| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
27. உபஜ்ஜா²யாதி³வத்தவினிச்ச²யகதா²
27. Upajjhāyādivattavinicchayakathā
183. வத்தந்தி எத்த² பன வத்தங் நாமேதங் உபஜ்ஜா²யவத்தங் ஆசரியவத்தங் ஆக³ந்துகவத்தங் ஆவாஸிகவத்தங் க³மிகவத்தங் ப⁴த்தக்³க³வத்தங் பிண்ட³சாரிகவத்தங் ஆரஞ்ஞிகவத்தங் ஸேனாஸனவத்தங் ஜந்தாக⁴ரவத்தங் வச்சகுடிவத்தந்தி ப³ஹுவித⁴ங். தத்த² உபஜ்ஜா²யவத்தங் தாவ ஏவங் வேதி³தப்³ப³ங் – ஸத்³தி⁴விஹாரிகேன காலஸ்ஸேவ உட்டா²ய உபாஹனா ஓமுஞ்சித்வா ஏகங்ஸங் உத்தராஸங்க³ங் கரித்வா உபஜ்ஜா²யஸ்ஸ த³ந்தகட்ட²ங் தா³தப்³ப³ங், முகோ²த³கங் தா³தப்³ப³ங். தத்த² த³ந்தகட்ட²ங் தெ³ந்தேன மஹந்தங் மஜ்ஜி²மங் கு²த்³த³கந்தி தீணி த³ந்தகட்டா²னி உபனெத்வா இதோ யங் தீணி தி³வஸானி க³ண்ஹாதி, சதுத்த²தி³வஸதோ பட்டா²ய தாதி³ஸமேவ தா³தப்³ப³ங். ஸசே அனியமங் கத்வா யங் வா தங் வா க³ண்ஹாதி, அத² யாதி³ஸங் லப⁴தி, தாதி³ஸங் தா³தப்³ப³ங். முகோ²த³கங் தெ³ந்தேனபி ஸீதஞ்ச உண்ஹஞ்ச உத³கங் உபனெத்வா ததோ யங் தீணி தி³வஸானி வளஞ்ஜேதி. சதுத்த²தி³வஸதோ பட்டா²ய தாதி³ஸமேவ முக²தோ⁴வனோத³கங் தா³தப்³ப³ங். ஸசே து³வித⁴ம்பி வளஞ்ஜேதி, து³வித⁴ம்பி உபனேதப்³ப³ங். உத³கங் முக²தோ⁴வனட்டா²னே ட²பெத்வா வச்சகுடிதோ பட்டா²ய ஸம்மஜ்ஜிதப்³ப³ங். தே²ரே வச்சகுடிக³தே பரிவேணங் ஸம்மஜ்ஜிதப்³ப³ங், ஏவங் பரிவேணங் அஸுஞ்ஞங் ஹோதி. தே²ரே வச்சகுடிதோ அனிக்க²ந்தேயேவ ஆஸனங் பஞ்ஞபேதப்³ப³ங். ஸரீரகிச்சங் கத்வா ஆக³ந்த்வா தஸ்மிங் நிஸின்னஸ்ஸ ஸசே யாகு³ ஹோதி, பா⁴ஜனங் தோ⁴வித்வா யாகு³ உபனாமேதப்³பா³, யாகு³ங் பிவிதஸ்ஸ உத³கங் த³த்வா பா⁴ஜனங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா படிஸாமேதப்³ப³ங். உபஜ்ஜா²யம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ தே³ஸோ உக்லாபோ ஹோதி கேனசி கசவரேன ஸங்கிண்ணோ, ஸோ தே³ஸோ ஸம்மஜ்ஜிதப்³போ³. ஸசே பன அஞ்ஞோ கசவரோ நத்தி², உத³கபு²ஸிதானேவ ஹொந்தி, ஹத்தே²ன பமஜ்ஜிதப்³போ³.
183.Vattanti ettha pana vattaṃ nāmetaṃ upajjhāyavattaṃ ācariyavattaṃ āgantukavattaṃ āvāsikavattaṃ gamikavattaṃ bhattaggavattaṃ piṇḍacārikavattaṃ āraññikavattaṃ senāsanavattaṃ jantāgharavattaṃ vaccakuṭivattanti bahuvidhaṃ. Tattha upajjhāyavattaṃ tāva evaṃ veditabbaṃ – saddhivihārikena kālasseva uṭṭhāya upāhanā omuñcitvā ekaṃsaṃ uttarāsaṅgaṃ karitvā upajjhāyassa dantakaṭṭhaṃ dātabbaṃ, mukhodakaṃ dātabbaṃ. Tattha dantakaṭṭhaṃ dentena mahantaṃ majjhimaṃ khuddakanti tīṇi dantakaṭṭhāni upanetvā ito yaṃ tīṇi divasāni gaṇhāti, catutthadivasato paṭṭhāya tādisameva dātabbaṃ. Sace aniyamaṃ katvā yaṃ vā taṃ vā gaṇhāti, atha yādisaṃ labhati, tādisaṃ dātabbaṃ. Mukhodakaṃ dentenapi sītañca uṇhañca udakaṃ upanetvā tato yaṃ tīṇi divasāni vaḷañjeti. Catutthadivasato paṭṭhāya tādisameva mukhadhovanodakaṃ dātabbaṃ. Sace duvidhampi vaḷañjeti, duvidhampi upanetabbaṃ. Udakaṃ mukhadhovanaṭṭhāne ṭhapetvā vaccakuṭito paṭṭhāya sammajjitabbaṃ. There vaccakuṭigate pariveṇaṃ sammajjitabbaṃ, evaṃ pariveṇaṃ asuññaṃ hoti. There vaccakuṭito anikkhanteyeva āsanaṃ paññapetabbaṃ. Sarīrakiccaṃ katvā āgantvā tasmiṃ nisinnassa sace yāgu hoti, bhājanaṃ dhovitvā yāgu upanāmetabbā, yāguṃ pivitassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ. Upajjhāyamhi vuṭṭhite āsanaṃ uddharitabbaṃ. Sace so deso uklāpo hoti kenaci kacavarena saṃkiṇṇo, so deso sammajjitabbo. Sace pana añño kacavaro natthi, udakaphusitāneva honti, hatthena pamajjitabbo.
ஸசே உபஜ்ஜா²யோ கா³மங் பவிஸிதுகாமோ ஹோதி, நிவாஸனங் தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங் தா³தப்³ப³ங், ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸஉத³கோ தா³தப்³போ³. ஸசே உபஜ்ஜா²யோ பச்சா²ஸமணங் ஆகங்க²தி, திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா உபஜ்ஜா²யஸ்ஸ பச்சா²ஸமணேன ஹோதப்³ப³ங், நாதிதூ³ரே க³ந்தப்³ப³ங், நாச்சாஸன்னே க³ந்தப்³ப³ங். எத்த² பன ஸசே உபஜ்ஜா²யங் நிவத்தித்வா ஓலோகெந்தங் ஏகேன வா த்³வீஹி வா பத³வீதிஹாரேஹி ஸம்பாபுணாதி, எத்தாவதா நாதிதூ³ரே நாச்சாஸன்னே க³தோ ஹோதீதி வேதி³தப்³ப³ங். ஸசே உபஜ்ஜா²யேன பி⁴க்கா²சாரே யாகு³யா வா ப⁴த்தே வா லத்³தே⁴ பத்தோ உண்ஹோ வா பா⁴ரிகோ வா ஹோதி, அத்தனோ பத்தங் தஸ்ஸ த³த்வா ஸோ பத்தோ க³ஹேதப்³போ³, ந உபஜ்ஜா²யஸ்ஸ ப⁴ணமானஸ்ஸ அந்தரந்தரா கதா² ஓபாதேதப்³பா³. இதோ பட்டா²ய பன யத்த² யத்த² ந-காரேன படிஸேதோ⁴ கரீயதி, ஸப்³ப³த்த² து³க்கடாபத்தி வேதி³தப்³பா³. உபஜ்ஜா²யோ ஆபத்திஸாமந்தா ப⁴ணமானோ நிவாரேதப்³போ³. நிவாரெந்தேன ச ‘‘ப⁴ந்தே, ஈதி³ஸங் நாம வத்துங் வட்டதி, ஆபத்தி ந ஹோதீ’’தி ஏவங் புச்ச²ந்தேன விய வாரேதப்³போ³, ‘‘வாரெஸ்ஸாமீ’’தி பன கத்வா ‘‘மஹல்லக, மா ஏவங் ப⁴ணா’’தி ந வத்தப்³போ³.
Sace upajjhāyo gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto saudako dātabbo. Sace upajjhāyo pacchāsamaṇaṃ ākaṅkhati, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā upajjhāyassa pacchāsamaṇena hotabbaṃ, nātidūre gantabbaṃ, nāccāsanne gantabbaṃ. Ettha pana sace upajjhāyaṃ nivattitvā olokentaṃ ekena vā dvīhi vā padavītihārehi sampāpuṇāti, ettāvatā nātidūre nāccāsanne gato hotīti veditabbaṃ. Sace upajjhāyena bhikkhācāre yāguyā vā bhatte vā laddhe patto uṇho vā bhāriko vā hoti, attano pattaṃ tassa datvā so patto gahetabbo, na upajjhāyassa bhaṇamānassa antarantarā kathā opātetabbā. Ito paṭṭhāya pana yattha yattha na-kārena paṭisedho karīyati, sabbattha dukkaṭāpatti veditabbā. Upajjhāyo āpattisāmantā bhaṇamāno nivāretabbo. Nivārentena ca ‘‘bhante, īdisaṃ nāma vattuṃ vaṭṭati, āpatti na hotī’’ti evaṃ pucchantena viya vāretabbo, ‘‘vāressāmī’’ti pana katvā ‘‘mahallaka, mā evaṃ bhaṇā’’ti na vattabbo.
ஸசே ஆஸன்னே கா³மோ ஹோதி, விஹாரே வா கி³லானோ பி⁴க்கு² ஹோதி, கா³மதோ பட²மதரங் ஆக³ந்தப்³ப³ங். ஸசே தூ³ரே கா³மோ ஹோதி, உபஜ்ஜா²யேன ஸத்³தி⁴ங் ஆக³ச்ச²ந்தோபி நத்தி², தேனேவ ஸத்³தி⁴ங் கா³மதோ நிக்க²மித்வா சீவரேன பத்தங் வேடெ²த்வா அந்தராமக்³க³தோ பட²மதரங் ஆக³ந்தப்³ப³ங். ஏவங் பட²மதரங் ஆக³தேன ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், பச்சுக்³க³ந்த்வா பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங், நிவாஸனங் படிக்³க³ஹேதப்³ப³ங். ஸசே சீவரங் ஸேத³க்³க³ஹிதங் ஹோதி, முஹுத்தங் உண்ஹே ஓதாபேதப்³ப³ங், ந ச உண்ஹே சீவரங் நித³ஹிதப்³ப³ங், சீவரங் ஸங்க⁴ரிதப்³ப³ங். சீவரங் ஸங்க⁴ரந்தேன ச சதுரங்கு³லங் கண்ணங் உஸ்ஸாரெத்வா சீவரங் ஸங்க⁴ரிதப்³ப³ங். கிங்காரணா? மா மஜ்ஜே² ப⁴ங்கோ³ அஹோஸீதி. ஸமங் கத்வா ஸங்க⁴ரிதஸ்ஸ ஹி மஜ்ஜே² ப⁴ங்கோ³ ஹோதி, ததோ நிச்சங் பி⁴ஜ்ஜமானங் து³ப்³ப³லங் ஹோதி, தங் நிவாரணத்த²மேதங் வுத்தங். தஸ்மா யதா² அஜ்ஜ ப⁴ங்க³ட்டா²னேயேவ ஸ்வே ந பி⁴ஜ்ஜிஸ்ஸதி, ததா² தி³வஸே தி³வஸே சதுரங்கு³லங் உஸ்ஸாரெத்வா ஸங்க⁴ரிதப்³ப³ங், ஓபோ⁴கே³ காயப³ந்த⁴னங் காதப்³ப³ங்.
Sace āsanne gāmo hoti, vihāre vā gilāno bhikkhu hoti, gāmato paṭhamataraṃ āgantabbaṃ. Sace dūre gāmo hoti, upajjhāyena saddhiṃ āgacchantopi natthi, teneva saddhiṃ gāmato nikkhamitvā cīvarena pattaṃ veṭhetvā antarāmaggato paṭhamataraṃ āgantabbaṃ. Evaṃ paṭhamataraṃ āgatena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sedaggahitaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ, cīvaraṃ saṅgharitabbaṃ. Cīvaraṃ saṅgharantena ca caturaṅgulaṃ kaṇṇaṃ ussāretvā cīvaraṃ saṅgharitabbaṃ. Kiṃkāraṇā? Mā majjhe bhaṅgo ahosīti. Samaṃ katvā saṅgharitassa hi majjhe bhaṅgo hoti, tato niccaṃ bhijjamānaṃ dubbalaṃ hoti, taṃ nivāraṇatthametaṃ vuttaṃ. Tasmā yathā ajja bhaṅgaṭṭhāneyeva sve na bhijjissati, tathā divase divase caturaṅgulaṃ ussāretvā saṅgharitabbaṃ, obhoge kāyabandhanaṃ kātabbaṃ.
ஸசே பிண்ட³பாதோ ஹோதி, உபஜ்ஜா²யோ ச பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ உபனாமேதப்³போ³, உபஜ்ஜா²யோ பானீயேன புச்சி²தப்³போ³. புச்ச²ந்தேன ச திக்க²த்துங் ‘‘பானீயங், ப⁴ந்தே, ஆஹரீயதூ’’தி பானீயேன புச்சி²தப்³போ³. ஸசே காலோ அத்தி², உபஜ்ஜா²யே பு⁴த்தே ஸயங் பு⁴ஞ்ஜிதப்³ப³ங். ஸசே உபகட்டோ² காலோ, பானீயங் உபஜ்ஜா²யஸ்ஸ ஸந்திகே ட²பெத்வா ஸயம்பி பு⁴ஞ்ஜிதப்³ப³ங். பு⁴த்தாவிஸ்ஸ உத³கங் த³த்வா பத்தங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா வோத³கங் கத்வா முஹுத்தங் உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³, பத்தசீவரங் நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ நிக்கி²பிதப்³போ³, ந ச தட்டிகசம்மக²ண்டா³தீ³ஹி அனந்தரஹிதாய பூ⁴மியா பத்தோ நிக்கி²பிதப்³போ³. ஸசே பன காளவண்ணகதா வா ஸுதா⁴ப³த்³தா⁴ வா பூ⁴மி ஹோதி நிரஜமத்திகா, ததா²ரூபாய பூ⁴மியா ட²பேதுங் வட்டதி, தோ⁴தவாலிகாயபி ட²பேதுங் வட்டதி, பங்ஸுரஜஸக்க²ராதீ³ஸு ந வட்டதி. தத்ர பன பண்ணங் வா ஆதா⁴ரகங் வா ட²பெத்வா தத்ர நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங். இத³ஞ்ச சீவரவங்ஸாதீ³னங் ஹெட்டா² ஹத்த²ங் பவேஸெத்வா அபி⁴முகே²ன ஹத்தே²ன ஸணிகங் நிக்கி²பனத்த²ங் வுத்தங். அந்தே பன க³ஹெத்வா போ⁴கே³ன சீவரவங்ஸாதீ³னங் உபரி கி²பந்தஸ்ஸ பி⁴த்தியங் போ⁴கோ³ படிஹஞ்ஞதி, தஸ்மா ததா² ந காதப்³ப³ங். உபஜ்ஜா²யம்ஹி வுட்டி²தே ஆஸனங் உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.
Sace piṇḍapāto hoti, upajjhāyo ca bhuñjitukāmo hoti, udakaṃ datvā piṇḍapāto upanāmetabbo, upajjhāyo pānīyena pucchitabbo. Pucchantena ca tikkhattuṃ ‘‘pānīyaṃ, bhante, āharīyatū’’ti pānīyena pucchitabbo. Sace kālo atthi, upajjhāye bhutte sayaṃ bhuñjitabbaṃ. Sace upakaṭṭho kālo, pānīyaṃ upajjhāyassa santike ṭhapetvā sayampi bhuñjitabbaṃ. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo, pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca taṭṭikacammakhaṇḍādīhi anantarahitāya bhūmiyā patto nikkhipitabbo. Sace pana kāḷavaṇṇakatā vā sudhābaddhā vā bhūmi hoti nirajamattikā, tathārūpāya bhūmiyā ṭhapetuṃ vaṭṭati, dhotavālikāyapi ṭhapetuṃ vaṭṭati, paṃsurajasakkharādīsu na vaṭṭati. Tatra pana paṇṇaṃ vā ādhārakaṃ vā ṭhapetvā tatra nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ. Idañca cīvaravaṃsādīnaṃ heṭṭhā hatthaṃ pavesetvā abhimukhena hatthena saṇikaṃ nikkhipanatthaṃ vuttaṃ. Ante pana gahetvā bhogena cīvaravaṃsādīnaṃ upari khipantassa bhittiyaṃ bhogo paṭihaññati, tasmā tathā na kātabbaṃ. Upajjhāyamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
ஸசே உபஜ்ஜா²யோ நஹாயிதுகாமோ ஹோதி, நஹானங் படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே உண்ஹேன அத்தோ² ஹோதி, உண்ஹங் படியாதே³தப்³ப³ங்.
Sace upajjhāyo nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
ஸசே உபஜ்ஜா²யோ ஜந்தாக⁴ரங் பவிஸிதுகாமோ ஹோதி, சுண்ணங் ஸன்னேதப்³ப³ங், மத்திகா தேமேதப்³பா³. ஜந்தாக⁴ரபீட²ங் ஆதா³ய உபஜ்ஜா²யஸ்ஸ பிட்டி²தோ பிட்டி²தோ க³ந்த்வா ஜந்தாக⁴ரபீட²ங் த³த்வா சீவரங் படிக்³க³ஹெத்வா ஏகமந்தே நித்³தூ⁴மட்டா²னே ட²பேதப்³ப³ங், சுண்ணங் தா³தப்³ப³ங், மத்திகா தா³தப்³பா³. ஸசே உஸ்ஸஹதி, ஜந்தாக⁴ரங் பவிஸிதப்³ப³ங், பவிஸந்தேன மத்திகாய முக²ங் மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங், ந நவா பி⁴க்கூ² ஆஸனேன படிபா³ஹிதப்³பா³, ஜந்தாக⁴ரே உபஜ்ஜா²யஸ்ஸ பரிகம்மங் காதப்³ப³ங். ஜந்தாக⁴ரே பரிகம்மங் நாம அங்கா³ரமத்திகாஉண்ஹோத³கதா³னாதி³கங் ஸப்³ப³கிச்சங். ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா ஜந்தாக⁴ரா நிக்க²மிதப்³ப³ங்.
Sace upajjhāyo jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā. Jantāgharapīṭhaṃ ādāya upajjhāyassa piṭṭhito piṭṭhito gantvā jantāgharapīṭhaṃ datvā cīvaraṃ paṭiggahetvā ekamante niddhūmaṭṭhāne ṭhapetabbaṃ, cuṇṇaṃ dātabbaṃ, mattikā dātabbā. Sace ussahati, jantāgharaṃ pavisitabbaṃ, pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ, na navā bhikkhū āsanena paṭibāhitabbā, jantāghare upajjhāyassa parikammaṃ kātabbaṃ. Jantāghare parikammaṃ nāma aṅgāramattikāuṇhodakadānādikaṃ sabbakiccaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
உத³கேபி உபஜ்ஜா²யஸ்ஸ அங்க³பச்சங்க³க⁴ங்ஸனாதி³கங் பரிகம்மங் காதப்³ப³ங், நஹாதேன பட²மதரங் உத்தரித்வா அத்தனோ க³த்தங் வோத³கங் கத்வா நிவாஸெத்வா உபஜ்ஜா²யஸ்ஸ க³த்ததோ உத³கங் பமஜ்ஜிதப்³ப³ங், நிவாஸனங் தா³தப்³ப³ங், ஸங்கா⁴டி தா³தப்³பா³ , ஜந்தாக⁴ரபீட²ங் ஆதா³ய பட²மதரங் ஆக³ந்த்வா ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், உபஜ்ஜா²யோ பானீயேன புச்சி²தப்³போ³. ஜந்தாக⁴ரே ஹி உண்ஹஸந்தாபேன பிபாஸா ஹோதி. ஸசே உத்³தி³ஸாபேதுகாமோ ஹோதி, உத்³தி³ஸிதப்³போ³. ஸசே பரிபுச்சி²துகாமோ ஹோதி, பரிபுச்சி²தப்³போ³.
Udakepi upajjhāyassa aṅgapaccaṅgaghaṃsanādikaṃ parikammaṃ kātabbaṃ, nahātena paṭhamataraṃ uttaritvā attano gattaṃ vodakaṃ katvā nivāsetvā upajjhāyassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā , jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, upajjhāyo pānīyena pucchitabbo. Jantāghare hi uṇhasantāpena pipāsā hoti. Sace uddisāpetukāmo hoti, uddisitabbo. Sace paripucchitukāmo hoti, paripucchitabbo.
யஸ்மிங் விஹாரே உபஜ்ஜா²யோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, கேனசி கே³லஞ்ஞேன அனபி⁴பூ⁴தோ ஹோதி, ஸோதே⁴தப்³போ³. அகி³லானேன ஹி ஸத்³தி⁴விஹாரிகேன ஸட்டி²வஸ்ஸேனபி ஸப்³ப³ங் உபஜ்ஜா²யவத்தங் காதப்³ப³ங், அனாத³ரேன அகரொந்தஸ்ஸ வத்தபே⁴தே³ து³க்கடங், ந-காரபடிஸங்யுத்தேஸு பன பதே³ஸு கி³லானஸ்ஸபி படிக்கி²த்தகிரியங் கரொந்தஸ்ஸ து³க்கடமேவ. விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங் நிக்கி²பிதப்³ப³ங், நிஸீத³னபச்சத்த²ரணங் நீஹரித்வா ஏகமந்தங் நிக்கி²பிதப்³ப³ங், பி⁴ஸிபி³ம்போ³ஹனங் நீஹரித்வா ஏகமந்தங் நிக்கி²பிதப்³ப³ங், மஞ்சோ நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் நீஹரித்வா ஏகமந்தங் நிக்கி²பிதப்³போ³, பீட²ங் நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் நீஹரித்வா ஏகமந்தங் நிக்கி²பிதப்³ப³ங், மஞ்சபடிபாத³கா நீஹரித்வா ஏகமந்தங் நிக்கி²பிதப்³பா³, கே²ளமல்லகோ நீஹரித்வா ஏகமந்தங் நிக்கி²பிதப்³போ³, அபஸ்ஸேனப²லகங் நீஹரித்வா ஏகமந்தங் நிக்கி²பிதப்³ப³ங். பூ⁴மத்த²ரணங் யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங் நிக்கி²பிதப்³ப³ங். ஸசே விஹாரே ஸந்தானகங் ஹோதி, உல்லோகா பட²மங் ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா பரிப்போ²ஸித்வா ஸம்மஜ்ஜிதப்³பா³ ‘‘மா விஹாரோ ரஜேன உஹஞ்ஞீ’’தி, ஸங்காரங் விசினித்வா ஏகமந்தங் ச²ட்³டே³தப்³ப³ங்.
Yasmiṃ vihāre upajjhāyo viharati, sace so vihāro uklāpo hoti, sace ussahati, kenaci gelaññena anabhibhūto hoti, sodhetabbo. Agilānena hi saddhivihārikena saṭṭhivassenapi sabbaṃ upajjhāyavattaṃ kātabbaṃ, anādarena akarontassa vattabhede dukkaṭaṃ, na-kārapaṭisaṃyuttesu pana padesu gilānassapi paṭikkhittakiriyaṃ karontassa dukkaṭameva. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ, nisīdanapaccattharaṇaṃ nīharitvā ekamantaṃ nikkhipitabbaṃ, bhisibimbohanaṃ nīharitvā ekamantaṃ nikkhipitabbaṃ, mañco nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbo, pīṭhaṃ nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbaṃ, mañcapaṭipādakā nīharitvā ekamantaṃ nikkhipitabbā, kheḷamallako nīharitvā ekamantaṃ nikkhipitabbo, apassenaphalakaṃ nīharitvā ekamantaṃ nikkhipitabbaṃ. Bhūmattharaṇaṃ yathāpaññattaṃ sallakkhetvā nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā paripphositvā sammajjitabbā ‘‘mā vihāro rajena uhaññī’’ti, saṅkāraṃ vicinitvā ekamantaṃ chaḍḍetabbaṃ.
பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா அபி⁴ஹரித்வா யதா² பட²மங் பஞ்ஞத்தங் அஹோஸி, ததே²வ பஞ்ஞபேதப்³ப³ங். ஏதத³த்த²மேவ ஹி ‘‘யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங் நிக்கி²பிதப்³ப³’’ந்தி வுத்தங். ஸசே பன பட²மங் அஜானந்தேன கேனசி பஞ்ஞத்தங் அஹோஸி, ஸமந்ததோ பி⁴த்திங் த்³வங்கு³லமத்தேன வா திவங்கு³லமத்தேன வா மோசெத்வா பஞ்ஞபேதப்³ப³ங். இத³ஞ்ஹெத்த² பஞ்ஞாபனவத்தங் – ஸசே கடஸாரகோ ஹோதி அதிமஹந்தோ ச, சி²ந்தி³த்வா கோடிங் நிவத்தெத்வா ப³ந்தி⁴த்வா பஞ்ஞபேதப்³போ³. ஸசே கோடிங் நிவத்தெத்வா ப³ந்தி⁴துங் ந ஜானாதி, ந சி²ந்தி³தப்³போ³. மஞ்சபடிபாத³கா ஓதாபெத்வா பமஜ்ஜித்வா யதா²டா²னே ட²பேதப்³பா³, மஞ்சோ ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் அதிஹரித்வா யதா²பஞ்ஞத்தங் பஞ்ஞபேதப்³போ³, பீட²ங் ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் அதிஹரித்வா யதா²பஞ்ஞத்தங் பஞ்ஞபேதப்³ப³ங், பி⁴ஸிபி³ம்போ³ஹனங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங், நிஸீத³னபச்சத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங், கே²ளமல்லகோ ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³போ³, அபஸ்ஸேனப²லகங் ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³ப³ங். பத்தசீவரங் நிக்கி²பிதப்³ப³ங், பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ நிக்கி²பிதப்³போ³, ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங், ஓரதோ போ⁴க³ங் கத்வா சீவரங் நிக்கி²பிதப்³ப³ங்.
Bhūmattharaṇaṃ otāpetvā sodhetvā papphoṭetvā abhiharitvā yathā paṭhamaṃ paññattaṃ ahosi, tatheva paññapetabbaṃ. Etadatthameva hi ‘‘yathāpaññattaṃ sallakkhetvā nīharitvā ekamantaṃ nikkhipitabba’’nti vuttaṃ. Sace pana paṭhamaṃ ajānantena kenaci paññattaṃ ahosi, samantato bhittiṃ dvaṅgulamattena vā tivaṅgulamattena vā mocetvā paññapetabbaṃ. Idañhettha paññāpanavattaṃ – sace kaṭasārako hoti atimahanto ca, chinditvā koṭiṃ nivattetvā bandhitvā paññapetabbo. Sace koṭiṃ nivattetvā bandhituṃ na jānāti, na chinditabbo. Mañcapaṭipādakā otāpetvā pamajjitvā yathāṭhāne ṭhapetabbā, mañco otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbo, pīṭhaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbaṃ, bhisibimbohanaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, nisīdanapaccattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, kheḷamallako otāpetvā pamajjitvā atiharitvā yathāṭhāne ṭhapetabbo, apassenaphalakaṃ otāpetvā pamajjitvā atiharitvā yathāṭhāne ṭhapetabbaṃ. Pattacīvaraṃ nikkhipitabbaṃ, pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ, orato bhogaṃ katvā cīvaraṃ nikkhipitabbaṃ.
ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா, உத்தரா, த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே உண்ஹகாலோ ஹோதி, தி³வா த²கேதப்³பா³, ரத்திங் விவரிதப்³பா³.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā thaketabbā, rattiṃ vivaritabbā.
ஸசே உக்லாபங் ஹோதி, பரிவேணங் ஸம்மஜ்ஜிதப்³ப³ங், கொட்ட²கோ ஸம்மஜ்ஜிதப்³போ³, உபட்டா²னஸாலா ஸம்மஜ்ஜிதப்³பா³, அக்³கி³ஸாலா ஸம்மஜ்ஜிதப்³பா³, வச்சகுடி ஸம்மஜ்ஜிதப்³பா³, பானீயங் பரிபோ⁴ஜனீயங் உபட்ட²பேதப்³ப³ங், ஆசமனகும்பி⁴யா உத³கங் ஆஸிஞ்சிதப்³ப³ங்.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā, aggisālā sammajjitabbā, vaccakuṭi sammajjitabbā, pānīyaṃ paribhojanīyaṃ upaṭṭhapetabbaṃ, ācamanakumbhiyā udakaṃ āsiñcitabbaṃ.
ஸசே உபஜ்ஜா²யஸ்ஸ அனபி⁴ரதி உப்பன்னா ஹோதி, ஸத்³தி⁴விஹாரிகேன அஞ்ஞத்த² நேதப்³போ³, அஞ்ஞோ வா பி⁴க்கு² வத்தப்³போ³ ‘‘தே²ரங் க³ஹெத்வா அஞ்ஞத்த² க³ச்சா²’’தி, த⁴ம்மகதா² வாஸ்ஸ காதப்³பா³. ஸசே உபஜ்ஜா²யஸ்ஸ குக்குச்சங் உப்பன்னங் ஹோதி, ஸத்³தி⁴விஹாரிகேன வினோதே³தப்³ப³ங், அஞ்ஞேன வா வினோதா³பேதப்³ப³ங் த⁴ம்மகதா² வாஸ்ஸ காதப்³பா³. ஸசே உபஜ்ஜா²யஸ்ஸ தி³ட்டி²க³தங் உப்பன்னங் ஹோதி, ஸத்³தி⁴விஹாரிகேன விஸ்ஸஜ்ஜேதப்³ப³ங், அஞ்ஞோ வா வத்தப்³போ³ ‘‘தே²ரங் தி³ட்டி²க³தங் விஸ்ஸஜ்ஜாபேஹீ’’தி, த⁴ம்மகதா² வாஸ்ஸ காதப்³பா³. ஸசே உபஜ்ஜா²யோ க³ருத⁴ம்மங் அஜ்ஜா²பன்னோ ஹோதி பரிவாஸாரஹோ, ஸத்³தி⁴விஹாரிகேன உஸ்ஸுக்கங் காதப்³ப³ங், பரிவாஸதா³னத்த²ங் ஸோ ஸோ பி⁴க்கு² உபஸங்கமித்வா யாசிதப்³போ³. ஸசே அத்தனா படிப³லோ ஹோதி, அத்தனாவ தா³தப்³போ³. நோ சே படிப³லோ ஹோதி, அஞ்ஞேன தா³பேதப்³போ³. ஸசே உபஜ்ஜா²யோ மூலாயபடிகஸ்ஸனாரஹோ ஹோதி மானத்தாரஹோ அப்³பா⁴னாரஹோ வா, வுத்தனயேனேவ உஸ்ஸுக்கங் காதப்³ப³ங். ஸசே ஸங்கோ⁴ உபஜ்ஜா²யஸ்ஸ கம்மங் கத்துகாமோ ஹோதி தஜ்ஜனீயங் வா நியஸ்ஸங் வா பப்³பா³ஜனீயங் வா படிஸாரணீயங் வா உக்கே²பனீயங் வா, ஸத்³தி⁴விஹாரிகேன உஸ்ஸுக்கங் காதப்³ப³ங் ‘‘கேன நு கோ² உபாயேன ஸங்கோ⁴ உபஜ்ஜா²யஸ்ஸ கம்மங் ந கரெய்ய, லஹுகாய வா பரிணாமெய்யா’’தி. ஸத்³தி⁴விஹாரிகேன ஹி ‘‘உபஜ்ஜா²யஸ்ஸ உக்கே²பனீயகம்மங் கத்துகாமோ ஸங்கோ⁴’’தி ஞத்வா ஏகமேகங் பி⁴க்கு²ங் உபஸங்கமித்வா ‘‘மா, ப⁴ந்தே, அம்ஹாகங் உபஜ்ஜா²யஸ்ஸ கம்மங் கரித்தா²’’தி யாசிதப்³பா³. ஸசே கரொந்தியேவ, ‘‘தஜ்ஜனீயங் வா நியஸ்ஸங் வா லஹுககம்மங் கரோதா²’’தி யாசிதப்³பா³. ஸசே கரொந்தியேவ, அத² உபஜ்ஜா²யோ ‘‘ஸம்மா வத்தத², ப⁴ந்தே’’தி யாசிதப்³போ³. இதி தங் ஸம்மா வத்தாபெத்வா ‘‘படிப்பஸ்ஸம்பே⁴த², ப⁴ந்தே, கம்ம’’ந்தி பி⁴க்கூ² யாசிதப்³பா³.
Sace upajjhāyassa anabhirati uppannā hoti, saddhivihārikena aññattha netabbo, añño vā bhikkhu vattabbo ‘‘theraṃ gahetvā aññattha gacchā’’ti, dhammakathā vāssa kātabbā. Sace upajjhāyassa kukkuccaṃ uppannaṃ hoti, saddhivihārikena vinodetabbaṃ, aññena vā vinodāpetabbaṃ dhammakathā vāssa kātabbā. Sace upajjhāyassa diṭṭhigataṃ uppannaṃ hoti, saddhivihārikena vissajjetabbaṃ, añño vā vattabbo ‘‘theraṃ diṭṭhigataṃ vissajjāpehī’’ti, dhammakathā vāssa kātabbā. Sace upajjhāyo garudhammaṃ ajjhāpanno hoti parivāsāraho, saddhivihārikena ussukkaṃ kātabbaṃ, parivāsadānatthaṃ so so bhikkhu upasaṅkamitvā yācitabbo. Sace attanā paṭibalo hoti, attanāva dātabbo. No ce paṭibalo hoti, aññena dāpetabbo. Sace upajjhāyo mūlāyapaṭikassanāraho hoti mānattāraho abbhānāraho vā, vuttanayeneva ussukkaṃ kātabbaṃ. Sace saṅgho upajjhāyassa kammaṃ kattukāmo hoti tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, saddhivihārikena ussukkaṃ kātabbaṃ ‘‘kena nu kho upāyena saṅgho upajjhāyassa kammaṃ na kareyya, lahukāya vā pariṇāmeyyā’’ti. Saddhivihārikena hi ‘‘upajjhāyassa ukkhepanīyakammaṃ kattukāmo saṅgho’’ti ñatvā ekamekaṃ bhikkhuṃ upasaṅkamitvā ‘‘mā, bhante, amhākaṃ upajjhāyassa kammaṃ karitthā’’ti yācitabbā. Sace karontiyeva, ‘‘tajjanīyaṃ vā niyassaṃ vā lahukakammaṃ karothā’’ti yācitabbā. Sace karontiyeva, atha upajjhāyo ‘‘sammā vattatha, bhante’’ti yācitabbo. Iti taṃ sammā vattāpetvā ‘‘paṭippassambhetha, bhante, kamma’’nti bhikkhū yācitabbā.
ஸசே உபஜ்ஜா²யஸ்ஸ சீவரங் தோ⁴விதப்³ப³ங் ஹோதி, ஸத்³தி⁴விஹாரிகேன தோ⁴விதப்³ப³ங், உஸ்ஸுக்கங் வா காதப்³ப³ங் ‘‘கிந்தி நு கோ² உபஜ்ஜா²யஸ்ஸ சீவரங் தோ⁴வியேதா²’’தி. ஸசே உபஜ்ஜா²யஸ்ஸ சீவரங் காதப்³ப³ங் ஹோதி, ரஜனங் வா பசிதப்³ப³ங், சீவரங் வா ரஜேதப்³ப³ங் ஹோதி, ஸத்³தி⁴விஹாரிகேன ஸப்³ப³ங் காதப்³ப³ங், உஸ்ஸக்கங் வா காதப்³ப³ங் ‘‘கிந்தி நு கோ² உபஜ்ஜா²யஸ்ஸ சீவரங் ரஜியேதா²’’தி. சீவரங் ரஜந்தேன ஸாது⁴கங் ஸங்பரிவத்தெத்வா ரஜேதப்³ப³ங், ந ச அச்சி²ன்னே தே²வே பக்கமிதப்³ப³ங்.
Sace upajjhāyassa cīvaraṃ dhovitabbaṃ hoti, saddhivihārikena dhovitabbaṃ, ussukkaṃ vā kātabbaṃ ‘‘kinti nu kho upajjhāyassa cīvaraṃ dhoviyethā’’ti. Sace upajjhāyassa cīvaraṃ kātabbaṃ hoti, rajanaṃ vā pacitabbaṃ, cīvaraṃ vā rajetabbaṃ hoti, saddhivihārikena sabbaṃ kātabbaṃ, ussakkaṃ vā kātabbaṃ ‘‘kinti nu kho upajjhāyassa cīvaraṃ rajiyethā’’ti. Cīvaraṃ rajantena sādhukaṃ saṃparivattetvā rajetabbaṃ, na ca acchinne theve pakkamitabbaṃ.
ந உபஜ்ஜா²யங் அனாபுச்சா² ஏகச்சஸ்ஸ பத்தோ தா³தப்³போ³, ந ஏகச்சஸ்ஸ பத்தோ படிக்³க³ஹேதப்³போ³, ந ஏகச்சஸ்ஸ சீவரங் தா³தப்³ப³ங், ந ஏகச்சஸ்ஸ சீவரங் படிக்³க³ஹேதப்³ப³ங், ந ஏகச்சஸ்ஸ பரிக்கா²ரோ தா³தப்³போ³, ந ஏகச்சஸ்ஸ பரிக்கா²ரோ படிக்³க³ஹேதப்³போ³, ந ஏகச்சஸ்ஸ கேஸா சே²தே³தப்³பா³, ந ஏகச்சேன கேஸா சே²தா³பேதப்³பா³ , ந ஏகச்சஸ்ஸ பரிகம்மங் காதப்³ப³ங், ந ஏகச்சேன பரிகம்மங் காராபேதப்³ப³ங், ந ஏகச்சஸ்ஸ வெய்யாவச்சோ காதப்³போ³, ந ஏகச்சேன வெய்யாவச்சோ காராபேதப்³போ³, ந ஏகச்சஸ்ஸ பச்சா²ஸமணேன ஹோதப்³ப³ங், ந ஏகச்சோ பச்சா²ஸமணோ ஆதா³தப்³போ³, ந ஏகச்சஸ்ஸ பிண்ட³பாதோ நீஹரிதப்³போ³, ந ஏகச்சேன பிண்ட³பாதோ நீஹராபேதப்³போ³, ந உபஜ்ஜா²யங் அனாபுச்சா² கா³மோ பவிஸிதப்³போ³, பிண்டா³ய வா அஞ்ஞேன வா கரணீயேன பவிஸிதுகாமேன ஆபுச்சி²த்வாவ பவிஸிதப்³போ³. ஸசே உபஜ்ஜா²யோ காலஸ்ஸேவ வுட்டா²ய தூ³ரங் பி⁴க்கா²சாரங் க³ந்துகாமோ ஹோதி, ‘‘த³ஹரா பிண்டா³ய பவிஸந்தூ’’தி வத்வா க³ந்தப்³ப³ங். அவத்வா க³தே பரிவேணங் க³ந்த்வா உபஜ்ஜா²யங் அபஸ்ஸந்தேன கா³மங் பவிஸிதுங் வட்டதி. ஸசே கா³மங் பவிஸந்தோபி பஸ்ஸதி, தி³ட்ட²ட்டா²னதோ பட்டா²ய ஆபுச்சி²துங்யேவ வட்டதி. ந உபஜ்ஜா²யங் அனாபுச்சா² வாஸத்தா²ய வா அஸுப⁴த³ஸ்ஸனத்தா²ய வா ஸுஸானங் க³ந்தப்³ப³ங், ந தி³ஸா பக்கமிதப்³பா³, பக்கமிதுகாமேன பன கம்மங் ஆசிக்கி²த்வா யாவததியங் யாசிதப்³போ³. ஸசே அனுஜானாதி, ஸாது⁴, நோ சே அனுஜானாதி, தங் நிஸ்ஸாய வஸதோ சஸ்ஸ உத்³தே³ஸோ வா பரிபுச்சா² வா கம்மட்டா²னங் வா ந ஸம்பஜ்ஜதி, உபஜ்ஜா²யோ பா³லோ ஹோதி அப்³யத்தோ, கேவலங் அத்தனோ ஸந்திகே வஸாபேதுகாமதாய ஏவ க³ந்துங் ந தே³தி, ஏவரூபே நிவாரெந்தேபி க³ந்துங் வட்டதி. ஸசே உபஜ்ஜா²யோ கி³லானோ ஹோதி, யாவஜீவங் உபட்டா²பேதப்³போ³, வுட்டா²னமஸ்ஸ ஆக³மேதப்³ப³ங், ந கத்த²சி க³ந்தப்³ப³ங். ஸசே அஞ்ஞோ பி⁴க்கு² உபட்டா²கோ அத்தி², பே⁴ஸஜ்ஜங் பரியேஸித்வா தஸ்ஸ ஹத்தே² த³த்வா ‘‘ப⁴ந்தே, அயங் உபட்ட²ஹிஸ்ஸதீ’’தி வத்வா க³ந்தப்³ப³ங். இத³ங் தாவ உபஜ்ஜா²யவத்தங்.
Na upajjhāyaṃ anāpucchā ekaccassa patto dātabbo, na ekaccassa patto paṭiggahetabbo, na ekaccassa cīvaraṃ dātabbaṃ, na ekaccassa cīvaraṃ paṭiggahetabbaṃ, na ekaccassa parikkhāro dātabbo, na ekaccassa parikkhāro paṭiggahetabbo, na ekaccassa kesā chedetabbā, na ekaccena kesā chedāpetabbā , na ekaccassa parikammaṃ kātabbaṃ, na ekaccena parikammaṃ kārāpetabbaṃ, na ekaccassa veyyāvacco kātabbo, na ekaccena veyyāvacco kārāpetabbo, na ekaccassa pacchāsamaṇena hotabbaṃ, na ekacco pacchāsamaṇo ādātabbo, na ekaccassa piṇḍapāto nīharitabbo, na ekaccena piṇḍapāto nīharāpetabbo, na upajjhāyaṃ anāpucchā gāmo pavisitabbo, piṇḍāya vā aññena vā karaṇīyena pavisitukāmena āpucchitvāva pavisitabbo. Sace upajjhāyo kālasseva vuṭṭhāya dūraṃ bhikkhācāraṃ gantukāmo hoti, ‘‘daharā piṇḍāya pavisantū’’ti vatvā gantabbaṃ. Avatvā gate pariveṇaṃ gantvā upajjhāyaṃ apassantena gāmaṃ pavisituṃ vaṭṭati. Sace gāmaṃ pavisantopi passati, diṭṭhaṭṭhānato paṭṭhāya āpucchituṃyeva vaṭṭati. Na upajjhāyaṃ anāpucchā vāsatthāya vā asubhadassanatthāya vā susānaṃ gantabbaṃ, na disā pakkamitabbā, pakkamitukāmena pana kammaṃ ācikkhitvā yāvatatiyaṃ yācitabbo. Sace anujānāti, sādhu, no ce anujānāti, taṃ nissāya vasato cassa uddeso vā paripucchā vā kammaṭṭhānaṃ vā na sampajjati, upajjhāyo bālo hoti abyatto, kevalaṃ attano santike vasāpetukāmatāya eva gantuṃ na deti, evarūpe nivārentepi gantuṃ vaṭṭati. Sace upajjhāyo gilāno hoti, yāvajīvaṃ upaṭṭhāpetabbo, vuṭṭhānamassa āgametabbaṃ, na katthaci gantabbaṃ. Sace añño bhikkhu upaṭṭhāko atthi, bhesajjaṃ pariyesitvā tassa hatthe datvā ‘‘bhante, ayaṃ upaṭṭhahissatī’’ti vatvā gantabbaṃ. Idaṃ tāva upajjhāyavattaṃ.
184. இத³மேவ ச அந்தேவாஸிகேன ஆசரியஸ்ஸ கத்தப்³ப³த்தா ஆசரியவத்தந்தி வுச்சதி. நாமமத்தமேவ ஹெத்த² நானங். தத்த² யாவ சீவரரஜனங், தாவ வத்தே அகரியமானே உபஜ்ஜா²யஸ்ஸ ஆசரியஸ்ஸ ச பரிஹானி ஹோதி, தஸ்மா தங் அகரொந்தஸ்ஸ நிஸ்ஸயமுத்தகஸ்ஸபி அமுத்தகஸ்ஸபி ஆபத்தியேவ, ஏகச்சஸ்ஸ பத்ததா³னதோ பட்டா²ய அமுத்தனிஸ்ஸயஸ்ஸேவ ஆபத்தி. உபஜ்ஜா²யே ஆசரியே வா வத்தங் ஸாதி³யந்தே ஸத்³தி⁴விஹாரிகா அந்தேவாஸிகா ச ப³ஹுகாபி ஹொந்து, ஸப்³பே³ஸங் ஆபத்தி. ஸசே உபஜ்ஜா²யோ ஆசரியோ வா ‘‘மய்ஹங் உபட்டா²கோ அத்தி², தும்ஹே அத்தனோ ஸஜ்ஜா²யமனஸிகாராதீ³ஸு யோக³ங் கரோதா²’’தி வத³தி, ஸத்³தி⁴விஹாரிகாதீ³னங் அனாபத்தி. உபஜ்ஜா²யோ வா ஆசரியோ வா ஸசே ஸாதி³யனங் வா அஸாதி³யனங் வா ந ஜானாதி, பா³லோ ஹோதி, ஸத்³தி⁴விஹாரிகாத³யோ ப³ஹூ, தேஸு ஏகோ வத்தஸம்பன்னோ பி⁴க்கு² ‘‘உபஜ்ஜா²யஸ்ஸ வா ஆசரியஸ்ஸ வா கிச்சங் அஹங் கரிஸ்ஸாமி, தும்ஹே அப்பொஸ்ஸுக்கா விஹரதா²’’தி ஏவஞ்சே அத்தனோ பா⁴ரங் கத்வா இதரே விஸ்ஸஜ்ஜேதி, தஸ்ஸ பா⁴ரகரணதோ பட்டா²ய தேஸங் அனாபத்தி. எத்த² அந்தேவாஸிகேஸு பன நிஸ்ஸயந்தேவாஸிகேன யாவ ஆசரியங் நிஸ்ஸாய வஸதி, தாவ ஸப்³ப³ங் ஆசரியவத்தங் காதப்³ப³ங். பப்³ப³ஜ்ஜஉபஸம்பத³த⁴ம்மந்தேவாஸிகேஹி பன நிஸ்ஸயமுத்தகேஹிபி ஆதி³தோ பட்டா²ய யாவ சீவரரஜனங், தாவ வத்தங் காதப்³ப³ங். அனாபுச்சி²த்வா பத்ததா³னாதி³ம்ஹி பன ஏதேஸங் அனாபத்தி.
184. Idameva ca antevāsikena ācariyassa kattabbattā ācariyavattanti vuccati. Nāmamattameva hettha nānaṃ. Tattha yāva cīvararajanaṃ, tāva vatte akariyamāne upajjhāyassa ācariyassa ca parihāni hoti, tasmā taṃ akarontassa nissayamuttakassapi amuttakassapi āpattiyeva, ekaccassa pattadānato paṭṭhāya amuttanissayasseva āpatti. Upajjhāye ācariye vā vattaṃ sādiyante saddhivihārikā antevāsikā ca bahukāpi hontu, sabbesaṃ āpatti. Sace upajjhāyo ācariyo vā ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikādīnaṃ anāpatti. Upajjhāyo vā ācariyo vā sace sādiyanaṃ vā asādiyanaṃ vā na jānāti, bālo hoti, saddhivihārikādayo bahū, tesu eko vattasampanno bhikkhu ‘‘upajjhāyassa vā ācariyassa vā kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti. Ettha antevāsikesu pana nissayantevāsikena yāva ācariyaṃ nissāya vasati, tāva sabbaṃ ācariyavattaṃ kātabbaṃ. Pabbajjaupasampadadhammantevāsikehi pana nissayamuttakehipi ādito paṭṭhāya yāva cīvararajanaṃ, tāva vattaṃ kātabbaṃ. Anāpucchitvā pattadānādimhi pana etesaṃ anāpatti.
ஏதேஸு பப்³ப³ஜ்ஜந்தேவாஸிகோ ச உபஸம்பத³ந்தேவாஸிகோ ச ஆசரியஸ்ஸ யாவஜீவங் பா⁴ரா. நிஸ்ஸயந்தேவாஸிகோ ச த⁴ம்மந்தேவாஸிகோ ச யாவ ஸமீபே வஸந்தி, தாவ ஆசரியுபஜ்ஜா²யேஹிபி அந்தேவாஸிகஸத்³தி⁴விஹாரிகா ஸங்க³ஹேதப்³பா³ அனுக்³க³ஹேதப்³பா³ உத்³தே³ஸேன பரிபுச்சா²ய ஓவாதே³ன அனுஸாஸனியா. ஸசே அந்தேவாஸிகஸத்³தி⁴விஹாரிகானங் பத்தோ வா சீவரங் வா அஞ்ஞோ வா கோசி பரிக்கா²ரோ நத்தி², அத்தனோ அதிரேகபத்தசீவரங் அதிரேகபரிக்கா²ரோ வா அத்தி², தா³தப்³ப³ங். நோ சே, த⁴ம்மியேன நயேன பரியேஸனத்தா²ய உஸ்ஸுக்கங் காதப்³ப³ங். ஸசே அந்தேவாஸிகஸத்³தி⁴விஹாரிகா கி³லானா ஹொந்தி, உபஜ்ஜா²யவத்தே வுத்தனயேன த³ந்தகட்ட²தா³னங் ஆதி³ங் கத்வா ஆசமனகும்பி⁴யா உத³கஸிஞ்சனபரியோஸானங் ஸப்³ப³ங் வத்தங் காதப்³ப³மேவ, அகரொந்தானங் ஆபத்தி. தஸ்மா ஆசரியுபஜ்ஜா²யேஹிபி அந்தேவாஸிகஸத்³தி⁴விஹாரிகேஸு ஸம்மா வத்திதப்³ப³ங். ஆசரியுபஜ்ஜா²யாதீ³ஸு ஹி யோ யோ ந ஸம்மா வத்ததி, தஸ்ஸ தஸ்ஸ ஆபத்தி. உபஜ்ஜா²யாதி³வத்தகதா².
Etesu pabbajjantevāsiko ca upasampadantevāsiko ca ācariyassa yāvajīvaṃ bhārā. Nissayantevāsiko ca dhammantevāsiko ca yāva samīpe vasanti, tāva ācariyupajjhāyehipi antevāsikasaddhivihārikā saṅgahetabbā anuggahetabbā uddesena paripucchāya ovādena anusāsaniyā. Sace antevāsikasaddhivihārikānaṃ patto vā cīvaraṃ vā añño vā koci parikkhāro natthi, attano atirekapattacīvaraṃ atirekaparikkhāro vā atthi, dātabbaṃ. No ce, dhammiyena nayena pariyesanatthāya ussukkaṃ kātabbaṃ. Sace antevāsikasaddhivihārikā gilānā honti, upajjhāyavatte vuttanayena dantakaṭṭhadānaṃ ādiṃ katvā ācamanakumbhiyā udakasiñcanapariyosānaṃ sabbaṃ vattaṃ kātabbameva, akarontānaṃ āpatti. Tasmā ācariyupajjhāyehipi antevāsikasaddhivihārikesu sammā vattitabbaṃ. Ācariyupajjhāyādīsu hi yo yo na sammā vattati, tassa tassa āpatti. Upajjhāyādivattakathā.
185. இதா³னி ஆக³ந்துகவத்தாதீ³னி வேதி³தப்³பா³னி. ஆக³ந்துகேன பி⁴க்கு²னா உபசாரஸீமாஸமீபங் க³ந்த்வா உபாஹனா ஓமுஞ்சித்வா நீசங் கத்வா பப்போ²டெத்வா உபாஹனத³ண்ட³கேன க³ஹெத்வா ச²த்தங் உபனாமெத்வா ஸீஸங் விவரித்வா ஸீஸே சீவரங் க²ந்தே⁴ கரித்வா ஸாது⁴கங் அதரமானேன ஆராமோ பவிஸிதப்³போ³, ஆராமங் பவிஸந்தேன ஸல்லக்கே²தப்³ப³ங் ‘‘கத்த² ஆவாஸிகா பி⁴க்கூ² ஸன்னிபதந்தீ’’தி. யத்த² ஆவாஸிகா பி⁴க்கூ² ஸன்னிபதந்தி உபட்டா²னஸாலாய வா மண்ட³பே வா ருக்க²மூலே வா, தத்த² க³ந்த்வா ஏகமந்தங் பத்தோ நிக்கி²பிதப்³போ³, ஏகமந்தங் சீவரங் நிக்கி²பிதப்³ப³ங், பதிரூபங் ஆஸனங் க³ஹெத்வா நிஸீதி³தப்³ப³ங், பானீயங் புச்சி²தப்³ப³ங், பரிபோ⁴ஜனீயங் புச்சி²தப்³ப³ங் ‘‘கதமங் பானீயங், கதமங் பரிபோ⁴ஜனீய’’ந்தி. ஸசே பானீயேன அத்தோ² ஹோதி, பானீயங் க³ஹெத்வா பாதப்³ப³ங். ஸசே பரிபோ⁴ஜனீயேன அத்தோ² ஹோதி, பரிபோ⁴ஜனீயங் க³ஹெத்வா பாதா³ தோ⁴விதப்³பா³. பாதே³ தோ⁴வந்தேன ஏகேன ஹத்தே²ன உத³கங் ஆஸிஞ்சிதப்³ப³ங், ஏகேன ஹத்தே²ன பாதா³ தோ⁴விதப்³பா³, ந தேனேவ ஹத்தே²ன உத³கங் ஆஸிஞ்சிதப்³ப³ங், ந தேனேவ ஹத்தே²ன பாதா³ தோ⁴விதப்³பா³, உபாஹனபுஞ்ச²னசோளகங் புஞ்சி²த்வா உபாஹனா புஞ்சி²தப்³பா³, உபாஹனா புஞ்ச²ந்தேன பட²மங் ஸுக்கே²ன சோளகேன புஞ்சி²தப்³பா³, பச்சா² அல்லேன, உபாஹனபுஞ்ச²னசோளகங் தோ⁴வித்வா ஏகமந்தங் பத்த²ரிதப்³ப³ங்.
185. Idāni āgantukavattādīni veditabbāni. Āgantukena bhikkhunā upacārasīmāsamīpaṃ gantvā upāhanā omuñcitvā nīcaṃ katvā papphoṭetvā upāhanadaṇḍakena gahetvā chattaṃ upanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabbo, ārāmaṃ pavisantena sallakkhetabbaṃ ‘‘kattha āvāsikā bhikkhū sannipatantī’’ti. Yattha āvāsikā bhikkhū sannipatanti upaṭṭhānasālāya vā maṇḍape vā rukkhamūle vā, tattha gantvā ekamantaṃ patto nikkhipitabbo, ekamantaṃ cīvaraṃ nikkhipitabbaṃ, patirūpaṃ āsanaṃ gahetvā nisīditabbaṃ, pānīyaṃ pucchitabbaṃ, paribhojanīyaṃ pucchitabbaṃ ‘‘katamaṃ pānīyaṃ, katamaṃ paribhojanīya’’nti. Sace pānīyena attho hoti, pānīyaṃ gahetvā pātabbaṃ. Sace paribhojanīyena attho hoti, paribhojanīyaṃ gahetvā pādā dhovitabbā. Pāde dhovantena ekena hatthena udakaṃ āsiñcitabbaṃ, ekena hatthena pādā dhovitabbā, na teneva hatthena udakaṃ āsiñcitabbaṃ, na teneva hatthena pādā dhovitabbā, upāhanapuñchanacoḷakaṃ puñchitvā upāhanā puñchitabbā, upāhanā puñchantena paṭhamaṃ sukkhena coḷakena puñchitabbā, pacchā allena, upāhanapuñchanacoḷakaṃ dhovitvā ekamantaṃ pattharitabbaṃ.
ஸசே ஆவாஸிகோ பி⁴க்கு² வுட்³டோ⁴ ஹோதி, அபி⁴வாதே³தப்³போ³. ஸசே நவகோ ஹோதி, அபி⁴வாதா³பேதப்³போ³. ஸேனாஸனங் புச்சி²தப்³ப³ங் ‘‘கதமங் மே ஸேனாஸனங் பாபுணாதீ’’தி, அஜ்ஜா²வுட்ட²ங் வா அனஜ்ஜா²வுட்ட²ங் வா புச்சி²தப்³ப³ங், ‘‘கோ³சரகா³மோ ஆஸன்னே, உதா³ஹு தூ³ரே, காலஸ்ஸேவ பிண்டா³ய சரிதப்³ப³ங், உதா³ஹு தி³வா’’தி ஏவங் பி⁴க்கா²சாரோ புச்சி²தப்³போ³, அகோ³சரோ புச்சி²தப்³போ³, கோ³சரோ புச்சி²தப்³போ³. அகோ³சரோ நாம மிச்சா²தி³ட்டி²கானங் கா³மோ பரிச்சி²ன்னபி⁴க்கோ² வா கா³மோ, யத்த² ஏகஸ்ஸ வா த்³வின்னங் வா பி⁴க்கா² தீ³யதி, ஸெக்க²ஸம்மஹானி குலானி புச்சி²தப்³பா³னி, வச்சட்டா²னங் புச்சி²தப்³ப³ங், பஸ்ஸாவட்டா²னங் புச்சி²தப்³ப³ங், ‘‘கிங் இமிஸ்ஸா பொக்க²ரணியா பானீயங்யேவ பிவந்தி, நஹானாதி³பரிபோ⁴க³ம்பி கரொந்தீ’’தி ஏவங் பானீயஞ்சேவ பரிபோ⁴ஜனீயஞ்ச புச்சி²தப்³ப³ங், கத்தரத³ண்டோ³ புச்சி²தப்³போ³, ஸங்க⁴ஸ்ஸ கதிகஸண்டா²னங் புச்சி²தப்³ப³ங், கேஸுசி டா²னேஸு வாளமிகா³ வா அமனுஸ்ஸா வா ஹொந்தி, தஸ்மா ‘‘கங் காலங் பவிஸிதப்³ப³ங், கங் காலங் நிக்க²மிதப்³ப³’’ந்தி புச்சி²தப்³ப³ங். ஸசே விஹாரோ அனஜ்ஜா²வுட்டோ² ஹோதி, கவாடங் ஆகோடெத்வா முஹுத்தங் ஆக³மெத்வா க⁴டிகங் உக்³கா⁴டெத்வா கவாடங் பணாமெத்வா ப³ஹி டி²தேன நில்லோகேதப்³போ³.
Sace āvāsiko bhikkhu vuḍḍho hoti, abhivādetabbo. Sace navako hoti, abhivādāpetabbo. Senāsanaṃ pucchitabbaṃ ‘‘katamaṃ me senāsanaṃ pāpuṇātī’’ti, ajjhāvuṭṭhaṃ vā anajjhāvuṭṭhaṃ vā pucchitabbaṃ, ‘‘gocaragāmo āsanne, udāhu dūre, kālasseva piṇḍāya caritabbaṃ, udāhu divā’’ti evaṃ bhikkhācāro pucchitabbo, agocaro pucchitabbo, gocaro pucchitabbo. Agocaro nāma micchādiṭṭhikānaṃ gāmo paricchinnabhikkho vā gāmo, yattha ekassa vā dvinnaṃ vā bhikkhā dīyati, sekkhasammahāni kulāni pucchitabbāni, vaccaṭṭhānaṃ pucchitabbaṃ, passāvaṭṭhānaṃ pucchitabbaṃ, ‘‘kiṃ imissā pokkharaṇiyā pānīyaṃyeva pivanti, nahānādiparibhogampi karontī’’ti evaṃ pānīyañceva paribhojanīyañca pucchitabbaṃ, kattaradaṇḍo pucchitabbo, saṅghassa katikasaṇṭhānaṃ pucchitabbaṃ, kesuci ṭhānesu vāḷamigā vā amanussā vā honti, tasmā ‘‘kaṃ kālaṃ pavisitabbaṃ, kaṃ kālaṃ nikkhamitabba’’nti pucchitabbaṃ. Sace vihāro anajjhāvuṭṭho hoti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena nilloketabbo.
ஸசே ஸோ விஹாரோ உக்லாபோ ஹோதி, மஞ்சே வா மஞ்சோ ஆரோபிதோ ஹோதி, பீடே² வா பீட²ங் ஆரோபிதங் ஹோதி, ஸேனாஸனங் உபரி புஞ்ஜீகதங் ஹோதி, ஸசே ஸக்கோதி, ஸப்³போ³ விஹாரோ ஸோதே⁴தப்³போ³, அஸக்கொந்தேன அத்தனோ வஸனோகாஸோ ஜக்³கி³தப்³போ³. ஸப்³ப³ங் ஸோதே⁴துங் ஸக்கொந்தேன பன உபஜ்ஜா²யவத்தே வுத்தனயேன பூ⁴மத்த²ரணமஞ்சபீடா²தீ³னி ப³ஹி நீஹரித்வா விஹாரங் ஸோதெ⁴த்வா புன அதிஹரித்வா யதா²டா²னே பஞ்ஞபேதப்³பா³னி.
Sace so vihāro uklāpo hoti, mañce vā mañco āropito hoti, pīṭhe vā pīṭhaṃ āropitaṃ hoti, senāsanaṃ upari puñjīkataṃ hoti, sace sakkoti, sabbo vihāro sodhetabbo, asakkontena attano vasanokāso jaggitabbo. Sabbaṃ sodhetuṃ sakkontena pana upajjhāyavatte vuttanayena bhūmattharaṇamañcapīṭhādīni bahi nīharitvā vihāraṃ sodhetvā puna atiharitvā yathāṭhāne paññapetabbāni.
ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா, உத்தரா, த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே உண்ஹகாலோ ஹோதி, தி³வா த²கேதப்³பா³, ரத்திங் விவரிதப்³பா³.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā thaketabbā, rattiṃ vivaritabbā.
ஸசே உக்லாபங் ஹோதி, பரிவேணங் ஸம்மஜ்ஜிதப்³ப³ங், கொட்ட²கோ ஸம்மஜ்ஜிதப்³போ³, உபட்டா²னஸாலா ஸம்மஜ்ஜிதப்³பா³ , அக்³கி³ஸாலா ஸம்மஜ்ஜிதப்³பா³, வச்சகுடி ஸம்மஜ்ஜிதப்³பா³, பானீயங் பரிபோ⁴ஜனீயங் உபட்டா²பேதப்³ப³ங், ஆசமனகும்பி⁴யா உத³கங் ஆஸிஞ்சிதப்³ப³ங். இத³ங் ஆக³ந்துகவத்தங்.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā , aggisālā sammajjitabbā, vaccakuṭi sammajjitabbā, pānīyaṃ paribhojanīyaṃ upaṭṭhāpetabbaṃ, ācamanakumbhiyā udakaṃ āsiñcitabbaṃ. Idaṃ āgantukavattaṃ.
186. ஆவாஸிகவத்தே ஆவாஸிகேன பி⁴க்கு²னா ஆக³ந்துகங் பி⁴க்கு²ங் வுட்³ட⁴தரங் தி³ஸ்வா ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், பச்சுக்³க³ந்த்வா பத்தசீவரங் படிக்³க³ஹேதப்³ப³ங், பானீயேன புச்சி²தப்³போ³, புச்ச²ந்தேன பன ஸகிங் ஆனீதங் பானீயங் ஸப்³ப³ங் பிவதி, ‘‘புன ஆனேமீ’’தி புச்சி²தப்³போ³யேவ. பீ³ஜனேனபி பீ³ஜிதப்³போ³, பீ³ஜந்தேன ஸகிங் பாத³பிட்டி²யங் பீ³ஜித்வா ஸகிங் மஜ்ஜே², ஸகிங் ஸீஸே பீ³ஜிதப்³போ³, ‘‘அலங் ஹோதூ’’தி வுத்தேன மந்த³தரங் பீ³ஜிதப்³ப³ங், புன ‘‘அல’’ந்தி வுத்தேன ததோ மந்த³தரங் பீ³ஜிதப்³ப³ங், ததியவாரங் வுத்தேன பீ³ஜனீ ட²பேதப்³பா³, பாதா³பிஸ்ஸ தோ⁴விதப்³பா³. ஸசே அத்தனோ தேலங் அத்தி², தேலேன மக்கே²தப்³பா³. நோ சே அத்தி², தஸ்ஸ ஸந்தகேன மக்கே²தப்³பா³. ஸசே உஸ்ஸஹதி, உபாஹனா புஞ்சி²தப்³பா³. உபாஹனா புஞ்ச²ந்தேன பட²மங் ஸுக்கே²ன சோளேன புஞ்சி²தப்³பா³, பச்சா² அல்லேன, உபாஹனபுஞ்ச²னசோளகங் தோ⁴வித்வா ஏகமந்தங் விஸ்ஸஜ்ஜேதப்³ப³ங்.
186.Āvāsikavatte āvāsikena bhikkhunā āgantukaṃ bhikkhuṃ vuḍḍhataraṃ disvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, pānīyena pucchitabbo, pucchantena pana sakiṃ ānītaṃ pānīyaṃ sabbaṃ pivati, ‘‘puna ānemī’’ti pucchitabboyeva. Bījanenapi bījitabbo, bījantena sakiṃ pādapiṭṭhiyaṃ bījitvā sakiṃ majjhe, sakiṃ sīse bījitabbo, ‘‘alaṃ hotū’’ti vuttena mandataraṃ bījitabbaṃ, puna ‘‘ala’’nti vuttena tato mandataraṃ bījitabbaṃ, tatiyavāraṃ vuttena bījanī ṭhapetabbā, pādāpissa dhovitabbā. Sace attano telaṃ atthi, telena makkhetabbā. No ce atthi, tassa santakena makkhetabbā. Sace ussahati, upāhanā puñchitabbā. Upāhanā puñchantena paṭhamaṃ sukkhena coḷena puñchitabbā, pacchā allena, upāhanapuñchanacoḷakaṃ dhovitvā ekamantaṃ vissajjetabbaṃ.
ஆக³ந்துகோ பி⁴க்கு² அபி⁴வாதே³தப்³போ³, ஸேனாஸனங் பஞ்ஞபேதப்³ப³ங் ‘‘ஏதங் ஸேனாஸனங் பாபுணாதீ’’தி. அஜ்ஜா²வுட்ட²ங் வா அனஜ்ஜா²வுட்ட²ங் வா ஆசிக்கி²தப்³ப³ங், கோ³சரோ ஆசிக்கி²தப்³போ³, அகோ³சரோ ஆசிக்கி²தப்³போ³, ஸெக்க²ஸம்மதானி குலானி ஆசிக்கி²தப்³பா³னி, வச்சட்டா²னங் ஆசிக்கி²தப்³ப³ங், பஸ்ஸாவட்டா²னங் ஆசிக்கி²தப்³ப³ங், பானீயங் ஆசிக்கி²தப்³ப³ங், பரிபோ⁴ஜனீயங் ஆசிக்கி²தப்³ப³ங், கத்தரத³ண்டோ³ ஆசிக்கி²தப்³போ³, ஸங்க⁴ஸ்ஸ கதிகஸண்டா²னங் ஆசிக்கி²தப்³ப³ங் ‘‘இமங் காலங் பவிஸிதப்³ப³ங், இமங் காலங் நிக்க²மிதப்³ப³’’ந்தி.
Āgantuko bhikkhu abhivādetabbo, senāsanaṃ paññapetabbaṃ ‘‘etaṃ senāsanaṃ pāpuṇātī’’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ, gocaro ācikkhitabbo, agocaro ācikkhitabbo, sekkhasammatāni kulāni ācikkhitabbāni, vaccaṭṭhānaṃ ācikkhitabbaṃ, passāvaṭṭhānaṃ ācikkhitabbaṃ, pānīyaṃ ācikkhitabbaṃ, paribhojanīyaṃ ācikkhitabbaṃ, kattaradaṇḍo ācikkhitabbo, saṅghassa katikasaṇṭhānaṃ ācikkhitabbaṃ ‘‘imaṃ kālaṃ pavisitabbaṃ, imaṃ kālaṃ nikkhamitabba’’nti.
ஸசே ஆக³ந்துகோ நவகோ ஹோதி, நிஸின்னகேனேவ ஆசிக்கி²தப்³ப³ங் ‘‘அத்ர பத்தங் நிக்கி²பாஹி, அத்ர சீவரங் நிக்கி²பாஹி, இத³ங் ஆஸனங், நிஸீதா³ஹீ’’தி. பானீயங் ஆசிக்கி²தப்³ப³ங், பரிபோ⁴ஜனீயங் ஆசிக்கி²தப்³ப³ங், உபாஹனபுஞ்ச²னசோளகங் ஆசிக்கி²தப்³ப³ங், ஆக³ந்துகோ பி⁴க்கு² அபி⁴வாதா³பேதப்³போ³, ஸேனாஸனாதீ³னிபி நிஸின்னேனேவ ஆசிக்கி²தப்³பா³னி. வுட்³ட⁴தரே பன ஆக³தே ஆஸனங் பஞ்ஞபேதப்³ப³ந்தி ஏவமாதி³ ஸப்³ப³ங் சீவரகம்மங் வா நவகம்மங் வா ட²பெத்வாபி காதப்³ப³ங். சேதியங்க³ணங் ஸம்மஜ்ஜந்தேன ஸம்முஞ்ஜனிங் நிக்கி²பித்வா தஸ்ஸ வத்தங் காதுங் ஆரபி⁴தப்³ப³ங். பண்டி³தோ ஹி ஆக³ந்துகோ ‘‘ஸம்மஜ்ஜாஹி தாவ சேதியங்க³ண’’ந்தி வக்க²தி. கி³லானஸ்ஸ பே⁴ஸஜ்ஜங் கரொந்தேன பன ஸசே நாதிஆதுரோ கி³லானோ ஹோதி, பே⁴ஸஜ்ஜங் அகத்வா வத்தமேவ காதப்³ப³ங், மஹாகி³லானஸ்ஸ பன பே⁴ஸஜ்ஜமேவ காதப்³ப³ங். பண்டி³தோ ஹி ஆக³ந்துகோ ‘‘கரோஹி தாவ பே⁴ஸஜ்ஜ’’ந்தி வக்க²தி. இத³ங் ஆவாஸிகவத்தங்.
Sace āgantuko navako hoti, nisinnakeneva ācikkhitabbaṃ ‘‘atra pattaṃ nikkhipāhi, atra cīvaraṃ nikkhipāhi, idaṃ āsanaṃ, nisīdāhī’’ti. Pānīyaṃ ācikkhitabbaṃ, paribhojanīyaṃ ācikkhitabbaṃ, upāhanapuñchanacoḷakaṃ ācikkhitabbaṃ, āgantuko bhikkhu abhivādāpetabbo, senāsanādīnipi nisinneneva ācikkhitabbāni. Vuḍḍhatare pana āgate āsanaṃ paññapetabbanti evamādi sabbaṃ cīvarakammaṃ vā navakammaṃ vā ṭhapetvāpi kātabbaṃ. Cetiyaṅgaṇaṃ sammajjantena sammuñjaniṃ nikkhipitvā tassa vattaṃ kātuṃ ārabhitabbaṃ. Paṇḍito hi āgantuko ‘‘sammajjāhi tāva cetiyaṅgaṇa’’nti vakkhati. Gilānassa bhesajjaṃ karontena pana sace nātiāturo gilāno hoti, bhesajjaṃ akatvā vattameva kātabbaṃ, mahāgilānassa pana bhesajjameva kātabbaṃ. Paṇḍito hi āgantuko ‘‘karohi tāva bhesajja’’nti vakkhati. Idaṃ āvāsikavattaṃ.
187. க³மிகவத்தே க³மிகேன பி⁴க்கு²னா மஞ்சபீடா²தி³தா³ருப⁴ண்ட³ங் மத்திகாப⁴ண்ட³ம்பி ரஜனபா⁴ஜனாதி³ ஸப்³ப³ங் அக்³கி³ஸாலாயங் வா அஞ்ஞஸ்மிங் வா கு³த்தட்டா²னே படிஸாமெத்வா த்³வாரவாதபானங் த²கெத்வா ஸேனாஸனங் ஆபுச்சி²த்வா பக்கமிதப்³ப³ங். ஸசே பி⁴க்கு² ந ஹோதி, ஸாமணேரோ ஆபுச்சி²தப்³போ³. ஸசே ஸாமணேரோ ந ஹோதி, ஆராமிகோ ஆபுச்சி²தப்³போ³. ஸசே ந ஹோதி பி⁴க்கு² வா ஸாமணேரோ வா ஆராமிகோ வா, சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா பக்கமிதப்³ப³ங். ஸசே விஹாரோ ஓவஸ்ஸதி, ஸசே உஸ்ஸஹதி, ஸப்³போ³ சா²தே³தப்³போ³, உஸ்ஸுக்கங் வா காதப்³ப³ங் ‘‘கிந்தி நு கோ² விஹாரோ சா²தி³யேதா²’’தி, ஏவஞ்சேதங் லபே⁴த², இச்சேதங் குஸலங். நோ சே லபே⁴த², யோ தே³ஸோ அனோவஸ்ஸகோ ஹோதி, தத்த² சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா பக்கமிதப்³ப³ங். ஸசே விஹாரோ ஓவஸ்ஸதி, ஸசே உஸ்ஸஹதி, ஸேனாஸனங் கா³மங் அதிஹரிதப்³ப³ங், உஸ்ஸுக்கங் வா காதப்³ப³ங் ‘‘கிந்தி நு கோ² ஸேனாஸனங் கா³மங் அதிஹரியேதா²’’தி, ஏவஞ்சேதங் லபே⁴த², இச்சேதங் குஸலங். நோ சே லபே⁴த², அஜ்ஜோ²காஸே சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா திணேன வா பண்ணேன வா படிச்சா²தெ³த்வா பக்கமிதப்³ப³ங் ‘‘அப்பேவ நாம அங்கா³னிபி ஸேஸெய்யு’’ந்தி. இத³ங் க³மிகவத்தங்.
187.Gamikavatte gamikena bhikkhunā mañcapīṭhādidārubhaṇḍaṃ mattikābhaṇḍampi rajanabhājanādi sabbaṃ aggisālāyaṃ vā aññasmiṃ vā guttaṭṭhāne paṭisāmetvā dvāravātapānaṃ thaketvā senāsanaṃ āpucchitvā pakkamitabbaṃ. Sace bhikkhu na hoti, sāmaṇero āpucchitabbo. Sace sāmaṇero na hoti, ārāmiko āpucchitabbo. Sace na hoti bhikkhu vā sāmaṇero vā ārāmiko vā, catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace vihāro ovassati, sace ussahati, sabbo chādetabbo, ussukkaṃ vā kātabbaṃ ‘‘kinti nu kho vihāro chādiyethā’’ti, evañcetaṃ labhetha, iccetaṃ kusalaṃ. No ce labhetha, yo deso anovassako hoti, tattha catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace vihāro ovassati, sace ussahati, senāsanaṃ gāmaṃ atiharitabbaṃ, ussukkaṃ vā kātabbaṃ ‘‘kinti nu kho senāsanaṃ gāmaṃ atihariyethā’’ti, evañcetaṃ labhetha, iccetaṃ kusalaṃ. No ce labhetha, ajjhokāse catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā tiṇena vā paṇṇena vā paṭicchādetvā pakkamitabbaṃ ‘‘appeva nāma aṅgānipi seseyyu’’nti. Idaṃ gamikavattaṃ.
188. ப⁴த்தக்³க³வத்தே ஸசே ஆராமே காலோ ஆரோசிதோ ஹோதி, திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³.
188.Bhattaggavatte sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
ந ஓக்கம்ம தே²ரானங் பி⁴க்கூ²னங் புரதோ க³ந்தப்³ப³ங். ஸுப்படிச்ச²ன்னேன, ஸுஸங்வுதேன, ஒக்கி²த்தசக்கு²னா, அப்பஸத்³தே³ன அந்தரக⁴ரே க³ந்தப்³ப³ங், ந உக்கி²த்தகாய, ந உஜ்ஜக்³கி⁴காய அந்தரக⁴ரே க³ந்தப்³ப³ங், ந காயப்பசாலகங், ந பா³ஹுப்பசாலகங், ந ஸீஸப்பசாலகங் அந்தரக⁴ரே க³ந்தப்³ப³ங், ந க²ம்ப⁴கதேன, ந ஓகு³ண்டி²தேன, ந உக்குடிகாய அந்தரக⁴ரே க³ந்தப்³ப³ங்.
Na okkamma therānaṃ bhikkhūnaṃ purato gantabbaṃ. Suppaṭicchannena, susaṃvutena, okkhittacakkhunā, appasaddena antaraghare gantabbaṃ, na ukkhittakāya, na ujjagghikāya antaraghare gantabbaṃ, na kāyappacālakaṃ, na bāhuppacālakaṃ, na sīsappacālakaṃ antaraghare gantabbaṃ, na khambhakatena, na oguṇṭhitena, na ukkuṭikāya antaraghare gantabbaṃ.
ஸுப்படிச்ச²ன்னேன , ஸுஸங்வுதேன, ஒக்கி²த்தசக்கு²னா, அப்பஸத்³தே³ன அந்தரக⁴ரே நிஸீதி³தப்³ப³ங், ந உக்கி²த்தகாய, ந உஜ்ஜக்³கி⁴காய அந்தரக⁴ரே நிஸீதி³தப்³ப³ங், ந காயப்பசாலகங், ந பா³ஹுப்பசாலகங், ந ஸீஸப்பசாலகங் அந்தரக⁴ரே நிஸீதி³தப்³ப³ங், ந க²ம்ப⁴கதேன, ந ஓகு³ண்டி²தேன, ந பல்லத்தி²காய அந்தரக⁴ரே நிஸீதி³தப்³ப³ங், ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ஸசே மஹாதே²ரஸ்ஸ நிஸின்னாஸனேன ஸமகங் ஆஸனங் ஹோதி, ப³ஹூஸு ஆஸனேஸு ஸதி ஏகங் த்³வே ஆஸனானி ட²பெத்வா நிஸீதி³தப்³ப³ங். பி⁴க்கூ² க³ணெத்வா பஞ்ஞத்தாஸனேஸு அனிஸீதி³த்வா மஹாதே²ரேன ‘‘நிஸீதா³’’தி வுத்தேன நிஸீதி³தப்³ப³ங். நோ சே மஹாதே²ரோ வத³தி, ‘‘இத³ங், ப⁴ந்தே, ஆஸனங் உச்ச’’ந்தி வத்தப்³ப³ங். ‘‘நிஸீதா³’’தி வுத்தேன நிஸீதி³தப்³ப³ங். ஸசே பன ஏவங் ஆபுச்சி²தேபி ந வத³தி, நிஸீத³ந்தஸ்ஸ அனாபத்தி, மஹாதே²ரஸ்ஸேவ ஆபத்தி. நவகோ ஹி ஏவரூபே ஆஸனே அனாபுச்சா² நிஸீத³ந்தோ ஆபஜ்ஜதி, தே²ரோ ஆபுச்சி²தே அனநுஜானந்தோ. ந நவா பி⁴க்கூ² ஆஸனேன படிபா³ஹிதப்³பா³, ந ஸங்கா⁴டிகங் ஒத்த²ரித்வா அந்தரக⁴ரே நிஸீதி³தப்³ப³ங்.
Suppaṭicchannena , susaṃvutena, okkhittacakkhunā, appasaddena antaraghare nisīditabbaṃ, na ukkhittakāya, na ujjagghikāya antaraghare nisīditabbaṃ, na kāyappacālakaṃ, na bāhuppacālakaṃ, na sīsappacālakaṃ antaraghare nisīditabbaṃ, na khambhakatena, na oguṇṭhitena, na pallatthikāya antaraghare nisīditabbaṃ, na there bhikkhū anupakhajja nisīditabbaṃ. Sace mahātherassa nisinnāsanena samakaṃ āsanaṃ hoti, bahūsu āsanesu sati ekaṃ dve āsanāni ṭhapetvā nisīditabbaṃ. Bhikkhū gaṇetvā paññattāsanesu anisīditvā mahātherena ‘‘nisīdā’’ti vuttena nisīditabbaṃ. No ce mahāthero vadati, ‘‘idaṃ, bhante, āsanaṃ ucca’’nti vattabbaṃ. ‘‘Nisīdā’’ti vuttena nisīditabbaṃ. Sace pana evaṃ āpucchitepi na vadati, nisīdantassa anāpatti, mahātherasseva āpatti. Navako hi evarūpe āsane anāpucchā nisīdanto āpajjati, thero āpucchite ananujānanto. Na navā bhikkhū āsanena paṭibāhitabbā, na saṅghāṭikaṃ ottharitvā antaraghare nisīditabbaṃ.
பத்ததோ⁴வனோத³கே தீ³யமானே உபோ⁴ஹி ஹத்தே²ஹி பத்தங் படிக்³க³ஹெத்வா உத³கங் படிக்³க³ஹேதப்³ப³ங், த³க்கி²ணோத³கங் பன புரதோ ஆதா⁴ரகே பத்தங் ட²பெத்வா க³ஹேதப்³ப³ங், நீசங் கத்வா உத³கஸத்³த³ங் அகரொந்தேன அபடிக⁴ங்ஸந்தேன பத்தோ தோ⁴விதப்³போ³. ஸசே உத³கபடிக்³கா³ஹகோ ஹோதி, நீசங் கத்வா உத³கபடிக்³கா³ஹகே உத³கங் ஆஸிஞ்சிதப்³ப³ங் ‘‘மா உத³கபடிக்³கா³ஹகோ உத³கேன ஓஸிஞ்சி , மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீ’’தி. ஸசே உத³கபடிக்³கா³ஹகோ ந ஹோதி, நீசங் கத்வா ச²மாய உத³கங் ஆஸிஞ்சிதப்³ப³ங் ‘‘மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீ’’தி.
Pattadhovanodake dīyamāne ubhohi hatthehi pattaṃ paṭiggahetvā udakaṃ paṭiggahetabbaṃ, dakkhiṇodakaṃ pana purato ādhārake pattaṃ ṭhapetvā gahetabbaṃ, nīcaṃ katvā udakasaddaṃ akarontena apaṭighaṃsantena patto dhovitabbo. Sace udakapaṭiggāhako hoti, nīcaṃ katvā udakapaṭiggāhake udakaṃ āsiñcitabbaṃ ‘‘mā udakapaṭiggāhako udakena osiñci , mā sāmantā bhikkhū udakena osiñciṃsu, mā saṅghāṭi udakena osiñcī’’ti. Sace udakapaṭiggāhako na hoti, nīcaṃ katvā chamāya udakaṃ āsiñcitabbaṃ ‘‘mā sāmantā bhikkhū udakena osiñciṃsu, mā saṅghāṭi udakena osiñcī’’ti.
ஓத³னே தீ³யமானே உபோ⁴ஹி ஹத்தே²ஹி பத்தங் படிக்³க³ஹெத்வா ஓத³னோ படிக்³க³ஹேதப்³போ³. யதா² ஸூபஸ்ஸ ஓகாஸோ ஹோதி, ஏவங் மத்தாய ஓத³னோ க³ண்ஹிதப்³போ³. ஸசே ஹோதி ஸப்பி வா தேலங் வா உத்தரிப⁴ங்க³ங் வா, தே²ரேன வத்தப்³போ³ ‘‘ஸப்³பே³ஸங் ஸமகங் ஸம்பாதே³ஹீ’’தி. இத³ஞ்ச ந கேவலங் ஸப்பிஆதீ³ஸு, ஓத³னேபி வத்தப்³ப³ங். ஸப்பிஆதீ³ஸு பன யங் அப்பங் ஹோதி ஏகஸ்ஸ வா த்³வின்னங் வா அனுரூபங், தங் ஸப்³பே³ஸங் ஸமகங் ஸம்பாதே³ஹீதி வுத்தே மனுஸ்ஸானங் விஹேஸா ஹோதி, தஸ்மா தாதி³ஸங் ஸகிங் வா த்³விக்க²த்துங் வா க³ஹெத்வா ஸேஸங் ந க³ஹேதப்³ப³ங். ஸக்கச்சங் பிண்ட³பாதோ படிக்³க³ஹேதப்³போ³, பத்தஸஞ்ஞினா பிண்ட³பாதோ படிக்³க³ஹேதப்³போ³, ஸமஸூபகோ ஸமதித்தி²கோ பிண்ட³பாதோ படிக்³க³ஹேதப்³போ³, ந தாவ தே²ரேன பு⁴ஞ்ஜிதப்³ப³ங், யாவ ந ஸப்³பே³ஸங் ஓத³னோ ஸம்பத்தோ ஹோதி. இத³ஞ்ச யங் பரிச்சி²ன்னபி⁴க்கு²கங் ப⁴த்தக்³க³ங், யத்த² மனுஸ்ஸா ஸப்³பே³ஸங் பாபெத்வா வந்தி³துகாமா ஹொந்தி, தங் ஸந்தா⁴ய வுத்தங் . யங் பன மஹாப⁴த்தக்³க³ங் ஹோதி, யத்த² ஏகஸ்மிங் பதே³ஸே பு⁴ஞ்ஜந்தி, ஏகஸ்மிங் பதே³ஸே உத³கங் தீ³யதி, தத்த² யதா²ஸுக²ங் பு⁴ஞ்ஜிதப்³ப³ங்.
Odane dīyamāne ubhohi hatthehi pattaṃ paṭiggahetvā odano paṭiggahetabbo. Yathā sūpassa okāso hoti, evaṃ mattāya odano gaṇhitabbo. Sace hoti sappi vā telaṃ vā uttaribhaṅgaṃ vā, therena vattabbo ‘‘sabbesaṃ samakaṃ sampādehī’’ti. Idañca na kevalaṃ sappiādīsu, odanepi vattabbaṃ. Sappiādīsu pana yaṃ appaṃ hoti ekassa vā dvinnaṃ vā anurūpaṃ, taṃ sabbesaṃ samakaṃ sampādehīti vutte manussānaṃ vihesā hoti, tasmā tādisaṃ sakiṃ vā dvikkhattuṃ vā gahetvā sesaṃ na gahetabbaṃ. Sakkaccaṃ piṇḍapāto paṭiggahetabbo, pattasaññinā piṇḍapāto paṭiggahetabbo, samasūpako samatitthiko piṇḍapāto paṭiggahetabbo, na tāva therena bhuñjitabbaṃ, yāva na sabbesaṃ odano sampatto hoti. Idañca yaṃ paricchinnabhikkhukaṃ bhattaggaṃ, yattha manussā sabbesaṃ pāpetvā vanditukāmā honti, taṃ sandhāya vuttaṃ . Yaṃ pana mahābhattaggaṃ hoti, yattha ekasmiṃ padese bhuñjanti, ekasmiṃ padese udakaṃ dīyati, tattha yathāsukhaṃ bhuñjitabbaṃ.
ஸக்கச்சங் பிண்ட³பாதோ பு⁴ஞ்ஜிதப்³போ³, பத்தஸஞ்ஞினா பிண்ட³பாதோ பு⁴ஞ்ஜிதப்³போ³, ஸபதா³னோ பிண்ட³பாதோ பு⁴ஞ்ஜிதப்³போ³, ஸமஸூபகோ பிண்ட³பாதோ பு⁴ஞ்ஜிதப்³போ³, ந தூ²பகதோ ஓமத்³தி³த்வா பிண்ட³பாதோ பு⁴ஞ்ஜிதப்³போ³, ந ஸூபங் வா ப்³யஞ்ஜனங் வா ஓத³னேன படிச்சா²தே³தப்³ப³ங் பி⁴ய்யோகம்யதங் உபாதா³ய, ந ஸூபங் வா ஓத³னங் வா அகி³லானேன அத்தனோ அத்தா²ய விஞ்ஞாபெத்வா பு⁴ஞ்ஜிதப்³ப³ங், ந உஜ்ஜா²னஸஞ்ஞினா பரேஸங் பத்தோ ஓலோகேதப்³போ³, நாதிமஹந்தோ கப³ளோ காதப்³போ³, பரிமண்ட³லங் ஆலோபோ காதப்³போ³, ந அனாஹடே கப³ளே முக²த்³வாரங் விவரிதப்³ப³ங், ந பு⁴ஞ்ஜமானேன ஸப்³போ³ ஹத்தோ² முகே² பக்கி²பிதப்³போ³, ந ஸகப³ளேன முகே²ன ப்³யாஹரிதப்³ப³ங், ந பிண்டு³க்கே²பகங் பு⁴ஞ்ஜிதப்³ப³ங், ந கப³ளாவச்சே²கங், ந அவக³ண்ட³காரகங், ந ஹத்த²னித்³து⁴னகங், ந ஸித்தா²வகாரகங், ந ஜிவ்ஹானிச்சா²ரகங், ந சபுசபுகாரகங், ந ஸுருஸுருகாரகங், ந ஹத்த²னில்லேஹகங், ந பத்தனில்லேஹகங், ந ஒட்ட²னில்லேஹகங் பு⁴ஞ்ஜிதப்³ப³ங்.
Sakkaccaṃ piṇḍapāto bhuñjitabbo, pattasaññinā piṇḍapāto bhuñjitabbo, sapadāno piṇḍapāto bhuñjitabbo, samasūpako piṇḍapāto bhuñjitabbo, na thūpakato omadditvā piṇḍapāto bhuñjitabbo, na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya, na sūpaṃ vā odanaṃ vā agilānena attano atthāya viññāpetvā bhuñjitabbaṃ, na ujjhānasaññinā paresaṃ patto oloketabbo, nātimahanto kabaḷo kātabbo, parimaṇḍalaṃ ālopo kātabbo, na anāhaṭe kabaḷe mukhadvāraṃ vivaritabbaṃ, na bhuñjamānena sabbo hattho mukhe pakkhipitabbo, na sakabaḷena mukhena byāharitabbaṃ, na piṇḍukkhepakaṃ bhuñjitabbaṃ, na kabaḷāvacchekaṃ, na avagaṇḍakārakaṃ, na hatthaniddhunakaṃ, na sitthāvakārakaṃ, na jivhānicchārakaṃ, na capucapukārakaṃ, na surusurukārakaṃ, na hatthanillehakaṃ, na pattanillehakaṃ, na oṭṭhanillehakaṃ bhuñjitabbaṃ.
ந ஸாமிஸேன ஹத்தே²ன பானீயதா²லகோ படிக்³க³ஹேதப்³போ³, ந தாவ தே²ரேன ஹத்த²தோ⁴வனஉத³கங் படிக்³க³ஹேதப்³ப³ங், யாவ ந ஸப்³பே³ பு⁴த்தாவினோ ஹொந்தி. ஸசே மனுஸ்ஸா ‘‘தோ⁴வத², ப⁴ந்தே, பத்தஞ்ச ஹத்தே² சா’’தி வத³ந்தி, பி⁴க்கூ² வா ‘‘தும்ஹே உத³கங் க³ண்ஹதா²’’தி வத³ந்தி, வட்டதி. உத³கே தீ³யமானே உபோ⁴ஹி ஹத்தே²ஹி பத்தங் படிக்³க³ஹெத்வா உத³கங் படிக்³க³ஹேதப்³ப³ங், நீசங் கத்வா உத³கஸத்³த³ங் அகரொந்தேன அபடிக⁴ங்ஸந்தேன பத்தோ தோ⁴விதப்³போ³. ஸசே உத³கபடிக்³கா³ஹகோ ஹோதி, நீசங் கத்வா உத³கபடிக்³கா³ஹகே உத³கங் ஆஸிஞ்சிதப்³ப³ங் ‘‘மா உத³கபடிக்³கா³ஹகோ உத³கேன ஓஸிஞ்சி, மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீ’’தி. ஸசே உத³கபடிக்³கா³ஹகோ ந ஹோதி, நீசங் கத்வா ச²மாய உத³கங் ஆஸிஞ்சிதப்³ப³ங் ‘‘மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீ’’தி, ந ஸஸித்த²கங் பத்ததோ⁴வனங் அந்தரக⁴ரே ச²ட்³டே³தப்³ப³ங்.
Na sāmisena hatthena pānīyathālako paṭiggahetabbo, na tāva therena hatthadhovanaudakaṃ paṭiggahetabbaṃ, yāva na sabbe bhuttāvino honti. Sace manussā ‘‘dhovatha, bhante, pattañca hatthe cā’’ti vadanti, bhikkhū vā ‘‘tumhe udakaṃ gaṇhathā’’ti vadanti, vaṭṭati. Udake dīyamāne ubhohi hatthehi pattaṃ paṭiggahetvā udakaṃ paṭiggahetabbaṃ, nīcaṃ katvā udakasaddaṃ akarontena apaṭighaṃsantena patto dhovitabbo. Sace udakapaṭiggāhako hoti, nīcaṃ katvā udakapaṭiggāhake udakaṃ āsiñcitabbaṃ ‘‘mā udakapaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcī’’ti. Sace udakapaṭiggāhako na hoti, nīcaṃ katvā chamāya udakaṃ āsiñcitabbaṃ ‘‘mā sāmantā bhikkhū udakena osiñciṃsu, mā saṅghāṭi udakena osiñcī’’ti, na sasitthakaṃ pattadhovanaṃ antaraghare chaḍḍetabbaṃ.
ப⁴த்தக்³க³தோ உட்டா²ய நிவத்தந்தேஸு நவகேஹி பி⁴க்கூ²ஹி பட²மதரங் நிவத்திதப்³ப³ங், பச்சா² தே²ரேஹி. ஸம்பா³தே⁴ஸு ஹி க⁴ரேஸு மஹாதே²ரானங் நிக்க²மனோகாஸோ ந ஹோதி, தஸ்மா ஏவங் வுத்தங். ஏவங் நிவத்தந்தேஹி பன நவகேஹி கே³ஹத்³வாரே ட²த்வா தே²ரேஸு நிக்க²மந்தேஸு படிபாடியா க³ந்தப்³ப³ங். ஸசே பன மஹாதே²ரா து⁴ரே நிஸின்னா ஹொந்தி, நவகா அந்தோகே³ஹே, தே²ராஸனதோ பட்டா²ய படிபாடியா ஏவ நிக்க²மிதப்³ப³ங் , காயேன காயங் அஸங்க⁴ட்டெந்தேன யதா² அந்தரேன மனுஸ்ஸா க³ந்துங் ஸக்கொந்தி, ஏவங் விரளாய பாளியா க³ந்தப்³ப³ங்.
Bhattaggato uṭṭhāya nivattantesu navakehi bhikkhūhi paṭhamataraṃ nivattitabbaṃ, pacchā therehi. Sambādhesu hi gharesu mahātherānaṃ nikkhamanokāso na hoti, tasmā evaṃ vuttaṃ. Evaṃ nivattantehi pana navakehi gehadvāre ṭhatvā theresu nikkhamantesu paṭipāṭiyā gantabbaṃ. Sace pana mahātherā dhure nisinnā honti, navakā antogehe, therāsanato paṭṭhāya paṭipāṭiyā eva nikkhamitabbaṃ , kāyena kāyaṃ asaṅghaṭṭentena yathā antarena manussā gantuṃ sakkonti, evaṃ viraḷāya pāḷiyā gantabbaṃ.
‘‘அனுஜானாமி, பி⁴க்க²வே, தே²ரேன பி⁴க்கு²னா ப⁴த்தக்³கே³ அனுமோதி³து’’ந்தி (சூளவ॰ 362) வசனதோ ஸங்க⁴த்தே²ரேன ப⁴த்தக்³கே³ அனுமோதி³தப்³ப³ங். தங் ஏகமேவ ஓஹாய ஸேஸேஹி ந க³ந்தப்³ப³ங்.
‘‘Anujānāmi, bhikkhave, therena bhikkhunā bhattagge anumoditu’’nti (cūḷava. 362) vacanato saṅghattherena bhattagge anumoditabbaṃ. Taṃ ekameva ohāya sesehi na gantabbaṃ.
‘‘அனுஜானாமி, பி⁴க்க²வே, ப⁴த்தக்³கே³ சதூஹி பஞ்சஹி தே²ரானுதே²ரேஹி பி⁴க்கூ²ஹி ஆக³மேது’’ந்தி (சூளவ॰ 362) வசனதோ ஸங்க⁴த்தே²ரேன அனுமோத³னத்தா²ய நிஸின்னே ஹெட்டா² படிபாடியா சதூஹி நிஸீதி³தப்³ப³ங், அனுதே²ரே நிஸின்னே மஹாதே²ரேன ச ஹெட்டா² ச தீஹி நிஸீதி³தப்³ப³ங், பஞ்சமே நிஸின்னே உபரி சதூஹி நிஸீதி³தப்³ப³ங், ஸங்க⁴த்தே²ரேன ஹெட்டா² த³ஹரபி⁴க்கு²ஸ்மிங் அஜ்ஜி²ட்டே²பி ஸங்க⁴த்தே²ரதோ பட்டா²ய சதூஹி நிஸீதி³தப்³ப³மேவ. ஸசே பன அனுமோத³கோ பி⁴க்கு² ‘‘க³ச்ச²த², ப⁴ந்தே, ஆக³மேதப்³ப³கிச்சங் நத்தீ²’’தி வத³தி, க³ந்துங் வட்டதி. மஹாதே²ரேன ‘‘க³ச்சா²ம, ஆவுஸோ’’தி வுத்தே ‘‘க³ச்ச²தா²’’தி வத³தி, ஏவம்பி வட்டதி, ‘‘ப³ஹிகா³மே ஆக³மிஸ்ஸாமா’’தி ஆபோ⁴க³ங் கத்வாபி ப³ஹிகா³மங் க³ந்த்வா அத்தனோ நிஸ்ஸிதகே ‘‘தும்ஹே தஸ்ஸ ஆக³மனங் ஆக³மேதா²’’தி வத்வாபி க³ந்துங் வட்டதியேவ. ஸசே பன மனுஸ்ஸா அத்தனோ ருசிதேன ஏகேன அனுமோத³னங் காரெந்தி, நேவ தஸ்ஸ அனுமோத³தோ ஆபத்தி, ந மஹாதே²ரஸ்ஸ பா⁴ரோ ஹோதி. உபனிஸின்னகதா²யமேவ ஹி மனுஸ்ஸேஸு கதா²பெந்தேஸு தே²ரோ ஆபுச்சி²தப்³போ³. மஹாதே²ரேன ச அனுமோத³னாய அஜ்ஜி²ட்டோ²வ ஆக³மேதப்³போ³தி இத³மெத்த² லக்க²ணங். ‘‘அனுஜானாமி, பி⁴க்க²வே, ஸதி கரணீயே ஆனந்தரிகங் பி⁴க்கு²ங் ஆபுச்சி²த்வா க³ந்து’’ந்தி (சூளவ॰ 362) வசனதோ பன வச்சாதி³பீளிதேன அனந்தரங் பி⁴க்கு²ங் ஆபுச்சி²த்வா க³ந்தப்³ப³ந்தி. இத³ங் ப⁴த்தக்³க³வத்தங்.
‘‘Anujānāmi, bhikkhave, bhattagge catūhi pañcahi therānutherehi bhikkhūhi āgametu’’nti (cūḷava. 362) vacanato saṅghattherena anumodanatthāya nisinne heṭṭhā paṭipāṭiyā catūhi nisīditabbaṃ, anuthere nisinne mahātherena ca heṭṭhā ca tīhi nisīditabbaṃ, pañcame nisinne upari catūhi nisīditabbaṃ, saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu ‘‘gacchatha, bhante, āgametabbakiccaṃ natthī’’ti vadati, gantuṃ vaṭṭati. Mahātherena ‘‘gacchāma, āvuso’’ti vutte ‘‘gacchathā’’ti vadati, evampi vaṭṭati, ‘‘bahigāme āgamissāmā’’ti ābhogaṃ katvāpi bahigāmaṃ gantvā attano nissitake ‘‘tumhe tassa āgamanaṃ āgamethā’’ti vatvāpi gantuṃ vaṭṭatiyeva. Sace pana manussā attano rucitena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu thero āpucchitabbo. Mahātherena ca anumodanāya ajjhiṭṭhova āgametabboti idamettha lakkhaṇaṃ. ‘‘Anujānāmi, bhikkhave, sati karaṇīye ānantarikaṃ bhikkhuṃ āpucchitvā gantu’’nti (cūḷava. 362) vacanato pana vaccādipīḷitena anantaraṃ bhikkhuṃ āpucchitvā gantabbanti. Idaṃ bhattaggavattaṃ.
189. பிண்ட³சாரிகவத்தே பன பிண்ட³சாரிகேன பி⁴க்கு²னா ‘‘இதா³னி கா³மங் பவிஸிஸ்ஸாமீ’’தி திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³. ஸுப்படிச்ச²ன்னேன அந்தரக⁴ரே க³ந்தப்³ப³ந்திஆதி³ ஸப்³ப³ங் ப⁴த்தக்³க³வத்தே வுத்தனயேனேவ இதா⁴பி வேதி³தப்³ப³ங்.
189.Piṇḍacārikavatte pana piṇḍacārikena bhikkhunā ‘‘idāni gāmaṃ pavisissāmī’’ti timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbantiādi sabbaṃ bhattaggavatte vuttanayeneva idhāpi veditabbaṃ.
நிவேஸனங் பவிஸந்தேன ஸல்லக்கே²தப்³ப³ங் ‘‘இமினா பவிஸிஸ்ஸாமி, இமினா நிக்க²மிஸ்ஸாமீ’’தி, நாதிஸஹஸா பவிஸிதப்³ப³ங், நாதிதூ³ரே நாச்சாஸன்னே டா²தப்³ப³ங், நாதிசிரங் டா²தப்³ப³ங், நாதிலஹுகங் நிவத்திதப்³ப³ங், டி²தேன ஸல்லக்கே²தப்³ப³ங் ‘‘பி⁴க்க²ங் தா³துகாமா வா அதா³துகாமா வா’’தி . ஸசே கம்மங் வா நிக்கி²பதி, ஆஸனா வா வுட்டா²தி, கடச்சு²ங் வா பராமஸதி, பா⁴ஜனங் வா பராமஸதி, ட²பேதி வா, ‘‘தா³துகாமஸ்ஸா’’தி டா²தப்³ப³ங். பி⁴க்கா²ய தீ³யமானாய வாமேன ஹத்தே²ன ஸங்கா⁴டிங் உச்சாரெத்வா த³க்கி²ணேன ஹத்தே²ன பத்தங் பணாமெத்வா உபோ⁴ஹி ஹத்தே²ஹி பத்தங் படிக்³க³ஹெத்வா பி⁴க்கா² படிக்³க³ஹேதப்³பா³, இத்தீ² வா ஹோது புரிஸோ வா, பி⁴க்கா²தா³னஸமயே முக²ங் ந ஓலோகேதப்³ப³ங், ஸல்லக்கே²தப்³ப³ங் ‘‘ஸூபங் தா³துகாமா வா அதா³துகாமா வா’’தி. ஸசே கடச்சு²ங் வா பராமஸதி, பா⁴ஜனங் வா பராமஸதி, ட²பேதி வா, ‘‘தா³துகாமஸ்ஸா’’தி டா²தப்³ப³ங். பி⁴க்கா²ய தி³ன்னாய ஸங்கா⁴டியா பத்தங் படிச்சா²தெ³த்வா ஸாது⁴கங் அதரமானேன நிவத்திதப்³ப³ங்.
Nivesanaṃ pavisantena sallakkhetabbaṃ ‘‘iminā pavisissāmi, iminā nikkhamissāmī’’ti, nātisahasā pavisitabbaṃ, nātidūre nāccāsanne ṭhātabbaṃ, nāticiraṃ ṭhātabbaṃ, nātilahukaṃ nivattitabbaṃ, ṭhitena sallakkhetabbaṃ ‘‘bhikkhaṃ dātukāmā vā adātukāmā vā’’ti . Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti vā, ‘‘dātukāmassā’’ti ṭhātabbaṃ. Bhikkhāya dīyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā, itthī vā hotu puriso vā, bhikkhādānasamaye mukhaṃ na oloketabbaṃ, sallakkhetabbaṃ ‘‘sūpaṃ dātukāmā vā adātukāmā vā’’ti. Sace kaṭacchuṃ vā parāmasati, bhājanaṃ vā parāmasati, ṭhapeti vā, ‘‘dātukāmassā’’ti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
யோ பட²மங் கா³மதோ பிண்டா³ய படிக்கமதி, தேன ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், அவக்காரபாதி தோ⁴வித்வா உபட்டா²பேதப்³பா³, பானீயங் பரிபோ⁴ஜனீயங் உபட்டா²பேதப்³ப³ங். யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ, ஸசே ஆகங்க²தி, பு⁴ஞ்ஜிதப்³ப³ங். நோ சே ஆகங்க²தி, அப்பஹரிதே வா ச²ட்³டே³தப்³ப³ங், அப்பாணகே வா உத³கே ஓபிலாபேதப்³ப³ங், தேன ஆஸனங் உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங், அவக்காரபாதி தோ⁴வித்வா படிஸாமேதப்³பா³, பானீயங் பரிபோ⁴ஜனீயங் படிஸாமேதப்³ப³ங், ப⁴த்தக்³க³ங் ஸம்மஜ்ஜிதப்³ப³ங். யோ பஸ்ஸதி பானீயக⁴டங் வா பரிபோ⁴ஜனீயக⁴டங் வா வச்சக⁴டங் வா ரித்தங் துச்ச²ங், தேன உபட்டா²பேதப்³ப³ங். ஸசஸ்ஸ ஹோதி அவிஸய்ஹங், ஹத்த²விகாரேன து³தியங் ஆமந்தெத்வா ஹத்த²விலங்க⁴கேன உபட்டா²பேதப்³ப³ங், ந ச தப்பச்சயா வாசா பி⁴ந்தி³தப்³பா³தி. இத³ங் பிண்ட³சாரிகவத்தங்.
Yo paṭhamaṃ gāmato piṇḍāya paṭikkamati, tena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, avakkārapāti dhovitvā upaṭṭhāpetabbā, pānīyaṃ paribhojanīyaṃ upaṭṭhāpetabbaṃ. Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati, bhuñjitabbaṃ. No ce ākaṅkhati, appaharite vā chaḍḍetabbaṃ, appāṇake vā udake opilāpetabbaṃ, tena āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ, avakkārapāti dhovitvā paṭisāmetabbā, pānīyaṃ paribhojanīyaṃ paṭisāmetabbaṃ, bhattaggaṃ sammajjitabbaṃ. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ, tena upaṭṭhāpetabbaṃ. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpetabbaṃ, na ca tappaccayā vācā bhinditabbāti. Idaṃ piṇḍacārikavattaṃ.
190. ஆரஞ்ஞிகவத்தே ஆரஞ்ஞிகேன பி⁴க்கு²னா காலஸ்ஸேவ உட்டா²ய பத்தங் த²விகாய பக்கி²பித்வா அங்ஸே லக்³கெ³த்வா சீவரங் க²ந்தே⁴ கரித்வா உபாஹனா ஆரோஹித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா வஸனட்டா²னதோ நிக்க²மிதப்³ப³ங். ‘‘இதா³னி கா³மங் பவிஸிஸ்ஸாமா’’தி உபாஹனா ஓமுஞ்சித்வா நீசங் கத்வா பப்போ²டெத்வா த²விகாய பக்கி²பித்வா அங்ஸே லக்³கெ³த்வா திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³. ஸுப்படிச்ச²ன்னேன அந்தரக⁴ரே க³ந்தப்³ப³ந்திஆதி³ ஸப்³ப³ங் க³மனவிதா⁴னங் இதா⁴பி ப⁴த்தக்³க³வத்தே வுத்தனயேனேவ வேதி³தப்³ப³ங்.
190.Āraññikavatte āraññikena bhikkhunā kālasseva uṭṭhāya pattaṃ thavikāya pakkhipitvā aṃse laggetvā cīvaraṃ khandhe karitvā upāhanā ārohitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā vasanaṭṭhānato nikkhamitabbaṃ. ‘‘Idāni gāmaṃ pavisissāmā’’ti upāhanā omuñcitvā nīcaṃ katvā papphoṭetvā thavikāya pakkhipitvā aṃse laggetvā timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbantiādi sabbaṃ gamanavidhānaṃ idhāpi bhattaggavatte vuttanayeneva veditabbaṃ.
நிவேஸனங் பவிஸந்தேன ஸல்லக்கே²தப்³ப³ங் ‘‘இமினா பவிஸிஸ்ஸாமி, இமினா நிக்க²மிஸ்ஸாமீ’’திஆதி³ ஸப்³ப³ங் பி⁴க்கா²சாரவிதா⁴னங் பிண்ட³சாரிகவத்தே வுத்தனயேனேவ வேதி³தப்³ப³ங். ஆரஞ்ஞிகேன பி⁴க்கு²னா பானீயங் பரிபோ⁴ஜனீயங் உபட்டா²பேதப்³ப³ங். ஸசே பா⁴ஜனானி நப்பஹொந்தி, பானீயமேவ பரிபோ⁴ஜனீயம்பி கத்வா உபட்டா²பேதப்³ப³ங். பா⁴ஜனங் அலப⁴ந்தேன வேளுனாளிகாயபி உபட்டா²பேதப்³ப³ங். தம்பி அலப⁴ந்தஸ்ஸ யதா² ஸமீபே உத³கஆவாடோ ஹோதி, ஏவங் காதப்³ப³ங். அக்³கி³ உபட்டா²பேதப்³போ³, அரணிஸஹிதங் உபட்டா²பேதப்³ப³ங், அரணிஸஹிதே ஸதி அக்³கி³ங் அகாதும்பி வட்டதி. யதா² ச ஆரஞ்ஞிகஸ்ஸ, ஏவங் கந்தாரப்படிபன்னஸ்ஸபி அரணிஸஹிதங் இச்சி²தப்³ப³ங். க³ணவாஸினோ பன தேன வினாபி வட்டதி. கத்தரத³ண்டோ³ உபட்டா²பேதப்³போ³, நக்க²த்தபதா³னி உக்³க³ஹேதப்³பா³னி ஸகலானி வா ஏகதே³ஸானி வா, தி³ஸாகுஸலேன ப⁴விதப்³ப³ங். இத³ங் ஆரஞ்ஞிகவத்தங்.
Nivesanaṃ pavisantena sallakkhetabbaṃ ‘‘iminā pavisissāmi, iminā nikkhamissāmī’’tiādi sabbaṃ bhikkhācāravidhānaṃ piṇḍacārikavatte vuttanayeneva veditabbaṃ. Āraññikena bhikkhunā pānīyaṃ paribhojanīyaṃ upaṭṭhāpetabbaṃ. Sace bhājanāni nappahonti, pānīyameva paribhojanīyampi katvā upaṭṭhāpetabbaṃ. Bhājanaṃ alabhantena veḷunāḷikāyapi upaṭṭhāpetabbaṃ. Tampi alabhantassa yathā samīpe udakaāvāṭo hoti, evaṃ kātabbaṃ. Aggi upaṭṭhāpetabbo, araṇisahitaṃ upaṭṭhāpetabbaṃ, araṇisahite sati aggiṃ akātumpi vaṭṭati. Yathā ca āraññikassa, evaṃ kantārappaṭipannassapi araṇisahitaṃ icchitabbaṃ. Gaṇavāsino pana tena vināpi vaṭṭati. Kattaradaṇḍo upaṭṭhāpetabbo, nakkhattapadāni uggahetabbāni sakalāni vā ekadesāni vā, disākusalena bhavitabbaṃ. Idaṃ āraññikavattaṃ.
191. ஸேனாஸனவத்தே யஸ்மிங் விஹாரே விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங் நிக்கி²பிதப்³ப³ங், நிஸீத³னபச்சத்த²ரணங் நீஹரித்வா ஏகமந்தங் நிக்கி²பிதப்³ப³ங், பி⁴ஸிபி³ம்போ³ஹனங் நீஹரித்வா ஏகமந்தங் நிக்கி²பிதப்³ப³ங், மஞ்சோ நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் நீஹரித்வா ஏகமந்தங் நிக்கி²பிதப்³போ³, பீட²ங் நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் நீஹரித்வா ஏகமந்தங் நிக்கி²பிதப்³ப³ங், மஞ்சபடிபாத³கா நீஹரித்வா ஏகமந்தங் நிக்கி²பிதப்³பா³, கே²ளமல்லகோ நீஹரித்வா ஏகமந்தங் நிக்கி²பிதப்³போ³, அபஸ்ஸேனப²லகங் நீஹரித்வா ஏகமந்தங் நிக்கி²பிதப்³ப³ங், பூ⁴மத்த²ரணங் யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங் நிக்கி²பிதப்³ப³ங். ஸசே விஹாரே ஸந்தானகங் ஹோதி, உல்லோகா பட²மங் ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா பரிப்போ²ஸித்வா ஸம்மஜ்ஜிதப்³பா³ ‘‘மா விஹாரோ ரஜேன உஹஞ்ஞீ’’தி, ஸங்காரங் விசினித்வா ஏகமந்தங் ச²ட்³டே³தப்³ப³ங்.
191.Senāsanavatte yasmiṃ vihāre viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ, nisīdanapaccattharaṇaṃ nīharitvā ekamantaṃ nikkhipitabbaṃ, bhisibimbohanaṃ nīharitvā ekamantaṃ nikkhipitabbaṃ, mañco nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbo, pīṭhaṃ nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbaṃ, mañcapaṭipādakā nīharitvā ekamantaṃ nikkhipitabbā, kheḷamallako nīharitvā ekamantaṃ nikkhipitabbo, apassenaphalakaṃ nīharitvā ekamantaṃ nikkhipitabbaṃ, bhūmattharaṇaṃ yathāpaññattaṃ sallakkhetvā nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā paripphositvā sammajjitabbā ‘‘mā vihāro rajena uhaññī’’ti, saṅkāraṃ vicinitvā ekamantaṃ chaḍḍetabbaṃ.
ந பி⁴க்கு²ஸாமந்தா ஸேனாஸனங் பப்போ²டேதப்³ப³ங், ந விஹாரஸாமந்தா ஸேனாஸனங் பப்போ²டேதப்³ப³ங், ந பானீயஸாமந்தா ஸேனாஸனங் பப்போ²டேதப்³ப³ங், ந பரிபோ⁴ஜனீயஸாமந்தா ஸேனாஸனங் பப்போ²டேதப்³ப³ங், ந படிவாதே அங்க³ணே ஸேனாஸனங் பப்போ²டேதப்³ப³ங், அதோ⁴வாதே ஸேனாஸனங் பப்போ²டேதப்³ப³ங்.
Na bhikkhusāmantā senāsanaṃ papphoṭetabbaṃ, na vihārasāmantā senāsanaṃ papphoṭetabbaṃ, na pānīyasāmantā senāsanaṃ papphoṭetabbaṃ, na paribhojanīyasāmantā senāsanaṃ papphoṭetabbaṃ, na paṭivāte aṅgaṇe senāsanaṃ papphoṭetabbaṃ, adhovāte senāsanaṃ papphoṭetabbaṃ.
பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங், மஞ்சபடிபாத³கா ஏகமந்தங் ஓதாபெத்வா பமஜ்ஜித்வா அபி⁴ஹரித்வா யதா²டா²னே ட²பேதப்³பா³, மஞ்சோ ஏகமந்தங் ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் அதிஹரித்வா யதா²பஞ்ஞத்தங் பஞ்ஞபேதப்³போ³, பீட²ங் ஏகமந்தங் ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அபடிக⁴ங்ஸந்தேன அஸங்க⁴ட்டெந்தேன கவாடபீட²ங் அதிஹரித்வா யதா²பஞ்ஞத்தங் பஞ்ஞபேதப்³ப³ங் , பி⁴ஸிபி³ம்போ³ஹனங் ஏகமந்தங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங், நிஸீத³னபச்சத்த²ரணங் ஓதாபெத்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங், கே²ளமல்லகோ ஏகமந்தங் ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³போ³, அபஸ்ஸேனப²லகங் ஏகமந்தங் ஓதாபெத்வா பமஜ்ஜித்வா யதா²டா²னே ட²பேதப்³ப³ங். பத்தசீவரங் நிக்கி²பிதப்³ப³ங், பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ நிக்கி²பிதப்³போ³, ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங், ஓரதோ போ⁴க³ங் கத்வா சீவரங் நிக்கி²பிதப்³ப³ங்.
Bhūmattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, mañcapaṭipādakā ekamantaṃ otāpetvā pamajjitvā abhiharitvā yathāṭhāne ṭhapetabbā, mañco ekamantaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbo, pīṭhaṃ ekamantaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbaṃ , bhisibimbohanaṃ ekamantaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, nisīdanapaccattharaṇaṃ otāpetvā papphoṭetvā atiharitvā yathāpaññattaṃ paññapetabbaṃ, kheḷamallako ekamantaṃ otāpetvā pamajjitvā atiharitvā yathāṭhāne ṭhapetabbo, apassenaphalakaṃ ekamantaṃ otāpetvā pamajjitvā yathāṭhāne ṭhapetabbaṃ. Pattacīvaraṃ nikkhipitabbaṃ, pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ, orato bhogaṃ katvā cīvaraṃ nikkhipitabbaṃ.
ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா, உத்தரா, த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திங் விவரிதப்³பா³.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.
ஸசே உக்லாபங் ஹோதி, பரிவேணங் ஸம்மஜ்ஜிதப்³ப³ங், கொட்ட²கோ ஸம்மஜ்ஜிதப்³போ³, உபட்டா²னஸாலா ஸம்மஜ்ஜிதப்³பா³, அக்³கி³ஸாலா ஸம்மஜ்ஜிதப்³பா³, வச்சகுடி ஸம்மஜ்ஜிதப்³பா³. ஸசே பானீயங் ந ஹோதி, பானீயங் உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங் உபட்டா²பேதப்³ப³ங். ஸசே ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங்.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā, aggisālā sammajjitabbā, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
ஸசே வுட்³டே⁴ன ஸத்³தி⁴ங் ஏகவிஹாரே விஹரதி, ந வுட்³ட⁴ங் அனாபுச்சா² உத்³தே³ஸோ தா³தப்³போ³, ந பரிபுச்சா² தா³தப்³பா³, ந ஸஜ்ஜா²யோ காதப்³போ³, ந த⁴ம்மோ பா⁴ஸிதப்³போ³, ந பதீ³போ காதப்³போ³, ந பதீ³போ விஜ்ஜா²பேதப்³போ³, ந வாதபானா விவரிதப்³பா³, ந வாதபானா த²கேதப்³பா³. த்³வாரங் நாம யஸ்மா மஹாவளஞ்ஜங், தஸ்மா தத்த² ஆபுச்ச²னகிச்சங் நத்தி², ஸேஸானி பன உத்³தே³ஸதா³னாதீ³னி ஆபுச்சி²த்வாவ காதப்³பா³னி, தே³வஸிகம்பி ஆபுச்சி²துங் வட்டதி. அதா²பி ‘‘ப⁴ந்தே, ஆபுச்சி²தமேவ ஹோதூ’’தி வுத்தே வுட்³ட⁴தரோ ‘‘ஸாதூ⁴’’தி ஸம்படிச்ச²தி, ஸயமேவ வா ‘‘த்வங் யதா²ஸுக²ங் விஹராஹீ’’தி வத³தி, ஏவம்பி வட்டதி. ஸபா⁴க³ஸ்ஸ விஸ்ஸாஸேனபி வட்டதியேவ. ஸசே வுட்³டே⁴ன ஸத்³தி⁴ங் ஏகசங்கமே சங்கமதி, யேன வுட்³டோ⁴, தேன பரிவத்தேதப்³ப³ங், ந ச வுட்³டோ⁴ ஸங்கா⁴டிகண்ணேன க⁴ட்டேதப்³போ³. இத³ங் ஸேனாஸனவத்தங்.
Sace vuḍḍhena saddhiṃ ekavihāre viharati, na vuḍḍhaṃ anāpucchā uddeso dātabbo, na paripucchā dātabbā, na sajjhāyo kātabbo, na dhammo bhāsitabbo, na padīpo kātabbo, na padīpo vijjhāpetabbo, na vātapānā vivaritabbā, na vātapānā thaketabbā. Dvāraṃ nāma yasmā mahāvaḷañjaṃ, tasmā tattha āpucchanakiccaṃ natthi, sesāni pana uddesadānādīni āpucchitvāva kātabbāni, devasikampi āpucchituṃ vaṭṭati. Athāpi ‘‘bhante, āpucchitameva hotū’’ti vutte vuḍḍhataro ‘‘sādhū’’ti sampaṭicchati, sayameva vā ‘‘tvaṃ yathāsukhaṃ viharāhī’’ti vadati, evampi vaṭṭati. Sabhāgassa vissāsenapi vaṭṭatiyeva. Sace vuḍḍhena saddhiṃ ekacaṅkame caṅkamati, yena vuḍḍho, tena parivattetabbaṃ, na ca vuḍḍho saṅghāṭikaṇṇena ghaṭṭetabbo. Idaṃ senāsanavattaṃ.
192. ஜந்தாக⁴ரவத்தே யோ பட²மங் ஜந்தாக⁴ரங் க³ச்ச²தி, ஸசே சா²ரிகா உஸ்ஸன்னா ஹோதி, சா²ரிகா ச²ட்³டே³தப்³பா³. ஸசே உக்லாபங் ஹோதி, ஜந்தாக⁴ரங் ஸம்மஜ்ஜிதப்³ப³ங், பரிப⁴ண்ட³ங் ஸம்மஜ்ஜிதப்³ப³ங், பரிவேணங் ஸம்மஜ்ஜிதப்³ப³ங், கொட்ட²கோ ஸம்மஜ்ஜிதப்³போ³, ஜந்தாக⁴ரஸாலா ஸம்மஜ்ஜிதப்³பா³, சுண்ணங் ஸன்னேதப்³ப³ங், மத்திகா தேமேதப்³பா³, உத³கதோ³ணியா உத³கங் ஆஸிஞ்சிதப்³ப³ங். ஜந்தாக⁴ரங் பவிஸந்தேன மத்திகாய முக²ங் மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங், ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங், ந நவா பி⁴க்கூ² ஆஸனேன படிபா³ஹிதப்³பா³. ஸசே உஸ்ஸஹதி, ஜந்தாக⁴ரே தே²ரானங் பி⁴க்கூ²னங் பரிகம்மங் காதப்³ப³ங். ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா ஜந்தாக⁴ரா நிக்க²மிதப்³ப³ங். ஸசே உஸ்ஸஹதி, உத³கேபி தே²ரானங் பி⁴க்கூ²னங் பரிகம்மங் காதப்³ப³ங், ந தே²ரானங் பி⁴க்கூ²னங் புரதோ நஹாயிதப்³ப³ங், ந உபரிதோ நஹாயிதப்³ப³ங், நஹாதேன உத்தரந்தேன ஓதரந்தானங் மக்³கோ³ தா³தப்³போ³. யோ பச்சா² ஜந்தாக⁴ரா நிக்க²மதி, ஸசே ஜந்தாக⁴ரங் சிக்க²ல்லங் ஹோதி, தோ⁴விதப்³ப³ங், மத்திகாதோ³ணிங் தோ⁴வித்வா ஜந்தாக⁴ரபீட²ங் படிஸாமெத்வா அக்³கி³ங் விஜ்ஜா²பெத்வா த்³வாரங் த²கெத்வா பக்கமிதப்³ப³ங். இத³ங் ஜந்தாக⁴ரவத்தங்.
192.Jantāgharavatte yo paṭhamaṃ jantāgharaṃ gacchati, sace chārikā ussannā hoti, chārikā chaḍḍetabbā. Sace uklāpaṃ hoti, jantāgharaṃ sammajjitabbaṃ, paribhaṇḍaṃ sammajjitabbaṃ, pariveṇaṃ sammajjitabbaṃ, koṭṭhako sammajjitabbo, jantāgharasālā sammajjitabbā, cuṇṇaṃ sannetabbaṃ, mattikā temetabbā, udakadoṇiyā udakaṃ āsiñcitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ, na there bhikkhū anupakhajja nisīditabbaṃ, na navā bhikkhū āsanena paṭibāhitabbā. Sace ussahati, jantāghare therānaṃ bhikkhūnaṃ parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ. Sace ussahati, udakepi therānaṃ bhikkhūnaṃ parikammaṃ kātabbaṃ, na therānaṃ bhikkhūnaṃ purato nahāyitabbaṃ, na uparito nahāyitabbaṃ, nahātena uttarantena otarantānaṃ maggo dātabbo. Yo pacchā jantāgharā nikkhamati, sace jantāgharaṃ cikkhallaṃ hoti, dhovitabbaṃ, mattikādoṇiṃ dhovitvā jantāgharapīṭhaṃ paṭisāmetvā aggiṃ vijjhāpetvā dvāraṃ thaketvā pakkamitabbaṃ. Idaṃ jantāgharavattaṃ.
193. வச்சகுடிவத்தே யோ வச்சகுடிங் க³ச்ச²தி, ப³ஹி டி²தேன உக்காஸிதப்³ப³ங், அந்தோ நிஸின்னேனபி உக்காஸிதப்³ப³ங், சீவரவங்ஸே வா சீவரரஜ்ஜுயா வா சீவரங் நிக்கி²பித்வா ஸாது⁴கங் அதரமானேன வச்சகுடி பவிஸிதப்³பா³, நாதிஸஹஸா பவிஸிதப்³பா³, ந உப்³ப⁴ஜித்வா பவிஸிதப்³பா³, வச்சபாது³காய டி²தேன உப்³ப⁴ஜிதப்³ப³ங், ந நித்து²னந்தேன வச்சோ காதப்³போ³, ந த³ந்தகட்ட²ங் கா²த³ந்தேன வச்சோ காதப்³போ³, ந ப³ஹித்³தா⁴ வச்சதோ³ணிகாய வச்சோ காதப்³போ³, ந ப³ஹித்³தா⁴ பஸ்ஸாவதோ³ணிகாய பஸ்ஸாவோ காதப்³போ³, ந பஸ்ஸாவதோ³ணிகாய கே²ளோ காதப்³போ³, பா²லிதேன வா க²ரேன வா க³ண்டி²கேன வா கண்டகேன வா ஸுஸிரேன வா பூதினா வா கட்டே²ன ந அவலேகி²தப்³ப³ங், அவலேக²னகட்ட²ங் பன அக்³க³ஹெத்வா பவிட்ட²ஸ்ஸ ஆபத்தி நத்தி², ந அவலேக²னகட்ட²ங் வச்சகூபம்ஹி பாதேதப்³ப³ங், வச்சபாது³காய டி²தேன படிச்சா²தே³தப்³ப³ங், நாதிஸஹஸா நிக்க²மிதப்³ப³ங், ந உப்³ப⁴ஜித்வா நிக்க²மிதப்³ப³ங், ஆசமனபாது³காய டி²தேன உப்³ப⁴ஜிதப்³ப³ங், ந சபுசபுகாரகங் ஆசமேதப்³ப³ங், ந ஆசமனஸராவகே உத³கங் ஸேஸேதப்³ப³ங். இத³ஞ்ச ஸப்³ப³ஸாதா⁴ரணட்டா²னங் ஸந்தா⁴ய வுத்தங். தத்ர ஹி அஞ்ஞே அஞ்ஞே ஆக³ச்ச²ந்தி, தஸ்மா உத³கங் ந ஸேஸேதப்³ப³ங். யங் பன ஸங்கி⁴கேபி விஹாரே ஏகதே³ஸே நிப³த்³த⁴க³மனத்தா²ய கதங் டா²னங் ஹோதி புக்³க³லிகட்டா²னங் வா, தஸ்மிங் வட்டதி. விரேசனங் பிவித்வா புனப்புனங் பவிஸந்தஸ்ஸபி வட்டதியேவ. ஆசமனபாது³காய டி²தேன படிச்சா²தே³தப்³ப³ங்.
193.Vaccakuṭivatte yo vaccakuṭiṃ gacchati, bahi ṭhitena ukkāsitabbaṃ, anto nisinnenapi ukkāsitabbaṃ, cīvaravaṃse vā cīvararajjuyā vā cīvaraṃ nikkhipitvā sādhukaṃ ataramānena vaccakuṭi pavisitabbā, nātisahasā pavisitabbā, na ubbhajitvā pavisitabbā, vaccapādukāya ṭhitena ubbhajitabbaṃ, na nitthunantena vacco kātabbo, na dantakaṭṭhaṃ khādantena vacco kātabbo, na bahiddhā vaccadoṇikāya vacco kātabbo, na bahiddhā passāvadoṇikāya passāvo kātabbo, na passāvadoṇikāya kheḷo kātabbo, phālitena vā kharena vā gaṇṭhikena vā kaṇṭakena vā susirena vā pūtinā vā kaṭṭhena na avalekhitabbaṃ, avalekhanakaṭṭhaṃ pana aggahetvā paviṭṭhassa āpatti natthi, na avalekhanakaṭṭhaṃ vaccakūpamhi pātetabbaṃ, vaccapādukāya ṭhitena paṭicchādetabbaṃ, nātisahasā nikkhamitabbaṃ, na ubbhajitvā nikkhamitabbaṃ, ācamanapādukāya ṭhitena ubbhajitabbaṃ, na capucapukārakaṃ ācametabbaṃ, na ācamanasarāvake udakaṃ sesetabbaṃ. Idañca sabbasādhāraṇaṭṭhānaṃ sandhāya vuttaṃ. Tatra hi aññe aññe āgacchanti, tasmā udakaṃ na sesetabbaṃ. Yaṃ pana saṅghikepi vihāre ekadese nibaddhagamanatthāya kataṃ ṭhānaṃ hoti puggalikaṭṭhānaṃ vā, tasmiṃ vaṭṭati. Virecanaṃ pivitvā punappunaṃ pavisantassapi vaṭṭatiyeva. Ācamanapādukāya ṭhitena paṭicchādetabbaṃ.
ஸசே வச்சகுடி உஹதா ஹோதி ப³ஹி வச்சமக்கி²தா, உத³கங் ஆஹரித்வா தோ⁴விதப்³பா³. உத³கங் அத்தி², பா⁴ஜனங் நத்தி², அஸந்தங் நாம ஹோதி. பா⁴ஜனங் அத்தி², உத³கங் நத்தி², ஏதம்பி அஸந்தங் . உப⁴யஸ்மிங் அஸதி அஸந்தமேவ, கட்டே²ன வா கேனசி வா புஞ்சி²த்வா க³ந்தப்³ப³ங். ஸசே அவலேக²னபிடகோ பூரிதோ ஹோதி, அவலேக²னகட்ட²ங் ச²ட்³டே³தப்³ப³ங். ஸசே கசவரங் அத்தி², வச்சகுடி ஸம்மஜ்ஜிதப்³பா³, பரிப⁴ண்ட³ங் ஸம்மஜ்ஜிதப்³ப³ங், பரிவேணங் ஸம்மஜ்ஜிதப்³ப³ங், கொட்ட²கோ ஸம்மஜ்ஜிதப்³போ³. ஸசே ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங்.
Sace vaccakuṭi uhatā hoti bahi vaccamakkhitā, udakaṃ āharitvā dhovitabbā. Udakaṃ atthi, bhājanaṃ natthi, asantaṃ nāma hoti. Bhājanaṃ atthi, udakaṃ natthi, etampi asantaṃ . Ubhayasmiṃ asati asantameva, kaṭṭhena vā kenaci vā puñchitvā gantabbaṃ. Sace avalekhanapiṭako pūrito hoti, avalekhanakaṭṭhaṃ chaḍḍetabbaṃ. Sace kacavaraṃ atthi, vaccakuṭi sammajjitabbā, paribhaṇḍaṃ sammajjitabbaṃ, pariveṇaṃ sammajjitabbaṃ, koṭṭhako sammajjitabbo. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘ந, பி⁴க்க²வே, வச்சங் கத்வா ஸதி உத³கே நாசமேதப்³ப³ங், யோ நாசமெய்ய, ஆபத்தி து³க்கடஸ்ஸா’’தி (சூளவ॰ 373) வசனதோ உத³கே ஸதி உத³ககிச்சங் அகரொந்தஸ்ஸ ஆபத்தி. ஸசே உத³கங் அத்தி², படிச்ச²ன்னட்டா²னங் பன நத்தி², பா⁴ஜனேன நீஹரித்வா ஆசமிதப்³ப³ங். பா⁴ஜனே அஸதி பத்தேன நீஹரிதப்³ப³ங், பத்தேபி அஸதி அஸந்தங் நாம ஹோதி. ‘‘இத³ங் அதிவிவடங், புரதோ அஞ்ஞங் உத³கங் ப⁴விஸ்ஸதீ’’தி க³தஸ்ஸ உத³கங் அலப⁴ந்தஸ்ஸேவ பி⁴க்கா²சாரவேலா ஹோதி, கட்டே²ன வா கேனசி வா புஞ்சி²த்வா க³ந்தப்³ப³ங், பு⁴ஞ்ஜிதும்பி அனுமோதி³தும்பி வட்டதி. ‘‘ந, பி⁴க்க²வே, வச்சகுடியா யதா²வுட்³ட⁴ங் வச்சோ காதப்³போ³, யோ கரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆக³தபடிபாடியா வச்சங் காது’’ந்தி (சுளவ॰ 373) வசனதோ வச்சகுடிங் பவிஸந்தேன ஆக³தபடிபாடியா பவிஸிதப்³ப³ங். வச்சகுடியங் பஸ்ஸாவட்டா²னே நஹானதித்தே²தி தீஸுபி ஆக³தபடிபாடியேவ பமாணங். இத³ங் வச்சகுடிவத்தங்.
‘‘Na, bhikkhave, vaccaṃ katvā sati udake nācametabbaṃ, yo nācameyya, āpatti dukkaṭassā’’ti (cūḷava. 373) vacanato udake sati udakakiccaṃ akarontassa āpatti. Sace udakaṃ atthi, paṭicchannaṭṭhānaṃ pana natthi, bhājanena nīharitvā ācamitabbaṃ. Bhājane asati pattena nīharitabbaṃ, pattepi asati asantaṃ nāma hoti. ‘‘Idaṃ ativivaṭaṃ, purato aññaṃ udakaṃ bhavissatī’’ti gatassa udakaṃ alabhantasseva bhikkhācāravelā hoti, kaṭṭhena vā kenaci vā puñchitvā gantabbaṃ, bhuñjitumpi anumoditumpi vaṭṭati. ‘‘Na, bhikkhave, vaccakuṭiyā yathāvuḍḍhaṃ vacco kātabbo, yo kareyya, āpatti dukkaṭassa. Anujānāmi, bhikkhave, āgatapaṭipāṭiyā vaccaṃ kātu’’nti (cuḷava. 373) vacanato vaccakuṭiṃ pavisantena āgatapaṭipāṭiyā pavisitabbaṃ. Vaccakuṭiyaṃ passāvaṭṭhāne nahānatittheti tīsupi āgatapaṭipāṭiyeva pamāṇaṃ. Idaṃ vaccakuṭivattaṃ.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
உபஜ்ஜா²யாதி³வத்தவினிச்ச²யகதா² ஸமத்தா.
Upajjhāyādivattavinicchayakathā samattā.
