| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
15. உபஜ்ஜா²சரியவத்தனித்³தே³ஸவண்ணனா
15. Upajjhācariyavattaniddesavaṇṇanā
145. ‘‘இத³ங் தயா து³க்கதங், து³ப்³பா⁴ஸித’’ந்திஆதீ³னி வத்வா சோத³னதோ, அத்தனோ வஜ்ஜங் அஸ்ஸரந்தஸ்ஸ ஸதுப்பாத³வஸேன ஸாரணதோ, ஸம்மா படிபத்தியங் ஸாரணதோ பவத்தாபனதோ வா வஜ்ஜாவஜ்ஜங் உபனிஜ்ஜா²யதி பு⁴ஸங் சிந்தேதீதி உபஜ்ஜா². உபஜ்ஜா² ஏவ உபஜ்ஜா²யோ. ‘‘ஏவங் தயா பு³த்³த⁴வசனங் ஸஜ்ஜா²யிதப்³ப³ங், ஏவங் அதிக்கமிதப்³ப³ங், ஏவங் படிக்கமிதப்³ப³’’ந்திஆதி³னா ஆசாரஸிக்கா²பனே ஆசரதி பவத்ததீதி ஆசரியோ. ஸோ ச நிஸ்ஸயபப்³ப³ஜ்ஜாஉபஸம்பதா³த⁴ம்மாசரியவஸேன சதுப்³பி³தோ⁴. உபஜ்ஜா² ச ஆசரியோ ச உபஜ்ஜா²சரியா, தே. நிஸ்ஸாய வஸமானோதி இமினா நிஸ்ஸயபப்³ப³ஜ்ஜாஉபஸம்பதா³த⁴ம்மந்தேவாஸிகேஸு யோ நிஸ்ஸாய வஸதி, தங் த³ஸ்ஸேதி. சதூஸு ஹி தேஸு நிஸ்ஸயந்தேவாஸிகேன யாவ ஆசரியங் நிஸ்ஸாய வஸதி, தாவஸப்³ப³ங் ஆசரியவத்தங் காதப்³ப³ங், நேதரேஹி. இதரேஹி, நிஸ்ஸயமுத்தகேஹிபி யாவ சீவரரஜனங், தாவ ச அரதிவினோத³னாதி³கஞ்ச வத்தங் காதப்³ப³ங். அனாபுச்சி²த்வா பத்தசீவரதா³னாதி³ம்ஹி பன ஏதேஸங் அனாபத்தி. ஸத்³தி⁴விஹாரிகஸ்ஸ பன உபஜ்ஜா²யானங் யாவ சீவரரஜனங், தாவ ச அரதிவினோத³னாதி³கஞ்ச அகரொந்தஸ்ஸ நிஸ்ஸயமுத்தகஸ்ஸாபி அமுத்தகஸ்ஸாபி ஆபத்தியேவ. ஏகச்சஸ்ஸ பத்ததா³னாதி³தோ பட்டா²ய அமுத்தனிஸ்ஸயஸ்ஸேவ ஆபத்தி. தேஸு மஜ்ஜே² த்³வே ஆசரியஸ்ஸ யாவஜீவங் பா⁴ரா. இதரே பன யாவ ஸமீபே வஸந்தி, தாவதே³வ, தஸ்மா ஆசரியேனாபி தேஸு ஸம்மா வத்திதப்³ப³ங், உபஜ்ஜா²யேன ஸத்³தி⁴விஹாரிகேஸு வத்தப்³ப³மேவ நத்தி². ஸுபேஸலோதி பியங் ஸீலமஸ்ஸாதி பேஸலோ, வுத்³தி⁴, ய-லோபேன ஈ-காரஸ்ஸ அத்தகரணேன, ஸுட்டு² பேஸலோ ஸுபேஸலோ, ஸிக்கா²காமோதி அத்தோ². ‘‘த³ந்தகட்ட²’’ந்திஆதி³ ‘‘த³தே³’’திமஸ்ஸ கம்மங். த³தே³தி ஸம்மா ஆத³ரேன யதா²தி⁴ப்பாயங் த³தெ³ய்யாதி அத்தோ². காலேதி தத³னுரூபே காலே.
145. ‘‘Idaṃ tayā dukkataṃ, dubbhāsita’’ntiādīni vatvā codanato, attano vajjaṃ assarantassa satuppādavasena sāraṇato, sammā paṭipattiyaṃ sāraṇato pavattāpanato vā vajjāvajjaṃ upanijjhāyati bhusaṃ cintetīti upajjhā. Upajjhā eva upajjhāyo. ‘‘Evaṃ tayā buddhavacanaṃ sajjhāyitabbaṃ, evaṃ atikkamitabbaṃ, evaṃ paṭikkamitabba’’ntiādinā ācārasikkhāpane ācarati pavattatīti ācariyo. So ca nissayapabbajjāupasampadādhammācariyavasena catubbidho. Upajjhā ca ācariyo ca upajjhācariyā, te. Nissāya vasamānoti iminā nissayapabbajjāupasampadādhammantevāsikesu yo nissāya vasati, taṃ dasseti. Catūsu hi tesu nissayantevāsikena yāva ācariyaṃ nissāya vasati, tāvasabbaṃ ācariyavattaṃ kātabbaṃ, netarehi. Itarehi, nissayamuttakehipi yāva cīvararajanaṃ, tāva ca arativinodanādikañca vattaṃ kātabbaṃ. Anāpucchitvā pattacīvaradānādimhi pana etesaṃ anāpatti. Saddhivihārikassa pana upajjhāyānaṃ yāva cīvararajanaṃ, tāva ca arativinodanādikañca akarontassa nissayamuttakassāpi amuttakassāpi āpattiyeva. Ekaccassa pattadānādito paṭṭhāya amuttanissayasseva āpatti. Tesu majjhe dve ācariyassa yāvajīvaṃ bhārā. Itare pana yāva samīpe vasanti, tāvadeva, tasmā ācariyenāpi tesu sammā vattitabbaṃ, upajjhāyena saddhivihārikesu vattabbameva natthi. Supesaloti piyaṃ sīlamassāti pesalo, vuddhi, ya-lopena ī-kārassa attakaraṇena, suṭṭhu pesalo supesalo, sikkhākāmoti attho. ‘‘Dantakaṭṭha’’ntiādi ‘‘dade’’timassa kammaṃ. Dadeti sammā ādarena yathādhippāyaṃ dadeyyāti attho. Kāleti tadanurūpe kāle.
146. பத்தே ச…பே॰… சீவரே ச வத்தங் சரேதி ஸம்ப³ந்தோ⁴. சரேதி கரெய்ய. தத்த² நீசங் கத்வா ஸாது⁴கங் அபரிக⁴ங்ஸந்தேன தோ⁴வனங், முஹுத்தங் உண்ஹே ஓதாபனங், ட²பனட்டா²னங் உபபரிக்கி²த்வா சம்மாதி³னா கேனசி அந்தரஹிதாய நிக்கி²பனங் பத்தே வத்தங். கா³மங் பவிஸந்தானங் நிவாஸனகாயப³ந்த⁴னஸங்கா⁴டிதா³னங், தோ⁴வித்வா ஸோத³கபத்தஸ்ஸ தா³னங் கா³மப்பவேஸே வத்தங். யதி³ ஆகங்க²ந்தி, பரிமண்ட³லங் நிவாஸெத்வா ச பாருபித்வா ச நாதிதூ³ரனச்சாஸன்னே க³மனங், பத்தபரியாபன்னக்³க³ஹணஞ்ச க³மனே வத்தங். நிவத்தெந்தே பன பட²மதரங் ஆக³ந்த்வா ஆஸனபஞ்ஞாபனங், பாதோ³த³காதி³உபனிக்கி²பனங், பத்தசீவரப்படிக்³க³ஹணங் ஆக³மே ஆக³மனே வத்தங். ப⁴ணந்தானங் அந்தரா கதா²அனோபாதனங் ஸப்³ப³த்த² வத்தங். ஆஸனபஞ்ஞாபனங், உட்டி²தேஸு ஆஸனஉத்³த⁴ரணங், பாத³பீட²கத²லானங் உபனிக்கி²பனங், படிஸாமனஞ்ச ஆஸனே பாத³பீடே² பாத³கத²லே ச வத்தங். தோ⁴தபாத³ட்ட²பனகங் பாத³பீட²ங். அஞ்ஞங் கத²லங். உபாஹனா ச சீவரஞ்சாதி த்³வந்தோ³, தஸ்மிங். ஸுக்க²அல்லசோளேஹி புஞ்ச²னங் உபாஹனாய வத்தங். ஸின்னசீவரஸ்ஸ முஹுத்தங் ஓதாபனங், சதுரங்கு³லங் கண்ணங் உஸ்ஸாரெத்வா சீவரஸங்ஹரணஞ்ச சீவரே வத்தங்.
146. Patte ca…pe… cīvare ca vattaṃ careti sambandho. Careti kareyya. Tattha nīcaṃ katvā sādhukaṃ aparighaṃsantena dhovanaṃ, muhuttaṃ uṇhe otāpanaṃ, ṭhapanaṭṭhānaṃ upaparikkhitvā cammādinā kenaci antarahitāya nikkhipanaṃ patte vattaṃ. Gāmaṃ pavisantānaṃ nivāsanakāyabandhanasaṅghāṭidānaṃ, dhovitvā sodakapattassa dānaṃ gāmappavese vattaṃ. Yadi ākaṅkhanti, parimaṇḍalaṃ nivāsetvā ca pārupitvā ca nātidūranaccāsanne gamanaṃ, pattapariyāpannaggahaṇañca gamane vattaṃ. Nivattente pana paṭhamataraṃ āgantvā āsanapaññāpanaṃ, pādodakādiupanikkhipanaṃ, pattacīvarappaṭiggahaṇaṃ āgame āgamane vattaṃ. Bhaṇantānaṃ antarā kathāanopātanaṃ sabbattha vattaṃ. Āsanapaññāpanaṃ, uṭṭhitesu āsanauddharaṇaṃ, pādapīṭhakathalānaṃ upanikkhipanaṃ, paṭisāmanañca āsane pādapīṭhe pādakathale ca vattaṃ. Dhotapādaṭṭhapanakaṃ pādapīṭhaṃ. Aññaṃ kathalaṃ. Upāhanā ca cīvarañcāti dvando, tasmiṃ. Sukkhaallacoḷehi puñchanaṃ upāhanāya vattaṃ. Sinnacīvarassa muhuttaṃ otāpanaṃ, caturaṅgulaṃ kaṇṇaṃ ussāretvā cīvarasaṃharaṇañca cīvare vattaṃ.
147. பரிபோ⁴ஜனீய…பே॰… பஸ்ஸாவட்டா²னிஸு ச விஹாரஸோத⁴னே ச புன பஞ்ஞாபனே ச வத்தங் ததா²தி ஸம்ப³ந்தோ⁴. வச்சஞ்ச பஸ்ஸாவோ ச வச்சபஸ்ஸாவா. திட்ட²தி எத்தா²தி டா²னீ, குடி. வச்சபஸ்ஸாவானங் டா²னீதி தப்புரிஸோ. அத² வா திட்ட²தி எத்தா²தி டா²னங், ஸோயேவ ஸமாஸோ, வச்சபஸ்ஸாவஸ்ஸ ச பதனட்டா²னங், தங் அஸ்ஸ அத்தீ²தி இட்ட²கே³ஹாதி³. பரிபோ⁴ஜனீயஞ்ச பானீயஞ்ச வச்சபஸ்ஸாவட்டா²னீ ச பரி…பே॰… ட்டா²னீ. தாஸு தேஸு வா. பாதோ³த³கஉண்ஹஸீதனஹானோத³கப்படியாதா³பனங் பரிபோ⁴ஜனீயே வத்தங். பாதப்³ப³பானீயேன புச்ச²னங் உபட்டா²பனஞ்ச பானீயே வத்தங். ஸம்மஜ்ஜனபானீயஉபட்டா²பனங் வச்சபஸ்ஸாவட்டா²னீஸு வத்தங். பட²மங் பத்தசீவராதீ³னி ஹராபெத்வா ஏகமந்தே நிக்கி²பனாதி³, உல்லோகதோ பட்டா²ய மக்கடஸந்தானங் ஓஹாரெத்வா ஸம்மஜ்ஜனஞ்ச விஹாரஸோத⁴னே வத்தங். ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²டா²னே பூ⁴மத்த²ரணாதி³பஞ்ஞாபனங் புன பஞ்ஞாபனே வத்தங். ததா²தி இமினா ‘‘சரே’’தி இத³ங் அதிதி³ஸதி.
147. Paribhojanīya…pe… passāvaṭṭhānisu ca vihārasodhane ca puna paññāpane ca vattaṃ tathāti sambandho. Vaccañca passāvo ca vaccapassāvā. Tiṭṭhati etthāti ṭhānī, kuṭi. Vaccapassāvānaṃ ṭhānīti tappuriso. Atha vā tiṭṭhati etthāti ṭhānaṃ, soyeva samāso, vaccapassāvassa ca patanaṭṭhānaṃ, taṃ assa atthīti iṭṭhagehādi. Paribhojanīyañca pānīyañca vaccapassāvaṭṭhānī ca pari…pe… ṭṭhānī. Tāsu tesu vā. Pādodakauṇhasītanahānodakappaṭiyādāpanaṃ paribhojanīye vattaṃ. Pātabbapānīyena pucchanaṃ upaṭṭhāpanañca pānīye vattaṃ. Sammajjanapānīyaupaṭṭhāpanaṃ vaccapassāvaṭṭhānīsu vattaṃ. Paṭhamaṃ pattacīvarādīni harāpetvā ekamante nikkhipanādi, ullokato paṭṭhāya makkaṭasantānaṃ ohāretvā sammajjanañca vihārasodhane vattaṃ. Otāpetvā sodhetvā papphoṭetvā atiharitvā yathāṭhāne bhūmattharaṇādipaññāpanaṃ puna paññāpane vattaṃ. Tathāti iminā ‘‘care’’ti idaṃ atidisati.
148. விஹாரங் ஸோதெ⁴ந்தோ பி⁴க்கு² படிவாதே வா ஸங்க³ணே வா பானீயஸாமந்தா வா ஸயனாஸனங் ந பப்போ²டெய்யாதி ஸம்ப³ந்தோ⁴. பானீய-ஸத்³தே³ன பரிபோ⁴ஜனீயஞ்ச ஸங்க³ஹிதங். படிவாதேதி உபரிவாதே. ஸங்க³ணேதி ப³ஹூனங் ஸமோஸரணே விவடப்பதே³ஸே. ஸயனாஸனங் நாம பூ⁴மத்த²ரணமஞ்சாதி³.
148. Vihāraṃ sodhento bhikkhu paṭivāte vā saṅgaṇe vā pānīyasāmantā vā sayanāsanaṃ na papphoṭeyyāti sambandho. Pānīya-saddena paribhojanīyañca saṅgahitaṃ. Paṭivāteti uparivāte. Saṅgaṇeti bahūnaṃ samosaraṇe vivaṭappadese. Sayanāsanaṃ nāma bhūmattharaṇamañcādi.
149. ந்ஹானே வத்தங் சரே, ந்ஹாதஸ்ஸ காதப்³பே³ சரேதி ஸம்ப³ந்த⁴ஸ்ஸ புரிஸாதீ⁴னதாய ஸம்ப³ந்தோ⁴ வேதி³தப்³போ³ . சீவரப்படிக்³க³ஹணக³த்தபரிகம்மகரணங் நஹானே வத்தங். காதப்³பே³ சரேதி க³த்ததோ உத³கஸம்மஜ்ஜனநிவாஸனதா³னாதி³கிச்சே பவத்தெய்யாதி அத்தோ². ‘‘வனப்பகு³ம்பே³’’திஆதீ³ஸு விய ஸிஸ்ஸ ஏ-காராதே³ஸங் ரூபங், தஸ்மா காதப்³ப³ங் வத்தங் சரெய்யாதி யோஜெத்வா வேதி³தப்³ப³ங். பு³தா⁴ பன ‘‘ந்ஹானே ந்ஹாதஸ்ஸ காதப்³பே³ வத்தங் சரே’’தி யோஜெத்வா அத்த²ங் வத³ந்தி. ஏவங் ஸதி காதப்³ப³-ஸத்³த³ஸ்ஸ கம்மஸாத⁴னத்தா வத்தமேவ காதப்³ப³ங் நாமாதி ‘‘வத்தே வத்தங் சரே’’தி வுத்தங் விய ஹோதீதி விருஜ்ஜ²தி. ‘‘நஹாதேன நஹாதஸ்ஸா’’தி வா பாடோ², உத³கே க³த்தபரிகம்மேன தே²ரங் பட²மங் நஹாபெத்வா ஸயம்பி நஹாதேனாதி அத்தோ². பாளியம்பி ‘‘நஹாதேன பட²மதரங் உத்தரித்வா’’தி (மஹாவ॰ 67) அத்தி². அத² ரங்க³பாகே தோ⁴வனே ஸிப்³ப³னே ச வத்தங் சரேதி ஸம்ப³ந்தோ⁴, ரஜனபாகே சீவரதோ⁴வனே சீவரஸிப்³ப³னே சாதி அத்தோ². ரஜந்தோ சீவரே தே²வே டி²தே ந வஜேதி ஸம்ப³ந்தோ⁴. ரஜந்தோதி சீவரங் ரஜந்தோ. தே²வேதி ரஜனபி³ந்து³ம்ஹி.
149. Nhāne vattaṃ care, nhātassa kātabbe careti sambandhassa purisādhīnatāya sambandho veditabbo . Cīvarappaṭiggahaṇagattaparikammakaraṇaṃ nahāne vattaṃ. Kātabbe careti gattato udakasammajjananivāsanadānādikicce pavatteyyāti attho. ‘‘Vanappagumbe’’tiādīsu viya sissa e-kārādesaṃ rūpaṃ, tasmā kātabbaṃ vattaṃ careyyāti yojetvā veditabbaṃ. Budhā pana ‘‘nhāne nhātassa kātabbe vattaṃ care’’ti yojetvā atthaṃ vadanti. Evaṃ sati kātabba-saddassa kammasādhanattā vattameva kātabbaṃ nāmāti ‘‘vatte vattaṃ care’’ti vuttaṃ viya hotīti virujjhati. ‘‘Nahātena nahātassā’’ti vā pāṭho, udake gattaparikammena theraṃ paṭhamaṃ nahāpetvā sayampi nahātenāti attho. Pāḷiyampi ‘‘nahātena paṭhamataraṃ uttaritvā’’ti (mahāva. 67) atthi. Atha raṅgapāke dhovane sibbane ca vattaṃ careti sambandho, rajanapāke cīvaradhovane cīvarasibbane cāti attho. Rajanto cīvare theve ṭhite na vajeti sambandho. Rajantoti cīvaraṃ rajanto. Theveti rajanabindumhi.
150. ஏகச்சஸ்ஸாதி ஆசரியுபஜ்ஜா²யானங் வேரினோ புக்³க³லஸ்ஸ பத்தங் வா சீவரானி வா கிஞ்சனங் பரிக்கா²ரங் வா ந த³தெ³ய்ய ந க³ண்ஹெய்ய வாதி ஸம்ப³ந்தோ⁴. தத்த² ந த³தெ³ய்ய ந க³ண்ஹெய்யாதி படிஸாமனத்தா²யபி ந த³தெ³ய்ய, ந க³ண்ஹெய்ய வாதி அத்தோ². ‘‘ஆகிஞ்சன’’ந்திஆதீ³ஸு விய கிஞ்சன-ஸத்³தோ³ த³ட்ட²ப்³போ³, தஸ்ஸ கிஞ்சீதி அத்தோ². கிஞ்சினந்தி வா பாடோ², கிஞ்சி நங் பரிக்கா²ரந்தி யோஜனா. பத³ஸித்³தி⁴வஸேனெத்த² நந்தி த-ஸத்³த³ப்பயோகோ³ கதோ.
150.Ekaccassāti ācariyupajjhāyānaṃ verino puggalassa pattaṃ vā cīvarāni vā kiñcanaṃ parikkhāraṃ vā na dadeyya na gaṇheyya vāti sambandho. Tattha na dadeyya na gaṇheyyāti paṭisāmanatthāyapi na dadeyya, na gaṇheyya vāti attho. ‘‘Ākiñcana’’ntiādīsu viya kiñcana-saddo daṭṭhabbo, tassa kiñcīti attho. Kiñcinanti vā pāṭho, kiñci naṃ parikkhāranti yojanā. Padasiddhivasenettha nanti ta-saddappayogo kato.
151-2. பச்ச²தோ காதுந்தி பச்சா²ஸமணங் காதுங். தஸ்ஸாதி ஏகச்சஸ்ஸ. பச்ச²தோதி பச்சா²ஸமணோ ஹுத்வா. நின்னேதுந்தி ஏகச்சஸ்ஸ நீஹரிதுங். ஸப்³ப³த்த² அனாபுச்சா² ந வட்டதீதி யோஜேதப்³ப³ங். கிச்சயங் வாதி வெய்யாவச்சாதி³ யங் கிஞ்சி கிச்சங் வா. கிச்சமேவ கிச்சயங், கஸ்ஸ யோ ‘‘ஸேனியோ’’திஆதீ³ஸு விய. பரிகம்மங் வாதி பிட்டி²பரிகம்மாதி³பரிகம்மங். அத்தனோ காராபேதுங் வாதி ஏகச்சேன அத்தனோ காராபேதுங் வா. காதுங் வாதி தஸ்ஸ அத்தனா காதுங் வா.
151-2.Pacchato kātunti pacchāsamaṇaṃ kātuṃ. Tassāti ekaccassa. Pacchatoti pacchāsamaṇo hutvā. Ninnetunti ekaccassa nīharituṃ. Sabbattha anāpucchā na vaṭṭatīti yojetabbaṃ. Kiccayaṃ vāti veyyāvaccādi yaṃ kiñci kiccaṃ vā. Kiccameva kiccayaṃ, kassa yo ‘‘seniyo’’tiādīsu viya. Parikammaṃ vāti piṭṭhiparikammādiparikammaṃ. Attano kārāpetuṃ vāti ekaccena attano kārāpetuṃ vā. Kātuṃ vāti tassa attanā kātuṃ vā.
153. ஸீமதோ நிக்³க³தா ப³ஹிபூ⁴தா நிஸ்ஸீமா, தங். ஆசரியுபஜ்ஜா²யேஸு அவத்வா தூ³ரங் பி⁴க்கா²சாரங் க³தேஸுபி அபஸ்ஸந்தேன கா³மோ பவிஸிதப்³போ³. தி³ட்ட²ட்டா²னதோ பட்டா²ய பன ஆபுச்சி²துங்யேவ வட்டதி. அத்தனோ கிச்சயங் வாபீதி அத்தனோ ஸீமாயபி பத்தபசனசீவரரஜனாதி³கங் ஸகங் கரணீயங் வாபி காதுங்.
153. Sīmato niggatā bahibhūtā nissīmā, taṃ. Ācariyupajjhāyesu avatvā dūraṃ bhikkhācāraṃ gatesupi apassantena gāmo pavisitabbo. Diṭṭhaṭṭhānato paṭṭhāya pana āpucchituṃyeva vaṭṭati. Attano kiccayaṃ vāpīti attano sīmāyapi pattapacanacīvararajanādikaṃ sakaṃ karaṇīyaṃ vāpi kātuṃ.
154. அரதிந்தி ஸாஸனே அனபி⁴ரதிங். ஸங்கா⁴யத்தேஸு கம்மேஸூதி பரிவாஸாதி³தஜ்ஜனீயாதீ³ஸு ஸங்க⁴ப்படிப³த்³தே⁴ஸு கம்மேஸு. உஸ்ஸுக்கங் வாபீதி ஆசரியுபஜ்ஜா²யேஸு க³ருத⁴ம்மங் அஜ்ஜா²பன்னேஸு, கம்மாரஹேஸு ச ‘‘கிந்தி நு கோ² ஸங்கோ⁴ பரிவாஸங் த³தெ³ய்யா’’திஆதி³னா உஸ்ஸாஹங் வாபி.
154.Aratinti sāsane anabhiratiṃ. Saṅghāyattesu kammesūti parivāsāditajjanīyādīsu saṅghappaṭibaddhesu kammesu. Ussukkaṃ vāpīti ācariyupajjhāyesu garudhammaṃ ajjhāpannesu, kammārahesu ca ‘‘kinti nu kho saṅgho parivāsaṃ dadeyyā’’tiādinā ussāhaṃ vāpi.
155. கி³லானேஸு உபட்டெ²ய்யாதி ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ அலங் கி³லானங் உபட்டா²துங், படிப³லோ ஹோதி பே⁴ஸஜ்ஜங் ஸங்விதா⁴துங், ஸப்பாயாஸப்பாயங் ஜானாதி, அஸப்பாயங் அபனாமேதி, ஸப்பாயங் உபனாமேதி, மெத்தசித்தோ கி³லானங் உபட்டா²தி நோ ஆமிஸந்தரோ, அஜேகு³ச்சீ² ஹோதி உச்சாரங் வா பஸ்ஸாவங் வா கே²ளங் வா வந்தங் வா நீஹாதுங், படிப³லோ ஹோதி கி³லானங் காலேன காலங் த⁴ம்மியா கதா²ய ஸந்த³ஸ்ஸேதுங் ஸமாத³பேதுங் ஸமுத்தேஜேதுங் ஸம்பஹங்ஸேது’’ந்தி (மஹாவ॰ 366) ஏவங் வுத்தபஞ்சங்க³ஸமன்னாக³தேன ஹுத்வா கி³லானேஸு உபட்ட²ஹெய்யாதி அத்தோ². இமினா ஸப்³பே³ஹிபி ஆசரிதப்³ப³ங் கி³லானவத்தங் உபதி³ஸதி. வுட்டா²னந்தி கே³லஞ்ஞா வுட்டி²தங். ஆக³மேதி ஆக³மெய்ய, ஓலோகெய்யாதி அத்தோ². உபஜ்ஜா²சரியேஹி ச ஸத்³தி⁴விஹாரிகஅந்தேவாஸிகேஸு யதி³ தே கி³லானா ஹொந்தி, ஆதி³தோ பட்டா²ய சீவரே ரஜனபரியோஸானஞ்ச அரதிவினோத³னாதி³கஞ்ச வத்தங், அகி³லானேஸு பன உத்³தே³ஸபரிபுச்சா² ஓவாதா³னுஸாஸனியா அனுக்³க³ஹோபத்தசீவராதி³தா³னஞ்சாதி ஸப்³ப³ங் காதப்³ப³ங். தேனேவ ஹெட்டா² வுத்தங் ‘‘தஸ்மா ஆசரியேனாபி தேஸு ஸம்மா வத்திதப்³ப³ங், உபஜ்ஜா²யேன ஸத்³தி⁴விஹாரிகேஸு வத்தப்³ப³மேவ நத்தீ²’’தி.
155.Gilānesu upaṭṭheyyāti ‘‘pañcahi, bhikkhave, aṅgehi samannāgato gilānupaṭṭhāko alaṃ gilānaṃ upaṭṭhātuṃ, paṭibalo hoti bhesajjaṃ saṃvidhātuṃ, sappāyāsappāyaṃ jānāti, asappāyaṃ apanāmeti, sappāyaṃ upanāmeti, mettacitto gilānaṃ upaṭṭhāti no āmisantaro, ajegucchī hoti uccāraṃ vā passāvaṃ vā kheḷaṃ vā vantaṃ vā nīhātuṃ, paṭibalo hoti gilānaṃ kālena kālaṃ dhammiyā kathāya sandassetuṃ samādapetuṃ samuttejetuṃ sampahaṃsetu’’nti (mahāva. 366) evaṃ vuttapañcaṅgasamannāgatena hutvā gilānesu upaṭṭhaheyyāti attho. Iminā sabbehipi ācaritabbaṃ gilānavattaṃ upadisati. Vuṭṭhānanti gelaññā vuṭṭhitaṃ. Āgameti āgameyya, olokeyyāti attho. Upajjhācariyehi ca saddhivihārikaantevāsikesu yadi te gilānā honti, ādito paṭṭhāya cīvare rajanapariyosānañca arativinodanādikañca vattaṃ, agilānesu pana uddesaparipucchā ovādānusāsaniyā anuggahopattacīvarādidānañcāti sabbaṃ kātabbaṃ. Teneva heṭṭhā vuttaṃ ‘‘tasmā ācariyenāpi tesu sammā vattitabbaṃ, upajjhāyena saddhivihārikesu vattabbameva natthī’’ti.
உபஜ்ஜா²சரியவத்தனித்³தே³ஸவண்ணனா நிட்டி²தா.
Upajjhācariyavattaniddesavaṇṇanā niṭṭhitā.
