| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
27. убаж̇жхааяаад̣̇ивад̇д̇авинижчаяагат̇аа
27. Upajjhāyādivattavinicchayakathā
183. вад̇д̇анд̇и зд̇т̇а бана вад̇д̇ам̣ наамзд̇ам̣ убаж̇жхааяавад̇д̇ам̣ аажарияавад̇д̇ам̣ ааг̇анд̇угавад̇д̇ам̣ ааваасигавад̇д̇ам̣ г̇амигавад̇д̇ам̣ бхад̇д̇аг̇г̇авад̇д̇ам̣ бин̣д̣ажааригавад̇д̇ам̣ ааран̃н̃игавад̇д̇ам̣ сзнаасанавад̇д̇ам̣ ж̇анд̇аагхаравад̇д̇ам̣ важжагудивад̇д̇анд̇и б̣ахувид̇хам̣. д̇ад̇т̇а убаж̇жхааяавад̇д̇ам̣ д̇аава звам̣ взд̣̇ид̇аб̣б̣ам̣ – сад̣̇д̇хивихааригзна гаалассзва удтааяа убааханаа омун̃жид̇ваа згам̣сам̣ уд̇д̇араасан̇г̇ам̣ гарид̇ваа убаж̇жхааяасса д̣̇анд̇агадтам̣ д̣̇аад̇аб̣б̣ам̣, мукод̣̇агам̣ д̣̇аад̇аб̣б̣ам̣. д̇ад̇т̇а д̣̇анд̇агадтам̣ д̣̇знд̇зна маханд̇ам̣ маж̇жхимам̣ куд̣̇д̣̇аганд̇и д̇ийн̣и д̣̇анд̇агадтаани убанзд̇ваа ид̇о яам̣ д̇ийн̣и д̣̇ивасаани г̇ан̣хаад̇и, жад̇уд̇т̇ад̣̇ивасад̇о бадтааяа д̇аад̣̇исамзва д̣̇аад̇аб̣б̣ам̣. сажз анияамам̣ гад̇ваа яам̣ ваа д̇ам̣ ваа г̇ан̣хаад̇и, ат̇а яаад̣̇исам̣ лабхад̇и, д̇аад̣̇исам̣ д̣̇аад̇аб̣б̣ам̣. мукод̣̇агам̣ д̣̇знд̇знаби сийд̇ан̃жа ун̣хан̃жа уд̣̇агам̣ убанзд̇ваа д̇ад̇о яам̣ д̇ийн̣и д̣̇ивасаани вал̣ан̃ж̇зд̇и. жад̇уд̇т̇ад̣̇ивасад̇о бадтааяа д̇аад̣̇исамзва мукад̇хованод̣̇агам̣ д̣̇аад̇аб̣б̣ам̣. сажз д̣̇увид̇хамби вал̣ан̃ж̇зд̇и, д̣̇увид̇хамби убанзд̇аб̣б̣ам̣. уд̣̇агам̣ мукад̇хованадтаанз табзд̇ваа важжагудид̇о бадтааяа саммаж̇ж̇ид̇аб̣б̣ам̣. т̇зрз важжагудиг̇ад̇з баривзн̣ам̣ саммаж̇ж̇ид̇аб̣б̣ам̣, звам̣ баривзн̣ам̣ асун̃н̃ам̣ ход̇и. т̇зрз важжагудид̇о анигканд̇зязва аасанам̣ бан̃н̃абзд̇аб̣б̣ам̣. сарийрагижжам̣ гад̇ваа ааг̇анд̇ваа д̇асмим̣ нисиннасса сажз яааг̇у ход̇и, бхааж̇анам̣ д̇ховид̇ваа яааг̇у убанаамзд̇аб̣б̣аа, яааг̇ум̣ бивид̇асса уд̣̇агам̣ д̣̇ад̇ваа бхааж̇анам̣ бадиг̇г̇ахзд̇ваа нийжам̣ гад̇ваа саад̇хугам̣ аббадигхам̣санд̇зна д̇ховид̇ваа бадисаамзд̇аб̣б̣ам̣. убаж̇жхааяамхи вудтид̇з аасанам̣ уд̣̇д̇харид̇аб̣б̣ам̣. сажз со д̣̇зсо углаабо ход̇и гзнажи гажаварзна сам̣гин̣н̣о, со д̣̇зсо саммаж̇ж̇ид̇аб̣б̣о. сажз бана ан̃н̃о гажаваро над̇т̇и, уд̣̇агапусид̇аанзва хонд̇и, хад̇т̇зна бамаж̇ж̇ид̇аб̣б̣о.
183.Vattanti ettha pana vattaṃ nāmetaṃ upajjhāyavattaṃ ācariyavattaṃ āgantukavattaṃ āvāsikavattaṃ gamikavattaṃ bhattaggavattaṃ piṇḍacārikavattaṃ āraññikavattaṃ senāsanavattaṃ jantāgharavattaṃ vaccakuṭivattanti bahuvidhaṃ. Tattha upajjhāyavattaṃ tāva evaṃ veditabbaṃ – saddhivihārikena kālasseva uṭṭhāya upāhanā omuñcitvā ekaṃsaṃ uttarāsaṅgaṃ karitvā upajjhāyassa dantakaṭṭhaṃ dātabbaṃ, mukhodakaṃ dātabbaṃ. Tattha dantakaṭṭhaṃ dentena mahantaṃ majjhimaṃ khuddakanti tīṇi dantakaṭṭhāni upanetvā ito yaṃ tīṇi divasāni gaṇhāti, catutthadivasato paṭṭhāya tādisameva dātabbaṃ. Sace aniyamaṃ katvā yaṃ vā taṃ vā gaṇhāti, atha yādisaṃ labhati, tādisaṃ dātabbaṃ. Mukhodakaṃ dentenapi sītañca uṇhañca udakaṃ upanetvā tato yaṃ tīṇi divasāni vaḷañjeti. Catutthadivasato paṭṭhāya tādisameva mukhadhovanodakaṃ dātabbaṃ. Sace duvidhampi vaḷañjeti, duvidhampi upanetabbaṃ. Udakaṃ mukhadhovanaṭṭhāne ṭhapetvā vaccakuṭito paṭṭhāya sammajjitabbaṃ. There vaccakuṭigate pariveṇaṃ sammajjitabbaṃ, evaṃ pariveṇaṃ asuññaṃ hoti. There vaccakuṭito anikkhanteyeva āsanaṃ paññapetabbaṃ. Sarīrakiccaṃ katvā āgantvā tasmiṃ nisinnassa sace yāgu hoti, bhājanaṃ dhovitvā yāgu upanāmetabbā, yāguṃ pivitassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ. Upajjhāyamhi vuṭṭhite āsanaṃ uddharitabbaṃ. Sace so deso uklāpo hoti kenaci kacavarena saṃkiṇṇo, so deso sammajjitabbo. Sace pana añño kacavaro natthi, udakaphusitāneva honti, hatthena pamajjitabbo.
сажз убаж̇жхааяо г̇аамам̣ бависид̇угаамо ход̇и, ниваасанам̣ д̣̇аад̇аб̣б̣ам̣, бадиниваасанам̣ бадиг̇г̇ахзд̇аб̣б̣ам̣, гааяаб̣анд̇ханам̣ д̣̇аад̇аб̣б̣ам̣, саг̇ун̣ам̣ гад̇ваа сан̇гхаадияо д̣̇аад̇аб̣б̣аа, д̇ховид̇ваа бад̇д̇о сауд̣̇аго д̣̇аад̇аб̣б̣о. сажз убаж̇жхааяо бажчаасаман̣ам̣ ааган̇кад̇и, д̇иман̣д̣алам̣ бадижчаад̣̇знд̇зна бариман̣д̣алам̣ ниваасзд̇ваа гааяаб̣анд̇ханам̣ б̣анд̇хид̇ваа саг̇ун̣ам̣ гад̇ваа сан̇гхаадияо баарубид̇ваа г̇ан̣тигам̣ бадимун̃жид̇ваа д̇ховид̇ваа бад̇д̇ам̣ г̇ахзд̇ваа убаж̇жхааяасса бажчаасаман̣зна ход̇аб̣б̣ам̣, наад̇ид̣̇уурз г̇анд̇аб̣б̣ам̣, наажжаасаннз г̇анд̇аб̣б̣ам̣. зд̇т̇а бана сажз убаж̇жхааяам̣ нивад̇д̇ид̇ваа ологзнд̇ам̣ згзна ваа д̣̇вийхи ваа бад̣̇авийд̇ихаарзхи самбаабун̣аад̇и, зд̇д̇аавад̇аа наад̇ид̣̇уурз наажжаасаннз г̇ад̇о ход̇ийд̇и взд̣̇ид̇аб̣б̣ам̣. сажз убаж̇жхааязна бхигкаажаарз яааг̇уяаа ваа бхад̇д̇з ваа лад̣̇д̇хз бад̇д̇о ун̣хо ваа бхаариго ваа ход̇и, ад̇д̇ано бад̇д̇ам̣ д̇асса д̣̇ад̇ваа со бад̇д̇о г̇ахзд̇аб̣б̣о, на убаж̇жхааяасса бхан̣амаанасса анд̇аранд̇араа гат̇аа обаад̇зд̇аб̣б̣аа. ид̇о бадтааяа бана яад̇т̇а яад̇т̇а на-гаарзна бадисзд̇хо гарийяад̇и, саб̣б̣ад̇т̇а д̣̇уггадаабад̇д̇и взд̣̇ид̇аб̣б̣аа. убаж̇жхааяо аабад̇д̇исааманд̇аа бхан̣амаано ниваарзд̇аб̣б̣о. ниваарзнд̇зна жа ‘‘бханд̇з, ийд̣̇исам̣ наама вад̇д̇ум̣ ваддад̇и, аабад̇д̇и на ход̇ий’’д̇и звам̣ бужчанд̇зна вияа ваарзд̇аб̣б̣о, ‘‘ваарзссаамий’’д̇и бана гад̇ваа ‘‘махаллага, маа звам̣ бхан̣аа’’д̇и на вад̇д̇аб̣б̣о.
Sace upajjhāyo gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto saudako dātabbo. Sace upajjhāyo pacchāsamaṇaṃ ākaṅkhati, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā upajjhāyassa pacchāsamaṇena hotabbaṃ, nātidūre gantabbaṃ, nāccāsanne gantabbaṃ. Ettha pana sace upajjhāyaṃ nivattitvā olokentaṃ ekena vā dvīhi vā padavītihārehi sampāpuṇāti, ettāvatā nātidūre nāccāsanne gato hotīti veditabbaṃ. Sace upajjhāyena bhikkhācāre yāguyā vā bhatte vā laddhe patto uṇho vā bhāriko vā hoti, attano pattaṃ tassa datvā so patto gahetabbo, na upajjhāyassa bhaṇamānassa antarantarā kathā opātetabbā. Ito paṭṭhāya pana yattha yattha na-kārena paṭisedho karīyati, sabbattha dukkaṭāpatti veditabbā. Upajjhāyo āpattisāmantā bhaṇamāno nivāretabbo. Nivārentena ca ‘‘bhante, īdisaṃ nāma vattuṃ vaṭṭati, āpatti na hotī’’ti evaṃ pucchantena viya vāretabbo, ‘‘vāressāmī’’ti pana katvā ‘‘mahallaka, mā evaṃ bhaṇā’’ti na vattabbo.
сажз аасаннз г̇аамо ход̇и, вихаарз ваа г̇илаано бхигку ход̇и, г̇аамад̇о батамад̇арам̣ ааг̇анд̇аб̣б̣ам̣. сажз д̣̇уурз г̇аамо ход̇и, убаж̇жхааязна сад̣̇д̇хим̣ ааг̇ажчанд̇оби над̇т̇и, д̇знзва сад̣̇д̇хим̣ г̇аамад̇о нигкамид̇ваа жийварзна бад̇д̇ам̣ взтзд̇ваа анд̇араамаг̇г̇ад̇о батамад̇арам̣ ааг̇анд̇аб̣б̣ам̣. звам̣ батамад̇арам̣ ааг̇ад̇зна аасанам̣ бан̃н̃абзд̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкибид̇аб̣б̣ам̣, бажжуг̇г̇анд̇ваа бад̇д̇ажийварам̣ бадиг̇г̇ахзд̇аб̣б̣ам̣, бадиниваасанам̣ д̣̇аад̇аб̣б̣ам̣, ниваасанам̣ бадиг̇г̇ахзд̇аб̣б̣ам̣. сажз жийварам̣ сзд̣̇аг̇г̇ахид̇ам̣ ход̇и, мухуд̇д̇ам̣ ун̣хз од̇аабзд̇аб̣б̣ам̣, на жа ун̣хз жийварам̣ нид̣̇ахид̇аб̣б̣ам̣, жийварам̣ сан̇гхарид̇аб̣б̣ам̣. жийварам̣ сан̇гхаранд̇зна жа жад̇уран̇г̇улам̣ ган̣н̣ам̣ уссаарзд̇ваа жийварам̣ сан̇гхарид̇аб̣б̣ам̣. гим̣гааран̣аа? маа маж̇жхз бхан̇г̇о ахосийд̇и. самам̣ гад̇ваа сан̇гхарид̇асса хи маж̇жхз бхан̇г̇о ход̇и, д̇ад̇о нижжам̣ бхиж̇ж̇амаанам̣ д̣̇уб̣б̣алам̣ ход̇и, д̇ам̣ нивааран̣ад̇т̇амзд̇ам̣ вуд̇д̇ам̣. д̇асмаа яат̇аа аж̇ж̇а бхан̇г̇адтаанзязва свз на бхиж̇ж̇иссад̇и, д̇ат̇аа д̣̇ивасз д̣̇ивасз жад̇уран̇г̇улам̣ уссаарзд̇ваа сан̇гхарид̇аб̣б̣ам̣, обхог̇з гааяаб̣анд̇ханам̣ гаад̇аб̣б̣ам̣.
Sace āsanne gāmo hoti, vihāre vā gilāno bhikkhu hoti, gāmato paṭhamataraṃ āgantabbaṃ. Sace dūre gāmo hoti, upajjhāyena saddhiṃ āgacchantopi natthi, teneva saddhiṃ gāmato nikkhamitvā cīvarena pattaṃ veṭhetvā antarāmaggato paṭhamataraṃ āgantabbaṃ. Evaṃ paṭhamataraṃ āgatena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sedaggahitaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ, cīvaraṃ saṅgharitabbaṃ. Cīvaraṃ saṅgharantena ca caturaṅgulaṃ kaṇṇaṃ ussāretvā cīvaraṃ saṅgharitabbaṃ. Kiṃkāraṇā? Mā majjhe bhaṅgo ahosīti. Samaṃ katvā saṅgharitassa hi majjhe bhaṅgo hoti, tato niccaṃ bhijjamānaṃ dubbalaṃ hoti, taṃ nivāraṇatthametaṃ vuttaṃ. Tasmā yathā ajja bhaṅgaṭṭhāneyeva sve na bhijjissati, tathā divase divase caturaṅgulaṃ ussāretvā saṅgharitabbaṃ, obhoge kāyabandhanaṃ kātabbaṃ.
сажз бин̣д̣абаад̇о ход̇и, убаж̇жхааяо жа бхун̃ж̇ид̇угаамо ход̇и, уд̣̇агам̣ д̣̇ад̇ваа бин̣д̣абаад̇о убанаамзд̇аб̣б̣о, убаж̇жхааяо баанийязна бужчид̇аб̣б̣о. бужчанд̇зна жа д̇игкад̇д̇ум̣ ‘‘баанийяам̣, бханд̇з, аахарийяад̇уу’’д̇и баанийязна бужчид̇аб̣б̣о. сажз гаало ад̇т̇и, убаж̇жхааяз бхуд̇д̇з саяам̣ бхун̃ж̇ид̇аб̣б̣ам̣. сажз убагадто гаало, баанийяам̣ убаж̇жхааяасса санд̇игз табзд̇ваа саяамби бхун̃ж̇ид̇аб̣б̣ам̣. бхуд̇д̇аависса уд̣̇агам̣ д̣̇ад̇ваа бад̇д̇ам̣ бадиг̇г̇ахзд̇ваа нийжам̣ гад̇ваа саад̇хугам̣ аббадигхам̣санд̇зна д̇ховид̇ваа вод̣̇агам̣ гад̇ваа мухуд̇д̇ам̣ ун̣хз од̇аабзд̇аб̣б̣о, на жа ун̣хз бад̇д̇о нид̣̇ахид̇аб̣б̣о, бад̇д̇ажийварам̣ нигкибид̇аб̣б̣ам̣. бад̇д̇ам̣ нигкибанд̇зна згзна хад̇т̇зна бад̇д̇ам̣ г̇ахзд̇ваа згзна хад̇т̇зна хздтааман̃жам̣ ваа хздтаабийтам̣ ваа бараамасид̇ваа бад̇д̇о нигкибид̇аб̣б̣о, на жа д̇аддигажаммакан̣д̣аад̣̇ийхи ананд̇арахид̇ааяа бхуумияаа бад̇д̇о нигкибид̇аб̣б̣о. сажз бана гаал̣аван̣н̣агад̇аа ваа суд̇хааб̣ад̣̇д̇хаа ваа бхууми ход̇и нираж̇амад̇д̇игаа, д̇ат̇ааруубааяа бхуумияаа табзд̇ум̣ ваддад̇и, д̇ход̇аваалигааяаби табзд̇ум̣ ваддад̇и, бам̣сураж̇асагкараад̣̇ийсу на ваддад̇и. д̇ад̇ра бана бан̣н̣ам̣ ваа аад̇хаарагам̣ ваа табзд̇ваа д̇ад̇ра нигкибид̇аб̣б̣о. жийварам̣ нигкибанд̇зна згзна хад̇т̇зна жийварам̣ г̇ахзд̇ваа згзна хад̇т̇зна жийваравам̣сам̣ ваа жийварараж̇ж̇ум̣ ваа бамаж̇ж̇ид̇ваа баарад̇о анд̇ам̣ орад̇о бхог̇ам̣ гад̇ваа жийварам̣ нигкибид̇аб̣б̣ам̣. ид̣̇ан̃жа жийваравам̣саад̣̇ийнам̣ хздтаа хад̇т̇ам̣ бавзсзд̇ваа абхимукзна хад̇т̇зна сан̣игам̣ нигкибанад̇т̇ам̣ вуд̇д̇ам̣. анд̇з бана г̇ахзд̇ваа бхог̇зна жийваравам̣саад̣̇ийнам̣ убари кибанд̇асса бхид̇д̇ияам̣ бхог̇о бадихан̃н̃ад̇и, д̇асмаа д̇ат̇аа на гаад̇аб̣б̣ам̣. убаж̇жхааяамхи вудтид̇з аасанам̣ уд̣̇д̇харид̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ бадисаамзд̇аб̣б̣ам̣. сажз со д̣̇зсо углаабо ход̇и, со д̣̇зсо саммаж̇ж̇ид̇аб̣б̣о.
Sace piṇḍapāto hoti, upajjhāyo ca bhuñjitukāmo hoti, udakaṃ datvā piṇḍapāto upanāmetabbo, upajjhāyo pānīyena pucchitabbo. Pucchantena ca tikkhattuṃ ‘‘pānīyaṃ, bhante, āharīyatū’’ti pānīyena pucchitabbo. Sace kālo atthi, upajjhāye bhutte sayaṃ bhuñjitabbaṃ. Sace upakaṭṭho kālo, pānīyaṃ upajjhāyassa santike ṭhapetvā sayampi bhuñjitabbaṃ. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo, pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca taṭṭikacammakhaṇḍādīhi anantarahitāya bhūmiyā patto nikkhipitabbo. Sace pana kāḷavaṇṇakatā vā sudhābaddhā vā bhūmi hoti nirajamattikā, tathārūpāya bhūmiyā ṭhapetuṃ vaṭṭati, dhotavālikāyapi ṭhapetuṃ vaṭṭati, paṃsurajasakkharādīsu na vaṭṭati. Tatra pana paṇṇaṃ vā ādhārakaṃ vā ṭhapetvā tatra nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ. Idañca cīvaravaṃsādīnaṃ heṭṭhā hatthaṃ pavesetvā abhimukhena hatthena saṇikaṃ nikkhipanatthaṃ vuttaṃ. Ante pana gahetvā bhogena cīvaravaṃsādīnaṃ upari khipantassa bhittiyaṃ bhogo paṭihaññati, tasmā tathā na kātabbaṃ. Upajjhāyamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
сажз убаж̇жхааяо нахааяид̇угаамо ход̇и, нахаанам̣ бадияаад̣̇зд̇аб̣б̣ам̣. сажз сийд̇зна ад̇т̇о ход̇и, сийд̇ам̣ бадияаад̣̇зд̇аб̣б̣ам̣. сажз ун̣хзна ад̇т̇о ход̇и, ун̣хам̣ бадияаад̣̇зд̇аб̣б̣ам̣.
Sace upajjhāyo nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
сажз убаж̇жхааяо ж̇анд̇аагхарам̣ бависид̇угаамо ход̇и, жун̣н̣ам̣ саннзд̇аб̣б̣ам̣, мад̇д̇игаа д̇змзд̇аб̣б̣аа. ж̇анд̇аагхарабийтам̣ аад̣̇ааяа убаж̇жхааяасса бидтид̇о бидтид̇о г̇анд̇ваа ж̇анд̇аагхарабийтам̣ д̣̇ад̇ваа жийварам̣ бадиг̇г̇ахзд̇ваа згаманд̇з нид̣̇д̇хуумадтаанз табзд̇аб̣б̣ам̣, жун̣н̣ам̣ д̣̇аад̇аб̣б̣ам̣, мад̇д̇игаа д̣̇аад̇аб̣б̣аа. сажз уссахад̇и, ж̇анд̇аагхарам̣ бависид̇аб̣б̣ам̣, бависанд̇зна мад̇д̇игааяа мукам̣ магкзд̇ваа бурад̇о жа бажчад̇о жа бадижчаад̣̇зд̇ваа ж̇анд̇аагхарам̣ бависид̇аб̣б̣ам̣. на т̇зрз бхигкуу анубакаж̇ж̇а нисийд̣̇ид̇аб̣б̣ам̣, на наваа бхигкуу аасанзна бадиб̣аахид̇аб̣б̣аа, ж̇анд̇аагхарз убаж̇жхааяасса баригаммам̣ гаад̇аб̣б̣ам̣. ж̇анд̇аагхарз баригаммам̣ наама ан̇г̇аарамад̇д̇игааун̣ход̣̇агад̣̇аанаад̣̇игам̣ саб̣б̣агижжам̣. ж̇анд̇аагхараа нигкаманд̇зна ж̇анд̇аагхарабийтам̣ аад̣̇ааяа бурад̇о жа бажчад̇о жа бадижчаад̣̇зд̇ваа ж̇анд̇аагхараа нигкамид̇аб̣б̣ам̣.
Sace upajjhāyo jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā. Jantāgharapīṭhaṃ ādāya upajjhāyassa piṭṭhito piṭṭhito gantvā jantāgharapīṭhaṃ datvā cīvaraṃ paṭiggahetvā ekamante niddhūmaṭṭhāne ṭhapetabbaṃ, cuṇṇaṃ dātabbaṃ, mattikā dātabbā. Sace ussahati, jantāgharaṃ pavisitabbaṃ, pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ, na navā bhikkhū āsanena paṭibāhitabbā, jantāghare upajjhāyassa parikammaṃ kātabbaṃ. Jantāghare parikammaṃ nāma aṅgāramattikāuṇhodakadānādikaṃ sabbakiccaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
уд̣̇агзби убаж̇жхааяасса ан̇г̇абажжан̇г̇агхам̣санаад̣̇игам̣ баригаммам̣ гаад̇аб̣б̣ам̣, нахаад̇зна батамад̇арам̣ уд̇д̇арид̇ваа ад̇д̇ано г̇ад̇д̇ам̣ вод̣̇агам̣ гад̇ваа ниваасзд̇ваа убаж̇жхааяасса г̇ад̇д̇ад̇о уд̣̇агам̣ бамаж̇ж̇ид̇аб̣б̣ам̣, ниваасанам̣ д̣̇аад̇аб̣б̣ам̣, сан̇гхаади д̣̇аад̇аб̣б̣аа , ж̇анд̇аагхарабийтам̣ аад̣̇ааяа батамад̇арам̣ ааг̇анд̇ваа аасанам̣ бан̃н̃абзд̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкибид̇аб̣б̣ам̣, убаж̇жхааяо баанийязна бужчид̇аб̣б̣о. ж̇анд̇аагхарз хи ун̣хасанд̇аабзна бибаасаа ход̇и. сажз уд̣̇д̣̇исаабзд̇угаамо ход̇и, уд̣̇д̣̇исид̇аб̣б̣о. сажз барибужчид̇угаамо ход̇и, барибужчид̇аб̣б̣о.
Udakepi upajjhāyassa aṅgapaccaṅgaghaṃsanādikaṃ parikammaṃ kātabbaṃ, nahātena paṭhamataraṃ uttaritvā attano gattaṃ vodakaṃ katvā nivāsetvā upajjhāyassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā , jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, upajjhāyo pānīyena pucchitabbo. Jantāghare hi uṇhasantāpena pipāsā hoti. Sace uddisāpetukāmo hoti, uddisitabbo. Sace paripucchitukāmo hoti, paripucchitabbo.
яасмим̣ вихаарз убаж̇жхааяо вихарад̇и, сажз со вихааро углаабо ход̇и, сажз уссахад̇и, гзнажи г̇злан̃н̃зна анабхибхууд̇о ход̇и, сод̇хзд̇аб̣б̣о. аг̇илаанзна хи сад̣̇д̇хивихааригзна садтивассзнаби саб̣б̣ам̣ убаж̇жхааяавад̇д̇ам̣ гаад̇аб̣б̣ам̣, анаад̣̇арзна агаронд̇асса вад̇д̇абхзд̣̇з д̣̇уггадам̣, на-гаарабадисам̣яуд̇д̇зсу бана бад̣̇зсу г̇илаанассаби бадигкид̇д̇агирияам̣ гаронд̇асса д̣̇уггадамзва. вихаарам̣ сод̇хзнд̇зна батамам̣ бад̇д̇ажийварам̣ нийхарид̇ваа згаманд̇ам̣ нигкибид̇аб̣б̣ам̣, нисийд̣̇анабажжад̇т̇аран̣ам̣ нийхарид̇ваа згаманд̇ам̣ нигкибид̇аб̣б̣ам̣, бхисиб̣имб̣оханам̣ нийхарид̇ваа згаманд̇ам̣ нигкибид̇аб̣б̣ам̣, ман̃жо нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ нийхарид̇ваа згаманд̇ам̣ нигкибид̇аб̣б̣о, бийтам̣ нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ нийхарид̇ваа згаманд̇ам̣ нигкибид̇аб̣б̣ам̣, ман̃жабадибаад̣̇агаа нийхарид̇ваа згаманд̇ам̣ нигкибид̇аб̣б̣аа, кзл̣амаллаго нийхарид̇ваа згаманд̇ам̣ нигкибид̇аб̣б̣о, абассзнапалагам̣ нийхарид̇ваа згаманд̇ам̣ нигкибид̇аб̣б̣ам̣. бхуумад̇т̇аран̣ам̣ яат̇аабан̃н̃ад̇д̇ам̣ саллагкзд̇ваа нийхарид̇ваа згаманд̇ам̣ нигкибид̇аб̣б̣ам̣. сажз вихаарз санд̇аанагам̣ ход̇и, уллогаа батамам̣ охаарзд̇аб̣б̣ам̣, аалогасанд̇хиган̣н̣абхааг̇аа бамаж̇ж̇ид̇аб̣б̣аа. сажз г̇зругабаригаммагад̇аа бхид̇д̇и ган̣н̣агид̇аа ход̇и, жол̣агам̣ д̇змзд̇ваа бийл̣зд̇ваа бамаж̇ж̇ид̇аб̣б̣аа. сажз гаал̣аван̣н̣агад̇аа бхууми ган̣н̣агид̇аа ход̇и, жол̣агам̣ д̇змзд̇ваа бийл̣зд̇ваа бамаж̇ж̇ид̇аб̣б̣аа. сажз агад̇аа ход̇и бхууми, уд̣̇агзна барибпосид̇ваа барибпосид̇ваа саммаж̇ж̇ид̇аб̣б̣аа ‘‘маа вихааро раж̇зна ухан̃н̃ий’’д̇и, сан̇гаарам̣ вижинид̇ваа згаманд̇ам̣ чад̣д̣зд̇аб̣б̣ам̣.
Yasmiṃ vihāre upajjhāyo viharati, sace so vihāro uklāpo hoti, sace ussahati, kenaci gelaññena anabhibhūto hoti, sodhetabbo. Agilānena hi saddhivihārikena saṭṭhivassenapi sabbaṃ upajjhāyavattaṃ kātabbaṃ, anādarena akarontassa vattabhede dukkaṭaṃ, na-kārapaṭisaṃyuttesu pana padesu gilānassapi paṭikkhittakiriyaṃ karontassa dukkaṭameva. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ, nisīdanapaccattharaṇaṃ nīharitvā ekamantaṃ nikkhipitabbaṃ, bhisibimbohanaṃ nīharitvā ekamantaṃ nikkhipitabbaṃ, mañco nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbo, pīṭhaṃ nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbaṃ, mañcapaṭipādakā nīharitvā ekamantaṃ nikkhipitabbā, kheḷamallako nīharitvā ekamantaṃ nikkhipitabbo, apassenaphalakaṃ nīharitvā ekamantaṃ nikkhipitabbaṃ. Bhūmattharaṇaṃ yathāpaññattaṃ sallakkhetvā nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā paripphositvā sammajjitabbā ‘‘mā vihāro rajena uhaññī’’ti, saṅkāraṃ vicinitvā ekamantaṃ chaḍḍetabbaṃ.
бхуумад̇т̇аран̣ам̣ од̇аабзд̇ваа сод̇хзд̇ваа бабподзд̇ваа абхихарид̇ваа яат̇аа батамам̣ бан̃н̃ад̇д̇ам̣ ахоси, д̇ат̇зва бан̃н̃абзд̇аб̣б̣ам̣. зд̇ад̣̇ад̇т̇амзва хи ‘‘яат̇аабан̃н̃ад̇д̇ам̣ саллагкзд̇ваа нийхарид̇ваа згаманд̇ам̣ нигкибид̇аб̣б̣а’’нд̇и вуд̇д̇ам̣. сажз бана батамам̣ аж̇аананд̇зна гзнажи бан̃н̃ад̇д̇ам̣ ахоси, саманд̇ад̇о бхид̇д̇им̣ д̣̇ван̇г̇уламад̇д̇зна ваа д̇иван̇г̇уламад̇д̇зна ваа можзд̇ваа бан̃н̃абзд̇аб̣б̣ам̣. ид̣̇ан̃хзд̇т̇а бан̃н̃аабанавад̇д̇ам̣ – сажз гадасаараго ход̇и ад̇имаханд̇о жа, чинд̣̇ид̇ваа годим̣ нивад̇д̇зд̇ваа б̣анд̇хид̇ваа бан̃н̃абзд̇аб̣б̣о. сажз годим̣ нивад̇д̇зд̇ваа б̣анд̇хид̇ум̣ на ж̇аанаад̇и, на чинд̣̇ид̇аб̣б̣о. ман̃жабадибаад̣̇агаа од̇аабзд̇ваа бамаж̇ж̇ид̇ваа яат̇аатаанз табзд̇аб̣б̣аа, ман̃жо од̇аабзд̇ваа сод̇хзд̇ваа бабподзд̇ваа нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣о, бийтам̣ од̇аабзд̇ваа сод̇хзд̇ваа бабподзд̇ваа нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, бхисиб̣имб̣оханам̣ од̇аабзд̇ваа сод̇хзд̇ваа бабподзд̇ваа ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, нисийд̣̇анабажжад̇т̇аран̣ам̣ од̇аабзд̇ваа сод̇хзд̇ваа бабподзд̇ваа ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, кзл̣амаллаго од̇аабзд̇ваа бамаж̇ж̇ид̇ваа ад̇ихарид̇ваа яат̇аатаанз табзд̇аб̣б̣о, абассзнапалагам̣ од̇аабзд̇ваа бамаж̇ж̇ид̇ваа ад̇ихарид̇ваа яат̇аатаанз табзд̇аб̣б̣ам̣. бад̇д̇ажийварам̣ нигкибид̇аб̣б̣ам̣, бад̇д̇ам̣ нигкибанд̇зна згзна хад̇т̇зна бад̇д̇ам̣ г̇ахзд̇ваа згзна хад̇т̇зна хздтааман̃жам̣ ваа хздтаабийтам̣ ваа бараамасид̇ваа бад̇д̇о нигкибид̇аб̣б̣о, на жа ананд̇арахид̇ааяа бхуумияаа бад̇д̇о нигкибид̇аб̣б̣о. жийварам̣ нигкибанд̇зна згзна хад̇т̇зна жийварам̣ г̇ахзд̇ваа згзна хад̇т̇зна жийваравам̣сам̣ ваа жийварараж̇ж̇ум̣ ваа бамаж̇ж̇ид̇ваа баарад̇о анд̇ам̣, орад̇о бхог̇ам̣ гад̇ваа жийварам̣ нигкибид̇аб̣б̣ам̣.
Bhūmattharaṇaṃ otāpetvā sodhetvā papphoṭetvā abhiharitvā yathā paṭhamaṃ paññattaṃ ahosi, tatheva paññapetabbaṃ. Etadatthameva hi ‘‘yathāpaññattaṃ sallakkhetvā nīharitvā ekamantaṃ nikkhipitabba’’nti vuttaṃ. Sace pana paṭhamaṃ ajānantena kenaci paññattaṃ ahosi, samantato bhittiṃ dvaṅgulamattena vā tivaṅgulamattena vā mocetvā paññapetabbaṃ. Idañhettha paññāpanavattaṃ – sace kaṭasārako hoti atimahanto ca, chinditvā koṭiṃ nivattetvā bandhitvā paññapetabbo. Sace koṭiṃ nivattetvā bandhituṃ na jānāti, na chinditabbo. Mañcapaṭipādakā otāpetvā pamajjitvā yathāṭhāne ṭhapetabbā, mañco otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbo, pīṭhaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbaṃ, bhisibimbohanaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, nisīdanapaccattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, kheḷamallako otāpetvā pamajjitvā atiharitvā yathāṭhāne ṭhapetabbo, apassenaphalakaṃ otāpetvā pamajjitvā atiharitvā yathāṭhāne ṭhapetabbaṃ. Pattacīvaraṃ nikkhipitabbaṃ, pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ, orato bhogaṃ katvā cīvaraṃ nikkhipitabbaṃ.
сажз бурад̇т̇имаа сараж̇аа ваад̇аа вааяанд̇и, бурад̇т̇имаа ваад̇абаанаа т̇агзд̇аб̣б̣аа. сажз бажчимаа, уд̇д̇араа, д̣̇агкин̣аа сараж̇аа ваад̇аа вааяанд̇и, д̣̇агкин̣аа ваад̇абаанаа т̇агзд̇аб̣б̣аа. сажз сийд̇агаало ход̇и, д̣̇иваа ваад̇абаанаа виварид̇аб̣б̣аа, рад̇д̇им̣ т̇агзд̇аб̣б̣аа. сажз ун̣хагаало ход̇и, д̣̇иваа т̇агзд̇аб̣б̣аа, рад̇д̇им̣ виварид̇аб̣б̣аа.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā thaketabbā, rattiṃ vivaritabbā.
сажз углаабам̣ ход̇и, баривзн̣ам̣ саммаж̇ж̇ид̇аб̣б̣ам̣, годтаго саммаж̇ж̇ид̇аб̣б̣о, убадтаанасаалаа саммаж̇ж̇ид̇аб̣б̣аа, аг̇г̇исаалаа саммаж̇ж̇ид̇аб̣б̣аа, важжагуди саммаж̇ж̇ид̇аб̣б̣аа, баанийяам̣ барибхож̇анийяам̣ убадтабзд̇аб̣б̣ам̣, аажаманагумбхияаа уд̣̇агам̣ аасин̃жид̇аб̣б̣ам̣.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā, aggisālā sammajjitabbā, vaccakuṭi sammajjitabbā, pānīyaṃ paribhojanīyaṃ upaṭṭhapetabbaṃ, ācamanakumbhiyā udakaṃ āsiñcitabbaṃ.
сажз убаж̇жхааяасса анабхирад̇и уббаннаа ход̇и, сад̣̇д̇хивихааригзна ан̃н̃ад̇т̇а нзд̇аб̣б̣о, ан̃н̃о ваа бхигку вад̇д̇аб̣б̣о ‘‘т̇зрам̣ г̇ахзд̇ваа ан̃н̃ад̇т̇а г̇ажчаа’’д̇и, д̇хаммагат̇аа ваасса гаад̇аб̣б̣аа. сажз убаж̇жхааяасса гуггужжам̣ уббаннам̣ ход̇и, сад̣̇д̇хивихааригзна винод̣̇зд̇аб̣б̣ам̣, ан̃н̃зна ваа винод̣̇аабзд̇аб̣б̣ам̣ д̇хаммагат̇аа ваасса гаад̇аб̣б̣аа. сажз убаж̇жхааяасса д̣̇идтиг̇ад̇ам̣ уббаннам̣ ход̇и, сад̣̇д̇хивихааригзна виссаж̇ж̇зд̇аб̣б̣ам̣, ан̃н̃о ваа вад̇д̇аб̣б̣о ‘‘т̇зрам̣ д̣̇идтиг̇ад̇ам̣ виссаж̇ж̇аабзхий’’д̇и, д̇хаммагат̇аа ваасса гаад̇аб̣б̣аа. сажз убаж̇жхааяо г̇аруд̇хаммам̣ аж̇жхаабанно ход̇и бариваасаарахо, сад̣̇д̇хивихааригзна уссуггам̣ гаад̇аб̣б̣ам̣, бариваасад̣̇аанад̇т̇ам̣ со со бхигку убасан̇гамид̇ваа яаажид̇аб̣б̣о. сажз ад̇д̇анаа бадиб̣ало ход̇и, ад̇д̇анаава д̣̇аад̇аб̣б̣о. но жз бадиб̣ало ход̇и, ан̃н̃зна д̣̇аабзд̇аб̣б̣о. сажз убаж̇жхааяо муулааяабадигассанаарахо ход̇и маанад̇д̇аарахо аб̣бхаанаарахо ваа, вуд̇д̇анаязнзва уссуггам̣ гаад̇аб̣б̣ам̣. сажз сан̇гхо убаж̇жхааяасса гаммам̣ гад̇д̇угаамо ход̇и д̇аж̇ж̇анийяам̣ ваа нияассам̣ ваа баб̣б̣ааж̇анийяам̣ ваа бадисааран̣ийяам̣ ваа угкзбанийяам̣ ваа, сад̣̇д̇хивихааригзна уссуггам̣ гаад̇аб̣б̣ам̣ ‘‘гзна ну ко убааязна сан̇гхо убаж̇жхааяасса гаммам̣ на гарзяяа, лахугааяа ваа барин̣аамзяяаа’’д̇и. сад̣̇д̇хивихааригзна хи ‘‘убаж̇жхааяасса угкзбанийяагаммам̣ гад̇д̇угаамо сан̇гхо’’д̇и н̃ад̇ваа згамзгам̣ бхигкум̣ убасан̇гамид̇ваа ‘‘маа, бханд̇з, амхаагам̣ убаж̇жхааяасса гаммам̣ гарид̇т̇аа’’д̇и яаажид̇аб̣б̣аа. сажз гаронд̇иязва, ‘‘д̇аж̇ж̇анийяам̣ ваа нияассам̣ ваа лахугагаммам̣ гарот̇аа’’д̇и яаажид̇аб̣б̣аа. сажз гаронд̇иязва, ат̇а убаж̇жхааяо ‘‘саммаа вад̇д̇ат̇а, бханд̇з’’д̇и яаажид̇аб̣б̣о. ид̇и д̇ам̣ саммаа вад̇д̇аабзд̇ваа ‘‘бадиббассамбхзт̇а, бханд̇з, гамма’’нд̇и бхигкуу яаажид̇аб̣б̣аа.
Sace upajjhāyassa anabhirati uppannā hoti, saddhivihārikena aññattha netabbo, añño vā bhikkhu vattabbo ‘‘theraṃ gahetvā aññattha gacchā’’ti, dhammakathā vāssa kātabbā. Sace upajjhāyassa kukkuccaṃ uppannaṃ hoti, saddhivihārikena vinodetabbaṃ, aññena vā vinodāpetabbaṃ dhammakathā vāssa kātabbā. Sace upajjhāyassa diṭṭhigataṃ uppannaṃ hoti, saddhivihārikena vissajjetabbaṃ, añño vā vattabbo ‘‘theraṃ diṭṭhigataṃ vissajjāpehī’’ti, dhammakathā vāssa kātabbā. Sace upajjhāyo garudhammaṃ ajjhāpanno hoti parivāsāraho, saddhivihārikena ussukkaṃ kātabbaṃ, parivāsadānatthaṃ so so bhikkhu upasaṅkamitvā yācitabbo. Sace attanā paṭibalo hoti, attanāva dātabbo. No ce paṭibalo hoti, aññena dāpetabbo. Sace upajjhāyo mūlāyapaṭikassanāraho hoti mānattāraho abbhānāraho vā, vuttanayeneva ussukkaṃ kātabbaṃ. Sace saṅgho upajjhāyassa kammaṃ kattukāmo hoti tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, saddhivihārikena ussukkaṃ kātabbaṃ ‘‘kena nu kho upāyena saṅgho upajjhāyassa kammaṃ na kareyya, lahukāya vā pariṇāmeyyā’’ti. Saddhivihārikena hi ‘‘upajjhāyassa ukkhepanīyakammaṃ kattukāmo saṅgho’’ti ñatvā ekamekaṃ bhikkhuṃ upasaṅkamitvā ‘‘mā, bhante, amhākaṃ upajjhāyassa kammaṃ karitthā’’ti yācitabbā. Sace karontiyeva, ‘‘tajjanīyaṃ vā niyassaṃ vā lahukakammaṃ karothā’’ti yācitabbā. Sace karontiyeva, atha upajjhāyo ‘‘sammā vattatha, bhante’’ti yācitabbo. Iti taṃ sammā vattāpetvā ‘‘paṭippassambhetha, bhante, kamma’’nti bhikkhū yācitabbā.
сажз убаж̇жхааяасса жийварам̣ д̇ховид̇аб̣б̣ам̣ ход̇и, сад̣̇д̇хивихааригзна д̇ховид̇аб̣б̣ам̣, уссуггам̣ ваа гаад̇аб̣б̣ам̣ ‘‘гинд̇и ну ко убаж̇жхааяасса жийварам̣ д̇ховиязт̇аа’’д̇и. сажз убаж̇жхааяасса жийварам̣ гаад̇аб̣б̣ам̣ ход̇и, раж̇анам̣ ваа бажид̇аб̣б̣ам̣, жийварам̣ ваа раж̇зд̇аб̣б̣ам̣ ход̇и, сад̣̇д̇хивихааригзна саб̣б̣ам̣ гаад̇аб̣б̣ам̣, уссаггам̣ ваа гаад̇аб̣б̣ам̣ ‘‘гинд̇и ну ко убаж̇жхааяасса жийварам̣ раж̇иязт̇аа’’д̇и. жийварам̣ раж̇анд̇зна саад̇хугам̣ сам̣баривад̇д̇зд̇ваа раж̇зд̇аб̣б̣ам̣, на жа ажчиннз т̇звз баггамид̇аб̣б̣ам̣.
Sace upajjhāyassa cīvaraṃ dhovitabbaṃ hoti, saddhivihārikena dhovitabbaṃ, ussukkaṃ vā kātabbaṃ ‘‘kinti nu kho upajjhāyassa cīvaraṃ dhoviyethā’’ti. Sace upajjhāyassa cīvaraṃ kātabbaṃ hoti, rajanaṃ vā pacitabbaṃ, cīvaraṃ vā rajetabbaṃ hoti, saddhivihārikena sabbaṃ kātabbaṃ, ussakkaṃ vā kātabbaṃ ‘‘kinti nu kho upajjhāyassa cīvaraṃ rajiyethā’’ti. Cīvaraṃ rajantena sādhukaṃ saṃparivattetvā rajetabbaṃ, na ca acchinne theve pakkamitabbaṃ.
на убаж̇жхааяам̣ анаабужчаа згажжасса бад̇д̇о д̣̇аад̇аб̣б̣о, на згажжасса бад̇д̇о бадиг̇г̇ахзд̇аб̣б̣о, на згажжасса жийварам̣ д̣̇аад̇аб̣б̣ам̣, на згажжасса жийварам̣ бадиг̇г̇ахзд̇аб̣б̣ам̣, на згажжасса баригкааро д̣̇аад̇аб̣б̣о, на згажжасса баригкааро бадиг̇г̇ахзд̇аб̣б̣о, на згажжасса гзсаа чзд̣̇зд̇аб̣б̣аа, на згажжзна гзсаа чзд̣̇аабзд̇аб̣б̣аа , на згажжасса баригаммам̣ гаад̇аб̣б̣ам̣, на згажжзна баригаммам̣ гаараабзд̇аб̣б̣ам̣, на згажжасса взяяааважжо гаад̇аб̣б̣о, на згажжзна взяяааважжо гаараабзд̇аб̣б̣о, на згажжасса бажчаасаман̣зна ход̇аб̣б̣ам̣, на згажжо бажчаасаман̣о аад̣̇аад̇аб̣б̣о, на згажжасса бин̣д̣абаад̇о нийхарид̇аб̣б̣о, на згажжзна бин̣д̣абаад̇о нийхараабзд̇аб̣б̣о, на убаж̇жхааяам̣ анаабужчаа г̇аамо бависид̇аб̣б̣о, бин̣д̣ааяа ваа ан̃н̃зна ваа гаран̣ийязна бависид̇угаамзна аабужчид̇ваава бависид̇аб̣б̣о. сажз убаж̇жхааяо гаалассзва вудтааяа д̣̇уурам̣ бхигкаажаарам̣ г̇анд̇угаамо ход̇и, ‘‘д̣̇ахараа бин̣д̣ааяа бависанд̇уу’’д̇и вад̇ваа г̇анд̇аб̣б̣ам̣. авад̇ваа г̇ад̇з баривзн̣ам̣ г̇анд̇ваа убаж̇жхааяам̣ абассанд̇зна г̇аамам̣ бависид̇ум̣ ваддад̇и. сажз г̇аамам̣ бависанд̇оби бассад̇и, д̣̇идтадтаанад̇о бадтааяа аабужчид̇ум̣язва ваддад̇и. на убаж̇жхааяам̣ анаабужчаа ваасад̇т̇ааяа ваа асубхад̣̇ассанад̇т̇ааяа ваа сусаанам̣ г̇анд̇аб̣б̣ам̣, на д̣̇исаа баггамид̇аб̣б̣аа, баггамид̇угаамзна бана гаммам̣ аажигкид̇ваа яаавад̇ад̇ияам̣ яаажид̇аб̣б̣о. сажз ануж̇аанаад̇и, саад̇ху, но жз ануж̇аанаад̇и, д̇ам̣ ниссааяа васад̇о жасса уд̣̇д̣̇зсо ваа барибужчаа ваа гаммадтаанам̣ ваа на самбаж̇ж̇ад̇и, убаж̇жхааяо б̣аало ход̇и аб̣яад̇д̇о, гзвалам̣ ад̇д̇ано санд̇игз васаабзд̇угаамад̇ааяа зва г̇анд̇ум̣ на д̣̇зд̇и, зваруубз ниваарзнд̇зби г̇анд̇ум̣ ваддад̇и. сажз убаж̇жхааяо г̇илаано ход̇и, яааваж̇ийвам̣ убадтаабзд̇аб̣б̣о, вудтаанамасса ааг̇амзд̇аб̣б̣ам̣, на гад̇т̇ажи г̇анд̇аб̣б̣ам̣. сажз ан̃н̃о бхигку убадтааго ад̇т̇и, бхзсаж̇ж̇ам̣ бариязсид̇ваа д̇асса хад̇т̇з д̣̇ад̇ваа ‘‘бханд̇з, аяам̣ убадтахиссад̇ий’’д̇и вад̇ваа г̇анд̇аб̣б̣ам̣. ид̣̇ам̣ д̇аава убаж̇жхааяавад̇д̇ам̣.
Na upajjhāyaṃ anāpucchā ekaccassa patto dātabbo, na ekaccassa patto paṭiggahetabbo, na ekaccassa cīvaraṃ dātabbaṃ, na ekaccassa cīvaraṃ paṭiggahetabbaṃ, na ekaccassa parikkhāro dātabbo, na ekaccassa parikkhāro paṭiggahetabbo, na ekaccassa kesā chedetabbā, na ekaccena kesā chedāpetabbā , na ekaccassa parikammaṃ kātabbaṃ, na ekaccena parikammaṃ kārāpetabbaṃ, na ekaccassa veyyāvacco kātabbo, na ekaccena veyyāvacco kārāpetabbo, na ekaccassa pacchāsamaṇena hotabbaṃ, na ekacco pacchāsamaṇo ādātabbo, na ekaccassa piṇḍapāto nīharitabbo, na ekaccena piṇḍapāto nīharāpetabbo, na upajjhāyaṃ anāpucchā gāmo pavisitabbo, piṇḍāya vā aññena vā karaṇīyena pavisitukāmena āpucchitvāva pavisitabbo. Sace upajjhāyo kālasseva vuṭṭhāya dūraṃ bhikkhācāraṃ gantukāmo hoti, ‘‘daharā piṇḍāya pavisantū’’ti vatvā gantabbaṃ. Avatvā gate pariveṇaṃ gantvā upajjhāyaṃ apassantena gāmaṃ pavisituṃ vaṭṭati. Sace gāmaṃ pavisantopi passati, diṭṭhaṭṭhānato paṭṭhāya āpucchituṃyeva vaṭṭati. Na upajjhāyaṃ anāpucchā vāsatthāya vā asubhadassanatthāya vā susānaṃ gantabbaṃ, na disā pakkamitabbā, pakkamitukāmena pana kammaṃ ācikkhitvā yāvatatiyaṃ yācitabbo. Sace anujānāti, sādhu, no ce anujānāti, taṃ nissāya vasato cassa uddeso vā paripucchā vā kammaṭṭhānaṃ vā na sampajjati, upajjhāyo bālo hoti abyatto, kevalaṃ attano santike vasāpetukāmatāya eva gantuṃ na deti, evarūpe nivārentepi gantuṃ vaṭṭati. Sace upajjhāyo gilāno hoti, yāvajīvaṃ upaṭṭhāpetabbo, vuṭṭhānamassa āgametabbaṃ, na katthaci gantabbaṃ. Sace añño bhikkhu upaṭṭhāko atthi, bhesajjaṃ pariyesitvā tassa hatthe datvā ‘‘bhante, ayaṃ upaṭṭhahissatī’’ti vatvā gantabbaṃ. Idaṃ tāva upajjhāyavattaṃ.
184. ид̣̇амзва жа анд̇зваасигзна аажарияасса гад̇д̇аб̣б̣ад̇д̇аа аажарияавад̇д̇анд̇и вужжад̇и. наамамад̇д̇амзва хзд̇т̇а наанам̣. д̇ад̇т̇а яаава жийварараж̇анам̣, д̇аава вад̇д̇з агарияамаанз убаж̇жхааяасса аажарияасса жа барихаани ход̇и, д̇асмаа д̇ам̣ агаронд̇асса ниссаяамуд̇д̇агассаби амуд̇д̇агассаби аабад̇д̇иязва, згажжасса бад̇д̇ад̣̇аанад̇о бадтааяа амуд̇д̇аниссаяассзва аабад̇д̇и. убаж̇жхааяз аажарияз ваа вад̇д̇ам̣ саад̣̇ияанд̇з сад̣̇д̇хивихааригаа анд̇зваасигаа жа б̣ахугааби хонд̇у, саб̣б̣зсам̣ аабад̇д̇и. сажз убаж̇жхааяо аажарияо ваа ‘‘маяхам̣ убадтааго ад̇т̇и, д̇умхз ад̇д̇ано саж̇жхааяаманасигаараад̣̇ийсу яог̇ам̣ гарот̇аа’’д̇и вад̣̇ад̇и, сад̣̇д̇хивихааригаад̣̇ийнам̣ анаабад̇д̇и. убаж̇жхааяо ваа аажарияо ваа сажз саад̣̇ияанам̣ ваа асаад̣̇ияанам̣ ваа на ж̇аанаад̇и, б̣аало ход̇и, сад̣̇д̇хивихааригаад̣̇аяо б̣ахуу, д̇зсу зго вад̇д̇асамбанно бхигку ‘‘убаж̇жхааяасса ваа аажарияасса ваа гижжам̣ ахам̣ гариссаами, д̇умхз аббоссуггаа вихарат̇аа’’д̇и зван̃жз ад̇д̇ано бхаарам̣ гад̇ваа ид̇арз виссаж̇ж̇зд̇и, д̇асса бхаарагаран̣ад̇о бадтааяа д̇зсам̣ анаабад̇д̇и. зд̇т̇а анд̇зваасигзсу бана ниссаяанд̇зваасигзна яаава аажарияам̣ ниссааяа васад̇и, д̇аава саб̣б̣ам̣ аажарияавад̇д̇ам̣ гаад̇аб̣б̣ам̣. баб̣б̣аж̇ж̇аубасамбад̣̇ад̇хамманд̇зваасигзхи бана ниссаяамуд̇д̇агзхиби аад̣̇ид̇о бадтааяа яаава жийварараж̇анам̣, д̇аава вад̇д̇ам̣ гаад̇аб̣б̣ам̣. анаабужчид̇ваа бад̇д̇ад̣̇аанаад̣̇имхи бана зд̇зсам̣ анаабад̇д̇и.
184. Idameva ca antevāsikena ācariyassa kattabbattā ācariyavattanti vuccati. Nāmamattameva hettha nānaṃ. Tattha yāva cīvararajanaṃ, tāva vatte akariyamāne upajjhāyassa ācariyassa ca parihāni hoti, tasmā taṃ akarontassa nissayamuttakassapi amuttakassapi āpattiyeva, ekaccassa pattadānato paṭṭhāya amuttanissayasseva āpatti. Upajjhāye ācariye vā vattaṃ sādiyante saddhivihārikā antevāsikā ca bahukāpi hontu, sabbesaṃ āpatti. Sace upajjhāyo ācariyo vā ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikādīnaṃ anāpatti. Upajjhāyo vā ācariyo vā sace sādiyanaṃ vā asādiyanaṃ vā na jānāti, bālo hoti, saddhivihārikādayo bahū, tesu eko vattasampanno bhikkhu ‘‘upajjhāyassa vā ācariyassa vā kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti. Ettha antevāsikesu pana nissayantevāsikena yāva ācariyaṃ nissāya vasati, tāva sabbaṃ ācariyavattaṃ kātabbaṃ. Pabbajjaupasampadadhammantevāsikehi pana nissayamuttakehipi ādito paṭṭhāya yāva cīvararajanaṃ, tāva vattaṃ kātabbaṃ. Anāpucchitvā pattadānādimhi pana etesaṃ anāpatti.
зд̇зсу баб̣б̣аж̇ж̇анд̇зваасиго жа убасамбад̣̇анд̇зваасиго жа аажарияасса яааваж̇ийвам̣ бхаараа. ниссаяанд̇зваасиго жа д̇хамманд̇зваасиго жа яаава самийбз васанд̇и, д̇аава аажарияубаж̇жхааязхиби анд̇зваасигасад̣̇д̇хивихааригаа сан̇г̇ахзд̇аб̣б̣аа ануг̇г̇ахзд̇аб̣б̣аа уд̣̇д̣̇зсзна барибужчааяа оваад̣̇зна анусаасанияаа. сажз анд̇зваасигасад̣̇д̇хивихааригаанам̣ бад̇д̇о ваа жийварам̣ ваа ан̃н̃о ваа гожи баригкааро над̇т̇и, ад̇д̇ано ад̇ирзгабад̇д̇ажийварам̣ ад̇ирзгабаригкааро ваа ад̇т̇и, д̣̇аад̇аб̣б̣ам̣. но жз, д̇хаммиязна наязна бариязсанад̇т̇ааяа уссуггам̣ гаад̇аб̣б̣ам̣. сажз анд̇зваасигасад̣̇д̇хивихааригаа г̇илаанаа хонд̇и, убаж̇жхааяавад̇д̇з вуд̇д̇анаязна д̣̇анд̇агадтад̣̇аанам̣ аад̣̇им̣ гад̇ваа аажаманагумбхияаа уд̣̇агасин̃жанабарияосаанам̣ саб̣б̣ам̣ вад̇д̇ам̣ гаад̇аб̣б̣амзва, агаронд̇аанам̣ аабад̇д̇и. д̇асмаа аажарияубаж̇жхааязхиби анд̇зваасигасад̣̇д̇хивихааригзсу саммаа вад̇д̇ид̇аб̣б̣ам̣. аажарияубаж̇жхааяаад̣̇ийсу хи яо яо на саммаа вад̇д̇ад̇и, д̇асса д̇асса аабад̇д̇и. убаж̇жхааяаад̣̇ивад̇д̇агат̇аа.
Etesu pabbajjantevāsiko ca upasampadantevāsiko ca ācariyassa yāvajīvaṃ bhārā. Nissayantevāsiko ca dhammantevāsiko ca yāva samīpe vasanti, tāva ācariyupajjhāyehipi antevāsikasaddhivihārikā saṅgahetabbā anuggahetabbā uddesena paripucchāya ovādena anusāsaniyā. Sace antevāsikasaddhivihārikānaṃ patto vā cīvaraṃ vā añño vā koci parikkhāro natthi, attano atirekapattacīvaraṃ atirekaparikkhāro vā atthi, dātabbaṃ. No ce, dhammiyena nayena pariyesanatthāya ussukkaṃ kātabbaṃ. Sace antevāsikasaddhivihārikā gilānā honti, upajjhāyavatte vuttanayena dantakaṭṭhadānaṃ ādiṃ katvā ācamanakumbhiyā udakasiñcanapariyosānaṃ sabbaṃ vattaṃ kātabbameva, akarontānaṃ āpatti. Tasmā ācariyupajjhāyehipi antevāsikasaddhivihārikesu sammā vattitabbaṃ. Ācariyupajjhāyādīsu hi yo yo na sammā vattati, tassa tassa āpatti. Upajjhāyādivattakathā.
185. ид̣̇аани ааг̇анд̇угавад̇д̇аад̣̇ийни взд̣̇ид̇аб̣б̣аани. ааг̇анд̇угзна бхигкунаа убажаарасиймаасамийбам̣ г̇анд̇ваа убааханаа омун̃жид̇ваа нийжам̣ гад̇ваа бабподзд̇ваа убааханад̣̇ан̣д̣агзна г̇ахзд̇ваа чад̇д̇ам̣ убанаамзд̇ваа сийсам̣ виварид̇ваа сийсз жийварам̣ канд̇хз гарид̇ваа саад̇хугам̣ ад̇арамаанзна аараамо бависид̇аб̣б̣о, аараамам̣ бависанд̇зна саллагкзд̇аб̣б̣ам̣ ‘‘гад̇т̇а ааваасигаа бхигкуу саннибад̇анд̇ий’’д̇и. яад̇т̇а ааваасигаа бхигкуу саннибад̇анд̇и убадтаанасаалааяа ваа ман̣д̣абз ваа ругкамуулз ваа, д̇ад̇т̇а г̇анд̇ваа згаманд̇ам̣ бад̇д̇о нигкибид̇аб̣б̣о, згаманд̇ам̣ жийварам̣ нигкибид̇аб̣б̣ам̣, бад̇ируубам̣ аасанам̣ г̇ахзд̇ваа нисийд̣̇ид̇аб̣б̣ам̣, баанийяам̣ бужчид̇аб̣б̣ам̣, барибхож̇анийяам̣ бужчид̇аб̣б̣ам̣ ‘‘гад̇амам̣ баанийяам̣, гад̇амам̣ барибхож̇анийяа’’нд̇и. сажз баанийязна ад̇т̇о ход̇и, баанийяам̣ г̇ахзд̇ваа баад̇аб̣б̣ам̣. сажз барибхож̇анийязна ад̇т̇о ход̇и, барибхож̇анийяам̣ г̇ахзд̇ваа баад̣̇аа д̇ховид̇аб̣б̣аа. баад̣̇з д̇хованд̇зна згзна хад̇т̇зна уд̣̇агам̣ аасин̃жид̇аб̣б̣ам̣, згзна хад̇т̇зна баад̣̇аа д̇ховид̇аб̣б̣аа, на д̇знзва хад̇т̇зна уд̣̇агам̣ аасин̃жид̇аб̣б̣ам̣, на д̇знзва хад̇т̇зна баад̣̇аа д̇ховид̇аб̣б̣аа, убааханабун̃чанажол̣агам̣ бун̃чид̇ваа убааханаа бун̃чид̇аб̣б̣аа, убааханаа бун̃чанд̇зна батамам̣ сугкзна жол̣агзна бун̃чид̇аб̣б̣аа, бажчаа аллзна, убааханабун̃чанажол̣агам̣ д̇ховид̇ваа згаманд̇ам̣ бад̇т̇арид̇аб̣б̣ам̣.
185. Idāni āgantukavattādīni veditabbāni. Āgantukena bhikkhunā upacārasīmāsamīpaṃ gantvā upāhanā omuñcitvā nīcaṃ katvā papphoṭetvā upāhanadaṇḍakena gahetvā chattaṃ upanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabbo, ārāmaṃ pavisantena sallakkhetabbaṃ ‘‘kattha āvāsikā bhikkhū sannipatantī’’ti. Yattha āvāsikā bhikkhū sannipatanti upaṭṭhānasālāya vā maṇḍape vā rukkhamūle vā, tattha gantvā ekamantaṃ patto nikkhipitabbo, ekamantaṃ cīvaraṃ nikkhipitabbaṃ, patirūpaṃ āsanaṃ gahetvā nisīditabbaṃ, pānīyaṃ pucchitabbaṃ, paribhojanīyaṃ pucchitabbaṃ ‘‘katamaṃ pānīyaṃ, katamaṃ paribhojanīya’’nti. Sace pānīyena attho hoti, pānīyaṃ gahetvā pātabbaṃ. Sace paribhojanīyena attho hoti, paribhojanīyaṃ gahetvā pādā dhovitabbā. Pāde dhovantena ekena hatthena udakaṃ āsiñcitabbaṃ, ekena hatthena pādā dhovitabbā, na teneva hatthena udakaṃ āsiñcitabbaṃ, na teneva hatthena pādā dhovitabbā, upāhanapuñchanacoḷakaṃ puñchitvā upāhanā puñchitabbā, upāhanā puñchantena paṭhamaṃ sukkhena coḷakena puñchitabbā, pacchā allena, upāhanapuñchanacoḷakaṃ dhovitvā ekamantaṃ pattharitabbaṃ.
сажз ааваасиго бхигку вуд̣дхо ход̇и, абхиваад̣̇зд̇аб̣б̣о. сажз наваго ход̇и, абхиваад̣̇аабзд̇аб̣б̣о. сзнаасанам̣ бужчид̇аб̣б̣ам̣ ‘‘гад̇амам̣ мз сзнаасанам̣ баабун̣аад̇ий’’д̇и, аж̇жхаавудтам̣ ваа анаж̇жхаавудтам̣ ваа бужчид̇аб̣б̣ам̣, ‘‘г̇ожараг̇аамо аасаннз, уд̣̇ааху д̣̇уурз, гаалассзва бин̣д̣ааяа жарид̇аб̣б̣ам̣, уд̣̇ааху д̣̇иваа’’д̇и звам̣ бхигкаажааро бужчид̇аб̣б̣о, аг̇ожаро бужчид̇аб̣б̣о, г̇ожаро бужчид̇аб̣б̣о. аг̇ожаро наама мижчаад̣̇идтигаанам̣ г̇аамо барижчиннабхигко ваа г̇аамо, яад̇т̇а згасса ваа д̣̇виннам̣ ваа бхигкаа д̣̇ийяад̇и, сзгкасаммахаани гулаани бужчид̇аб̣б̣аани, важжадтаанам̣ бужчид̇аб̣б̣ам̣, бассаавадтаанам̣ бужчид̇аб̣б̣ам̣, ‘‘гим̣ имиссаа богкаран̣ияаа баанийяам̣язва биванд̇и, нахаанаад̣̇ибарибхог̇амби гаронд̇ий’’д̇и звам̣ баанийяан̃жзва барибхож̇анийяан̃жа бужчид̇аб̣б̣ам̣, гад̇д̇арад̣̇ан̣д̣о бужчид̇аб̣б̣о, сан̇гхасса гад̇игасан̣таанам̣ бужчид̇аб̣б̣ам̣, гзсужи таанзсу ваал̣амиг̇аа ваа амануссаа ваа хонд̇и, д̇асмаа ‘‘гам̣ гаалам̣ бависид̇аб̣б̣ам̣, гам̣ гаалам̣ нигкамид̇аб̣б̣а’’нд̇и бужчид̇аб̣б̣ам̣. сажз вихааро анаж̇жхаавудто ход̇и, гаваадам̣ аагодзд̇ваа мухуд̇д̇ам̣ ааг̇амзд̇ваа гхадигам̣ уг̇гхаадзд̇ваа гаваадам̣ бан̣аамзд̇ваа б̣ахи тид̇зна ниллогзд̇аб̣б̣о.
Sace āvāsiko bhikkhu vuḍḍho hoti, abhivādetabbo. Sace navako hoti, abhivādāpetabbo. Senāsanaṃ pucchitabbaṃ ‘‘katamaṃ me senāsanaṃ pāpuṇātī’’ti, ajjhāvuṭṭhaṃ vā anajjhāvuṭṭhaṃ vā pucchitabbaṃ, ‘‘gocaragāmo āsanne, udāhu dūre, kālasseva piṇḍāya caritabbaṃ, udāhu divā’’ti evaṃ bhikkhācāro pucchitabbo, agocaro pucchitabbo, gocaro pucchitabbo. Agocaro nāma micchādiṭṭhikānaṃ gāmo paricchinnabhikkho vā gāmo, yattha ekassa vā dvinnaṃ vā bhikkhā dīyati, sekkhasammahāni kulāni pucchitabbāni, vaccaṭṭhānaṃ pucchitabbaṃ, passāvaṭṭhānaṃ pucchitabbaṃ, ‘‘kiṃ imissā pokkharaṇiyā pānīyaṃyeva pivanti, nahānādiparibhogampi karontī’’ti evaṃ pānīyañceva paribhojanīyañca pucchitabbaṃ, kattaradaṇḍo pucchitabbo, saṅghassa katikasaṇṭhānaṃ pucchitabbaṃ, kesuci ṭhānesu vāḷamigā vā amanussā vā honti, tasmā ‘‘kaṃ kālaṃ pavisitabbaṃ, kaṃ kālaṃ nikkhamitabba’’nti pucchitabbaṃ. Sace vihāro anajjhāvuṭṭho hoti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena nilloketabbo.
сажз со вихааро углаабо ход̇и, ман̃жз ваа ман̃жо ааробид̇о ход̇и, бийтз ваа бийтам̣ ааробид̇ам̣ ход̇и, сзнаасанам̣ убари бун̃ж̇ийгад̇ам̣ ход̇и, сажз саггод̇и, саб̣б̣о вихааро сод̇хзд̇аб̣б̣о, асаггонд̇зна ад̇д̇ано васаногаасо ж̇аг̇г̇ид̇аб̣б̣о. саб̣б̣ам̣ сод̇хзд̇ум̣ саггонд̇зна бана убаж̇жхааяавад̇д̇з вуд̇д̇анаязна бхуумад̇т̇аран̣аман̃жабийтаад̣̇ийни б̣ахи нийхарид̇ваа вихаарам̣ сод̇хзд̇ваа буна ад̇ихарид̇ваа яат̇аатаанз бан̃н̃абзд̇аб̣б̣аани.
Sace so vihāro uklāpo hoti, mañce vā mañco āropito hoti, pīṭhe vā pīṭhaṃ āropitaṃ hoti, senāsanaṃ upari puñjīkataṃ hoti, sace sakkoti, sabbo vihāro sodhetabbo, asakkontena attano vasanokāso jaggitabbo. Sabbaṃ sodhetuṃ sakkontena pana upajjhāyavatte vuttanayena bhūmattharaṇamañcapīṭhādīni bahi nīharitvā vihāraṃ sodhetvā puna atiharitvā yathāṭhāne paññapetabbāni.
сажз бурад̇т̇имаа сараж̇аа ваад̇аа вааяанд̇и, бурад̇т̇имаа ваад̇абаанаа т̇агзд̇аб̣б̣аа. сажз бажчимаа, уд̇д̇араа, д̣̇агкин̣аа сараж̇аа ваад̇аа вааяанд̇и, д̣̇агкин̣аа ваад̇абаанаа т̇агзд̇аб̣б̣аа. сажз сийд̇агаало ход̇и, д̣̇иваа ваад̇абаанаа виварид̇аб̣б̣аа, рад̇д̇им̣ т̇агзд̇аб̣б̣аа. сажз ун̣хагаало ход̇и, д̣̇иваа т̇агзд̇аб̣б̣аа, рад̇д̇им̣ виварид̇аб̣б̣аа.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā thaketabbā, rattiṃ vivaritabbā.
сажз углаабам̣ ход̇и, баривзн̣ам̣ саммаж̇ж̇ид̇аб̣б̣ам̣, годтаго саммаж̇ж̇ид̇аб̣б̣о, убадтаанасаалаа саммаж̇ж̇ид̇аб̣б̣аа , аг̇г̇исаалаа саммаж̇ж̇ид̇аб̣б̣аа, важжагуди саммаж̇ж̇ид̇аб̣б̣аа, баанийяам̣ барибхож̇анийяам̣ убадтаабзд̇аб̣б̣ам̣, аажаманагумбхияаа уд̣̇агам̣ аасин̃жид̇аб̣б̣ам̣. ид̣̇ам̣ ааг̇анд̇угавад̇д̇ам̣.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā , aggisālā sammajjitabbā, vaccakuṭi sammajjitabbā, pānīyaṃ paribhojanīyaṃ upaṭṭhāpetabbaṃ, ācamanakumbhiyā udakaṃ āsiñcitabbaṃ. Idaṃ āgantukavattaṃ.
186. ааваасигавад̇д̇з ааваасигзна бхигкунаа ааг̇анд̇угам̣ бхигкум̣ вуд̣дхад̇арам̣ д̣̇исваа аасанам̣ бан̃н̃абзд̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкибид̇аб̣б̣ам̣, бажжуг̇г̇анд̇ваа бад̇д̇ажийварам̣ бадиг̇г̇ахзд̇аб̣б̣ам̣, баанийязна бужчид̇аб̣б̣о, бужчанд̇зна бана сагим̣ аанийд̇ам̣ баанийяам̣ саб̣б̣ам̣ бивад̇и, ‘‘буна аанзмий’’д̇и бужчид̇аб̣б̣оязва. б̣ийж̇анзнаби б̣ийж̇ид̇аб̣б̣о, б̣ийж̇анд̇зна сагим̣ баад̣̇абидтияам̣ б̣ийж̇ид̇ваа сагим̣ маж̇жхз, сагим̣ сийсз б̣ийж̇ид̇аб̣б̣о, ‘‘алам̣ ход̇уу’’д̇и вуд̇д̇зна манд̣̇ад̇арам̣ б̣ийж̇ид̇аб̣б̣ам̣, буна ‘‘ала’’нд̇и вуд̇д̇зна д̇ад̇о манд̣̇ад̇арам̣ б̣ийж̇ид̇аб̣б̣ам̣, д̇ад̇ияаваарам̣ вуд̇д̇зна б̣ийж̇аний табзд̇аб̣б̣аа, баад̣̇аабисса д̇ховид̇аб̣б̣аа. сажз ад̇д̇ано д̇злам̣ ад̇т̇и, д̇злзна магкзд̇аб̣б̣аа. но жз ад̇т̇и, д̇асса санд̇агзна магкзд̇аб̣б̣аа. сажз уссахад̇и, убааханаа бун̃чид̇аб̣б̣аа. убааханаа бун̃чанд̇зна батамам̣ сугкзна жол̣зна бун̃чид̇аб̣б̣аа, бажчаа аллзна, убааханабун̃чанажол̣агам̣ д̇ховид̇ваа згаманд̇ам̣ виссаж̇ж̇зд̇аб̣б̣ам̣.
186.Āvāsikavatte āvāsikena bhikkhunā āgantukaṃ bhikkhuṃ vuḍḍhataraṃ disvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, pānīyena pucchitabbo, pucchantena pana sakiṃ ānītaṃ pānīyaṃ sabbaṃ pivati, ‘‘puna ānemī’’ti pucchitabboyeva. Bījanenapi bījitabbo, bījantena sakiṃ pādapiṭṭhiyaṃ bījitvā sakiṃ majjhe, sakiṃ sīse bījitabbo, ‘‘alaṃ hotū’’ti vuttena mandataraṃ bījitabbaṃ, puna ‘‘ala’’nti vuttena tato mandataraṃ bījitabbaṃ, tatiyavāraṃ vuttena bījanī ṭhapetabbā, pādāpissa dhovitabbā. Sace attano telaṃ atthi, telena makkhetabbā. No ce atthi, tassa santakena makkhetabbā. Sace ussahati, upāhanā puñchitabbā. Upāhanā puñchantena paṭhamaṃ sukkhena coḷena puñchitabbā, pacchā allena, upāhanapuñchanacoḷakaṃ dhovitvā ekamantaṃ vissajjetabbaṃ.
ааг̇анд̇уго бхигку абхиваад̣̇зд̇аб̣б̣о, сзнаасанам̣ бан̃н̃абзд̇аб̣б̣ам̣ ‘‘зд̇ам̣ сзнаасанам̣ баабун̣аад̇ий’’д̇и. аж̇жхаавудтам̣ ваа анаж̇жхаавудтам̣ ваа аажигкид̇аб̣б̣ам̣, г̇ожаро аажигкид̇аб̣б̣о, аг̇ожаро аажигкид̇аб̣б̣о, сзгкасаммад̇аани гулаани аажигкид̇аб̣б̣аани, важжадтаанам̣ аажигкид̇аб̣б̣ам̣, бассаавадтаанам̣ аажигкид̇аб̣б̣ам̣, баанийяам̣ аажигкид̇аб̣б̣ам̣, барибхож̇анийяам̣ аажигкид̇аб̣б̣ам̣, гад̇д̇арад̣̇ан̣д̣о аажигкид̇аб̣б̣о, сан̇гхасса гад̇игасан̣таанам̣ аажигкид̇аб̣б̣ам̣ ‘‘имам̣ гаалам̣ бависид̇аб̣б̣ам̣, имам̣ гаалам̣ нигкамид̇аб̣б̣а’’нд̇и.
Āgantuko bhikkhu abhivādetabbo, senāsanaṃ paññapetabbaṃ ‘‘etaṃ senāsanaṃ pāpuṇātī’’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ, gocaro ācikkhitabbo, agocaro ācikkhitabbo, sekkhasammatāni kulāni ācikkhitabbāni, vaccaṭṭhānaṃ ācikkhitabbaṃ, passāvaṭṭhānaṃ ācikkhitabbaṃ, pānīyaṃ ācikkhitabbaṃ, paribhojanīyaṃ ācikkhitabbaṃ, kattaradaṇḍo ācikkhitabbo, saṅghassa katikasaṇṭhānaṃ ācikkhitabbaṃ ‘‘imaṃ kālaṃ pavisitabbaṃ, imaṃ kālaṃ nikkhamitabba’’nti.
сажз ааг̇анд̇уго наваго ход̇и, нисиннагзнзва аажигкид̇аб̣б̣ам̣ ‘‘ад̇ра бад̇д̇ам̣ нигкибаахи, ад̇ра жийварам̣ нигкибаахи, ид̣̇ам̣ аасанам̣, нисийд̣̇аахий’’д̇и. баанийяам̣ аажигкид̇аб̣б̣ам̣, барибхож̇анийяам̣ аажигкид̇аб̣б̣ам̣, убааханабун̃чанажол̣агам̣ аажигкид̇аб̣б̣ам̣, ааг̇анд̇уго бхигку абхиваад̣̇аабзд̇аб̣б̣о, сзнаасанаад̣̇ийниби нисиннзнзва аажигкид̇аб̣б̣аани. вуд̣дхад̇арз бана ааг̇ад̇з аасанам̣ бан̃н̃абзд̇аб̣б̣анд̇и звамаад̣̇и саб̣б̣ам̣ жийварагаммам̣ ваа навагаммам̣ ваа табзд̇вааби гаад̇аб̣б̣ам̣. жзд̇ияан̇г̇ан̣ам̣ саммаж̇ж̇анд̇зна саммун̃ж̇аним̣ нигкибид̇ваа д̇асса вад̇д̇ам̣ гаад̇ум̣ аарабхид̇аб̣б̣ам̣. бан̣д̣ид̇о хи ааг̇анд̇уго ‘‘саммаж̇ж̇аахи д̇аава жзд̇ияан̇г̇ан̣а’’нд̇и вагкад̇и. г̇илаанасса бхзсаж̇ж̇ам̣ гаронд̇зна бана сажз наад̇иаад̇уро г̇илаано ход̇и, бхзсаж̇ж̇ам̣ агад̇ваа вад̇д̇амзва гаад̇аб̣б̣ам̣, махааг̇илаанасса бана бхзсаж̇ж̇амзва гаад̇аб̣б̣ам̣. бан̣д̣ид̇о хи ааг̇анд̇уго ‘‘гарохи д̇аава бхзсаж̇ж̇а’’нд̇и вагкад̇и. ид̣̇ам̣ ааваасигавад̇д̇ам̣.
Sace āgantuko navako hoti, nisinnakeneva ācikkhitabbaṃ ‘‘atra pattaṃ nikkhipāhi, atra cīvaraṃ nikkhipāhi, idaṃ āsanaṃ, nisīdāhī’’ti. Pānīyaṃ ācikkhitabbaṃ, paribhojanīyaṃ ācikkhitabbaṃ, upāhanapuñchanacoḷakaṃ ācikkhitabbaṃ, āgantuko bhikkhu abhivādāpetabbo, senāsanādīnipi nisinneneva ācikkhitabbāni. Vuḍḍhatare pana āgate āsanaṃ paññapetabbanti evamādi sabbaṃ cīvarakammaṃ vā navakammaṃ vā ṭhapetvāpi kātabbaṃ. Cetiyaṅgaṇaṃ sammajjantena sammuñjaniṃ nikkhipitvā tassa vattaṃ kātuṃ ārabhitabbaṃ. Paṇḍito hi āgantuko ‘‘sammajjāhi tāva cetiyaṅgaṇa’’nti vakkhati. Gilānassa bhesajjaṃ karontena pana sace nātiāturo gilāno hoti, bhesajjaṃ akatvā vattameva kātabbaṃ, mahāgilānassa pana bhesajjameva kātabbaṃ. Paṇḍito hi āgantuko ‘‘karohi tāva bhesajja’’nti vakkhati. Idaṃ āvāsikavattaṃ.
187. г̇амигавад̇д̇з г̇амигзна бхигкунаа ман̃жабийтаад̣̇ид̣̇аарубхан̣д̣ам̣ мад̇д̇игаабхан̣д̣амби раж̇анабхааж̇анаад̣̇и саб̣б̣ам̣ аг̇г̇исаалааяам̣ ваа ан̃н̃асмим̣ ваа г̇уд̇д̇адтаанз бадисаамзд̇ваа д̣̇ваараваад̇абаанам̣ т̇агзд̇ваа сзнаасанам̣ аабужчид̇ваа баггамид̇аб̣б̣ам̣. сажз бхигку на ход̇и, сааман̣зро аабужчид̇аб̣б̣о. сажз сааман̣зро на ход̇и, аараамиго аабужчид̇аб̣б̣о. сажз на ход̇и бхигку ваа сааман̣зро ваа аараамиго ваа, жад̇уусу баасаан̣зсу ман̃жам̣ бан̃н̃абзд̇ваа ман̃жз ман̃жам̣ ааробзд̇ваа бийтз бийтам̣ ааробзд̇ваа сзнаасанам̣ убари бун̃ж̇ам̣ гарид̇ваа д̣̇аарубхан̣д̣ам̣ мад̇д̇игаабхан̣д̣ам̣ бадисаамзд̇ваа д̣̇ваараваад̇абаанам̣ т̇агзд̇ваа баггамид̇аб̣б̣ам̣. сажз вихааро овассад̇и, сажз уссахад̇и, саб̣б̣о чаад̣̇зд̇аб̣б̣о, уссуггам̣ ваа гаад̇аб̣б̣ам̣ ‘‘гинд̇и ну ко вихааро чаад̣̇иязт̇аа’’д̇и, зван̃жзд̇ам̣ лабхзт̇а, ижжзд̇ам̣ гусалам̣. но жз лабхзт̇а, яо д̣̇зсо ановассаго ход̇и, д̇ад̇т̇а жад̇уусу баасаан̣зсу ман̃жам̣ бан̃н̃абзд̇ваа ман̃жз ман̃жам̣ ааробзд̇ваа бийтз бийтам̣ ааробзд̇ваа сзнаасанам̣ убари бун̃ж̇ам̣ гарид̇ваа д̣̇аарубхан̣д̣ам̣ мад̇д̇игаабхан̣д̣ам̣ бадисаамзд̇ваа д̣̇ваараваад̇абаанам̣ т̇агзд̇ваа баггамид̇аб̣б̣ам̣. сажз вихааро овассад̇и, сажз уссахад̇и, сзнаасанам̣ г̇аамам̣ ад̇ихарид̇аб̣б̣ам̣, уссуггам̣ ваа гаад̇аб̣б̣ам̣ ‘‘гинд̇и ну ко сзнаасанам̣ г̇аамам̣ ад̇ихариязт̇аа’’д̇и, зван̃жзд̇ам̣ лабхзт̇а, ижжзд̇ам̣ гусалам̣. но жз лабхзт̇а, аж̇жхогаасз жад̇уусу баасаан̣зсу ман̃жам̣ бан̃н̃абзд̇ваа ман̃жз ман̃жам̣ ааробзд̇ваа бийтз бийтам̣ ааробзд̇ваа сзнаасанам̣ убари бун̃ж̇ам̣ гарид̇ваа д̣̇аарубхан̣д̣ам̣ мад̇д̇игаабхан̣д̣ам̣ бадисаамзд̇ваа д̇ин̣зна ваа бан̣н̣зна ваа бадижчаад̣̇зд̇ваа баггамид̇аб̣б̣ам̣ ‘‘аббзва наама ан̇г̇ааниби сзсзяяу’’нд̇и. ид̣̇ам̣ г̇амигавад̇д̇ам̣.
187.Gamikavatte gamikena bhikkhunā mañcapīṭhādidārubhaṇḍaṃ mattikābhaṇḍampi rajanabhājanādi sabbaṃ aggisālāyaṃ vā aññasmiṃ vā guttaṭṭhāne paṭisāmetvā dvāravātapānaṃ thaketvā senāsanaṃ āpucchitvā pakkamitabbaṃ. Sace bhikkhu na hoti, sāmaṇero āpucchitabbo. Sace sāmaṇero na hoti, ārāmiko āpucchitabbo. Sace na hoti bhikkhu vā sāmaṇero vā ārāmiko vā, catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace vihāro ovassati, sace ussahati, sabbo chādetabbo, ussukkaṃ vā kātabbaṃ ‘‘kinti nu kho vihāro chādiyethā’’ti, evañcetaṃ labhetha, iccetaṃ kusalaṃ. No ce labhetha, yo deso anovassako hoti, tattha catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace vihāro ovassati, sace ussahati, senāsanaṃ gāmaṃ atiharitabbaṃ, ussukkaṃ vā kātabbaṃ ‘‘kinti nu kho senāsanaṃ gāmaṃ atihariyethā’’ti, evañcetaṃ labhetha, iccetaṃ kusalaṃ. No ce labhetha, ajjhokāse catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā tiṇena vā paṇṇena vā paṭicchādetvā pakkamitabbaṃ ‘‘appeva nāma aṅgānipi seseyyu’’nti. Idaṃ gamikavattaṃ.
188. бхад̇д̇аг̇г̇авад̇д̇з сажз аараамз гаало аарожид̇о ход̇и, д̇иман̣д̣алам̣ бадижчаад̣̇знд̇зна бариман̣д̣алам̣ ниваасзд̇ваа гааяаб̣анд̇ханам̣ б̣анд̇хид̇ваа саг̇ун̣ам̣ гад̇ваа сан̇гхаадияо баарубид̇ваа г̇ан̣тигам̣ бадимун̃жид̇ваа д̇ховид̇ваа бад̇д̇ам̣ г̇ахзд̇ваа саад̇хугам̣ ад̇арамаанзна г̇аамо бависид̇аб̣б̣о.
188.Bhattaggavatte sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
на оггамма т̇зраанам̣ бхигкуунам̣ бурад̇о г̇анд̇аб̣б̣ам̣. суббадижчаннзна, сусам̣вуд̇зна, огкид̇д̇ажагкунаа, аббасад̣̇д̣̇зна анд̇арагхарз г̇анд̇аб̣б̣ам̣, на угкид̇д̇агааяа, на уж̇ж̇аг̇гхигааяа анд̇арагхарз г̇анд̇аб̣б̣ам̣, на гааяаббажаалагам̣, на б̣аахуббажаалагам̣, на сийсаббажаалагам̣ анд̇арагхарз г̇анд̇аб̣б̣ам̣, на камбхагад̇зна, на ог̇ун̣тид̇зна, на уггудигааяа анд̇арагхарз г̇анд̇аб̣б̣ам̣.
Na okkamma therānaṃ bhikkhūnaṃ purato gantabbaṃ. Suppaṭicchannena, susaṃvutena, okkhittacakkhunā, appasaddena antaraghare gantabbaṃ, na ukkhittakāya, na ujjagghikāya antaraghare gantabbaṃ, na kāyappacālakaṃ, na bāhuppacālakaṃ, na sīsappacālakaṃ antaraghare gantabbaṃ, na khambhakatena, na oguṇṭhitena, na ukkuṭikāya antaraghare gantabbaṃ.
суббадижчаннзна , сусам̣вуд̇зна, огкид̇д̇ажагкунаа, аббасад̣̇д̣̇зна анд̇арагхарз нисийд̣̇ид̇аб̣б̣ам̣, на угкид̇д̇агааяа, на уж̇ж̇аг̇гхигааяа анд̇арагхарз нисийд̣̇ид̇аб̣б̣ам̣, на гааяаббажаалагам̣, на б̣аахуббажаалагам̣, на сийсаббажаалагам̣ анд̇арагхарз нисийд̣̇ид̇аб̣б̣ам̣, на камбхагад̇зна, на ог̇ун̣тид̇зна, на баллад̇т̇игааяа анд̇арагхарз нисийд̣̇ид̇аб̣б̣ам̣, на т̇зрз бхигкуу анубакаж̇ж̇а нисийд̣̇ид̇аб̣б̣ам̣. сажз махаат̇зрасса нисиннаасанзна самагам̣ аасанам̣ ход̇и, б̣ахуусу аасанзсу сад̇и згам̣ д̣̇вз аасанаани табзд̇ваа нисийд̣̇ид̇аб̣б̣ам̣. бхигкуу г̇ан̣зд̇ваа бан̃н̃ад̇д̇аасанзсу анисийд̣̇ид̇ваа махаат̇зрзна ‘‘нисийд̣̇аа’’д̇и вуд̇д̇зна нисийд̣̇ид̇аб̣б̣ам̣. но жз махаат̇зро вад̣̇ад̇и, ‘‘ид̣̇ам̣, бханд̇з, аасанам̣ ужжа’’нд̇и вад̇д̇аб̣б̣ам̣. ‘‘нисийд̣̇аа’’д̇и вуд̇д̇зна нисийд̣̇ид̇аб̣б̣ам̣. сажз бана звам̣ аабужчид̇зби на вад̣̇ад̇и, нисийд̣̇анд̇асса анаабад̇д̇и, махаат̇зрассзва аабад̇д̇и. наваго хи зваруубз аасанз анаабужчаа нисийд̣̇анд̇о аабаж̇ж̇ад̇и, т̇зро аабужчид̇з анануж̇аананд̇о. на наваа бхигкуу аасанзна бадиб̣аахид̇аб̣б̣аа, на сан̇гхаадигам̣ од̇т̇арид̇ваа анд̇арагхарз нисийд̣̇ид̇аб̣б̣ам̣.
Suppaṭicchannena , susaṃvutena, okkhittacakkhunā, appasaddena antaraghare nisīditabbaṃ, na ukkhittakāya, na ujjagghikāya antaraghare nisīditabbaṃ, na kāyappacālakaṃ, na bāhuppacālakaṃ, na sīsappacālakaṃ antaraghare nisīditabbaṃ, na khambhakatena, na oguṇṭhitena, na pallatthikāya antaraghare nisīditabbaṃ, na there bhikkhū anupakhajja nisīditabbaṃ. Sace mahātherassa nisinnāsanena samakaṃ āsanaṃ hoti, bahūsu āsanesu sati ekaṃ dve āsanāni ṭhapetvā nisīditabbaṃ. Bhikkhū gaṇetvā paññattāsanesu anisīditvā mahātherena ‘‘nisīdā’’ti vuttena nisīditabbaṃ. No ce mahāthero vadati, ‘‘idaṃ, bhante, āsanaṃ ucca’’nti vattabbaṃ. ‘‘Nisīdā’’ti vuttena nisīditabbaṃ. Sace pana evaṃ āpucchitepi na vadati, nisīdantassa anāpatti, mahātherasseva āpatti. Navako hi evarūpe āsane anāpucchā nisīdanto āpajjati, thero āpucchite ananujānanto. Na navā bhikkhū āsanena paṭibāhitabbā, na saṅghāṭikaṃ ottharitvā antaraghare nisīditabbaṃ.
бад̇д̇ад̇хованод̣̇агз д̣̇ийяамаанз убхохи хад̇т̇зхи бад̇д̇ам̣ бадиг̇г̇ахзд̇ваа уд̣̇агам̣ бадиг̇г̇ахзд̇аб̣б̣ам̣, д̣̇агкин̣од̣̇агам̣ бана бурад̇о аад̇хаарагз бад̇д̇ам̣ табзд̇ваа г̇ахзд̇аб̣б̣ам̣, нийжам̣ гад̇ваа уд̣̇агасад̣̇д̣̇ам̣ агаронд̇зна абадигхам̣санд̇зна бад̇д̇о д̇ховид̇аб̣б̣о. сажз уд̣̇агабадиг̇г̇аахаго ход̇и, нийжам̣ гад̇ваа уд̣̇агабадиг̇г̇аахагз уд̣̇агам̣ аасин̃жид̇аб̣б̣ам̣ ‘‘маа уд̣̇агабадиг̇г̇аахаго уд̣̇агзна осин̃жи , маа сааманд̇аа бхигкуу уд̣̇агзна осин̃жим̣су, маа сан̇гхаади уд̣̇агзна осин̃жий’’д̇и. сажз уд̣̇агабадиг̇г̇аахаго на ход̇и, нийжам̣ гад̇ваа чамааяа уд̣̇агам̣ аасин̃жид̇аб̣б̣ам̣ ‘‘маа сааманд̇аа бхигкуу уд̣̇агзна осин̃жим̣су, маа сан̇гхаади уд̣̇агзна осин̃жий’’д̇и.
Pattadhovanodake dīyamāne ubhohi hatthehi pattaṃ paṭiggahetvā udakaṃ paṭiggahetabbaṃ, dakkhiṇodakaṃ pana purato ādhārake pattaṃ ṭhapetvā gahetabbaṃ, nīcaṃ katvā udakasaddaṃ akarontena apaṭighaṃsantena patto dhovitabbo. Sace udakapaṭiggāhako hoti, nīcaṃ katvā udakapaṭiggāhake udakaṃ āsiñcitabbaṃ ‘‘mā udakapaṭiggāhako udakena osiñci , mā sāmantā bhikkhū udakena osiñciṃsu, mā saṅghāṭi udakena osiñcī’’ti. Sace udakapaṭiggāhako na hoti, nīcaṃ katvā chamāya udakaṃ āsiñcitabbaṃ ‘‘mā sāmantā bhikkhū udakena osiñciṃsu, mā saṅghāṭi udakena osiñcī’’ti.
од̣̇анз д̣̇ийяамаанз убхохи хад̇т̇зхи бад̇д̇ам̣ бадиг̇г̇ахзд̇ваа од̣̇ано бадиг̇г̇ахзд̇аб̣б̣о. яат̇аа суубасса огаасо ход̇и, звам̣ мад̇д̇ааяа од̣̇ано г̇ан̣хид̇аб̣б̣о. сажз ход̇и сабби ваа д̇злам̣ ваа уд̇д̇арибхан̇г̇ам̣ ваа, т̇зрзна вад̇д̇аб̣б̣о ‘‘саб̣б̣зсам̣ самагам̣ самбаад̣̇зхий’’д̇и. ид̣̇ан̃жа на гзвалам̣ саббиаад̣̇ийсу, од̣̇анзби вад̇д̇аб̣б̣ам̣. саббиаад̣̇ийсу бана яам̣ аббам̣ ход̇и згасса ваа д̣̇виннам̣ ваа ануруубам̣, д̇ам̣ саб̣б̣зсам̣ самагам̣ самбаад̣̇зхийд̇и вуд̇д̇з мануссаанам̣ вихзсаа ход̇и, д̇асмаа д̇аад̣̇исам̣ сагим̣ ваа д̣̇вигкад̇д̇ум̣ ваа г̇ахзд̇ваа сзсам̣ на г̇ахзд̇аб̣б̣ам̣. саггажжам̣ бин̣д̣абаад̇о бадиг̇г̇ахзд̇аб̣б̣о, бад̇д̇асан̃н̃инаа бин̣д̣абаад̇о бадиг̇г̇ахзд̇аб̣б̣о, самасуубаго самад̇ид̇т̇иго бин̣д̣абаад̇о бадиг̇г̇ахзд̇аб̣б̣о, на д̇аава т̇зрзна бхун̃ж̇ид̇аб̣б̣ам̣, яаава на саб̣б̣зсам̣ од̣̇ано самбад̇д̇о ход̇и. ид̣̇ан̃жа яам̣ барижчиннабхигкугам̣ бхад̇д̇аг̇г̇ам̣, яад̇т̇а мануссаа саб̣б̣зсам̣ баабзд̇ваа ванд̣̇ид̇угаамаа хонд̇и, д̇ам̣ санд̇хааяа вуд̇д̇ам̣ . яам̣ бана махаабхад̇д̇аг̇г̇ам̣ ход̇и, яад̇т̇а згасмим̣ бад̣̇зсз бхун̃ж̇анд̇и, згасмим̣ бад̣̇зсз уд̣̇агам̣ д̣̇ийяад̇и, д̇ад̇т̇а яат̇аасукам̣ бхун̃ж̇ид̇аб̣б̣ам̣.
Odane dīyamāne ubhohi hatthehi pattaṃ paṭiggahetvā odano paṭiggahetabbo. Yathā sūpassa okāso hoti, evaṃ mattāya odano gaṇhitabbo. Sace hoti sappi vā telaṃ vā uttaribhaṅgaṃ vā, therena vattabbo ‘‘sabbesaṃ samakaṃ sampādehī’’ti. Idañca na kevalaṃ sappiādīsu, odanepi vattabbaṃ. Sappiādīsu pana yaṃ appaṃ hoti ekassa vā dvinnaṃ vā anurūpaṃ, taṃ sabbesaṃ samakaṃ sampādehīti vutte manussānaṃ vihesā hoti, tasmā tādisaṃ sakiṃ vā dvikkhattuṃ vā gahetvā sesaṃ na gahetabbaṃ. Sakkaccaṃ piṇḍapāto paṭiggahetabbo, pattasaññinā piṇḍapāto paṭiggahetabbo, samasūpako samatitthiko piṇḍapāto paṭiggahetabbo, na tāva therena bhuñjitabbaṃ, yāva na sabbesaṃ odano sampatto hoti. Idañca yaṃ paricchinnabhikkhukaṃ bhattaggaṃ, yattha manussā sabbesaṃ pāpetvā vanditukāmā honti, taṃ sandhāya vuttaṃ . Yaṃ pana mahābhattaggaṃ hoti, yattha ekasmiṃ padese bhuñjanti, ekasmiṃ padese udakaṃ dīyati, tattha yathāsukhaṃ bhuñjitabbaṃ.
саггажжам̣ бин̣д̣абаад̇о бхун̃ж̇ид̇аб̣б̣о, бад̇д̇асан̃н̃инаа бин̣д̣абаад̇о бхун̃ж̇ид̇аб̣б̣о, сабад̣̇аано бин̣д̣абаад̇о бхун̃ж̇ид̇аб̣б̣о, самасуубаго бин̣д̣абаад̇о бхун̃ж̇ид̇аб̣б̣о, на т̇уубагад̇о омад̣̇д̣̇ид̇ваа бин̣д̣абаад̇о бхун̃ж̇ид̇аб̣б̣о, на суубам̣ ваа б̣яан̃ж̇анам̣ ваа од̣̇анзна бадижчаад̣̇зд̇аб̣б̣ам̣ бхияяогамяад̇ам̣ убаад̣̇ааяа, на суубам̣ ваа од̣̇анам̣ ваа аг̇илаанзна ад̇д̇ано ад̇т̇ааяа вин̃н̃аабзд̇ваа бхун̃ж̇ид̇аб̣б̣ам̣, на уж̇жхаанасан̃н̃инаа барзсам̣ бад̇д̇о ологзд̇аб̣б̣о, наад̇имаханд̇о габ̣ал̣о гаад̇аб̣б̣о, бариман̣д̣алам̣ аалобо гаад̇аб̣б̣о, на анаахадз габ̣ал̣з мукад̣̇ваарам̣ виварид̇аб̣б̣ам̣, на бхун̃ж̇амаанзна саб̣б̣о хад̇т̇о мукз багкибид̇аб̣б̣о, на сагаб̣ал̣зна мукзна б̣яаахарид̇аб̣б̣ам̣, на бин̣д̣угкзбагам̣ бхун̃ж̇ид̇аб̣б̣ам̣, на габ̣ал̣ааважчзгам̣, на аваг̇ан̣д̣агаарагам̣, на хад̇т̇анид̣̇д̇хунагам̣, на сид̇т̇аавагаарагам̣, на ж̇ивхаанижчаарагам̣, на жабужабугаарагам̣, на сурусуругаарагам̣, на хад̇т̇аниллзхагам̣, на бад̇д̇аниллзхагам̣, на одтаниллзхагам̣ бхун̃ж̇ид̇аб̣б̣ам̣.
Sakkaccaṃ piṇḍapāto bhuñjitabbo, pattasaññinā piṇḍapāto bhuñjitabbo, sapadāno piṇḍapāto bhuñjitabbo, samasūpako piṇḍapāto bhuñjitabbo, na thūpakato omadditvā piṇḍapāto bhuñjitabbo, na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya, na sūpaṃ vā odanaṃ vā agilānena attano atthāya viññāpetvā bhuñjitabbaṃ, na ujjhānasaññinā paresaṃ patto oloketabbo, nātimahanto kabaḷo kātabbo, parimaṇḍalaṃ ālopo kātabbo, na anāhaṭe kabaḷe mukhadvāraṃ vivaritabbaṃ, na bhuñjamānena sabbo hattho mukhe pakkhipitabbo, na sakabaḷena mukhena byāharitabbaṃ, na piṇḍukkhepakaṃ bhuñjitabbaṃ, na kabaḷāvacchekaṃ, na avagaṇḍakārakaṃ, na hatthaniddhunakaṃ, na sitthāvakārakaṃ, na jivhānicchārakaṃ, na capucapukārakaṃ, na surusurukārakaṃ, na hatthanillehakaṃ, na pattanillehakaṃ, na oṭṭhanillehakaṃ bhuñjitabbaṃ.
на саамисзна хад̇т̇зна баанийяат̇аалаго бадиг̇г̇ахзд̇аб̣б̣о, на д̇аава т̇зрзна хад̇т̇ад̇хованауд̣̇агам̣ бадиг̇г̇ахзд̇аб̣б̣ам̣, яаава на саб̣б̣з бхуд̇д̇аавино хонд̇и. сажз мануссаа ‘‘д̇ховат̇а, бханд̇з, бад̇д̇ан̃жа хад̇т̇з жаа’’д̇и вад̣̇анд̇и, бхигкуу ваа ‘‘д̇умхз уд̣̇агам̣ г̇ан̣хат̇аа’’д̇и вад̣̇анд̇и, ваддад̇и. уд̣̇агз д̣̇ийяамаанз убхохи хад̇т̇зхи бад̇д̇ам̣ бадиг̇г̇ахзд̇ваа уд̣̇агам̣ бадиг̇г̇ахзд̇аб̣б̣ам̣, нийжам̣ гад̇ваа уд̣̇агасад̣̇д̣̇ам̣ агаронд̇зна абадигхам̣санд̇зна бад̇д̇о д̇ховид̇аб̣б̣о. сажз уд̣̇агабадиг̇г̇аахаго ход̇и, нийжам̣ гад̇ваа уд̣̇агабадиг̇г̇аахагз уд̣̇агам̣ аасин̃жид̇аб̣б̣ам̣ ‘‘маа уд̣̇агабадиг̇г̇аахаго уд̣̇агзна осин̃жи, маа сааманд̇аа бхигкуу уд̣̇агзна осин̃жим̣су, маа сан̇гхаади уд̣̇агзна осин̃жий’’д̇и. сажз уд̣̇агабадиг̇г̇аахаго на ход̇и, нийжам̣ гад̇ваа чамааяа уд̣̇агам̣ аасин̃жид̇аб̣б̣ам̣ ‘‘маа сааманд̇аа бхигкуу уд̣̇агзна осин̃жим̣су, маа сан̇гхаади уд̣̇агзна осин̃жий’’д̇и, на сасид̇т̇агам̣ бад̇д̇ад̇хованам̣ анд̇арагхарз чад̣д̣зд̇аб̣б̣ам̣.
Na sāmisena hatthena pānīyathālako paṭiggahetabbo, na tāva therena hatthadhovanaudakaṃ paṭiggahetabbaṃ, yāva na sabbe bhuttāvino honti. Sace manussā ‘‘dhovatha, bhante, pattañca hatthe cā’’ti vadanti, bhikkhū vā ‘‘tumhe udakaṃ gaṇhathā’’ti vadanti, vaṭṭati. Udake dīyamāne ubhohi hatthehi pattaṃ paṭiggahetvā udakaṃ paṭiggahetabbaṃ, nīcaṃ katvā udakasaddaṃ akarontena apaṭighaṃsantena patto dhovitabbo. Sace udakapaṭiggāhako hoti, nīcaṃ katvā udakapaṭiggāhake udakaṃ āsiñcitabbaṃ ‘‘mā udakapaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcī’’ti. Sace udakapaṭiggāhako na hoti, nīcaṃ katvā chamāya udakaṃ āsiñcitabbaṃ ‘‘mā sāmantā bhikkhū udakena osiñciṃsu, mā saṅghāṭi udakena osiñcī’’ti, na sasitthakaṃ pattadhovanaṃ antaraghare chaḍḍetabbaṃ.
бхад̇д̇аг̇г̇ад̇о удтааяа нивад̇д̇анд̇зсу навагзхи бхигкуухи батамад̇арам̣ нивад̇д̇ид̇аб̣б̣ам̣, бажчаа т̇зрзхи. самб̣аад̇хзсу хи гхарзсу махаат̇зраанам̣ нигкаманогаасо на ход̇и, д̇асмаа звам̣ вуд̇д̇ам̣. звам̣ нивад̇д̇анд̇зхи бана навагзхи г̇зхад̣̇ваарз тад̇ваа т̇зрзсу нигкаманд̇зсу бадибаадияаа г̇анд̇аб̣б̣ам̣. сажз бана махаат̇зраа д̇хурз нисиннаа хонд̇и, навагаа анд̇ог̇зхз, т̇зраасанад̇о бадтааяа бадибаадияаа зва нигкамид̇аб̣б̣ам̣ , гааязна гааяам̣ асан̇гхаддзнд̇зна яат̇аа анд̇арзна мануссаа г̇анд̇ум̣ саггонд̇и, звам̣ вирал̣ааяа баал̣ияаа г̇анд̇аб̣б̣ам̣.
Bhattaggato uṭṭhāya nivattantesu navakehi bhikkhūhi paṭhamataraṃ nivattitabbaṃ, pacchā therehi. Sambādhesu hi gharesu mahātherānaṃ nikkhamanokāso na hoti, tasmā evaṃ vuttaṃ. Evaṃ nivattantehi pana navakehi gehadvāre ṭhatvā theresu nikkhamantesu paṭipāṭiyā gantabbaṃ. Sace pana mahātherā dhure nisinnā honti, navakā antogehe, therāsanato paṭṭhāya paṭipāṭiyā eva nikkhamitabbaṃ , kāyena kāyaṃ asaṅghaṭṭentena yathā antarena manussā gantuṃ sakkonti, evaṃ viraḷāya pāḷiyā gantabbaṃ.
‘‘ануж̇аанаами, бхигкавз, т̇зрзна бхигкунаа бхад̇д̇аг̇г̇з анумод̣̇ид̇у’’нд̇и (жуул̣ава. 362) важанад̇о сан̇гхад̇т̇зрзна бхад̇д̇аг̇г̇з анумод̣̇ид̇аб̣б̣ам̣. д̇ам̣ згамзва охааяа сзсзхи на г̇анд̇аб̣б̣ам̣.
‘‘Anujānāmi, bhikkhave, therena bhikkhunā bhattagge anumoditu’’nti (cūḷava. 362) vacanato saṅghattherena bhattagge anumoditabbaṃ. Taṃ ekameva ohāya sesehi na gantabbaṃ.
‘‘ануж̇аанаами, бхигкавз, бхад̇д̇аг̇г̇з жад̇уухи бан̃жахи т̇зраанут̇зрзхи бхигкуухи ааг̇амзд̇у’’нд̇и (жуул̣ава. 362) важанад̇о сан̇гхад̇т̇зрзна анумод̣̇анад̇т̇ааяа нисиннз хздтаа бадибаадияаа жад̇уухи нисийд̣̇ид̇аб̣б̣ам̣, анут̇зрз нисиннз махаат̇зрзна жа хздтаа жа д̇ийхи нисийд̣̇ид̇аб̣б̣ам̣, бан̃жамз нисиннз убари жад̇уухи нисийд̣̇ид̇аб̣б̣ам̣, сан̇гхад̇т̇зрзна хздтаа д̣̇ахарабхигкусмим̣ аж̇жхидтзби сан̇гхад̇т̇зрад̇о бадтааяа жад̇уухи нисийд̣̇ид̇аб̣б̣амзва. сажз бана анумод̣̇аго бхигку ‘‘г̇ажчат̇а, бханд̇з, ааг̇амзд̇аб̣б̣агижжам̣ над̇т̇ий’’д̇и вад̣̇ад̇и, г̇анд̇ум̣ ваддад̇и. махаат̇зрзна ‘‘г̇ажчаама, аавусо’’д̇и вуд̇д̇з ‘‘г̇ажчат̇аа’’д̇и вад̣̇ад̇и, звамби ваддад̇и, ‘‘б̣ахиг̇аамз ааг̇амиссаамаа’’д̇и аабхог̇ам̣ гад̇вааби б̣ахиг̇аамам̣ г̇анд̇ваа ад̇д̇ано ниссид̇агз ‘‘д̇умхз д̇асса ааг̇аманам̣ ааг̇амзт̇аа’’д̇и вад̇вааби г̇анд̇ум̣ ваддад̇иязва. сажз бана мануссаа ад̇д̇ано ружид̇зна згзна анумод̣̇анам̣ гаарзнд̇и, нзва д̇асса анумод̣̇ад̇о аабад̇д̇и, на махаат̇зрасса бхааро ход̇и. убанисиннагат̇ааяамзва хи мануссзсу гат̇аабзнд̇зсу т̇зро аабужчид̇аб̣б̣о. махаат̇зрзна жа анумод̣̇анааяа аж̇жхидтова ааг̇амзд̇аб̣б̣од̇и ид̣̇амзд̇т̇а лагкан̣ам̣. ‘‘ануж̇аанаами, бхигкавз, сад̇и гаран̣ийяз аананд̇аригам̣ бхигкум̣ аабужчид̇ваа г̇анд̇у’’нд̇и (жуул̣ава. 362) важанад̇о бана важжаад̣̇ибийл̣ид̇зна ананд̇арам̣ бхигкум̣ аабужчид̇ваа г̇анд̇аб̣б̣анд̇и. ид̣̇ам̣ бхад̇д̇аг̇г̇авад̇д̇ам̣.
‘‘Anujānāmi, bhikkhave, bhattagge catūhi pañcahi therānutherehi bhikkhūhi āgametu’’nti (cūḷava. 362) vacanato saṅghattherena anumodanatthāya nisinne heṭṭhā paṭipāṭiyā catūhi nisīditabbaṃ, anuthere nisinne mahātherena ca heṭṭhā ca tīhi nisīditabbaṃ, pañcame nisinne upari catūhi nisīditabbaṃ, saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu ‘‘gacchatha, bhante, āgametabbakiccaṃ natthī’’ti vadati, gantuṃ vaṭṭati. Mahātherena ‘‘gacchāma, āvuso’’ti vutte ‘‘gacchathā’’ti vadati, evampi vaṭṭati, ‘‘bahigāme āgamissāmā’’ti ābhogaṃ katvāpi bahigāmaṃ gantvā attano nissitake ‘‘tumhe tassa āgamanaṃ āgamethā’’ti vatvāpi gantuṃ vaṭṭatiyeva. Sace pana manussā attano rucitena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu thero āpucchitabbo. Mahātherena ca anumodanāya ajjhiṭṭhova āgametabboti idamettha lakkhaṇaṃ. ‘‘Anujānāmi, bhikkhave, sati karaṇīye ānantarikaṃ bhikkhuṃ āpucchitvā gantu’’nti (cūḷava. 362) vacanato pana vaccādipīḷitena anantaraṃ bhikkhuṃ āpucchitvā gantabbanti. Idaṃ bhattaggavattaṃ.
189. бин̣д̣ажааригавад̇д̇з бана бин̣д̣ажааригзна бхигкунаа ‘‘ид̣̇аани г̇аамам̣ бависиссаамий’’д̇и д̇иман̣д̣алам̣ бадижчаад̣̇знд̇зна бариман̣д̣алам̣ ниваасзд̇ваа гааяаб̣анд̇ханам̣ б̣анд̇хид̇ваа саг̇ун̣ам̣ гад̇ваа сан̇гхаадияо баарубид̇ваа г̇ан̣тигам̣ бадимун̃жид̇ваа д̇ховид̇ваа бад̇д̇ам̣ г̇ахзд̇ваа саад̇хугам̣ ад̇арамаанзна г̇аамо бависид̇аб̣б̣о. суббадижчаннзна анд̇арагхарз г̇анд̇аб̣б̣анд̇иаад̣̇и саб̣б̣ам̣ бхад̇д̇аг̇г̇авад̇д̇з вуд̇д̇анаязнзва ид̇хааби взд̣̇ид̇аб̣б̣ам̣.
189.Piṇḍacārikavatte pana piṇḍacārikena bhikkhunā ‘‘idāni gāmaṃ pavisissāmī’’ti timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbantiādi sabbaṃ bhattaggavatte vuttanayeneva idhāpi veditabbaṃ.
нивзсанам̣ бависанд̇зна саллагкзд̇аб̣б̣ам̣ ‘‘иминаа бависиссаами, иминаа нигкамиссаамий’’д̇и, наад̇исахасаа бависид̇аб̣б̣ам̣, наад̇ид̣̇уурз наажжаасаннз таад̇аб̣б̣ам̣, наад̇ижирам̣ таад̇аб̣б̣ам̣, наад̇илахугам̣ нивад̇д̇ид̇аб̣б̣ам̣, тид̇зна саллагкзд̇аб̣б̣ам̣ ‘‘бхигкам̣ д̣̇аад̇угаамаа ваа ад̣̇аад̇угаамаа ваа’’д̇и . сажз гаммам̣ ваа нигкибад̇и, аасанаа ваа вудтаад̇и, гадажчум̣ ваа бараамасад̇и, бхааж̇анам̣ ваа бараамасад̇и, табзд̇и ваа, ‘‘д̣̇аад̇угаамассаа’’д̇и таад̇аб̣б̣ам̣. бхигкааяа д̣̇ийяамаанааяа ваамзна хад̇т̇зна сан̇гхаадим̣ ужжаарзд̇ваа д̣̇агкин̣зна хад̇т̇зна бад̇д̇ам̣ бан̣аамзд̇ваа убхохи хад̇т̇зхи бад̇д̇ам̣ бадиг̇г̇ахзд̇ваа бхигкаа бадиг̇г̇ахзд̇аб̣б̣аа, ид̇т̇ий ваа ход̇у бурисо ваа, бхигкаад̣̇аанасамаяз мукам̣ на ологзд̇аб̣б̣ам̣, саллагкзд̇аб̣б̣ам̣ ‘‘суубам̣ д̣̇аад̇угаамаа ваа ад̣̇аад̇угаамаа ваа’’д̇и. сажз гадажчум̣ ваа бараамасад̇и, бхааж̇анам̣ ваа бараамасад̇и, табзд̇и ваа, ‘‘д̣̇аад̇угаамассаа’’д̇и таад̇аб̣б̣ам̣. бхигкааяа д̣̇иннааяа сан̇гхаадияаа бад̇д̇ам̣ бадижчаад̣̇зд̇ваа саад̇хугам̣ ад̇арамаанзна нивад̇д̇ид̇аб̣б̣ам̣.
Nivesanaṃ pavisantena sallakkhetabbaṃ ‘‘iminā pavisissāmi, iminā nikkhamissāmī’’ti, nātisahasā pavisitabbaṃ, nātidūre nāccāsanne ṭhātabbaṃ, nāticiraṃ ṭhātabbaṃ, nātilahukaṃ nivattitabbaṃ, ṭhitena sallakkhetabbaṃ ‘‘bhikkhaṃ dātukāmā vā adātukāmā vā’’ti . Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti vā, ‘‘dātukāmassā’’ti ṭhātabbaṃ. Bhikkhāya dīyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā, itthī vā hotu puriso vā, bhikkhādānasamaye mukhaṃ na oloketabbaṃ, sallakkhetabbaṃ ‘‘sūpaṃ dātukāmā vā adātukāmā vā’’ti. Sace kaṭacchuṃ vā parāmasati, bhājanaṃ vā parāmasati, ṭhapeti vā, ‘‘dātukāmassā’’ti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
яо батамам̣ г̇аамад̇о бин̣д̣ааяа бадиггамад̇и, д̇зна аасанам̣ бан̃н̃абзд̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкибид̇аб̣б̣ам̣, аваггаарабаад̇и д̇ховид̇ваа убадтаабзд̇аб̣б̣аа, баанийяам̣ барибхож̇анийяам̣ убадтаабзд̇аб̣б̣ам̣. яо бажчаа г̇аамад̇о бин̣д̣ааяа бадиггамад̇и, сажз ход̇и бхуд̇д̇аавасзсо, сажз ааган̇кад̇и, бхун̃ж̇ид̇аб̣б̣ам̣. но жз ааган̇кад̇и, аббахарид̇з ваа чад̣д̣зд̇аб̣б̣ам̣, аббаан̣агз ваа уд̣̇агз обилаабзд̇аб̣б̣ам̣, д̇зна аасанам̣ уд̣̇д̇харид̇аб̣б̣ам̣, баад̣̇од̣̇агам̣ баад̣̇абийтам̣ баад̣̇агат̇алигам̣ бадисаамзд̇аб̣б̣ам̣, аваггаарабаад̇и д̇ховид̇ваа бадисаамзд̇аб̣б̣аа, баанийяам̣ барибхож̇анийяам̣ бадисаамзд̇аб̣б̣ам̣, бхад̇д̇аг̇г̇ам̣ саммаж̇ж̇ид̇аб̣б̣ам̣. яо бассад̇и баанийяагхадам̣ ваа барибхож̇анийяагхадам̣ ваа важжагхадам̣ ваа рид̇д̇ам̣ д̇ужчам̣, д̇зна убадтаабзд̇аб̣б̣ам̣. сажасса ход̇и ависаяхам̣, хад̇т̇авигаарзна д̣̇уд̇ияам̣ ааманд̇зд̇ваа хад̇т̇авилан̇гхагзна убадтаабзд̇аб̣б̣ам̣, на жа д̇аббажжаяаа ваажаа бхинд̣̇ид̇аб̣б̣аад̇и. ид̣̇ам̣ бин̣д̣ажааригавад̇д̇ам̣.
Yo paṭhamaṃ gāmato piṇḍāya paṭikkamati, tena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, avakkārapāti dhovitvā upaṭṭhāpetabbā, pānīyaṃ paribhojanīyaṃ upaṭṭhāpetabbaṃ. Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati, bhuñjitabbaṃ. No ce ākaṅkhati, appaharite vā chaḍḍetabbaṃ, appāṇake vā udake opilāpetabbaṃ, tena āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ, avakkārapāti dhovitvā paṭisāmetabbā, pānīyaṃ paribhojanīyaṃ paṭisāmetabbaṃ, bhattaggaṃ sammajjitabbaṃ. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ, tena upaṭṭhāpetabbaṃ. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpetabbaṃ, na ca tappaccayā vācā bhinditabbāti. Idaṃ piṇḍacārikavattaṃ.
190. ааран̃н̃игавад̇д̇з ааран̃н̃игзна бхигкунаа гаалассзва удтааяа бад̇д̇ам̣ т̇авигааяа багкибид̇ваа ам̣сз лаг̇г̇зд̇ваа жийварам̣ канд̇хз гарид̇ваа убааханаа аарохид̇ваа д̣̇аарубхан̣д̣ам̣ мад̇д̇игаабхан̣д̣ам̣ бадисаамзд̇ваа д̣̇ваараваад̇абаанам̣ т̇агзд̇ваа васанадтаанад̇о нигкамид̇аб̣б̣ам̣. ‘‘ид̣̇аани г̇аамам̣ бависиссаамаа’’д̇и убааханаа омун̃жид̇ваа нийжам̣ гад̇ваа бабподзд̇ваа т̇авигааяа багкибид̇ваа ам̣сз лаг̇г̇зд̇ваа д̇иман̣д̣алам̣ бадижчаад̣̇знд̇зна бариман̣д̣алам̣ ниваасзд̇ваа гааяаб̣анд̇ханам̣ б̣анд̇хид̇ваа саг̇ун̣ам̣ гад̇ваа сан̇гхаадияо баарубид̇ваа г̇ан̣тигам̣ бадимун̃жид̇ваа д̇ховид̇ваа бад̇д̇ам̣ г̇ахзд̇ваа саад̇хугам̣ ад̇арамаанзна г̇аамо бависид̇аб̣б̣о. суббадижчаннзна анд̇арагхарз г̇анд̇аб̣б̣анд̇иаад̣̇и саб̣б̣ам̣ г̇аманавид̇хаанам̣ ид̇хааби бхад̇д̇аг̇г̇авад̇д̇з вуд̇д̇анаязнзва взд̣̇ид̇аб̣б̣ам̣.
190.Āraññikavatte āraññikena bhikkhunā kālasseva uṭṭhāya pattaṃ thavikāya pakkhipitvā aṃse laggetvā cīvaraṃ khandhe karitvā upāhanā ārohitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā vasanaṭṭhānato nikkhamitabbaṃ. ‘‘Idāni gāmaṃ pavisissāmā’’ti upāhanā omuñcitvā nīcaṃ katvā papphoṭetvā thavikāya pakkhipitvā aṃse laggetvā timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbantiādi sabbaṃ gamanavidhānaṃ idhāpi bhattaggavatte vuttanayeneva veditabbaṃ.
нивзсанам̣ бависанд̇зна саллагкзд̇аб̣б̣ам̣ ‘‘иминаа бависиссаами, иминаа нигкамиссаамий’’д̇иаад̣̇и саб̣б̣ам̣ бхигкаажааравид̇хаанам̣ бин̣д̣ажааригавад̇д̇з вуд̇д̇анаязнзва взд̣̇ид̇аб̣б̣ам̣. ааран̃н̃игзна бхигкунаа баанийяам̣ барибхож̇анийяам̣ убадтаабзд̇аб̣б̣ам̣. сажз бхааж̇анаани наббахонд̇и, баанийяамзва барибхож̇анийяамби гад̇ваа убадтаабзд̇аб̣б̣ам̣. бхааж̇анам̣ алабханд̇зна взл̣унаал̣игааяаби убадтаабзд̇аб̣б̣ам̣. д̇амби алабханд̇асса яат̇аа самийбз уд̣̇агаааваадо ход̇и, звам̣ гаад̇аб̣б̣ам̣. аг̇г̇и убадтаабзд̇аб̣б̣о, аран̣исахид̇ам̣ убадтаабзд̇аб̣б̣ам̣, аран̣исахид̇з сад̇и аг̇г̇им̣ агаад̇умби ваддад̇и. яат̇аа жа ааран̃н̃игасса, звам̣ ганд̇аараббадибаннассаби аран̣исахид̇ам̣ ижчид̇аб̣б̣ам̣. г̇ан̣аваасино бана д̇зна винааби ваддад̇и. гад̇д̇арад̣̇ан̣д̣о убадтаабзд̇аб̣б̣о, нагкад̇д̇абад̣̇аани уг̇г̇ахзд̇аб̣б̣аани сагалаани ваа згад̣̇зсаани ваа, д̣̇исаагусалзна бхавид̇аб̣б̣ам̣. ид̣̇ам̣ ааран̃н̃игавад̇д̇ам̣.
Nivesanaṃ pavisantena sallakkhetabbaṃ ‘‘iminā pavisissāmi, iminā nikkhamissāmī’’tiādi sabbaṃ bhikkhācāravidhānaṃ piṇḍacārikavatte vuttanayeneva veditabbaṃ. Āraññikena bhikkhunā pānīyaṃ paribhojanīyaṃ upaṭṭhāpetabbaṃ. Sace bhājanāni nappahonti, pānīyameva paribhojanīyampi katvā upaṭṭhāpetabbaṃ. Bhājanaṃ alabhantena veḷunāḷikāyapi upaṭṭhāpetabbaṃ. Tampi alabhantassa yathā samīpe udakaāvāṭo hoti, evaṃ kātabbaṃ. Aggi upaṭṭhāpetabbo, araṇisahitaṃ upaṭṭhāpetabbaṃ, araṇisahite sati aggiṃ akātumpi vaṭṭati. Yathā ca āraññikassa, evaṃ kantārappaṭipannassapi araṇisahitaṃ icchitabbaṃ. Gaṇavāsino pana tena vināpi vaṭṭati. Kattaradaṇḍo upaṭṭhāpetabbo, nakkhattapadāni uggahetabbāni sakalāni vā ekadesāni vā, disākusalena bhavitabbaṃ. Idaṃ āraññikavattaṃ.
191. сзнаасанавад̇д̇з яасмим̣ вихаарз вихарад̇и, сажз со вихааро углаабо ход̇и, сажз уссахад̇и, сод̇хзд̇аб̣б̣о. вихаарам̣ сод̇хзнд̇зна батамам̣ бад̇д̇ажийварам̣ нийхарид̇ваа згаманд̇ам̣ нигкибид̇аб̣б̣ам̣, нисийд̣̇анабажжад̇т̇аран̣ам̣ нийхарид̇ваа згаманд̇ам̣ нигкибид̇аб̣б̣ам̣, бхисиб̣имб̣оханам̣ нийхарид̇ваа згаманд̇ам̣ нигкибид̇аб̣б̣ам̣, ман̃жо нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ нийхарид̇ваа згаманд̇ам̣ нигкибид̇аб̣б̣о, бийтам̣ нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ нийхарид̇ваа згаманд̇ам̣ нигкибид̇аб̣б̣ам̣, ман̃жабадибаад̣̇агаа нийхарид̇ваа згаманд̇ам̣ нигкибид̇аб̣б̣аа, кзл̣амаллаго нийхарид̇ваа згаманд̇ам̣ нигкибид̇аб̣б̣о, абассзнапалагам̣ нийхарид̇ваа згаманд̇ам̣ нигкибид̇аб̣б̣ам̣, бхуумад̇т̇аран̣ам̣ яат̇аабан̃н̃ад̇д̇ам̣ саллагкзд̇ваа нийхарид̇ваа згаманд̇ам̣ нигкибид̇аб̣б̣ам̣. сажз вихаарз санд̇аанагам̣ ход̇и, уллогаа батамам̣ охаарзд̇аб̣б̣ам̣, аалогасанд̇хиган̣н̣абхааг̇аа бамаж̇ж̇ид̇аб̣б̣аа. сажз г̇зругабаригаммагад̇аа бхид̇д̇и ган̣н̣агид̇аа ход̇и, жол̣агам̣ д̇змзд̇ваа бийл̣зд̇ваа бамаж̇ж̇ид̇аб̣б̣аа. сажз гаал̣аван̣н̣агад̇аа бхууми ган̣н̣агид̇аа ход̇и, жол̣агам̣ д̇змзд̇ваа бийл̣зд̇ваа бамаж̇ж̇ид̇аб̣б̣аа. сажз агад̇аа ход̇и бхууми, уд̣̇агзна барибпосид̇ваа барибпосид̇ваа саммаж̇ж̇ид̇аб̣б̣аа ‘‘маа вихааро раж̇зна ухан̃н̃ий’’д̇и, сан̇гаарам̣ вижинид̇ваа згаманд̇ам̣ чад̣д̣зд̇аб̣б̣ам̣.
191.Senāsanavatte yasmiṃ vihāre viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ, nisīdanapaccattharaṇaṃ nīharitvā ekamantaṃ nikkhipitabbaṃ, bhisibimbohanaṃ nīharitvā ekamantaṃ nikkhipitabbaṃ, mañco nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbo, pīṭhaṃ nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ nīharitvā ekamantaṃ nikkhipitabbaṃ, mañcapaṭipādakā nīharitvā ekamantaṃ nikkhipitabbā, kheḷamallako nīharitvā ekamantaṃ nikkhipitabbo, apassenaphalakaṃ nīharitvā ekamantaṃ nikkhipitabbaṃ, bhūmattharaṇaṃ yathāpaññattaṃ sallakkhetvā nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā paripphositvā sammajjitabbā ‘‘mā vihāro rajena uhaññī’’ti, saṅkāraṃ vicinitvā ekamantaṃ chaḍḍetabbaṃ.
на бхигкусааманд̇аа сзнаасанам̣ бабподзд̇аб̣б̣ам̣, на вихаарасааманд̇аа сзнаасанам̣ бабподзд̇аб̣б̣ам̣, на баанийяасааманд̇аа сзнаасанам̣ бабподзд̇аб̣б̣ам̣, на барибхож̇анийяасааманд̇аа сзнаасанам̣ бабподзд̇аб̣б̣ам̣, на бадиваад̇з ан̇г̇ан̣з сзнаасанам̣ бабподзд̇аб̣б̣ам̣, ад̇ховаад̇з сзнаасанам̣ бабподзд̇аб̣б̣ам̣.
Na bhikkhusāmantā senāsanaṃ papphoṭetabbaṃ, na vihārasāmantā senāsanaṃ papphoṭetabbaṃ, na pānīyasāmantā senāsanaṃ papphoṭetabbaṃ, na paribhojanīyasāmantā senāsanaṃ papphoṭetabbaṃ, na paṭivāte aṅgaṇe senāsanaṃ papphoṭetabbaṃ, adhovāte senāsanaṃ papphoṭetabbaṃ.
бхуумад̇т̇аран̣ам̣ од̇аабзд̇ваа сод̇хзд̇ваа бабподзд̇ваа ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, ман̃жабадибаад̣̇агаа згаманд̇ам̣ од̇аабзд̇ваа бамаж̇ж̇ид̇ваа абхихарид̇ваа яат̇аатаанз табзд̇аб̣б̣аа, ман̃жо згаманд̇ам̣ од̇аабзд̇ваа сод̇хзд̇ваа бабподзд̇ваа нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣о, бийтам̣ згаманд̇ам̣ од̇аабзд̇ваа сод̇хзд̇ваа бабподзд̇ваа нийжам̣ гад̇ваа саад̇хугам̣ абадигхам̣санд̇зна асан̇гхаддзнд̇зна гаваадабийтам̣ ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣ , бхисиб̣имб̣оханам̣ згаманд̇ам̣ од̇аабзд̇ваа сод̇хзд̇ваа бабподзд̇ваа ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, нисийд̣̇анабажжад̇т̇аран̣ам̣ од̇аабзд̇ваа бабподзд̇ваа ад̇ихарид̇ваа яат̇аабан̃н̃ад̇д̇ам̣ бан̃н̃абзд̇аб̣б̣ам̣, кзл̣амаллаго згаманд̇ам̣ од̇аабзд̇ваа бамаж̇ж̇ид̇ваа ад̇ихарид̇ваа яат̇аатаанз табзд̇аб̣б̣о, абассзнапалагам̣ згаманд̇ам̣ од̇аабзд̇ваа бамаж̇ж̇ид̇ваа яат̇аатаанз табзд̇аб̣б̣ам̣. бад̇д̇ажийварам̣ нигкибид̇аб̣б̣ам̣, бад̇д̇ам̣ нигкибанд̇зна згзна хад̇т̇зна бад̇д̇ам̣ г̇ахзд̇ваа згзна хад̇т̇зна хздтааман̃жам̣ ваа хздтаабийтам̣ ваа бараамасид̇ваа бад̇д̇о нигкибид̇аб̣б̣о, на жа ананд̇арахид̇ааяа бхуумияаа бад̇д̇о нигкибид̇аб̣б̣о. жийварам̣ нигкибанд̇зна згзна хад̇т̇зна жийварам̣ г̇ахзд̇ваа згзна хад̇т̇зна жийваравам̣сам̣ ваа жийварараж̇ж̇ум̣ ваа бамаж̇ж̇ид̇ваа баарад̇о анд̇ам̣, орад̇о бхог̇ам̣ гад̇ваа жийварам̣ нигкибид̇аб̣б̣ам̣.
Bhūmattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, mañcapaṭipādakā ekamantaṃ otāpetvā pamajjitvā abhiharitvā yathāṭhāne ṭhapetabbā, mañco ekamantaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbo, pīṭhaṃ ekamantaṃ otāpetvā sodhetvā papphoṭetvā nīcaṃ katvā sādhukaṃ apaṭighaṃsantena asaṅghaṭṭentena kavāṭapīṭhaṃ atiharitvā yathāpaññattaṃ paññapetabbaṃ , bhisibimbohanaṃ ekamantaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ, nisīdanapaccattharaṇaṃ otāpetvā papphoṭetvā atiharitvā yathāpaññattaṃ paññapetabbaṃ, kheḷamallako ekamantaṃ otāpetvā pamajjitvā atiharitvā yathāṭhāne ṭhapetabbo, apassenaphalakaṃ ekamantaṃ otāpetvā pamajjitvā yathāṭhāne ṭhapetabbaṃ. Pattacīvaraṃ nikkhipitabbaṃ, pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo, na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ, orato bhogaṃ katvā cīvaraṃ nikkhipitabbaṃ.
сажз бурад̇т̇имаа сараж̇аа ваад̇аа вааяанд̇и, бурад̇т̇имаа ваад̇абаанаа т̇агзд̇аб̣б̣аа. сажз бажчимаа, уд̇д̇араа, д̣̇агкин̣аа сараж̇аа ваад̇аа вааяанд̇и, д̣̇агкин̣аа ваад̇абаанаа т̇агзд̇аб̣б̣аа. сажз сийд̇агаало ход̇и, д̣̇иваа ваад̇абаанаа виварид̇аб̣б̣аа, рад̇д̇им̣ т̇агзд̇аб̣б̣аа. сажз ун̣хагаало ход̇и, д̣̇иваа ваад̇абаанаа т̇агзд̇аб̣б̣аа, рад̇д̇им̣ виварид̇аб̣б̣аа.
Sace puratthimā sarajā vātā vāyanti, puratthimā vātapānā thaketabbā. Sace pacchimā, uttarā, dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.
сажз углаабам̣ ход̇и, баривзн̣ам̣ саммаж̇ж̇ид̇аб̣б̣ам̣, годтаго саммаж̇ж̇ид̇аб̣б̣о, убадтаанасаалаа саммаж̇ж̇ид̇аб̣б̣аа, аг̇г̇исаалаа саммаж̇ж̇ид̇аб̣б̣аа, важжагуди саммаж̇ж̇ид̇аб̣б̣аа. сажз баанийяам̣ на ход̇и, баанийяам̣ убадтаабзд̇аб̣б̣ам̣. сажз барибхож̇анийяам̣ на ход̇и, барибхож̇анийяам̣ убадтаабзд̇аб̣б̣ам̣. сажз аажаманагумбхияаа уд̣̇агам̣ на ход̇и, аажаманагумбхияаа уд̣̇агам̣ аасин̃жид̇аб̣б̣ам̣.
Sace uklāpaṃ hoti, pariveṇaṃ sammajjitabbaṃ, koṭṭhako sammajjitabbo, upaṭṭhānasālā sammajjitabbā, aggisālā sammajjitabbā, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
сажз вуд̣дхзна сад̣̇д̇хим̣ згавихаарз вихарад̇и, на вуд̣дхам̣ анаабужчаа уд̣̇д̣̇зсо д̣̇аад̇аб̣б̣о, на барибужчаа д̣̇аад̇аб̣б̣аа, на саж̇жхааяо гаад̇аб̣б̣о, на д̇хаммо бхаасид̇аб̣б̣о, на бад̣̇ийбо гаад̇аб̣б̣о, на бад̣̇ийбо виж̇жхаабзд̇аб̣б̣о, на ваад̇абаанаа виварид̇аб̣б̣аа, на ваад̇абаанаа т̇агзд̇аб̣б̣аа. д̣̇ваарам̣ наама яасмаа махаавал̣ан̃ж̇ам̣, д̇асмаа д̇ад̇т̇а аабужчанагижжам̣ над̇т̇и, сзсаани бана уд̣̇д̣̇зсад̣̇аанаад̣̇ийни аабужчид̇ваава гаад̇аб̣б̣аани, д̣̇звасигамби аабужчид̇ум̣ ваддад̇и. ат̇ааби ‘‘бханд̇з, аабужчид̇амзва ход̇уу’’д̇и вуд̇д̇з вуд̣дхад̇аро ‘‘саад̇хуу’’д̇и самбадижчад̇и, саяамзва ваа ‘‘д̇вам̣ яат̇аасукам̣ вихараахий’’д̇и вад̣̇ад̇и, звамби ваддад̇и. сабхааг̇асса виссаасзнаби ваддад̇иязва. сажз вуд̣дхзна сад̣̇д̇хим̣ згажан̇гамз жан̇гамад̇и, язна вуд̣дхо, д̇зна баривад̇д̇зд̇аб̣б̣ам̣, на жа вуд̣дхо сан̇гхаадиган̣н̣зна гхаддзд̇аб̣б̣о. ид̣̇ам̣ сзнаасанавад̇д̇ам̣.
Sace vuḍḍhena saddhiṃ ekavihāre viharati, na vuḍḍhaṃ anāpucchā uddeso dātabbo, na paripucchā dātabbā, na sajjhāyo kātabbo, na dhammo bhāsitabbo, na padīpo kātabbo, na padīpo vijjhāpetabbo, na vātapānā vivaritabbā, na vātapānā thaketabbā. Dvāraṃ nāma yasmā mahāvaḷañjaṃ, tasmā tattha āpucchanakiccaṃ natthi, sesāni pana uddesadānādīni āpucchitvāva kātabbāni, devasikampi āpucchituṃ vaṭṭati. Athāpi ‘‘bhante, āpucchitameva hotū’’ti vutte vuḍḍhataro ‘‘sādhū’’ti sampaṭicchati, sayameva vā ‘‘tvaṃ yathāsukhaṃ viharāhī’’ti vadati, evampi vaṭṭati. Sabhāgassa vissāsenapi vaṭṭatiyeva. Sace vuḍḍhena saddhiṃ ekacaṅkame caṅkamati, yena vuḍḍho, tena parivattetabbaṃ, na ca vuḍḍho saṅghāṭikaṇṇena ghaṭṭetabbo. Idaṃ senāsanavattaṃ.
192. ж̇анд̇аагхаравад̇д̇з яо батамам̣ ж̇анд̇аагхарам̣ г̇ажчад̇и, сажз чааригаа уссаннаа ход̇и, чааригаа чад̣д̣зд̇аб̣б̣аа. сажз углаабам̣ ход̇и, ж̇анд̇аагхарам̣ саммаж̇ж̇ид̇аб̣б̣ам̣, барибхан̣д̣ам̣ саммаж̇ж̇ид̇аб̣б̣ам̣, баривзн̣ам̣ саммаж̇ж̇ид̇аб̣б̣ам̣, годтаго саммаж̇ж̇ид̇аб̣б̣о, ж̇анд̇аагхарасаалаа саммаж̇ж̇ид̇аб̣б̣аа, жун̣н̣ам̣ саннзд̇аб̣б̣ам̣, мад̇д̇игаа д̇змзд̇аб̣б̣аа, уд̣̇агад̣̇он̣ияаа уд̣̇агам̣ аасин̃жид̇аб̣б̣ам̣. ж̇анд̇аагхарам̣ бависанд̇зна мад̇д̇игааяа мукам̣ магкзд̇ваа бурад̇о жа бажчад̇о жа бадижчаад̣̇зд̇ваа ж̇анд̇аагхарам̣ бависид̇аб̣б̣ам̣, на т̇зрз бхигкуу анубакаж̇ж̇а нисийд̣̇ид̇аб̣б̣ам̣, на наваа бхигкуу аасанзна бадиб̣аахид̇аб̣б̣аа. сажз уссахад̇и, ж̇анд̇аагхарз т̇зраанам̣ бхигкуунам̣ баригаммам̣ гаад̇аб̣б̣ам̣. ж̇анд̇аагхараа нигкаманд̇зна ж̇анд̇аагхарабийтам̣ аад̣̇ааяа бурад̇о жа бажчад̇о жа бадижчаад̣̇зд̇ваа ж̇анд̇аагхараа нигкамид̇аб̣б̣ам̣. сажз уссахад̇и, уд̣̇агзби т̇зраанам̣ бхигкуунам̣ баригаммам̣ гаад̇аб̣б̣ам̣, на т̇зраанам̣ бхигкуунам̣ бурад̇о нахааяид̇аб̣б̣ам̣, на убарид̇о нахааяид̇аб̣б̣ам̣, нахаад̇зна уд̇д̇аранд̇зна од̇аранд̇аанам̣ маг̇г̇о д̣̇аад̇аб̣б̣о. яо бажчаа ж̇анд̇аагхараа нигкамад̇и, сажз ж̇анд̇аагхарам̣ жигкаллам̣ ход̇и, д̇ховид̇аб̣б̣ам̣, мад̇д̇игаад̣̇он̣им̣ д̇ховид̇ваа ж̇анд̇аагхарабийтам̣ бадисаамзд̇ваа аг̇г̇им̣ виж̇жхаабзд̇ваа д̣̇ваарам̣ т̇агзд̇ваа баггамид̇аб̣б̣ам̣. ид̣̇ам̣ ж̇анд̇аагхаравад̇д̇ам̣.
192.Jantāgharavatte yo paṭhamaṃ jantāgharaṃ gacchati, sace chārikā ussannā hoti, chārikā chaḍḍetabbā. Sace uklāpaṃ hoti, jantāgharaṃ sammajjitabbaṃ, paribhaṇḍaṃ sammajjitabbaṃ, pariveṇaṃ sammajjitabbaṃ, koṭṭhako sammajjitabbo, jantāgharasālā sammajjitabbā, cuṇṇaṃ sannetabbaṃ, mattikā temetabbā, udakadoṇiyā udakaṃ āsiñcitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ, na there bhikkhū anupakhajja nisīditabbaṃ, na navā bhikkhū āsanena paṭibāhitabbā. Sace ussahati, jantāghare therānaṃ bhikkhūnaṃ parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ. Sace ussahati, udakepi therānaṃ bhikkhūnaṃ parikammaṃ kātabbaṃ, na therānaṃ bhikkhūnaṃ purato nahāyitabbaṃ, na uparito nahāyitabbaṃ, nahātena uttarantena otarantānaṃ maggo dātabbo. Yo pacchā jantāgharā nikkhamati, sace jantāgharaṃ cikkhallaṃ hoti, dhovitabbaṃ, mattikādoṇiṃ dhovitvā jantāgharapīṭhaṃ paṭisāmetvā aggiṃ vijjhāpetvā dvāraṃ thaketvā pakkamitabbaṃ. Idaṃ jantāgharavattaṃ.
193. важжагудивад̇д̇з яо важжагудим̣ г̇ажчад̇и, б̣ахи тид̇зна уггаасид̇аб̣б̣ам̣, анд̇о нисиннзнаби уггаасид̇аб̣б̣ам̣, жийваравам̣сз ваа жийварараж̇ж̇уяаа ваа жийварам̣ нигкибид̇ваа саад̇хугам̣ ад̇арамаанзна важжагуди бависид̇аб̣б̣аа, наад̇исахасаа бависид̇аб̣б̣аа, на уб̣бхаж̇ид̇ваа бависид̇аб̣б̣аа, важжабаад̣̇угааяа тид̇зна уб̣бхаж̇ид̇аб̣б̣ам̣, на нид̇т̇унанд̇зна важжо гаад̇аб̣б̣о, на д̣̇анд̇агадтам̣ каад̣̇анд̇зна важжо гаад̇аб̣б̣о, на б̣ахид̣̇д̇хаа важжад̣̇он̣игааяа важжо гаад̇аб̣б̣о, на б̣ахид̣̇д̇хаа бассаавад̣̇он̣игааяа бассааво гаад̇аб̣б̣о, на бассаавад̣̇он̣игааяа кзл̣о гаад̇аб̣б̣о, паалид̇зна ваа карзна ваа г̇ан̣тигзна ваа ган̣дагзна ваа сусирзна ваа бууд̇инаа ваа гадтзна на авалзкид̇аб̣б̣ам̣, авалзканагадтам̣ бана аг̇г̇ахзд̇ваа бавидтасса аабад̇д̇и над̇т̇и, на авалзканагадтам̣ важжагуубамхи баад̇зд̇аб̣б̣ам̣, важжабаад̣̇угааяа тид̇зна бадижчаад̣̇зд̇аб̣б̣ам̣, наад̇исахасаа нигкамид̇аб̣б̣ам̣, на уб̣бхаж̇ид̇ваа нигкамид̇аб̣б̣ам̣, аажаманабаад̣̇угааяа тид̇зна уб̣бхаж̇ид̇аб̣б̣ам̣, на жабужабугаарагам̣ аажамзд̇аб̣б̣ам̣, на аажаманасараавагз уд̣̇агам̣ сзсзд̇аб̣б̣ам̣. ид̣̇ан̃жа саб̣б̣асаад̇хааран̣адтаанам̣ санд̇хааяа вуд̇д̇ам̣. д̇ад̇ра хи ан̃н̃з ан̃н̃з ааг̇ажчанд̇и, д̇асмаа уд̣̇агам̣ на сзсзд̇аб̣б̣ам̣. яам̣ бана сан̇гхигзби вихаарз згад̣̇зсз ниб̣ад̣̇д̇хаг̇аманад̇т̇ааяа гад̇ам̣ таанам̣ ход̇и буг̇г̇алигадтаанам̣ ваа, д̇асмим̣ ваддад̇и. вирзжанам̣ бивид̇ваа бунаббунам̣ бависанд̇ассаби ваддад̇иязва. аажаманабаад̣̇угааяа тид̇зна бадижчаад̣̇зд̇аб̣б̣ам̣.
193.Vaccakuṭivatte yo vaccakuṭiṃ gacchati, bahi ṭhitena ukkāsitabbaṃ, anto nisinnenapi ukkāsitabbaṃ, cīvaravaṃse vā cīvararajjuyā vā cīvaraṃ nikkhipitvā sādhukaṃ ataramānena vaccakuṭi pavisitabbā, nātisahasā pavisitabbā, na ubbhajitvā pavisitabbā, vaccapādukāya ṭhitena ubbhajitabbaṃ, na nitthunantena vacco kātabbo, na dantakaṭṭhaṃ khādantena vacco kātabbo, na bahiddhā vaccadoṇikāya vacco kātabbo, na bahiddhā passāvadoṇikāya passāvo kātabbo, na passāvadoṇikāya kheḷo kātabbo, phālitena vā kharena vā gaṇṭhikena vā kaṇṭakena vā susirena vā pūtinā vā kaṭṭhena na avalekhitabbaṃ, avalekhanakaṭṭhaṃ pana aggahetvā paviṭṭhassa āpatti natthi, na avalekhanakaṭṭhaṃ vaccakūpamhi pātetabbaṃ, vaccapādukāya ṭhitena paṭicchādetabbaṃ, nātisahasā nikkhamitabbaṃ, na ubbhajitvā nikkhamitabbaṃ, ācamanapādukāya ṭhitena ubbhajitabbaṃ, na capucapukārakaṃ ācametabbaṃ, na ācamanasarāvake udakaṃ sesetabbaṃ. Idañca sabbasādhāraṇaṭṭhānaṃ sandhāya vuttaṃ. Tatra hi aññe aññe āgacchanti, tasmā udakaṃ na sesetabbaṃ. Yaṃ pana saṅghikepi vihāre ekadese nibaddhagamanatthāya kataṃ ṭhānaṃ hoti puggalikaṭṭhānaṃ vā, tasmiṃ vaṭṭati. Virecanaṃ pivitvā punappunaṃ pavisantassapi vaṭṭatiyeva. Ācamanapādukāya ṭhitena paṭicchādetabbaṃ.
сажз важжагуди ухад̇аа ход̇и б̣ахи важжамагкид̇аа, уд̣̇агам̣ аахарид̇ваа д̇ховид̇аб̣б̣аа. уд̣̇агам̣ ад̇т̇и, бхааж̇анам̣ над̇т̇и, асанд̇ам̣ наама ход̇и. бхааж̇анам̣ ад̇т̇и, уд̣̇агам̣ над̇т̇и, зд̇амби асанд̇ам̣ . убхаяасмим̣ асад̇и асанд̇амзва, гадтзна ваа гзнажи ваа бун̃чид̇ваа г̇анд̇аб̣б̣ам̣. сажз авалзканабидаго буурид̇о ход̇и, авалзканагадтам̣ чад̣д̣зд̇аб̣б̣ам̣. сажз гажаварам̣ ад̇т̇и, важжагуди саммаж̇ж̇ид̇аб̣б̣аа, барибхан̣д̣ам̣ саммаж̇ж̇ид̇аб̣б̣ам̣, баривзн̣ам̣ саммаж̇ж̇ид̇аб̣б̣ам̣, годтаго саммаж̇ж̇ид̇аб̣б̣о. сажз аажаманагумбхияаа уд̣̇агам̣ на ход̇и, аажаманагумбхияаа уд̣̇агам̣ аасин̃жид̇аб̣б̣ам̣.
Sace vaccakuṭi uhatā hoti bahi vaccamakkhitā, udakaṃ āharitvā dhovitabbā. Udakaṃ atthi, bhājanaṃ natthi, asantaṃ nāma hoti. Bhājanaṃ atthi, udakaṃ natthi, etampi asantaṃ . Ubhayasmiṃ asati asantameva, kaṭṭhena vā kenaci vā puñchitvā gantabbaṃ. Sace avalekhanapiṭako pūrito hoti, avalekhanakaṭṭhaṃ chaḍḍetabbaṃ. Sace kacavaraṃ atthi, vaccakuṭi sammajjitabbā, paribhaṇḍaṃ sammajjitabbaṃ, pariveṇaṃ sammajjitabbaṃ, koṭṭhako sammajjitabbo. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘на, бхигкавз, важжам̣ гад̇ваа сад̇и уд̣̇агз наажамзд̇аб̣б̣ам̣, яо наажамзяяа, аабад̇д̇и д̣̇уггадассаа’’д̇и (жуул̣ава. 373) важанад̇о уд̣̇агз сад̇и уд̣̇агагижжам̣ агаронд̇асса аабад̇д̇и. сажз уд̣̇агам̣ ад̇т̇и, бадижчаннадтаанам̣ бана над̇т̇и, бхааж̇анзна нийхарид̇ваа аажамид̇аб̣б̣ам̣. бхааж̇анз асад̇и бад̇д̇зна нийхарид̇аб̣б̣ам̣, бад̇д̇зби асад̇и асанд̇ам̣ наама ход̇и. ‘‘ид̣̇ам̣ ад̇ививадам̣, бурад̇о ан̃н̃ам̣ уд̣̇агам̣ бхависсад̇ий’’д̇и г̇ад̇асса уд̣̇агам̣ алабханд̇ассзва бхигкаажааравзлаа ход̇и, гадтзна ваа гзнажи ваа бун̃чид̇ваа г̇анд̇аб̣б̣ам̣, бхун̃ж̇ид̇умби анумод̣̇ид̇умби ваддад̇и. ‘‘на, бхигкавз, важжагудияаа яат̇аавуд̣дхам̣ важжо гаад̇аб̣б̣о, яо гарзяяа, аабад̇д̇и д̣̇уггадасса. ануж̇аанаами, бхигкавз, ааг̇ад̇абадибаадияаа важжам̣ гаад̇у’’нд̇и (жул̣ава. 373) важанад̇о важжагудим̣ бависанд̇зна ааг̇ад̇абадибаадияаа бависид̇аб̣б̣ам̣. важжагудияам̣ бассаавадтаанз нахаанад̇ид̇т̇зд̇и д̇ийсуби ааг̇ад̇абадибаадиязва бамаан̣ам̣. ид̣̇ам̣ важжагудивад̇д̇ам̣.
‘‘Na, bhikkhave, vaccaṃ katvā sati udake nācametabbaṃ, yo nācameyya, āpatti dukkaṭassā’’ti (cūḷava. 373) vacanato udake sati udakakiccaṃ akarontassa āpatti. Sace udakaṃ atthi, paṭicchannaṭṭhānaṃ pana natthi, bhājanena nīharitvā ācamitabbaṃ. Bhājane asati pattena nīharitabbaṃ, pattepi asati asantaṃ nāma hoti. ‘‘Idaṃ ativivaṭaṃ, purato aññaṃ udakaṃ bhavissatī’’ti gatassa udakaṃ alabhantasseva bhikkhācāravelā hoti, kaṭṭhena vā kenaci vā puñchitvā gantabbaṃ, bhuñjitumpi anumoditumpi vaṭṭati. ‘‘Na, bhikkhave, vaccakuṭiyā yathāvuḍḍhaṃ vacco kātabbo, yo kareyya, āpatti dukkaṭassa. Anujānāmi, bhikkhave, āgatapaṭipāṭiyā vaccaṃ kātu’’nti (cuḷava. 373) vacanato vaccakuṭiṃ pavisantena āgatapaṭipāṭiyā pavisitabbaṃ. Vaccakuṭiyaṃ passāvaṭṭhāne nahānatittheti tīsupi āgatapaṭipāṭiyeva pamāṇaṃ. Idaṃ vaccakuṭivattaṃ.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
убаж̇жхааяаад̣̇ивад̇д̇авинижчаяагат̇аа самад̇д̇аа.
Upajjhāyādivattavinicchayakathā samattā.
