| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. උපාදානියධම්‌මසුත්‌තං
10. Upādāniyadhammasuttaṃ
123. ‘‘උපාදානියෙ ච, භික්‌ඛවෙ, ධම්‌මෙ දෙසෙස්‌සාමි උපාදානඤ්‌ච. තං සුණාථ. කතමෙ ච, භික්‌ඛවෙ, උපාදානියා ධම්‌මා, කතමඤ්‌ච උපාදානං? සන්‌ති, භික්‌ඛවෙ, චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා. ඉමෙ වුච්‌චන්‌ති, භික්‌ඛවෙ, උපාදානියා ධම්‌මා. යො තත්‌ථ ඡන්‌දරාගො, තං තත්‌ථ උපාදානං…පෙ.… සන්‌ති, භික්‌ඛවෙ, ජිව්‌හාවිඤ්‌ඤෙය්‍යා රසා…පෙ.… සන්‌ති, භික්‌ඛවෙ, මනොවිඤ්‌ඤෙය්‍යා ධම්‌මා ඉට්‌ඨා කන්‌තා මනාපා පියරූපා කාමූපසංහිතා රජනීයා. ඉමෙ වුච්‌චන්‌ති, භික්‌ඛවෙ, උපාදානියා ධම්‌මා. යො තත්‌ථ ඡන්‌දරාගො තං තත්‌ථ උපාදාන’’න්‌ති. දසමං.
123. ‘‘Upādāniye ca, bhikkhave, dhamme desessāmi upādānañca. Taṃ suṇātha. Katame ca, bhikkhave, upādāniyā dhammā, katamañca upādānaṃ? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, upādāniyā dhammā. Yo tattha chandarāgo, taṃ tattha upādānaṃ…pe… santi, bhikkhave, jivhāviññeyyā rasā…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, upādāniyā dhammā. Yo tattha chandarāgo taṃ tattha upādāna’’nti. Dasamaṃ.
ලොකකාමගුණවග්‌ගො ද්‌වාදසමො.
Lokakāmaguṇavaggo dvādasamo.
තස්‌සුද්‌දානං –
Tassuddānaṃ –
මාරපාසෙන ද්‌වෙ වුත්‌තා, ලොකකාමගුණෙන ච;
Mārapāsena dve vuttā, lokakāmaguṇena ca;
සක්‌කො පඤ්‌චසිඛො චෙව, සාරිපුත්‌තො ච රාහුලො;
Sakko pañcasikho ceva, sāriputto ca rāhulo;
සංයොජනං උපාදානං, වග්‌ගො තෙන පවුච්‌චතීති.
Saṃyojanaṃ upādānaṃ, vaggo tena pavuccatīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9-10. සංයොජනියධම්‌මසුත්‌තාදිවණ්‌ණනා • 9-10. Saṃyojaniyadhammasuttādivaṇṇanā
