| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
4. உபாதி³ன்னத்திகவண்ணனா
4. Upādinnattikavaṇṇanā
15. உபாதி³ன்னத்திகே அனுபாதி³ன்னஅனுபாதா³னியங் த⁴ம்மங் படிச்ச அனுபாதி³ன்னஅனுபாதா³னியோ த⁴ம்மோ உப்பஜ்ஜதி நாதி⁴பதிபச்சயாதி ஏதேன ஸயங் அதி⁴பதிபூ⁴தத்தா அவிரஹிதாரம்மணாதி⁴பதீஸுபி அதி⁴பதி து³விதே⁴னபி அதி⁴பதிபச்சயேன உப்பஜ்ஜதீதி ந வத்தப்³போ³, அயமேதஸ்ஸ ஸபா⁴வோதி த³ஸ்ஸேதி.
15. Upādinnattike anupādinnaanupādāniyaṃ dhammaṃ paṭicca anupādinnaanupādāniyo dhammo uppajjati nādhipatipaccayāti etena sayaṃ adhipatibhūtattā avirahitārammaṇādhipatīsupi adhipati duvidhenapi adhipatipaccayena uppajjatīti na vattabbo, ayametassa sabhāvoti dasseti.
72. உபாதி³ன்னுபாதா³னியோ கப³ளீகாராஹாரோ உபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோதி எத்த² கம்மஜானங் ரூபானங் அப்³ப⁴ந்தரக³தா ஓஜா தஸ்ஸேவ கம்மஜகாயஸ்ஸ ரூபஜீவிதிந்த்³ரியங் விய கடத்தாரூபானங் அனுபாலனுபத்த²ம்ப⁴னவஸேன பச்சயோ, ந ஜனகவஸேனாதி அயமத்தோ² அட்ட²கதா²யங் வுத்தோ. ஏதஸ்மிங் பன அத்தே² ஸதி உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ பச்சா²ஜாதிந்த்³ரியந்தி எத்த² ‘‘ஆஹார’’ந்திபி வத்தப்³ப³ங், யதி³ ச கம்மஜா ஓஜா ஸகலாபரூபானமேவ ஆஹாரபச்சயோ ஹோதி, ஏவங் ஸதி ‘‘உபாதி³ன்னுபாதா³னியோ கப³ளீகாராஹாரோ அனுபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோ’’தி ந வத்தப்³ப³ங் ஸியா, வுத்தஞ்சித³ங், தம்பி அனஜ்ஜோ²ஹடாய ஸஸந்தானக³தாய உபாதி³ன்னோஜாய அனுபாதி³ன்னுபாதா³னியஸ்ஸ காயஸ்ஸ ஆஹாரபச்சயங் ஸந்தா⁴ய வுத்தங். ஏவஞ்ச ஸதி ‘‘உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா அனுபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ’’தி (பட்டா²॰ 1.4.85) அயம்பி பஞ்ஹோ பச்சா²ஜாதாஹாரவஸேன உத்³த⁴ரிதப்³போ³ ஸியா, தஸ்மா அஜ்ஜோ²ஹடஸ்ஸ உபாதி³ன்னாஹாரஸ்ஸ லோகுத்தரக்க²ணே அபா⁴வதோ து³மூலகேஸு பட²மபஞ்ஹே ‘‘ஆஹார’’ந்தி ந வுத்தங். து³தியபஞ்ஹோ ச ந உத்³த⁴டோ, ந இதரஸ்ஸ உபாதி³ன்னாஹாரஸ்ஸ காமப⁴வே அஸம்ப⁴வாபா⁴வதோதி அஜ்ஜோ²ஹடமேவ மண்டூ³காதி³ஸரீரக³தங் உபாதி³ன்னாஹாரங் ஸந்தா⁴ய ‘‘உபாதி³ன்னுபாதா³னியோ கப³ளீகாராஹாரோ உபாதி³ன்னுபாதா³னியஸ்ஸ ச அனுபாதி³ன்னுபாதா³னியஸ்ஸ ச காயஸ்ஸ ஆஹாரபச்சயேன பச்சயோ’’தி (பட்டா²॰ 1.4.74) வத³ந்தானங் வாதோ³ ப³லவதரோ. ந ஹி அஜ்ஜோ²ஹடமத்தாவ மண்டூ³காத³யோ குச்சி²வித்த²தங் ந கரொந்தி, ந ச ப³லங் ந உபஜாயந்தி, ந ச ரூபவிஸேஸோ ந விஞ்ஞாயதீதி.
72. Upādinnupādāniyo kabaḷīkārāhāro upādinnupādāniyassa kāyassa āhārapaccayena paccayoti ettha kammajānaṃ rūpānaṃ abbhantaragatā ojā tasseva kammajakāyassa rūpajīvitindriyaṃ viya kaṭattārūpānaṃ anupālanupatthambhanavasena paccayo, na janakavasenāti ayamattho aṭṭhakathāyaṃ vutto. Etasmiṃ pana atthe sati upādinnupādāniyo ca anupādinnaanupādāniyo ca dhammā upādinnupādāniyassa dhammassa atthipaccayena paccayo pacchājātindriyanti ettha ‘‘āhāra’’ntipi vattabbaṃ, yadi ca kammajā ojā sakalāparūpānameva āhārapaccayo hoti, evaṃ sati ‘‘upādinnupādāniyo kabaḷīkārāhāro anupādinnupādāniyassa kāyassa āhārapaccayena paccayo’’ti na vattabbaṃ siyā, vuttañcidaṃ, tampi anajjhohaṭāya sasantānagatāya upādinnojāya anupādinnupādāniyassa kāyassa āhārapaccayaṃ sandhāya vuttaṃ. Evañca sati ‘‘upādinnupādāniyo ca anupādinnaanupādāniyo ca dhammā anupādinnupādāniyassa dhammassa atthipaccayena paccayo’’ti (paṭṭhā. 1.4.85) ayampi pañho pacchājātāhāravasena uddharitabbo siyā, tasmā ajjhohaṭassa upādinnāhārassa lokuttarakkhaṇe abhāvato dumūlakesu paṭhamapañhe ‘‘āhāra’’nti na vuttaṃ. Dutiyapañho ca na uddhaṭo, na itarassa upādinnāhārassa kāmabhave asambhavābhāvatoti ajjhohaṭameva maṇḍūkādisarīragataṃ upādinnāhāraṃ sandhāya ‘‘upādinnupādāniyo kabaḷīkārāhāro upādinnupādāniyassa ca anupādinnupādāniyassa ca kāyassa āhārapaccayena paccayo’’ti (paṭṭhā. 1.4.74) vadantānaṃ vādo balavataro. Na hi ajjhohaṭamattāva maṇḍūkādayo kucchivitthataṃ na karonti, na ca balaṃ na upajāyanti, na ca rūpaviseso na viññāyatīti.
‘‘அனுபாதி³ன்னஅனுபாதா³னியோ த⁴ம்மோ உபாதி³ன்னுபாதா³னியஸ்ஸ ச அனுபாதி³ன்னஅனுபாதா³னியஸ்ஸ ச த⁴ம்மஸ்ஸ அத்தி²பச்சயேன பச்சயோ ஸஹஜாதங் பச்சா²ஜாத’’ந்தி (பட்டா²॰ 1.4.83) ஏவமாதீ³ஹி இத⁴ வுத்தேஹி ஏகமூலகது³கதிகாவஸானபஞ்ஹவிஸ்ஸஜ்ஜனேஹி ‘‘குஸலோ த⁴ம்மோ குஸலஸ்ஸ ச அப்³யாகதஸ்ஸ ச த⁴ம்மஸ்ஸ அத்தி²பச்சயேன பச்சயோ ஸஹஜாத’’ந்திஆதி³னா இத⁴ து³தியது³காவஸானே விய விஸ்ஸஜ்ஜனங் லப்³ப⁴தீதி விஞ்ஞாயதி. ஸுகா²வபோ³த⁴னத்த²ங் பன தத்த² ஸஹஜாதவஸேனேவ விஸ்ஸஜ்ஜனங் கதங். பச்சனீயே பன ஸஹஜாதஸ்ஸேவ அபடிக்கே²பே லாப⁴தோ, படிக்கே²பே ச அலாப⁴தோ ஸஹஜாதபச்சயவஸேனேவ ஏகமூலகது³காவஸானா தத்த² உத்³த⁴டா, இத⁴ பனேதேஹி விஸ்ஸஜ்ஜனேஹி ஏகோ த⁴ம்மோ ஸஹஜாதாதீ³ஸு அத்தி²பச்சயவிஸேஸேஸு அனேகேஹிபி அனேகேஸங் த⁴ம்மானங் ஏகோ அத்தி²பச்சயோ ஹோதீதி த³ஸ்ஸிதங் ஹோதி. ஏகோ ஹி த⁴ம்மோ ஏகஸ்ஸ த⁴ம்மஸ்ஸ ஏகேனேவ அத்தி²பச்சயவிஸேஸேன அத்தி²பச்சயோ ஹோதி, ஏகோ அனேகேஸங் ஏகேனபி அனேகேஹிபி, ததா² அனேகோ ஏகஸ்ஸ, அனேகோ அனேகேஸங் ஸமானத்தே பச்சயுப்பன்னத⁴ம்மானங், அத்தி²பச்சயவிஸேஸேஸு பன பஞ்சஸு ஸஹஜாதங் புரேஜாதேனேவ ஸஹ அத்தி²பச்சயோ ஹோதி, அனஞ்ஞத⁴ம்மத்தே பச்சா²ஜாதேன ச, ந நானாத⁴ம்மத்தே.
‘‘Anupādinnaanupādāniyo dhammo upādinnupādāniyassa ca anupādinnaanupādāniyassa ca dhammassa atthipaccayena paccayo sahajātaṃ pacchājāta’’nti (paṭṭhā. 1.4.83) evamādīhi idha vuttehi ekamūlakadukatikāvasānapañhavissajjanehi ‘‘kusalo dhammo kusalassa ca abyākatassa ca dhammassa atthipaccayena paccayo sahajāta’’ntiādinā idha dutiyadukāvasāne viya vissajjanaṃ labbhatīti viññāyati. Sukhāvabodhanatthaṃ pana tattha sahajātavaseneva vissajjanaṃ kataṃ. Paccanīye pana sahajātasseva apaṭikkhepe lābhato, paṭikkhepe ca alābhato sahajātapaccayavaseneva ekamūlakadukāvasānā tattha uddhaṭā, idha panetehi vissajjanehi eko dhammo sahajātādīsu atthipaccayavisesesu anekehipi anekesaṃ dhammānaṃ eko atthipaccayo hotīti dassitaṃ hoti. Eko hi dhammo ekassa dhammassa ekeneva atthipaccayavisesena atthipaccayo hoti, eko anekesaṃ ekenapi anekehipi, tathā aneko ekassa, aneko anekesaṃ samānatte paccayuppannadhammānaṃ, atthipaccayavisesesu pana pañcasu sahajātaṃ purejāteneva saha atthipaccayo hoti, anaññadhammatte pacchājātena ca, na nānādhammatte.
யதி³ ஸியா, ‘‘உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ பச்சா²ஜாதங் இந்த்³ரிய’’ந்தி எத்த² ‘‘ஸஹஜாத’’ந்திபி வத்தப்³ப³ங் ஸியா. கம்மஜானஞ்ஹி பூ⁴தானங் ஸஹஜாதானங் பச்சா²ஜாதானஞ்ச லோகுத்தரானங் ஏகக்க²ணே லப்³ப⁴மானானம்பி ஏகோ அத்தி²பச்சயபா⁴வோ நத்தி² ஸஹஜாதபச்சா²ஜாதானங் நானாத⁴ம்மானங் விருத்³த⁴ஸபா⁴வத்தாதி தங் ந வுத்தந்தி வேதி³தப்³ப³ங். ஏவஞ்ச கத்வா பச்சனீயே ச ‘‘நஇந்த்³ரியே பா³வீஸா’’தி வுத்தங். அஞ்ஞதா² ஹி இந்த்³ரியபடிக்கே²பேபி ஸஹஜாதபச்சா²ஜாதவஸேன தஸ்ஸ பஞ்ஹஸ்ஸ லாப⁴தோ ‘‘தேவீஸா’’தி வத்தப்³ப³ங் ஸியாதி. புரேஜாதங் ஸஹஜாதேனேவ ஸஹ அத்தி²பச்சயோ ஹோதி, ந இதரேஹி, தம்பி வத்து² தங்ஸஹிதபுரேஜாதமேவ, ந இதரங். குஸலத்திகே ஹி பஞ்ஹாவாரே ‘‘நவிப்பயுத்தபச்சயா அத்தி²யா பஞ்சா’’தி (பட்டா²॰ 1.1.649) வுத்தங், ஸனித³ஸ்ஸனத்திகே பன ‘‘விப்பயுத்தே பா³வீஸா’’தி. யங் பன தத்த² அத்தி²விப⁴ங்கே³ பச்சயுத்³தா⁴ரே ச திமூலகேகாவஸானங் உத்³த⁴டங், தங் வத்து²ஸஹிதஸ்ஸ ஆரம்மணபுரேஜாதஸ்ஸ ஸஹஜாதேன, ஸஹ பச்சயபா⁴வதோதி பச்சா²ஜாதங் ஆஹாரிந்த்³ரியேஹேவ, அனஞ்ஞத⁴ம்மத்தே ச ஸஹஜாதேன ச, ஆஹாரோ பச்சா²ஜாதிந்த்³ரியேஹேவ, இந்த்³ரியங் பச்சா²ஜாதாஹாரேனாதி ஏவமேதங் அத்தி²பச்சயவிபா⁴க³ங் ஸல்லக்கெ²த்வா அனுலோமே பச்சனீயாதீ³ஸு ச லப்³ப⁴மானா பஞ்ஹா உத்³த⁴ரிதப்³பா³.
Yadi siyā, ‘‘upādinnupādāniyo ca anupādinnaanupādāniyo ca dhammā upādinnupādāniyassa dhammassa atthipaccayena paccayo pacchājātaṃ indriya’’nti ettha ‘‘sahajāta’’ntipi vattabbaṃ siyā. Kammajānañhi bhūtānaṃ sahajātānaṃ pacchājātānañca lokuttarānaṃ ekakkhaṇe labbhamānānampi eko atthipaccayabhāvo natthi sahajātapacchājātānaṃ nānādhammānaṃ viruddhasabhāvattāti taṃ na vuttanti veditabbaṃ. Evañca katvā paccanīye ca ‘‘naindriye bāvīsā’’ti vuttaṃ. Aññathā hi indriyapaṭikkhepepi sahajātapacchājātavasena tassa pañhassa lābhato ‘‘tevīsā’’ti vattabbaṃ siyāti. Purejātaṃ sahajāteneva saha atthipaccayo hoti, na itarehi, tampi vatthu taṃsahitapurejātameva, na itaraṃ. Kusalattike hi pañhāvāre ‘‘navippayuttapaccayā atthiyā pañcā’’ti (paṭṭhā. 1.1.649) vuttaṃ, sanidassanattike pana ‘‘vippayutte bāvīsā’’ti. Yaṃ pana tattha atthivibhaṅge paccayuddhāre ca timūlakekāvasānaṃ uddhaṭaṃ, taṃ vatthusahitassa ārammaṇapurejātassa sahajātena, saha paccayabhāvatoti pacchājātaṃ āhārindriyeheva, anaññadhammatte ca sahajātena ca, āhāro pacchājātindriyeheva, indriyaṃ pacchājātāhārenāti evametaṃ atthipaccayavibhāgaṃ sallakkhetvā anulome paccanīyādīsu ca labbhamānā pañhā uddharitabbā.
உபாதி³ன்னத்திகவண்ணனா நிட்டி²தா.
Upādinnattikavaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. உபாதி³ன்னத்திகவண்ணனா • 4. Upādinnattikavaṇṇanā
