| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. උපාදානසුත්‌තං
2. Upādānasuttaṃ
52. සාවත්‌ථියං විහරති…පෙ.… ‘‘උපාදානියෙසු, භික්‌ඛවෙ, ධම්‌මෙසු අස්‌සාදානුපස්‌සිනො විහරතො තණ්‌හා පවඩ්‌ඪති. තණ්‌හාපච්‌චයා උපාදානං; උපාදානපච්‌චයා භවො; භවපච්‌චයා ජාති; ජාතිපච්‌චයා ජරාමරණං සොකපරිදෙවදුක්‌ඛදොමනස්‌සුපායාසා සම්‌භවන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති’’.
52. Sāvatthiyaṃ viharati…pe… ‘‘upādāniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘සෙය්‍යථාපි , භික්‌ඛවෙ, දසන්‌නං වා කට්‌ඨවාහානං වීසාය වා කට්‌ඨවාහානං තිංසාය වා කට්‌ඨවාහානං චත්‌තාරීසාය වා කට්‌ඨවාහානං මහාඅග්‌ගික්‌ඛන්‌ධො ජලෙය්‍ය. තත්‍ර පුරිසො කාලෙන කාලං සුක්‌ඛානි චෙව තිණානි පක්‌ඛිපෙය්‍ය, සුක්‌ඛානි ච ගොමයානි පක්‌ඛිපෙය්‍ය, සුක්‌ඛානි ච කට්‌ඨානි පක්‌ඛිපෙය්‍ය. එවඤ්‌හි සො, භික්‌ඛවෙ, මහාඅග්‌ගික්‌ඛන්‌ධො තදාහාරො තදුපාදානො චිරං දීඝමද්‌ධානං ජලෙය්‍ය. එවමෙව ඛො, භික්‌ඛවෙ, උපාදානියෙසු ධම්‌මෙසු අස්‌සාදානුපස්‌සිනො විහරතො තණ්‌හා පවඩ්‌ඪති. තණ්‌හාපච්‌චයා උපාදානං…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති.
‘‘Seyyathāpi , bhikkhave, dasannaṃ vā kaṭṭhavāhānaṃ vīsāya vā kaṭṭhavāhānaṃ tiṃsāya vā kaṭṭhavāhānaṃ cattārīsāya vā kaṭṭhavāhānaṃ mahāaggikkhandho jaleyya. Tatra puriso kālena kālaṃ sukkhāni ceva tiṇāni pakkhipeyya, sukkhāni ca gomayāni pakkhipeyya, sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘උපාදානියෙසු, භික්‌ඛවෙ, ධම්‌මෙසු ආදීනවානුපස්‌සිනො විහරතො තණ්‌හා නිරුජ්‌ඣති. තණ්‌හානිරොධා උපාදානනිරොධො; උපාදානනිරොධා භවනිරොධො; භවනිරොධා ජාතිනිරොධො; ජාතිනිරොධා ජරාමරණං සොකපරිදෙවදුක්‌ඛදොමනස්‌සුපායාසා නිරුජ්‌ඣන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොති.
‘‘Upādāniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
‘‘සෙය්‍යථාපි, භික්‌ඛවෙ, දසන්‌නං වා කට්‌ඨවාහානං වීසාය වා තිංසාය වා චත්‌තාරීසාය වා කට්‌ඨවාහානං මහාඅග්‌ගික්‌ඛන්‌ධො ජලෙය්‍ය; තත්‍ර පුරිසො න කාලෙන කාලං සුක්‌ඛානි චෙව තිණානි පක්‌ඛිපෙය්‍ය, න සුක්‌ඛානි ච ගොමයානි පක්‌ඛිපෙය්‍ය, න සුක්‌ඛානි ච කට්‌ඨානි පක්‌ඛිපෙය්‍ය. එවඤ්‌හි සො, භික්‌ඛවෙ, මහාඅග්‌ගික්‌ඛන්‌ධො පුරිමස්‌ස ච උපාදානස්‌ස පරියාදානා අඤ්‌ඤස්‌ස ච අනුපහාරා 1 අනාහාරො නිබ්‌බායෙය්‍ය. එවමෙව ඛො, භික්‌ඛවෙ, උපාදානියෙසු ධම්‌මෙසු ආදීනවානුපස්‌සිනො විහරතො තණ්‌හා නිරුජ්‌ඣති, තණ්‌හානිරොධා උපාදානනිරොධො…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොතී’’ති. දුතියං.
‘‘Seyyathāpi, bhikkhave, dasannaṃ vā kaṭṭhavāhānaṃ vīsāya vā tiṃsāya vā cattārīsāya vā kaṭṭhavāhānaṃ mahāaggikkhandho jaleyya; tatra puriso na kālena kālaṃ sukkhāni ceva tiṇāni pakkhipeyya, na sukkhāni ca gomayāni pakkhipeyya, na sukkhāni ca kaṭṭhāni pakkhipeyya. Evañhi so, bhikkhave, mahāaggikkhandho purimassa ca upādānassa pariyādānā aññassa ca anupahārā 2 anāhāro nibbāyeyya. Evameva kho, bhikkhave, upādāniyesu dhammesu ādīnavānupassino viharato taṇhā nirujjhati, taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. උපාදානසුත්‌තවණ්‌ණනා • 2. Upādānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. උපාදානසුත්‌තවණ්‌ණනා • 2. Upādānasuttavaṇṇanā
