| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. උපජ්‌ඣායසුත්‌තං
6. Upajjhāyasuttaṃ
56. අථ ඛො අඤ්‌ඤතරො භික්‌ඛු යෙන සකො උපජ්‌ඣායො තෙනුපසඞ්‌කමි; උපසඞ්‌කමිත්‌වා සකං උපජ්‌ඣායං එතදවොච – ‘‘එතරහි මෙ, භන්‌තෙ, මධුරකජාතො චෙව කායො, දිසා ච මෙ න පක්‌ඛායන්‌ති, ධම්‌මා ච මං නප්‌පටිභන්‌ති, ථිනමිද්‌ධඤ්‌ච මෙ චිත්‌තං පරියාදාය තිට්‌ඨති, අනභිරතො ච බ්‍රහ්‌මචරියං චරාමි, අත්‌ථි ච මෙ ධම්‌මෙසු විචිකිච්‌ඡා’’ති.
56. Atha kho aññataro bhikkhu yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, madhurakajāto ceva kāyo, disā ca me na pakkhāyanti, dhammā ca maṃ nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’ti.
අථ ඛො සො භික්‌ඛු තං සද්‌ධිවිහාරිකං භික්‌ඛුං ආදාය යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘අයං, භන්‌තෙ, භික්‌ඛු එවමාහ – ‘එතරහි මෙ, භන්‌තෙ, මධුරකජාතො චෙව කායො, දිසා ච මං න පක්‌ඛායන්‌ති, ධම්‌මා ච මෙ නප්‌පටිභන්‌ති, ථිනමිද්‌ධඤ්‌ච මෙ චිත්‌තං පරියාදාය තිට්‌ඨති, අනභිරතො ච බ්‍රහ්‌මචරියං චරාමි, අත්‌ථි ච මෙ ධම්‌මෙසු විචිකිච්‌ඡා’’’ති.
Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, madhurakajāto ceva kāyo, disā ca maṃ na pakkhāyanti, dhammā ca me nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’’ti.
‘‘එවඤ්‌හෙතං , භික්‌ඛු, හොති ඉන්‌ද්‍රියෙසු අගුත්‌තද්‌වාරස්‌ස, භොජනෙ අමත්‌තඤ්‌ඤුනො, ජාගරියං අනනුයුත්‌තස්‌ස, අවිපස්‌සකස්‌ස කුසලානං ධම්‌මානං, පුබ්‌බරත්‌තාපරරත්‌තං බොධිපක්‌ඛියානං ධම්‌මානං භාවනානුයොගං අනනුයුත්‌තස්‌ස විහරතො, යං මධුරකජාතො චෙව කායො හොති, දිසා චස්‌ස න පක්‌ඛායන්‌ති, ධම්‌මා ච තං නප්‌පටිභන්‌ති, ථිනමිද්‌ධඤ්‌චස්‌ස චිත්‌තං පරියාදාය තිට්‌ඨති, අනභිරතො ච බ්‍රහ්‌මචරියං චරති, හොති චස්‌ස ධම්‌මෙසු විචිකිච්‌ඡා. තස්‌මාතිහ තෙ, භික්‌ඛු, එවං සික්‌ඛිතබ්‌බං – ‘ඉන්‌ද්‍රියෙසු ගුත්‌තද්‌වාරො භවිස්‌සාමි, භොජනෙ මත්‌තඤ්‌ඤූ, ජාගරියං අනුයුත්‌තො, විපස්‌සකො කුසලානං ධම්‌මානං, පුබ්‌බරත්‌තාපරරත්‌තං බොධිපක්‌ඛියානං ධම්‌මානං භාවනානුයොගං අනුයුත්‌තො විහරිස්‌සාමී’ති. එවඤ්‌හි තෙ, භික්‌ඛු, සික්‌ඛිතබ්‌බ’’න්‌ති.
‘‘Evañhetaṃ , bhikkhu, hoti indriyesu aguttadvārassa, bhojane amattaññuno, jāgariyaṃ ananuyuttassa, avipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ ananuyuttassa viharato, yaṃ madhurakajāto ceva kāyo hoti, disā cassa na pakkhāyanti, dhammā ca taṃ nappaṭibhanti, thinamiddhañcassa cittaṃ pariyādāya tiṭṭhati, anabhirato ca brahmacariyaṃ carati, hoti cassa dhammesu vicikicchā. Tasmātiha te, bhikkhu, evaṃ sikkhitabbaṃ – ‘indriyesu guttadvāro bhavissāmi, bhojane mattaññū, jāgariyaṃ anuyutto, vipassako kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyutto viharissāmī’ti. Evañhi te, bhikkhu, sikkhitabba’’nti.
අථ ඛො සො භික්‌ඛු භගවතා ඉමිනා ඔවාදෙන ඔවදිතො උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. අථ ඛො සො භික්‌ඛු එකො වූපකට්‌ඨො අප්‌පමත්‌තො ආතාපී පහිතත්‌තො විහරන්‌තො නචිරස්‌සෙව – යස්‌සත්‌ථාය කුලපුත්‌තා සම්‌මදෙව අගාරස්‌මා අනගාරියං පබ්‌බජන්‌ති, තදනුත්‌තරං – බ්‍රහ්‌මචරියපරියොසානං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහාසි. ‘‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’’ති අබ්‌භඤ්‌ඤාසි. අඤ්‌ඤතරො පන සො භික්‌ඛු අරහතං අහොසි.
Atha kho so bhikkhu bhagavatā iminā ovādena ovadito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho so bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro pana so bhikkhu arahataṃ ahosi.
අථ ඛො සො භික්‌ඛු අරහත්‌තං පත්‌තො යෙන සකො උපජ්‌ඣායො තෙනුපසඞ්‌කමි; උපසඞ්‌කමිත්‌වා සකං උපජ්‌ඣායං එතදවොච – ‘‘එතරහි මෙ, භන්‌තෙ, න චෙව 1 මධුරකජාතො කායො, දිසා ච මෙ පක්‌ඛායන්‌ති, ධම්‌මා ච මං පටිභන්‌ති, ථිනමිද්‌ධඤ්‌ච මෙ චිත්‌තං න පරියාදාය තිට්‌ඨති, අභිරතො ච බ්‍රහ්‌මචරියං චරාමි, නත්‌ථි ච මෙ ධම්‌මෙසු විචිකිච්‌ඡා’’ති. අථ ඛො සො භික්‌ඛු තං සද්‌ධිවිහාරිකං භික්‌ඛුං ආදාය යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘අයං, භන්‌තෙ, භික්‌ඛු එවමාහ – ‘එතරහි මෙ, භන්‌තෙ, න චෙව මධුරකජාතො කායො, දිසා ච මෙ පක්‌ඛායන්‌ති, ධම්‌මා ච මං පටිභන්‌ති, ථිනමිද්‌ධඤ්‌ච මෙ චිත්‌තං න පරියාදාය තිට්‌ඨති, අභිරතො ච බ්‍රහ්‌මචරියං චරාමි, නත්‌ථි ච මෙ ධම්‌මෙසු විචිකිච්‌ඡා’’’ති.
Atha kho so bhikkhu arahattaṃ patto yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, na ceva 2 madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’ti. Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, na ceva madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’’ti.
‘‘එවඤ්‌හෙතං, භික්‌ඛු, හොති ඉන්‌ද්‍රියෙසු ගුත්‌තද්‌වාරස්‌ස, භොජනෙ මත්‌තඤ්‌ඤුනො, ජාගරියං අනුයුත්‌තස්‌ස, විපස්‌සකස්‌ස කුසලානං ධම්‌මානං, පුබ්‌බරත්‌තාපරරත්‌තං බොධිපක්‌ඛියානං ධම්‌මානං භාවනානුයොගං අනුයුත්‌තස්‌ස විහරතො, යං න චෙව මධුරකජාතො කායො හොති, දිසා චස්‌ස පක්‌ඛායන්‌ති, ධම්‌මා ච තං පටිභන්‌ති, ථිනමිද්‌ධඤ්‌චස්‌ස චිත්‌තං න පරියාදාය තිට්‌ඨති, අභිරතො ච බ්‍රහ්‌මචරියං චරති, න චස්‌ස හොති ධම්‌මෙසු විචිකිච්‌ඡා. තස්‌මාතිහ වො, භික්‌ඛවෙ, එවං සික්‌ඛිතබ්‌බං – ‘ඉන්‌ද්‍රියෙසු ගුත්‌තද්‌වාරා භවිස්‌සාම, භොජනෙ මත්‌තඤ්‌ඤුනො, ජාගරියං අනුයුත්‌තා, විපස්‌සකා කුසලානං ධම්‌මානං, පුබ්‌බරත්‌තාපරරත්‌තං බොධිපක්‌ඛියානං ධම්‌මානං භාවනානුයොගං අනුයුත්‌තා විහරිස්‌සාමා’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. ඡට්‌ඨං.
‘‘Evañhetaṃ, bhikkhu, hoti indriyesu guttadvārassa, bhojane mattaññuno, jāgariyaṃ anuyuttassa, vipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttassa viharato, yaṃ na ceva madhurakajāto kāyo hoti, disā cassa pakkhāyanti, dhammā ca taṃ paṭibhanti, thinamiddhañcassa cittaṃ na pariyādāya tiṭṭhati, abhirato ca brahmacariyaṃ carati, na cassa hoti dhammesu vicikicchā. Tasmātiha vo, bhikkhave, evaṃ sikkhitabbaṃ – ‘indriyesu guttadvārā bhavissāma, bhojane mattaññuno, jāgariyaṃ anuyuttā, vipassakā kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttā viharissāmā’ti. Evañhi vo, bhikkhave, sikkhitabba’’nti. Chaṭṭhaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. උපජ්‌ඣායසුත්‌තවණ්‌ණනා • 6. Upajjhāyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. උපජ්‌ඣායසුත්‌තවණ්‌ණනා • 6. Upajjhāyasuttavaṇṇanā
