| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
४. उपादिन्नत्तिकवण्णना
4. Upādinnattikavaṇṇanā
५१. उपादिन्नुपादानियत्तिकस्स पञ्हावारे वत्थु उपादानियानं खन्धानं पुरेजातपच्चयेन पच्चयोति पवत्तिं सन्धाय वुत्तं। पटिसन्धियं पन तं पुरेजातं न होति।
51. Upādinnupādāniyattikassa pañhāvāre vatthu upādāniyānaṃ khandhānaṃ purejātapaccayena paccayoti pavattiṃ sandhāya vuttaṃ. Paṭisandhiyaṃ pana taṃ purejātaṃ na hoti.
७२. उपादिन्नुपादानियो कबळीकारो आहारो उपादिन्नुपादानियस्स कायस्स आहारपच्चयेन पच्चयोति एत्थ उपादिन्नुपादानियो कबळीकाराहारो नाम कम्मसमुट्ठानानं रूपानं अब्भन्तरगता ओजा। उपादिन्नुपादानियस्स कायस्साति तस्सेव कम्मसमुट्ठानरूपकायस्स आहारपच्चयेन पच्चयो। रूपजीवितिन्द्रियं विय कटत्तारूपानं अनुपालनउपत्थम्भनवसेन पच्चयो, न जनकवसेन। यं पन मण्डूकादयो गिलित्वा ठितानं अहिआदीनं कायस्स जीवमानकमण्डूकादिसरीरे ओजा आहारपच्चयेन पच्चयोति वदन्ति, तं न गहेतब्बं। न हि जीवमानकसरीरे ओजा अञ्ञस्स सरीरस्स आहारपच्चयतं साधेति। अनुपादिन्नुपादानियस्स कायस्साति एत्थ पन जनकवसेनापि लब्भति। उपादिन्नुपादानियस्स च अनुपादिन्नुपादानियस्स चाति एत्थ एकस्स उपत्थम्भकवसेन, एकस्स जनकवसेन, उभिन्नम्पि वा उपत्थम्भकवसेनेव वुत्तो। द्वे पन आहारा एकतो पच्चया होन्ता उपत्थम्भकाव होन्ति, न जनका। सेसमेत्थ पाळिमेव साधुकं ओलोकेत्वा वेदितब्बं।
72. Upādinnupādāniyo kabaḷīkāro āhāro upādinnupādāniyassa kāyassa āhārapaccayena paccayoti ettha upādinnupādāniyo kabaḷīkārāhāro nāma kammasamuṭṭhānānaṃ rūpānaṃ abbhantaragatā ojā. Upādinnupādāniyassa kāyassāti tasseva kammasamuṭṭhānarūpakāyassa āhārapaccayena paccayo. Rūpajīvitindriyaṃ viya kaṭattārūpānaṃ anupālanaupatthambhanavasena paccayo, na janakavasena. Yaṃ pana maṇḍūkādayo gilitvā ṭhitānaṃ ahiādīnaṃ kāyassa jīvamānakamaṇḍūkādisarīre ojā āhārapaccayena paccayoti vadanti, taṃ na gahetabbaṃ. Na hi jīvamānakasarīre ojā aññassa sarīrassa āhārapaccayataṃ sādheti. Anupādinnupādāniyassa kāyassāti ettha pana janakavasenāpi labbhati. Upādinnupādāniyassa ca anupādinnupādāniyassa cāti ettha ekassa upatthambhakavasena, ekassa janakavasena, ubhinnampi vā upatthambhakavaseneva vutto. Dve pana āhārā ekato paccayā hontā upatthambhakāva honti, na janakā. Sesamettha pāḷimeva sādhukaṃ oloketvā veditabbaṃ.
उपादिन्नत्तिकवण्णना।
Upādinnattikavaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / पट्ठानपाळि • Paṭṭhānapāḷi / ४. उपादिन्नत्तिकं • 4. Upādinnattikaṃ
