| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ဥပာဒာနပရိပဝတ္တသုတ္တဝဏ္ဏနာ
4. Upādānaparipavattasuttavaṇṇanā
၅၆. စတုန္နံ ပရိဝဋ္ဋနဝသေနာတိ ပစ္စေကက္ခန္ဓေသု စတုန္နံ အရိယသစ္စာနံ ပရိဝဋ္ဋနဝသေန။ ရူပံ အဗ္ဘညာသိန္တိ သကလဘူတုပာဒာရူပံ ကုစ္ဆိတဘာဝတော တတ္ထ စ တုစ္ဆဝိပလ္လာသတာယ ‘‘ဒုက္ခသစ္စ’’န္တိ အဘိဝိသိဋ္ဌေန ဉာဏေန အညာသိံ ပဋိဝိဇ္ဈိံ။ အာဟာရဝသေန ရူပကာယသ္သ ဟာနိဝုဒ္ဓာဒီနံ ပာကဋဘာဝတော ဝိသေသပစ္စယတော စ တသ္သ ‘‘အာဟာရသမုဒယာ’’တိ ဝုတ္တံ။ ဒုက္ခသမုဒယကထာ နာမ ဝဋ္ဋကထာတိ ‘‘သစ္ဆန္ဒရာဂော’’တိ ဝိသေသေတ္ဝာ ဝုတ္တံ။ ဆန္ဒရာဂဂ္ဂဟဏေန စ ဥပာဒာနကမ္မာဝိဇ္ဇာပိ ဂဟိတာ ဧဝ။ ပဋိပန္နာ ဟောန္တီတိ အတ္ထော။ ဝတ္တမာနကာလပ္ပယောဂော ဟေသ ယထာ ‘‘ကုသလံ စိတ္တံ ဥပ္ပန္နံ ဟောတီ’’တိ။ ပတိဋ္ဌဟန္တီတိ ပတိဋ္ဌံ လဘန္တိ။ ကေဝလိနောတိ ဣဓ ဝိမုတ္တိဂုဏေန ပာရိပူရီတိ အာဟ ‘‘သကလိနော ကတသဗ္ဗကိစ္စာ’’တိ။ ယေန တေတိ ယေန အဝသိဋ္ဌေန တေ အသေက္ခေ ပညာပေန္တာ ပညာပေယ္ယုံ, တံ နေသံ ဝဋ္ဋံ သေက္ခာနံ ဝိယ နတ္ထိ ပညာပနာယ။ ဝဋ္ဋန္တိ ကာရဏံ ဝဋ္ဋနဋ္ဌေန ဖလသ္သ ပဝတ္တနဋ္ဌေန။ အသေက္ခဘူမိဝာရောတိ အသေက္ခဘူမိပ္ပဝတ္တိ။
56.Catunnaṃparivaṭṭanavasenāti paccekakkhandhesu catunnaṃ ariyasaccānaṃ parivaṭṭanavasena. Rūpaṃ abbhaññāsinti sakalabhūtupādārūpaṃ kucchitabhāvato tattha ca tucchavipallāsatāya ‘‘dukkhasacca’’nti abhivisiṭṭhena ñāṇena aññāsiṃ paṭivijjhiṃ. Āhāravasena rūpakāyassa hānivuddhādīnaṃ pākaṭabhāvato visesapaccayato ca tassa ‘‘āhārasamudayā’’ti vuttaṃ. Dukkhasamudayakathā nāma vaṭṭakathāti ‘‘sacchandarāgo’’ti visesetvā vuttaṃ. Chandarāgaggahaṇena ca upādānakammāvijjāpi gahitā eva. Paṭipannā hontīti attho. Vattamānakālappayogo hesa yathā ‘‘kusalaṃ cittaṃ uppannaṃ hotī’’ti. Patiṭṭhahantīti patiṭṭhaṃ labhanti. Kevalinoti idha vimuttiguṇena pāripūrīti āha ‘‘sakalino katasabbakiccā’’ti. Yena teti yena avasiṭṭhena te asekkhe paññāpentā paññāpeyyuṃ, taṃ nesaṃ vaṭṭaṃ sekkhānaṃ viya natthi paññāpanāya. Vaṭṭanti kāraṇaṃ vaṭṭanaṭṭhena phalassa pavattanaṭṭhena. Asekkhabhūmivāroti asekkhabhūmippavatti.
ဥပာဒာနပရိပဝတ္တသုတ္တဝဏ္ဏနာ နိဋ္ဌိတာ။
Upādānaparipavattasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဥပာဒာနပရိပဝတ္တသုတ္တံ • 4. Upādānaparipavattasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ဥပာဒာနပရိပဝတ္တသုတ္တဝဏ္ဏနာ • 4. Upādānaparipavattasuttavaṇṇanā
