| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
உபஜ்ஜா²யவத்தகதா²
Upajjhāyavattakathā
64-5. அனுபஜ்ஜா²யகாதி வஜ்ஜாவஜ்ஜங் உபனிஜ்ஜா²யகேன க³ருனா விரஹிதா. அனாகப்பஸம்பன்னாதி ந ஆகப்பேன ஸம்பன்னா; ஸமணஸாருப்பாசாரவிரஹிதாதி அத்தோ² . உபரிபோ⁴ஜனேதி போ⁴ஜனஸ்ஸ உபரி. உத்திட்ட²பத்தந்தி பிண்டா³ய சரணகபத்தங். தஸ்மிஞ்ஹி மனுஸ்ஸா உச்சி²ட்ட²ஸஞ்ஞினோ, தஸ்மா உத்திட்ட²பத்தந்தி வுத்தங். அத² வா உட்ட²ஹித்வா பத்தங் உபனாமெந்தீதி ஏவம்பெத்த² அத்தோ² த³ட்ட²ப்³போ³. அனுஜானாமி பி⁴க்க²வே உபஜ்ஜா²யந்தி உபஜ்ஜா²யங் க³ஹேதுங் அனுஜானாமீதி அத்தோ². புத்தசித்தங் உபட்ட²பெஸ்ஸதீதி புத்தோ மே அயந்தி ஏவங் கே³ஹஸ்ஸிதபேமவஸேன சித்தங் உபட்ட²பெஸ்ஸதி. ஏஸ நயோ து³தியபதே³பி. ஸகா³ரவா ஸப்பதிஸ்ஸாதி க³ருபா⁴வஞ்சேவ ஜெட்ட²கபா⁴வஞ்ச உபட்ட²பெத்வா. ஸபா⁴க³வுத்தினோதி ஸபா⁴க³ஜீவிகா. ஸாஹூதி வாதிஆதீ³னி பஞ்ச பதா³னி உபஜ்ஜா²யபா⁴வஸம்படிச்ச²னவேவசனானி. காயேன விஞ்ஞாபேதீதி ஏவங் ஸத்³தி⁴விஹாரிகேன ‘‘உபஜ்ஜா²யோ மே ப⁴ந்தே ஹோஹீ’’தி திக்க²த்துங் வுத்தே ஸசே உபஜ்ஜா²யோ ‘‘ஸாஹூ’’திஆதீ³ஸு பஞ்சஸு பதே³ஸு யஸ்ஸ கஸ்ஸசி பத³ஸ்ஸ வஸேன காயேன வா வாசாய வா காயவாசாஹி வா ‘‘க³ஹிதோ தயா உபஜ்ஜா²யோ’’தி உபஜ்ஜா²யக்³க³ஹணங் விஞ்ஞாபேதி, க³ஹிதோ ஹோதி உபஜ்ஜா²யோ. இத³மேவ ஹி எத்த² உபஜ்ஜா²யக்³க³ஹணங், யதி³த³ங் உபஜ்ஜா²யஸ்ஸ இமேஸு பஞ்சஸு பதே³ஸு யஸ்ஸ கஸ்ஸசி பத³ஸ்ஸ வாசாய வா ஸாவனங் காயேன வா அத்த²விஞ்ஞாபனந்தி. கேசி பன ஸாதூ⁴தி ஸம்படிச்ச²னங் ஸந்தா⁴ய வத³ந்தி. ந தங் பமாணங், ஆயாசனதா³னமத்தேன ஹி க³ஹிதோ ஹோதி உபஜ்ஜா²யோ, ந எத்த² ஸம்படிச்ச²னங் அங்க³ங். ஸத்³தி⁴விஹாரிகேனாபி ந கேவலங் இமினா மே பதே³ன உபஜ்ஜா²யோ க³ஹிதோதி ஞாதுங் வட்டதி. ‘‘அஜ்ஜதக்³கே³ தா³னி தே²ரோ மய்ஹங் பா⁴ரோ, அஹம்பி தே²ரஸ்ஸ பா⁴ரோ’’தி இத³ம்பி ஞாதுங் வட்டதி.
64-5.Anupajjhāyakāti vajjāvajjaṃ upanijjhāyakena garunā virahitā. Anākappasampannāti na ākappena sampannā; samaṇasāruppācāravirahitāti attho . Uparibhojaneti bhojanassa upari. Uttiṭṭhapattanti piṇḍāya caraṇakapattaṃ. Tasmiñhi manussā ucchiṭṭhasaññino, tasmā uttiṭṭhapattanti vuttaṃ. Atha vā uṭṭhahitvā pattaṃ upanāmentīti evampettha attho daṭṭhabbo. Anujānāmi bhikkhave upajjhāyanti upajjhāyaṃ gahetuṃ anujānāmīti attho. Puttacittaṃ upaṭṭhapessatīti putto me ayanti evaṃ gehassitapemavasena cittaṃ upaṭṭhapessati. Esa nayo dutiyapadepi. Sagāravā sappatissāti garubhāvañceva jeṭṭhakabhāvañca upaṭṭhapetvā. Sabhāgavuttinoti sabhāgajīvikā. Sāhūti vātiādīni pañca padāni upajjhāyabhāvasampaṭicchanavevacanāni. Kāyena viññāpetīti evaṃ saddhivihārikena ‘‘upajjhāyo me bhante hohī’’ti tikkhattuṃ vutte sace upajjhāyo ‘‘sāhū’’tiādīsu pañcasu padesu yassa kassaci padassa vasena kāyena vā vācāya vā kāyavācāhi vā ‘‘gahito tayā upajjhāyo’’ti upajjhāyaggahaṇaṃ viññāpeti, gahito hoti upajjhāyo. Idameva hi ettha upajjhāyaggahaṇaṃ, yadidaṃ upajjhāyassa imesu pañcasu padesu yassa kassaci padassa vācāya vā sāvanaṃ kāyena vā atthaviññāpananti. Keci pana sādhūti sampaṭicchanaṃ sandhāya vadanti. Na taṃ pamāṇaṃ, āyācanadānamattena hi gahito hoti upajjhāyo, na ettha sampaṭicchanaṃ aṅgaṃ. Saddhivihārikenāpi na kevalaṃ iminā me padena upajjhāyo gahitoti ñātuṃ vaṭṭati. ‘‘Ajjatagge dāni thero mayhaṃ bhāro, ahampi therassa bhāro’’ti idampi ñātuṃ vaṭṭati.
66. தத்ராயங் ஸம்மாவத்தனாதி யங் வுத்தங் ஸம்மா வத்திதப்³ப³ந்தி, தத்ர அயங் ஸம்மாவத்தனா. காலஸ்ஸேவ உட்டா²ய உபாஹனா ஓமுஞ்சித்வாதி ஸசஸ்ஸ பச்சூஸகாலே சங்கமனத்தா²ய வா தோ⁴தபாத³பரிஹரணத்தா²ய வா படிமுக்கா உபாஹனா பாத³க³தா ஹொந்தி, தா காலஸ்ஸேவ உட்டா²ய அபனெத்வா. த³ந்தகட்ட²ங் தா³தப்³ப³ந்தி மஹந்தங் மஜ்ஜி²மங் கு²த்³த³கந்தி தீணி த³ந்தகட்டா²னி உபனெத்வா ததோ யங் தீணி தி³வஸானி க³ண்ஹாதி, சதுத்த²தி³வஸதோ பட்டா²ய தாதி³ஸமேவ தா³தப்³ப³ங். ஸசே அனியமங் கத்வா யங் வா தங் வா க³ண்ஹாதி, அத² யாதி³ஸங் லப⁴தி தாதி³ஸங் தா³தப்³ப³ங்.
66.Tatrāyaṃ sammāvattanāti yaṃ vuttaṃ sammā vattitabbanti, tatra ayaṃ sammāvattanā. Kālasseva uṭṭhāya upāhanā omuñcitvāti sacassa paccūsakāle caṅkamanatthāya vā dhotapādapariharaṇatthāya vā paṭimukkā upāhanā pādagatā honti, tā kālasseva uṭṭhāya apanetvā. Dantakaṭṭhaṃ dātabbanti mahantaṃ majjhimaṃ khuddakanti tīṇi dantakaṭṭhāni upanetvā tato yaṃ tīṇi divasāni gaṇhāti, catutthadivasato paṭṭhāya tādisameva dātabbaṃ. Sace aniyamaṃ katvā yaṃ vā taṃ vā gaṇhāti, atha yādisaṃ labhati tādisaṃ dātabbaṃ.
முகோ²த³கங் தா³தப்³ப³ந்தி ஸீதஞ்ச உண்ஹஞ்ச உத³கங் உபனெத்வா ததோ யங் தீணி தி³வஸானி வளஞ்ஜேதி, சதுத்த²தி³வஸதோ பட்டா²ய தாதி³ஸமேவ முக²தோ⁴வனோத³கங் தா³தப்³ப³ங். ஸசே அனியமங் கத்வா யங் வா தங் வா க³ண்ஹாதி, அத² யாதி³ஸங் லப⁴தி தாதி³ஸங் தா³தப்³ப³ங். ஸசே து³வித⁴ம்பி வளஞ்ஜேதி, து³வித⁴ம்பி உபனேதப்³ப³ங். உத³கங் முக²தோ⁴வனட்டா²னே ட²பெத்வா வச்சகுடிதோ பட்டா²ய ஸம்மஜ்ஜிதப்³ப³ங். தே²ரே வச்சகுடிங் க³தே பரிவேணங் ஸம்மஜ்ஜிதப்³ப³ங்; ஏவங் பரிவேணங் அஸுஞ்ஞங் ஹோதி. தே²ரே வச்சகுடிதோ அனிக்க²ந்தேயேவ ஆஸனங் பஞ்ஞபேதப்³ப³ங். ஸரீரகிச்சங் கத்வா ஆக³ந்த்வா தஸ்மிங் நிஸின்னஸ்ஸ ‘‘ஸசே யாகு³ ஹோதீ’’திஆதி³னா நயேன வுத்தவத்தங் காதப்³ப³ங். உக்லாபோதி கேனசி கசவரேன ஸங்கிண்ணோ, ஸசே பன அஞ்ஞோ கசவரோ நத்தி², உத³கபு²ஸிதானேவ ஹொந்தி, ஹத்தே²னபி பமஜ்ஜிதப்³போ³.
Mukhodakaṃ dātabbanti sītañca uṇhañca udakaṃ upanetvā tato yaṃ tīṇi divasāni vaḷañjeti, catutthadivasato paṭṭhāya tādisameva mukhadhovanodakaṃ dātabbaṃ. Sace aniyamaṃ katvā yaṃ vā taṃ vā gaṇhāti, atha yādisaṃ labhati tādisaṃ dātabbaṃ. Sace duvidhampi vaḷañjeti, duvidhampi upanetabbaṃ. Udakaṃ mukhadhovanaṭṭhāne ṭhapetvā vaccakuṭito paṭṭhāya sammajjitabbaṃ. There vaccakuṭiṃ gate pariveṇaṃ sammajjitabbaṃ; evaṃ pariveṇaṃ asuññaṃ hoti. There vaccakuṭito anikkhanteyeva āsanaṃ paññapetabbaṃ. Sarīrakiccaṃ katvā āgantvā tasmiṃ nisinnassa ‘‘sace yāgu hotī’’tiādinā nayena vuttavattaṃ kātabbaṃ. Uklāpoti kenaci kacavarena saṅkiṇṇo, sace pana añño kacavaro natthi, udakaphusitāneva honti, hatthenapi pamajjitabbo.
ஸகு³ணங் கத்வாதி த்³வே சீவரானி ஏகதோ கத்வா, தா ஏகதோ கதா த்³வேபி ஸங்கா⁴டியோ தா³தப்³பா³. ஸப்³ப³ஞ்ஹி சீவரங் ஸங்க⁴டிதத்தா ‘‘ஸங்கா⁴டீ’’தி வுச்சதி. தேன வுத்தங் – ‘‘ஸங்கா⁴டியோ தா³தப்³பா³’’தி. நாதிதூ³ரே க³ந்தப்³ப³ங் நாச்சாஸன்னேதி எத்த² ஸசே உபஜ்ஜா²யங் நிவத்தித்வா ஓலோகெந்தங் ஏகேன வா த்³வீஹி வா பத³வீதிஹாரேஹி ஸம்பாபுணாதி, எத்தாவதா நாதிதூ³ரே நாச்சாஸன்னே க³தோ ஹோதீதி வேதி³தப்³ப³ங். பத்தபரியாபன்னங் படிக்³க³ஹேதப்³ப³ந்தி ஸசே உபஜ்ஜா²யேன பி⁴க்கா²சாரே யாகு³யா வா ப⁴த்தே வா லத்³தே⁴ பத்தோ உண்ஹோ வா பா⁴ரிகோ வா ஹோதி, அத்தனோ பத்தங் தஸ்ஸ த³த்வா ஸோ பத்தோ க³ஹேதப்³போ³தி அத்தோ². ந உபஜ்ஜா²யஸ்ஸ ப⁴ணமானஸ்ஸ அந்தரந்தரா கதா² ஓபாதேதப்³பா³தி அந்தரக⁴ரே வா அஞ்ஞத்ர வா ப⁴ணமானஸ்ஸ அனிட்டி²தே தஸ்ஸ வசனே அஞ்ஞா கதா² ந ஸமுட்டா²பேதப்³பா³. இதோ பட்டா²ய ச பன யத்த² யத்த² நகாரேன படிஸேதோ⁴ கரியதி, ஸப்³ப³த்த² து³க்கடாபத்தி வேதி³தப்³பா³. அயஞ்ஹி க²ந்த⁴கத⁴ம்மதா. ஆபத்திஸாமந்தா ப⁴ணமானோதி பத³ஸோத⁴ம்மது³ட்டு²ல்லாதி³வஸேன ஆபத்தியா ஆஸன்னவாசங் ப⁴ணமானோ. நிவாரேதப்³போ³தி ‘‘கிங் ப⁴ந்தே ஈதி³ஸங் நாம வத்துங் வட்டதி, ஆபத்தி ந ஹோதீ’’தி ஏவங் புச்ச²ந்தேன விய வாரேதப்³போ³. வாரெஸ்ஸாமீதி பன கத்வா ‘‘மஹல்லக, மா ஏவங் ப⁴ணா’’தி ந வத்தப்³போ³.
Saguṇaṃ katvāti dve cīvarāni ekato katvā, tā ekato katā dvepi saṅghāṭiyo dātabbā. Sabbañhi cīvaraṃ saṅghaṭitattā ‘‘saṅghāṭī’’ti vuccati. Tena vuttaṃ – ‘‘saṅghāṭiyo dātabbā’’ti. Nātidūre gantabbaṃ nāccāsanneti ettha sace upajjhāyaṃ nivattitvā olokentaṃ ekena vā dvīhi vā padavītihārehi sampāpuṇāti, ettāvatā nātidūre nāccāsanne gato hotīti veditabbaṃ. Pattapariyāpannaṃ paṭiggahetabbanti sace upajjhāyena bhikkhācāre yāguyā vā bhatte vā laddhe patto uṇho vā bhāriko vā hoti, attano pattaṃ tassa datvā so patto gahetabboti attho. Na upajjhāyassa bhaṇamānassa antarantarā kathā opātetabbāti antaraghare vā aññatra vā bhaṇamānassa aniṭṭhite tassa vacane aññā kathā na samuṭṭhāpetabbā. Ito paṭṭhāya ca pana yattha yattha nakārena paṭisedho kariyati, sabbattha dukkaṭāpatti veditabbā. Ayañhi khandhakadhammatā. Āpattisāmantā bhaṇamānoti padasodhammaduṭṭhullādivasena āpattiyā āsannavācaṃ bhaṇamāno. Nivāretabboti ‘‘kiṃ bhante īdisaṃ nāma vattuṃ vaṭṭati, āpatti na hotī’’ti evaṃ pucchantena viya vāretabbo. Vāressāmīti pana katvā ‘‘mahallaka, mā evaṃ bhaṇā’’ti na vattabbo.
பட²மதரங் ஆக³ந்த்வாதி ஸசே ஆஸன்னே கா³மோ ஹோதி, விஹாரே வா கி³லானோ பி⁴க்கு² ஹோதி, கா³மதோ பட²மதரங் ஆக³ந்தப்³ப³ங். ஸசே தூ³ரே கா³மோ ஹோதி, உபஜ்ஜா²யேன ஸத்³தி⁴ங் ஆக³ச்ச²ந்தோ நத்தி², தேனேவ ஸத்³தி⁴ங் கா³மதோ நிக்க²மித்வா சீவரேன பத்தங் வேடெ²த்வா அந்தராமக்³க³தோ பட²மதரங் ஆக³ந்தப்³ப³ங் . ஏவங் நிவத்தந்தேன பட²மதரங் ஆக³ந்த்வா ஆஸனபஞ்ஞாபனாதி³ ஸப்³ப³ங் கிச்சங் காதப்³ப³ங். ஸின்னங் ஹோதீதி திந்தங் ஸேத³க்³க³ஹிதங். சதுரங்கு³லங் கண்ணங் உஸ்ஸாரெத்வாதி கண்ணங் சதுரங்கு³லப்பமாணங் அதிரேகங் கத்வா ஏவங் சீவரங் ஸங்ஹரிதப்³ப³ங். கிங் காரணா? மா மஜ்ஜே² ப⁴ங்கோ³ அஹோஸீதி. ஸமங் கத்வா ஸங்ஹரிதஸ்ஸ ஹி மஜ்ஜே² ப⁴ங்கோ³ ஹோதி, ததோ நிச்சங் பி⁴ஜ்ஜமானங் து³ப்³ப³லங் ஹோதி தங் நிவாரணத்த²மேதங் வுத்தங். தஸ்மா யதா² அஜ்ஜ ப⁴ங்க³ட்டா²னேயேவ ஸ்வே ந பி⁴ஜ்ஜதி, ததா² தி³வஸே தி³வஸே சதுரங்கு³லங் உஸ்ஸாரெத்வா ஸங்ஹரிதப்³ப³ங். ஓபோ⁴கே³ காயப³ந்த⁴னங் காதப்³ப³ந்தி காயப³ந்த⁴னங் ஸங்ஹரித்வா சீவரபோ⁴கே³ பக்கி²பித்வா ட²பேதப்³ப³ங்.
Paṭhamataraṃ āgantvāti sace āsanne gāmo hoti, vihāre vā gilāno bhikkhu hoti, gāmato paṭhamataraṃ āgantabbaṃ. Sace dūre gāmo hoti, upajjhāyena saddhiṃ āgacchanto natthi, teneva saddhiṃ gāmato nikkhamitvā cīvarena pattaṃ veṭhetvā antarāmaggato paṭhamataraṃ āgantabbaṃ . Evaṃ nivattantena paṭhamataraṃ āgantvā āsanapaññāpanādi sabbaṃ kiccaṃ kātabbaṃ. Sinnaṃ hotīti tintaṃ sedaggahitaṃ. Caturaṅgulaṃ kaṇṇaṃ ussāretvāti kaṇṇaṃ caturaṅgulappamāṇaṃ atirekaṃ katvā evaṃ cīvaraṃ saṃharitabbaṃ. Kiṃ kāraṇā? Mā majjhe bhaṅgo ahosīti. Samaṃ katvā saṃharitassa hi majjhe bhaṅgo hoti, tato niccaṃ bhijjamānaṃ dubbalaṃ hoti taṃ nivāraṇatthametaṃ vuttaṃ. Tasmā yathā ajja bhaṅgaṭṭhāneyeva sve na bhijjati, tathā divase divase caturaṅgulaṃ ussāretvā saṃharitabbaṃ. Obhoge kāyabandhanaṃ kātabbanti kāyabandhanaṃ saṃharitvā cīvarabhoge pakkhipitvā ṭhapetabbaṃ.
ஸசே பிண்ட³பாதோ ஹோதீதி எத்த² யோ கா³மேயேவ வா அந்தரக⁴ரே வா படிக்கமனே வா பு⁴ஞ்ஜித்வா ஆக³ச்ச²தி, பிண்ட³ங் வா ந லப⁴தி, தஸ்ஸ பிண்ட³பாதோ ந ஹோதி, கா³மே அபு⁴த்தஸ்ஸ பன லத்³த⁴பி⁴க்க²ஸ்ஸ வா ஹோதி; தஸ்மா ‘‘ஸசே பிண்ட³பாதோ ஹோதீ’’திஆதி³ வுத்தங். ஸசேபி தஸ்ஸ ந ஹோதி, பு⁴ஞ்ஜிதுகாமோ ச ஹோதி, உத³கங் த³த்வா அத்தனா லத்³த⁴தோபி பிண்ட³பாதோ உபனேதப்³போ³. பானீயேன புச்சி²தப்³போ³தி பு⁴ஞ்ஜமானோ திக்க²த்துங் ‘‘பானீயங் ப⁴ந்தே ஆஹரியதூ’’தி பானீயேன புச்சி²தப்³போ³. ஸசே காலோ அத்தி², உபஜ்ஜா²யே பு⁴த்தே ஸயங் பு⁴ஞ்ஜிதப்³ப³ங். ஸசே உபகட்டோ² காலோ, பானீயங் உபஜ்ஜா²யஸ்ஸ ஸந்திகே ட²பெத்வா ஸயம்பி பு⁴ஞ்ஜிதப்³ப³ங்.
Sacepiṇḍapāto hotīti ettha yo gāmeyeva vā antaraghare vā paṭikkamane vā bhuñjitvā āgacchati, piṇḍaṃ vā na labhati, tassa piṇḍapāto na hoti, gāme abhuttassa pana laddhabhikkhassa vā hoti; tasmā ‘‘sace piṇḍapāto hotī’’tiādi vuttaṃ. Sacepi tassa na hoti, bhuñjitukāmo ca hoti, udakaṃ datvā attanā laddhatopi piṇḍapāto upanetabbo. Pānīyena pucchitabboti bhuñjamāno tikkhattuṃ ‘‘pānīyaṃ bhante āhariyatū’’ti pānīyena pucchitabbo. Sace kālo atthi, upajjhāye bhutte sayaṃ bhuñjitabbaṃ. Sace upakaṭṭho kālo, pānīyaṃ upajjhāyassa santike ṭhapetvā sayampi bhuñjitabbaṃ.
அனந்தரஹிதாயாதி தட்டிகத⁴ம்மக²ண்டா³தீ³ஸு யேன கேனசி அனத்த²தாய பங்ஸுஸக்க²ரமிஸ்ஸாய பூ⁴மியா பத்தோ² ந ட²பேதப்³போ³தி அத்தோ². ஸசே பன காளவண்ணகதா வா ஸுதா⁴ப³த்³தா⁴ வா ஹோதி நிரஜமத்திகா, ததா²ரூபாய பூ⁴மியா ட²பேதுங் வட்டதி. தோ⁴தவாலிகாயபி ட²பேதுங் வட்டதி. பங்ஸுரஜஸக்க²ராதீ³ஸு ந வட்டதி. தத்ர பன பண்ணங் வா ஆதா⁴ரகங் வா ட²பெத்வா தத்ர நிக்கி²பிதப்³போ³. பாரதோ அந்தங் ஓரதோ போ⁴க³ந்தி இத³ங் சீவரவங்ஸாதீ³னங் ஹெட்டா² ஹத்த²ங் பவேஸெத்வா அபி⁴முகே²ன ஹத்தே²ன ஸணிகங் நிக்கி²பனத்த²ங் வுத்தங். அந்தே பன க³ஹெத்வா போ⁴கே³ன சீவரவங்ஸாதீ³னங் உபரி நிக்கி²பந்தஸ்ஸ பி⁴த்தியங் போ⁴கோ³ படிஹஞ்ஞதி, தஸ்மா ததா² ந காதப்³ப³ங்.
Anantarahitāyāti taṭṭikadhammakhaṇḍādīsu yena kenaci anatthatāya paṃsusakkharamissāya bhūmiyā pattho na ṭhapetabboti attho. Sace pana kāḷavaṇṇakatā vā sudhābaddhā vā hoti nirajamattikā, tathārūpāya bhūmiyā ṭhapetuṃ vaṭṭati. Dhotavālikāyapi ṭhapetuṃ vaṭṭati. Paṃsurajasakkharādīsu na vaṭṭati. Tatra pana paṇṇaṃ vā ādhārakaṃ vā ṭhapetvā tatra nikkhipitabbo. Pārato antaṃ orato bhoganti idaṃ cīvaravaṃsādīnaṃ heṭṭhā hatthaṃ pavesetvā abhimukhena hatthena saṇikaṃ nikkhipanatthaṃ vuttaṃ. Ante pana gahetvā bhogena cīvaravaṃsādīnaṃ upari nikkhipantassa bhittiyaṃ bhogo paṭihaññati, tasmā tathā na kātabbaṃ.
சுண்ணங் ஸன்னேதப்³ப³ந்தி ந்ஹானசுண்ணங் உத³கேன தேமெத்வா பிண்டி³ காதப்³பா³. ஏகமந்தங் நிக்கி²பிதப்³ப³ந்தி ஏகஸ்மிங் நித்³தூ⁴மே டா²னே ட²பேதப்³ப³ங். ஜந்தாக⁴ரே பரிகம்மங் நாம அங்கா³ரமத்திகஉண்ஹோத³கதா³னாதி³கங் ஸப்³ப³ங் கிச்சங். உத³கேபி பரிகம்மந்தி அங்க³பச்சங்க³க⁴ங்ஸனாதி³கங் ஸப்³ப³ங் கிச்சங். பானீயேன புச்சி²தப்³போ³தி ஜந்தாக⁴ரே உண்ஹஸந்தாபேன பிபாஸா ஹோதி, தஸ்மா புச்சி²தப்³போ³.
Cuṇṇaṃ sannetabbanti nhānacuṇṇaṃ udakena temetvā piṇḍi kātabbā. Ekamantaṃ nikkhipitabbanti ekasmiṃ niddhūme ṭhāne ṭhapetabbaṃ. Jantāghare parikammaṃ nāma aṅgāramattikauṇhodakadānādikaṃ sabbaṃ kiccaṃ. Udakepi parikammanti aṅgapaccaṅgaghaṃsanādikaṃ sabbaṃ kiccaṃ. Pānīyena pucchitabboti jantāghare uṇhasantāpena pipāsā hoti, tasmā pucchitabbo.
ஸசே உஸ்ஸஹதீதி ஸசே பஹோதி; ந கேனசி கே³லஞ்ஞேன அபி⁴பூ⁴தோ ஹோதி; அகி³லானேன ஹி ஸத்³தி⁴விஹாரிகேன ஸட்டி²வஸ்ஸேனாபி ஸப்³ப³ங் உபஜ்ஜா²யவத்தங் காதப்³ப³ங், அனாத³ரேன அகரொந்தஸ்ஸ வத்தபே⁴தே³ து³க்கடங். நகாரபடிஸங்யுத்தேஸு பன பதே³ஸு கி³லானஸ்ஸாபி படிக்கி²த்தகிரியங் கரொந்தஸ்ஸ து³க்கடமேவ. அப்படிக⁴ங்ஸந்தேனாதி பூ⁴மியங் அப்படிக⁴ங்ஸந்தேன. கவாடபிட்ட²ந்தி கவாடஞ்ச பிட்ட²ஸங்கா⁴தஞ்ச அச்சு²பந்தேன. ஸந்தானகந்தி யங்கிஞ்சி கீடகுலாவகமக்கடகஸுத்தாதி³. உல்லோகா பட²மங் ஓஹாரேதப்³ப³ந்தி உல்லோகதோ பட²மங் உல்லோகங் ஆதி³ங்கத்வா அவஹரிதப்³ப³ந்தி அத்தோ². ஆலோகஸந்தி⁴கண்ணபா⁴கா³தி ஆலோகஸந்தி⁴பா⁴கா³ ச கண்ணபா⁴கா³ ச அந்தரபா³ஹிரவாதபானகவாடகானி ச க³ப்³ப⁴ஸ்ஸ ச சத்தாரோ கோணா பமஜ்ஜிதப்³பா³தி அத்தோ².
Sace ussahatīti sace pahoti; na kenaci gelaññena abhibhūto hoti; agilānena hi saddhivihārikena saṭṭhivassenāpi sabbaṃ upajjhāyavattaṃ kātabbaṃ, anādarena akarontassa vattabhede dukkaṭaṃ. Nakārapaṭisaṃyuttesu pana padesu gilānassāpi paṭikkhittakiriyaṃ karontassa dukkaṭameva. Appaṭighaṃsantenāti bhūmiyaṃ appaṭighaṃsantena. Kavāṭapiṭṭhanti kavāṭañca piṭṭhasaṅghātañca acchupantena. Santānakanti yaṃkiñci kīṭakulāvakamakkaṭakasuttādi. Ullokā paṭhamaṃ ohāretabbanti ullokato paṭhamaṃ ullokaṃ ādiṃkatvā avaharitabbanti attho. Ālokasandhikaṇṇabhāgāti ālokasandhibhāgā ca kaṇṇabhāgā ca antarabāhiravātapānakavāṭakāni ca gabbhassa ca cattāro koṇā pamajjitabbāti attho.
யதா²பஞ்ஞத்தங் பஞ்ஞபேதப்³ப³ந்தி யதா² பட²மங் பஞ்ஞத்தங் அஹோஸி, ததே²வ பஞ்ஞபேதப்³ப³ங். ஏதத³த்த²மேவ ஹி யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங் நிக்கி²பிதப்³ப³ந்தி புரிமவத்தங் பஞ்ஞத்தங். ஸசே பன பட²மங் அஜானந்தேன கேனசி பஞ்ஞத்தங் அஹோஸி, ஸமந்ததோ பி⁴த்திங் த்³வங்கு³லமத்தேன வா திவங்கு³லமத்தேன வா மோசெத்வா பஞ்ஞபேதப்³ப³ங். இத³ஞ்ஹி பஞ்ஞாபனவத்தங். ஸசே கடஸாரகோ ஹோதி அதிமஹந்தோ ச, சி²ந்தி³த்வா கோடிங் நிவத்தெத்வா ப³ந்தி⁴த்வா பஞ்ஞபேதப்³போ³. ஸசே கோடிங் நிவத்தெத்வா ப³ந்தி⁴துங் ந ஜானாதி, ந சி²ந்தி³தப்³போ³. புரத்தி²மா வாதபானா த²கேதப்³பா³தி புரத்தி²மாய வாதபானா த²கேதப்³பா³. ஏவங் ஸேஸாபி வாதபானா த²கேதப்³பா³.
Yathāpaññattaṃpaññapetabbanti yathā paṭhamaṃ paññattaṃ ahosi, tatheva paññapetabbaṃ. Etadatthameva hi yathāpaññattaṃ sallakkhetvā nīharitvā ekamantaṃ nikkhipitabbanti purimavattaṃ paññattaṃ. Sace pana paṭhamaṃ ajānantena kenaci paññattaṃ ahosi, samantato bhittiṃ dvaṅgulamattena vā tivaṅgulamattena vā mocetvā paññapetabbaṃ. Idañhi paññāpanavattaṃ. Sace kaṭasārako hoti atimahanto ca, chinditvā koṭiṃ nivattetvā bandhitvā paññapetabbo. Sace koṭiṃ nivattetvā bandhituṃ na jānāti, na chinditabbo. Puratthimā vātapānā thaketabbāti puratthimāya vātapānā thaketabbā. Evaṃ sesāpi vātapānā thaketabbā.
வூபகாஸேதப்³போ³தி அஞ்ஞத்த² நேதப்³போ³. வூபகாஸாபேதப்³போ³தி அஞ்ஞோ பி⁴க்கு² வத்தப்³போ³ ‘‘தே²ரங் க³ஹெத்வா அஞ்ஞத்த² க³ச்சா²’’தி விவேசேதப்³ப³ந்தி விஸ்ஸஜ்ஜாபேதப்³ப³ங். விவேசாபேதப்³ப³ந்தி அஞ்ஞோ வத்தப்³போ³ ‘‘தே²ரங் தி³ட்டி²க³தங் விஸ்ஸஜ்ஜாபேஹீ’’தி. உஸ்ஸுக்கங் காதப்³ப³ந்தி பரிவாஸதா³னத்த²ங் ஸோ ஸோ பி⁴க்கு² உபஸங்கமித்வா யாசிதப்³போ³. ஸசே அத்தனா படிப³லோ ஹோதி, அத்தனாவ தா³தப்³போ³. நோ சே படிப³லோ ஹோதி, அஞ்ஞேன தா³பேதப்³போ³. கிந்தி நு கோ²தி கேன நு கோ² உபாயேன. ஏஸ நயோ ஸப்³ப³த்த². லஹுகாய வா பரிணாமெய்யாதி உக்கே²பனீயங் அகத்வா தஜ்ஜனீயங் வா நியஸ்ஸங் வா கரெய்யாதி அத்தோ². தேன ஹி ‘‘உபஜ்ஜா²யஸ்ஸ உக்கே²பனீயகம்மங் கத்துகாமோ ஸங்கோ⁴’’தி ஞத்வா ஏகமேகங் பி⁴க்கு²ங் உபஸங்கமித்வா ‘‘மா ப⁴ந்தே அம்ஹாகங் உபஜ்ஜா²யஸ்ஸ கம்மங் கரித்தா²’’தி யாசிதப்³பா³. ஸசே கரொந்தியேவ, ‘‘தஜ்ஜனீயங் வா நியஸ்ஸங் வா கரோதா²’’தி யாசிதப்³பா³. ஸசே கரொந்தியேவ, அத² உபஜ்ஜா²யோ ‘‘ஸம்மா வத்தத² ப⁴ந்தே’’தி யாசிதப்³போ³. இதி தங் ஸம்மா வத்தாபெத்வா ‘‘படிப்பஸ்ஸம்பே⁴த² ப⁴ந்தே கம்ம’’ந்தி பி⁴க்கூ² யாசிதப்³பா³.
Vūpakāsetabboti aññattha netabbo. Vūpakāsāpetabboti añño bhikkhu vattabbo ‘‘theraṃ gahetvā aññattha gacchā’’ti vivecetabbanti vissajjāpetabbaṃ. Vivecāpetabbanti añño vattabbo ‘‘theraṃ diṭṭhigataṃ vissajjāpehī’’ti. Ussukkaṃ kātabbanti parivāsadānatthaṃ so so bhikkhu upasaṅkamitvā yācitabbo. Sace attanā paṭibalo hoti, attanāva dātabbo. No ce paṭibalo hoti, aññena dāpetabbo. Kinti nu khoti kena nu kho upāyena. Esa nayo sabbattha. Lahukāya vāpariṇāmeyyāti ukkhepanīyaṃ akatvā tajjanīyaṃ vā niyassaṃ vā kareyyāti attho. Tena hi ‘‘upajjhāyassa ukkhepanīyakammaṃ kattukāmo saṅgho’’ti ñatvā ekamekaṃ bhikkhuṃ upasaṅkamitvā ‘‘mā bhante amhākaṃ upajjhāyassa kammaṃ karitthā’’ti yācitabbā. Sace karontiyeva, ‘‘tajjanīyaṃ vā niyassaṃ vā karothā’’ti yācitabbā. Sace karontiyeva, atha upajjhāyo ‘‘sammā vattatha bhante’’ti yācitabbo. Iti taṃ sammā vattāpetvā ‘‘paṭippassambhetha bhante kamma’’nti bhikkhū yācitabbā.
ஸம்பரிவத்தகங் ஸம்பரிவத்தகந்தி ஸம்பரிவத்தெத்வா ஸம்பரிவத்தெத்வா. ந ச அச்சி²ன்னே தே²வே பக்கமிதப்³ப³ந்தி யதி³ அப்பமத்தகம்பி ரஜனங் க³ளதி, ந தாவ பக்கமிதப்³ப³ங். ந உபஜ்ஜா²யங் அனாபுச்சா² ஏகச்சஸ்ஸ பத்தோ தா³தப்³போ³திஆதி³ ஸப்³ப³ங் உபஜ்ஜா²யஸ்ஸ விஸபா⁴க³புக்³க³லவஸேன கதி²தங். ந உபஜ்ஜா²யங் அனாபுச்சா² கா³மோ பவிஸிதப்³போ³தி பிண்டா³ய வா அஞ்ஞேன வா கரணீயேன பவிஸிதுகாமேன ஆபுச்சி²த்வாவ பவிஸிதப்³போ³. ஸசே உபஜ்ஜா²யோ காலஸ்ஸேவ வுட்டா²ய தூ³ரங் பி⁴க்கா²சாரங் க³ந்துகாமோ ஹோதி, ‘‘த³ஹரா பிண்டா³ய பவிஸந்தூ’’தி வத்வா க³ந்தப்³ப³ங். அவத்வா க³தே பரிவேணங் க³ந்த்வா உபஜ்ஜா²யங் அபஸ்ஸந்தேன கா³மங் பவிஸிதுங் வட்டதி. ஸசே கா³மங் பவிஸந்தோபி பஸ்ஸதி, தி³ட்ட²ட்டா²னதோ பட்டா²ய ஆபுச்சி²துங்யேவ வட்டதி.
Samparivattakaṃ samparivattakanti samparivattetvā samparivattetvā. Na ca acchinne theve pakkamitabbanti yadi appamattakampi rajanaṃ gaḷati, na tāva pakkamitabbaṃ. Na upajjhāyaṃ anāpucchā ekaccassa patto dātabbotiādi sabbaṃ upajjhāyassa visabhāgapuggalavasena kathitaṃ. Na upajjhāyaṃ anāpucchā gāmo pavisitabboti piṇḍāya vā aññena vā karaṇīyena pavisitukāmena āpucchitvāva pavisitabbo. Sace upajjhāyo kālasseva vuṭṭhāya dūraṃ bhikkhācāraṃ gantukāmo hoti, ‘‘daharā piṇḍāya pavisantū’’ti vatvā gantabbaṃ. Avatvā gate pariveṇaṃ gantvā upajjhāyaṃ apassantena gāmaṃ pavisituṃ vaṭṭati. Sace gāmaṃ pavisantopi passati, diṭṭhaṭṭhānato paṭṭhāya āpucchituṃyeva vaṭṭati.
ந ஸுஸானங் க³ந்தப்³ப³ந்தி வாஸத்தா²ய வா த³ஸ்ஸனத்தா²ய வா ந க³ந்தப்³ப³ங். ந தி³ஸா பக்கமிதப்³பா³தி எத்த² பக்கமிதுகாமேன கம்மங் ஆசிக்கி²த்வா யாவததியங் யாசிதப்³போ³. ஸசே அனுஜானாதி, ஸாது⁴; நோ சே அனுஜானாதி, தங் நிஸ்ஸாய வஸதோ சஸ்ஸ உத்³தே³ஸோ வா பரிபுச்சா² வா கம்மட்டா²னங் வா ந ஸம்பஜ்ஜதி, உபஜ்ஜா²யோ பா³லோ ஹோதி அப்³யத்தோ, கேவலங் அத்தனோ ஸந்திகே வஸாபேதுகாமதாய ஏவ க³ந்துங் ந தே³தி, ஏவரூபே நிவாரெந்தேபி க³ந்துங் வட்டதி. வுட்டா²னமஸ்ஸ ஆக³மேதப்³ப³ந்தி கே³லஞ்ஞதோ வுட்டா²னங் அஸ்ஸ ஆக³மேதப்³ப³ங்; ந கத்த²சி க³ந்தப்³ப³ங். ஸசே அஞ்ஞோ பி⁴க்கு² உபட்டா²கோ அத்தி², பே⁴ஸஜ்ஜங் பரியேஸித்வா தஸ்ஸ ஹத்தே² த³த்வா ‘‘ப⁴ந்தே அயங் உபட்ட²ஹிஸ்ஸதீ’’தி வத்வா க³ந்தப்³ப³ங்.
Na susānaṃ gantabbanti vāsatthāya vā dassanatthāya vā na gantabbaṃ. Na disā pakkamitabbāti ettha pakkamitukāmena kammaṃ ācikkhitvā yāvatatiyaṃ yācitabbo. Sace anujānāti, sādhu; no ce anujānāti, taṃ nissāya vasato cassa uddeso vā paripucchā vā kammaṭṭhānaṃ vā na sampajjati, upajjhāyo bālo hoti abyatto, kevalaṃ attano santike vasāpetukāmatāya eva gantuṃ na deti, evarūpe nivārentepi gantuṃ vaṭṭati. Vuṭṭhānamassa āgametabbanti gelaññato vuṭṭhānaṃ assa āgametabbaṃ; na katthaci gantabbaṃ. Sace añño bhikkhu upaṭṭhāko atthi, bhesajjaṃ pariyesitvā tassa hatthe datvā ‘‘bhante ayaṃ upaṭṭhahissatī’’ti vatvā gantabbaṃ.
உபஜ்ஜா²யவத்தகதா² நிட்டி²தா.
Upajjhāyavattakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 15. உபஜ்ஜா²யவத்தகதா² • 15. Upajjhāyavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபஜ்ஜா²யவத்தகதா²வண்ணனா • Upajjhāyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபஜ்ஜா²யவத்தகதா²வண்ணனா • Upajjhāyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபஜ்ஜா²யவத்தகதா²வண்ணனா • Upajjhāyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 15. உபஜ்ஜா²யவத்தகதா² • 15. Upajjhāyavattakathā
