| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
15. உபஜ்ஜா²சரியவத்தனித்³தே³ஸவண்ணனா
15. Upajjhācariyavattaniddesavaṇṇanā
145. உபஜ்ஜா²சரியேதி எத்த² (மஹாவ॰ 64, 67, 74, 78-79; சூளவ॰ 375, 377; 379-382; மஹாவ॰ அட்ட²॰ 64, 67, 75, 76, 77) ஆசரியோ நாம நிஸ்ஸயாசரியோ பப்³ப³ஜ்ஜாசரியோ உபஸம்பதா³சரியோ த⁴ம்மாசரியோதி சதுப்³பி³தோ⁴. ஏதேஸு ஹி நிஸ்ஸயந்தேவாஸிகேன யாவ ஆசரியங் நிஸ்ஸாய வஸதி, தாவ ஸப்³ப³மாசரியவத்தங் காதப்³ப³ங். பப்³ப³ஜ்ஜாஉபஸம்பதா³த⁴ம்மந்தேவாஸிகேஹி பன நிஸ்ஸயமுத்தகேஹிபி ஆதி³தோ பட்டா²ய யாவ சீவரரஜனங், தாவ வத்தங் காதப்³ப³ங். அனாபுச்சி²த்வா பத்ததா³னாதி³ம்ஹி பன ஏதேஸங் அனாபத்தி. ஏதேஸு ச பப்³ப³ஜ்ஜந்தேவாஸிகோ ச உபஸம்பத³ந்தேவாஸிகோ ச ஆசரியஸ்ஸ யாவஜீவங் பா⁴ரோ, நிஸ்ஸயந்தேவாஸிகோ ச த⁴ம்மந்தேவாஸிகோ ச யாவ ஸமீபே வஸதி, தாவதே³வ. ஸுட்டு² பியஸீலோ ஸுபேஸலோ, ஸிக்கா²காமோதி அத்தோ². த³ந்தகட்ட²ங் தெ³ந்தேன ஏகங்ஸங் உத்தராஸங்க³ங் கரித்வா மஹந்தங் மஜ்ஜி²மங் கு²த்³த³கந்தி தீணி த³ந்தகட்டா²னி உபனேதப்³பா³னி. தேஸு யங் தீணி தி³வஸானி க³ண்ஹாதி, தங் ஸல்லக்கெ²த்வா சதுத்த²தி³வஸதோ பட்டா²ய தாதி³ஸங்யேவ ஸம்மா உபோ⁴ஹி ஹத்தே²ஹி தா³தப்³ப³ங். ஸசே யங் வா தங் வா க³ண்ஹாதி, யதா²லத்³த⁴ங் உபனேதப்³ப³ங். தோயந்தி ஸீதஞ்ச உண்ஹஞ்ச உத³கங் உபனெத்வா யங் தீணி தி³வஸானி வளஞ்ஜேதி, சதுத்த²தி³வஸதோ பட்டா²ய தாதி³ஸங் உபனேதப்³ப³ங். ஸசே த்³வேபி வளஞ்ஜேதி, து³வித⁴ம்பி உபனேதப்³ப³ங். ஸசே யாகு³ ஹோதி, பா⁴ஜனங் தோ⁴வித்வா உபனேதப்³ப³ங்.
145.Upajjhācariyeti ettha (mahāva. 64, 67, 74, 78-79; cūḷava. 375, 377; 379-382; mahāva. aṭṭha. 64, 67, 75, 76, 77) ācariyo nāma nissayācariyo pabbajjācariyo upasampadācariyo dhammācariyoti catubbidho. Etesu hi nissayantevāsikena yāva ācariyaṃ nissāya vasati, tāva sabbamācariyavattaṃ kātabbaṃ. Pabbajjāupasampadādhammantevāsikehi pana nissayamuttakehipi ādito paṭṭhāya yāva cīvararajanaṃ, tāva vattaṃ kātabbaṃ. Anāpucchitvā pattadānādimhi pana etesaṃ anāpatti. Etesu ca pabbajjantevāsiko ca upasampadantevāsiko ca ācariyassa yāvajīvaṃ bhāro, nissayantevāsiko ca dhammantevāsiko ca yāva samīpe vasati, tāvadeva. Suṭṭhu piyasīlo supesalo, sikkhākāmoti attho. Dantakaṭṭhaṃ dentena ekaṃsaṃ uttarāsaṅgaṃ karitvā mahantaṃ majjhimaṃ khuddakanti tīṇi dantakaṭṭhāni upanetabbāni. Tesu yaṃ tīṇi divasāni gaṇhāti, taṃ sallakkhetvā catutthadivasato paṭṭhāya tādisaṃyeva sammā ubhohi hatthehi dātabbaṃ. Sace yaṃ vā taṃ vā gaṇhāti, yathāladdhaṃ upanetabbaṃ. Toyanti sītañca uṇhañca udakaṃ upanetvā yaṃ tīṇi divasāni vaḷañjeti, catutthadivasato paṭṭhāya tādisaṃ upanetabbaṃ. Sace dvepi vaḷañjeti, duvidhampi upanetabbaṃ. Sace yāgu hoti, bhājanaṃ dhovitvā upanetabbaṃ.
146. பத்தே வத்தங் சரேதி ‘‘யாகு³ங் பீதஸ்ஸ உத³கங் த³த்வா பா⁴ஜனங் படிக்³க³ஹெத்வா நீசங் கத்வா ஸாது⁴கங் அபரிக⁴ங்ஸந்தேன தோ⁴வித்வா படிஸாமேதப்³ப³’’ந்தி (மஹாவ॰ 66, 78; சூளவ॰ 376, 380) வுத்தங் பத்தே வத்தங் சரேதி அத்தோ². கா³மப்பவேஸே வத்தங் சரேதி ஏவங் ஸப்³ப³த்த². ‘‘ஸசே உபஜ்ஜா²யோ வா ஆசரியோ வா கா³மங் பவிஸிதுகாமோ ஹோதி, நிவாஸனங் தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங் தா³தப்³ப³ங், ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³’’தி (மஹாவ॰ 66, 78; சூளவ॰ 376, 380) இத³ங் கா³மப்பவேஸனே வத்தங் நாம. ‘‘ஸசே உபஜ்ஜா²யோ வா ஆசரியோ வா பச்சா²ஸமணங் ஆகங்க²தி, திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா உபஜ்ஜா²யஸ்ஸ வா ஆசரியஸ்ஸ வா பச்சா²ஸமணேன ஹோதப்³ப³’’ந்திஆதி³னா (மஹாவ॰ 66, 78; சூளவ॰ 376, 380) நயேன வுத்தங் க³மனே வத்தங் நாம. ‘‘நிவத்தந்தேன பட²மதரங் ஆக³ந்த்வா ஆஸனங் பஞ்ஞாபேதப்³ப³’’ந்திஆதி³னா (மஹாவ॰ 66, 78; சூளவ॰ 376, 380) நயேன வுத்தங் ஆக³மே வத்தங் நாம. ‘‘உபஜ்ஜா²யம்ஹி வுட்டி²தே ஆஸனங் உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³’’ந்தி (மஹாவ॰ 66, 78; சூளவ॰ 376, 380) ஏவங் வுத்தங் ஆஸனாதீ³ஸு வத்தங் நாம. உபாஹனாய வத்தங் நாம ‘‘உபாஹனா புஞ்சி²தப்³பா³, உபாஹனா புஞ்ச²ந்தேன பட²மங் ஸுக்கே²ன சோளகேன புஞ்சி²தப்³பா³, பச்சா² அல்லேனா’’திஆதி³னா (சூளவ॰ 357, 359) வுத்தங். சீவரே வத்தங் நாம ‘‘ஸசே சீவரங் ஸின்னங் ஹோதி, முஹுத்தங் உண்ஹே ஓதாபேதப்³ப³ங், ந ச உண்ஹே சீவரங் நித³ஹிதப்³ப³’’ந்திஆதி³னா (மஹாவ॰ 66, 78; சூளவ॰ 376, 380) வுத்தங்.
146.Patte vattaṃ careti ‘‘yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ aparighaṃsantena dhovitvā paṭisāmetabba’’nti (mahāva. 66, 78; cūḷava. 376, 380) vuttaṃ patte vattaṃ careti attho. Gāmappavese vattaṃ careti evaṃ sabbattha. ‘‘Sace upajjhāyo vā ācariyo vā gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo’’ti (mahāva. 66, 78; cūḷava. 376, 380) idaṃ gāmappavesane vattaṃ nāma. ‘‘Sace upajjhāyo vā ācariyo vā pacchāsamaṇaṃ ākaṅkhati, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā upajjhāyassa vā ācariyassa vā pacchāsamaṇena hotabba’’ntiādinā (mahāva. 66, 78; cūḷava. 376, 380) nayena vuttaṃ gamane vattaṃ nāma. ‘‘Nivattantena paṭhamataraṃ āgantvā āsanaṃ paññāpetabba’’ntiādinā (mahāva. 66, 78; cūḷava. 376, 380) nayena vuttaṃ āgame vattaṃ nāma. ‘‘Upajjhāyamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabba’’nti (mahāva. 66, 78; cūḷava. 376, 380) evaṃ vuttaṃ āsanādīsu vattaṃ nāma. Upāhanāya vattaṃ nāma ‘‘upāhanā puñchitabbā, upāhanā puñchantena paṭhamaṃ sukkhena coḷakena puñchitabbā, pacchā allenā’’tiādinā (cūḷava. 357, 359) vuttaṃ. Cīvare vattaṃ nāma ‘‘sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabba’’ntiādinā (mahāva. 66, 78; cūḷava. 376, 380) vuttaṃ.
147. பரிபோ⁴ஜனீயபானீய-வச்சப்பஸ்ஸாவடா²னிஸூதி எத்த² ஸசே பானீயங் ந ஹோதி, பானீயங் உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங் உபட்டா²பேதப்³ப³ங். ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ததா² பஸ்ஸாவட்டா²னே ஏவங் வத்தங் சரிதப்³ப³ந்தி அத்தோ². ‘‘விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங் நிக்கி²பிதப்³ப³’’ந்திஆதி³னா நயேன வுத்தங் விஹாரஸோத⁴னே வத்தங் நாம. ‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞாபேதப்³ப³’’ந்திஆதி³னா (மஹாவ॰ 66, 78; சூளவ॰ 376, 380) வுத்தங் புன பஞ்ஞாபனே வத்தங் நாம.
147.Paribhojanīyapānīya-vaccappassāvaṭhānisūti ettha sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace vaccakuṭi uklāpā hoti, vaccakuṭi sammajjitabbā. Tathā passāvaṭṭhāne evaṃ vattaṃ caritabbanti attho. ‘‘Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabba’’ntiādinā nayena vuttaṃ vihārasodhane vattaṃ nāma. ‘‘Bhūmattharaṇaṃ otāpetvā sodhetvā papphoṭetvā atiharitvā yathāpaññattaṃ paññāpetabba’’ntiādinā (mahāva. 66, 78; cūḷava. 376, 380) vuttaṃ puna paññāpane vattaṃ nāma.
148. இதா³னி விஹாரங் ஸோதெ⁴ந்தேன ஏவங் ஸோதே⁴தப்³ப³ந்தி தங் த³ஸ்ஸேதுங் ‘‘ந பப்போ²டெய்யா’’திஆதி³மாஹ . தஸ்ஸத்தோ² – விஹாரங் ஸோதெ⁴ந்தோ பி⁴க்கு² பூ⁴மத்த²ரணாதி³ஸயனாஸனங் படிவாதே வா பங்க³ணே வா பானீயஸாமந்தா வா ந பப்போ²டெய்யாதி. பங்க³ணேதி ப³ஹூனங் ஸன்னிபாதே டா²னே.
148. Idāni vihāraṃ sodhentena evaṃ sodhetabbanti taṃ dassetuṃ ‘‘na papphoṭeyyā’’tiādimāha . Tassattho – vihāraṃ sodhento bhikkhu bhūmattharaṇādisayanāsanaṃ paṭivāte vā paṅgaṇe vā pānīyasāmantā vā na papphoṭeyyāti. Paṅgaṇeti bahūnaṃ sannipāte ṭhāne.
149. ந்ஹானேதி ‘‘ஸசே உபஜ்ஜா²யோ நஹாயிதுகாமோ ஹோதி, நஹானங் படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³’’ந்திஆதி³னா (மஹாவ॰ 66; சூளவ॰ 376) வுத்தங் நஹானே வத்தங் நாம, ‘‘உபஜ்ஜா²யஸ்ஸ க³த்ததோ உத³கங் ஸம்மஜ்ஜிதப்³ப³ங், நிவாஸனங் தா³தப்³ப³’’ந்திஆதி³னா (மஹாவ॰ 66; சூளவ॰ 376) வுத்தங் நஹாதஸ்ஸ காதப்³ப³ங் நாம. ரங்க³பாகேதி ‘‘ஸசே உபஜ்ஜா²யஸ்ஸ ஆசரியஸ்ஸ ரஜனங் பசிதப்³ப³ங் ஹோதி, ஸத்³தி⁴விஹாரிகேன அந்தேவாஸிகேன பசிதப்³ப³’’ந்தி (மஹாவ॰ 66, 78; சூளவ॰ 376, 380) வுத்தங். தோ⁴வனேதி ‘‘ஸசே உபஜ்ஜா²யஸ்ஸ ஆசரியஸ்ஸ சீவரங் தோ⁴விதப்³ப³ங் ஹோதி, ஸத்³தி⁴விஹாரிகேன அந்தேவாஸிகேன தோ⁴விதப்³ப³ங், உஸ்ஸுக்கங் வா காதப்³ப³’’ந்தி (மஹாவ॰ 66, 78; சூளவ॰ 376, 380) வுத்தங். ஸிப்³ப³னேதி ‘‘ஸசே உபஜ்ஜா²யேன ஆசரியேன சீவரங் காதப்³ப³ங் ஹோதி, ஸத்³தி⁴விஹாரிகேன அந்தேவாஸிகேன காதப்³ப³’’ந்தி (மஹாவ॰ 66, 78; சூளவ॰ 376, 380) வுத்தங். சீவரே தே²வே டி²தே ரஜந்தோ ந வஜே ந பக்கமெய்யாதி அத்தோ². ‘‘சீவரங் ரஜந்தேன ஸாது⁴கங் ஸம்பரிவத்தகங் ஸம்பரிவத்தகங் ரஜிதப்³ப³ங், ந ச அச்சி²ன்னே தே²வே பக்கமிதப்³ப³’’ந்தி (மஹாவ॰ 66, 78; சூளவ॰ 376, 380) ஹி வுத்தங்.
149.Nhāneti ‘‘sace upajjhāyo nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabba’’ntiādinā (mahāva. 66; cūḷava. 376) vuttaṃ nahāne vattaṃ nāma, ‘‘upajjhāyassa gattato udakaṃ sammajjitabbaṃ, nivāsanaṃ dātabba’’ntiādinā (mahāva. 66; cūḷava. 376) vuttaṃ nahātassa kātabbaṃ nāma. Raṅgapāketi ‘‘sace upajjhāyassa ācariyassa rajanaṃ pacitabbaṃ hoti, saddhivihārikena antevāsikena pacitabba’’nti (mahāva. 66, 78; cūḷava. 376, 380) vuttaṃ. Dhovaneti ‘‘sace upajjhāyassa ācariyassa cīvaraṃ dhovitabbaṃ hoti, saddhivihārikena antevāsikena dhovitabbaṃ, ussukkaṃ vā kātabba’’nti (mahāva. 66, 78; cūḷava. 376, 380) vuttaṃ. Sibbaneti ‘‘sace upajjhāyena ācariyena cīvaraṃ kātabbaṃ hoti, saddhivihārikena antevāsikena kātabba’’nti (mahāva. 66, 78; cūḷava. 376, 380) vuttaṃ. Cīvare theve ṭhite rajanto na vaje na pakkameyyāti attho. ‘‘Cīvaraṃ rajantena sādhukaṃ samparivattakaṃ samparivattakaṃ rajitabbaṃ, na ca acchinne theve pakkamitabba’’nti (mahāva. 66, 78; cūḷava. 376, 380) hi vuttaṃ.
150. ஏகச்சஸ்ஸாதி ஆசரியுபஜ்ஜா²யானங் விஸபா⁴க³ஸ்ஸ அனத்த²காமஸ்ஸ வேரிபுக்³க³லஸ்ஸ. அனாபுச்சா²தி ஆசரியுபஜ்ஜா²யானங் அனாரோசெத்வா. கிஞ்சனந்தி யங் கிஞ்சி.
150.Ekaccassāti ācariyupajjhāyānaṃ visabhāgassa anatthakāmassa veripuggalassa. Anāpucchāti ācariyupajjhāyānaṃ anārocetvā. Kiñcananti yaṃ kiñci.
151-2. தஸ்ஸாதி ஏகச்சஸ்ஸ. நின்னேதுந்தி நீஹரிதுங். கிச்சயங் பரிகம்மங் வாதி வெய்யாவச்சங் வா பிட்டி²பரிகம்மாதி³பரிகம்மங் வா அத்தனா தஸ்ஸ காதுங் வா தேன அத்தனோ காராபேதுங் வாதி ஏவமத்தோ² வேதி³தப்³போ³.
151-2.Tassāti ekaccassa. Ninnetunti nīharituṃ. Kiccayaṃ parikammaṃ vāti veyyāvaccaṃ vā piṭṭhiparikammādiparikammaṃ vā attanā tassa kātuṃ vā tena attano kārāpetuṃ vāti evamattho veditabbo.
153. ஸசே ஆசரியுபஜ்ஜா²யா அஞ்ஞத்த² க³தா ஹொந்தி, பரிவேணங் க³ந்த்வா அபஸ்ஸந்தேஹி கா³மங் பவிஸிதுங் வட்டதி. கா³மங் பவிஸந்தோ ஸசே பஸ்ஸதி, ஆபுச்சி²தப்³ப³மேவாதி வத³ந்தி. ‘‘உபஜ்ஜா²யங் அனாபுச்சா² ந தி³ஸா பக்கமிதப்³பா³’’தி (மஹாவ॰ 66, சூளவ॰ 376) ஹி வுத்தங். அத்தனோ கிச்சயங் நாம அந்தோவிஹாரேபி அத்தனோ பத்தபசனசீவரகம்மகேஸச்சே²த³னாதி³.
153. Sace ācariyupajjhāyā aññattha gatā honti, pariveṇaṃ gantvā apassantehi gāmaṃ pavisituṃ vaṭṭati. Gāmaṃ pavisanto sace passati, āpucchitabbamevāti vadanti. ‘‘Upajjhāyaṃ anāpucchā na disā pakkamitabbā’’ti (mahāva. 66, cūḷava. 376) hi vuttaṃ. Attano kiccayaṃ nāma antovihārepi attano pattapacanacīvarakammakesacchedanādi.
154. ஸங்கா⁴யத்தகம்மானி நாம பரிவாஸமானத்தஅப்³பா⁴னதஜ்ஜனீயனியஸ்ஸபப்³பா³ஜனீயபடிஸாரணீயஉக்கே²பனாத³யோ.
154.Saṅghāyattakammāni nāma parivāsamānattaabbhānatajjanīyaniyassapabbājanīyapaṭisāraṇīyaukkhepanādayo.
155. வுட்டா²னங் நேஸமாக³மேதி ‘‘ஸசே உபஜ்ஜா²யோ வா ஆசரியோ வா கி³லானோ ஹோதி, யாவஜீவங் உபட்டா²தப்³போ³, வுட்டா²னமஸ்ஸ ஆக³மேதப்³ப³’’ந்தி (மஹாவ॰ 66; சூளவ॰ 376) ஹி வுத்தங். உபஜ்ஜா²சரியவத்தவினிச்ச²யோ.
155.Vuṭṭhānaṃ nesamāgameti ‘‘sace upajjhāyo vā ācariyo vā gilāno hoti, yāvajīvaṃ upaṭṭhātabbo, vuṭṭhānamassa āgametabba’’nti (mahāva. 66; cūḷava. 376) hi vuttaṃ. Upajjhācariyavattavinicchayo.
உபஜ்ஜா²சரியவத்தனித்³தே³ஸவண்ணனா நிட்டி²தா.
Upajjhācariyavattaniddesavaṇṇanā niṭṭhitā.
