| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៤. ឧបាទិន្នត្តិកវណ្ណនា
4. Upādinnattikavaṇṇanā
៥១. ឧបាទិន្នុបាទានិយត្តិកស្ស បញ្ហាវារេ វត្ថុ ឧបាទានិយានំ ខន្ធានំ បុរេជាតបច្ចយេន បច្ចយោតិ បវត្តិំ សន្ធាយ វុត្តំ។ បដិសន្ធិយំ បន តំ បុរេជាតំ ន ហោតិ។
51. Upādinnupādāniyattikassa pañhāvāre vatthu upādāniyānaṃ khandhānaṃ purejātapaccayena paccayoti pavattiṃ sandhāya vuttaṃ. Paṭisandhiyaṃ pana taṃ purejātaṃ na hoti.
៧២. ឧបាទិន្នុបាទានិយោ កពឡីការោ អាហារោ ឧបាទិន្នុបាទានិយស្ស កាយស្ស អាហារបច្ចយេន បច្ចយោតិ ឯត្ថ ឧបាទិន្នុបាទានិយោ កពឡីការាហារោ នាម កម្មសមុដ្ឋានានំ រូបានំ អព្ភន្តរគតា ឱជា។ ឧបាទិន្នុបាទានិយស្ស កាយស្សាតិ តស្សេវ កម្មសមុដ្ឋានរូបកាយស្ស អាហារបច្ចយេន បច្ចយោ។ រូបជីវិតិន្ទ្រិយំ វិយ កដត្តារូបានំ អនុបាលនឧបត្ថម្ភនវសេន បច្ចយោ, ន ជនកវសេន។ យំ បន មណ្ឌូកាទយោ គិលិត្វា ឋិតានំ អហិអាទីនំ កាយស្ស ជីវមានកមណ្ឌូកាទិសរីរេ ឱជា អាហារបច្ចយេន បច្ចយោតិ វទន្តិ, តំ ន គហេតព្ពំ។ ន ហិ ជីវមានកសរីរេ ឱជា អញ្ញស្ស សរីរស្ស អាហារបច្ចយតំ សាធេតិ។ អនុបាទិន្នុបាទានិយស្ស កាយស្សាតិ ឯត្ថ បន ជនកវសេនាបិ លព្ភតិ។ ឧបាទិន្នុបាទានិយស្ស ច អនុបាទិន្នុបាទានិយស្ស ចាតិ ឯត្ថ ឯកស្ស ឧបត្ថម្ភកវសេន, ឯកស្ស ជនកវសេន, ឧភិន្នម្បិ វា ឧបត្ថម្ភកវសេនេវ វុត្តោ។ ទ្វេ បន អាហារា ឯកតោ បច្ចយា ហោន្តា ឧបត្ថម្ភកាវ ហោន្តិ, ន ជនកា។ សេសមេត្ថ បាឡិមេវ សាធុកំ ឱលោកេត្វា វេទិតព្ពំ។
72. Upādinnupādāniyo kabaḷīkāro āhāro upādinnupādāniyassa kāyassa āhārapaccayena paccayoti ettha upādinnupādāniyo kabaḷīkārāhāro nāma kammasamuṭṭhānānaṃ rūpānaṃ abbhantaragatā ojā. Upādinnupādāniyassa kāyassāti tasseva kammasamuṭṭhānarūpakāyassa āhārapaccayena paccayo. Rūpajīvitindriyaṃ viya kaṭattārūpānaṃ anupālanaupatthambhanavasena paccayo, na janakavasena. Yaṃ pana maṇḍūkādayo gilitvā ṭhitānaṃ ahiādīnaṃ kāyassa jīvamānakamaṇḍūkādisarīre ojā āhārapaccayena paccayoti vadanti, taṃ na gahetabbaṃ. Na hi jīvamānakasarīre ojā aññassa sarīrassa āhārapaccayataṃ sādheti. Anupādinnupādāniyassa kāyassāti ettha pana janakavasenāpi labbhati. Upādinnupādāniyassa ca anupādinnupādāniyassa cāti ettha ekassa upatthambhakavasena, ekassa janakavasena, ubhinnampi vā upatthambhakavaseneva vutto. Dve pana āhārā ekato paccayā hontā upatthambhakāva honti, na janakā. Sesamettha pāḷimeva sādhukaṃ oloketvā veditabbaṃ.
ឧបាទិន្នត្តិកវណ្ណនា។
Upādinnattikavaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / បដ្ឋានបាឡិ • Paṭṭhānapāḷi / ៤. ឧបាទិន្នត្តិកំ • 4. Upādinnattikaṃ
