetiyaṃ olokento ṭhitopi aparabhāge sabbatūriyesu paggahitesu rūpārammaṇaṃ vissajjetvā saddārammaṇaṃ saṅkamati. Manuññagandhesu pupphesu vā gandhesu vā ābhatesu saddārammaṇaṃ vissajjetvā gandhārammaṇaṃ saṅkamati. Evaṃ visayādhimattato saṅkamati nāma.

    ༦༥༡. ཨཱཔོདྷཱཏུནིདྡེསེ ཨཱཔོཏི སབྷཱཝནིདྡེསོ། ཨཱཔོཝ ཨཱཔོགཏཾ། སིནེཧཝསེན སིནེཧོ, སིནེཧོཝ སིནེཧགཏཾ། བནྡྷནཏྟཾ རཱུཔསྶཱཏི པཐཝཱིདྷཱཏུཨཱདིཀསྶ བྷཱུཏརཱུཔསྶ བནྡྷནབྷཱཝོ། ཨཡོཔིཎྜིཨཱདཱིནི ཧི ཨཱཔོདྷཱཏུ ཨཱབནྡྷིཏྭཱ བདྡྷཱནི ཀརོཏི། ཏཱཡ ཨཱབདྡྷཏྟཱ ཏཱནི བདྡྷཱནི ནཱམ ཧོནྟི། པཱསཱཎཔབྦཏཏཱལཊྛིཧཏྠིདནྟགོསིངྒཱདཱིསུཔི ཨེསེཝ ནཡོ ། སབྦཱནི ཧེཏཱནི ཨཱཔོདྷཱཏུ ཨེཝ ཨཱབནྡྷིཏྭཱ བདྡྷཱནི ཀརོཏི། ཨཱཔོདྷཱཏུཡཱ ཨཱབདྡྷཏྟཱཝ བདྡྷཱནི ཧོནྟི།

    651. Āpodhātuniddese āpoti sabhāvaniddeso. Āpova āpogataṃ. Sinehavasena sineho, sinehova sinehagataṃ. Bandhanattaṃrūpassāti pathavīdhātuādikassa bhūtarūpassa bandhanabhāvo. Ayopiṇḍiādīni hi āpodhātu ābandhitvā baddhāni karoti. Tāya ābaddhattā tāni baddhāni nāma honti. Pāsāṇapabbatatālaṭṭhihatthidantagosiṅgādīsupi eseva nayo . Sabbāni hetāni āpodhātu eva ābandhitvā baddhāni karoti. Āpodhātuyā ābaddhattāva baddhāni honti.

    ཀིཾ པན པཐཝཱིདྷཱཏུ སེསདྷཱཏཱུནཾ པཏིཊྛཱ ཧོཏི ན ཧོཏཱིཏི ཧོཏི ཕུསིཏྭཱ ཧོཏི ཨུདཱཧུ ཨཕུསིཏྭཱ? ཨཱཔོདྷཱཏུ ཝཱ སེསཱ ཨཱབནྡྷམཱནཱ ཕུསིཏྭཱ ཨཱབནྡྷཏི ཨུདཱཧུ ཨཕུསིཏྭཱཏི? པཐཝཱིདྷཱཏུ ཏཱཝ ཨཱཔོདྷཱཏུཡཱ ཨཕུསིཏྭཱཝ པཏིཊྛཱ ཧོཏི, ཏེཛོདྷཱཏུཡཱ ཙ ཝཱཡོདྷཱཏུཡཱ ཙ ཕུསིཏྭཱ། ཨཱཔོདྷཱཏུ པན པཐཝཱིདྷཱཏུམྤི ཏེཛོཝཱཡོདྷཱཏུཡོཔི ཨཕུསིཏྭཱཝ ཨཱབནྡྷཏི། ཡདི ཕུསིཏྭཱ ཨཱབནྡྷེཡྻ ཕོཊྛབྦཱཡཏནཾ ནཱམ བྷཝེཡྻ།

    Kiṃ pana pathavīdhātu sesadhātūnaṃ patiṭṭhā hoti na hotīti hoti phusitvā hoti udāhu aphusitvā? Āpodhātu vā sesā ābandhamānā phusitvā ābandhati udāhu aphusitvāti? Pathavīdhātu tāva āpodhātuyā aphusitvāva patiṭṭhā hoti, tejodhātuyā ca vāyodhātuyā ca phusitvā. Āpodhātu pana pathavīdhātumpi tejovāyodhātuyopi aphusitvāva ābandhati. Yadi phusitvā ābandheyya phoṭṭhabbāyatanaṃ nāma bhaveyya.

    ཏེཛོདྷཱཏུཝཱཡོདྷཱཏཱུནམྤི སེསདྷཱཏཱུསུ སཀསཀཀིཙྩཀརཎེ ཨེསེཝ ནཡོ། ཏེཛོདྷཱཏུ ཧི པཐཝཱིདྷཱཏུཾ ཕུསིཏྭཱ ཛྷཱཔེཏི། སཱ པན ན ཨུཎྷཱ ཧུཏྭཱ ཛྷཱཡཏི། ཡདི ཨུཎྷཱ ཧུཏྭཱ ཛྷཱཡེཡྻ ཨུཎྷཏྟལཀྑཎཱ ནཱམ བྷཝེཡྻ། ཨཱཔོདྷཱཏུཾ པན ཨཕུསིཏྭཱཝ ཏཱཔེཏི། སཱཔི ཏཔམཱནཱ ན ཨུཎྷཱ ཧུཏྭཱ ཏཔཏི། ཡདི ཨུཎྷཱ ཧུཏྭཱ ཏཔེཡྻ ཨུཎྷཏྟལཀྑཎཱ ནཱམ བྷཝེཡྻ། ཝཱཡོདྷཱཏུཾ པན ཕུསིཏྭཱཝ ཏཱཔེཏི། སཱཔི ཏཔམཱནཱ ན ཨུཎྷཱ ཧུཏྭཱ ཏཔཏི། ཡདི ཨུཎྷཱ ཧུཏྭཱ ཏཔེཡྻ ཨུཎྷཏྟལཀྑཎཱ ནཱམ བྷཝེཡྻ། ཝཱཡོདྷཱཏུ པཐཝཱིདྷཱཏུཾ ཕུསིཏྭཱ ཝིཏྠམྦྷེཏི, ཏཐཱ ཏེཛོདྷཱཏུཾ ཨཱཔོདྷཱཏུཾ པན ཨཕུསིཏྭཱཝ ཝིཏྠམྦྷེཏི།

    Tejodhātuvāyodhātūnampi sesadhātūsu sakasakakiccakaraṇe eseva nayo. Tejodhātu hi pathavīdhātuṃ phusitvā jhāpeti. Sā pana na uṇhā hutvā jhāyati. Yadi uṇhā hutvā jhāyeyya uṇhattalakkhaṇā nāma bhaveyya. Āpodhātuṃ pana aphusitvāva tāpeti. Sāpi tapamānā na uṇhā hutvā tapati. Yadi uṇhā hutvā tapeyya uṇhattalakkhaṇā nāma bhaveyya. Vāyodhātuṃ pana phusitvāva tāpeti. Sāpi tapamānā na uṇhā hutvā tapati. Yadi uṇhā hutvā tapeyya uṇhattalakkhaṇā nāma bhaveyya. Vāyodhātu pathavīdhātuṃ phusitvā vitthambheti, tathā tejodhātuṃ āpodhātuṃ pana aphusitvāva vitthambheti.

    ཨུཙྪུརསཾ པཙིཏྭཱ ཕཱཎིཏཔིཎྜེ ཀརིཡམཱནེ ཨཱཔོདྷཱཏུ ཐདྡྷཱ ཧོཏི ན ཧོཏཱིཏི? ན ཧོཏི། སཱ ཧི པགྒྷརཎལཀྑཎཱ། པཐཝཱིདྷཱཏུ ཀཀྑལ༹ལཀྑཎཱ། ཨོམཏྟཾ པན ཨཱཔོ ཨདྷིམཏྟཔཐཝཱིགཏིཀཾ ཛཱཏཾ། སཱ ཧི རསཱཀཱརེན ཋིཏབྷཱཝཾ ཝིཛཧཏི, ལཀྑཎཾ ན ཝིཛཧཏི། ཕཱཎིཏཔིཎྜེ ཝིལཱིཡམཱནེཔི པཐཝཱིདྷཱཏུ ན ཝིལཱིཡཏི། ཀཀྑལ༹ལཀྑཎཱ ཧི པཐཝཱིདྷཱཏུ པགྒྷརཎལཀྑཎཱ ཨཱཔོདྷཱཏུ། ཨོམཏྟཱ པན པཐཝཱི ཨདྷིམཏྟཨཱཔགཏིཀཱ ཧོཏི། སཱ པིཎྜཱཀཱརེན ཋིཏབྷཱཝཾ ཝིཛཧཏི, ལཀྑཎཾ ན ཝིཛཧཏི། ཙཏུནྣཉྷི མཧཱབྷཱུཏཱནཾ བྷཱཝཉྙཐཏྟམེཝ ཧོཏི, ལཀྑཎཉྙཐཏྟཾ ནཱམ ནཏྠི། ཏསྶ ཨབྷཱཝོ ཨཊྛཱནཔརིཀཔྤསུཏྟེན དཱིཔིཏོ། ཝུཏྟཉྷེཏཾ –

    Ucchurasaṃ pacitvā phāṇitapiṇḍe kariyamāne āpodhātu thaddhā hoti na hotīti? Na hoti. Sā hi paggharaṇalakkhaṇā. Pathavīdhātu kakkhaḷalakkhaṇā. Omattaṃ pana āpo adhimattapathavīgatikaṃ jātaṃ. Sā hi rasākārena ṭhitabhāvaṃ vijahati, lakkhaṇaṃ na vijahati. Phāṇitapiṇḍe vilīyamānepi pathavīdhātu na vilīyati. Kakkhaḷalakkhaṇā hi pathavīdhātu paggharaṇalakkhaṇā āpodhātu. Omattā pana pathavī adhimattaāpagatikā hoti. Sā piṇḍākārena ṭhitabhāvaṃ vijahati, lakkhaṇaṃ na vijahati. Catunnañhi mahābhūtānaṃ bhāvaññathattameva hoti, lakkhaṇaññathattaṃ nāma natthi. Tassa abhāvo aṭṭhānaparikappasuttena dīpito. Vuttañhetaṃ –

    ‘‘སིཡཱ, ཨཱནནྡ, ཙཏུནྣཾ མཧཱབྷཱུཏཱནཾ ཨཉྙཐཏྟཾ, པཐཝཱིདྷཱཏུཡཱ…པེ॰… ཝཱཡོདྷཱཏུཡཱ ; ན ཏྭེཝ བུདྡྷེ ཨཝེཙྩཔྤསཱདེན སམནྣཱགཏསྶ ཨརིཡསཱཝཀསྶ སིཡཱ ཨཉྙཐཏྟ’’ནྟི (ཨ॰ ནི॰ ༣.༧༦)།

    ‘‘Siyā, ānanda, catunnaṃ mahābhūtānaṃ aññathattaṃ, pathavīdhātuyā…pe… vāyodhātuyā ; na tveva buddhe aveccappasādena samannāgatassa ariyasāvakassa siyā aññathatta’’nti (a. ni. 3.76).

    ཨཡཉྷེཏྠ ཨཏྠོ – ཨཱནནྡ, ཀཀྑལ༹ཏྟལཀྑཎཱ པཐཝཱིདྷཱཏུ པརིཝཏྟིཏྭཱ པགྒྷརཎལཀྑཎཱ ཨཱཔོདྷཱཏུ ནཱམ བྷཝེཡྻ, ཨརིཡསཱཝཀསྶ པན ཨཉྙཐཏྟཾ ནཱམ ནཏྠཱིཏི། ཨེཝམེཏྠ ཨཊྛཱནཔརིཀཔྤོ ཨཱགཏོ།

    Ayañhettha attho – ānanda, kakkhaḷattalakkhaṇā pathavīdhātu parivattitvā paggharaṇalakkhaṇā āpodhātu nāma bhaveyya, ariyasāvakassa pana aññathattaṃ nāma natthīti. Evamettha aṭṭhānaparikappo āgato.

    ༦༥༢. ཨིཏོ པརེསུ ཨུཔཱདིཎྞརཱུཔཱདིནིདྡེསེསུ ཨུཔཱདིཎྞཔདཱདཱིནཾ ཨཏྠོ མཱཏིཀཱཀཐཱཡཾ ཝུཏྟནཡེནེཝ ཝེདིཏབྦོ། ཙཀྑཱཡཏནཱདཱིནི ཧེཊྛཱ ཝིཏྠཱརིཏཱནེཝ། ཏཏྠ ཏཏྠ པན ཝིསེསམཏྟམེཝ ཝཀྑཱམ།

    652. Ito paresu upādiṇṇarūpādiniddesesu upādiṇṇapadādīnaṃ attho mātikākathāyaṃ vuttanayeneva veditabbo. Cakkhāyatanādīni heṭṭhā vitthāritāneva. Tattha tattha pana visesamattameva vakkhāma.

    ཨུཔཱདིཎྞནིདྡེསེ ཏཱཝ ཙཀྑཱཡཏནཱདཱིནི ཨེཀནྟཨུཔཱདིཎྞཏྟཱ ཝུཏྟཱནི། ཡསྨཱ པན རཱུཔཱཡཏནཱདཱིནི ཨུཔཱདིཎྞཱནིཔི ཨཏྠི ཨནུཔཱདིཎྞཱནིཔི, ཏསྨཱ ཏཱནི ཡཾ ཝཱ པནཱཏི སངྑེཔཏོ དསྶེཏྭཱ པུན ཀམྨསྶ ཀཏཏྟཱ རཱུཔཱཡཏནནྟིཨཱདིནཱ ནཡེན ཝིཏྠཱརིཏཱནི། ཨིམིནཱ ཨུཔཱཡེན སབྦཡེཝཱཔནཀེསུ ཨཏྠོ ཝེདིཏབྦོ།

    Upādiṇṇaniddese tāva cakkhāyatanādīni ekantaupādiṇṇattā vuttāni. Yasmā pana rūpāyatanādīni upādiṇṇānipi atthi anupādiṇṇānipi, tasmā tāni yaṃ vā panāti saṅkhepato dassetvā puna kammassa katattā rūpāyatanantiādinā nayena vitthāritāni. Iminā upāyena sabbayevāpanakesu attho veditabbo.

    ཀསྨཱ པན ‘ཀམྨསྶ ཀཏཏྟཱ’ཏི ཙ ‘ན ཀམྨསྶ ཀཏཏྟཱ’ཏི ཙ ཨུབྷིནྣམྤི ནིདྡེསེ ‘ཛརཏཱ ཙ ཨནིཙྩཏཱ ཙ’ ན གཧིཏཱ, ཨནུཔཱདིཎྞཱདཱིནཾཡེཝ ནིདྡེསེསུ གཧིཏཱཏི? ན ཀམྨསྶ ཀཏཏྟཱཏི ཨེཏྠ ཏཱཝ ཀམྨཏོ ཨཉྙཔཙྩཡསམུཊྛཱནཾ སངྒཧིཏཾ། ‘ཀམྨསྶ ཀཏཏྟཱ’ཏི ཨེཏྠ ཀམྨསམུཊྛཱནམེཝ། ཨིམཱནི ཙ དྭེ རཱུཔཱནི ནེཝ ཀམྨཏོ ན ཨཉྙསྨཱ རཱུཔཛནཀཔཙྩཡཱ ཨུཔྤཛྫནྟི, ཏསྨཱ ན གཧིཏཱནི། སཱ ཙ ནེསཾ ཨནུཔྤཏྟི པརཏོ ཨཱཝི བྷཝིསྶཏི། ཨནུཔཱདིཎྞནྟིཨཱདཱིསུ པན ཀེཝལཾ ཨནུཔཱདིཎྞཱདིགྒཧཎེན ཀམྨཱདིསམུཊྛཱནཏཱ པཊིཀྑིཏྟཱ, ནཨཉྙཔཙྩཡསམུཊྛཱནཏཱ ཨནུཉྙཱཏཱ། ཏསྨཱ ཏཏྠ གཧིཏཱནཱིཏི ཝེདིཏབྦཱནི།

    Kasmā pana ‘kammassa katattā’ti ca ‘na kammassa katattā’ti ca ubhinnampi niddese ‘jaratā ca aniccatā ca’ na gahitā, anupādiṇṇādīnaṃyeva niddesesu gahitāti? Na kammassa katattāti ettha tāva kammato aññapaccayasamuṭṭhānaṃ saṅgahitaṃ. ‘Kammassa katattā’ti ettha kammasamuṭṭhānameva. Imāni ca dve rūpāni neva kammato na aññasmā rūpajanakapaccayā uppajjanti, tasmā na gahitāni. Sā ca nesaṃ anuppatti parato āvi bhavissati. Anupādiṇṇantiādīsu pana kevalaṃ anupādiṇṇādiggahaṇena kammādisamuṭṭhānatā paṭikkhittā, naaññapaccayasamuṭṭhānatā anuññātā. Tasmā tattha gahitānīti veditabbāni.

    ༦༦༦. ཙིཏྟསམུཊྛཱནནིདྡེསེ ཀཱཡཝིཉྙཏྟི ཝཙཱིཝིཉྙཏྟཱིཏི ཨིདཾ དྭཡཾ ཡསྨཱ ཨེཀནྟཙིཏྟསམུཊྛཱནཱནི བྷཱུཏཱནི ཨུཔཱདཱཡ པཉྙཱཡཏི, ཏསྨཱ ཝུཏྟཾ། པརམཏྠཏོ པན ཏསྶ ནིསྶཡབྷཱུཏཱནི བྷཱུཏཱནེཝ ཙིཏྟསམུཊྛཱནཱནི, ཏཾནིསྶིཏཏྟཱ། ཡཐཱ ཨནིཙྩསྶ རཱུཔསྶ ཛརཱམརཎཾ ཨནིཙྩཾ ནཱམ ཧོཏི, ཨེཝམིདམྤི ཙིཏྟསམུཊྛཱནཾ ནཱམ ཛཱཏཾ།

    666. Cittasamuṭṭhānaniddese kāyaviññatti vacīviññattīti idaṃ dvayaṃ yasmā ekantacittasamuṭṭhānāni bhūtāni upādāya paññāyati, tasmā vuttaṃ. Paramatthato pana tassa nissayabhūtāni bhūtāneva cittasamuṭṭhānāni, taṃnissitattā. Yathā aniccassa rūpassa jarāmaraṇaṃ aniccaṃ nāma hoti, evamidampi cittasamuṭṭhānaṃ nāma jātaṃ.

    ༦༦༨. ཙིཏྟསཧབྷུནིདྡེསེཔི ཨེསེཝ ནཡོ། ཡཱཝ ཙིཏྟཾ ཏཱཝ པཉྙཱཡནཏོ ཨིདམེཝ དྭཡཾ ཝུཏྟཾ། ན པནེཏཾ ཙིཏྟེན སཧ བྷཱུཏཱནི ཝིཡ, ཙེཏནཱདཡོ ཝིཡ ཙ ཨུཔྤཛྫཏི།

    668. Cittasahabhuniddesepi eseva nayo. Yāva cittaṃ tāva paññāyanato idameva dvayaṃ vuttaṃ. Na panetaṃ cittena saha bhūtāni viya, cetanādayo viya ca uppajjati.

    ༦༧༠. ཙིཏྟཱནུཔརིཝཏྟིཏཱཡཔི ཨེསེཝ ནཡོ། ཡཱཝ ཙིཏྟཾ ཏཱཝ པཉྙཱཡནཏོ ཨེཝ ཧེཏཾ དྭཡཾ ཙིཏྟཱནུཔརིཝཏྟཱིཏི ཝུཏྟཾ།

    670. Cittānuparivattitāyapi eseva nayo. Yāva cittaṃ tāva paññāyanato eva hetaṃ dvayaṃ cittānuparivattīti vuttaṃ.

    ༦༧༤. ཨོལཱ༹རིཀནྟི ཝཏྠཱརམྨཎབྷཱུཏཏྟཱ སཾངྒྷཊྚནཝསེན གཧེཏབྦཏོ ཐཱུལཾ། ཝུཏྟཝིཔལླཱསཏོ སུཁུམཾ ཝེདིཏབྦཾ།

    674. Oḷārikanti vatthārammaṇabhūtattā saṃṅghaṭṭanavasena gahetabbato thūlaṃ. Vuttavipallāsato sukhumaṃ veditabbaṃ.

    ༦༧༦. དཱུརེཏི གྷཊྚནཝསེན ཨགྒཧེཏབྦཏྟཱ དུབྦིཉྙེཡྻབྷཱཝེན སམཱིཔེ ཋིཏམྤི དཱུརེ། ཨིཏརཾ པན གྷཊྚནཝསེན གཧེཏབྦཏྟཱ སུཝིཉྙེཡྻབྷཱཝེན དཱུརེ ཋིཏམྤི སནྟིཀེ། ཙཀྑཱཡཏནཱདིནིདྡེསཱ ཧེཊྛཱ ཝུཏྟནཡེནེཝ ཝིཏྠཱརཏོ ཝེདིཏབྦཱ། ཨིདཾ ཏཱཝ དུཝིདྷེན རཱུཔསངྒཧེ ཝིསེསམཏྟཾ། ཏིཝིདྷསངྒཧོ ཨུཏྟཱནཏྠོཝ།

    676. Dūreti ghaṭṭanavasena aggahetabbattā dubbiññeyyabhāvena samīpe ṭhitampi dūre. Itaraṃ pana ghaṭṭanavasena gahetabbattā suviññeyyabhāvena dūre ṭhitampi santike. Cakkhāyatanādiniddesā heṭṭhā vuttanayeneva vitthārato veditabbā. Idaṃ tāva duvidhena rūpasaṅgahe visesamattaṃ. Tividhasaṅgaho uttānatthova.




    Next: ཙཏུཀྐནིདྡེསཝཎྞནཱ • Catukkaniddesavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / དྷམྨསངྒཎཱིཔཱལི༹ • Dhammasaṅgaṇīpāḷi / རཱུཔཝིབྷཏྟི • Rūpavibhatti

    ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-མཱུལཊཱིཀཱ • Dhammasaṅgaṇī-mūlaṭīkā
    ཨུཔཱདཱབྷཱཛནཱིཡཀཐཱཝཎྞནཱ • Upādābhājanīyakathāvaṇṇanā
    ནོཨུཔཱདཱབྷཱཛནཱིཡཀཐཱཝཎྞནཱ • Noupādābhājanīyakathāvaṇṇanā

    ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-ཨནུཊཱིཀཱ • Dhammasaṅgaṇī-anuṭīkā
    ཨུཔཱདཱབྷཱཛནཱིཡཝཎྞནཱ • Upādābhājanīyavaṇṇanā
    ནོཨུཔཱདཱབྷཱཛནཱིཡཀཐཱཝཎྞནཱ • Noupādābhājanīyakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact