| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. উপাদানপরিপৰত্তসুত্তৰণ্ণনা
4. Upādānaparipavattasuttavaṇṇanā
৫৬. চতুন্নং পরিৰট্টনৰসেনাতি পচ্চেকক্খন্ধেসু চতুন্নং অরিযসচ্চানং পরিৰট্টনৰসেন। রূপং অব্ভঞ্ঞাসিন্তি সকলভূতুপাদারূপং কুচ্ছিতভাৰতো তত্থ চ তুচ্ছৰিপল্লাসতায ‘‘দুক্খসচ্চ’’ন্তি অভিৰিসিট্ঠেন ঞাণেন অঞ্ঞাসিং পটিৰিজ্ঝিং। আহারৰসেন রূপকাযস্স হানিৰুদ্ধাদীনং পাকটভাৰতো ৰিসেসপচ্চযতো চ তস্স ‘‘আহারসমুদযা’’তি ৰুত্তং। দুক্খসমুদযকথা নাম ৰট্টকথাতি ‘‘সচ্ছন্দরাগো’’তি ৰিসেসেত্ৰা ৰুত্তং। ছন্দরাগগ্গহণেন চ উপাদানকম্মাৰিজ্জাপি গহিতা এৰ। পটিপন্না হোন্তীতি অত্থো। ৰত্তমানকালপ্পযোগো হেস যথা ‘‘কুসলং চিত্তং উপ্পন্নং হোতী’’তি। পতিট্ঠহন্তীতি পতিট্ঠং লভন্তি। কেৰলিনোতি ইধ ৰিমুত্তিগুণেন পারিপূরীতি আহ ‘‘সকলিনো কতসব্বকিচ্চা’’তি। যেন তেতি যেন অৰসিট্ঠেন তে অসেক্খে পঞ্ঞাপেন্তা পঞ্ঞাপেয্যুং, তং নেসং ৰট্টং সেক্খানং ৰিয নত্থি পঞ্ঞাপনায। ৰট্টন্তি কারণং ৰট্টনট্ঠেন ফলস্স পৰত্তনট্ঠেন। অসেক্খভূমিৰারোতি অসেক্খভূমিপ্পৰত্তি।
56.Catunnaṃparivaṭṭanavasenāti paccekakkhandhesu catunnaṃ ariyasaccānaṃ parivaṭṭanavasena. Rūpaṃ abbhaññāsinti sakalabhūtupādārūpaṃ kucchitabhāvato tattha ca tucchavipallāsatāya ‘‘dukkhasacca’’nti abhivisiṭṭhena ñāṇena aññāsiṃ paṭivijjhiṃ. Āhāravasena rūpakāyassa hānivuddhādīnaṃ pākaṭabhāvato visesapaccayato ca tassa ‘‘āhārasamudayā’’ti vuttaṃ. Dukkhasamudayakathā nāma vaṭṭakathāti ‘‘sacchandarāgo’’ti visesetvā vuttaṃ. Chandarāgaggahaṇena ca upādānakammāvijjāpi gahitā eva. Paṭipannā hontīti attho. Vattamānakālappayogo hesa yathā ‘‘kusalaṃ cittaṃ uppannaṃ hotī’’ti. Patiṭṭhahantīti patiṭṭhaṃ labhanti. Kevalinoti idha vimuttiguṇena pāripūrīti āha ‘‘sakalino katasabbakiccā’’ti. Yena teti yena avasiṭṭhena te asekkhe paññāpentā paññāpeyyuṃ, taṃ nesaṃ vaṭṭaṃ sekkhānaṃ viya natthi paññāpanāya. Vaṭṭanti kāraṇaṃ vaṭṭanaṭṭhena phalassa pavattanaṭṭhena. Asekkhabhūmivāroti asekkhabhūmippavatti.
উপাদানপরিপৰত্তসুত্তৰণ্ণনা নিট্ঠিতা।
Upādānaparipavattasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. উপাদানপরিপৰত্তসুত্তং • 4. Upādānaparipavattasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. উপাদানপরিপৰত্তসুত্তৰণ্ণনা • 4. Upādānaparipavattasuttavaṇṇanā
