| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā |
д̣̇уганид̣̇д̣̇зсо
Dukaniddeso
убаад̣̇аабхааж̇анийяагат̇ааван̣н̣анаа
Upādābhājanīyakathāvaṇṇanā
596. аббараж̇агкаад̣̇исад̇д̇асамуухад̣̇ассанам̣ б̣уд̣̇д̇хажагку, часу асаад̇хааран̣ан̃аан̣зсу инд̣̇рияабаробарияад̇д̇ан̃аан̣ам̣ д̣̇адтаб̣б̣ам̣. саб̣б̣асан̇кад̇аасан̇кад̇ад̣̇ассанам̣ саманд̇ажагку. ‘‘д̣̇угкам̣ барин̃н̃зяяам̣ барин̃н̃аад̇а’’нд̇и (сам̣. ни. 5.1081; махаава. 15) звамаад̣̇инаа аагаарзна бавад̇д̇ам̣ н̃аан̣ад̣̇ассанам̣ н̃аан̣ажагку, д̇амби буримад̣̇ваяамива гаамааважарам̣. жад̇усажжад̇хаммад̣̇ассанам̣ д̇хаммажагку. убад̇т̇амбхабхууд̇аа жад̇усамудтаанигаруубасанд̇ад̇ияо самбхаараа. саха самбхаарзхи сасамбхаарам̣, самбхаараванд̇ам̣. самбхавод̇и аабод̇хаад̇умзва самбхавасамбхууд̇амааха. сан̣таананд̇и ван̣н̣ааяад̇анамзва бариман̣д̣алаад̣̇исан̣таанабхууд̇ам̣. д̇зсам̣ бана висум̣ важанам̣ д̇ат̇аабхууд̇аанам̣ ад̇ат̇аабхууд̇аанан̃жа аабод̇хаад̇уван̣н̣ааяад̇анаанам̣ яат̇аавуд̇д̇з мам̣сабин̣д̣з виж̇ж̇амаанад̇д̇аа. жуд̣̇д̣̇асасамбхааро хи мам̣сабин̣д̣о. самбхавасса жад̇уд̇хаад̇униссид̇зхи саха вуд̇д̇асса д̇хаад̇уд̇д̇аяаниссид̇ад̇аа яож̇зд̇аб̣б̣аа. аабод̇хаад̇уван̣н̣ааяад̇анаанамзва ваа самбхавасан̣таанаабхааваа висум̣ вуд̇д̇аад̇и жад̇уд̇хаад̇униссид̇ад̇аа жа на вируж̇жхад̇и. яам̣ мам̣сабин̣д̣ам̣ сзд̇аад̣̇инаа сан̃ж̇аананд̇о на басаад̣̇ажагкум̣ сан̃ж̇аанаад̇и, бад̇т̇ин̣н̣ад̇аад̣̇ивисзсам̣ вад̇д̇угаамо ‘‘бат̇авийби ад̇т̇ий’’д̇иаад̣̇и вуд̇д̇амби вад̣̇ад̇и.
596. Apparajakkhādisattasamūhadassanaṃ buddhacakkhu, chasu asādhāraṇañāṇesu indriyaparopariyattañāṇaṃ daṭṭhabbaṃ. Sabbasaṅkhatāsaṅkhatadassanaṃ samantacakkhu. ‘‘Dukkhaṃ pariññeyyaṃ pariññāta’’nti (saṃ. ni. 5.1081; mahāva. 15) evamādinā ākārena pavattaṃ ñāṇadassanaṃ ñāṇacakkhu, tampi purimadvayamiva kāmāvacaraṃ. Catusaccadhammadassanaṃ dhammacakkhu. Upatthambhabhūtā catusamuṭṭhānikarūpasantatiyo sambhārā. Saha sambhārehi sasambhāraṃ, sambhāravantaṃ. Sambhavoti āpodhātumeva sambhavasambhūtamāha. Saṇṭhānanti vaṇṇāyatanameva parimaṇḍalādisaṇṭhānabhūtaṃ. Tesaṃ pana visuṃ vacanaṃ tathābhūtānaṃ atathābhūtānañca āpodhātuvaṇṇāyatanānaṃ yathāvutte maṃsapiṇḍe vijjamānattā. Cuddasasambhāro hi maṃsapiṇḍo. Sambhavassa catudhātunissitehi saha vuttassa dhātuttayanissitatā yojetabbā. Āpodhātuvaṇṇāyatanānameva vā sambhavasaṇṭhānābhāvā visuṃ vuttāti catudhātunissitatā ca na virujjhati. Yaṃ maṃsapiṇḍaṃ setādinā sañjānanto na pasādacakkhuṃ sañjānāti, patthiṇṇatādivisesaṃ vattukāmo ‘‘pathavīpi atthī’’tiādi vuttampi vadati.
сарийрасан̣таануббад̇д̇ид̣̇зсабхууд̇зд̇и зд̇зна авасзсам̣ ган̣хаман̣д̣алам̣ бадигкибад̇и. снзхамива сад̇д̇агкибадалаани б̣яаабзд̇ваа тид̇аахзва ад̇д̇ано ниссаяабхууд̇аахи жад̇уухи д̇хаад̇уухи гад̇уубагаарам̣ д̇ам̣ниссид̇зхи зва ааяуван̣н̣аад̣̇ийхи анубаалид̇абариваарид̇ам̣ д̇исанд̇ад̇ируубасамудтаабагзхи уд̇ужид̇д̇аахаарзхи убад̇т̇амбхияамаанам̣ д̇идтад̇и. сад̇д̇агкибадалаанам̣ б̣яаабанаважанзна жа анзгагалаабаг̇ад̇абхаавам̣ жагкусса д̣̇ассзд̇и. бамаан̣ад̇о уугаасирамад̇д̇анд̇и уугаасирамад̇д̇з бад̣̇зсз бавад̇д̇анад̇о вуд̇д̇ам̣. руубаани манубассад̇ийд̇и ма-гааро бад̣̇асанд̇хигаро. ат̇а ваа манууд̇и мажжо. убагаарабхууд̇зхи сан̇г̇ахид̇о. барияааязнаад̇и жад̇уннам̣ басаад̣̇о д̇зсу згасса д̣̇виннан̃жаад̇иби вад̇д̇ум̣ яуд̇д̇о самаанад̇ханаанам̣ д̇ханам̣ вияаад̇и зд̇зна барияааязна. сарийрам̣ руубагканд̇хо зва. бадигхадданамзва нигхам̣со бадигхадданаанигхам̣со. руубаабхимукабхаавзна жагкувин̃н̃аан̣асса ниссаяабхааваабад̇д̇исан̇каад̇о бадигхадданад̇о ж̇аад̇о ваа нигхам̣со бадигхадданаанигхам̣со.
Sarīrasaṇṭhānuppattidesabhūteti etena avasesaṃ kaṇhamaṇḍalaṃ paṭikkhipati. Snehamiva sattakkhipaṭalāni byāpetvā ṭhitāheva attano nissayabhūtāhi catūhi dhātūhi katūpakāraṃ taṃnissitehi eva āyuvaṇṇādīhi anupālitaparivāritaṃ tisantatirūpasamuṭṭhāpakehi utucittāhārehi upatthambhiyamānaṃ tiṭṭhati. Sattakkhipaṭalānaṃ byāpanavacanena ca anekakalāpagatabhāvaṃ cakkhussa dasseti. Pamāṇato ūkāsiramattanti ūkāsiramatte padese pavattanato vuttaṃ. Rūpāni manupassatīti ma-kāro padasandhikaro. Atha vā manūti macco. Upakārabhūtehi saṅgahito. Pariyāyenāti catunnaṃ pasādo tesu ekassa dvinnañcātipi vattuṃ yutto samānadhanānaṃ dhanaṃ viyāti etena pariyāyena. Sarīraṃ rūpakkhandho eva. Paṭighaṭṭanameva nighaṃso paṭighaṭṭanānighaṃso. Rūpābhimukhabhāvena cakkhuviññāṇassa nissayabhāvāpattisaṅkhāto paṭighaṭṭanato jāto vā nighaṃso paṭighaṭṭanānighaṃso.
баригаббаважанам̣ ‘‘сажз аабаат̇ам̣ ааг̇ажчзяяаа’’д̇и хзд̇угирияам̣, ‘‘бассзяяаа’’д̇и палагирияан̃жа баригаббзд̇ваа д̇зна баригаббзна важанам̣. зд̇т̇а жа хзд̇угирияаа анзгад̇д̇аа авуд̇д̇ааби вин̃н̃ааяад̇ийд̇и д̣̇адтаб̣б̣аа. ‘‘бассз ваа’’д̇и иминаа важанзна д̇ийсуби гаалзсу жагкувин̃н̃аан̣асса ниссаяабхаавам̣ анубаг̇ажчанд̇ам̣ жагкум̣ сан̇г̇ан̣хаад̇и. д̣̇ассанз барин̣ааяагабхааво д̣̇ассанабарин̣ааяагадто. яат̇аа хи иссаро ‘‘ид̣̇ан̃жид̣̇ан̃жа гарот̇аа’’д̇и вад̣̇анд̇о д̇асмим̣ д̇асмим̣ гижжз сабурисз барин̣ааяад̇и бавад̇д̇аяад̇и, звамид̣̇амби жагкусампассаад̣̇ийнам̣ ниссаяабхаавзна д̇з д̇хаммз д̣̇ассанагижжз аан̣аабзнд̇ам̣ вияа барин̣ааяад̇ийд̇и жагкууд̇и вужжад̇и. жагкад̇ийд̇и хи жагку, яат̇аавуд̇д̇зна наязна аажигкад̇и барин̣ааяад̇ийд̇и ад̇т̇о. ат̇а ваа самависамаани руубаани жагкад̇и аажигкад̇и, багаасзд̇ийд̇и ваа жагку. сан̃ж̇ааяанд̇и зд̇т̇аад̇и сан̃ж̇аад̇и. гз сан̃ж̇ааяанд̇и? пассаад̣̇ийни . д̇ат̇аа самосаран̣ам̣. жагкусампассаад̣̇ийнам̣ ад̇д̇ано д̇игкаманд̣̇абхааваанубавад̇д̇анзна инд̣̇адтам̣ гаарзд̇ийд̇и. нижжам̣ д̇хувам̣ ад̇д̇аад̇и г̇ахид̇ассаби луж̇ж̇анабалуж̇ж̇анадтзна. вал̣ан̃ж̇анд̇и бависанд̇и зд̇знаад̇и вал̣ан̃ж̇анам̣, д̇ам̣д̣̇вааригаанам̣ пассаад̣̇ийнам̣ вал̣ан̃ж̇анадтзна.
Parikappavacanaṃ ‘‘sace āpāthaṃ āgaccheyyā’’ti hetukiriyaṃ, ‘‘passeyyā’’ti phalakiriyañca parikappetvā tena parikappena vacanaṃ. Ettha ca hetukiriyā anekattā avuttāpi viññāyatīti daṭṭhabbā. ‘‘Passe vā’’ti iminā vacanena tīsupi kālesu cakkhuviññāṇassa nissayabhāvaṃ anupagacchantaṃ cakkhuṃ saṅgaṇhāti. Dassane pariṇāyakabhāvo dassanapariṇāyakaṭṭho. Yathā hi issaro ‘‘idañcidañca karothā’’ti vadanto tasmiṃ tasmiṃ kicce sapurise pariṇāyati pavattayati, evamidampi cakkhusamphassādīnaṃ nissayabhāvena te dhamme dassanakicce āṇāpentaṃ viya pariṇāyatīti cakkhūti vuccati. Cakkhatīti hi cakkhu, yathāvuttena nayena ācikkhati pariṇāyatīti attho. Atha vā samavisamāni rūpāni cakkhati ācikkhati, pakāsetīti vā cakkhu. Sañjāyanti etthāti sañjāti. Ke sañjāyanti? Phassādīni . Tathā samosaraṇaṃ. Cakkhusamphassādīnaṃ attano tikkhamandabhāvānupavattanena indaṭṭhaṃ kāretīti. Niccaṃ dhuvaṃ attāti gahitassapi lujjanapalujjanaṭṭhena. Vaḷañjanti pavisanti etenāti vaḷañjanaṃ, taṃdvārikānaṃ phassādīnaṃ vaḷañjanaṭṭhena.
597. буб̣б̣з вуд̇д̇о баригаббо зва вигаббанад̇т̇о. гхаддаяамаанамзваад̇и басаад̣̇асса абхимукабхаавависзсам̣ г̇ажчанд̇амзва.
597. Pubbe vutto parikappo eva vikappanattho. Ghaṭṭayamānamevāti pasādassa abhimukhabhāvavisesaṃ gacchantameva.
599. руубам̣ аараб̣бха жагкусампассаад̣̇ийнам̣ уббад̇д̇иважанзнзва д̇зсам̣ д̇ам̣д̣̇вааригаанам̣ ан̃н̃зсан̃жа руубам̣ аараб̣бха уббад̇д̇и вуд̇д̇аа ход̇и. яат̇аа жа д̇зсам̣ руубам̣ бажжаяо ход̇и, д̇зна бажжаязна уббад̇д̇и вуд̇д̇аа ход̇ийд̇и ад̇хиббааязна ‘‘иминаа’’д̇иаад̣̇имааха. д̇ад̇т̇а жагкубасаад̣̇авад̇т̇угаанам̣ пассаад̣̇ийнанд̇и иминаа важанзна д̇ад̣̇ааламб̣анаруубаарамман̣ад̇ааяа д̇ам̣сад̣̇исаанам̣ манод̇хаад̇уаад̣̇ийнан̃жа бурзж̇аад̇абажжаязна уббад̇д̇и д̣̇ассид̇аад̇и д̣̇адтаб̣б̣аа. яад̇т̇а бана висзсо ад̇т̇и, д̇ам̣ д̣̇ассзд̇ум̣ ‘‘жагкуд̣̇ваараж̇аванавийт̇ибарияаабаннаана’’нд̇иаад̣̇имааха. д̇аани хи руубам̣ г̇арум̣ гад̇ваа бавад̇д̇амаанассаад̣̇анаабхинанд̣̇анабхууд̇аани д̇ам̣самбаяуд̇д̇аани жа аарамман̣аад̇хибад̇иаарамман̣уубаниссаязхи уббаж̇ж̇анд̇и, ан̃н̃аани аарамман̣абурзж̇аад̇знзваад̇и звам̣ ‘‘аараб̣бхаа’’д̇и важанам̣ аарамман̣абажжаяад̇о ан̃н̃абажжаяабхаавассаби д̣̇ийбагам̣, аарамман̣аважанам̣ аарамман̣абажжаяабхаавассзваад̇и аяамзд̇зсам̣ висзсо.
599. Rūpaṃ ārabbha cakkhusamphassādīnaṃ uppattivacaneneva tesaṃ taṃdvārikānaṃ aññesañca rūpaṃ ārabbha uppatti vuttā hoti. Yathā ca tesaṃ rūpaṃ paccayo hoti, tena paccayena uppatti vuttā hotīti adhippāyena ‘‘iminā’’tiādimāha. Tattha cakkhupasādavatthukānaṃ phassādīnanti iminā vacanena tadālambanarūpārammaṇatāya taṃsadisānaṃ manodhātuādīnañca purejātapaccayena uppatti dassitāti daṭṭhabbā. Yattha pana viseso atthi, taṃ dassetuṃ ‘‘cakkhudvārajavanavīthipariyāpannāna’’ntiādimāha. Tāni hi rūpaṃ garuṃ katvā pavattamānassādanābhinandanabhūtāni taṃsampayuttāni ca ārammaṇādhipatiārammaṇūpanissayehi uppajjanti, aññāni ārammaṇapurejātenevāti evaṃ ‘‘ārabbhā’’ti vacanaṃ ārammaṇapaccayato aññapaccayabhāvassapi dīpakaṃ, ārammaṇavacanaṃ ārammaṇapaccayabhāvassevāti ayametesaṃ viseso.
600. сун̣аад̇ийд̇и сод̇авин̃н̃аан̣асса ниссаяабхаавзна сун̣аад̇и. ж̇ивхаасад̣̇д̣̇зна вин̃н̃ааяамаанаа гирияаа сааяананд̇и гад̇ваа ‘‘сааяанадтзнаа’’д̇и ааха. гужчид̇аанам̣ д̣̇угкасамбаяуд̇д̇апассаад̣̇ийнам̣ ааяод̇и гааяо, д̣̇угкад̣̇угкавибарин̣аамад̣̇угкаанам̣ ваа. гааяааяад̇анасса б̣яаабид̇ааяа жагкубасаад̣̇з гааяабасаад̣̇абхаавоби ад̇т̇и, д̇зна жагкубасаад̣̇асса анувид̣̇д̇хад̇д̇аа но б̣яаабид̇аа жа на сияаа, вуд̇д̇аа жа саа. д̇асмаа жагкубасаад̣̇асса подтаб̣б̣аавабхаасанам̣ гааяабасаад̣̇асса жа руубаавабхаасанам̣ аабаннанд̇и лагкан̣асаммиссад̇ам̣ жод̣̇зд̇и. жагкугааяаанам̣ ан̃н̃аниссаяад̇д̇аа галаабанд̇араг̇ад̇ад̇ааяа ‘‘ан̃н̃асса ан̃н̃ад̇т̇а абхаавад̇о’’д̇и ааха. руубарасаад̣̇инид̣̇ассанам̣ самаананиссаяаанан̃жа ан̃н̃аман̃н̃асабхааваанубаг̇амзна ан̃н̃аман̃н̃асмим̣ абхааво, го бана ваад̣̇о асамаананиссаяаананд̇и д̣̇ассзд̇ум̣ вуд̇д̇ам̣.
600. Suṇātīti sotaviññāṇassa nissayabhāvena suṇāti. Jivhāsaddena viññāyamānā kiriyā sāyananti katvā ‘‘sāyanaṭṭhenā’’ti āha. Kucchitānaṃ dukkhasampayuttaphassādīnaṃ āyoti kāyo, dukkhadukkhavipariṇāmadukkhānaṃ vā. Kāyāyatanassa byāpitāya cakkhupasāde kāyapasādabhāvopi atthi, tena cakkhupasādassa anuviddhattā no byāpitā ca na siyā, vuttā ca sā. Tasmā cakkhupasādassa phoṭṭhabbāvabhāsanaṃ kāyapasādassa ca rūpāvabhāsanaṃ āpannanti lakkhaṇasammissataṃ codeti. Cakkhukāyānaṃ aññanissayattā kalāpantaragatatāya ‘‘aññassa aññattha abhāvato’’ti āha. Rūparasādinidassanaṃ samānanissayānañca aññamaññasabhāvānupagamena aññamaññasmiṃ abhāvo, ko pana vādo asamānanissayānanti dassetuṃ vuttaṃ.
руубаабхигхаад̇аарахо жа со бхууд̇аббасаад̣̇о жаад̇и руубаабхигхаад̇аарахабхууд̇аббасаад̣̇о. звам̣лагкан̣ам̣ жагку. руубаабхигхаад̇од̇и жа руубз, руубасса ваа абхигхаад̇од̇и ад̇т̇о. барибун̣н̣аабарибун̣н̣ааяад̇анад̇д̇абхааваниб̣б̣ад̇д̇агасса гаммасса нид̣̇аанабхууд̇аа гаамад̇ан̣хаа руубад̇ан̣хаа жа д̇ад̣̇ааяад̇анигабхавабад̇т̇анаабхаавад̇о д̣̇адтугаамад̇аад̣̇ивохаарам̣ арахад̇ийд̇и д̣̇уд̇ияо наяо саб̣б̣ад̇т̇а вуд̇д̇о. д̇ад̇т̇а д̣̇адтугаамад̇аанид̣̇аанам̣ гаммам̣ самудтаанамзд̇зсанд̇и д̣̇адтугаамад̇аанид̣̇аанагаммасамудтаанаани, звам̣вид̇хаанам̣ бхууд̇аанам̣ басаад̣̇алагкан̣ам̣ жагку, звам̣вид̇хо ваа бхууд̇аббасаад̣̇о д̣̇адтугаамад̇аани…бз… басаад̣̇о. звам̣лагкан̣ам̣ жагку. руубзсу буг̇г̇аласса ваа вин̃н̃аан̣асса ваа аавин̃чанарасам̣.
Rūpābhighātāraho ca so bhūtappasādo cāti rūpābhighātārahabhūtappasādo. Evaṃlakkhaṇaṃ cakkhu. Rūpābhighātoti ca rūpe, rūpassa vā abhighātoti attho. Paripuṇṇāparipuṇṇāyatanattabhāvanibbattakassa kammassa nidānabhūtā kāmataṇhā rūpataṇhā ca tadāyatanikabhavapatthanābhāvato daṭṭhukāmatādivohāraṃ arahatīti dutiyo nayo sabbattha vutto. Tattha daṭṭhukāmatānidānaṃ kammaṃ samuṭṭhānametesanti daṭṭhukāmatānidānakammasamuṭṭhānāni, evaṃvidhānaṃ bhūtānaṃ pasādalakkhaṇaṃ cakkhu, evaṃvidho vā bhūtappasādo daṭṭhukāmatāni…pe… pasādo. Evaṃlakkhaṇaṃ cakkhu. Rūpesu puggalassa vā viññāṇassa vā āviñchanarasaṃ.
гааяо саб̣б̣зсанд̇и го зд̇т̇а висзсо, нану д̇зж̇аад̣̇иад̇хигаанан̃жа бхууд̇аанам̣ басаад̣̇аа саб̣б̣зсам̣язваад̇и? сажжамзд̇ам̣, ид̣̇ам̣ бана ‘‘саб̣б̣зса’’нд̇и важанам̣ ‘‘самаанаана’’нд̇и имамад̇т̇ам̣ д̣̇ийбзд̇и анувад̇д̇амаанасса згад̣̇зсаад̇хигабхаавасса нивааран̣авасзна вуд̇д̇ад̇д̇аа. д̇зж̇аад̣̇ийнанд̇и бад̣̇ийбасан̇каад̇асса д̇зж̇асса обхаасзна вааяусса сад̣̇д̣̇зна бат̇авияаа г̇анд̇хзна кзл̣асан̇каад̇асса уд̣̇агасса расзнаад̇и буримаваад̣̇з бажчимаваад̣̇з жа яат̇ааяог̇ам̣ д̇ам̣д̇ам̣бхууд̇аг̇ун̣зхи ануг̇г̇аяхабхаавад̇о руубаад̣̇иг̇г̇ахан̣з убагарид̇аб̣б̣ад̇од̇и ад̇т̇о. руубаад̣̇ийнам̣ ад̇хигабхаавад̣̇ассанад̇од̇и аг̇г̇имхи руубасса бабхассарасса вааяумхи сад̣̇д̣̇асса сабхаавзна суяяамаанасса бат̇авияаа сурабхиаад̣̇ино г̇анд̇хасса аабз жа расасса мад̇хурасса висзсаяуд̇д̇аанам̣ д̣̇ассанад̇о ‘‘руубаад̣̇аяо д̇зсам̣ г̇ун̣аа’’д̇и батамаваад̣̇ий ааха. д̇ассзва жа ‘‘ижчзяяаамаа’’д̇иаад̣̇инаа уд̇д̇арамааха. иминаавубааязна д̣̇уд̇ияаваад̣̇иссаби ниг̇г̇ахо ход̇ийд̇и.
Kāyo sabbesanti ko ettha viseso, nanu tejādiadhikānañca bhūtānaṃ pasādā sabbesaṃyevāti? Saccametaṃ, idaṃ pana ‘‘sabbesa’’nti vacanaṃ ‘‘samānāna’’nti imamatthaṃ dīpeti anuvattamānassa ekadesādhikabhāvassa nivāraṇavasena vuttattā. Tejādīnanti padīpasaṅkhātassa tejassa obhāsena vāyussa saddena pathaviyā gandhena kheḷasaṅkhātassa udakassa rasenāti purimavāde pacchimavāde ca yathāyogaṃ taṃtaṃbhūtaguṇehi anuggayhabhāvato rūpādiggahaṇe upakaritabbatoti attho. Rūpādīnaṃ adhikabhāvadassanatoti aggimhi rūpassa pabhassarassa vāyumhi saddassa sabhāvena suyyamānassa pathaviyā surabhiādino gandhassa āpe ca rasassa madhurassa visesayuttānaṃ dassanato ‘‘rūpādayo tesaṃ guṇā’’ti paṭhamavādī āha. Tasseva ca ‘‘iccheyyāmā’’tiādinā uttaramāha. Imināvupāyena dutiyavādissapi niggaho hotīti.
ат̇а ваа руубаад̣̇ивисзсаг̇ун̣зхи д̇зж̇ааагаасабат̇авийаабавааяуухи жагкаад̣̇ийни гад̇аанийд̇и вад̣̇анд̇асса ган̣аад̣̇асса ваад̣̇ам̣ д̇ад̇ияам̣ уд̣̇д̇харид̇ваа д̇ам̣ ниг̇г̇ахзд̇ум̣ ‘‘ат̇ааби вад̣̇зяяу’’нд̇иаад̣̇и вуд̇д̇анд̇и д̣̇адтаб̣б̣ам̣. аасавз убалаб̣бхамааноби г̇анд̇хо бат̇авияаа аабосам̣яуд̇д̇ааяа габбаасад̇о висад̣̇исааяаад̇и на габбаасаг̇анд̇хасса ад̇хигабхааваабад̇д̇ийд̇и жз? на, анабхибхууд̇ад̇д̇аа. аасавзхи уд̣̇агасам̣яуд̇д̇аа бат̇авий уд̣̇агзна абхибхууд̇аа, на габбаасабат̇авийд̇и д̇ассааязва ад̇хигзна г̇анд̇хзна бхавид̇аб̣б̣анд̇и. ун̣ход̣̇агасан̃н̃уд̇д̇о жа аг̇г̇и убалаб̣бханийяо маханд̇од̇и гад̇ваа д̇асса пассо вияа ван̣н̣оби бабхассаро убалаб̣бхид̇аб̣б̣од̇и ун̣ход̣̇агаван̣н̣ад̇о аг̇г̇инаа анабхисамб̣анд̇хасса сийд̇уд̣̇агасса ван̣н̣о барихааязт̇а. д̇асмаад̇и зд̇ассубхаяасса абхааваа. д̇ад̣̇абхаавзна хи руубаад̣̇ийнам̣ д̇зж̇аад̣̇ивисзсаг̇ун̣ад̇аа нивад̇д̇ид̇аа, д̇ам̣нивад̇д̇анзна ‘‘д̇зж̇аад̣̇ийнам̣ г̇ун̣зхи руубаад̣̇ийхи ануг̇г̇аяхабхаавад̇о’’д̇и ид̣̇ам̣ гааран̣ам̣ нивад̇д̇ид̇анд̇и. звам̣ барамбарааяа убхаяаабхааво висзсагаббанаббахаанасса гааран̣ам̣ ход̇ийд̇и ааха ‘‘д̇асмаа бахааязт̇зд̇а’’нд̇иаад̣̇и. згагалаабзби руубарасаад̣̇аяо висад̣̇исаа, го бана ваад̣̇о наанаагалаабз жагкаад̣̇аяо бхууд̇ависзсаабхаавзбийд̇и д̣̇ассзд̇ум̣ руубарасаад̣̇инид̣̇ассанам̣ вуд̇д̇ам̣.
Atha vā rūpādivisesaguṇehi tejaākāsapathavīāpavāyūhi cakkhādīni katānīti vadantassa kaṇādassa vādaṃ tatiyaṃ uddharitvā taṃ niggahetuṃ ‘‘athāpi vadeyyu’’ntiādi vuttanti daṭṭhabbaṃ. Āsave upalabbhamānopi gandho pathaviyā āposaṃyuttāya kappāsato visadisāyāti na kappāsagandhassa adhikabhāvāpattīti ce? Na, anabhibhūtattā. Āsavehi udakasaṃyuttā pathavī udakena abhibhūtā, na kappāsapathavīti tassāyeva adhikena gandhena bhavitabbanti. Uṇhodakasaññutto ca aggi upalabbhanīyo mahantoti katvā tassa phasso viya vaṇṇopi pabhassaro upalabbhitabboti uṇhodakavaṇṇato agginā anabhisambandhassa sītudakassa vaṇṇo parihāyetha. Tasmāti etassubhayassa abhāvā. Tadabhāvena hi rūpādīnaṃ tejādivisesaguṇatā nivattitā, taṃnivattanena ‘‘tejādīnaṃ guṇehi rūpādīhi anuggayhabhāvato’’ti idaṃ kāraṇaṃ nivattitanti. Evaṃ paramparāya ubhayābhāvo visesakappanappahānassa kāraṇaṃ hotīti āha ‘‘tasmā pahāyetheta’’ntiādi. Ekakalāpepi rūparasādayo visadisā, ko pana vādo nānākalāpe cakkhādayo bhūtavisesābhāvepīti dassetuṃ rūparasādinidassanaṃ vuttaṃ.
яад̣̇и бхууд̇ависзсо над̇т̇и, гим̣ бана жагкаад̣̇ивисзсасса гааран̣анд̇и д̇ам̣ д̣̇ассзд̇ум̣ ‘‘яам̣ ан̃н̃аман̃н̃ассаа’’д̇иаад̣̇имааха. згамби гаммам̣ бан̃жааяад̇анигад̇д̇абхаавабад̇т̇анаанибпаннам̣ жагкаад̣̇ийнам̣ висзсахзд̇уд̇д̇аа ‘‘ан̃н̃аман̃н̃асса асаад̇хааран̣а’’нд̇и жа ‘‘гаммависзсо’’д̇и жа вуд̇д̇анд̇и д̣̇адтаб̣б̣ам̣. на хи д̇ам̣ язна висзсзна жагкусса бажжаяо, д̇знзва сод̇асса ход̇и инд̣̇рияанд̇араабхааваббад̇д̇ид̇о. ‘‘бадисанд̇хигкан̣з махаг̇г̇ад̇аа згаа жзд̇анаа гадад̇д̇ааруубаанам̣ гаммабажжаязна бажжаяо’’д̇и (бадтаа. 2.12.78) важанзна бадисанд̇хигкан̣з виж̇ж̇амаанаанам̣ саб̣б̣зсам̣ гадад̇д̇ааруубаанам̣ згаа жзд̇анаа гаммабажжаяо ход̇ийд̇и вин̃н̃ааяад̇и. наанаажзд̇анааяа хи д̇ад̣̇аа инд̣̇рияуббад̇д̇ияам̣ сад̇и барид̇д̇зна жа махаг̇г̇ад̇зна жа гаммунаа ниб̣б̣ад̇д̇ид̇ам̣ гадад̇д̇ааруубам̣ аабаж̇ж̇зяяаад̇и на жзгаа бадисанд̇хи анзгагамманиб̣б̣ад̇д̇аа ход̇ийд̇и сид̣̇д̇хамзгзна гаммзна анзгинд̣̇рияуббад̇д̇и ход̇ийд̇и. аналлийно ниссаяо зд̇ассаад̇и аналлийнаниссаяо, руубасад̣̇д̣̇асан̇каад̇о висаяо. г̇анд̇харасаанам̣ ниссаяаа гхаанаж̇ивхааниссаяз аллийяанд̇ийд̇и д̇з ниссаяавасзна аллийнаа, подтаб̣б̣ам̣ саяам̣ гааяаниссаяааллийнам̣ бхууд̇ад̇д̇аяад̇д̇аа. д̣̇уурз…бз… самбад̇д̇о зва наама бадигхаддананигхам̣саж̇анагад̇од̇и ад̇хиббааяо. сад̣̇д̣̇о бана д̇хаад̇убарамбарааяа вааяу вияа ааг̇анд̇ваа ниссаяавасзна сод̇аниссаяз аллийяид̇ваа сод̇ам̣ гхаддзд̇ваа вавад̇т̇аанам̣ г̇ажчанд̇о сан̣игам̣ вавад̇т̇аанам̣ г̇ажчад̇ийд̇и вуд̇д̇о. звам̣ бана сад̇ижид̇д̇асамудтаанам̣ сад̣̇д̣̇ааяад̇анам̣ сод̇авин̃н̃аан̣асса гад̣̇аажиби аарамман̣абажжаяо на сияаа. на хи б̣ахид̣̇д̇хаа жид̇д̇асамудтаануббад̇д̇и убабаж̇ж̇ад̇ийд̇и.
Yadi bhūtaviseso natthi, kiṃ pana cakkhādivisesassa kāraṇanti taṃ dassetuṃ ‘‘yaṃ aññamaññassā’’tiādimāha. Ekampi kammaṃ pañcāyatanikattabhāvapatthanānipphannaṃ cakkhādīnaṃ visesahetuttā ‘‘aññamaññassa asādhāraṇa’’nti ca ‘‘kammaviseso’’ti ca vuttanti daṭṭhabbaṃ. Na hi taṃ yena visesena cakkhussa paccayo, teneva sotassa hoti indriyantarābhāvappattito. ‘‘Paṭisandhikkhaṇe mahaggatā ekā cetanā kaṭattārūpānaṃ kammapaccayena paccayo’’ti (paṭṭhā. 2.12.78) vacanena paṭisandhikkhaṇe vijjamānānaṃ sabbesaṃ kaṭattārūpānaṃ ekā cetanā kammapaccayo hotīti viññāyati. Nānācetanāya hi tadā indriyuppattiyaṃ sati parittena ca mahaggatena ca kammunā nibbattitaṃ kaṭattārūpaṃ āpajjeyyāti na cekā paṭisandhi anekakammanibbattā hotīti siddhamekena kammena anekindriyuppatti hotīti. Anallīno nissayo etassāti anallīnanissayo, rūpasaddasaṅkhāto visayo. Gandharasānaṃ nissayā ghānajivhānissaye allīyantīti te nissayavasena allīnā, phoṭṭhabbaṃ sayaṃ kāyanissayaallīnaṃ bhūtattayattā. Dūre…pe… sampatto eva nāma paṭighaṭṭananighaṃsajanakatoti adhippāyo. Saddo pana dhātuparamparāya vāyu viya āgantvā nissayavasena sotanissaye allīyitvā sotaṃ ghaṭṭetvā vavatthānaṃ gacchanto saṇikaṃ vavatthānaṃ gacchatīti vutto. Evaṃ pana saticittasamuṭṭhānaṃ saddāyatanaṃ sotaviññāṇassa kadācipi ārammaṇapaccayo na siyā. Na hi bahiddhā cittasamuṭṭhānuppatti upapajjatīti.
жирзна суяязяяаад̇и гасмаа зд̇ам̣ вуд̇д̇ам̣, нану д̣̇уурз тид̇зхи раж̇агаад̣̇исад̣̇д̣̇аа жирзна суяяанд̇ийд̇и? на, д̣̇уураасаннаанам̣ яат̇аабаагадз сад̣̇д̣̇з г̇ахан̣ависзсад̇о. яат̇аа хи д̣̇уураасаннаанам̣ важанасад̣̇д̣̇з яат̇аа баагадийбхууд̇з г̇ахан̣ависзсад̇о аагаарависзсаанам̣ аг̇г̇ахан̣ам̣ г̇ахан̣ан̃жа ход̇и, звам̣ раж̇агаад̣̇исад̣̇д̣̇зби аасаннасса аад̣̇ид̇о бабхуд̇и яааваавасаанаа гамзна баагадийбхууд̇з д̣̇уурасса жаавасаанз маж̇жхз ваа бин̣д̣авасзна бавад̇д̇ибаагадийбхууд̇з нижчаяаг̇ахан̣аанам̣ сод̇авин̃н̃аан̣авийт̇ияаа барад̇о бавад̇д̇аанам̣ висзсад̇о лахугам̣ суд̇о жирзна суд̇од̇и абхимаано ход̇и. со бана сад̣̇д̣̇о яад̇т̇а уббанно, д̇ам̣ ниссид̇ова ад̇д̇ано виж̇ж̇амаанагкан̣з сод̇асса аабаат̇амааг̇ажчад̇и. д̣̇уурз тид̇о бана сад̣̇д̣̇о ан̃н̃ад̇т̇а бадигхосуббад̇д̇ияаа бхааж̇анаад̣̇ижаланасса жа аяоганд̇о вияа аяожаланасса бажжаяо ход̇ийд̇и д̣̇адтаб̣б̣о. яат̇аа ваа гхан̣даабхигхаад̇аануж̇аани бхууд̇аани ануравасса ниссаяабхууд̇аани гхадданасабхааваани, звам̣ гхадданаануж̇аани яаава сод̇аббасаад̣̇аа уббад̇д̇ивасзна ааг̇ад̇аани бхууд̇аани гхадданасабхааваанзваад̇и д̇ам̣ниссид̇о сад̣̇д̣̇о ниссаяавасзна д̇хаад̇убарамбарааяа гхаддзд̇ваа сан̣игам̣ вавад̇т̇аанам̣ г̇ажчад̇ийд̇и вуд̇д̇о. асугад̣̇исааяа наамаад̇и на бан̃н̃ааязяяа. гасмаа? сод̇аббад̣̇зсассзва сад̣̇д̣̇асса г̇ахан̣ад̇о.
Cirena suyyeyyāti kasmā etaṃ vuttaṃ, nanu dūre ṭhitehi rajakādisaddā cirena suyyantīti? Na, dūrāsannānaṃ yathāpākaṭe sadde gahaṇavisesato. Yathā hi dūrāsannānaṃ vacanasadde yathā pākaṭībhūte gahaṇavisesato ākāravisesānaṃ aggahaṇaṃ gahaṇañca hoti, evaṃ rajakādisaddepi āsannassa ādito pabhuti yāvāvasānā kamena pākaṭībhūte dūrassa cāvasāne majjhe vā piṇḍavasena pavattipākaṭībhūte nicchayagahaṇānaṃ sotaviññāṇavīthiyā parato pavattānaṃ visesato lahukaṃ suto cirena sutoti abhimāno hoti. So pana saddo yattha uppanno, taṃ nissitova attano vijjamānakkhaṇe sotassa āpāthamāgacchati. Dūre ṭhito pana saddo aññattha paṭighosuppattiyā bhājanādicalanassa ca ayokanto viya ayocalanassa paccayo hotīti daṭṭhabbo. Yathā vā ghaṇṭābhighātānujāni bhūtāni anuravassa nissayabhūtāni ghaṭṭanasabhāvāni, evaṃ ghaṭṭanānujāni yāva sotappasādā uppattivasena āgatāni bhūtāni ghaṭṭanasabhāvānevāti taṃnissito saddo nissayavasena dhātuparamparāya ghaṭṭetvā saṇikaṃ vavatthānaṃ gacchatīti vutto. Asukadisāya nāmāti na paññāyeyya. Kasmā? Sotappadesasseva saddassa gahaṇato.
висамз аж̇жхаасаяо зд̇ассаад̇и висамаж̇жхаасаяо, аж̇жхаасаяарахид̇амби жагку висаманиннад̇д̇аа висамаж̇жхаасаяам̣ вияа ход̇ийд̇и ‘‘висамаж̇жхаасаяа’’нд̇и вуд̇д̇ам̣. жагкумад̇о ваа буг̇г̇аласса аж̇жхаасаяавасзна жагку ‘‘висамаж̇жхаасаяа’’нд̇и вуд̇д̇ам̣.
Visame ajjhāsayo etassāti visamajjhāsayo, ajjhāsayarahitampi cakkhu visamaninnattā visamajjhāsayaṃ viya hotīti ‘‘visamajjhāsaya’’nti vuttaṃ. Cakkhumato vā puggalassa ajjhāsayavasena cakkhu ‘‘visamajjhāsaya’’nti vuttaṃ.
ган̣н̣агуубачид̣̇д̣̇зязва бавад̇д̇анад̇о аарамман̣аг̇г̇ахан̣ахзд̇уд̇о жа д̇ад̇т̇зва ‘‘аж̇жхаасаяам̣ гарод̇ий’’д̇и вуд̇д̇ам̣. д̇асса сод̇асса сод̇авин̃н̃аан̣аниссаяабхаавзна сад̣̇д̣̇асаванз. аж̇адаагаасоби ваддад̇ийд̇и зд̇асса адтагат̇аад̇хиббааязна ад̇т̇ам̣ вад̣̇анд̇о ‘‘анд̇олзн̣асми’’нд̇иаад̣̇имааха. ад̇д̇ано ад̇хиббааязна вад̣̇анд̇о ‘‘гим̣ зд̇ааяа д̇хаммад̇ааяаа’’д̇иаад̣̇имавожа.
Kaṇṇakūpachiddeyeva pavattanato ārammaṇaggahaṇahetuto ca tattheva ‘‘ajjhāsayaṃ karotī’’ti vuttaṃ. Tassa sotassa sotaviññāṇanissayabhāvena saddasavane. Ajaṭākāsopi vaṭṭatīti etassa aṭṭhakathādhippāyena atthaṃ vadanto ‘‘antoleṇasmi’’ntiādimāha. Attano adhippāyena vadanto ‘‘kiṃ etāya dhammatāyā’’tiādimavoca.
ваад̇уубаниссаяо г̇анд̇хо г̇ожаро зд̇ассаад̇и ваад̇уубаниссаяаг̇анд̇хаг̇ожарам̣. зд̇т̇а жа г̇анд̇хаг̇г̇ахан̣асса ваад̇о убаниссаяо, д̇аб̣б̣охаарзна бана г̇анд̇хо ‘‘ваад̇уубаниссаяо’’д̇и вуд̇д̇о. ат̇а ваа ваад̇о зва убаниссаяо ваад̇уубаниссаяо. гассаад̇и? гхаанавин̃н̃аан̣асса. со сахагаарийбажжаяанд̇арабхууд̇о зд̇асса ад̇т̇ийд̇и ваад̇уубаниссаяо, г̇анд̇хо бажжаяо.
Vātūpanissayo gandho gocaro etassāti vātūpanissayagandhagocaraṃ. Ettha ca gandhaggahaṇassa vāto upanissayo, tabbohārena pana gandho ‘‘vātūpanissayo’’ti vutto. Atha vā vāto eva upanissayo vātūpanissayo. Kassāti? Ghānaviññāṇassa. So sahakārīpaccayantarabhūto etassa atthīti vātūpanissayo, gandho paccayo.
аабо жа сахагаарийбажжаяанд̇арабхууд̇о кзл̣аад̣̇иго. д̇ат̇аа бат̇авий. г̇ахзд̇аб̣б̣асса хи подтаб̣б̣асса уббийл̣ияамаанасса аад̇хаарабхууд̇аа бат̇авий гааяасса жа подтаб̣б̣зна уббийл̣ияамаанасса ниссаяабхууд̇аанам̣ аад̇хаарабхууд̇аа саб̣б̣ад̣̇аа подтаб̣б̣аг̇ахан̣асса убаниссаяод̇и. уббийл̣анзна бана винаа подтаб̣б̣аг̇ахан̣з гааяааяад̇анасса ниссаяабхууд̇аа бат̇авий убаниссаяод̇и д̣̇адтаб̣б̣аа. саб̣б̣ад̣̇ааби жа д̇ассаа убаниссаяабхааво яуд̇д̇о зва.
Āpo ca sahakārīpaccayantarabhūto kheḷādiko. Tathā pathavī. Gahetabbassa hi phoṭṭhabbassa uppīḷiyamānassa ādhārabhūtā pathavī kāyassa ca phoṭṭhabbena uppīḷiyamānassa nissayabhūtānaṃ ādhārabhūtā sabbadā phoṭṭhabbagahaṇassa upanissayoti. Uppīḷanena pana vinā phoṭṭhabbagahaṇe kāyāyatanassa nissayabhūtā pathavī upanissayoti daṭṭhabbā. Sabbadāpi ca tassā upanissayabhāvo yutto eva.
бан̃жаван̣н̣аананд̇и важанам̣ д̇ад̣̇аад̇хаараанам̣ суд̇д̇аанам̣ наанад̇д̇ад̣̇ассанад̇т̇ам̣. бан̃жаббагаараа бан̃жаван̣н̣аа. зганд̇ад̇од̇и ид̣̇ам̣ саб̣б̣ад̣̇аа уббийл̣анзна виниб̣бхуж̇ж̇ид̇ум̣ асаггун̣зяяаанам̣ галаабанд̇араруубаанам̣ саб̣бхааваа д̇зсам̣ нивад̇д̇анад̇т̇ам̣ вуд̇д̇ам̣. на хи д̇аани зганд̇зна авинибхуд̇д̇аани галаабанд̇араг̇ад̇ад̇д̇аад̇и.
Pañcavaṇṇānanti vacanaṃ tadādhārānaṃ suttānaṃ nānattadassanatthaṃ. Pañcappakārā pañcavaṇṇā. Ekantatoti idaṃ sabbadā uppīḷanena vinibbhujjituṃ asakkuṇeyyānaṃ kalāpantararūpānaṃ sabbhāvā tesaṃ nivattanatthaṃ vuttaṃ. Na hi tāni ekantena avinibhuttāni kalāpantaragatattāti.
616. ван̣н̣анибхаад̇и руубааяад̇анамзва нид̣̇д̣̇идтанд̇и д̇ад̣̇зва абзгкид̇ваа ‘‘санид̣̇ассана’’нд̇и набум̣саганид̣̇д̣̇зсо гад̇о. д̇асмаад̇и ниббарияааяаруубаанам̣ нийлаад̣̇ийнам̣ пусид̇ваа аж̇аанид̇аб̣б̣ад̇о д̣̇ийгхаад̣̇ийнан̃жа пусид̇ваа ж̇аанид̇аб̣б̣ад̇о на ниббарияааязна д̣̇ийгхам̣ руубааяад̇анам̣. д̇ам̣ д̇ам̣ ниссааяаад̇и д̣̇ийгхаад̣̇исаннивзсам̣ бхууд̇асамуд̣̇ааяам̣ ниссааяа. д̇ат̇аа д̇ат̇аа тид̇анд̇и д̣̇ийгхаад̣̇исаннивзсзна тид̇ам̣ ван̣н̣асамуд̣̇ааяабхууд̇ам̣ руубааяад̇анамзва д̣̇ийгхаад̣̇ивохаарзна бхаасид̇ам̣. ан̃н̃аман̃н̃абарижчиннам̣ згасмим̣ ид̇арасса абхааваа. висаяаг̇ожараанам̣ висзсо анан̃н̃ад̇т̇абхааво д̇аб̣б̣ахулажаарид̇аа жа жагкувин̃н̃аан̣асса.
616. Vaṇṇanibhāti rūpāyatanameva niddiṭṭhanti tadeva apekkhitvā ‘‘sanidassana’’nti napuṃsakaniddeso kato. Tasmāti nippariyāyarūpānaṃ nīlādīnaṃ phusitvā ajānitabbato dīghādīnañca phusitvā jānitabbato na nippariyāyena dīghaṃ rūpāyatanaṃ. Taṃ taṃ nissāyāti dīghādisannivesaṃ bhūtasamudāyaṃ nissāya. Tathā tathā ṭhitanti dīghādisannivesena ṭhitaṃ vaṇṇasamudāyabhūtaṃ rūpāyatanameva dīghādivohārena bhāsitaṃ. Aññamaññaparicchinnaṃ ekasmiṃ itarassa abhāvā. Visayagocarānaṃ viseso anaññatthabhāvo tabbahulacāritā ca cakkhuviññāṇassa.
620. бхзрисад̣̇д̣̇аад̣̇ийнан̃жа ваад̣̇ид̇асад̣̇д̣̇ад̇д̇аа ‘‘вуд̇д̇аавасзсаана’’нд̇и ааха. амануссаважанзна на мануссзхи ан̃н̃з баан̣ино зва г̇ахид̇аа, ат̇а ко гадтаад̣̇аяобийд̇и ад̇хиббааязна ‘‘сзсо саб̣б̣обий’’д̇и ааха. звам̣ санд̇зби вад̇т̇увисзсагид̇д̇анавасзна баал̣ияам̣ анааг̇ад̇о д̇ат̇аа гид̇д̇зд̇аб̣б̣о яз ваа банаад̇и вуд̇д̇од̇и ад̇хиббааяо.
620. Bherisaddādīnañca vāditasaddattā ‘‘vuttāvasesāna’’nti āha. Amanussavacanena na manussehi aññe pāṇino eva gahitā, atha kho kaṭṭhādayopīti adhippāyena ‘‘seso sabbopī’’ti āha. Evaṃ santepi vatthuvisesakittanavasena pāḷiyaṃ anāgato tathā kittetabbo ye vā panāti vuttoti adhippāyo.
624. виссаг̇анд̇ход̇и вируубо мам̣саад̣̇иг̇анд̇хо. ламб̣иланд̇и мад̇хурамб̣илам̣.
624. Vissagandhoti virūpo maṃsādigandho. Lambilanti madhurambilaṃ.
632. сан̃ж̇аананд̇и зд̇знаад̇и сан̃ж̇аананам̣, убалагкан̣ам̣. сагзна сагзна гаммажид̇д̇аад̣̇инаа бажжаязна самудтид̇ааниби ид̇т̇илин̇г̇аад̣̇ийни инд̣̇рияасахид̇з сарийрз уббаж̇ж̇амаанаани д̇ам̣д̇ад̣̇аагаараани худ̇ваа уббаж̇ж̇анд̇ийд̇и ‘‘ид̇т̇инд̣̇рияам̣ бадижжа самудтаханд̇ий’’д̇и вуд̇д̇аани. ид̇т̇илин̇г̇аад̣̇ийсу зва жа ад̇хибад̇ибхааваа зд̇асса инд̣̇рияад̇аа вуд̇д̇аа, инд̣̇рияасахид̇з санд̇аанз ид̇т̇илин̇г̇аад̣̇иаагаараруубабажжаяаанам̣ ан̃н̃ат̇аа ануббаад̣̇анад̇о ид̇т̇иг̇г̇ахан̣асса жа д̇зсам̣ руубаанам̣ бажжаяабхаавад̇о. яасмаа бана бхаавад̣̇асагзби руубаанам̣ ид̇т̇инд̣̇рияам̣ на ж̇анагам̣, нааби анубаалагам̣ убад̇т̇амбхагам̣ ваа, на жа ан̃н̃агалаабаруубаанам̣, д̇асмаа д̇ам̣ ж̇ийвид̇инд̣̇рияам̣ вияа сагалаабаруубаанам̣ аахааро вияа ваа галаабанд̇араруубаанан̃жа инд̣̇рияаад̇т̇иавиг̇ад̇абажжаяод̇и на вуд̇д̇ам̣. зса наяо бурисинд̣̇риязби. лин̇г̇аад̣̇иаагаарзсу руубзсу руубааяад̇анасса жагкувин̃н̃зяяад̇д̇аа лин̇г̇аад̣̇ийнам̣ жагкувин̃н̃зяяад̇аа вуд̇д̇аа.
632. Sañjānanti etenāti sañjānanaṃ, upalakkhaṇaṃ. Sakena sakena kammacittādinā paccayena samuṭṭhitānipi itthiliṅgādīni indriyasahite sarīre uppajjamānāni taṃtadākārāni hutvā uppajjantīti ‘‘itthindriyaṃ paṭicca samuṭṭhahantī’’ti vuttāni. Itthiliṅgādīsu eva ca adhipatibhāvā etassa indriyatā vuttā, indriyasahite santāne itthiliṅgādiākārarūpapaccayānaṃ aññathā anuppādanato itthiggahaṇassa ca tesaṃ rūpānaṃ paccayabhāvato. Yasmā pana bhāvadasakepi rūpānaṃ itthindriyaṃ na janakaṃ, nāpi anupālakaṃ upatthambhakaṃ vā, na ca aññakalāparūpānaṃ, tasmā taṃ jīvitindriyaṃ viya sakalāparūpānaṃ āhāro viya vā kalāpantararūpānañca indriyaatthiavigatapaccayoti na vuttaṃ. Esa nayo purisindriyepi. Liṅgādiākāresu rūpesu rūpāyatanassa cakkhuviññeyyattā liṅgādīnaṃ cakkhuviññeyyatā vuttā.
633. убхаяамби…бз… гусалзна бад̇идтаад̇ийд̇и суг̇ад̇им̣ санд̇хааяа вуд̇д̇анд̇и взд̣̇ид̇аб̣б̣ам̣. д̣̇уг̇г̇ад̇ияан̃хи бадисанд̇хи агусалзнзваад̇и д̇ад̣̇аа уббаж̇ж̇амаано бхаавоби агусалзнзва бхавзяяа, бадисанд̇хияам̣ вияа бавад̇д̇збийд̇и. д̇аяид̣̇ам̣ д̣̇ваяам̣ яасмаа санд̇аанз саха на бавад̇д̇ад̇и ‘‘яасса ид̇т̇инд̣̇рияам̣ уббаж̇ж̇ад̇и, д̇асса бурисинд̣̇рияам̣ уббаж̇ж̇ад̇ийд̇и? но’’д̇иаад̣̇иважанад̇о (яама. 3.инд̣̇рияаяамага.188), д̇асмаа убхад̇об̣яан̃ж̇анагассаби згамзвинд̣̇рияам̣ ход̇ийд̇и вуд̇д̇ам̣.
633. Ubhayampi…pe… kusalena patiṭṭhātīti sugatiṃ sandhāya vuttanti veditabbaṃ. Duggatiyañhi paṭisandhi akusalenevāti tadā uppajjamāno bhāvopi akusaleneva bhaveyya, paṭisandhiyaṃ viya pavattepīti. Tayidaṃ dvayaṃ yasmā santāne saha na pavattati ‘‘yassa itthindriyaṃ uppajjati, tassa purisindriyaṃ uppajjatīti? No’’tiādivacanato (yama. 3.indriyayamaka.188), tasmā ubhatobyañjanakassapi ekamevindriyaṃ hotīti vuttaṃ.
635. зганд̇ам̣ гааяавин̃н̃ад̇д̇ияам̣ гааяавохаарасса бавад̇д̇ид̣̇ассанад̇т̇ам̣ ‘‘гааязна сам̣варо саад̇хуу’’д̇и (д̇ха. ба. 361; сам̣. ни. 1.116) саад̇хагасуд̇д̇ам̣ аахадам̣. бхаавасса г̇аманам̣ багаасанам̣ жобанам̣. т̇амбханаад̇и вааяод̇хаад̇уад̇хигаанам̣ бхууд̇аанам̣ т̇амбханаагааро вин̃н̃ад̇д̇ийд̇и ад̇т̇о. уд̣̇д̇хан̇г̇амаваад̇аад̣̇аяо вияа хи яо ваад̇аад̇хиго галаабо, д̇ад̇т̇а бхууд̇аанам̣ вин̃н̃ад̇д̇иаагаарад̇аа ход̇ийд̇и. д̇знзва ‘‘гааяам̣ т̇амбхзд̇ваа т̇ад̣̇д̇хам̣ гарод̇ийд̇и т̇амбханаа’’д̇и вааяод̇хаад̇угижжавасзна вин̃н̃ад̇д̇и вуд̇д̇аа. д̇ад̇о зва жа ‘‘вааяод̇хаад̇уяаа аагааро гааяавин̃н̃ад̇д̇ий’’д̇и жа вад̇д̇ум̣ ваддад̇и, д̇ат̇аа ‘‘бат̇авийд̇хаад̇уяаа важийвин̃н̃ад̇д̇ий’’д̇и бат̇авийд̇хаад̇уад̇хигабхууд̇авигаарад̇о.
635. Ekantaṃ kāyaviññattiyaṃ kāyavohārassa pavattidassanatthaṃ ‘‘kāyena saṃvaro sādhū’’ti (dha. pa. 361; saṃ. ni. 1.116) sādhakasuttaṃ āhaṭaṃ. Bhāvassa gamanaṃ pakāsanaṃ copanaṃ. Thambhanāti vāyodhātuadhikānaṃ bhūtānaṃ thambhanākāro viññattīti attho. Uddhaṅgamavātādayo viya hi yo vātādhiko kalāpo, tattha bhūtānaṃ viññattiākāratā hotīti. Teneva ‘‘kāyaṃ thambhetvā thaddhaṃ karotīti thambhanā’’ti vāyodhātukiccavasena viññatti vuttā. Tato eva ca ‘‘vāyodhātuyā ākāro kāyaviññattī’’ti ca vattuṃ vaṭṭati, tathā ‘‘pathavīdhātuyā vacīviññattī’’ti pathavīdhātuadhikabhūtavikārato.
636. бабхзд̣̇аг̇ад̇аа ваажаа зваад̇и д̇исса пуссаад̇и бабхзд̣̇аг̇ад̇аа. ат̇а ваа важийсан̇каарзхи вид̇аггавижаарзхи бариг̇г̇ахид̇аа саванависаяабхаавам̣ анубанийд̇ад̇ааяа абхиннаа д̇аб̣бхаавам̣ нийяамаанаа ваажаа ‘‘важийбхзд̣̇о’’д̇и вужжад̇и. ирияаабат̇амби убад̇т̇амбхзнд̇ийд̇и яат̇аабавад̇д̇ам̣ ирияаабат̇ам̣ убад̇т̇амбхзнд̇и. яат̇аа хи аб̣б̣огин̣н̣з бхаван̇г̇з вад̇д̇амаанз ан̇г̇аани осийд̣̇анд̇и бавидтаани вияа хонд̇и, на звам̣ ‘‘д̣̇вад̇д̇им̣са чаб̣б̣ийсаа’’д̇и вуд̇д̇зсу ж̇ааг̇аран̣ажид̇д̇зсу вад̇д̇амаанзсу. д̇зсу бана вад̇д̇амаанзсу ан̇г̇аани убад̇т̇ад̣̇д̇хаани яат̇аабавад̇д̇ирияаабат̇абхаавзнзва бавад̇д̇анд̇ийд̇и. кийн̣аасаваанам̣ жуд̇ижид̇д̇анд̇и висзсзд̇ваа вуд̇д̇ам̣, ‘‘гаамааважараанам̣ бажчимажид̇д̇асса уббаад̣̇агкан̣з яасса жид̇д̇асса ананд̇араа гаамааважараанам̣ бажчимажид̇д̇ам̣ уббаж̇ж̇иссад̇и, руубааважарз аруубааважарз бажчимабхавигаанам̣, яз жа руубааважарам̣ аруубааважарам̣ убабаж̇ж̇ид̇ваа бариниб̣б̣ааяиссанд̇и, д̇зсам̣ жаванд̇аанам̣ д̇зсам̣ важийсан̇кааро нируж̇жхиссад̇и, но жа д̇зсам̣ гааяасан̇кааро нируж̇жхиссад̇ий’’д̇и (яама. 2.сан̇каараяамага.88) бана важанад̇о ан̃н̃зсамби жуд̇ижид̇д̇ам̣ руубам̣ на самудтаабзд̇ийд̇и вин̃н̃ааяад̇и. на хи руубасамудтаабагажид̇д̇асса г̇аб̣бхаг̇аманаад̣̇ивиниб̣ад̣̇д̇хаабхаавзна гааяасан̇каараасамудтаабанам̣ ад̇т̇и, на жа яуд̇д̇ам̣ ‘‘жуд̇о жа жид̇д̇асамудтаанан̃жасса бавад̇д̇ад̇ий’’д̇и, нааби ‘‘жуд̇ижид̇д̇ам̣ руубам̣ самудтаабзд̇ий’’д̇и баал̣и ад̇т̇ийд̇и.
636. Pabhedagatā vācā evāti tissa phussāti pabhedagatā. Atha vā vacīsaṅkhārehi vitakkavicārehi pariggahitā savanavisayabhāvaṃ anupanītatāya abhinnā tabbhāvaṃ nīyamānā vācā ‘‘vacībhedo’’ti vuccati. Iriyāpathampi upatthambhentīti yathāpavattaṃ iriyāpathaṃ upatthambhenti. Yathā hi abbokiṇṇe bhavaṅge vattamāne aṅgāni osīdanti paviṭṭhāni viya honti, na evaṃ ‘‘dvattiṃsa chabbīsā’’ti vuttesu jāgaraṇacittesu vattamānesu. Tesu pana vattamānesu aṅgāni upatthaddhāni yathāpavattiriyāpathabhāveneva pavattantīti. Khīṇāsavānaṃ cuticittanti visesetvā vuttaṃ, ‘‘kāmāvacarānaṃ pacchimacittassa uppādakkhaṇe yassa cittassa anantarā kāmāvacarānaṃ pacchimacittaṃ uppajjissati, rūpāvacare arūpāvacare pacchimabhavikānaṃ, ye ca rūpāvacaraṃ arūpāvacaraṃ upapajjitvā parinibbāyissanti, tesaṃ cavantānaṃ tesaṃ vacīsaṅkhāro nirujjhissati, no ca tesaṃ kāyasaṅkhāro nirujjhissatī’’ti (yama. 2.saṅkhārayamaka.88) pana vacanato aññesampi cuticittaṃ rūpaṃ na samuṭṭhāpetīti viññāyati. Na hi rūpasamuṭṭhāpakacittassa gabbhagamanādivinibaddhābhāvena kāyasaṅkhārāsamuṭṭhāpanaṃ atthi, na ca yuttaṃ ‘‘cuto ca cittasamuṭṭhānañcassa pavattatī’’ti, nāpi ‘‘cuticittaṃ rūpaṃ samuṭṭhāpetī’’ti pāḷi atthīti.
637. на гассад̇ийд̇и на вилзкияад̇и. г̇ад̇анд̇и вин̃н̃аад̇ам̣. асампудтам̣ жад̇уухи махаабхууд̇зхийд̇и яасмим̣ галаабз бхууд̇аанам̣ барижчзд̣̇о, д̇зхзва асампудтам̣. виж̇ж̇амаанзби хи галаабанд̇арабхууд̇аанам̣ галаабанд̇арабхууд̇асампудтабхаавз д̇ам̣д̇ам̣бхууд̇авивид̇д̇ад̇аа руубабарияанд̇о аагаасод̇и язсам̣ яо барижчзд̣̇о, д̇зхи со асампудтова, ан̃н̃ат̇аа барижчиннабхааво на сияаа д̇зсам̣ бхууд̇аанам̣ б̣яаабид̇абхааваабад̇д̇ид̇о. аб̣яаабид̇аа хи асампудтад̇аад̇и.
637. Na kassatīti na vilekhiyati. Gatanti viññātaṃ. Asamphuṭṭhaṃ catūhi mahābhūtehīti yasmiṃ kalāpe bhūtānaṃ paricchedo, teheva asamphuṭṭhaṃ. Vijjamānepi hi kalāpantarabhūtānaṃ kalāpantarabhūtasamphuṭṭhabhāve taṃtaṃbhūtavivittatā rūpapariyanto ākāsoti yesaṃ yo paricchedo, tehi so asamphuṭṭhova, aññathā paricchinnabhāvo na siyā tesaṃ bhūtānaṃ byāpitabhāvāpattito. Abyāpitā hi asamphuṭṭhatāti.
638. лахуд̇аад̣̇ийнам̣ ан̃н̃аман̃н̃аавиж̇аханзна д̣̇уб̣б̣ин̃н̃зяяанаанад̇д̇ад̇аа вуд̇д̇аад̇и д̇ам̣д̇ам̣вигаараад̇хигаруубзхи д̇ам̣д̇ам̣наанад̇д̇аббагаасанад̇т̇ам̣ ‘‘звам̣ санд̇збий’’д̇иаад̣̇имааха. яат̇аавуд̇д̇аа жа бажжаяаа д̇ам̣д̇ам̣вигаарасса висзсабажжаяабхаавад̇о вуд̇д̇аа, ависзсзна бана саб̣б̣з саб̣б̣зсам̣ бажжаяаад̇и.
638. Lahutādīnaṃ aññamaññāvijahanena dubbiññeyyanānattatā vuttāti taṃtaṃvikārādhikarūpehi taṃtaṃnānattappakāsanatthaṃ ‘‘evaṃ santepī’’tiādimāha. Yathāvuttā ca paccayā taṃtaṃvikārassa visesapaccayabhāvato vuttā, avisesena pana sabbe sabbesaṃ paccayāti.
641. аад̣̇ид̇о жаяо аажаяо, батамуббад̇д̇и. убари жаяо убажаяо. баб̣анд̇хо санд̇ад̇и. д̇ад̇т̇а уд̣̇д̣̇зсз авуд̇д̇оби аажаяо убажаяасад̣̇д̣̇знзва вин̃н̃ааяад̇ийд̇и ‘‘яо ааяад̇анаанам̣ аажаяо бунаббунам̣ ниб̣б̣ад̇д̇амаанаанам̣, сова руубасса убажаяо’’д̇и ааха. баал̣ияам̣ бана уба-сад̣̇д̣̇о батамад̇т̇о убариад̇т̇о жа ход̇ийд̇и ‘‘аад̣̇ижаяо убажаяо, убарижаяо санд̇ад̇ий’’д̇и аяамад̇т̇о вин̃н̃ааяад̇ийд̇и. ан̃н̃ат̇аа хи аажаяасан̇каад̇асса батамуббаад̣̇асса авуд̇д̇ад̇аа аабаж̇ж̇зяяа.
641. Ādito cayo ācayo, paṭhamuppatti. Upari cayo upacayo. Pabandho santati. Tattha uddese avuttopi ācayo upacayasaddeneva viññāyatīti ‘‘yo āyatanānaṃ ācayo punappunaṃ nibbattamānānaṃ, sova rūpassa upacayo’’ti āha. Pāḷiyaṃ pana upa-saddo paṭhamattho upariattho ca hotīti ‘‘ādicayo upacayo, uparicayo santatī’’ti ayamattho viññāyatīti. Aññathā hi ācayasaṅkhātassa paṭhamuppādassa avuttatā āpajjeyya.
званд̇и ‘‘яо ааяад̇анаанам̣ аажаяо’’д̇иаад̣̇инид̣̇д̣̇зсзна гим̣ гат̇ид̇ам̣ ход̇и? ааяад̇анзна аажаяо гат̇ид̇о. аажаяуубажаяасанд̇ад̇ияо хи ниб̣б̣ад̇д̇ибхаавзна аажаяо зваад̇и ааяад̇анзхи аажаяаад̣̇ийнам̣ багаасид̇ад̇д̇аа д̇зхи аажаяо гат̇ид̇о. ааяад̇анаанам̣ аажаяаад̣̇иважанзнзва аажаяасабхааваани уббаад̣̇ад̇хаммаани ааяад̇анаанийд̇и аажаязна д̇ам̣багад̇игаани ааяад̇анаани гат̇ид̇аани. лагкан̣ан̃хи уббаад̣̇о, на руубаруубанд̇и. д̇знзваад̇хиббааязнааха ‘‘ааяад̇анамзва гат̇ид̇а’’нд̇и. аажаяан̃хи лагкан̣ам̣ гат̇аяанд̇зна д̇ам̣лагкан̣аани ааяад̇анаанзва гат̇ид̇аани хонд̇ийд̇и. звамби гим̣ гат̇ид̇ам̣ ход̇ийд̇и ааяад̇анаажаязхи аажаяааяад̇анзхи аажаяамзва ааяад̇анамзва гат̇знд̇зна уд̣̇д̣̇зсз нид̣̇д̣̇зсз жа аажаяод̇и ид̣̇амзва авад̇ваа убажаяасанд̇ад̇ияо уд̣̇д̣̇исид̇ваа д̇зсам̣ вибхаж̇анавасзна ааяад̇анзна аажаяагат̇анаад̣̇инаа гим̣ гат̇ид̇ам̣ ход̇ийд̇и ад̇хиббааяо. аажаяод̇и убажаяамааха, убажаяод̇и жа санд̇ад̇им̣. д̇ад̣̇звубхаяам̣ яат̇ааггамам̣ виваранд̇о ‘‘ниб̣б̣ад̇д̇и вад̣дхи гат̇ид̇аа’’д̇и ааха. убажаяасанд̇ад̇ияо хи ад̇т̇ад̇о згад̇д̇аа аажаяоваад̇и д̇ад̣̇уд̣̇д̣̇зсавибхаж̇анавасзна ааяад̇анзна аажаяагат̇анаад̣̇инаа ниб̣б̣ад̇д̇ивад̣дхиаагааранаанад̇д̇ам̣ аажаяасса гат̇ид̇анд̇и ад̇т̇о. имамзвад̇т̇ам̣ вибхаавзд̇ум̣ ‘‘ад̇т̇ад̇о хий’’д̇иаад̣̇имааха. яасмаа жа убхаяамби зд̇ам̣ ж̇аад̇ируубассзваад̇хиважанам̣, д̇асмаа ж̇аад̇ируубасса лагкан̣аад̣̇ивисзсзсу аажаяаад̣̇ийсу бавад̇д̇иаад̣̇ийсу жа аажаяаад̣̇илагкан̣аад̣̇иго убажаяо, бавад̇д̇иаад̣̇илагкан̣аад̣̇игаа санд̇ад̇ийд̇и взд̣̇ид̇аб̣б̣аад̇и ад̇т̇о.
Evanti ‘‘yo āyatanānaṃ ācayo’’tiādiniddesena kiṃ kathitaṃ hoti? Āyatanena ācayo kathito. Ācayūpacayasantatiyo hi nibbattibhāvena ācayo evāti āyatanehi ācayādīnaṃ pakāsitattā tehi ācayo kathito. Āyatanānaṃ ācayādivacaneneva ācayasabhāvāni uppādadhammāni āyatanānīti ācayena taṃpakatikāni āyatanāni kathitāni. Lakkhaṇañhi uppādo, na rūparūpanti. Tenevādhippāyenāha ‘‘āyatanameva kathita’’nti. Ācayañhi lakkhaṇaṃ kathayantena taṃlakkhaṇāni āyatanāneva kathitāni hontīti. Evampi kiṃ kathitaṃ hotīti āyatanācayehi ācayāyatanehi ācayameva āyatanameva kathentena uddese niddese ca ācayoti idameva avatvā upacayasantatiyo uddisitvā tesaṃ vibhajanavasena āyatanena ācayakathanādinā kiṃ kathitaṃ hotīti adhippāyo. Ācayoti upacayamāha, upacayoti ca santatiṃ. Tadevubhayaṃ yathākkamaṃ vivaranto ‘‘nibbatti vaḍḍhi kathitā’’ti āha. Upacayasantatiyo hi atthato ekattā ācayovāti taduddesavibhajanavasena āyatanena ācayakathanādinā nibbattivaḍḍhiākāranānattaṃ ācayassa kathitanti attho. Imamevatthaṃ vibhāvetuṃ ‘‘atthato hī’’tiādimāha. Yasmā ca ubhayampi etaṃ jātirūpassevādhivacanaṃ, tasmā jātirūpassa lakkhaṇādivisesesu ācayādīsu pavattiādīsu ca ācayādilakkhaṇādiko upacayo, pavattiādilakkhaṇādikā santatīti veditabbāti attho.
643. багад̇инид̣̇д̣̇зсаад̇и палавибажжанабагад̇ияаа нид̣̇д̣̇зсаа, ж̇арааяа баабун̣ид̇аб̣б̣ам̣ паламзва ваа багад̇и. на жа кан̣д̣ижжаад̣̇ийнзва ж̇араад̇и галалагаалад̇о бабхуд̇и буримаруубаанам̣ ж̇араабад̇д̇агкан̣з уббаж̇ж̇амаанаани бажчимаруубаани барибаггаруубаануруубаани барин̣ад̇абарин̣ад̇аани уббаж̇ж̇анд̇ийд̇и ануггамзна субарин̣ад̇аруубабарибаагагаалз уббаж̇ж̇амаанаани кан̣д̣ижжаад̣̇исабхааваани уббаж̇ж̇анд̇и. д̇аани уд̣̇агаад̣̇имаг̇г̇зсу д̇ин̣аругкасам̣бхаг̇г̇ад̇аад̣̇аяо вияа барибаагаг̇ад̇амаг̇г̇асан̇каад̇зсу барибаггаруубзсу уббаннаани ж̇арааяа г̇ад̇амаг̇г̇оижжзва вуд̇д̇аани, на ж̇араад̇и. авин̃н̃ааяамаананд̇араж̇араа авийжиж̇араа. маран̣з убанаяанарасаа.
643. Pakatiniddesāti phalavipaccanapakatiyā niddesā, jarāya pāpuṇitabbaṃ phalameva vā pakati. Na ca khaṇḍiccādīneva jarāti kalalakālato pabhuti purimarūpānaṃ jarāpattakkhaṇe uppajjamānāni pacchimarūpāni paripakkarūpānurūpāni pariṇatapariṇatāni uppajjantīti anukkamena supariṇatarūpaparipākakāle uppajjamānāni khaṇḍiccādisabhāvāni uppajjanti. Tāni udakādimaggesu tiṇarukkhasaṃbhaggatādayo viya paripākagatamaggasaṅkhātesu paripakkarūpesu uppannāni jarāya gatamaggoicceva vuttāni, na jarāti. Aviññāyamānantarajarā avīcijarā. Maraṇe upanayanarasā.
644. д̇ам̣ бад̇ваад̇и д̇ам̣ ад̇д̇ано зва каяаваяасан̇каад̇ам̣ сабхаавам̣ бад̇ваа руубам̣ кийяад̇и взд̇и бхиж̇ж̇ад̇и. бот̇зд̇ваа баад̇ид̇асса д̣̇уб̣б̣алад̇аа бараад̇хийнад̇аа саяанабарааяан̣ад̇аа жа ход̇и, д̇ат̇аа ж̇араабхибхууд̇ассаад̇и бот̇агасад̣̇исий ж̇араа.
644. Taṃ patvāti taṃ attano eva khayavayasaṅkhātaṃ sabhāvaṃ patvā rūpaṃ khīyati veti bhijjati. Pothetvā pātitassa dubbalatā parādhīnatā sayanaparāyaṇatā ca hoti, tathā jarābhibhūtassāti pothakasadisī jarā.
645. гад̇д̇аб̣б̣ад̇од̇и гад̇д̇аб̣б̣асабхаавад̇о. висаан̣аад̣̇ийнам̣ д̇аражчакзл̣ад̇змид̇аанам̣ баасаан̣аанам̣ вияа т̇ад̣̇д̇хабхааваабхаавад̇о ахивижчигаанам̣ вияа сависад̇д̇аабхаавад̇о жа сукумад̇аа вуд̇д̇аа. ож̇аалагкан̣од̇и зд̇т̇а ан̇г̇аман̇г̇аанусаарино расасса сааро убад̇т̇амбхаб̣алагааро бхууд̇аниссид̇о зго висзсо ож̇аад̇и.
645. Kattabbatoti kattabbasabhāvato. Visāṇādīnaṃ taracchakheḷatemitānaṃ pāsāṇānaṃ viya thaddhabhāvābhāvato ahivicchikānaṃ viya savisattābhāvato ca sukhumatā vuttā. Ojālakkhaṇoti ettha aṅgamaṅgānusārino rasassa sāro upatthambhabalakāro bhūtanissito eko viseso ojāti.
убаад̣̇аабхааж̇анийяагат̇ааван̣н̣анаа нидтид̇аа.
Upādābhājanīyakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаммасан̇г̇ан̣ийбаал̣и • Dhammasaṅgaṇīpāḷi / руубавибхад̇д̇и • Rūpavibhatti
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā / убаад̣̇аабхааж̇анийяагат̇аа • Upādābhājanīyakathā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-анудийгаа • Dhammasaṅgaṇī-anuṭīkā / убаад̣̇аабхааж̇анийяаван̣н̣анаа • Upādābhājanīyavaṇṇanā
