| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உபஜ்ஜா²யவத்தகதா²வண்ணனா
Upajjhāyavattakathāvaṇṇanā
64. வஜ்ஜாவஜ்ஜந்தி கு²த்³த³கங், மஹந்தஞ்ச வஜ்ஜங். உத்திட்ட²பத்தந்தி எத்த² உத்திட்ட²ங் நாம பிண்டா³ய சரணங் வுச்சதி ‘‘உத்திட்டே² நப்பமஜ்ஜெய்யா’’திஆதீ³ஸு (த⁴॰ ப॰ 168) விய. உத்திட்ட²த்தா²ய க³ஹிதங் பத்தங் உத்திட்ட²பத்தங், தேனாஹ ‘‘பிண்டா³ய சரணகபத்த’’ந்தி. தஸ்ஸ உபனாமே கோ தோ³ஸோதி ஆஹ ‘‘தஸ்மிங் ஹீ’’திஆதி³. தஸ்மாதி யஸ்மா மனுஸ்ஸா ஏதஸ்மிங்யேவ ஏதே பு⁴ஞ்ஜந்தீதி உத்திட்ட²பத்தே உச்சி²ட்ட²ஸஞ்ஞினோ, தஸ்மா உத்திட்ட²பத்தந்தி வுத்தங் உத்திட்ட²-ஸத்³தே³னேவ மனுஸ்ஸானங் ஸஞ்ஞாய உச்சி²ட்ட²தாபி க³ம்மதீதி. கேசி பன ‘‘உச்சி²ட்ட²ஸத்³தே³ன ஸமானத்தோ² உத்திட்ட²ஸத்³தோ³’’தி வத³ந்தி. ‘‘உத்திட்டா²’’தி த்வாபச்சயந்தோபி ஹோதீதி ஆஹ ‘‘உட்ட²ஹித்வா’’தி. உபஜ்ஜா²யங் க³ஹேதுந்தி உபஜ்ஜா²யத்தங் மனஸா க³ஹேதுங், யாசனவசனேன தஸ்ஸ அனுமதிங் க³ஹேதுந்தி வா அத்தோ².
64.Vajjāvajjanti khuddakaṃ, mahantañca vajjaṃ. Uttiṭṭhapattanti ettha uttiṭṭhaṃ nāma piṇḍāya caraṇaṃ vuccati ‘‘uttiṭṭhe nappamajjeyyā’’tiādīsu (dha. pa. 168) viya. Uttiṭṭhatthāya gahitaṃ pattaṃ uttiṭṭhapattaṃ, tenāha ‘‘piṇḍāya caraṇakapatta’’nti. Tassa upanāme ko dosoti āha ‘‘tasmiṃ hī’’tiādi. Tasmāti yasmā manussā etasmiṃyeva ete bhuñjantīti uttiṭṭhapatte ucchiṭṭhasaññino, tasmā uttiṭṭhapattanti vuttaṃ uttiṭṭha-saddeneva manussānaṃ saññāya ucchiṭṭhatāpi gammatīti. Keci pana ‘‘ucchiṭṭhasaddena samānattho uttiṭṭhasaddo’’ti vadanti. ‘‘Uttiṭṭhā’’ti tvāpaccayantopi hotīti āha ‘‘uṭṭhahitvā’’ti. Upajjhāyaṃ gahetunti upajjhāyattaṃ manasā gahetuṃ, yācanavacanena tassa anumatiṃ gahetunti vā attho.
65. பதிஸ்ஸயனங் பதிஸ்ஸோ, க³ருங் நிஸ்ஸாய வத்தனபா⁴வோ, யங்கிஞ்சி கா³ரவந்தி அத்தோ². ஸஹ பதிஸ்ஸேன ஸப்பதிஸ்ஸோ, பரங் ஜெட்ட²ங் கத்வா தஸ்ஸோவாதே³ வத்தனதாதி அத்தோ². தேனாஹ ‘‘ஜெட்ட²கபா⁴வஞ்ச உபட்ட²பெத்வா’’தி. ஸாஹூதி ஸாது⁴ ஸுந்த³ரங். லஹூதி அக³ரு, ஸுப⁴ரதாதி அத்தோ². ஓபாயிகந்தி உபாயபடிஸங்யுத்தங், ஏவங் படிபஜ்ஜனங் நித்த²ரணூபாயோதி அத்தோ². பதிரூபந்தி ஸாமீசிகம்மமித³ந்தி அத்தோ². பாஸாதி³கேனாதி பஸாதா³வஹேன காயவசீபயோகே³ன ஸம்பாதே³ஹீதி அத்தோ². காயேனாதி ஏதத³த்த²விஞ்ஞாபகங் ஹத்த²முத்³தா³தி³ங் த³ஸ்ஸெந்தோ காயேன விஞ்ஞாபேதி. ஸாதூ⁴தி ஸம்படிச்ச²னங் ஸந்தா⁴யாதி உபஜ்ஜா²யேன ‘‘ஸாஹூ’’திஆதீ³ஸு வுத்தேஸு ஸத்³தி⁴விஹாரிகஸ்ஸ ‘‘ஸாதூ⁴’’தி ஸம்படிச்ச²னங் வசனங் ஸந்தா⁴ய ‘‘காயேன விஞ்ஞாபேதீ’’திஆதி³ வுத்தந்தி அதி⁴ப்பாயோ. ஆயாசனதா³னமத்தேனாதி ஸத்³தி⁴விஹாரிகஸ்ஸ பட²மங் ஆயாசனமத்தேன, ததோ உபஜ்ஜா²யஸ்ஸ ச ‘‘ஸாஹூ’’திஆதி³னா வசனமத்தேனாதி அத்தோ².
65. Patissayanaṃ patisso, garuṃ nissāya vattanabhāvo, yaṃkiñci gāravanti attho. Saha patissena sappatisso, paraṃ jeṭṭhaṃ katvā tassovāde vattanatāti attho. Tenāha ‘‘jeṭṭhakabhāvañca upaṭṭhapetvā’’ti. Sāhūti sādhu sundaraṃ. Lahūti agaru, subharatāti attho. Opāyikanti upāyapaṭisaṃyuttaṃ, evaṃ paṭipajjanaṃ nittharaṇūpāyoti attho. Patirūpanti sāmīcikammamidanti attho. Pāsādikenāti pasādāvahena kāyavacīpayogena sampādehīti attho. Kāyenāti etadatthaviññāpakaṃ hatthamuddādiṃ dassento kāyena viññāpeti. Sādhūti sampaṭicchanaṃ sandhāyāti upajjhāyena ‘‘sāhū’’tiādīsu vuttesu saddhivihārikassa ‘‘sādhū’’ti sampaṭicchanaṃ vacanaṃ sandhāya ‘‘kāyena viññāpetī’’tiādi vuttanti adhippāyo. Āyācanadānamattenāti saddhivihārikassa paṭhamaṃ āyācanamattena, tato upajjhāyassa ca ‘‘sāhū’’tiādinā vacanamattenāti attho.
66. அஸ்ஸாதி ஸத்³தி⁴விஹாரிகஸ்ஸ. த்³வே சீவரானீதி உத்தராஸங்க³ங், ஸங்கா⁴டிஞ்ச ஸந்தா⁴ய வத³தி. இதோ பட்டா²யாதி ‘‘ந உபஜ்ஜா²யஸ்ஸ ப⁴ணமானஸ்ஸா’’தி எத்த² ந-காரதோ பட்டா²ய, தேன ‘‘நாதிதூ³ரே’’திஆதீ³ஸு ந-காரபடிஸித்³தே⁴ஸு ஆபத்தி நத்தீ²தி த³ஸ்ஸேதி. ஸப்³ப³த்த² து³க்கடாபத்தீதி ஆபதா³உம்மத்தகி²த்தசித்தவேத³னட்டதாதீ³ஹி வினா பண்ணத்திங் அஜானித்வாபி வத³ந்தஸ்ஸ கி³லானஸ்ஸபி து³க்கடமேவ. ஆபதா³ஸு ஹி அந்தரந்தரா கதா² வத்துங் வட்டதி. ஏவமஞ்ஞேஸுபி ந-காரபடிஸித்³தே⁴ஸு ஈதி³ஸேஸு, இதரேஸு பன கி³லானோபி ந முச்சதி. பாளியங் ‘‘ஹெட்டா²பீட²ங் வா பராமஸித்வா’’தி இத³ங் புப்³பே³ தத்த² ட²பிதபத்தாதி³னா அஸங்க⁴ட்டனத்தா²ய வுத்தங், சக்கு²னா ஓலோகெத்வாபி அஞ்ஞேஸங் அபா⁴வங் ஞத்வாபி ட²பேதுங் வட்டதி ஏவ. ஆபத்தியா ஆஸன்னந்தி ஆபத்திகரணமேவ.
66.Assāti saddhivihārikassa. Dve cīvarānīti uttarāsaṅgaṃ, saṅghāṭiñca sandhāya vadati. Ito paṭṭhāyāti ‘‘na upajjhāyassa bhaṇamānassā’’ti ettha na-kārato paṭṭhāya, tena ‘‘nātidūre’’tiādīsu na-kārapaṭisiddhesu āpatti natthīti dasseti. Sabbattha dukkaṭāpattīti āpadāummattakhittacittavedanaṭṭatādīhi vinā paṇṇattiṃ ajānitvāpi vadantassa gilānassapi dukkaṭameva. Āpadāsu hi antarantarā kathā vattuṃ vaṭṭati. Evamaññesupi na-kārapaṭisiddhesu īdisesu, itaresu pana gilānopi na muccati. Pāḷiyaṃ ‘‘heṭṭhāpīṭhaṃ vā parāmasitvā’’ti idaṃ pubbe tattha ṭhapitapattādinā asaṅghaṭṭanatthāya vuttaṃ, cakkhunā oloketvāpi aññesaṃ abhāvaṃ ñatvāpi ṭhapetuṃ vaṭṭati eva. Āpattiyā āsannanti āpattikaraṇameva.
கா³மேதி அந்தோகா³மே தாதி³ஸே மண்ட³பாதி³ம்ஹி. அந்தரக⁴ரேதி அந்தோகே³ஹே. படிக்கமனேதி ஆஸனஸாலாயங். தோ⁴தவாலிகாயாதி உத³கேன க³தட்டா²னே நிரஜாய பரிஸுத்³த⁴வாலிகாய. நித்³தூ⁴மேதி ஜந்தாக⁴ரே ஜலியமானஅக்³கி³தூ⁴மரஹிதே. ஜந்தாக⁴ரஞ்ஹி நாம ஹிமபாதப³ஹுலேஸு தே³ஸேஸு தப்பச்சயரோக³பீளாதி³னிவாரணத்த²ங் ஸரீரஸேதா³பனட்டா²னங். தத்த² கிர அந்த⁴காரபடிச்ச²ன்னதாய ப³ஹூபி ஏகதோ பவிஸித்வா சீவரங் நிக்கி²பித்வா அக்³கி³தாபபரிஹாராய மத்திகாய முக²ங் லிம்பித்வா ஸரீரங் யாவத³த்த²ங் ஸேதெ³த்வா சுண்ணாதீ³ஹி உப்³ப³ட்டெத்வா நஹாயந்தி. தேனேவ பாளியங் ‘‘சுண்ணங் ஸன்னேதப்³ப³’’ந்திஆதி³ வுத்தங். உல்லோகந்தி உத்³த⁴ங் ஓலோகனட்டா²னங். உபரிபா⁴க³ந்தி அத்தோ².
Gāmeti antogāme tādise maṇḍapādimhi. Antaraghareti antogehe. Paṭikkamaneti āsanasālāyaṃ. Dhotavālikāyāti udakena gataṭṭhāne nirajāya parisuddhavālikāya. Niddhūmeti jantāghare jaliyamānaaggidhūmarahite. Jantāgharañhi nāma himapātabahulesu desesu tappaccayarogapīḷādinivāraṇatthaṃ sarīrasedāpanaṭṭhānaṃ. Tattha kira andhakārapaṭicchannatāya bahūpi ekato pavisitvā cīvaraṃ nikkhipitvā aggitāpaparihārāya mattikāya mukhaṃ limpitvā sarīraṃ yāvadatthaṃ sedetvā cuṇṇādīhi ubbaṭṭetvā nahāyanti. Teneva pāḷiyaṃ ‘‘cuṇṇaṃ sannetabba’’ntiādi vuttaṃ. Ullokanti uddhaṃ olokanaṭṭhānaṃ. Uparibhāganti attho.
அஞ்ஞத்த² நேதப்³போ³தி யத்த² விஹரதோ ஸாஸனே அனபி⁴ரதி உப்பன்னா, ததோ அஞ்ஞத்த² கல்யாணமித்தாதி³ஸம்பத்தியுத்தட்டா²னே நேதப்³போ³. விஸபா⁴க³புக்³க³லானந்தி லஜ்ஜினோ வா அலஜ்ஜினோ வா உபஜ்ஜா²யஸ்ஸ அவட்³டி⁴காமே ஸந்தா⁴ய வுத்தங். ஸசே பன உபஜ்ஜா²யோ அலஜ்ஜீ ஓவாத³ம்பி ந க³ண்ஹாதி, லஜ்ஜினோ ச ஏதஸ்ஸ விஸபா⁴கா³ ஹொந்தி, தத்த² உபஜ்ஜா²யங் விஹாய லஜ்ஜீஹேவ ஸத்³தி⁴ங் ஆமிஸாதி³பரிபோ⁴கோ³ காதப்³போ³. உபஜ்ஜா²யாதி³பா⁴வோ ஹெத்த² ந பமாணந்தி த³ட்ட²ப்³ப³ங். பரிவேணங் க³ந்த்வாதி உபஜ்ஜா²யஸ்ஸ பரிவேணங் க³ந்த்வா. ‘‘ந ஸுஸான’’ந்தி இத³ங் உபலக்க²ணங், உபசாரஸீமதோ ப³ஹி க³ந்துகாமேன அனாபுச்சா² க³ந்துங் ந வட்டதி.
Aññattha netabboti yattha viharato sāsane anabhirati uppannā, tato aññattha kalyāṇamittādisampattiyuttaṭṭhāne netabbo. Visabhāgapuggalānanti lajjino vā alajjino vā upajjhāyassa avaḍḍhikāme sandhāya vuttaṃ. Sace pana upajjhāyo alajjī ovādampi na gaṇhāti, lajjino ca etassa visabhāgā honti, tattha upajjhāyaṃ vihāya lajjīheva saddhiṃ āmisādiparibhogo kātabbo. Upajjhāyādibhāvo hettha na pamāṇanti daṭṭhabbaṃ. Pariveṇaṃ gantvāti upajjhāyassa pariveṇaṃ gantvā. ‘‘Na susāna’’nti idaṃ upalakkhaṇaṃ, upacārasīmato bahi gantukāmena anāpucchā gantuṃ na vaṭṭati.
உபஜ்ஜா²யவத்தகதா²வண்ணனா நிட்டி²தா.
Upajjhāyavattakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 15. உபஜ்ஜா²யவத்தகதா² • 15. Upajjhāyavattakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உபஜ்ஜா²யவத்தகதா² • Upajjhāyavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபஜ்ஜா²யவத்தகதா²வண்ணனா • Upajjhāyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபஜ்ஜா²யவத்தகதா²வண்ணனா • Upajjhāyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 15. உபஜ்ஜா²யவத்தகதா² • 15. Upajjhāyavattakathā
