| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
4. උපාදානපරිපවත්‌තසුත්‌තවණ්‌ණනා
4. Upādānaparipavattasuttavaṇṇanā
56. චතුන්‌නං පරිවට්‌ටනවසෙනාති පච්‌චෙකක්‌ඛන්‌ධෙසු චතුන්‌නං අරියසච්‌චානං පරිවට්‌ටනවසෙන. රූපං අබ්‌භඤ්‌ඤාසින්‌ති සකලභූතුපාදාරූපං කුච්‌ඡිතභාවතො තත්‌ථ ච තුච්‌ඡවිපල්‌ලාසතාය ‘‘දුක්‌ඛසච්‌ච’’න්‌ති අභිවිසිට්‌ඨෙන ඤාණෙන අඤ්‌ඤාසිං පටිවිජ්‌ඣිං. ආහාරවසෙන රූපකායස්‌ස හානිවුද්‌ධාදීනං පාකටභාවතො විසෙසපච්‌චයතො ච තස්‌ස ‘‘ආහාරසමුදයා’’ති වුත්‌තං. දුක්‌ඛසමුදයකථා නාම වට්‌ටකථාති ‘‘සච්‌ඡන්‌දරාගො’’ති විසෙසෙත්‌වා වුත්‌තං. ඡන්‌දරාගග්‌ගහණෙන ච උපාදානකම්‌මාවිජ්‌ජාපි ගහිතා එව. පටිපන්‌නා හොන්‌තීති අත්‌ථො. වත්‌තමානකාලප්‌පයොගො හෙස යථා ‘‘කුසලං චිත්‌තං උප්‌පන්‌නං හොතී’’ති. පතිට්‌ඨහන්‌තීති පතිට්‌ඨං ලභන්‌ති. කෙවලිනොති ඉධ විමුත්‌තිගුණෙන පාරිපූරීති ආහ ‘‘සකලිනො කතසබ්‌බකිච්‌චා’’ති. යෙන තෙති යෙන අවසිට්‌ඨෙන තෙ අසෙක්‌ඛෙ පඤ්‌ඤාපෙන්‌තා පඤ්‌ඤාපෙය්‍යුං, තං නෙසං වට්‌ටං සෙක්‌ඛානං විය නත්‌ථි පඤ්‌ඤාපනාය. වට්‌ටන්‌ති කාරණං වට්‌ටනට්‌ඨෙන ඵලස්‌ස පවත්‌තනට්‌ඨෙන. අසෙක්‌ඛභූමිවාරොති අසෙක්‌ඛභූමිප්‌පවත්‌ති.
56.Catunnaṃparivaṭṭanavasenāti paccekakkhandhesu catunnaṃ ariyasaccānaṃ parivaṭṭanavasena. Rūpaṃ abbhaññāsinti sakalabhūtupādārūpaṃ kucchitabhāvato tattha ca tucchavipallāsatāya ‘‘dukkhasacca’’nti abhivisiṭṭhena ñāṇena aññāsiṃ paṭivijjhiṃ. Āhāravasena rūpakāyassa hānivuddhādīnaṃ pākaṭabhāvato visesapaccayato ca tassa ‘‘āhārasamudayā’’ti vuttaṃ. Dukkhasamudayakathā nāma vaṭṭakathāti ‘‘sacchandarāgo’’ti visesetvā vuttaṃ. Chandarāgaggahaṇena ca upādānakammāvijjāpi gahitā eva. Paṭipannā hontīti attho. Vattamānakālappayogo hesa yathā ‘‘kusalaṃ cittaṃ uppannaṃ hotī’’ti. Patiṭṭhahantīti patiṭṭhaṃ labhanti. Kevalinoti idha vimuttiguṇena pāripūrīti āha ‘‘sakalino katasabbakiccā’’ti. Yena teti yena avasiṭṭhena te asekkhe paññāpentā paññāpeyyuṃ, taṃ nesaṃ vaṭṭaṃ sekkhānaṃ viya natthi paññāpanāya. Vaṭṭanti kāraṇaṃ vaṭṭanaṭṭhena phalassa pavattanaṭṭhena. Asekkhabhūmivāroti asekkhabhūmippavatti.
උපාදානපරිපවත්‌තසුත්‌තවණ්‌ණනා නිට්‌ඨිතා.
Upādānaparipavattasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 4. උපාදානපරිපවත්‌තසුත්‌තං • 4. Upādānaparipavattasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. උපාදානපරිපවත්‌තසුත්‌තවණ්‌ණනා • 4. Upādānaparipavattasuttavaṇṇanā
