| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
22. உபாஹனநித்³தே³ஸவண்ணனா
22. Upāhananiddesavaṇṇanā
175. கு³ணங்கு³ணூபாஹனாதி (மஹாவ॰ அட்ட²॰ 245) சதுபடலதோ பட்டா²ய வுச்சதி, ந ஏகத்³விதிபடலதோ பட்டா²ய ‘‘அனுஜானாமி, பி⁴க்க²வே, ஏகபலாஸிகங் உபாஹனங், ந பி⁴க்க²வே தி³கு³ணா உபாஹனா தா⁴ரேதப்³பா³, ந திகு³ணா உபாஹனா தா⁴ரேதப்³பா³, ந கு³ணங்கு³ணூபாஹனா தா⁴ரேதப்³பா³, யோ தா⁴ரெய்ய, ஆபத்தி து³க்கடஸ்ஸா’’தி (மஹாவ॰ 245) வுத்தத்தா. ‘‘அனுஜானாமி, பி⁴க்க²வே, ஓமுக்கங் கு³ணங்கு³ணூபாஹனங், ந பி⁴க்க²வே நவா கு³ணங்கு³ணூபாஹனா தா⁴ரேதப்³பா³, யோ தா⁴ரெய்ய, ஆபத்தி து³க்கடஸ்ஸா’’தி (மஹாவ॰ 247) வுத்தத்தா ‘‘நவா’’தி வுத்தங். ஸப்³ப³த்தா²பி மஜ்ஜி²மதே³ஸே கி³லானோபி நவங் கு³ணங்கு³ணூபாஹனங் ந லப⁴தி, ஏகவாரம்பி அஞ்ஞேஹி பரிபு⁴த்தங் ஓமுக்கஉபாஹனஸங்கா²தங் லப⁴தி, பச்சந்திமேஸு ஜனபதே³ஸு கி³லானோ நவம்பி லப⁴தீதி வேதி³தப்³ப³ங் ‘‘அனுஜானாமி, பி⁴க்க²வே, ஸப்³ப³பச்சந்திமேஸு ஜனபதே³ஸு கு³ணங்கு³ணூபாஹன’’ந்தி (மஹாவ॰ 259) அவிஸேஸேன வுத்தத்தா.
175.Guṇaṅguṇūpāhanāti (mahāva. aṭṭha. 245) catupaṭalato paṭṭhāya vuccati, na ekadvitipaṭalato paṭṭhāya ‘‘anujānāmi, bhikkhave, ekapalāsikaṃ upāhanaṃ, na bhikkhave diguṇā upāhanā dhāretabbā, na tiguṇā upāhanā dhāretabbā, na guṇaṅguṇūpāhanā dhāretabbā, yo dhāreyya, āpatti dukkaṭassā’’ti (mahāva. 245) vuttattā. ‘‘Anujānāmi, bhikkhave, omukkaṃ guṇaṅguṇūpāhanaṃ, na bhikkhave navā guṇaṅguṇūpāhanā dhāretabbā, yo dhāreyya, āpatti dukkaṭassā’’ti (mahāva. 247) vuttattā ‘‘navā’’ti vuttaṃ. Sabbatthāpi majjhimadese gilānopi navaṃ guṇaṅguṇūpāhanaṃ na labhati, ekavārampi aññehi paribhuttaṃ omukkaupāhanasaṅkhātaṃ labhati, paccantimesu janapadesu gilāno navampi labhatīti veditabbaṃ ‘‘anujānāmi, bhikkhave, sabbapaccantimesu janapadesu guṇaṅguṇūpāhana’’nti (mahāva. 259) avisesena vuttattā.
ஸப்³ப³ஸ்ஸாதி கி³லானஸ்ஸாபி அகி³லானஸ்ஸாபீதி அத்தோ². மஜ்ஜி²மதே³ஸேபி பச்சந்திமதே³ஸேபி ஆராமே ஆராமூபசாரே கி³லானஸ்ஸாபி அகி³லானஸ்ஸாபி ‘‘அனுஜானாமி, பி⁴க்க²வே, அஜ்ஜா²ராமே உபாஹனங் தா⁴ரேது’’ந்தி (மஹாவ॰ 249) வுத்தத்தா கப்பியந்தி அத்தோ². ஸப்³ப³த்தா²தி ஆராமேபி கா³மேபி. அகல்லகஸ்ஸாதி கி³லானஸ்ஸ. எத்த² பன மஜ்ஜி²மதே³ஸே கி³லானஸ்ஸ கு³ணங்கு³ணூபாஹனா பரிபு⁴த்தாவ ஆராமேபி கா³மேபி வட்டதி, பச்சந்திமதே³ஸே அபரிபு⁴த்தாபி. மஜ்ஜி²மதே³ஸேபி பச்சந்திமதே³ஸேபி ப⁴க³வதா கி³லானஸ்ஸேவ உபாஹனா அனுஞ்ஞாதா ‘‘அனுஜானாமி, பி⁴க்க²வே, யஸ்ஸ பாதா³ வா து³க்கா², பாதா³ வா ப²லிதா, பாத³கி²லோ வா ஆபா³தோ⁴, உபாஹனங் தா⁴ரேது’’ந்தி (மஹாவ॰ 249) ச ‘‘அனுஜானாமி, பி⁴க்க²வே, கி³லானேன பி⁴க்கு²னா ஸஉபாஹனேன கா³மங் பவிஸிது’’ந்தி (மஹாவ॰ 256) வுத்தத்தா ச. மஜ்ஜி²மதே³ஸே ச கி³லானோ நவங் கு³ணங்கு³ணூபாஹனங் தா⁴ரேதுங் யதி³ லப⁴தி, கத²ங் பதே³ஸபஞ்ஞத்தி ஹோதீதி? ஸப்³ப³த்த² பன ப⁴க³வதா கி³லானஸ்ஸேவ உபாஹனா அனுஞ்ஞாதா, தஸ்மா மஜ்ஜி²மதே³ஸே கி³லானோ நவங் கு³ணங்கு³ணூபாஹனங் லப⁴தீதி க³ஹேதப்³ப³ந்தி வத³ந்தி.
Sabbassāti gilānassāpi agilānassāpīti attho. Majjhimadesepi paccantimadesepi ārāme ārāmūpacāre gilānassāpi agilānassāpi ‘‘anujānāmi, bhikkhave, ajjhārāme upāhanaṃ dhāretu’’nti (mahāva. 249) vuttattā kappiyanti attho. Sabbatthāti ārāmepi gāmepi. Akallakassāti gilānassa. Ettha pana majjhimadese gilānassa guṇaṅguṇūpāhanā paribhuttāva ārāmepi gāmepi vaṭṭati, paccantimadese aparibhuttāpi. Majjhimadesepi paccantimadesepi bhagavatā gilānasseva upāhanā anuññātā ‘‘anujānāmi, bhikkhave, yassa pādā vā dukkhā, pādā vā phalitā, pādakhilo vā ābādho, upāhanaṃ dhāretu’’nti (mahāva. 249) ca ‘‘anujānāmi, bhikkhave, gilānena bhikkhunā saupāhanena gāmaṃ pavisitu’’nti (mahāva. 256) vuttattā ca. Majjhimadese ca gilāno navaṃ guṇaṅguṇūpāhanaṃ dhāretuṃ yadi labhati, kathaṃ padesapaññatti hotīti? Sabbattha pana bhagavatā gilānasseva upāhanā anuññātā, tasmā majjhimadese gilāno navaṃ guṇaṅguṇūpāhanaṃ labhatīti gahetabbanti vadanti.
176-9. ஸப்³பா³வ நீலகா (மஹாவ॰ 246; மஹாவ॰ அட்ட²॰ 246) ஸப்³ப³னீலகா. ஏஸ நயோ ஸப்³ப³த்த² ஓதா³தகாதீ³ஸுபி. ஓதா³தங் பன நேவ பாளியங், ந அட்ட²கதா²யங் படிக்கி²த்தங், அனுலோமவஸேன பன இத⁴ படிக்கி²த்தந்தி வேதி³தப்³ப³ங். மஹாரங்க³ரத்தா ஸதபதி³பிட்டி²வண்ணா. மஹானாமரங்க³ரத்தா மந்த³ரத்தா. மஞ்ஜெட்டி²கா கணவேரபுப்ப²வண்ணா. புப்ப²லதாதீ³ஹி விசித்தா சித்ரா. நீலபீதாதி³வத்³தி⁴காதி எத்த² ஆதி³-ஸத்³தே³ன ஓதா³தலோஹிதமஞ்ஜெட்டி²கமஹாரங்க³மஹானாமரங்க³ரத்தாதி³வஸேன வத்³தி⁴கா க³ஹிதா. ஸீஹப்³யக்³கு⁴த்³தா³ஜினதீ³பீனங் சம்மேஹி சாதி ஸம்ப³ந்தோ⁴. கோசீதி கி³லானோபி அகி³லானோபி.
176-9. Sabbāva nīlakā (mahāva. 246; mahāva. aṭṭha. 246) sabbanīlakā. Esa nayo sabbattha odātakādīsupi. Odātaṃ pana neva pāḷiyaṃ, na aṭṭhakathāyaṃ paṭikkhittaṃ, anulomavasena pana idha paṭikkhittanti veditabbaṃ. Mahāraṅgarattā satapadipiṭṭhivaṇṇā. Mahānāmaraṅgarattā mandarattā. Mañjeṭṭhikā kaṇaverapupphavaṇṇā. Pupphalatādīhi vicittā citrā. Nīlapītādivaddhikāti ettha ādi-saddena odātalohitamañjeṭṭhikamahāraṅgamahānāmaraṅgarattādivasena vaddhikā gahitā. Sīhabyagghuddājinadīpīnaṃ cammehi cāti sambandho. Kocīti gilānopi agilānopi.
180. ஸகலங் வா ஏகதே³ஸகங் வா ரஜனங் சோளேன (மஹாவ॰ அட்ட²॰ 246) புஞ்சி²த்வா வளஞ்ஜெய்யாதி அத்தோ². க²ல்லகாதி³கங் பன ஸப்³ப³ங் ஹாரித்வா வளஞ்ஜேதப்³ப³ங். உபாஹனவினிச்ச²யோ.
180. Sakalaṃ vā ekadesakaṃ vā rajanaṃ coḷena (mahāva. aṭṭha. 246) puñchitvā vaḷañjeyyāti attho. Khallakādikaṃ pana sabbaṃ hāritvā vaḷañjetabbaṃ. Upāhanavinicchayo.
உபாஹனநித்³தே³ஸவண்ணனா நிட்டி²தா.
Upāhananiddesavaṇṇanā niṭṭhitā.
