| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. உபகஸுத்தவண்ணனா
8. Upakasuttavaṇṇanā
188. அட்ட²மே நிப்³ப³த்திவஸேன நிரயங் அரஹதி, நிரயஸங்வத்தனியேன வா கம்முனா நிரயே நியுத்தோதி நேரயிகோ. அவீசிம்ஹி உப்பஜ்ஜித்வா தத்த² ஆயுகப்பஸஞ்ஞிதங் அந்தரகப்பங் திட்ட²தீதி கப்பட்டோ². நிரயூபபத்திங் பரிஹரணவஸேன திகிச்சி²துங் அஸக்குணெய்யோதி அதேகிச்சோ². அபரியாதி³ன்னாவாதி அபரிக்கீ²ணாயேவ. ஸசே ஹி ஏகோ பி⁴க்கு² காயானுபஸ்ஸனங் புச்ச²தி, அஞ்ஞோ வேத³னானுபஸ்ஸனங்…பே॰… சித்தானுபஸ்ஸனங். ‘‘இமினா புட்டே² அஹங் புச்சா²மீ’’தி ஏகோ ஏகங் ந ஓலோகேதி, ஏவங் ஸந்தேபி தேஸங் வாரோ பஞ்ஞாயதி ஏவ, பு³த்³தா⁴னங் பன வாரோ ந பஞ்ஞாயதி. வித³த்தி²சதுரங்கு³லங் சா²யங் அதிக்கமனதோ புரேதரங்யேவ ப⁴க³வா சுத்³த³ஸவிதே⁴ன காயானுபஸ்ஸனங், நவவிதே⁴ன வேத³னானுபஸ்ஸனங், ஸோளஸவிதே⁴ன சித்தானுபஸ்ஸனங், பஞ்சவிதே⁴ன த⁴ம்மானுபஸ்ஸனங் கதே²தி. திட்ட²ந்து வா ஏவங் சத்தாரோ. ஸசே ஹி அஞ்ஞே சத்தாரோ ஸம்மப்பதா⁴னேஸு, அஞ்ஞே இத்³தி⁴பாதே³ஸு, அஞ்ஞே பஞ்சிந்த்³ரியேஸு , அஞ்ஞே பஞ்சப³லேஸு, அஞ்ஞே ஸத்தபொ³ஜ்ஜ²ங்கே³ஸு, அஞ்ஞே அட்ட²மக்³க³ங்கே³ஸு பஞ்ஹே புச்செ²ய்யுங், தம்பி ப⁴க³வா கதெ²ய்ய. திட்ட²ந்து வா ஏதே அட்ட². ஸசே அஞ்ஞே ஸத்ததிங்ஸ ஜனா போ³தி⁴பக்கி²யேஸு பஞ்ஹே புச்செ²ய்யுங், தம்பி ப⁴க³வா தாவதே³வ கதெ²ய்ய. கஸ்மா? யாவதா ஹி லோகியமஹாஜனே ஏகங் பத³ங் கதெ²ந்தே தாவ ஆனந்த³த்தே²ரோ அட்ட² பதா³னி கதே²தி. ஆனந்த³த்தே²ரே பன ஏகங் பத³ங் கதெ²ந்தேயேவ ப⁴க³வா ஸோளஸ பதா³னி கதே²தி. கஸ்மா? ப⁴க³வதோ ஹி ஜிவ்ஹா முது³, த³ந்தாவரணங் ஸுபு²ஸிதங், வசனங் அக³ளிதங், ப⁴வங்க³பரிவாஸோ லஹுகோ. தேன வுத்தங் – ‘‘அபரியாதி³ன்னாவஸ்ஸ ததா²க³தஸ்ஸ த⁴ம்மதே³ஸனா, அபரியாதி³ன்னங் த⁴ம்மபத³ப்³யஞ்ஜன’’ந்தி.
188. Aṭṭhame nibbattivasena nirayaṃ arahati, nirayasaṃvattaniyena vā kammunā niraye niyuttoti nerayiko. Avīcimhi uppajjitvā tattha āyukappasaññitaṃ antarakappaṃ tiṭṭhatīti kappaṭṭho. Nirayūpapattiṃ pariharaṇavasena tikicchituṃ asakkuṇeyyoti atekiccho. Apariyādinnāvāti aparikkhīṇāyeva. Sace hi eko bhikkhu kāyānupassanaṃ pucchati, añño vedanānupassanaṃ…pe… cittānupassanaṃ. ‘‘Iminā puṭṭhe ahaṃ pucchāmī’’ti eko ekaṃ na oloketi, evaṃ santepi tesaṃ vāro paññāyati eva, buddhānaṃ pana vāro na paññāyati. Vidatthicaturaṅgulaṃ chāyaṃ atikkamanato puretaraṃyeva bhagavā cuddasavidhena kāyānupassanaṃ, navavidhena vedanānupassanaṃ, soḷasavidhena cittānupassanaṃ, pañcavidhena dhammānupassanaṃ katheti. Tiṭṭhantu vā evaṃ cattāro. Sace hi aññe cattāro sammappadhānesu, aññe iddhipādesu, aññe pañcindriyesu , aññe pañcabalesu, aññe sattabojjhaṅgesu, aññe aṭṭhamaggaṅgesu pañhe puccheyyuṃ, tampi bhagavā katheyya. Tiṭṭhantu vā ete aṭṭha. Sace aññe sattatiṃsa janā bodhipakkhiyesu pañhe puccheyyuṃ, tampi bhagavā tāvadeva katheyya. Kasmā? Yāvatā hi lokiyamahājane ekaṃ padaṃ kathente tāva ānandatthero aṭṭha padāni katheti. Ānandatthere pana ekaṃ padaṃ kathenteyeva bhagavā soḷasa padāni katheti. Kasmā? Bhagavato hi jivhā mudu, dantāvaraṇaṃ suphusitaṃ, vacanaṃ agaḷitaṃ, bhavaṅgaparivāso lahuko. Tena vuttaṃ – ‘‘apariyādinnāvassa tathāgatassa dhammadesanā, apariyādinnaṃ dhammapadabyañjana’’nti.
தத்த² த⁴ம்மதே³ஸனாதி தந்திட்ட²பனா. த⁴ம்மபத³ப்³யஞ்ஜனந்தி எத்த² த⁴ம்மோதி பாளி. பஜ்ஜதி அத்தோ² ஏதேனாதி பத³ங். வாக்யஞ்ச பதே³னேவ ஸங்க³ஹிதங். அத்த²ங் ப்³யஞ்ஜேதீதி ப்³யஞ்ஜனங், அக்க²ரங். தஞ்ஹி பத³வாக்யங் பரிச்சி²ஜ்ஜமானங் தங் தங் அத்த²ங் ப்³யஞ்ஜேதி பகாஸேதி. ஏதேன அபராபரேஹி பத³ப்³யஞ்ஜனேஹி ஸுசிரம்பி காலங் கதெ²ந்தஸ்ஸ ததா²க³தஸ்ஸ ந கதா³சி தேஸங் பரியாதா³னங் அத்தீ²தி த³ஸ்ஸேதி. கு³ணத⁴ங்ஸீதி கு³ணத⁴ங்ஸனஸீலோ. பக³ப்³போ³தி வாசாபாக³ப்³பி³யேன ஸமன்னாக³தோ.
Tattha dhammadesanāti tantiṭṭhapanā. Dhammapadabyañjananti ettha dhammoti pāḷi. Pajjati attho etenāti padaṃ. Vākyañca padeneva saṅgahitaṃ. Atthaṃ byañjetīti byañjanaṃ, akkharaṃ. Tañhi padavākyaṃ paricchijjamānaṃ taṃ taṃ atthaṃ byañjeti pakāseti. Etena aparāparehi padabyañjanehi sucirampi kālaṃ kathentassa tathāgatassa na kadāci tesaṃ pariyādānaṃ atthīti dasseti. Guṇadhaṃsīti guṇadhaṃsanasīlo. Pagabboti vācāpāgabbiyena samannāgato.
உபகஸுத்தவண்ணனா நிட்டி²தா.
Upakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. உபகஸுத்தங் • 8. Upakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. உபகஸுத்தவண்ணனா • 8. Upakasuttavaṇṇanā
