| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৮. উপক্কিলেসসুত্তং
8. Upakkilesasuttaṃ
২৩৬. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে। তেন খো পন সমযেন কোসম্বিযং ভিক্খূ ভণ্ডনজাতা কলহজাতা ৰিৰাদাপন্না অঞ্ঞমঞ্ঞং মুখসত্তীহি ৰিতুদন্তা ৰিহরন্তি। অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতো খো সো ভিক্খু ভগৰন্তং এতদৰোচ – ‘‘ইধ, ভন্তে, কোসম্বিযং ভিক্খূ ভণ্ডনজাতা কলহজাতা ৰিৰাদাপন্না অঞ্ঞমঞ্ঞং মুখসত্তীহি ৰিতুদন্তা ৰিহরন্তি। সাধু, ভন্তে, ভগৰা যেন তে ভিক্খূ তেনুপসঙ্কমতু অনুকম্পং উপাদাযা’’তি। অধিৰাসেসি ভগৰা তুণ্হীভাৰেন। অথ খো ভগৰা যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ এতদৰোচ – ‘‘অলং, ভিক্খৰে, মা ভণ্ডনং, মা কলহং, মা ৰিগ্গহং, মা ৰিৰাদ’’ন্তি।
236. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho so bhikkhu bhagavantaṃ etadavoca – ‘‘idha, bhante, kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Sādhu, bhante, bhagavā yena te bhikkhū tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā yena te bhikkhū tenupasaṅkami; upasaṅkamitvā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti.
এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘আগমেতু, ভন্তে! ভগৰা ধম্মস্সামী; অপ্পোস্সুক্কো, ভন্তে, ভগৰা দিট্ঠধম্মসুখৰিহারং অনুযুত্তো ৰিহরতু; মযমেতেন ভণ্ডনেন কলহেন ৰিগ্গহেন ৰিৰাদেন পঞ্ঞাযিস্সামা’’তি। দুতিযম্পি খো ভগৰা তে ভিক্খূ এতদৰোচ – ‘‘অলং, ভিক্খৰে, মা ভণ্ডনং, মা কলহং, মা ৰিগ্গহং, মা ৰিৰাদ’’ন্তি। দুতিযম্পি খো সো ভিক্খু ভগৰন্তং এতদৰোচ – ‘‘আগমেতু, ভন্তে! ভগৰা ধম্মস্সামী; অপ্পোস্সুক্কো, ভন্তে, ভগৰা দিট্ঠধম্মসুখৰিহারং অনুযুত্তো ৰিহরতু; মযমেতেন ভণ্ডনেন কলহেন ৰিগ্গহেন ৰিৰাদেন পঞ্ঞাযিস্সামা’’তি। ততিযম্পি খো ভগৰা তে ভিক্খূ এতদৰোচ – ‘‘অলং, ভিক্খৰে, মা ভণ্ডনং, মা কলহং, মা ৰিগ্গহং, মা ৰিৰাদ’’ন্তি। ততিযম্পি খো সো ভিক্খু ভগৰন্তং এতদৰোচ – ‘‘আগমেতু, ভন্তে, ভগৰা ধম্মস্সামী; অপ্পোস্সুক্কো, ভন্তে, ভগৰা দিট্ঠধম্মসুখৰিহারং অনুযুত্তো ৰিহরতু; মযমেতেন ভণ্ডনেন কলহেন ৰিগ্গহেন ৰিৰাদেন পঞ্ঞাযিস্সামা’’তি।
Evaṃ vutte, aññataro bhikkhu bhagavantaṃ etadavoca – ‘‘āgametu, bhante! Bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti. Dutiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti. Dutiyampi kho so bhikkhu bhagavantaṃ etadavoca – ‘‘āgametu, bhante! Bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti. Tatiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti. Tatiyampi kho so bhikkhu bhagavantaṃ etadavoca – ‘‘āgametu, bhante, bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti.
অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায কোসম্বিং পিণ্ডায পাৰিসি। কোসম্বিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো সেনাসনং সংসামেত্ৰা পত্তচীৰরমাদায ঠিতকোৰ ইমা গাথা অভাসি –
Atha kho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi. Kosambiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaramādāya ṭhitakova imā gāthā abhāsi –
২৩৭.
237.
‘‘পুথুসদ্দো সমজনো, ন বালো কোচি মঞ্ঞথ।
‘‘Puthusaddo samajano, na bālo koci maññatha;
সঙ্ঘস্মিং ভিজ্জমানস্মিং, নাঞ্ঞং ভিয্যো অমঞ্ঞরুং॥
Saṅghasmiṃ bhijjamānasmiṃ, nāññaṃ bhiyyo amaññaruṃ.
‘‘পরিমুট্ঠা পণ্ডিতাভাসা, ৰাচাগোচরভাণিনো।
‘‘Parimuṭṭhā paṇḍitābhāsā, vācāgocarabhāṇino;
যাৰিচ্ছন্তি মুখাযামং, যেন নীতা ন তং ৰিদূ॥
Yāvicchanti mukhāyāmaṃ, yena nītā na taṃ vidū.
‘‘অক্কোচ্ছি মং অৰধি মং, অজিনি মং অহাসি মে।
‘‘Akkocchi maṃ avadhi maṃ, ajini maṃ ahāsi me;
যে চ তং উপনয্হন্তি, ৰেরং তেসং ন সম্মতি॥
Ye ca taṃ upanayhanti, veraṃ tesaṃ na sammati.
‘‘অক্কোচ্ছি মং অৰধি মং, অজিনি মং অহাসি মে।
‘‘Akkocchi maṃ avadhi maṃ, ajini maṃ ahāsi me;
যে চ তং নুপনয্হন্তি, ৰেরং তেসূপসম্মতি॥
Ye ca taṃ nupanayhanti, veraṃ tesūpasammati.
‘‘ন হি ৰেরেন ৰেরানি, সম্মন্তীধ কুদাচনং।
‘‘Na hi verena verāni, sammantīdha kudācanaṃ;
অৰেরেন চ সম্মন্তি, এস ধম্মো সনন্তনো॥
Averena ca sammanti, esa dhammo sanantano.
‘‘পরে চ ন ৰিজানন্তি, মযমেত্থ যমামসে।
‘‘Pare ca na vijānanti, mayamettha yamāmase;
যে চ তত্থ ৰিজানন্তি, ততো সম্মন্তি মেধগা॥
Ye ca tattha vijānanti, tato sammanti medhagā.
‘‘অট্ঠিচ্ছিন্না পাণহরা, গৰস্সধনহারিনো।
‘‘Aṭṭhicchinnā pāṇaharā, gavassadhanahārino;
রট্ঠং ৰিলুম্পমানানং, তেসম্পি হোতি সঙ্গতি।
Raṭṭhaṃ vilumpamānānaṃ, tesampi hoti saṅgati;
কস্মা তুম্হাকং নো সিযা॥
Kasmā tumhākaṃ no siyā.
‘‘সচে লভেথ নিপকং সহাযং,
‘‘Sace labhetha nipakaṃ sahāyaṃ,
সদ্ধিং চরং সাধুৰিহারি ধীরং।
Saddhiṃ caraṃ sādhuvihāri dhīraṃ;
অভিভুয্য সব্বানি পরিস্সযানি,
Abhibhuyya sabbāni parissayāni,
চরেয্য তেনত্তমনো সতীমা॥
Careyya tenattamano satīmā.
‘‘নো চে লভেথ নিপকং সহাযং,
‘‘No ce labhetha nipakaṃ sahāyaṃ,
সদ্ধিং চরং সাধুৰিহারি ধীরং।
Saddhiṃ caraṃ sādhuvihāri dhīraṃ;
রাজাৰ রট্ঠং ৰিজিতং পহায,
Rājāva raṭṭhaṃ vijitaṃ pahāya,
একো চরে মাতঙ্গরঞ্ঞেৰ নাগো॥
Eko care mātaṅgaraññeva nāgo.
‘‘একস্স চরিতং সেয্যো, নত্থি বালে সহাযতা।
‘‘Ekassa caritaṃ seyyo, natthi bāle sahāyatā;
একো চরে ন চ পাপানি কযিরা,
Eko care na ca pāpāni kayirā,
অপ্পোস্সুক্কো মাতঙ্গরঞ্ঞেৰ নাগো’’তি॥
Appossukko mātaṅgaraññeva nāgo’’ti.
২৩৮. অথ খো ভগৰা ঠিতকোৰ ইমা গাথা ভাসিত্ৰা যেন বালকলোণকারগামো 1 তেনুপসঙ্কমি। তেন খো পন সমযেন আযস্মা ভগু বালকলোণকারগামে ৰিহরতি। অদ্দসা খো আযস্মা ভগু ভগৰন্তং দূরতোৰ আগচ্ছন্তং। দিস্ৰান আসনং পঞ্ঞপেসি উদকঞ্চ পাদানং ধোৰনং 2। নিসীদি ভগৰা পঞ্ঞত্তে আসনে। নিসজ্জ পাদে পক্খালেসি। আযস্মাপি খো ভগু ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং ভগুং ভগৰা এতদৰোচ – ‘‘কচ্চি, ভিক্খু, খমনীযং, কচ্চি যাপনীযং, কচ্চি পিণ্ডকেন ন কিলমসী’’তি? ‘‘খমনীযং ভগৰা, যাপনীযং ভগৰা, ন চাহং, ভন্তে, পিণ্ডকেন কিলমামী’’তি। অথ খো ভগৰা আযস্মন্তং ভগুং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা যেন পাচীনৰংসদাযো তেনুপসঙ্কমি।
238. Atha kho bhagavā ṭhitakova imā gāthā bhāsitvā yena bālakaloṇakāragāmo 3 tenupasaṅkami. Tena kho pana samayena āyasmā bhagu bālakaloṇakāragāme viharati. Addasā kho āyasmā bhagu bhagavantaṃ dūratova āgacchantaṃ. Disvāna āsanaṃ paññapesi udakañca pādānaṃ dhovanaṃ 4. Nisīdi bhagavā paññatte āsane. Nisajja pāde pakkhālesi. Āyasmāpi kho bhagu bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ bhaguṃ bhagavā etadavoca – ‘‘kacci, bhikkhu, khamanīyaṃ, kacci yāpanīyaṃ, kacci piṇḍakena na kilamasī’’ti? ‘‘Khamanīyaṃ bhagavā, yāpanīyaṃ bhagavā, na cāhaṃ, bhante, piṇḍakena kilamāmī’’ti. Atha kho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami.
তেন খো পন সমযেন আযস্মা চ অনুরুদ্ধো আযস্মা চ নন্দিযো 5 আযস্মা চ কিমিলো 6 পাচীনৰংসদাযে ৰিহরন্তি। অদ্দসা খো দাযপালো ভগৰন্তং দূরতোৰ আগচ্ছন্তং। দিস্ৰান ভগৰন্তং এতদৰোচ – ‘‘মা, মহাসমণ, এতং দাযং পাৰিসি। সন্তেত্থ তযো কুলপুত্তা অত্তকামরূপা ৰিহরন্তি। মা তেসং অফাসুমকাসী’’তি। অস্সোসি খো আযস্মা অনুরুদ্ধো দাযপালস্স ভগৰতা সদ্ধিং মন্তযমানস্স। সুত্ৰান দাযপালং এতদৰোচ – ‘‘মা, আৰুসো দাযপাল, ভগৰন্তং ৰারেসি। সত্থা নো ভগৰা অনুপ্পত্তো’’তি।
Tena kho pana samayena āyasmā ca anuruddho āyasmā ca nandiyo 7 āyasmā ca kimilo 8 pācīnavaṃsadāye viharanti. Addasā kho dāyapālo bhagavantaṃ dūratova āgacchantaṃ. Disvāna bhagavantaṃ etadavoca – ‘‘mā, mahāsamaṇa, etaṃ dāyaṃ pāvisi. Santettha tayo kulaputtā attakāmarūpā viharanti. Mā tesaṃ aphāsumakāsī’’ti. Assosi kho āyasmā anuruddho dāyapālassa bhagavatā saddhiṃ mantayamānassa. Sutvāna dāyapālaṃ etadavoca – ‘‘mā, āvuso dāyapāla, bhagavantaṃ vāresi. Satthā no bhagavā anuppatto’’ti.
২৩৯. অথ খো আযস্মা অনুরুদ্ধো যেনাযস্মা চ নন্দিযো যেনাযস্মা চ কিমিলো তেনুপসঙ্কমি; উপসঙ্কমিত্ৰা আযস্মন্তঞ্চ নন্দিযং আযস্মন্তঞ্চ কিমিলং এতদৰোচ – ‘‘অভিক্কমথাযস্মন্তো, অভিক্কমথাযস্মন্তো, সত্থা নো ভগৰা অনুপ্পত্তো’’তি। অথ খো আযস্মা চ অনুরুদ্ধো আযস্মা চ নন্দিযো আযস্মা চ কিমিলো ভগৰন্তং পচ্চুগ্গন্ত্ৰা একো ভগৰতো পত্তচীৰরং পটিগ্গহেসি, একো আসনং পঞ্ঞপেসি, একো পাদোদকং উপট্ঠপেসি। নিসীদি ভগৰা পঞ্ঞত্তে আসনে। নিসজ্জ পাদে পক্খালেসি। তেপি খো আযস্মন্তো ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্নং খো আযস্মন্তং অনুরুদ্ধং ভগৰা এতদৰোচ – ‘‘কচ্চি ৰো, অনুরুদ্ধা, খমনীযং, কচ্চি যাপনীযং, কচ্চি পিণ্ডকেন ন কিলমথা’’তি? ‘‘খমনীযং ভগৰা, যাপনীযং ভগৰা, ন চ মযং, ভন্তে, পিণ্ডকেন কিলমামা’’তি। ‘‘কচ্চি পন ৰো, অনুরুদ্ধা, সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরথা’’তি? ‘‘তগ্ঘ মযং, ভন্তে, সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরামা’’তি। ‘‘যথা কথং পন তুম্হে, অনুরুদ্ধা, সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরথা’’তি? ‘‘ইধ ময্হং, ভন্তে, এৰং হোতি – ‘লাভা ৰত মে, সুলদ্ধং ৰত মে যোহং এৰরূপেহি সব্রহ্মচারীহি সদ্ধিং ৰিহরামী’তি। তস্স ময্হং, ভন্তে, ইমেসু আযস্মন্তেসু মেত্তং কাযকম্মং পচ্চুপট্ঠিতং আৰি চেৰ রহো চ, মেত্তং ৰচীকম্মং পচ্চুপট্ঠিতং আৰি চেৰ রহো চ, মেত্তং মনোকম্মং পচ্চুপট্ঠিতং আৰি চেৰ রহো চ। তস্স, ময্হং, ভন্তে, এৰং হোতি – ‘যংনূনাহং সকং চিত্তং নিক্খিপিত্ৰা ইমেসংযেৰ আযস্মন্তানং চিত্তস্স ৰসেন ৰত্তেয্য’ন্তি। সো খো অহং, ভন্তে, সকং চিত্তং নিক্খিপিত্ৰা ইমেসংযেৰ আযস্মন্তানং চিত্তস্স ৰসেন ৰত্তামি। নানা হি খো নো, ভন্তে, কাযা, একঞ্চ পন মঞ্ঞে চিত্ত’’ন্তি।
239. Atha kho āyasmā anuruddho yenāyasmā ca nandiyo yenāyasmā ca kimilo tenupasaṅkami; upasaṅkamitvā āyasmantañca nandiyaṃ āyasmantañca kimilaṃ etadavoca – ‘‘abhikkamathāyasmanto, abhikkamathāyasmanto, satthā no bhagavā anuppatto’’ti. Atha kho āyasmā ca anuruddho āyasmā ca nandiyo āyasmā ca kimilo bhagavantaṃ paccuggantvā eko bhagavato pattacīvaraṃ paṭiggahesi, eko āsanaṃ paññapesi, eko pādodakaṃ upaṭṭhapesi. Nisīdi bhagavā paññatte āsane. Nisajja pāde pakkhālesi. Tepi kho āyasmanto bhagavantaṃ abhivādetvā ekamantaṃ nisīdiṃsu. Ekamantaṃ nisinnaṃ kho āyasmantaṃ anuruddhaṃ bhagavā etadavoca – ‘‘kacci vo, anuruddhā, khamanīyaṃ, kacci yāpanīyaṃ, kacci piṇḍakena na kilamathā’’ti? ‘‘Khamanīyaṃ bhagavā, yāpanīyaṃ bhagavā, na ca mayaṃ, bhante, piṇḍakena kilamāmā’’ti. ‘‘Kacci pana vo, anuruddhā, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathā’’ti? ‘‘Taggha mayaṃ, bhante, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharāmā’’ti. ‘‘Yathā kathaṃ pana tumhe, anuruddhā, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathā’’ti? ‘‘Idha mayhaṃ, bhante, evaṃ hoti – ‘lābhā vata me, suladdhaṃ vata me yohaṃ evarūpehi sabrahmacārīhi saddhiṃ viharāmī’ti. Tassa mayhaṃ, bhante, imesu āyasmantesu mettaṃ kāyakammaṃ paccupaṭṭhitaṃ āvi ceva raho ca, mettaṃ vacīkammaṃ paccupaṭṭhitaṃ āvi ceva raho ca, mettaṃ manokammaṃ paccupaṭṭhitaṃ āvi ceva raho ca. Tassa, mayhaṃ, bhante, evaṃ hoti – ‘yaṃnūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyya’nti. So kho ahaṃ, bhante, sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi. Nānā hi kho no, bhante, kāyā, ekañca pana maññe citta’’nti.
আযস্মাপি খো নন্দিযো…পে॰… আযস্মাপি খো কিমিলো ভগৰন্তং এতদৰোচ – ‘‘ময্হম্পি খো, ভন্তে, এৰং হোতি – ‘লাভা ৰত মে, সুলদ্ধং ৰত মে যোহং এৰরূপেহি সব্রহ্মচারীহি সদ্ধিং ৰিহরামী’তি। তস্স ময্হং, ভন্তে, ইমেসু আযস্মন্তেসু মেত্তং কাযকম্মং পচ্চুপট্ঠিতং আৰি চেৰ রহো চ, মেত্তং ৰচীকম্মং পচ্চুপট্ঠিতং আৰি চেৰ রহো চ, মেত্তং মনোকম্মং পচ্চুপট্ঠিতং আৰি চেৰ রহো চ। তস্স ময্হং, ভন্তে, এৰং হোতি – ‘যংনূনাহং সকং চিত্তং নিক্খিপিত্ৰা ইমেসংযেৰ আযস্মন্তানং চিত্তস্স ৰসেন ৰত্তেয্য’ন্তি। সো খো অহং, ভন্তে, সকং চিত্তং নিক্খিপিত্ৰা ইমেসংযেৰ আযস্মন্তানং চিত্তস্স ৰসেন ৰত্তামি। নানা হি খো নো, ভন্তে, কাযা, একঞ্চ পন মঞ্ঞে চিত্তন্তি। এৰং খো মযং, ভন্তে, সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরামা’’তি।
Āyasmāpi kho nandiyo…pe… āyasmāpi kho kimilo bhagavantaṃ etadavoca – ‘‘mayhampi kho, bhante, evaṃ hoti – ‘lābhā vata me, suladdhaṃ vata me yohaṃ evarūpehi sabrahmacārīhi saddhiṃ viharāmī’ti. Tassa mayhaṃ, bhante, imesu āyasmantesu mettaṃ kāyakammaṃ paccupaṭṭhitaṃ āvi ceva raho ca, mettaṃ vacīkammaṃ paccupaṭṭhitaṃ āvi ceva raho ca, mettaṃ manokammaṃ paccupaṭṭhitaṃ āvi ceva raho ca. Tassa mayhaṃ, bhante, evaṃ hoti – ‘yaṃnūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyya’nti. So kho ahaṃ, bhante, sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi. Nānā hi kho no, bhante, kāyā, ekañca pana maññe cittanti. Evaṃ kho mayaṃ, bhante, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharāmā’’ti.
২৪০. ‘‘সাধু, সাধু, অনুরুদ্ধা! কচ্চি পন ৰো, অনুরুদ্ধা, অপ্পমত্তা আতাপিনো পহিতত্তা ৰিহরথা’’তি? ‘‘তগ্ঘ মযং, ভন্তে, অপ্পমত্তা আতাপিনো পহিতত্তা ৰিহরামা’’তি। ‘‘যথা কথং পন তুম্হে, অনুরুদ্ধা, অপ্পমত্তা আতাপিনো পহিতত্তা ৰিহরথা’’তি? ‘‘ইধ, ভন্তে, অম্হাকং যো পঠমং গামতো পিণ্ডায পটিক্কমতি, সো আসনানি পঞ্ঞপেতি, পানীযং পরিভোজনীযং উপট্ঠাপেতি, অৰক্কারপাতিং উপট্ঠাপেতি। যো পচ্ছা গামতো পিণ্ডায পটিক্কমতি – সচে হোতি ভুত্তাৰসেসো, সচে আকঙ্খতি, ভুঞ্জতি; নো চে আকঙ্খতি, অপ্পহরিতে ৰা ছড্ডেতি অপাণকে ৰা উদকে ওপিলাপেতি – সো আসনানি পটিসামেতি, পানীযং পরিভোজনীযং পটিসামেতি, অৰক্কারপাতিং ধোৰিত্ৰা পটিসামেতি, ভত্তগ্গং সম্মজ্জতি। যো পস্সতি পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং সো উপট্ঠাপেতি। সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেম 9, ন ত্ৰেৰ মযং, ভন্তে, তপ্পচ্চযা ৰাচং ভিন্দাম। পঞ্চাহিকং খো পন মযং, ভন্তে, সব্বরত্তিং ধম্মিযা কথায সন্নিসীদাম। এৰং খো মযং, ভন্তে, অপ্পমত্তা আতাপিনো পহিতত্তা ৰিহরামা’’তি।
240. ‘‘Sādhu, sādhu, anuruddhā! Kacci pana vo, anuruddhā, appamattā ātāpino pahitattā viharathā’’ti? ‘‘Taggha mayaṃ, bhante, appamattā ātāpino pahitattā viharāmā’’ti. ‘‘Yathā kathaṃ pana tumhe, anuruddhā, appamattā ātāpino pahitattā viharathā’’ti? ‘‘Idha, bhante, amhākaṃ yo paṭhamaṃ gāmato piṇḍāya paṭikkamati, so āsanāni paññapeti, pānīyaṃ paribhojanīyaṃ upaṭṭhāpeti, avakkārapātiṃ upaṭṭhāpeti. Yo pacchā gāmato piṇḍāya paṭikkamati – sace hoti bhuttāvaseso, sace ākaṅkhati, bhuñjati; no ce ākaṅkhati, appaharite vā chaḍḍeti apāṇake vā udake opilāpeti – so āsanāni paṭisāmeti, pānīyaṃ paribhojanīyaṃ paṭisāmeti, avakkārapātiṃ dhovitvā paṭisāmeti, bhattaggaṃ sammajjati. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeti. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpema 10, na tveva mayaṃ, bhante, tappaccayā vācaṃ bhindāma. Pañcāhikaṃ kho pana mayaṃ, bhante, sabbarattiṃ dhammiyā kathāya sannisīdāma. Evaṃ kho mayaṃ, bhante, appamattā ātāpino pahitattā viharāmā’’ti.
২৪১. ‘‘সাধু, সাধু, অনুরুদ্ধা! অত্থি পন ৰো, অনুরুদ্ধা, এৰং অপ্পমত্তানং আতাপীনং পহিতত্তানং ৰিহরতং উত্তরিমনুস্সধম্মা অলমরিযঞাণদস্সনৰিসেসো অধিগতো ফাসুৰিহারো’’তি? ‘‘ইধ মযং, ভন্তে, অপ্পমত্তা আতাপিনো পহিতত্তা ৰিহরন্তা ওভাসঞ্চেৰ সঞ্জানাম দস্সনঞ্চ রূপানং। সো খো পন নো ওভাসো নচিরস্সেৰ অন্তরধাযতি দস্সনঞ্চ রূপানং; তঞ্চ নিমিত্তং নপ্পটিৰিজ্ঝামা’’তি।
241. ‘‘Sādhu, sādhu, anuruddhā! Atthi pana vo, anuruddhā, evaṃ appamattānaṃ ātāpīnaṃ pahitattānaṃ viharataṃ uttarimanussadhammā alamariyañāṇadassanaviseso adhigato phāsuvihāro’’ti? ‘‘Idha mayaṃ, bhante, appamattā ātāpino pahitattā viharantā obhāsañceva sañjānāma dassanañca rūpānaṃ. So kho pana no obhāso nacirasseva antaradhāyati dassanañca rūpānaṃ; tañca nimittaṃ nappaṭivijjhāmā’’ti.
‘‘তং খো পন ৰো, অনুরুদ্ধা, নিমিত্তং পটিৰিজ্ঝিতব্বং। অহম্পি সুদং, অনুরুদ্ধা, পুব্বেৰ সম্বোধা অনভিসম্বুদ্ধো বোধিসত্তোৰ সমানো ওভাসঞ্চেৰ সঞ্জানামি দস্সনঞ্চ রূপানং। সো খো পন মে ওভাসো নচিরস্সেৰ অন্তরধাযতি দস্সনঞ্চ রূপানং। তস্স ময্হং, অনুরুদ্ধা, এতদহোসি – ‘কো নু খো হেতু কো পচ্চযো যেন মে ওভাসো অন্তরধাযতি দস্সনঞ্চ রূপান’ন্তি? তস্স ময্হং, অনুরুদ্ধা, এতদহোসি – ‘ৰিচিকিচ্ছা খো মে উদপাদি, ৰিচিকিচ্ছাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতী’’’তি।
‘‘Taṃ kho pana vo, anuruddhā, nimittaṃ paṭivijjhitabbaṃ. Ahampi sudaṃ, anuruddhā, pubbeva sambodhā anabhisambuddho bodhisattova samāno obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ, anuruddhā, etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti? Tassa mayhaṃ, anuruddhā, etadahosi – ‘vicikicchā kho me udapādi, vicikicchādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissatī’’’ti.
‘‘সো খো অহং, অনুরুদ্ধা, অপ্পমত্তো আতাপী পহিতত্তো ৰিহরন্তো ওভাসঞ্চেৰ সঞ্জানামি দস্সনঞ্চ রূপানং। সো খো পন মে ওভাসো নচিরস্সেৰ অন্তরধাযতি দস্সনঞ্চ রূপানং। তস্স ময্হং, অনুরুদ্ধা, এতদহোসি – ‘কো নু খো হেতু কো পচ্চযো যেন মে ওভাসো অন্তরধাযতি দস্সনঞ্চ রূপান’ন্তি? তস্স ময্হং, অনুরুদ্ধা, এতদহোসি – ‘অমনসিকারো খো মে উদপাদি, অমনসিকারাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি ন অমনসিকারো’’’তি।
‘‘So kho ahaṃ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ, anuruddhā, etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti? Tassa mayhaṃ, anuruddhā, etadahosi – ‘amanasikāro kho me udapādi, amanasikārādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro’’’ti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘থিনমিদ্ধং খো মে উদপাদি, থিনমিদ্ধাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি ন অমনসিকারো ন থিনমিদ্ধ’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘thinamiddhaṃ kho me udapādi, thinamiddhādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro na thinamiddha’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘ছম্ভিতত্তং খো মে উদপাদি, ছম্ভিতত্তাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সেয্যথাপি, অনুরুদ্ধা, পুরিসো অদ্ধানমগ্গপ্পটিপন্নো, তস্স উভতোপস্সে ৰট্টকা 11 উপ্পতেয্যুং, তস্স ততোনিদানং ছম্ভিতত্তং উপ্পজ্জেয্য; এৰমেৰ খো মে, অনুরুদ্ধা, ছম্ভিতত্তং উদপাদি, ছম্ভিতত্তাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি ন অমনসিকারো ন থিনমিদ্ধং ন ছম্ভিতত্ত’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘chambhitattaṃ kho me udapādi, chambhitattādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso addhānamaggappaṭipanno, tassa ubhatopasse vaṭṭakā 12 uppateyyuṃ, tassa tatonidānaṃ chambhitattaṃ uppajjeyya; evameva kho me, anuruddhā, chambhitattaṃ udapādi, chambhitattādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro na thinamiddhaṃ na chambhitatta’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘উপ্পিলং 13 খো মে উদপাদি, উপ্পিলাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং । সেয্যথাপি, অনুরুদ্ধা, পুরিসো একং নিধিমুখং গৰেসন্তো সকিদেৰ পঞ্চনিধিমুখানি অধিগচ্ছেয্য, তস্স ততোনিদানং উপ্পিলং উপ্পজ্জেয্য; এৰমেৰ খো মে, অনুরুদ্ধা, উপ্পিলং উদপাদি, উপ্পিলাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিল’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘uppilaṃ 14 kho me udapādi, uppilādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ . Seyyathāpi, anuruddhā, puriso ekaṃ nidhimukhaṃ gavesanto sakideva pañcanidhimukhāni adhigaccheyya, tassa tatonidānaṃ uppilaṃ uppajjeyya; evameva kho me, anuruddhā, uppilaṃ udapādi, uppilādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppila’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘দুট্ঠুল্লং খো মে উদপাদি, দুট্ঠুল্লাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্ল’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘duṭṭhullaṃ kho me udapādi, duṭṭhullādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhulla’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘অচ্চারদ্ধৰীরিযং খো মে উদপাদি, অচ্চারদ্ধৰীরিযাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সেয্যথাপি, অনুরুদ্ধা, পুরিসো উভোহি হত্থেহি ৰট্টকং গাল়্হং গণ্হেয্য, সো তত্থেৰ পতমেয্য 15; এৰমেৰ খো মে, অনুরুদ্ধা, অচ্চারদ্ধৰীরিযং উদপাদি, অচ্চারদ্ধৰীরিযাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্লং, ন অচ্চারদ্ধৰীরিয’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘accāraddhavīriyaṃ kho me udapādi, accāraddhavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso ubhohi hatthehi vaṭṭakaṃ gāḷhaṃ gaṇheyya, so tattheva patameyya 16; evameva kho me, anuruddhā, accāraddhavīriyaṃ udapādi, accāraddhavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriya’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘অতিলীনৰীরিযং খো মে উদপাদি , অতিলীনৰীরিযাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সেয্যথাপি, অনুরুদ্ধা, পুরিসো ৰট্টকং সিথিলং গণ্হেয্য, সো তস্স হত্থতো উপ্পতেয্য; এৰমেৰ খো মে, অনুরুদ্ধা, অতিলীনৰীরিযং উদপাদি, অতিলীনৰীরিযাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্লং, ন অচ্চারদ্ধৰীরিযং, ন অতিলীনৰীরিয’’’ন্তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘atilīnavīriyaṃ kho me udapādi , atilīnavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso vaṭṭakaṃ sithilaṃ gaṇheyya, so tassa hatthato uppateyya; evameva kho me, anuruddhā, atilīnavīriyaṃ udapādi, atilīnavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriya’’’nti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘অভিজপ্পা খো মে উদপাদি, অভিজপ্পাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্লং, ন অচ্চারদ্ধৰীরিযং, ন অতিলীনৰীরিযং, ন অভিজপ্পা’’’তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘abhijappā kho me udapādi, abhijappādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā’’’ti.
‘‘সো খো অহং, অনুরুদ্ধা…পে॰… তস্স ময্হং, অনুরুদ্ধা, এতদহোসি – ‘নানত্তসঞ্ঞা খো মে উদপাদি, নানত্তসঞ্ঞাধিকরণঞ্চ পন মে সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্লং, ন অচ্চারদ্ধৰীরিযং, ন অতিলীনৰীরিযং, ন অভিজপ্পা, ন নানত্তসঞ্ঞা’’’তি।
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘nānattasaññā kho me udapādi, nānattasaññādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā, na nānattasaññā’’’ti.
‘‘সো খো অহং, অনুরুদ্ধা, অপ্পমত্তো আতাপী পহিতত্তো ৰিহরন্তো ওভাসঞ্চেৰ সঞ্জানামি দস্সনঞ্চ রূপানং। সো খো পন মে ওভাসো নচিরস্সেৰ অন্তরধাযতি দস্সনঞ্চ রূপানং। তস্স ময্হং অনুরুদ্ধা এতদহোসি – ‘কো নু খো হেতু কো পচ্চযো যেন মে ওভাসো অন্তরধাযতি দস্সনঞ্চ রূপান’ন্তি। তস্স ময্হং, অনুরুদ্ধা, এতদহোসি – ‘অতিনিজ্ঝাযিতত্তং খো মে রূপানং উদপাদি, অতিনিজ্ঝাযিতত্তাধিকরণঞ্চ পন মে রূপানং সমাধি চৰি। সমাধিম্হি চুতে ওভাসো অন্তরধাযতি দস্সনঞ্চ রূপানং। সোহং তথা করিস্সামি যথা মে পুন ন ৰিচিকিচ্ছা উপ্পজ্জিস্সতি, ন অমনসিকারো, ন থিনমিদ্ধং, ন ছম্ভিতত্তং, ন উপ্পিলং, ন দুট্ঠুল্লং, ন অচ্চারদ্ধৰীরিযং, ন অতিলীনৰীরিযং, ন অভিজপ্পা, ন নানত্তসঞ্ঞা, ন অতিনিজ্ঝাযিতত্তং রূপান’’’ন্তি।
‘‘So kho ahaṃ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ anuruddhā etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti. Tassa mayhaṃ, anuruddhā, etadahosi – ‘atinijjhāyitattaṃ kho me rūpānaṃ udapādi, atinijjhāyitattādhikaraṇañca pana me rūpānaṃ samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā, na nānattasaññā, na atinijjhāyitattaṃ rūpāna’’’nti.
২৪২. ‘‘সো খো অহং, অনুরুদ্ধা, ‘ৰিচিকিচ্ছা চিত্তস্স উপক্কিলেসো’তি – ইতি ৰিদিত্ৰা ৰিচিকিচ্ছং চিত্তস্স উপক্কিলেসং পজহিং, ‘অমনসিকারো চিত্তস্স উপক্কিলেসো’তি – ইতি ৰিদিত্ৰা অমনসিকারং চিত্তস্স উপক্কিলেসং পজহিং, ‘থিনমিদ্ধং চিত্তস্স উপক্কিলেসো’তি – ইতি ৰিদিত্ৰা থিনমিদ্ধং চিত্তস্স উপক্কিলেসং পজহিং, ‘ছম্ভিতত্তং চিত্তস্স উপক্কিলেসো’তি – ইতি ৰিদিত্ৰা ছম্ভিতত্তং চিত্তস্স উপক্কিলেসং পজহিং, ‘উপ্পিলং চিত্তস্স উপক্কিলেসো’তি – ইতি ৰিদিত্ৰা উপ্পিলং চিত্তস্স উপক্কিলেসং পজহিং, ‘দুট্ঠুল্লং চিত্তস্স উপক্কিলেসো’তি – ইতি ৰিদিত্ৰা দুট্ঠুল্লং চিত্তস্স উপক্কিলেসং পজহিং, ‘অচ্চারদ্ধৰীরিযং চিত্তস্স উপক্কিলেসো’তি – ইতি ৰিদিত্ৰা অচ্চারদ্ধৰীরিযং চিত্তস্স উপক্কিলেসং পজহিং, ‘অতিলীনৰীরিযং চিত্তস্স উপক্কিলেসো’তি – ইতি ৰিদিত্ৰা অতিলীনৰীরিযং চিত্তস্স উপক্কিলেসং পজহিং, ‘অভিজপ্পা চিত্তস্স উপক্কিলেসো’তি – ইতি ৰিদিত্ৰা অভিজপ্পং চিত্তস্স উপক্কিলেসং পজহিং, ‘নানত্তসঞ্ঞা চিত্তস্স উপক্কিলেসো’তি – ইতি ৰিদিত্ৰা নানত্তসঞ্ঞং চিত্তস্স উপক্কিলেসং পজহিং, ‘অতিনিজ্ঝাযিতত্তং রূপানং চিত্তস্স উপক্কিলেসো’তি – ইতি ৰিদিত্ৰা অতিনিজ্ঝাযিতত্তং রূপানং চিত্তস্স উপক্কিলেসং পজহিং।
242. ‘‘So kho ahaṃ, anuruddhā, ‘vicikicchā cittassa upakkileso’ti – iti viditvā vicikicchaṃ cittassa upakkilesaṃ pajahiṃ, ‘amanasikāro cittassa upakkileso’ti – iti viditvā amanasikāraṃ cittassa upakkilesaṃ pajahiṃ, ‘thinamiddhaṃ cittassa upakkileso’ti – iti viditvā thinamiddhaṃ cittassa upakkilesaṃ pajahiṃ, ‘chambhitattaṃ cittassa upakkileso’ti – iti viditvā chambhitattaṃ cittassa upakkilesaṃ pajahiṃ, ‘uppilaṃ cittassa upakkileso’ti – iti viditvā uppilaṃ cittassa upakkilesaṃ pajahiṃ, ‘duṭṭhullaṃ cittassa upakkileso’ti – iti viditvā duṭṭhullaṃ cittassa upakkilesaṃ pajahiṃ, ‘accāraddhavīriyaṃ cittassa upakkileso’ti – iti viditvā accāraddhavīriyaṃ cittassa upakkilesaṃ pajahiṃ, ‘atilīnavīriyaṃ cittassa upakkileso’ti – iti viditvā atilīnavīriyaṃ cittassa upakkilesaṃ pajahiṃ, ‘abhijappā cittassa upakkileso’ti – iti viditvā abhijappaṃ cittassa upakkilesaṃ pajahiṃ, ‘nānattasaññā cittassa upakkileso’ti – iti viditvā nānattasaññaṃ cittassa upakkilesaṃ pajahiṃ, ‘atinijjhāyitattaṃ rūpānaṃ cittassa upakkileso’ti – iti viditvā atinijjhāyitattaṃ rūpānaṃ cittassa upakkilesaṃ pajahiṃ.
২৪৩. ‘‘সো খো অহং, অনুরুদ্ধা, অপ্পমত্তো আতাপী পহিতত্তো ৰিহরন্তো ওভাসঞ্হি খো সঞ্জানামি, ন চ রূপানি পস্সামি; রূপানি হি খো পস্সামি, ন চ ওভাসং সঞ্জানামি – ‘কেৰলম্পি রত্তিং, কেৰলম্পি দিৰং 17, কেৰলম্পি রত্তিন্দিৰং’ 18। তস্স ময্হং, অনুরুদ্ধা, এতদহোসি – ‘কো নু খো হেতু কো পচ্চযো য্ৰাহং ওভাসঞ্হি খো সঞ্জানামি ন চ রূপানি পস্সামি; রূপানি হি খো 19 পস্সামি ন চ ওভাসং সঞ্জানামি – কেৰলম্পি রত্তিং, কেৰলম্পি দিৰং, কেৰলম্পি রত্তিন্দিৰ’ন্তি। তস্স ময্হং, অনুরুদ্ধা, এতদহোসি – ‘যস্মিঞ্হি খো অহং সমযে রূপনিমিত্তং অমনসিকরিত্ৰা ওভাসনিমিত্তং মনসি করোমি, ওভাসঞ্হি খো তস্মিং সমযে সঞ্জানামি, ন চ রূপানি পস্সামি। যস্মিং পনাহং সমযে ওভাসনিমিত্তং অমনসিকরিত্ৰা রূপনিমিত্তং মনসি করোমি, রূপানি হি খো তস্মিং সমযে পস্সামি ন চ ওভাসং সঞ্জানামি – কেৰলম্পি রত্তিং, কেৰলম্পি দিৰং, কেৰলম্পি রত্তিন্দিৰ’’’ন্তি।
243. ‘‘So kho ahaṃ, anuruddhā, appamatto ātāpī pahitatto viharanto obhāsañhi kho sañjānāmi, na ca rūpāni passāmi; rūpāni hi kho passāmi, na ca obhāsaṃ sañjānāmi – ‘kevalampi rattiṃ, kevalampi divaṃ 20, kevalampi rattindivaṃ’ 21. Tassa mayhaṃ, anuruddhā, etadahosi – ‘ko nu kho hetu ko paccayo yvāhaṃ obhāsañhi kho sañjānāmi na ca rūpāni passāmi; rūpāni hi kho 22 passāmi na ca obhāsaṃ sañjānāmi – kevalampi rattiṃ, kevalampi divaṃ, kevalampi rattindiva’nti. Tassa mayhaṃ, anuruddhā, etadahosi – ‘yasmiñhi kho ahaṃ samaye rūpanimittaṃ amanasikaritvā obhāsanimittaṃ manasi karomi, obhāsañhi kho tasmiṃ samaye sañjānāmi, na ca rūpāni passāmi. Yasmiṃ panāhaṃ samaye obhāsanimittaṃ amanasikaritvā rūpanimittaṃ manasi karomi, rūpāni hi kho tasmiṃ samaye passāmi na ca obhāsaṃ sañjānāmi – kevalampi rattiṃ, kevalampi divaṃ, kevalampi rattindiva’’’nti.
‘‘সো খো অহং, অনুরুদ্ধা, অপ্পমত্তো আতাপী পহিতত্তো ৰিহরন্তো পরিত্তঞ্চেৰ ওভাসং সঞ্জানামি, পরিত্তানি চ রূপানি পস্সামি; অপ্পমাণঞ্চেৰ ওভাসং সঞ্জানামি, অপ্পমাণানি চ রূপানি পস্সামি – কেৰলম্পি রত্তিং, কেৰলম্পি দিৰং, কেৰলম্পি রত্তিন্দিৰং। তস্স ময্হং, অনুরুদ্ধা, এতদহোসি – ‘কো নু খো হেতু কো পচ্চযো য্ৰাহং পরিত্তঞ্চেৰ ওভাসং সঞ্জানামি, পরিত্তানি চ রূপানি পস্সামি ; অপ্পমাণঞ্চেৰ ওভাসং সঞ্জানামি, অপ্পমাণানি চ রূপানি পস্সামি – কেৰলম্পি রত্তিং, কেৰলম্পি দিৰং, কেৰলম্পি রত্তিন্দিৰ’ন্তি। তস্স ময্হং, অনুরুদ্ধা, এতদহোসি – ‘যস্মিং খো মে সমযে পরিত্তো সমাধি হোতি, পরিত্তং মে তস্মিং সমযে চক্খু হোতি। সোহং পরিত্তেন চক্খুনা পরিত্তঞ্চেৰ ওভাসং সঞ্জানামি, পরিত্তানি চ রূপানি পস্সামি। যস্মিং পন মে সমযে অপ্পমাণো সমাধি হোতি, অপ্পমাণং মে তস্মিং সমযে চক্খু হোতি। সোহং অপ্পমাণেন চক্খুনা অপ্পমাণঞ্চেৰ ওভাসং সঞ্জানামি, অপ্পমাণানি চ রূপানি পস্সামি – কেৰলম্পি রত্তিং, কেৰলম্পি দিৰং, কেৰলম্পি রত্তিন্দিৰ’’’ন্তি।
‘‘So kho ahaṃ, anuruddhā, appamatto ātāpī pahitatto viharanto parittañceva obhāsaṃ sañjānāmi, parittāni ca rūpāni passāmi; appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindivaṃ. Tassa mayhaṃ, anuruddhā, etadahosi – ‘ko nu kho hetu ko paccayo yvāhaṃ parittañceva obhāsaṃ sañjānāmi, parittāni ca rūpāni passāmi ; appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindiva’nti. Tassa mayhaṃ, anuruddhā, etadahosi – ‘yasmiṃ kho me samaye paritto samādhi hoti, parittaṃ me tasmiṃ samaye cakkhu hoti. Sohaṃ parittena cakkhunā parittañceva obhāsaṃ sañjānāmi, parittāni ca rūpāni passāmi. Yasmiṃ pana me samaye appamāṇo samādhi hoti, appamāṇaṃ me tasmiṃ samaye cakkhu hoti. Sohaṃ appamāṇena cakkhunā appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindiva’’’nti.
২৪৪. যতো খো মে , অনুরুদ্ধা, ‘ৰিচিকিচ্ছা চিত্তস্স উপক্কিলেসো’তি – ইতি ৰিদিত্ৰা ৰিচিকিচ্ছা চিত্তস্স উপক্কিলেসো পহীনো অহোসি, ‘অমনসিকারো চিত্তস্স উপক্কিলেসো’তি – ইতি ৰিদিত্ৰা অমনসিকারো চিত্তস্স উপক্কিলেসো পহীনো অহোসি, ‘থিনমিদ্ধং চিত্তস্স উপক্কিলেসো’তি – ইতি ৰিদিত্ৰা থিনমিদ্ধং চিত্তস্স উপক্কিলেসো পহীনো অহোসি, ‘ছম্ভিতত্তং চিত্তস্স উপক্কিলেসো’তি – ইতি ৰিদিত্ৰা ছম্ভিতত্তং চিত্তস্স উপক্কিলেসো পহীনো অহোসি, ‘উপ্পিলং চিত্তস্স উপক্কিলেসো’তি – ইতি ৰিদিত্ৰা উপ্পিলং চিত্তস্স উপক্কিলেসো পহীনো অহোসি, ‘দুট্ঠুল্লং চিত্তস্স উপক্কিলেসো’তি – ইতি ৰিদিত্ৰা দুট্ঠুল্লং চিত্তস্স উপক্কিলেসো পহীনো অহোসি, ‘অচ্চারদ্ধৰীরিযং চিত্তস্স উপক্কিলেসো’তি – ইতি ৰিদিত্ৰা অচ্চারদ্ধৰীরিযং চিত্তস্স উপক্কিলেসো পহীনো অহোসি, ‘অতিলীনৰীরিযং চিত্তস্স উপক্কিলেসো’তি – ইতি ৰিদিত্ৰা অতিলীনৰীরিযং চিত্তস্স উপক্কিলেসো পহীনো অহোসি, ‘অভিজপ্পা চিত্তস্স উপক্কিলেসো’তি – ইতি ৰিদিত্ৰা অভিজপ্পা চিত্তস্স উপক্কিলেসো পহীনো অহোসি, ‘নানত্তসঞ্ঞা চিত্তস্স উপক্কিলেসো’তি – ইতি ৰিদিত্ৰা নানত্তসঞ্ঞা চিত্তস্স উপক্কিলেসো পহীনো অহোসি, ‘অতিনিজ্ঝাযিতত্তং রূপানং চিত্তস্স উপক্কিলেসো’তি – ইতি ৰিদিত্ৰা অতিনিজ্ঝাযিতত্তং রূপানং চিত্তস্স উপক্কিলেসো পহীনো অহোসি।
244. Yato kho me , anuruddhā, ‘vicikicchā cittassa upakkileso’ti – iti viditvā vicikicchā cittassa upakkileso pahīno ahosi, ‘amanasikāro cittassa upakkileso’ti – iti viditvā amanasikāro cittassa upakkileso pahīno ahosi, ‘thinamiddhaṃ cittassa upakkileso’ti – iti viditvā thinamiddhaṃ cittassa upakkileso pahīno ahosi, ‘chambhitattaṃ cittassa upakkileso’ti – iti viditvā chambhitattaṃ cittassa upakkileso pahīno ahosi, ‘uppilaṃ cittassa upakkileso’ti – iti viditvā uppilaṃ cittassa upakkileso pahīno ahosi, ‘duṭṭhullaṃ cittassa upakkileso’ti – iti viditvā duṭṭhullaṃ cittassa upakkileso pahīno ahosi, ‘accāraddhavīriyaṃ cittassa upakkileso’ti – iti viditvā accāraddhavīriyaṃ cittassa upakkileso pahīno ahosi, ‘atilīnavīriyaṃ cittassa upakkileso’ti – iti viditvā atilīnavīriyaṃ cittassa upakkileso pahīno ahosi, ‘abhijappā cittassa upakkileso’ti – iti viditvā abhijappā cittassa upakkileso pahīno ahosi, ‘nānattasaññā cittassa upakkileso’ti – iti viditvā nānattasaññā cittassa upakkileso pahīno ahosi, ‘atinijjhāyitattaṃ rūpānaṃ cittassa upakkileso’ti – iti viditvā atinijjhāyitattaṃ rūpānaṃ cittassa upakkileso pahīno ahosi.
২৪৫. ‘‘তস্স ময্হং, অনুরুদ্ধা, এতদহোসি – ‘যে খো মে চিত্তস্স উপক্কিলেসা তে মে পহীনা। হন্দ, দানাহং তিৰিধেন সমাধিং ভাৰেমী’তি 23। সো খো অহং, অনুরুদ্ধা, সৰিতক্কম্পি সৰিচারং সমাধিং ভাৰেসিং 24, অৰিতক্কম্পি ৰিচারমত্তং সমাধিং ভাৰেসিং, অৰিতক্কম্পি অৰিচারং সমাধিং ভাৰেসিং, সপ্পীতিকম্পি সমাধিং ভাৰেসিং, নিপ্পীতিকম্পি সমাধিং ভাৰেসিং, সাতসহগতম্পি সমাধিং ভাৰেসিং, উপেক্খাসহগতম্পি সমাধিং ভাৰেসিং। যতো খো মে, অনুরুদ্ধা, সৰিতক্কোপি সৰিচারো সমাধি ভাৰিতো অহোসি, অৰিতক্কোপি ৰিচারমত্তো সমাধি ভাৰিতো অহোসি, অৰিতক্কোপি অৰিচারো সমাধি ভাৰিতো অহোসি, সপ্পীতিকোপি সমাধি ভাৰিতো অহোসি, নিপ্পীতিকোপি সমাধি ভাৰিতো অহোসি, সাতসহগতোপি সমাধি ভাৰিতো অহোসি, উপেক্খাসহগতোপি সমাধি ভাৰিতো অহোসি। ঞাণঞ্চ পন মে দস্সনং উদপাদি, অকুপ্পা মে চেতোৰিমুত্তি। অযমন্তিমা জাতি, নত্থি দানি পুনব্ভৰো’’তি।
245. ‘‘Tassa mayhaṃ, anuruddhā, etadahosi – ‘ye kho me cittassa upakkilesā te me pahīnā. Handa, dānāhaṃ tividhena samādhiṃ bhāvemī’ti 25. So kho ahaṃ, anuruddhā, savitakkampi savicāraṃ samādhiṃ bhāvesiṃ 26, avitakkampi vicāramattaṃ samādhiṃ bhāvesiṃ, avitakkampi avicāraṃ samādhiṃ bhāvesiṃ, sappītikampi samādhiṃ bhāvesiṃ, nippītikampi samādhiṃ bhāvesiṃ, sātasahagatampi samādhiṃ bhāvesiṃ, upekkhāsahagatampi samādhiṃ bhāvesiṃ. Yato kho me, anuruddhā, savitakkopi savicāro samādhi bhāvito ahosi, avitakkopi vicāramatto samādhi bhāvito ahosi, avitakkopi avicāro samādhi bhāvito ahosi, sappītikopi samādhi bhāvito ahosi, nippītikopi samādhi bhāvito ahosi, sātasahagatopi samādhi bhāvito ahosi, upekkhāsahagatopi samādhi bhāvito ahosi. Ñāṇañca pana me dassanaṃ udapādi, akuppā me cetovimutti. Ayamantimā jāti, natthi dāni punabbhavo’’ti.
ইদমৰোচ ভগৰা। অত্তমনো আযস্মা অনুরুদ্ধো ভগৰতো ভাসিতং অভিনন্দীতি।
Idamavoca bhagavā. Attamano āyasmā anuruddho bhagavato bhāsitaṃ abhinandīti.
উপক্কিলেসসুত্তং নিট্ঠিতং অট্ঠমং।
Upakkilesasuttaṃ niṭṭhitaṃ aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৮. উপক্কিলেসসুত্তৰণ্ণনা • 8. Upakkilesasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৮. উপক্কিলেসসুত্তৰণ্ণনা • 8. Upakkilesasuttavaṇṇanā
