| Library / Tipiṭaka / তিপিটক • Tipiṭaka / ধম্মসঙ্গণী-অনুটীকা • Dhammasaṅgaṇī-anuṭīkā |
দুকনিদ্দেসো
Dukaniddeso
উপাদাভাজনীযৰণ্ণনা
Upādābhājanīyavaṇṇanā
৫৯৬. সমন্ততো সব্বসো দস্সনট্ঠেন চক্খু সমন্তচক্খূতি ইমমত্থং দস্সেতুং ‘‘সব্বসঙ্খতাসঙ্খতদস্সন’’ন্তি ৰুত্তং। এৰমাদিনাতি এত্থ আদি-সদ্দো ‘‘দুক্খং পরিঞ্ঞেয্যং পরিঞ্ঞাত’’ন্তি তীসুপি পদেসু পচ্চেকং যোজেতব্বো। ‘‘ইদং দুক্খন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদী’’তিআদিনা (মহাৰ॰ ১৫; পটি॰ ম॰ ২.৩০) হি পাল়ি পৰত্তাতি। আকারেনাতি দ্ৰাদসৰিধেন আকারেন। তম্পি কামাৰচরং ৰিপস্সনাপচ্চৰেক্খণঞাণভাৰতো। ‘‘ঞাণচক্খু সহঅরিযমগ্গং ৰিপস্সনাঞাণন্তিপি যুজ্জতী’’তি ৰদন্তি। অগ্গমগ্গেন পন সহ ৰিপস্সনা পচ্চৰেক্খণঞাণন্তি যুত্তং ৰিয দিস্সতি।
596. Samantato sabbaso dassanaṭṭhena cakkhu samantacakkhūti imamatthaṃ dassetuṃ ‘‘sabbasaṅkhatāsaṅkhatadassana’’nti vuttaṃ. Evamādināti ettha ādi-saddo ‘‘dukkhaṃ pariññeyyaṃ pariññāta’’nti tīsupi padesu paccekaṃ yojetabbo. ‘‘Idaṃ dukkhanti me, bhikkhave, pubbe ananussutesu dhammesu cakkhuṃ udapādi, ñāṇaṃ udapādī’’tiādinā (mahāva. 15; paṭi. ma. 2.30) hi pāḷi pavattāti. Ākārenāti dvādasavidhena ākārena. Tampi kāmāvacaraṃ vipassanāpaccavekkhaṇañāṇabhāvato. ‘‘Ñāṇacakkhu sahaariyamaggaṃ vipassanāñāṇantipi yujjatī’’ti vadanti. Aggamaggena pana saha vipassanā paccavekkhaṇañāṇanti yuttaṃ viya dissati.
যথাৰুত্তে মংসপিণ্ডে সসম্ভারে চক্খুৰোহারো সন্তানৰসেন পৰত্তমানে চতুসমুট্ঠানিকরূপধম্মে উপাদায পৰত্তোতি ‘‘চতু…পে॰… সম্ভারা’’তি ৰুত্তং। সণ্ঠানন্তি ৰণ্ণাযতনমেৰাতি তেন তেন আকারেন সন্নিৰিট্ঠেসু মহাভূতেসু তংতংসণ্ঠানৰসেন ৰণ্ণাযতনস্স ৰিঞ্ঞাযমানত্তা ৰুত্তং, ন ৰণ্ণাযতনস্সেৰ সণ্ঠানপঞ্ঞত্তিযা উপাদানত্তা। তথা হি অন্ধকারে ফুসিত্ৰাপি সণ্ঠানং ৰিঞ্ঞাযতীতি। তথা চ ৰক্খতি ‘‘দীঘাদীনি ফুসিত্ৰাপি সক্কা জানিতু’’ন্তি, (ধ॰ স॰ অট্ট॰ ৬১৬) ‘‘দীঘাদিসন্নিৰেসং ভূতসমুদাযং নিস্সাযা’’তি (ধ॰ স॰ মূলটী॰ ৬১৬) চ। তেসং সম্ভৰসণ্ঠানানং আপোধাতুৰণ্ণাযতনেহি অনত্থন্তরভাৰেপি তেহি ৰিসুং ৰচনং তথাভূতানং সম্ভৰভূতানং সণ্ঠানভূতানঞ্চ। এতেন আপোধাতুৰণ্ণাযতনানং ৰসেন ৰত্তমানঅৰত্থাৰিসেসো সম্ভৰো সণ্ঠানঞ্চাতি অযমত্থো দস্সিতো হোতি। তত্থ সম্ভৰো চতুসমুট্ঠানিকো সোল়সৰস্সকালে উপ্পজ্জতি। তস্স রাগৰসেন ঠানা ৰচনং হোতীতি ৰদন্তি। অতথাভূতানং ততো অঞ্ঞথাভূতানং। যথাৰুত্তে সম্ভারৰত্থুসঙ্খাতে। ৰিজ্জমানত্তাতি ভিয্যোৰুত্তিৰসেন ৰুত্তং। তথা হি খীণাসৰানং ব্রহ্মানঞ্চ সম্ভৰো নত্থীতি। আপোধাতুৰিসেসত্তা সম্ভৰো আপোধাতুসম্বন্ধী আপোধাতুতন্নিস্সযনিস্সিতোপি হোতীতি তস্স চতুধাতুনিস্সিততায অৰিরোধো ৰুত্তো।
Yathāvutte maṃsapiṇḍe sasambhāre cakkhuvohāro santānavasena pavattamāne catusamuṭṭhānikarūpadhamme upādāya pavattoti ‘‘catu…pe… sambhārā’’ti vuttaṃ. Saṇṭhānanti vaṇṇāyatanamevāti tena tena ākārena sanniviṭṭhesu mahābhūtesu taṃtaṃsaṇṭhānavasena vaṇṇāyatanassa viññāyamānattā vuttaṃ, na vaṇṇāyatanasseva saṇṭhānapaññattiyā upādānattā. Tathā hi andhakāre phusitvāpi saṇṭhānaṃ viññāyatīti. Tathā ca vakkhati ‘‘dīghādīni phusitvāpi sakkā jānitu’’nti, (dha. sa. aṭṭa. 616) ‘‘dīghādisannivesaṃ bhūtasamudāyaṃ nissāyā’’ti (dha. sa. mūlaṭī. 616) ca. Tesaṃ sambhavasaṇṭhānānaṃ āpodhātuvaṇṇāyatanehi anatthantarabhāvepi tehi visuṃ vacanaṃ tathābhūtānaṃ sambhavabhūtānaṃ saṇṭhānabhūtānañca. Etena āpodhātuvaṇṇāyatanānaṃ vasena vattamānaavatthāviseso sambhavo saṇṭhānañcāti ayamattho dassito hoti. Tattha sambhavo catusamuṭṭhāniko soḷasavassakāle uppajjati. Tassa rāgavasena ṭhānā vacanaṃ hotīti vadanti. Atathābhūtānaṃ tato aññathābhūtānaṃ. Yathāvutte sambhāravatthusaṅkhāte. Vijjamānattāti bhiyyovuttivasena vuttaṃ. Tathā hi khīṇāsavānaṃ brahmānañca sambhavo natthīti. Āpodhātuvisesattā sambhavo āpodhātusambandhī āpodhātutannissayanissitopi hotīti tassa catudhātunissitatāya avirodho vutto.
উতুচিত্তাহারেহি উপত্থম্ভিযমানন্তি এত্থ ‘‘কলাপন্তরগতা উতুআহারা অধিপ্পেতা’’তি ৰদন্তি। অনেককলাপগতভাৰং চক্খুস্স দস্সেতি যতো উপদ্দুতপটলে নিরাকরণেপি চক্খু ৰিজ্জতীতি । পটিঘট্টনং ৰিসযাভিমুখভাৰো নিঘংসপচ্চযত্তা। নিঘংসো নিস্সযভাৰাপত্তি। যতো চক্খাদিনিস্সিতা সঞ্ঞা ‘‘পটিঘসঞ্ঞা’’তি ৰুচ্চতি।
Utucittāhārehi upatthambhiyamānanti ettha ‘‘kalāpantaragatā utuāhārā adhippetā’’ti vadanti. Anekakalāpagatabhāvaṃ cakkhussa dasseti yato upaddutapaṭale nirākaraṇepi cakkhu vijjatīti . Paṭighaṭṭanaṃ visayābhimukhabhāvo nighaṃsapaccayattā. Nighaṃso nissayabhāvāpatti. Yato cakkhādinissitā saññā ‘‘paṭighasaññā’’ti vuccati.
অনেকত্তাতি ইদং অৰচনস্স কারণং, ন হেতুকিরিযায ৰিঞ্ঞাযমানভাৰস্স। সো পন অপেক্খাসিদ্ধিতো এৰ ৰেদিতব্বো। হেতুকিরিযাপেক্খা হি ফলকিরিযাতি। চক্খুং সঙ্গণ্হাতীতি চক্খুৰিঞ্ঞাণস্স নিস্সযভাৰানুপগমনেপি তংসভাৰানতিৰত্তনতো তস্সা সমঞ্ঞায তত্থ নিরুল়্হভাৰং দস্সেতি। দস্সনপরিণাযকট্ঠো চক্খুস্স ইন্দট্ঠোযেৰাতি ‘‘যথা হি ইস্সরো’’তিআদিনা ইস্সরোপমা ৰুত্তা। চক্খুৰিঞ্ঞাণং দস্সনকিচ্চে পরিণাযন্তং চক্খু তংসহজাতে চক্খুসম্ফস্সাদযোপি তত্থ পরিণাযতীতি ৰুচ্চতীতি ‘‘তে ধম্মে…পে॰… পরিণাযতী’’তি ৰুত্তং, ন পন চক্খুসম্ফস্সাদীনং দস্সনকিচ্চত্তা। অথ ৰা চক্খুসম্ফস্সাদীনং ইন্দ্রিযপচ্চযভাৰেন উপকারকং চক্খুৰিঞ্ঞাণং দস্সনকিচ্চে পরিণাযন্তং চক্খু তত্থ চক্খুসম্ফস্সাদযোপি তদনুৰত্তকে পরিণাযতীতি অত্থাযং পরিযাযোতি দস্সেন্তো আহ ‘‘তে ধম্মে…পে॰… ণাযতী’’তি। অনেকত্থত্তা ধাতূনং চক্খতীতি ইমস্স ‘‘পরিণাযতি পকাসেতী’’তি চ অত্থা ৰুত্তা। সণ্ঠানম্পি রূপাযতনমেৰাতি ‘‘সমৰিসমানি রূপানি চক্খতীতি চক্খূ’’তি ৰুত্তং। তংদ্ৰারিকানং ফস্সাদীনং উপনিস্সযপচ্চযভাৰো এৰ ৰল়ঞ্জনত্থো।
Anekattāti idaṃ avacanassa kāraṇaṃ, na hetukiriyāya viññāyamānabhāvassa. So pana apekkhāsiddhito eva veditabbo. Hetukiriyāpekkhā hi phalakiriyāti. Cakkhuṃ saṅgaṇhātīti cakkhuviññāṇassa nissayabhāvānupagamanepi taṃsabhāvānativattanato tassā samaññāya tattha niruḷhabhāvaṃ dasseti. Dassanapariṇāyakaṭṭho cakkhussa indaṭṭhoyevāti ‘‘yathā hi issaro’’tiādinā issaropamā vuttā. Cakkhuviññāṇaṃ dassanakicce pariṇāyantaṃ cakkhu taṃsahajāte cakkhusamphassādayopi tattha pariṇāyatīti vuccatīti ‘‘te dhamme…pe… pariṇāyatī’’ti vuttaṃ, na pana cakkhusamphassādīnaṃ dassanakiccattā. Atha vā cakkhusamphassādīnaṃ indriyapaccayabhāvena upakārakaṃ cakkhuviññāṇaṃ dassanakicce pariṇāyantaṃ cakkhu tattha cakkhusamphassādayopi tadanuvattake pariṇāyatīti atthāyaṃ pariyāyoti dassento āha ‘‘te dhamme…pe… ṇāyatī’’ti. Anekatthattā dhātūnaṃ cakkhatīti imassa ‘‘pariṇāyati pakāsetī’’ti ca atthā vuttā. Saṇṭhānampi rūpāyatanamevāti ‘‘samavisamāni rūpāni cakkhatīti cakkhū’’ti vuttaṃ. Taṃdvārikānaṃ phassādīnaṃ upanissayapaccayabhāvo eva vaḷañjanattho.
৫৯৯. তংদ্ৰারিকা…পে॰… উপ্পত্তি ৰুত্তাতি চক্খুৰিঞ্ঞাণে উপ্পন্নে সম্পটিচ্ছনাদীনি বলৰারম্মণে জৰনং একন্তেন উপ্পজ্জতীতি কত্ৰা ৰুত্তং। তথা চেৰ হি অন্তরা চক্খুৰিঞ্ঞাণে ৰা সম্পটিচ্ছনে ৰা সন্তীরণে ৰা ঠত্ৰা নিৰত্তিস্সতীতি নেতং ঠানং ৰিজ্জতীতি নিচ্ছিতং। তেন পচ্চযেনাতি তংপকারেন পচ্চযেন। তংসদিসানন্তি গরুং কত্ৰা অস্সাদনাদিপ্পৰত্তিৰিসেসরহিততায দস্সনসদিসানং মনোধাতুসন্তীরণৰোট্ঠব্বনানং। পঞ্চদ্ৰারিকজৰনানং অস্সাদনাদিতো অঞ্ঞথা গরুং কত্ৰা পৰত্তি নত্থি রূপধম্মৰিসযত্তাতি ‘‘অস্সাদনাভিনন্দনভূতানী’’তি এত্তকমেৰ ৰুত্তং। মনোদ্ৰারিকজৰনপিট্ঠিৰট্টকানম্পি হি পঞ্চদ্ৰারিকজৰনানং অস্সাদনাভিনন্দনভাৰেন রূপং গরুং কত্ৰা পৰত্তি নত্থীতি ন সক্কা ৰত্তুন্তি। রূপং আরম্মণাধিপতি অকুসলস্সেৰ হোতি। তথা হি পট্ঠানে ‘‘অব্যাকতো ধম্মো অকুসলস্স ধম্মস্স অধিপতিপচ্চযেন পচ্চযো। আরম্মণাধিপতি চক্খুং গরুং কত্ৰা অস্সাদেতি অভিনন্দতী’’তিআদিনা (পট্ঠা॰ ১.১.৪১৬) রূপধম্মোপি আরম্মণাধিপতি ৰিভত্তো। ‘‘অব্যাকতো ধম্মো অব্যাকতস্স ধম্মস্স অব্যাকতো ধম্মো কুসলস্সা’’তি এত্থ পন ফলনিব্বানানেৰ আরম্মণাধিপতিভাৰেন ৰিভত্তানীতি। গণনায চ ‘‘আরম্মণআরম্মণাধিপতিউপনিস্সযপুরেজাতঅত্থিঅৰিগতন্তি এক’’ন্তি (পট্ঠা॰ ১.১.৪৪৫) ৰুত্তং। যদি কুসলস্সপি সিযা, দ্ৰেতি ৰত্তব্বং সিযাতি। তানীতি যথাৰুত্তজৰনানি পটিনিদ্দিট্ঠানি। তংসম্পযুত্তানি চাতি জৰনসম্পযুত্তানি। অঞ্ঞানি চক্খুসম্ফস্সাদীনি। যদি রূপস্স আরম্মণপচ্চযভাৰমত্তং অধিপ্পেতং, ‘‘তং রূপারম্মণেতি এতেনেৰ সিজ্ঝেয্যা’’তি এত্তকমেৰ ৰদেয্য। যস্মা পন রূপং তংদ্ৰারিকজৰনানং পচ্চযৰিসেসোপি হোতি, তস্মা তস্স ৰিসেসস্স দীপনত্থং ‘‘আরব্ভা’’তি ৰচনং ৰুত্তং সিযাতি আহ ‘‘আরম্মণপচ্চযতো অঞ্ঞপচ্চযভাৰস্সপি দীপক’’ন্তি।
599. Taṃdvārikā…pe… uppatti vuttāti cakkhuviññāṇe uppanne sampaṭicchanādīni balavārammaṇe javanaṃ ekantena uppajjatīti katvā vuttaṃ. Tathā ceva hi antarā cakkhuviññāṇe vā sampaṭicchane vā santīraṇe vā ṭhatvā nivattissatīti netaṃ ṭhānaṃ vijjatīti nicchitaṃ. Tena paccayenāti taṃpakārena paccayena. Taṃsadisānanti garuṃ katvā assādanādippavattivisesarahitatāya dassanasadisānaṃ manodhātusantīraṇavoṭṭhabbanānaṃ. Pañcadvārikajavanānaṃ assādanādito aññathā garuṃ katvā pavatti natthi rūpadhammavisayattāti ‘‘assādanābhinandanabhūtānī’’ti ettakameva vuttaṃ. Manodvārikajavanapiṭṭhivaṭṭakānampi hi pañcadvārikajavanānaṃ assādanābhinandanabhāvena rūpaṃ garuṃ katvā pavatti natthīti na sakkā vattunti. Rūpaṃ ārammaṇādhipati akusalasseva hoti. Tathā hi paṭṭhāne ‘‘abyākato dhammo akusalassa dhammassa adhipatipaccayena paccayo. Ārammaṇādhipati cakkhuṃ garuṃ katvā assādeti abhinandatī’’tiādinā (paṭṭhā. 1.1.416) rūpadhammopi ārammaṇādhipati vibhatto. ‘‘Abyākato dhammo abyākatassa dhammassa abyākato dhammo kusalassā’’ti ettha pana phalanibbānāneva ārammaṇādhipatibhāvena vibhattānīti. Gaṇanāya ca ‘‘ārammaṇaārammaṇādhipatiupanissayapurejātaatthiavigatanti eka’’nti (paṭṭhā. 1.1.445) vuttaṃ. Yadi kusalassapi siyā, dveti vattabbaṃ siyāti. Tānīti yathāvuttajavanāni paṭiniddiṭṭhāni. Taṃsampayuttāni cāti javanasampayuttāni. Aññāni cakkhusamphassādīni. Yadi rūpassa ārammaṇapaccayabhāvamattaṃ adhippetaṃ, ‘‘taṃ rūpārammaṇeti eteneva sijjheyyā’’ti ettakameva vadeyya. Yasmā pana rūpaṃ taṃdvārikajavanānaṃ paccayavisesopi hoti, tasmā tassa visesassa dīpanatthaṃ ‘‘ārabbhā’’ti vacanaṃ vuttaṃ siyāti āha ‘‘ārammaṇapaccayato aññapaccayabhāvassapi dīpaka’’nti.
৬০০. সোতৰিঞ্ঞাণপ্পৰত্তিযং সৰনকিরিযাৰোহারোতি সোতস্স সৰনকিরিযায কত্তুভাৰো সোতৰিঞ্ঞাণস্স পচ্চযভাৰেনাতি ৰুত্তং ‘‘সোতৰিঞ্ঞাণস্স নিস্সযভাৰেন সুণাতী’’তি। জীৰিতনিমিত্তমাহাররসো জীৰিতং, তস্মিং নিন্নতায তং অৰ্হাযতীতি জিৰ্হাতি এৰং সিদ্ধেন জিৰ্হা-সদ্দেন পকাসিযমানা রসাৰ্হাযনসঙ্খাতা সাযনকিরিযা লব্ভতীতি কত্ৰা ৰুত্তং ‘‘জিৰ্হাসদ্দেন ৰিঞ্ঞাযমানা কিরিযাসাযন’’ন্তি। তথা চ ৰক্খতি ‘‘জীৰিতমৰ্হাযতীতি জিৰ্হা’’তি (ৰিভ॰ অট্ঠ॰ ১৫৪)। আযোতি উপ্পত্তিদেসো। পসাদকাযস্স কাযিকানং দুক্খসুখানং নিস্সযভাৰতো ইতরেসং উপনিস্সযভাৰতো ‘‘দুক্খদুক্খৰিপরিণামদুক্খানং আযো’’তি ৰুত্তং। ব্যাপিতাযাতি ব্যাপিভাৰে, ব্যাপিভাৰেন ৰা। কাযপ্পসাদভাৰোতি কাযপ্পসাদসব্ভাৰো। অনুৰিদ্ধত্তাতি অনুযুত্তভাৰতো, সংসট্ঠভাৰতোতি অত্থো। তস্মাতি যস্মা যাৰতা ইমস্মিং কাযে উপাদিন্নকপৰত্তং নাম অত্থি, সব্বত্থ কাযাযতনং কপ্পাসপটলে স্নেহো ৰিযাতি ৰুত্তং, তস্মা। পণ্ডরসভাৰা পসাদা আপাথগতং ৰিসযং ৰিঞ্ঞাণুপ্পত্তিহেতুভাৰেন পকাসেন্তা ৰিয হোন্তীতি তেসং ৰিসযাৰভাসনকিচ্চতা ৰুত্তা। সমাননিস্সযানন্তি একনিস্সযানং। অৰিনিব্ভুত্তেসু হি রূপরসাদীসু যংনিস্সযং রূপং, তংনিস্সযো এৰ রসাদীতি। অঞ্ঞমঞ্ঞসভাৰানুপগমেনাতি লক্খণসঙ্করাভাৰমাহ।
600. Sotaviññāṇappavattiyaṃ savanakiriyāvohāroti sotassa savanakiriyāya kattubhāvo sotaviññāṇassa paccayabhāvenāti vuttaṃ ‘‘sotaviññāṇassa nissayabhāvena suṇātī’’ti. Jīvitanimittamāhāraraso jīvitaṃ, tasmiṃ ninnatāya taṃ avhāyatīti jivhāti evaṃ siddhena jivhā-saddena pakāsiyamānā rasāvhāyanasaṅkhātā sāyanakiriyā labbhatīti katvā vuttaṃ ‘‘jivhāsaddena viññāyamānā kiriyāsāyana’’nti. Tathā ca vakkhati ‘‘jīvitamavhāyatīti jivhā’’ti (vibha. aṭṭha. 154). Āyoti uppattideso. Pasādakāyassa kāyikānaṃ dukkhasukhānaṃ nissayabhāvato itaresaṃ upanissayabhāvato ‘‘dukkhadukkhavipariṇāmadukkhānaṃ āyo’’ti vuttaṃ. Byāpitāyāti byāpibhāve, byāpibhāvena vā. Kāyappasādabhāvoti kāyappasādasabbhāvo. Anuviddhattāti anuyuttabhāvato, saṃsaṭṭhabhāvatoti attho. Tasmāti yasmā yāvatā imasmiṃ kāye upādinnakapavattaṃ nāma atthi, sabbattha kāyāyatanaṃ kappāsapaṭale sneho viyāti vuttaṃ, tasmā. Paṇḍarasabhāvā pasādā āpāthagataṃ visayaṃ viññāṇuppattihetubhāvena pakāsentā viya hontīti tesaṃ visayāvabhāsanakiccatā vuttā. Samānanissayānanti ekanissayānaṃ. Avinibbhuttesu hi rūparasādīsu yaṃnissayaṃ rūpaṃ, taṃnissayo eva rasādīti. Aññamaññasabhāvānupagamenāti lakkhaṇasaṅkarābhāvamāha.
যস্মা পচ্চযন্তরসহিতোযেৰ চক্খুপ্পসাদো রূপাভিহননৰসেন পৰত্ততি, ন পচ্চযন্তররহিতো, তস্মা রূপাভিঘাতো হোতু ৰা মা ৰা হোতু, এৰংসভাৰো সো রূপধম্মোতি দস্সেতুং ‘‘রূপাভিঘাতারহো’’তি ৰুত্তং যথা ‘‘ৰিপাকারহসভাৰা কুসলাকুসলা’’তি। ৰিসযৰিসযীনং অঞ্ঞমঞ্ঞং অভিমুখভাৰো অভিঘাতো ৰিযাতি অভিঘাতো, সো রূপে চক্খুস্স , চক্খুম্হি ৰা রূপস্স হোতীতি ৰুত্তং ‘‘রূপে, রূপস্স ৰা অভিঘাতো’’তি। তেনেৰাহ ‘‘যম্হি চক্খুম্হি অনিদস্সনম্হি সপ্পটিঘম্হি রূপং সনিদস্সনং সপ্পটিঘং পটিহঞ্ঞি ৰা’’তি (ধ॰ স॰ ৫৯৭), ‘‘চক্খু অনিদস্সনং সপ্পটিঘং রূপম্হি সনিদস্সনম্হি সপ্পটিঘম্হি পটিহঞ্ঞি ৰা’’তি (ধ॰ স॰ ৫৯৮) চ আদি। এত্থ চ তংতংভৰপত্থনাৰসেন চক্খাদীসু অৰিগতরাগস্স অত্তভাৰনিপ্ফাদকসাধারণকম্মৰসেন পুরিমং চক্খুলক্খণং ৰুত্তং, সুদূরসুখুমাদিভেদস্সপি রূপস্স গহণসমত্থমেৰ চক্খু হোতূতি এৰং নিব্বত্তিতআৰেণিককম্মৰসেন দুতিযং। এস নযো সেসেসুপি। অথ ৰা সতিপি পঞ্চন্নং পসাদভাৰসামঞ্ঞে সৰিসযাৰভাসনসঙ্খাতস্স পসাদব্যাপারস্স দস্সনৰসেন পুরিমং ৰুত্তং, পসাদকারণস্স সতিপি কম্মভাৰসামঞ্ঞে অত্তনো কারণভেদেন ভেদদস্সনৰসেন দুতিযং।
Yasmā paccayantarasahitoyeva cakkhuppasādo rūpābhihananavasena pavattati, na paccayantararahito, tasmā rūpābhighāto hotu vā mā vā hotu, evaṃsabhāvo so rūpadhammoti dassetuṃ ‘‘rūpābhighātāraho’’ti vuttaṃ yathā ‘‘vipākārahasabhāvā kusalākusalā’’ti. Visayavisayīnaṃ aññamaññaṃ abhimukhabhāvo abhighāto viyāti abhighāto, so rūpe cakkhussa , cakkhumhi vā rūpassa hotīti vuttaṃ ‘‘rūpe, rūpassa vā abhighāto’’ti. Tenevāha ‘‘yamhi cakkhumhi anidassanamhi sappaṭighamhi rūpaṃ sanidassanaṃ sappaṭighaṃ paṭihaññi vā’’ti (dha. sa. 597), ‘‘cakkhu anidassanaṃ sappaṭighaṃ rūpamhi sanidassanamhi sappaṭighamhi paṭihaññi vā’’ti (dha. sa. 598) ca ādi. Ettha ca taṃtaṃbhavapatthanāvasena cakkhādīsu avigatarāgassa attabhāvanipphādakasādhāraṇakammavasena purimaṃ cakkhulakkhaṇaṃ vuttaṃ, sudūrasukhumādibhedassapi rūpassa gahaṇasamatthameva cakkhu hotūti evaṃ nibbattitaāveṇikakammavasena dutiyaṃ. Esa nayo sesesupi. Atha vā satipi pañcannaṃ pasādabhāvasāmaññe savisayāvabhāsanasaṅkhātassa pasādabyāpārassa dassanavasena purimaṃ vuttaṃ, pasādakāraṇassa satipi kammabhāvasāmaññe attano kāraṇabhedena bhedadassanavasena dutiyaṃ.
কামতণ্হাতি কামভৰে তণ্হা। তথা রূপতণ্হা দট্ঠব্বা। তস্স তস্স ভৰস্স মূলকারণভূতা তণ্হা তস্মিং তস্মিং ভৰে উপ্পজ্জনারহাযতনৰিসযাপি নাম হোতীতি কামতণ্হাদীনং দট্ঠুকামতাদিৰোহারারহতা ৰুত্তা। দট্ঠুকামতাতি হি দট্ঠুমিচ্ছা রূপতণ্হাতি অত্থো। তথা সেসাসুপীতি। এত্থ চ দট্ঠুকামতাদীনং তংতংঅত্তভাৰনিব্বত্তককম্মাযূহনক্খণতো সতি পুরিমনিব্বত্তিযং ৰত্তব্বং নত্থি। অসতিপি তস্স মগ্গেন অসমুগ্ঘাতিতভাৰেনেৰ কারণন্তি দট্ঠব্বং। যতো মগ্গেন অসমুচ্ছিন্নং কারণলাভে সতি উপ্পজ্জিত্ৰা অত্তনো ফলস্স কারণভাৰূপগমনতো ৰিজ্জমানমেৰাতি উপ্পন্নঅত্থিতাপরিযাযেহি ৰুচ্চতি ‘‘অরিযং অট্ঠঙ্গিকং মগ্গং ভাৰেন্তো অরিযং অট্ঠঙ্গিকং মগ্গং বহুলীকরোন্তো উপ্পন্নুপ্পন্নে পাপকে অকুসলে ধম্মে অন্তরাযেৰ অন্তরধাপেতি’’ (সং॰ নি॰ ৫.১৫৭), ‘‘সন্তং ৰা অজ্ঝত্তং কামচ্ছন্দং অত্থি মে অজ্ঝত্তং কামচ্ছন্দোতি পজানাতী’’তি (দী॰ নি॰ ২.৩৮২; ম॰ নি॰ ১.১১৫) চ এৰমাদীসু।
Kāmataṇhāti kāmabhave taṇhā. Tathā rūpataṇhā daṭṭhabbā. Tassa tassa bhavassa mūlakāraṇabhūtā taṇhā tasmiṃ tasmiṃ bhave uppajjanārahāyatanavisayāpi nāma hotīti kāmataṇhādīnaṃ daṭṭhukāmatādivohārārahatā vuttā. Daṭṭhukāmatāti hi daṭṭhumicchā rūpataṇhāti attho. Tathā sesāsupīti. Ettha ca daṭṭhukāmatādīnaṃ taṃtaṃattabhāvanibbattakakammāyūhanakkhaṇato sati purimanibbattiyaṃ vattabbaṃ natthi. Asatipi tassa maggena asamugghātitabhāveneva kāraṇanti daṭṭhabbaṃ. Yato maggena asamucchinnaṃ kāraṇalābhe sati uppajjitvā attano phalassa kāraṇabhāvūpagamanato vijjamānamevāti uppannaatthitāpariyāyehi vuccati ‘‘ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto uppannuppanne pāpake akusale dhamme antarāyeva antaradhāpeti’’ (saṃ. ni. 5.157), ‘‘santaṃ vā ajjhattaṃ kāmacchandaṃ atthi me ajjhattaṃ kāmacchandoti pajānātī’’ti (dī. ni. 2.382; ma. ni. 1.115) ca evamādīsu.
এত্থাহ – চক্খাদীনং ইন্দ্রিযানং কিং এককম্মুনা উপ্পত্তি, উদাহু নানাকম্মুনাতি? উভযথাপীতি পোরাণা। তত্থ নানাকম্মুনা তাৰ উপ্পত্তিযং চক্খাদীনং ৰিসেসে ৰত্তব্বং নত্থি কারণস্স ভিন্নত্তা। এককম্মুনা পন উপ্পত্তিযং তেসং কথং ৰিসেসোতি? কারণস্স ভিন্নত্তাযেৰ। তংতংভৰপত্থনাভূতা হি তণ্হা তংতংভৰপরিযাপন্নাযতনাভিলাসতায সযং ৰিচিত্তরূপা উপনিস্সযভাৰেন তংতংভৰনিব্বত্তককম্মস্স ৰিচিত্তভেদতং ৰিদহতি। যতো তদাহিতৰিসেসং তং তথারূপসমত্থতাযোগেন অনেকরূপাপন্নং ৰিয অনেকং ৰিসিট্ঠসভাৰং ফলং নিব্বত্তেতি। তথা চ ৰক্খতি ‘‘কম্মমেৰ নেসং ৰিসেসকারণ’’ন্তি। ন চেত্থ সমত্থতাভাৰতো অঞ্ঞং ৰেদিতব্বং কারণৰিসেসেনাহিতৰিসেসস্স ৰিসিট্ঠফলনিপ্ফাদনযোগ্যতাভাৰতো। তথা হি সতি একস্সপি কম্মস্স অনেকিন্দ্রিযহেতুতাৰিসেসযোগং একম্পি কম্মন্তিআদিনা যুত্তিতো আগমতোপি পরতো সযমেৰ ৰক্খতি। তথা চ একস্সেৰ কুসলচিত্তস্স সোল়সাদিৰিপাকচিত্তনিব্বত্তিহেতুভাৰো ৰুচ্চতি। লোকেপি একস্সেৰ সালিবীজস্স পরিপুণ্ণাপরিপুণ্ণতণ্ডুলফলনিব্বত্তিহেতুতা দিস্সতি। কিং ৰা এতায যুত্তিচিন্তায, ন চিন্তিতব্বমেৰেতং। যতো কম্মৰিপাকো চক্খাদীনি কম্মৰিপাকো চ সব্বাকারতো বুদ্ধানংযেৰ কম্মৰিপাকঞাণফলযুত্তানং ৰিসযো, ন অঞ্ঞেসং অতক্কাৰচরতায। তেনেৰ চ ভগৰতা ‘‘কম্মৰিপাকো অচিন্তেয্যো ন চিন্তেতব্বো, যো চিন্তেয্য উম্মাদস্স ৰিঘাতস্স ভাগী অস্সা’’তি (অ॰ নি॰ ৪.৭৭) আদীনৰং দস্সেত্ৰা পটিক্খিত্তং। আৰিঞ্ছনং পুগ্গলস্স ৰিঞ্ঞাণস্স ৰা তংনিন্নভাৰপ্পত্তিযা হেতুভাৰো।
Etthāha – cakkhādīnaṃ indriyānaṃ kiṃ ekakammunā uppatti, udāhu nānākammunāti? Ubhayathāpīti porāṇā. Tattha nānākammunā tāva uppattiyaṃ cakkhādīnaṃ visese vattabbaṃ natthi kāraṇassa bhinnattā. Ekakammunā pana uppattiyaṃ tesaṃ kathaṃ visesoti? Kāraṇassa bhinnattāyeva. Taṃtaṃbhavapatthanābhūtā hi taṇhā taṃtaṃbhavapariyāpannāyatanābhilāsatāya sayaṃ vicittarūpā upanissayabhāvena taṃtaṃbhavanibbattakakammassa vicittabhedataṃ vidahati. Yato tadāhitavisesaṃ taṃ tathārūpasamatthatāyogena anekarūpāpannaṃ viya anekaṃ visiṭṭhasabhāvaṃ phalaṃ nibbatteti. Tathā ca vakkhati ‘‘kammameva nesaṃ visesakāraṇa’’nti. Na cettha samatthatābhāvato aññaṃ veditabbaṃ kāraṇavisesenāhitavisesassa visiṭṭhaphalanipphādanayogyatābhāvato. Tathā hi sati ekassapi kammassa anekindriyahetutāvisesayogaṃ ekampi kammantiādinā yuttito āgamatopi parato sayameva vakkhati. Tathā ca ekasseva kusalacittassa soḷasādivipākacittanibbattihetubhāvo vuccati. Lokepi ekasseva sālibījassa paripuṇṇāparipuṇṇataṇḍulaphalanibbattihetutā dissati. Kiṃ vā etāya yutticintāya, na cintitabbamevetaṃ. Yato kammavipāko cakkhādīni kammavipāko ca sabbākārato buddhānaṃyeva kammavipākañāṇaphalayuttānaṃ visayo, na aññesaṃ atakkāvacaratāya. Teneva ca bhagavatā ‘‘kammavipāko acinteyyo na cintetabbo, yo cinteyya ummādassa vighātassa bhāgī assā’’ti (a. ni. 4.77) ādīnavaṃ dassetvā paṭikkhittaṃ. Āviñchanaṃ puggalassa viññāṇassa vā taṃninnabhāvappattiyā hetubhāvo.
সব্বেসন্তি পদস্স পকরণতো পারিসেসতো ৰা লব্ভমানং অত্থৰিসেসং অজানন্তো যথারুতৰসেনেৰ অত্থং গহেত্ৰা ‘‘কো এত্থ ৰিসেসো’’তিআদিনা চোদেতি। ইতরো তেজাদীনং পচ্চেকং অধিকভাৰে ৰিয দ্ৰিন্নং তিণ্ণং ৰা অধিকভাৰেপি যথাৰুত্তাধিকভাৰেনেৰ এককাদিৰসেন লব্ভমানায ওমত্ততাযপি কাযপ্পসাদো ন হোতীতি ৰিঞ্ঞাযমানত্তা পকরণতো পারিসেসতো ৰা চতুন্নম্পি ভূতানং সমভাৰেন কাযো হোতীতি অযমত্থো সিদ্ধোতি সব্ব-সদ্দো ইধ সমভাৰদীপকোতি দস্সেতুং ‘‘ইদং পনা’’তিআদিমাহ। ইমমত্থং দীপেতীতি চ যথাৰুত্তেন ঞাযেন ‘‘সব্বেস’’ন্তি ৰচনতো অযমত্থো লব্ভতি, ন তস্স ৰাচকত্তাতি দস্সেতি। তেনেৰাহ ‘‘অনুৰত্ত…পে॰… ৰসেন ৰুত্তত্তা’’তি। একদেসাধিকভাৰনিৰারণেনেৰ হি একদেসোমত্ততানিৰারণম্পি ৰিঞ্ঞাযতীতি। একদেসো অৰযৰো। চতুধাতুসমুদাযনিস্সযস্স হি পসাদস্স তদেকধাতুঅধিকতা অৰযৰাধিকতা হোতীতি।
Sabbesanti padassa pakaraṇato pārisesato vā labbhamānaṃ atthavisesaṃ ajānanto yathārutavaseneva atthaṃ gahetvā ‘‘ko ettha viseso’’tiādinā codeti. Itaro tejādīnaṃ paccekaṃ adhikabhāve viya dvinnaṃ tiṇṇaṃ vā adhikabhāvepi yathāvuttādhikabhāveneva ekakādivasena labbhamānāya omattatāyapi kāyappasādo na hotīti viññāyamānattā pakaraṇato pārisesato vā catunnampi bhūtānaṃ samabhāvena kāyo hotīti ayamattho siddhoti sabba-saddo idha samabhāvadīpakoti dassetuṃ ‘‘idaṃ panā’’tiādimāha. Imamatthaṃ dīpetīti ca yathāvuttena ñāyena ‘‘sabbesa’’nti vacanato ayamattho labbhati, na tassa vācakattāti dasseti. Tenevāha ‘‘anuvatta…pe… vasena vuttattā’’ti. Ekadesādhikabhāvanivāraṇeneva hi ekadesomattatānivāraṇampi viññāyatīti. Ekadeso avayavo. Catudhātusamudāyanissayassa hi pasādassa tadekadhātuadhikatā avayavādhikatā hotīti.
‘‘পুরিমা চেত্থ দ্ৰেপি ৰাদিনো নিকাযন্তরিযা’’তি ৰদন্তি। আলোকাদিসহকারীকারণসহিতানংযেৰ চক্খাদীনং রূপাদিঅৰভাসনসমত্থতা ৰিৰরস্স চ সোতৰিঞ্ঞাণুপনিস্সযভাৰো গুণোতি তেসং লদ্ধীতি অধিপ্পাযেন ‘‘তংতংভূতগুণেহী’’তিআদি ৰুত্তং। তেজাদীনং ৰিয ৰিৰরস্স ভূতভাৰাভাৰতো ‘‘যথাযোগ’’ন্তি ৰুত্তং। অথ ৰা রূপাদযো ৰিয ৰিৰরম্পি ভূতগুণোতি পরাধিপ্পাযং দস্সেন্তো ‘‘তংতংভূতগুণেহী’’তি আহ। তেজস্স পন আলোকরূপেন, আকাসসঙ্খাতস্স ৰিৰরস্স সদ্দেন, ৰাযুস্স গন্ধেন, উদকস্স রসেন, পথৰিযা ফোট্ঠব্বেনাতি ইমমত্থং সন্ধায ‘‘যথাযোগং তংতংভূতগুণেহী’’তি ৰুত্তং সিযা। রূপাদিগ্গহণেতি রূপাদিৰিসযে চক্খুৰিঞ্ঞাণাদিকে নিপ্ফাদেতব্বেতি অত্থো। উপকরিতব্বতোতি সহকারীকারণভূতেহি যথাৰুত্তভূতগুণেহি চক্খাদীনং সকিচ্চকরণে উপকরিতব্বতো। সভাৰেন সুয্যমানস্সাতি কেনচি অনুচ্চারিযমানস্সেৰ লব্ভমানত্তা ৰুত্তং। ঘট্টনং পন ৰিনা ৰাযুসদ্দোপি নত্থীতি। অথ ৰা ৰাযুম্হি সদ্দো সভাৰেন সুয্যতীতি আপে রসো মধুরোতি চ তস্স লদ্ধিযেৰাতি দট্ঠব্বং। দুতিযৰাদিস্সপি নিগ্গহো হোতি তস্সপি তেজাদিগুণা রূপাদযোতি এৰংলদ্ধিকত্তা।
‘‘Purimā cettha dvepi vādino nikāyantariyā’’ti vadanti. Ālokādisahakārīkāraṇasahitānaṃyeva cakkhādīnaṃ rūpādiavabhāsanasamatthatā vivarassa ca sotaviññāṇupanissayabhāvo guṇoti tesaṃ laddhīti adhippāyena ‘‘taṃtaṃbhūtaguṇehī’’tiādi vuttaṃ. Tejādīnaṃ viya vivarassa bhūtabhāvābhāvato ‘‘yathāyoga’’nti vuttaṃ. Atha vā rūpādayo viya vivarampi bhūtaguṇoti parādhippāyaṃ dassento ‘‘taṃtaṃbhūtaguṇehī’’ti āha. Tejassa pana ālokarūpena, ākāsasaṅkhātassa vivarassa saddena, vāyussa gandhena, udakassa rasena, pathaviyā phoṭṭhabbenāti imamatthaṃ sandhāya ‘‘yathāyogaṃ taṃtaṃbhūtaguṇehī’’ti vuttaṃ siyā. Rūpādiggahaṇeti rūpādivisaye cakkhuviññāṇādike nipphādetabbeti attho. Upakaritabbatoti sahakārīkāraṇabhūtehi yathāvuttabhūtaguṇehi cakkhādīnaṃ sakiccakaraṇe upakaritabbato. Sabhāvena suyyamānassāti kenaci anuccāriyamānasseva labbhamānattā vuttaṃ. Ghaṭṭanaṃ pana vinā vāyusaddopi natthīti. Atha vā vāyumhi saddo sabhāvena suyyatīti āpe raso madhuroti ca tassa laddhiyevāti daṭṭhabbaṃ. Dutiyavādissapi niggaho hoti tassapi tejādiguṇā rūpādayoti evaṃladdhikattā.
রূপাদিৰিসেসগুণেহীতি রূপাদিৰিসেসগুণযুত্তেহি। তেজ…পে॰… ৰাযূহীতি সহাকাসেহি তেজাদিপরমাণূহি। কপ্পাসতো ৰিসদিসাযাতি কপ্পাসপথৰিতো ৰিসেসযুত্তায ততো অধিকসামত্থিযযুত্তাযাতি অধিপ্পাযো। তস্সাযেৰাতি কপ্পাসপথৰিযাযেৰ। যস্মা সা ৰিজ্জমানানিপি অৰিসেসভূতানি অত্থীতি গহেতুং অসক্কুণেয্যভাৰেন অভিভৰিত্ৰা ঠিতা, তস্মা তস্সাযেৰ গন্ধো অধিকতরো ভৰেয্যাতি অত্থো। অযঞ্চ সব্বো উত্তরো ‘‘তস্স তস্স ভূতস্স অধিকতাযা’’তিআদিনা অট্ঠকথাযং (ধ॰ স॰ অট্ঠ॰ ৬০০) ৰুত্তত্তা তথাগতানং ৰাদং সম্পটিচ্ছিত্ৰা ৰদন্তস্স কণাদস্স ৰসেন ৰুত্তো। ‘‘অত্তনো পন মতেন কণাদকপিলাদযো কেৰলং পথৰাদিদ্রব্যমেৰাতিআদি লদ্ধি। কণাদসাসনায অধিমুত্তানং সাসনে অনৰগাল়্হানং কেসঞ্চি অযং ৰাদো’’তি চ ৰদন্তি। এতস্সুভযস্সাতি আসৰগন্ধতো কপ্পাসগন্ধো অধিকো সীতুদকৰণ্ণতো উণ্হোদকৰণ্ণো চ অধিকোতি এতস্স উভযস্স। তেজাদিঅধিকেসু চ সম্ভারেসু রূপাদীনং ৰিসেসস্স অদস্সনতো ন রূপাদযো তেজাদীনং ৰিসেসগুণোতি সিদ্ধন্তি আহ ‘‘তদভা…পে॰… ত্তিতা’’তি। তেন ন রূপং তেজস্স ৰিসেসগুণো একন্ততো তেজাদিকে সম্ভারে ৰিসেসেন অদস্সনতো, যো যস্স ৰিসেসগুণো, ন সো তদধিকে সম্ভারে একন্ততো ৰিসেসেন দিস্সতি যথা পথৰীঅধিকে সম্ভারে আপোধাতূতি দস্সেতি। এৰং সেসেসুপি যথাযোগং যোজেতব্বং। কো পন ৰাদো নানাকলাপেতি সভাৰতো নানত্তাভাৰেপি মূলকারণনানত্তৰসেন অত্থি কোচি ৰিসেসো অসঙ্ঘাতেতি দস্সেতি, যতো পরমরণাদিকিরিযাসমত্থতা নেসং কেসঞ্চিযেৰ দিস্সতীতি।
Rūpādivisesaguṇehīti rūpādivisesaguṇayuttehi. Teja…pe… vāyūhīti sahākāsehi tejādiparamāṇūhi. Kappāsato visadisāyāti kappāsapathavito visesayuttāya tato adhikasāmatthiyayuttāyāti adhippāyo. Tassāyevāti kappāsapathaviyāyeva. Yasmā sā vijjamānānipi avisesabhūtāni atthīti gahetuṃ asakkuṇeyyabhāvena abhibhavitvā ṭhitā, tasmā tassāyeva gandho adhikataro bhaveyyāti attho. Ayañca sabbo uttaro ‘‘tassa tassa bhūtassa adhikatāyā’’tiādinā aṭṭhakathāyaṃ (dha. sa. aṭṭha. 600) vuttattā tathāgatānaṃ vādaṃ sampaṭicchitvā vadantassa kaṇādassa vasena vutto. ‘‘Attano pana matena kaṇādakapilādayo kevalaṃ pathavādidrabyamevātiādi laddhi. Kaṇādasāsanāya adhimuttānaṃ sāsane anavagāḷhānaṃ kesañci ayaṃ vādo’’ti ca vadanti. Etassubhayassāti āsavagandhato kappāsagandho adhiko sītudakavaṇṇato uṇhodakavaṇṇo ca adhikoti etassa ubhayassa. Tejādiadhikesu ca sambhāresu rūpādīnaṃ visesassa adassanato na rūpādayo tejādīnaṃ visesaguṇoti siddhanti āha ‘‘tadabhā…pe… ttitā’’ti. Tena na rūpaṃ tejassa visesaguṇo ekantato tejādike sambhāre visesena adassanato, yo yassa visesaguṇo, na so tadadhike sambhāre ekantato visesena dissati yathā pathavīadhike sambhāre āpodhātūti dasseti. Evaṃ sesesupi yathāyogaṃ yojetabbaṃ. Ko pana vādo nānākalāpeti sabhāvato nānattābhāvepi mūlakāraṇanānattavasena atthi koci viseso asaṅghāteti dasseti, yato paramaraṇādikiriyāsamatthatā nesaṃ kesañciyeva dissatīti.
একম্পীতি পি-সদ্দেন অনেকস্মিং ৰত্তব্বমেৰ নত্থীতি দস্সেতি। পঞ্চাযতনিকত্তভাৰে পত্থনা যা দট্ঠুকামতাদিভাৰেন ৰুত্তা, তায নিপ্ফন্নং। এতেন কারণৰিসেসেন ফলৰিসেসমাহ। ন হীতিআদিনা ৰুত্তমেৰত্থং সমত্থযতি। তন্তি কম্মং। ৰিসেসেনাতি অত্তনো কারণেন আহিতাতিসযেন । তেনেৰ সোতস্স ন হোতি পচ্চযো, ততো অঞ্ঞেনেৰ পন হোতীতি অধিপ্পাযো। তেন অনেকসভাৰেন কারণেন আহিতৰিসেসং একম্পি কম্মং অনেকসভাৰং ফলং নিপ্ফাদেতুং সমত্থং হোতীতি দস্সেতি। ইদানি কম্মস্স ৰুত্তপ্পকারৰিসেসাভাৰে দোসমাহ ‘‘ইন্দ্রিযন্তরাভাৰপ্পত্তিতো’’তি। তস্সত্থো – কারণৰিসেসাভাৰে ফলৰিসেসস্স অসম্ভৰতো যং ৰিসেসযুত্তং কম্মং চক্খুস্স কারণং, তস্স ততো অঞ্ঞৰিসেসাভাৰে তদঞ্ঞিন্দ্রিযুপ্পাদকতাপি ন সিযাতি সোতিন্দ্রিযাদীনং ততো অনুপ্পত্তি এৰ সিযা। এৰমিতরত্থাপি। ৰিসেসোতি চেত্থ কম্মস্স তংতংইন্দ্রিযুপ্পাদনসমত্থতা অধিপ্পেতা, সা চ পুব্বে দস্সিতসভাৰোৰ।
Ekampīti pi-saddena anekasmiṃ vattabbameva natthīti dasseti. Pañcāyatanikattabhāve patthanā yā daṭṭhukāmatādibhāvena vuttā, tāya nipphannaṃ. Etena kāraṇavisesena phalavisesamāha. Na hītiādinā vuttamevatthaṃ samatthayati. Tanti kammaṃ. Visesenāti attano kāraṇena āhitātisayena . Teneva sotassa na hoti paccayo, tato aññeneva pana hotīti adhippāyo. Tena anekasabhāvena kāraṇena āhitavisesaṃ ekampi kammaṃ anekasabhāvaṃ phalaṃ nipphādetuṃ samatthaṃ hotīti dasseti. Idāni kammassa vuttappakāravisesābhāve dosamāha ‘‘indriyantarābhāvappattito’’ti. Tassattho – kāraṇavisesābhāve phalavisesassa asambhavato yaṃ visesayuttaṃ kammaṃ cakkhussa kāraṇaṃ, tassa tato aññavisesābhāve tadaññindriyuppādakatāpi na siyāti sotindriyādīnaṃ tato anuppatti eva siyā. Evamitaratthāpi. Visesoti cettha kammassa taṃtaṃindriyuppādanasamatthatā adhippetā, sā ca pubbe dassitasabhāvova.
অনেকাহি মহগ্গতচেতনাহি একায ৰা পরিত্তচেতনাসহিতায পটিসন্ধিক্খণে কটত্তারূপানং নিব্বত্তীতি ন সক্কা ৰিঞ্ঞাতুন্তি ‘‘সব্বেসং…পে॰… ৰিঞ্ঞাযতী’’তি ৰুত্তং। ইদানি তমেৰ অসক্কুণেয্যতং ৰিত্থারতো দস্সেতুং ‘‘নানাচেতনাযা’’তিআদি ৰুত্তং। তস্সাযং সঙ্খেপত্থো – ‘‘পটিস…পে॰… পচ্চযো’’তি এত্থ যদি নানাকম্মৰসেন ইন্দ্রিযানং উপ্পত্তি অধিপ্পেতা, এৰং সতি মহগ্গতকম্মেন চ কামাৰচরকম্মেন চ তংতংপটিসন্ধিক্খণে কটত্তারূপং উপ্পন্নং সিযা, ন চেতং যুত্তং ‘‘মহগ্গতচেতনা কম্মপচ্চযো’’তি (পট্ঠা॰ ২.১২.৭৮) ৰুত্তত্তা। নাপি তংতংভৰনিযতরূপিন্দ্রিযেহি ৰিকলিন্দ্রিযতা গতিসম্পত্তিযা ওপপাতিকযোনিযং পটিসন্ধিক্খণে যুত্তা। অথ মহগ্গতাহি এৰ নানাচেতনাহি নিব্বত্তং, ন চেকা পটিসন্ধি অনেককম্মনিব্বত্তা হোতি। নিচ্ছিতঞ্হেতং সাকেতপঞ্হেনাতি। এৰং একেন মহগ্গতকম্মুনা চক্খুন্দ্রিযসোতিন্দ্রিযহদযৰত্থূনং উপ্পত্তিঞাপকেন ইমিনা ৰচনেন পরিত্তকম্মুনাপি একেন যথারহং অনেকেসং ইন্দ্রিযানং উপ্পত্তি সিদ্ধাৰাতি ৰুত্তং ‘‘সিদ্ধমেকেন কম্মেন অনেকিন্দ্রিযুপ্পত্তি হোতী’’তি।
Anekāhi mahaggatacetanāhi ekāya vā parittacetanāsahitāya paṭisandhikkhaṇe kaṭattārūpānaṃ nibbattīti na sakkā viññātunti ‘‘sabbesaṃ…pe… viññāyatī’’ti vuttaṃ. Idāni tameva asakkuṇeyyataṃ vitthārato dassetuṃ ‘‘nānācetanāyā’’tiādi vuttaṃ. Tassāyaṃ saṅkhepattho – ‘‘paṭisa…pe… paccayo’’ti ettha yadi nānākammavasena indriyānaṃ uppatti adhippetā, evaṃ sati mahaggatakammena ca kāmāvacarakammena ca taṃtaṃpaṭisandhikkhaṇe kaṭattārūpaṃ uppannaṃ siyā, na cetaṃ yuttaṃ ‘‘mahaggatacetanā kammapaccayo’’ti (paṭṭhā. 2.12.78) vuttattā. Nāpi taṃtaṃbhavaniyatarūpindriyehi vikalindriyatā gatisampattiyā opapātikayoniyaṃ paṭisandhikkhaṇe yuttā. Atha mahaggatāhi eva nānācetanāhi nibbattaṃ, na cekā paṭisandhi anekakammanibbattā hoti. Nicchitañhetaṃ sāketapañhenāti. Evaṃ ekena mahaggatakammunā cakkhundriyasotindriyahadayavatthūnaṃ uppattiñāpakena iminā vacanena parittakammunāpi ekena yathārahaṃ anekesaṃ indriyānaṃ uppatti siddhāvāti vuttaṃ ‘‘siddhamekena kammena anekindriyuppatti hotī’’ti.
সম্পত্তোযেৰ নাম সম্পত্তিকিচ্চকরণতোতি ইমমত্থং দস্সেতুং ‘‘পটি…পে॰… নকতো’’তি ৰুত্তং। অতিসুখুমভাৰতো মংসচক্খুঅগোচরেন রূপাযতনেন সমন্নাগতসঙ্ঘাতৰুত্তিতায চ ‘‘ৰাযু ৰিযা’’তি ৰুত্তং। চিত্তসমুট্ঠানং সদ্দাযতনং সোতৰিঞ্ঞাণস্স কদাচিপি আরম্মণপচ্চযো ন সিযা ধাতুপরম্পরায ঘট্টেন্তস্স উতুসমুট্ঠানত্তা। তেনাহ ‘‘ন হি…পে॰… পজ্জতী’’তি। পট্ঠানে (পট্ঠা॰ ১.১.২) চ ‘‘সদ্দাযতনং সোতৰিঞ্ঞাণস্স আরম্মণপচ্চযেন পচ্চযো’’তি অৰিসেসেন ৰুত্তং।
Sampattoyeva nāma sampattikiccakaraṇatoti imamatthaṃ dassetuṃ ‘‘paṭi…pe… nakato’’ti vuttaṃ. Atisukhumabhāvato maṃsacakkhuagocarena rūpāyatanena samannāgatasaṅghātavuttitāya ca ‘‘vāyu viyā’’ti vuttaṃ. Cittasamuṭṭhānaṃ saddāyatanaṃ sotaviññāṇassa kadācipi ārammaṇapaccayo na siyā dhātuparamparāya ghaṭṭentassa utusamuṭṭhānattā. Tenāha ‘‘na hi…pe… pajjatī’’ti. Paṭṭhāne (paṭṭhā. 1.1.2) ca ‘‘saddāyatanaṃ sotaviññāṇassa ārammaṇapaccayena paccayo’’ti avisesena vuttaṃ.
ননু চিরেন সুয্যন্তীতি দূরে ঠিতানং লহুকং সৰনং নত্থি, তেসম্পি ৰা লহুকং সৰনেন দূরাসন্নভাৰানং ৰিসেসো ন সিযাতি অধিপ্পাযো। ন , দূ…পে॰… তোতি ন দূরে ঠিতেহি রজকাদিসদ্দা চিরেন সোতৰিঞ্ঞাণেন সুয্যন্তি, সচে সৰনূপচারে সো সদ্দো দূরে আসন্নে চ ঠিতানং যথাভূতে আপাথগতে সদ্দে মনোৰিঞ্ঞাণসঙ্খাততো গহণৰিসেসতো চিরেন সুতো সীঘং সুতোতি অভিমানোতি অত্থো। এতমেৰত্থং ৰিত্থারতো দস্সেন্তো ‘‘যথা হী’’তিআদিমাহ। নিচ্ছয…পে॰… অভিমানো হোতি, সোতৰিঞ্ঞাণপ্পৰত্তি পন উভযত্থাপি সমানা, যস্মা সো পন সদ্দো…পে॰… আগচ্ছতীতি। যদি ধাতুপরম্পরায সদ্দো নপ্পৰত্ততি, কথং পটিঘোসাদীনং উপ্পত্তীতি আহ ‘‘দূরে…পে॰… পচ্চযো হোতী’’তি। উপ্পত্তিৰসেন আগতানীতি এতেন রূপধম্মাপি যত্থ উপ্পজ্জন্তি, তত্থেৰ ভিজ্জন্তি, ন দেসন্তরং সঙ্কমন্তীতি দস্সেতি। ঘট্টনসভাৰানেৰাতি তেসং ভূতানং সদ্দসমুপ্পত্তিহেতুভাৰমাহ। সোতপদেসস্সাতি সোতদেসস্স, সোতদেসে ঠিতস্সাতি অত্থো।
Nanu cirena suyyantīti dūre ṭhitānaṃ lahukaṃ savanaṃ natthi, tesampi vā lahukaṃ savanena dūrāsannabhāvānaṃ viseso na siyāti adhippāyo. Na, dū…pe… toti na dūre ṭhitehi rajakādisaddā cirena sotaviññāṇena suyyanti, sace savanūpacāre so saddo dūre āsanne ca ṭhitānaṃ yathābhūte āpāthagate sadde manoviññāṇasaṅkhātato gahaṇavisesato cirena suto sīghaṃ sutoti abhimānoti attho. Etamevatthaṃ vitthārato dassento ‘‘yathā hī’’tiādimāha. Nicchaya…pe… abhimāno hoti, sotaviññāṇappavatti pana ubhayatthāpi samānā, yasmā so pana saddo…pe… āgacchatīti. Yadi dhātuparamparāya saddo nappavattati, kathaṃ paṭighosādīnaṃ uppattīti āha ‘‘dūre…pe… paccayo hotī’’ti. Uppattivasena āgatānīti etena rūpadhammāpi yattha uppajjanti, tattheva bhijjanti, na desantaraṃ saṅkamantīti dasseti. Ghaṭṭanasabhāvānevāti tesaṃ bhūtānaṃ saddasamuppattihetubhāvamāha. Sotapadesassāti sotadesassa, sotadese ṭhitassāti attho.
চক্খুমতো পুগ্গলস্স অজ্ঝাসযৰসেনাতি চিত্রৰিচিত্ররূপাযতনে যেভুয্যেন সত্তানং চক্খুদ্ৰারিকজৰনস্স অনুকড্ঢনৰসেন পৰত্তিং সন্ধায ৰুত্তং। কণ্ণকূপচ্ছিদ্দেযেৰ পৰত্তনতোতি এতেন অধিট্ঠানতো বহিদ্ধা ইন্দ্রিযং পৰত্তীতি ৰাদং পটিসেধেতি। অধিট্ঠানদেসে এৰ হি ইন্দ্রিযং ৰত্ততি তত্থ কিচ্চাদিপ্পযোগদস্সনতো। সতিপি পনস্স বহিদ্ধা ৰুত্তিযং ন ৰিসযগ্গহণে সমত্থতা, অঞ্ঞথা অধিট্ঠানপিদহনেপি ৰিসযগ্গহণং ভৰেয্যাতি। আরম্মণগ্গহণহেতুতো চাতি কণ্ণকূপচ্ছিদ্দেযেৰ ঠত্ৰা আরম্মণকরণস্স ৰিঞ্ঞাণস্স ৰা হেতুভাৰতো।
Cakkhumato puggalassa ajjhāsayavasenāti citravicitrarūpāyatane yebhuyyena sattānaṃ cakkhudvārikajavanassa anukaḍḍhanavasena pavattiṃ sandhāya vuttaṃ. Kaṇṇakūpacchiddeyeva pavattanatoti etena adhiṭṭhānato bahiddhā indriyaṃ pavattīti vādaṃ paṭisedheti. Adhiṭṭhānadese eva hi indriyaṃ vattati tattha kiccādippayogadassanato. Satipi panassa bahiddhā vuttiyaṃ na visayaggahaṇe samatthatā, aññathā adhiṭṭhānapidahanepi visayaggahaṇaṃ bhaveyyāti. Ārammaṇaggahaṇahetuto cāti kaṇṇakūpacchiddeyeva ṭhatvā ārammaṇakaraṇassa viññāṇassa vā hetubhāvato.
তব্বোহারেনাতি গন্ধগন্ধগ্গহণস্স সহচরিতায গন্ধোপি তথা ৰুত্তোতি অধিপ্পাযো। গন্ধো পচ্চযোতি গন্ধো সহকারীপচ্চযোতি অত্থো। খেল়াদিকো পচ্চযোতি যোজেতব্বং। তথা পথৰীতি সহকারীপচ্চযন্তরভূতা অজ্ঝত্তিকবাহিরা পথৰী আরম্মণগ্গহণে পচ্চযোতি অত্থো। আধারভূতাতি তেজোৰাযোধাতূনং আধারভূতা। নিস্সযভূতানন্তি নিস্সযমহাভূতানং আপোতেজোৰাযোধাতূনং। সব্বদাতি উপ্পীল়নকালে চ অনুপ্পীল়নকালে চ। তত্থাতি চতুরাসীতিপভেদে উপরিমকাযসঙ্খাতে রূপসমূহে। ৰিনিব্ভুজ্জিতুং অসক্কুণেয্যানন্তি ইদং চক্খুদসকং ইদং কাযদসকং ইদং ভাৰদসকন্তি এৰং কলাপতোপি ৰিনিব্ভুজ্জিতুং অসক্কুণেয্যানং।
Tabbohārenāti gandhagandhaggahaṇassa sahacaritāya gandhopi tathā vuttoti adhippāyo. Gandho paccayoti gandho sahakārīpaccayoti attho. Kheḷādiko paccayoti yojetabbaṃ. Tathā pathavīti sahakārīpaccayantarabhūtā ajjhattikabāhirā pathavī ārammaṇaggahaṇe paccayoti attho. Ādhārabhūtāti tejovāyodhātūnaṃ ādhārabhūtā. Nissayabhūtānanti nissayamahābhūtānaṃ āpotejovāyodhātūnaṃ. Sabbadāti uppīḷanakāle ca anuppīḷanakāle ca. Tatthāti caturāsītipabhede uparimakāyasaṅkhāte rūpasamūhe. Vinibbhujjituṃ asakkuṇeyyānanti idaṃ cakkhudasakaṃ idaṃ kāyadasakaṃ idaṃ bhāvadasakanti evaṃ kalāpatopi vinibbhujjituṃ asakkuṇeyyānaṃ.
৬১৬. দীঘাদীনং ফুসিত্ৰা জানিতব্বতোতি ইদং দীঘাদীনং ন কাযৰিঞ্ঞাণগোচরত্তা ৰুত্তং, দীঘাদিৰোহাররূপাদীনং পন ফোট্ঠব্বং ফুসিত্ৰা কাযৰিঞ্ঞাণৰীথিযা পরতো পৰত্তেন মনোৰিঞ্ঞাণেনপি জানিতব্বত্তা ৰুত্তং। দীঘাদিসন্নিৰেসন্তি দীঘাদিসন্নিৰেসৰন্তং। একস্মিং ইতরস্স অভাৰাতি ছাযাতপানং আলোকন্ধকারানঞ্চ অসহট্ঠাযিতং আহ। কথং পন আলোকো অন্ধকারং ৰিধমতীতি? ‘‘আলোকপ্পৰত্তিসমানকালং অন্ধকারসভাৰেন পৰত্তমানং ৰণ্ণাযতনং ভিজ্জতি। অন্ধকারস্স নিস্সযো হুত্ৰা পৰত্তমানানি ভূতানি কমেন তথারূপস্স ৰণ্ণাযতনস্স নিস্সযভাৰং গচ্ছন্তী’’তি কেচি। সহ অন্ধকারেন তন্নিস্সযভূতানং নিরোধসমনন্তরং তংসন্ততিযং তাদিসে পচ্চযসন্নিপাতে আলোকনিস্সযভূতানং উপ্পত্তীতি ৰেদিতব্বং। ন হি নিস্সযমহাভূতেহি ৰিনা আলোকপ্পৰত্তি অত্থি, নাপি অন্ধকারসঙ্খাতং ৰণ্ণাযতনমেৰ নিরুজ্ঝতি তংনিস্সযেহি পযুজ্জমানকএককলাপভূতোপাদারূপানং সহেৰ নিরুজ্ঝনতো। পদীপসিখামণিরংসিযো ৰিয পথৰীপাকাররুক্খাদীনি মুঞ্চিত্ৰাপি অন্ধকারো পৰত্ততীতি ৰদন্তি। মন্দং পন পাকারাদিআধাররহিতং ন সুট্ঠু পঞ্ঞাযতি, বহলং আধারং নিস্সায পৰত্ততীতি যুত্তন্তি চ ৰদন্তি।
616. Dīghādīnaṃphusitvā jānitabbatoti idaṃ dīghādīnaṃ na kāyaviññāṇagocarattā vuttaṃ, dīghādivohārarūpādīnaṃ pana phoṭṭhabbaṃ phusitvā kāyaviññāṇavīthiyā parato pavattena manoviññāṇenapi jānitabbattā vuttaṃ. Dīghādisannivesanti dīghādisannivesavantaṃ. Ekasmiṃ itarassa abhāvāti chāyātapānaṃ ālokandhakārānañca asahaṭṭhāyitaṃ āha. Kathaṃ pana āloko andhakāraṃ vidhamatīti? ‘‘Ālokappavattisamānakālaṃ andhakārasabhāvena pavattamānaṃ vaṇṇāyatanaṃ bhijjati. Andhakārassa nissayo hutvā pavattamānāni bhūtāni kamena tathārūpassa vaṇṇāyatanassa nissayabhāvaṃ gacchantī’’ti keci. Saha andhakārena tannissayabhūtānaṃ nirodhasamanantaraṃ taṃsantatiyaṃ tādise paccayasannipāte ālokanissayabhūtānaṃ uppattīti veditabbaṃ. Na hi nissayamahābhūtehi vinā ālokappavatti atthi, nāpi andhakārasaṅkhātaṃ vaṇṇāyatanameva nirujjhati taṃnissayehi payujjamānakaekakalāpabhūtopādārūpānaṃ saheva nirujjhanato. Padīpasikhāmaṇiraṃsiyo viya pathavīpākārarukkhādīni muñcitvāpi andhakāro pavattatīti vadanti. Mandaṃ pana pākārādiādhārarahitaṃ na suṭṭhu paññāyati, bahalaṃ ādhāraṃ nissāya pavattatīti yuttanti ca vadanti.
৬২০. ‘‘অমনুস্সসদ্দো’’তি এত্থ অ-কারো ন মনুস্সতামত্তনিৰত্তিঅত্থো সদিসভাৰদীপনতায অনধিপ্পেতত্তা, মনুস্সতো পন অনঞ্ঞতানিৰত্তিঅত্থোতি দস্সেতুং ‘‘অমনুস্স…পে॰… ট্ঠাদযোপী’’তি আহ। তথা কিত্তেতব্বোতি ‘‘ৰংসফালনসদ্দো’’তিআদিনা ৰত্থুৰসেন কিত্তেতব্বো।
620. ‘‘Amanussasaddo’’ti ettha a-kāro na manussatāmattanivattiattho sadisabhāvadīpanatāya anadhippetattā, manussato pana anaññatānivattiatthoti dassetuṃ ‘‘amanussa…pe… ṭṭhādayopī’’ti āha. Tathā kittetabboti ‘‘vaṃsaphālanasaddo’’tiādinā vatthuvasena kittetabbo.
৬৩২. কম্মচিত্তাদিনাতি আদি-সদ্দেন উতুআহারে সঙ্গণ্হাতি। তংতদাকারানীতি ইত্থিলিঙ্গাদিআকারানি। ইত্থিন্দ্রিযং পটিচ্চ সমুট্ঠহন্তীতি অঞ্ঞমঞ্ঞপচ্চযানিপি ইত্থিলিঙ্গাদীনি যেভুয্যেন ইত্থিন্দ্রিযসহিতে এৰ সন্তানে সব্ভাৰা ইতরত্থ চ অভাৰা ইন্দ্রিযহেতুকানি ৰুত্তানি। অঞ্ঞথাতি ইত্থিলিঙ্গাদিআকারতো অঞ্ঞথা, ইত্থিন্দ্রিযাভাৰে ৰা। ইত্থিগ্গহণস্স চাতি ইত্থীতি চিত্তপ্পৰত্তিযা। তেসং রূপানন্তি ইত্থিলিঙ্গাদিআকাররূপানং। যদি ইত্থিন্দ্রিযং ইত্থিলিঙ্গাদিআকাররূপানং সহকারীকারণং, অথ কস্মা তস্স ইন্দ্রিযাদিপচ্চযভাৰো তেসং ন ৰুত্তোতি? নেৰ তং সহকারীকারণং, অথ খো তেসং তব্ভাৰভাৰিতামত্তেন তং কারণন্তি ৰুচ্চতীতি দস্সেতুং আহ ‘‘যস্মা পনা’’তিআদি।
632. Kammacittādināti ādi-saddena utuāhāre saṅgaṇhāti. Taṃtadākārānīti itthiliṅgādiākārāni. Itthindriyaṃ paṭicca samuṭṭhahantīti aññamaññapaccayānipi itthiliṅgādīni yebhuyyena itthindriyasahite eva santāne sabbhāvā itarattha ca abhāvā indriyahetukāni vuttāni. Aññathāti itthiliṅgādiākārato aññathā, itthindriyābhāve vā. Itthiggahaṇassa cāti itthīti cittappavattiyā. Tesaṃ rūpānanti itthiliṅgādiākārarūpānaṃ. Yadi itthindriyaṃ itthiliṅgādiākārarūpānaṃ sahakārīkāraṇaṃ, atha kasmā tassa indriyādipaccayabhāvo tesaṃ na vuttoti? Neva taṃ sahakārīkāraṇaṃ, atha kho tesaṃ tabbhāvabhāvitāmattena taṃ kāraṇanti vuccatīti dassetuṃ āha ‘‘yasmā panā’’tiādi.
৬৩৩. লিঙ্গং পরিৰত্তমানং পুরিমলিঙ্গাধারজাতিঅনুরূপমেৰ হুত্ৰা পরিৰত্ততীতি কত্ৰা ৰুত্তং ‘‘পটিসন্ধিযং ৰিয পৰত্তেপী’’তি। যস্স…পে॰… নোতি আদিৰচনতোতি আদি-সদ্দেন ‘‘যস্স ৰা পন পুরিসিন্দ্রিযং উপ্পজ্জতি, তস্স ইত্থিন্দ্রিযং উপ্পজ্জতীতি নো’’তি (যম॰ ৩.ইন্দ্রিযযমক.১৮৮) সঙ্গণ্হাতি।
633. Liṅgaṃ parivattamānaṃ purimaliṅgādhārajātianurūpameva hutvā parivattatīti katvā vuttaṃ ‘‘paṭisandhiyaṃ viya pavattepī’’ti. Yassa…pe… noti ādivacanatoti ādi-saddena ‘‘yassa vā pana purisindriyaṃ uppajjati, tassa itthindriyaṃ uppajjatīti no’’ti (yama. 3.indriyayamaka.188) saṅgaṇhāti.
৬৩৫. দ্ৰারভাৰেন কুচ্ছিতানং আসৰধম্মানং পৰত্তিট্ঠানতায পসাদৰিসেসে ৰিয ৰিঞ্ঞত্তিৰিসেসেপি কাযৰোহারপ্পৰত্তি দট্ঠব্বা। ৰিত্থম্ভনসভাৰতায ৰাযোধাতুযা থম্ভনং ‘‘ৰাযোধাতুকিচ্চ’’ন্তি ৰুত্তং। কিচ্চম্পি হি ধম্মানং সভাৰোযেৰাতি। পথৰীধাতুযা আকারো ৰচীৰিঞ্ঞত্তীতি ৰত্তুং ৰট্টতীতি যোজনা।
635. Dvārabhāvena kucchitānaṃ āsavadhammānaṃ pavattiṭṭhānatāya pasādavisese viya viññattivisesepi kāyavohārappavatti daṭṭhabbā. Vitthambhanasabhāvatāya vāyodhātuyā thambhanaṃ ‘‘vāyodhātukicca’’nti vuttaṃ. Kiccampi hi dhammānaṃ sabhāvoyevāti. Pathavīdhātuyā ākāro vacīviññattīti vattuṃ vaṭṭatīti yojanā.
৬৩৬. ৰিতক্ক…পে॰… গহিতাতি যথাধিপ্পেতত্থাভিব্যঞ্জিকায ৰাচায সমুট্ঠাপনাধিপ্পাযপ্পৰত্তিং সন্ধায ৰুত্তং। তদা হি সা তেহি পরিগ্গহিতা নাম হোতীতি। একস্সপি অক্খরস্স অনেকেহি জৰনেহি নিব্বত্তেতব্বত্তা তথা নিব্বত্তিযমানতায অসমত্থসভাৰত্তা ন ৰিঞ্ঞাতৰিসেসা ন ভিন্না এৰাতি আহ ‘‘সৰ…পে॰… ভিন্না’’তি। অব্বোকিণ্ণেতি অন্তরন্তরা উপ্পজ্জমানেহি অসংসট্ঠে। ‘‘পচ্ছিমচিত্ত’’ন্তি অৰিসেসেন চুতিচিত্তং ৰুত্তন্তি অধিপ্পাযেন ‘‘অঞ্ঞেসম্পি চুতিচিত্তং…পে॰… ঞাযতী’’তি ৰুত্তং।
636. Vitakka…pe… gahitāti yathādhippetatthābhibyañjikāya vācāya samuṭṭhāpanādhippāyappavattiṃ sandhāya vuttaṃ. Tadā hi sā tehi pariggahitā nāma hotīti. Ekassapi akkharassa anekehi javanehi nibbattetabbattā tathā nibbattiyamānatāya asamatthasabhāvattā na viññātavisesā na bhinnā evāti āha ‘‘sava…pe… bhinnā’’ti. Abbokiṇṇeti antarantarā uppajjamānehi asaṃsaṭṭhe. ‘‘Pacchimacitta’’nti avisesena cuticittaṃ vuttanti adhippāyena ‘‘aññesampi cuticittaṃ…pe… ñāyatī’’ti vuttaṃ.
অথ ৰা ‘‘যে চ রূপাৰচরং অরূপাৰচরং উপপজ্জিত্ৰা পরিনিব্বাযিস্সন্তি, তেসং চৰন্তানং তেসং ৰচীসঙ্খারো নিরুজ্ঝিস্সতি, নো চ তেসং কাযসঙ্খারো নিরুজ্ঝিস্সতী’’তি (যম॰ ২.সঙ্খারযমক.৮৮) রূপারূপভৰূপপজ্জনকানং কামাৰচরচুতিচিত্তস্সপি কাযসঙ্খারাসমুট্ঠাপনৰচনেন খীণাসৰেহি অঞ্ঞেসম্পি…পে॰… ঞাযতী’’তি ৰুত্তং। যস্মা চ –
Atha vā ‘‘ye ca rūpāvacaraṃ arūpāvacaraṃ upapajjitvā parinibbāyissanti, tesaṃ cavantānaṃ tesaṃ vacīsaṅkhāro nirujjhissati, no ca tesaṃ kāyasaṅkhāro nirujjhissatī’’ti (yama. 2.saṅkhārayamaka.88) rūpārūpabhavūpapajjanakānaṃ kāmāvacaracuticittassapi kāyasaṅkhārāsamuṭṭhāpanavacanena khīṇāsavehi aññesampi…pe… ñāyatī’’ti vuttaṃ. Yasmā ca –
‘‘যস্স কাযসঙ্খারো নিরুজ্ঝতি, তস্স ৰচীসঙ্খারো নিরুজ্ঝিস্সতীতি আমন্তা’’তি (যম॰ ২.সঙ্খারযমক.১০৮),
‘‘Yassa kāyasaṅkhāro nirujjhati, tassa vacīsaṅkhāro nirujjhissatīti āmantā’’ti (yama. 2.saṅkhārayamaka.108),
‘‘যস্স কাযসঙ্খারো নিরুজ্ঝতি, তস্স চিত্তসঙ্খারো নিরুজ্ঝিস্সতীতি আমন্তা’’তি (যম॰ ২.সঙ্খারযমক.১০৮) চ,
‘‘Yassa kāyasaṅkhāro nirujjhati, tassa cittasaṅkhāro nirujjhissatīti āmantā’’ti (yama. 2.saṅkhārayamaka.108) ca,
‘‘পচ্ছিমচিত্তস্স ভঙ্গক্খণে তেসং কাযসঙ্খারো চ ন নিরুজ্ঝতি চিত্তসঙ্খারো চ ন নিরুজ্ঝিস্সতী’’তি (যম॰ ২.সঙ্খারযমক.১১৩) –
‘‘Pacchimacittassa bhaṅgakkhaṇe tesaṃ kāyasaṅkhāro ca na nirujjhati cittasaṅkhāro ca na nirujjhissatī’’ti (yama. 2.saṅkhārayamaka.113) –
আদিৰচনতো চ পচ্ছিমচিত্তস্স পুরতো সোল়সমেন চিত্তেন ততো ওরিমেন ৰা সদ্ধিং অস্সাসপস্সাসা ন উপ্পজ্জন্তীতি সিদ্ধং। যদি উপ্পজ্জেয্যুং, ‘‘পচ্ছিমচিত্তস্স ভঙ্গক্খণে তেসং কাযসঙ্খারো ন নিরুজ্ঝতী’’তি ন ৰদেয্য, ৰুত্তঞ্চেতং, তস্মা হেট্ঠিমকোটিযা চুতিতো পুরিমেন সত্তরসমেন উপ্পন্না অস্সাসপস্সাসা চুতিযা হেট্ঠা দুতিযেন চিত্তেন সদ্ধিং নিরুজ্ঝন্তি। তেন ‘‘যস্স চিত্তস্স অনন্তরা কামাৰচরানং পচ্ছিমচিত্তং উপ্পজ্জিস্সতী’’তি চুতিচিত্তস্সানন্তরপচ্চযভূতস্সপি চিত্তস্স কাযসঙ্খারাসমুট্ঠাপনতা ৰুত্তা।
Ādivacanato ca pacchimacittassa purato soḷasamena cittena tato orimena vā saddhiṃ assāsapassāsā na uppajjantīti siddhaṃ. Yadi uppajjeyyuṃ, ‘‘pacchimacittassa bhaṅgakkhaṇe tesaṃ kāyasaṅkhāro na nirujjhatī’’ti na vadeyya, vuttañcetaṃ, tasmā heṭṭhimakoṭiyā cutito purimena sattarasamena uppannā assāsapassāsā cutiyā heṭṭhā dutiyena cittena saddhiṃ nirujjhanti. Tena ‘‘yassa cittassa anantarā kāmāvacarānaṃ pacchimacittaṃ uppajjissatī’’ti cuticittassānantarapaccayabhūtassapi cittassa kāyasaṅkhārāsamuṭṭhāpanatā vuttā.
অথ ৰা যস্স চিত্তস্সাতি যেন চিত্তেন সব্বপচ্ছিমো কাযসঙ্খারো উপ্পজ্জতি। তং চিত্তং ৰুত্তন্তি গহেতব্বং, ন পচ্ছিমচিত্তস্স অনন্তরপচ্চযভূতং। অনন্তরাতি হি কাযসঙ্খারুপ্পাদনং অন্তরং ৰিনা, যতো পচ্ছা কাযসঙ্খারুপ্পাদনেন অনন্তরিতং হুত্ৰা পচ্ছিমচিত্তং উপ্পজ্জিস্সতীতি অত্থো। কস্মা? ‘‘ইতরেসং ৰচীসঙ্খারো চ নিরুজ্ঝিস্সতি কাযসঙ্খারো চ নিরুজ্ঝিস্সতী’’তি (যম॰ ২.সঙ্খারযমক.৮৮) ৰুত্তত্তা। অঞ্ঞথাপচ্ছিমচিত্ততো পুরিমততিযচিত্তসমঙ্গীনং কাযসঙ্খারো উপ্পজ্জতীতি আপজ্জতীতি। এৰং সব্বেসম্পি চুতিচিত্তস্স রূপজনকতাভাৰে আগমং দস্সেত্ৰা ইদানি যুত্তিং দস্সেতুং ‘‘ন হী’’তিআদিমাহ। তত্থ গব্ভগমনাদীতি আদি-সদ্দেন উদকনিমুগ্গঅসঞ্ঞীভূতকালকতচতুত্থজ্ঝানসমাপন্নরূপারূপভৰসমঙ্গীনিরোধসমাপন্নভাৰে সঙ্গণ্হাতি।
Atha vā yassa cittassāti yena cittena sabbapacchimo kāyasaṅkhāro uppajjati. Taṃ cittaṃ vuttanti gahetabbaṃ, na pacchimacittassa anantarapaccayabhūtaṃ. Anantarāti hi kāyasaṅkhāruppādanaṃ antaraṃ vinā, yato pacchā kāyasaṅkhāruppādanena anantaritaṃ hutvā pacchimacittaṃ uppajjissatīti attho. Kasmā? ‘‘Itaresaṃ vacīsaṅkhāro ca nirujjhissati kāyasaṅkhāro ca nirujjhissatī’’ti (yama. 2.saṅkhārayamaka.88) vuttattā. Aññathāpacchimacittato purimatatiyacittasamaṅgīnaṃ kāyasaṅkhāro uppajjatīti āpajjatīti. Evaṃ sabbesampi cuticittassa rūpajanakatābhāve āgamaṃ dassetvā idāni yuttiṃ dassetuṃ ‘‘na hī’’tiādimāha. Tattha gabbhagamanādīti ādi-saddena udakanimuggaasaññībhūtakālakatacatutthajjhānasamāpannarūpārūpabhavasamaṅgīnirodhasamāpannabhāve saṅgaṇhāti.
৬৩৭. অনেকেসং কলাপানং একতো হুত্ৰা একঘনপিণ্ডভাৰেন পৰত্তনতো কলাপন্তরভূতানং কলাপন্তরভূতেহি সম্ফুট্ঠভাৰো ৰুত্তো। যতো তেসং দুৰিঞ্ঞেয্যনানত্তং, ন পন অৰিনিব্ভুত্তভাৰতো। তংতংভূতৰিৰিত্ততাতি তেসং তেসং ভূতানং ৰিভত্তভাৰো কলাপন্তরভূতেহি ৰিভত্তসভাৰতা অসংকিণ্ণতাতি অত্থো। যস্মা পন যথাৰুত্তা ৰিৰিত্ততা রূপানং ওসানং হোতি, তস্মা ‘‘রূপপরিযন্তো’’তি ৰুত্তং। অথ ৰা তংতংভূতসুঞ্ঞতা। যেসঞ্হি পরিচ্ছেদো আকাসো, তেসং পরিযন্ততায তেহি সুঞ্ঞভাৰোতি লক্খিতব্বো। ততোযেৰ চ সো ভূতন্তরেহি ৰিয তেহি অসম্ফুট্ঠোতি ৰুচ্চতীতি। অঞ্ঞথাতি পরিচ্ছিন্দিতব্বেহি অসম্ফুট্ঠভাৰাভাৰে।
637. Anekesaṃ kalāpānaṃ ekato hutvā ekaghanapiṇḍabhāvena pavattanato kalāpantarabhūtānaṃ kalāpantarabhūtehi samphuṭṭhabhāvo vutto. Yato tesaṃ duviññeyyanānattaṃ, na pana avinibbhuttabhāvato. Taṃtaṃbhūtavivittatāti tesaṃ tesaṃ bhūtānaṃ vibhattabhāvo kalāpantarabhūtehi vibhattasabhāvatā asaṃkiṇṇatāti attho. Yasmā pana yathāvuttā vivittatā rūpānaṃ osānaṃ hoti, tasmā ‘‘rūpapariyanto’’ti vuttaṃ. Atha vā taṃtaṃbhūtasuññatā. Yesañhi paricchedo ākāso, tesaṃ pariyantatāya tehi suññabhāvoti lakkhitabbo. Tatoyeva ca so bhūtantarehi viya tehi asamphuṭṭhoti vuccatīti. Aññathāti paricchinditabbehi asamphuṭṭhabhāvābhāve.
৬৩৮. তংতংৰিকারাধিকরূপেহীতি এত্থ কথং চম্মসুৰণ্ণেসু মুদুতাকম্মঞ্ঞতা লব্ভন্তি, ননু লহুতাদিৰিকারা একন্ততো ইন্দ্রিযবদ্ধরূপে এৰ পৰত্তনতো অনিন্দ্রিযবদ্ধে ন লব্ভন্তীতি? সচ্চমেতং, ইধ পন তংসদিসেসু তব্বোহারৰসেন ৰুত্তং। তথা হি তূলপিচুআদীসু গরুভাৰাদিহেতূনং ভূতানং অধিকভাৰাভাৰতো লহুআদিৰোহারো। নিদ্দিসিতব্বধম্মনিস্সযরূপে এৰ ৰা সন্ধায ‘‘তংতংৰিকারাধিকরূপেহী’’তি ৰুত্তন্তি দট্ঠব্বং। সব্বে সব্বেসং পচ্চযা লহুতাদীনং অঞ্ঞমঞ্ঞাৰিজহনতোতি অধিপ্পাযো।
638. Taṃtaṃvikārādhikarūpehīti ettha kathaṃ cammasuvaṇṇesu mudutākammaññatā labbhanti, nanu lahutādivikārā ekantato indriyabaddharūpe eva pavattanato anindriyabaddhe na labbhantīti? Saccametaṃ, idha pana taṃsadisesu tabbohāravasena vuttaṃ. Tathā hi tūlapicuādīsu garubhāvādihetūnaṃ bhūtānaṃ adhikabhāvābhāvato lahuādivohāro. Niddisitabbadhammanissayarūpe eva vā sandhāya ‘‘taṃtaṃvikārādhikarūpehī’’ti vuttanti daṭṭhabbaṃ. Sabbe sabbesaṃ paccayā lahutādīnaṃ aññamaññāvijahanatoti adhippāyo.
৬৪১. আচযসদ্দেনেৰাতি নিদ্দেসে ৰুত্তআচযসদ্দেনেৰ। যো আযতনানং আদিচযত্তা আচযো পুনপ্পুনং নিব্বত্তমানানং, সোৰ রূপস্স উপরিচযত্তা উপচযোতি অধিপ্পেতং অত্থং পাল়িযং যোজেত্ৰা দস্সেতুং ‘‘পাল়িযং পনা’’তিআদি ৰুত্তং। উপ-সদ্দো পঠমত্থো ‘‘দানং, ভিক্খৰে, পণ্ডিতুপঞ্ঞত্ত’’ন্তিআদীসু (অ॰ নি॰ ৩.৪৫) ৰিয। উপরিঅত্থোচ ‘‘সম্মট্ঠে উপসিত্তে চ, তে নিসীদিংসু মণ্ডপে’’তিআদীসু ৰিয। অঞ্ঞথাতি উপ-সদ্দস্স উপরিঅত্থস্সেৰ গহণে।
641. Ācayasaddenevāti niddese vuttaācayasaddeneva. Yo āyatanānaṃ ādicayattā ācayo punappunaṃ nibbattamānānaṃ, sova rūpassa uparicayattā upacayoti adhippetaṃ atthaṃ pāḷiyaṃ yojetvā dassetuṃ ‘‘pāḷiyaṃ panā’’tiādi vuttaṃ. Upa-saddo paṭhamattho ‘‘dānaṃ, bhikkhave, paṇḍitupaññatta’’ntiādīsu (a. ni. 3.45) viya. Upariatthoca ‘‘sammaṭṭhe upasitte ca, te nisīdiṃsu maṇḍape’’tiādīsu viya. Aññathāti upa-saddassa upariatthasseva gahaṇe.
৬৪৩. ফলৰিপচ্চনপকতিযাতি ফলৰিপচ্চনসভাৰেন। ফলমেৰ ৰা পকতীতি আযুসংহানাদিনা ফলসভাৰেন জরানিদ্দেসোতি অত্থো। তথা হি ‘‘ফলূপচারেন ৰুত্তা’’তি ৰুত্তং। সুপরিণতরূপপরিপাককালে হানিদসকাদীসু।
643. Phalavipaccanapakatiyāti phalavipaccanasabhāvena. Phalameva vā pakatīti āyusaṃhānādinā phalasabhāvena jarāniddesoti attho. Tathā hi ‘‘phalūpacārena vuttā’’ti vuttaṃ. Supariṇatarūpaparipākakāle hānidasakādīsu.
৬৪৫. কত্তব্বসভাৰতোতি মূলফলাদীনং ইধাধিপ্পেতআহারৰত্থূনং মুখেন অসনাদিকত্তব্বসভাৰতো। ৰিসভূতে সঙ্ঘাতে ওজা মন্দা হোতীতি সৰিসত্তাভাৰতো সুখুমতা ৰুত্তা। অঙ্গমঙ্গানুসারিনো রসস্স সারোতি রসহরণীধমনিজালানুসারেন সরীরাৰযৰে অনুপ্পৰিট্ঠস্স আহাররসস্স অব্ভন্তরাহারপচ্চযো স্নেহো, যো লোকে রসধাতূতি ৰুচ্চতি।
645. Kattabbasabhāvatoti mūlaphalādīnaṃ idhādhippetaāhāravatthūnaṃ mukhena asanādikattabbasabhāvato. Visabhūte saṅghāte ojā mandā hotīti savisattābhāvato sukhumatā vuttā. Aṅgamaṅgānusārino rasassa sāroti rasaharaṇīdhamanijālānusārena sarīrāvayave anuppaviṭṭhassa āhārarasassa abbhantarāhārapaccayo sneho, yo loke rasadhātūti vuccati.
উপাদাভাজনীযকথাৰণ্ণনা নিট্ঠিতা।
Upādābhājanīyakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / রূপৰিভত্তি • Rūpavibhatti
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā / উপাদাভাজনীযকথা • Upādābhājanīyakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / উপাদাভাজনীযকথাৰণ্ণনা • Upādābhājanīyakathāvaṇṇanā
