| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. உபாதா³னஸுத்தங்
2. Upādānasuttaṃ
52. ஸாவத்தி²யங் விஹரதி…பே॰… ‘‘உபாதா³னியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்; உபாதா³னபச்சயா ப⁴வோ; ப⁴வபச்சயா ஜாதி; ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.
52. Sāvatthiyaṃ viharati…pe… ‘‘upādāniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘ஸெய்யதா²பி , பி⁴க்க²வே, த³ஸன்னங் வா கட்ட²வாஹானங் வீஸாய வா கட்ட²வாஹானங் திங்ஸாய வா கட்ட²வாஹானங் சத்தாரீஸாய வா கட்ட²வாஹானங் மஹாஅக்³கி³க்க²ந்தோ⁴ ஜலெய்ய. தத்ர புரிஸோ காலேன காலங் ஸுக்கா²னி சேவ திணானி பக்கி²பெய்ய, ஸுக்கா²னி ச கோ³மயானி பக்கி²பெய்ய, ஸுக்கா²னி ச கட்டா²னி பக்கி²பெய்ய. ஏவஞ்ஹி ஸோ, பி⁴க்க²வே, மஹாஅக்³கி³க்க²ந்தோ⁴ ததா³ஹாரோ தது³பாதா³னோ சிரங் தீ³க⁴மத்³தா⁴னங் ஜலெய்ய. ஏவமேவ கோ², பி⁴க்க²வே, உபாதா³னியேஸு த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘Seyyathāpi , bhikkhave, dasannaṃ vā kaṭṭhavāhānaṃ vīsāya vā kaṭṭhavāhānaṃ tiṃsāya vā kaṭṭhavāhānaṃ cattārīsāya vā kaṭṭhavāhānaṃ mahāaggikkhandho jaleyya. Tatra puriso kālena kālaṃ sukkhāni ceva tiṇāni pakkhipeyya, sukkhāni ca gomayāni pakkhipeyya, sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘உபாதா³னியேஸு, பி⁴க்க²வே, த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴; ப⁴வனிரோதா⁴ ஜாதினிரோதோ⁴; ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
‘‘Upādāniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
‘‘ஸெய்யதா²பி, பி⁴க்க²வே, த³ஸன்னங் வா கட்ட²வாஹானங் வீஸாய வா திங்ஸாய வா சத்தாரீஸாய வா கட்ட²வாஹானங் மஹாஅக்³கி³க்க²ந்தோ⁴ ஜலெய்ய; தத்ர புரிஸோ ந காலேன காலங் ஸுக்கா²னி சேவ திணானி பக்கி²பெய்ய, ந ஸுக்கா²னி ச கோ³மயானி பக்கி²பெய்ய, ந ஸுக்கா²னி ச கட்டா²னி பக்கி²பெய்ய. ஏவஞ்ஹி ஸோ, பி⁴க்க²வே, மஹாஅக்³கி³க்க²ந்தோ⁴ புரிமஸ்ஸ ச உபாதா³னஸ்ஸ பரியாதா³னா அஞ்ஞஸ்ஸ ச அனுபஹாரா 1 அனாஹாரோ நிப்³பா³யெய்ய. ஏவமேவ கோ², பி⁴க்க²வே, உபாதா³னியேஸு த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி, தண்ஹானிரோதா⁴ உபாதா³னநிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. து³தியங்.
‘‘Seyyathāpi, bhikkhave, dasannaṃ vā kaṭṭhavāhānaṃ vīsāya vā tiṃsāya vā cattārīsāya vā kaṭṭhavāhānaṃ mahāaggikkhandho jaleyya; tatra puriso na kālena kālaṃ sukkhāni ceva tiṇāni pakkhipeyya, na sukkhāni ca gomayāni pakkhipeyya, na sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho purimassa ca upādānassa pariyādānā aññassa ca anupahārā 2 anāhāro nibbāyeyya. Evameva kho, bhikkhave, upādāniyesu dhammesu ādīnavānupassino viharato taṇhā nirujjhati, taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. உபாதா³னஸுத்தவண்ணனா • 2. Upādānasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. உபாதா³னஸுத்தவண்ணனா • 2. Upādānasuttavaṇṇanā
