| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. ཨུཔཛ྄ཛྷཱཡསུཏྟཾ
6. Upajjhāyasuttaṃ
༥༦. ཨཐ ཁོ ཨཉྙཏརོ བྷིཀྑུ ཡེན སཀོ ཨུཔཛ྄ཛྷཱཡོ ཏེནུཔསངྐམི; ཨུཔསངྐམིཏྭཱ སཀཾ ཨུཔཛ྄ཛྷཱཡཾ ཨེཏདཝོཙ – ‘‘ཨེཏརཧི མེ, བྷནྟེ, མདྷུརཀཛཱཏོ ཙེཝ ཀཱཡོ, དིསཱ ཙ མེ ན པཀྑཱཡནྟི, དྷམྨཱ ཙ མཾ ནཔྤཊིབྷནྟི, ཐིནམིདྡྷཉྩ མེ ཙིཏྟཾ པརིཡཱདཱཡ ཏིཊྛཏི, ཨནབྷིརཏོ ཙ བྲཧྨཙརིཡཾ ཙརཱམི, ཨཏྠི ཙ མེ དྷམྨེསུ ཝིཙིཀིཙྪཱ’’ཏི།
56. Atha kho aññataro bhikkhu yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, madhurakajāto ceva kāyo, disā ca me na pakkhāyanti, dhammā ca maṃ nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’ti.
ཨཐ ཁོ སོ བྷིཀྑུ ཏཾ སདྡྷིཝིཧཱརིཀཾ བྷིཀྑུཾ ཨཱདཱཡ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘ཨཡཾ, བྷནྟེ, བྷིཀྑུ ཨེཝམཱཧ – ‘ཨེཏརཧི མེ, བྷནྟེ, མདྷུརཀཛཱཏོ ཙེཝ ཀཱཡོ, དིསཱ ཙ མཾ ན པཀྑཱཡནྟི, དྷམྨཱ ཙ མེ ནཔྤཊིབྷནྟི, ཐིནམིདྡྷཉྩ མེ ཙིཏྟཾ པརིཡཱདཱཡ ཏིཊྛཏི, ཨནབྷིརཏོ ཙ བྲཧྨཙརིཡཾ ཙརཱམི, ཨཏྠི ཙ མེ དྷམྨེསུ ཝིཙིཀིཙྪཱ’’’ཏི།
Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, madhurakajāto ceva kāyo, disā ca maṃ na pakkhāyanti, dhammā ca me nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’’ti.
‘‘ཨེཝཉྷེཏཾ , བྷིཀྑུ, ཧོཏི ཨིནྡྲིཡེསུ ཨགུཏྟདྭཱརསྶ, བྷོཛནེ ཨམཏྟཉྙུནོ, ཛཱགརིཡཾ ཨནནུཡུཏྟསྶ, ཨཝིཔསྶཀསྶ ཀུསལཱནཾ དྷམྨཱནཾ, པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགཾ ཨནནུཡུཏྟསྶ ཝིཧརཏོ, ཡཾ མདྷུརཀཛཱཏོ ཙེཝ ཀཱཡོ ཧོཏི, དིསཱ ཙསྶ ན པཀྑཱཡནྟི, དྷམྨཱ ཙ ཏཾ ནཔྤཊིབྷནྟི, ཐིནམིདྡྷཉྩསྶ ཙིཏྟཾ པརིཡཱདཱཡ ཏིཊྛཏི, ཨནབྷིརཏོ ཙ བྲཧྨཙརིཡཾ ཙརཏི, ཧོཏི ཙསྶ དྷམྨེསུ ཝིཙིཀིཙྪཱ། ཏསྨཱཏིཧ ཏེ, བྷིཀྑུ, ཨེཝཾ སིཀྑིཏབྦཾ – ‘ཨིནྡྲིཡེསུ གུཏྟདྭཱརོ བྷཝིསྶཱམི, བྷོཛནེ མཏྟཉྙཱུ, ཛཱགརིཡཾ ཨནུཡུཏྟོ, ཝིཔསྶཀོ ཀུསལཱནཾ དྷམྨཱནཾ, པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགཾ ཨནུཡུཏྟོ ཝིཧརིསྶཱམཱི’ཏི། ཨེཝཉྷི ཏེ, བྷིཀྑུ, སིཀྑིཏབྦ’’ནྟི།
‘‘Evañhetaṃ , bhikkhu, hoti indriyesu aguttadvārassa, bhojane amattaññuno, jāgariyaṃ ananuyuttassa, avipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ ananuyuttassa viharato, yaṃ madhurakajāto ceva kāyo hoti, disā cassa na pakkhāyanti, dhammā ca taṃ nappaṭibhanti, thinamiddhañcassa cittaṃ pariyādāya tiṭṭhati, anabhirato ca brahmacariyaṃ carati, hoti cassa dhammesu vicikicchā. Tasmātiha te, bhikkhu, evaṃ sikkhitabbaṃ – ‘indriyesu guttadvāro bhavissāmi, bhojane mattaññū, jāgariyaṃ anuyutto, vipassako kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyutto viharissāmī’ti. Evañhi te, bhikkhu, sikkhitabba’’nti.
ཨཐ ཁོ སོ བྷིཀྑུ བྷགཝཏཱ ཨིམིནཱ ཨོཝཱདེན ཨོཝདིཏོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ སོ བྷིཀྑུ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ནཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི, ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསི། ‘‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’’ཏི ཨབྦྷཉྙཱསི། ཨཉྙཏརོ པན སོ བྷིཀྑུ ཨརཧཏཾ ཨཧོསི།
Atha kho so bhikkhu bhagavatā iminā ovādena ovadito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho so bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro pana so bhikkhu arahataṃ ahosi.
ཨཐ ཁོ སོ བྷིཀྑུ ཨརཧཏྟཾ པཏྟོ ཡེན སཀོ ཨུཔཛ྄ཛྷཱཡོ ཏེནུཔསངྐམི; ཨུཔསངྐམིཏྭཱ སཀཾ ཨུཔཛ྄ཛྷཱཡཾ ཨེཏདཝོཙ – ‘‘ཨེཏརཧི མེ, བྷནྟེ, ན ཙེཝ 1 མདྷུརཀཛཱཏོ ཀཱཡོ, དིསཱ ཙ མེ པཀྑཱཡནྟི, དྷམྨཱ ཙ མཾ པཊིབྷནྟི, ཐིནམིདྡྷཉྩ མེ ཙིཏྟཾ ན པརིཡཱདཱཡ ཏིཊྛཏི, ཨབྷིརཏོ ཙ བྲཧྨཙརིཡཾ ཙརཱམི, ནཏྠི ཙ མེ དྷམྨེསུ ཝིཙིཀིཙྪཱ’’ཏི། ཨཐ ཁོ སོ བྷིཀྑུ ཏཾ སདྡྷིཝིཧཱརིཀཾ བྷིཀྑུཾ ཨཱདཱཡ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘ཨཡཾ, བྷནྟེ, བྷིཀྑུ ཨེཝམཱཧ – ‘ཨེཏརཧི མེ, བྷནྟེ, ན ཙེཝ མདྷུརཀཛཱཏོ ཀཱཡོ, དིསཱ ཙ མེ པཀྑཱཡནྟི, དྷམྨཱ ཙ མཾ པཊིབྷནྟི, ཐིནམིདྡྷཉྩ མེ ཙིཏྟཾ ན པརིཡཱདཱཡ ཏིཊྛཏི, ཨབྷིརཏོ ཙ བྲཧྨཙརིཡཾ ཙརཱམི, ནཏྠི ཙ མེ དྷམྨེསུ ཝིཙིཀིཙྪཱ’’’ཏི།
Atha kho so bhikkhu arahattaṃ patto yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, na ceva 2 madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’ti. Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, na ceva madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’’ti.
‘‘ཨེཝཉྷེཏཾ, བྷིཀྑུ, ཧོཏི ཨིནྡྲིཡེསུ གུཏྟདྭཱརསྶ, བྷོཛནེ མཏྟཉྙུནོ, ཛཱགརིཡཾ ཨནུཡུཏྟསྶ, ཝིཔསྶཀསྶ ཀུསལཱནཾ དྷམྨཱནཾ, པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགཾ ཨནུཡུཏྟསྶ ཝིཧརཏོ, ཡཾ ན ཙེཝ མདྷུརཀཛཱཏོ ཀཱཡོ ཧོཏི, དིསཱ ཙསྶ པཀྑཱཡནྟི, དྷམྨཱ ཙ ཏཾ པཊིབྷནྟི, ཐིནམིདྡྷཉྩསྶ ཙིཏྟཾ ན པརིཡཱདཱཡ ཏིཊྛཏི, ཨབྷིརཏོ ཙ བྲཧྨཙརིཡཾ ཙརཏི, ན ཙསྶ ཧོཏི དྷམྨེསུ ཝིཙིཀིཙྪཱ། ཏསྨཱཏིཧ ཝོ, བྷིཀྑཝེ, ཨེཝཾ སིཀྑིཏབྦཾ – ‘ཨིནྡྲིཡེསུ གུཏྟདྭཱརཱ བྷཝིསྶཱམ, བྷོཛནེ མཏྟཉྙུནོ, ཛཱགརིཡཾ ཨནུཡུཏྟཱ, ཝིཔསྶཀཱ ཀུསལཱནཾ དྷམྨཱནཾ, པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགཾ ཨནུཡུཏྟཱ ཝིཧརིསྶཱམཱ’ཏི། ཨེཝཉྷི ཝོ, བྷིཀྑཝེ, སིཀྑིཏབྦ’’ནྟི། ཚཊྛཾ།
‘‘Evañhetaṃ, bhikkhu, hoti indriyesu guttadvārassa, bhojane mattaññuno, jāgariyaṃ anuyuttassa, vipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttassa viharato, yaṃ na ceva madhurakajāto kāyo hoti, disā cassa pakkhāyanti, dhammā ca taṃ paṭibhanti, thinamiddhañcassa cittaṃ na pariyādāya tiṭṭhati, abhirato ca brahmacariyaṃ carati, na cassa hoti dhammesu vicikicchā. Tasmātiha vo, bhikkhave, evaṃ sikkhitabbaṃ – ‘indriyesu guttadvārā bhavissāma, bhojane mattaññuno, jāgariyaṃ anuyuttā, vipassakā kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttā viharissāmā’ti. Evañhi vo, bhikkhave, sikkhitabba’’nti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཨུཔཛ྄ཛྷཱཡསུཏྟཝཎྞནཱ • 6. Upajjhāyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. ཨུཔཛ྄ཛྷཱཡསུཏྟཝཎྞནཱ • 6. Upajjhāyasuttavaṇṇanā
