| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
8. убаггилзсасуд̇д̇ам̣
8. Upakkilesasuttaṃ
236. звам̣ мз суд̇ам̣ – згам̣ самаяам̣ бхаг̇аваа госамб̣ияам̣ вихарад̇и гхосид̇аараамз. д̇зна ко бана самаязна госамб̣ияам̣ бхигкуу бхан̣д̣анаж̇аад̇аа галахаж̇аад̇аа виваад̣̇аабаннаа ан̃н̃аман̃н̃ам̣ мукасад̇д̇ийхи вид̇уд̣̇анд̇аа вихаранд̇и. ат̇а ко ан̃н̃ад̇аро бхигку язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ адтааси. згаманд̇ам̣ тид̇о ко со бхигку бхаг̇аванд̇ам̣ зд̇ад̣̇авожа – ‘‘ид̇ха, бханд̇з, госамб̣ияам̣ бхигкуу бхан̣д̣анаж̇аад̇аа галахаж̇аад̇аа виваад̣̇аабаннаа ан̃н̃аман̃н̃ам̣ мукасад̇д̇ийхи вид̇уд̣̇анд̇аа вихаранд̇и. саад̇ху, бханд̇з, бхаг̇аваа язна д̇з бхигкуу д̇знубасан̇гамад̇у анугамбам̣ убаад̣̇ааяаа’’д̇и. ад̇хиваасзси бхаг̇аваа д̇ун̣хийбхаавзна. ат̇а ко бхаг̇аваа язна д̇з бхигкуу д̇знубасан̇гами; убасан̇гамид̇ваа д̇з бхигкуу зд̇ад̣̇авожа – ‘‘алам̣, бхигкавз, маа бхан̣д̣анам̣, маа галахам̣, маа виг̇г̇ахам̣, маа виваад̣̇а’’нд̇и.
236. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho so bhikkhu bhagavantaṃ etadavoca – ‘‘idha, bhante, kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Sādhu, bhante, bhagavā yena te bhikkhū tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā yena te bhikkhū tenupasaṅkami; upasaṅkamitvā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti.
звам̣ вуд̇д̇з, ан̃н̃ад̇аро бхигку бхаг̇аванд̇ам̣ зд̇ад̣̇авожа – ‘‘ааг̇амзд̇у, бханд̇з! бхаг̇аваа д̇хаммассаамий; аббоссугго, бханд̇з, бхаг̇аваа д̣̇идтад̇хаммасукавихаарам̣ ануяуд̇д̇о вихарад̇у; маяамзд̇зна бхан̣д̣анзна галахзна виг̇г̇ахзна виваад̣̇зна бан̃н̃ааяиссаамаа’’д̇и. д̣̇уд̇ияамби ко бхаг̇аваа д̇з бхигкуу зд̇ад̣̇авожа – ‘‘алам̣, бхигкавз, маа бхан̣д̣анам̣, маа галахам̣, маа виг̇г̇ахам̣, маа виваад̣̇а’’нд̇и. д̣̇уд̇ияамби ко со бхигку бхаг̇аванд̇ам̣ зд̇ад̣̇авожа – ‘‘ааг̇амзд̇у, бханд̇з! бхаг̇аваа д̇хаммассаамий; аббоссугго, бханд̇з, бхаг̇аваа д̣̇идтад̇хаммасукавихаарам̣ ануяуд̇д̇о вихарад̇у; маяамзд̇зна бхан̣д̣анзна галахзна виг̇г̇ахзна виваад̣̇зна бан̃н̃ааяиссаамаа’’д̇и. д̇ад̇ияамби ко бхаг̇аваа д̇з бхигкуу зд̇ад̣̇авожа – ‘‘алам̣, бхигкавз, маа бхан̣д̣анам̣, маа галахам̣, маа виг̇г̇ахам̣, маа виваад̣̇а’’нд̇и. д̇ад̇ияамби ко со бхигку бхаг̇аванд̇ам̣ зд̇ад̣̇авожа – ‘‘ааг̇амзд̇у, бханд̇з, бхаг̇аваа д̇хаммассаамий; аббоссугго, бханд̇з, бхаг̇аваа д̣̇идтад̇хаммасукавихаарам̣ ануяуд̇д̇о вихарад̇у; маяамзд̇зна бхан̣д̣анзна галахзна виг̇г̇ахзна виваад̣̇зна бан̃н̃ааяиссаамаа’’д̇и.
Evaṃ vutte, aññataro bhikkhu bhagavantaṃ etadavoca – ‘‘āgametu, bhante! Bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti. Dutiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti. Dutiyampi kho so bhikkhu bhagavantaṃ etadavoca – ‘‘āgametu, bhante! Bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti. Tatiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ, mā kalahaṃ, mā viggahaṃ, mā vivāda’’nti. Tatiyampi kho so bhikkhu bhagavantaṃ etadavoca – ‘‘āgametu, bhante, bhagavā dhammassāmī; appossukko, bhante, bhagavā diṭṭhadhammasukhavihāraṃ anuyutto viharatu; mayametena bhaṇḍanena kalahena viggahena vivādena paññāyissāmā’’ti.
ат̇а ко бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа госамб̣им̣ бин̣д̣ааяа баависи. госамб̣ияам̣ бин̣д̣ааяа жарид̇ваа бажчаабхад̇д̇ам̣ бин̣д̣абаад̇абадигганд̇о сзнаасанам̣ сам̣саамзд̇ваа бад̇д̇ажийварамаад̣̇ааяа тид̇агова имаа г̇аат̇аа абхааси –
Atha kho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi. Kosambiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaramādāya ṭhitakova imā gāthā abhāsi –
237.
237.
‘‘бут̇усад̣̇д̣̇о самаж̇ано, на б̣аало гожи ман̃н̃ат̇а;
‘‘Puthusaddo samajano, na bālo koci maññatha;
сан̇гхасмим̣ бхиж̇ж̇амаанасмим̣, наан̃н̃ам̣ бхияяо аман̃н̃арум̣.
Saṅghasmiṃ bhijjamānasmiṃ, nāññaṃ bhiyyo amaññaruṃ.
‘‘баримудтаа бан̣д̣ид̇аабхаасаа, ваажааг̇ожарабхаан̣ино;
‘‘Parimuṭṭhā paṇḍitābhāsā, vācāgocarabhāṇino;
яаавижчанд̇и мукааяаамам̣, язна нийд̇аа на д̇ам̣ вид̣̇уу.
Yāvicchanti mukhāyāmaṃ, yena nītā na taṃ vidū.
‘‘аггожчи мам̣ авад̇хи мам̣, аж̇ини мам̣ ахааси мз;
‘‘Akkocchi maṃ avadhi maṃ, ajini maṃ ahāsi me;
яз жа д̇ам̣ убанаяханд̇и, взрам̣ д̇зсам̣ на саммад̇и.
Ye ca taṃ upanayhanti, veraṃ tesaṃ na sammati.
‘‘аггожчи мам̣ авад̇хи мам̣, аж̇ини мам̣ ахааси мз;
‘‘Akkocchi maṃ avadhi maṃ, ajini maṃ ahāsi me;
яз жа д̇ам̣ нубанаяханд̇и, взрам̣ д̇зсуубасаммад̇и.
Ye ca taṃ nupanayhanti, veraṃ tesūpasammati.
‘‘на хи взрзна взраани, самманд̇ийд̇ха гуд̣̇аажанам̣;
‘‘Na hi verena verāni, sammantīdha kudācanaṃ;
авзрзна жа самманд̇и, зса д̇хаммо сананд̇ано.
Averena ca sammanti, esa dhammo sanantano.
‘‘барз жа на виж̇аананд̇и, маяамзд̇т̇а яамаамасз;
‘‘Pare ca na vijānanti, mayamettha yamāmase;
яз жа д̇ад̇т̇а виж̇аананд̇и, д̇ад̇о самманд̇и мзд̇хаг̇аа.
Ye ca tattha vijānanti, tato sammanti medhagā.
‘‘адтижчиннаа баан̣ахараа, г̇авассад̇ханахаарино;
‘‘Aṭṭhicchinnā pāṇaharā, gavassadhanahārino;
радтам̣ вилумбамаанаанам̣, д̇зсамби ход̇и сан̇г̇ад̇и;
Raṭṭhaṃ vilumpamānānaṃ, tesampi hoti saṅgati;
гасмаа д̇умхаагам̣ но сияаа.
Kasmā tumhākaṃ no siyā.
‘‘сажз лабхзт̇а нибагам̣ сахааяам̣,
‘‘Sace labhetha nipakaṃ sahāyaṃ,
сад̣̇д̇хим̣ жарам̣ саад̇хувихаари д̇хийрам̣;
Saddhiṃ caraṃ sādhuvihāri dhīraṃ;
абхибхуяяа саб̣б̣аани бариссаяаани,
Abhibhuyya sabbāni parissayāni,
жарзяяа д̇знад̇д̇амано сад̇иймаа.
Careyya tenattamano satīmā.
‘‘но жз лабхзт̇а нибагам̣ сахааяам̣,
‘‘No ce labhetha nipakaṃ sahāyaṃ,
сад̣̇д̇хим̣ жарам̣ саад̇хувихаари д̇хийрам̣;
Saddhiṃ caraṃ sādhuvihāri dhīraṃ;
рааж̇аава радтам̣ виж̇ид̇ам̣ бахааяа,
Rājāva raṭṭhaṃ vijitaṃ pahāya,
зго жарз маад̇ан̇г̇аран̃н̃зва нааг̇о.
Eko care mātaṅgaraññeva nāgo.
‘‘згасса жарид̇ам̣ сзяяо, над̇т̇и б̣аалз сахааяад̇аа;
‘‘Ekassa caritaṃ seyyo, natthi bāle sahāyatā;
зго жарз на жа баабаани гаяираа,
Eko care na ca pāpāni kayirā,
аббоссугго маад̇ан̇г̇аран̃н̃зва нааг̇о’’д̇и.
Appossukko mātaṅgaraññeva nāgo’’ti.
238. ат̇а ко бхаг̇аваа тид̇агова имаа г̇аат̇аа бхаасид̇ваа язна б̣аалагалон̣агаараг̇аамо 1 д̇знубасан̇гами. д̇зна ко бана самаязна ааяасмаа бхаг̇у б̣аалагалон̣агаараг̇аамз вихарад̇и. ад̣̇д̣̇асаа ко ааяасмаа бхаг̇у бхаг̇аванд̇ам̣ д̣̇уурад̇ова ааг̇ажчанд̇ам̣. д̣̇исваана аасанам̣ бан̃н̃абзси уд̣̇аган̃жа баад̣̇аанам̣ д̇хованам̣ 2. нисийд̣̇и бхаг̇аваа бан̃н̃ад̇д̇з аасанз. нисаж̇ж̇а баад̣̇з багкаалзси. ааяасмааби ко бхаг̇у бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисиннам̣ ко ааяасманд̇ам̣ бхаг̇ум̣ бхаг̇аваа зд̇ад̣̇авожа – ‘‘гажжи, бхигку, каманийяам̣, гажжи яаабанийяам̣, гажжи бин̣д̣агзна на гиламасий’’д̇и? ‘‘каманийяам̣ бхаг̇аваа, яаабанийяам̣ бхаг̇аваа, на жаахам̣, бханд̇з, бин̣д̣агзна гиламаамий’’д̇и. ат̇а ко бхаг̇аваа ааяасманд̇ам̣ бхаг̇ум̣ д̇хаммияаа гат̇ааяа санд̣̇ассзд̇ваа самаад̣̇абзд̇ваа самуд̇д̇зж̇зд̇ваа самбахам̣сзд̇ваа удтааяаасанаа язна баажийнавам̣сад̣̇ааяо д̇знубасан̇гами.
238. Atha kho bhagavā ṭhitakova imā gāthā bhāsitvā yena bālakaloṇakāragāmo 3 tenupasaṅkami. Tena kho pana samayena āyasmā bhagu bālakaloṇakāragāme viharati. Addasā kho āyasmā bhagu bhagavantaṃ dūratova āgacchantaṃ. Disvāna āsanaṃ paññapesi udakañca pādānaṃ dhovanaṃ 4. Nisīdi bhagavā paññatte āsane. Nisajja pāde pakkhālesi. Āyasmāpi kho bhagu bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ bhaguṃ bhagavā etadavoca – ‘‘kacci, bhikkhu, khamanīyaṃ, kacci yāpanīyaṃ, kacci piṇḍakena na kilamasī’’ti? ‘‘Khamanīyaṃ bhagavā, yāpanīyaṃ bhagavā, na cāhaṃ, bhante, piṇḍakena kilamāmī’’ti. Atha kho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami.
д̇зна ко бана самаязна ааяасмаа жа ануруд̣̇д̇хо ааяасмаа жа нанд̣̇ияо 5 ааяасмаа жа гимило 6 баажийнавам̣сад̣̇ааяз вихаранд̇и. ад̣̇д̣̇асаа ко д̣̇ааяабаало бхаг̇аванд̇ам̣ д̣̇уурад̇ова ааг̇ажчанд̇ам̣. д̣̇исваана бхаг̇аванд̇ам̣ зд̇ад̣̇авожа – ‘‘маа, махаасаман̣а, зд̇ам̣ д̣̇ааяам̣ баависи. санд̇зд̇т̇а д̇аяо гулабуд̇д̇аа ад̇д̇агаамаруубаа вихаранд̇и. маа д̇зсам̣ апаасумагаасий’’д̇и. ассоси ко ааяасмаа ануруд̣̇д̇хо д̣̇ааяабааласса бхаг̇авад̇аа сад̣̇д̇хим̣ манд̇аяамаанасса. суд̇ваана д̣̇ааяабаалам̣ зд̇ад̣̇авожа – ‘‘маа, аавусо д̣̇ааяабаала, бхаг̇аванд̇ам̣ ваарзси. сад̇т̇аа но бхаг̇аваа ануббад̇д̇о’’д̇и.
Tena kho pana samayena āyasmā ca anuruddho āyasmā ca nandiyo 7 āyasmā ca kimilo 8 pācīnavaṃsadāye viharanti. Addasā kho dāyapālo bhagavantaṃ dūratova āgacchantaṃ. Disvāna bhagavantaṃ etadavoca – ‘‘mā, mahāsamaṇa, etaṃ dāyaṃ pāvisi. Santettha tayo kulaputtā attakāmarūpā viharanti. Mā tesaṃ aphāsumakāsī’’ti. Assosi kho āyasmā anuruddho dāyapālassa bhagavatā saddhiṃ mantayamānassa. Sutvāna dāyapālaṃ etadavoca – ‘‘mā, āvuso dāyapāla, bhagavantaṃ vāresi. Satthā no bhagavā anuppatto’’ti.
239. ат̇а ко ааяасмаа ануруд̣̇д̇хо язнааяасмаа жа нанд̣̇ияо язнааяасмаа жа гимило д̇знубасан̇гами; убасан̇гамид̇ваа ааяасманд̇ан̃жа нанд̣̇ияам̣ ааяасманд̇ан̃жа гимилам̣ зд̇ад̣̇авожа – ‘‘абхиггамат̇ааяасманд̇о, абхиггамат̇ааяасманд̇о, сад̇т̇аа но бхаг̇аваа ануббад̇д̇о’’д̇и. ат̇а ко ааяасмаа жа ануруд̣̇д̇хо ааяасмаа жа нанд̣̇ияо ааяасмаа жа гимило бхаг̇аванд̇ам̣ бажжуг̇г̇анд̇ваа зго бхаг̇авад̇о бад̇д̇ажийварам̣ бадиг̇г̇ахзси, зго аасанам̣ бан̃н̃абзси, зго баад̣̇од̣̇агам̣ убадтабзси. нисийд̣̇и бхаг̇аваа бан̃н̃ад̇д̇з аасанз. нисаж̇ж̇а баад̣̇з багкаалзси. д̇зби ко ааяасманд̇о бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇им̣су. згаманд̇ам̣ нисиннам̣ ко ааяасманд̇ам̣ ануруд̣̇д̇хам̣ бхаг̇аваа зд̇ад̣̇авожа – ‘‘гажжи во, ануруд̣̇д̇хаа, каманийяам̣, гажжи яаабанийяам̣, гажжи бин̣д̣агзна на гиламат̇аа’’д̇и? ‘‘каманийяам̣ бхаг̇аваа, яаабанийяам̣ бхаг̇аваа, на жа маяам̣, бханд̇з, бин̣д̣агзна гиламаамаа’’д̇и. ‘‘гажжи бана во, ануруд̣̇д̇хаа, самаг̇г̇аа саммод̣̇амаанаа авивад̣̇амаанаа кийрод̣̇агийбхууд̇аа ан̃н̃аман̃н̃ам̣ бияажагкуухи самбассанд̇аа вихарат̇аа’’д̇и? ‘‘д̇аг̇гха маяам̣, бханд̇з, самаг̇г̇аа саммод̣̇амаанаа авивад̣̇амаанаа кийрод̣̇агийбхууд̇аа ан̃н̃аман̃н̃ам̣ бияажагкуухи самбассанд̇аа вихараамаа’’д̇и. ‘‘яат̇аа гат̇ам̣ бана д̇умхз, ануруд̣̇д̇хаа, самаг̇г̇аа саммод̣̇амаанаа авивад̣̇амаанаа кийрод̣̇агийбхууд̇аа ан̃н̃аман̃н̃ам̣ бияажагкуухи самбассанд̇аа вихарат̇аа’’д̇и? ‘‘ид̇ха маяхам̣, бханд̇з, звам̣ ход̇и – ‘лаабхаа вад̇а мз, сулад̣̇д̇хам̣ вад̇а мз яохам̣ зваруубзхи саб̣рахмажаарийхи сад̣̇д̇хим̣ вихараамий’д̇и. д̇асса маяхам̣, бханд̇з, имзсу ааяасманд̇зсу мзд̇д̇ам̣ гааяагаммам̣ бажжубадтид̇ам̣ аави жзва рахо жа, мзд̇д̇ам̣ важийгаммам̣ бажжубадтид̇ам̣ аави жзва рахо жа, мзд̇д̇ам̣ маногаммам̣ бажжубадтид̇ам̣ аави жзва рахо жа. д̇асса, маяхам̣, бханд̇з, звам̣ ход̇и – ‘яам̣нуунаахам̣ сагам̣ жид̇д̇ам̣ нигкибид̇ваа имзсам̣язва ааяасманд̇аанам̣ жид̇д̇асса васзна вад̇д̇зяяа’нд̇и. со ко ахам̣, бханд̇з, сагам̣ жид̇д̇ам̣ нигкибид̇ваа имзсам̣язва ааяасманд̇аанам̣ жид̇д̇асса васзна вад̇д̇аами. наанаа хи ко но, бханд̇з, гааяаа, зган̃жа бана ман̃н̃з жид̇д̇а’’нд̇и.
239. Atha kho āyasmā anuruddho yenāyasmā ca nandiyo yenāyasmā ca kimilo tenupasaṅkami; upasaṅkamitvā āyasmantañca nandiyaṃ āyasmantañca kimilaṃ etadavoca – ‘‘abhikkamathāyasmanto, abhikkamathāyasmanto, satthā no bhagavā anuppatto’’ti. Atha kho āyasmā ca anuruddho āyasmā ca nandiyo āyasmā ca kimilo bhagavantaṃ paccuggantvā eko bhagavato pattacīvaraṃ paṭiggahesi, eko āsanaṃ paññapesi, eko pādodakaṃ upaṭṭhapesi. Nisīdi bhagavā paññatte āsane. Nisajja pāde pakkhālesi. Tepi kho āyasmanto bhagavantaṃ abhivādetvā ekamantaṃ nisīdiṃsu. Ekamantaṃ nisinnaṃ kho āyasmantaṃ anuruddhaṃ bhagavā etadavoca – ‘‘kacci vo, anuruddhā, khamanīyaṃ, kacci yāpanīyaṃ, kacci piṇḍakena na kilamathā’’ti? ‘‘Khamanīyaṃ bhagavā, yāpanīyaṃ bhagavā, na ca mayaṃ, bhante, piṇḍakena kilamāmā’’ti. ‘‘Kacci pana vo, anuruddhā, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathā’’ti? ‘‘Taggha mayaṃ, bhante, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharāmā’’ti. ‘‘Yathā kathaṃ pana tumhe, anuruddhā, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathā’’ti? ‘‘Idha mayhaṃ, bhante, evaṃ hoti – ‘lābhā vata me, suladdhaṃ vata me yohaṃ evarūpehi sabrahmacārīhi saddhiṃ viharāmī’ti. Tassa mayhaṃ, bhante, imesu āyasmantesu mettaṃ kāyakammaṃ paccupaṭṭhitaṃ āvi ceva raho ca, mettaṃ vacīkammaṃ paccupaṭṭhitaṃ āvi ceva raho ca, mettaṃ manokammaṃ paccupaṭṭhitaṃ āvi ceva raho ca. Tassa, mayhaṃ, bhante, evaṃ hoti – ‘yaṃnūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyya’nti. So kho ahaṃ, bhante, sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi. Nānā hi kho no, bhante, kāyā, ekañca pana maññe citta’’nti.
ааяасмааби ко нанд̣̇ияо…бз… ааяасмааби ко гимило бхаг̇аванд̇ам̣ зд̇ад̣̇авожа – ‘‘маяхамби ко, бханд̇з, звам̣ ход̇и – ‘лаабхаа вад̇а мз, сулад̣̇д̇хам̣ вад̇а мз яохам̣ зваруубзхи саб̣рахмажаарийхи сад̣̇д̇хим̣ вихараамий’д̇и. д̇асса маяхам̣, бханд̇з, имзсу ааяасманд̇зсу мзд̇д̇ам̣ гааяагаммам̣ бажжубадтид̇ам̣ аави жзва рахо жа, мзд̇д̇ам̣ важийгаммам̣ бажжубадтид̇ам̣ аави жзва рахо жа, мзд̇д̇ам̣ маногаммам̣ бажжубадтид̇ам̣ аави жзва рахо жа. д̇асса маяхам̣, бханд̇з, звам̣ ход̇и – ‘яам̣нуунаахам̣ сагам̣ жид̇д̇ам̣ нигкибид̇ваа имзсам̣язва ааяасманд̇аанам̣ жид̇д̇асса васзна вад̇д̇зяяа’нд̇и. со ко ахам̣, бханд̇з, сагам̣ жид̇д̇ам̣ нигкибид̇ваа имзсам̣язва ааяасманд̇аанам̣ жид̇д̇асса васзна вад̇д̇аами. наанаа хи ко но, бханд̇з, гааяаа, зган̃жа бана ман̃н̃з жид̇д̇анд̇и. звам̣ ко маяам̣, бханд̇з, самаг̇г̇аа саммод̣̇амаанаа авивад̣̇амаанаа кийрод̣̇агийбхууд̇аа ан̃н̃аман̃н̃ам̣ бияажагкуухи самбассанд̇аа вихараамаа’’д̇и.
Āyasmāpi kho nandiyo…pe… āyasmāpi kho kimilo bhagavantaṃ etadavoca – ‘‘mayhampi kho, bhante, evaṃ hoti – ‘lābhā vata me, suladdhaṃ vata me yohaṃ evarūpehi sabrahmacārīhi saddhiṃ viharāmī’ti. Tassa mayhaṃ, bhante, imesu āyasmantesu mettaṃ kāyakammaṃ paccupaṭṭhitaṃ āvi ceva raho ca, mettaṃ vacīkammaṃ paccupaṭṭhitaṃ āvi ceva raho ca, mettaṃ manokammaṃ paccupaṭṭhitaṃ āvi ceva raho ca. Tassa mayhaṃ, bhante, evaṃ hoti – ‘yaṃnūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyya’nti. So kho ahaṃ, bhante, sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi. Nānā hi kho no, bhante, kāyā, ekañca pana maññe cittanti. Evaṃ kho mayaṃ, bhante, samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharāmā’’ti.
240. ‘‘саад̇ху, саад̇ху, ануруд̣̇д̇хаа! гажжи бана во, ануруд̣̇д̇хаа, аббамад̇д̇аа аад̇аабино бахид̇ад̇д̇аа вихарат̇аа’’д̇и? ‘‘д̇аг̇гха маяам̣, бханд̇з, аббамад̇д̇аа аад̇аабино бахид̇ад̇д̇аа вихараамаа’’д̇и. ‘‘яат̇аа гат̇ам̣ бана д̇умхз, ануруд̣̇д̇хаа, аббамад̇д̇аа аад̇аабино бахид̇ад̇д̇аа вихарат̇аа’’д̇и? ‘‘ид̇ха, бханд̇з, амхаагам̣ яо батамам̣ г̇аамад̇о бин̣д̣ааяа бадиггамад̇и, со аасанаани бан̃н̃абзд̇и, баанийяам̣ барибхож̇анийяам̣ убадтаабзд̇и, аваггаарабаад̇им̣ убадтаабзд̇и. яо бажчаа г̇аамад̇о бин̣д̣ааяа бадиггамад̇и – сажз ход̇и бхуд̇д̇аавасзсо, сажз ааган̇кад̇и, бхун̃ж̇ад̇и; но жз ааган̇кад̇и, аббахарид̇з ваа чад̣д̣зд̇и абаан̣агз ваа уд̣̇агз обилаабзд̇и – со аасанаани бадисаамзд̇и, баанийяам̣ барибхож̇анийяам̣ бадисаамзд̇и, аваггаарабаад̇им̣ д̇ховид̇ваа бадисаамзд̇и, бхад̇д̇аг̇г̇ам̣ саммаж̇ж̇ад̇и. яо бассад̇и баанийяагхадам̣ ваа барибхож̇анийяагхадам̣ ваа важжагхадам̣ ваа рид̇д̇ам̣ д̇ужчам̣ со убадтаабзд̇и. сажасса ход̇и ависаяхам̣, хад̇т̇авигаарзна д̣̇уд̇ияам̣ ааманд̇зд̇ваа хад̇т̇авилан̇гхагзна убадтаабзма 9, на д̇взва маяам̣, бханд̇з, д̇аббажжаяаа ваажам̣ бхинд̣̇аама. бан̃жаахигам̣ ко бана маяам̣, бханд̇з, саб̣б̣арад̇д̇им̣ д̇хаммияаа гат̇ааяа саннисийд̣̇аама. звам̣ ко маяам̣, бханд̇з, аббамад̇д̇аа аад̇аабино бахид̇ад̇д̇аа вихараамаа’’д̇и.
240. ‘‘Sādhu, sādhu, anuruddhā! Kacci pana vo, anuruddhā, appamattā ātāpino pahitattā viharathā’’ti? ‘‘Taggha mayaṃ, bhante, appamattā ātāpino pahitattā viharāmā’’ti. ‘‘Yathā kathaṃ pana tumhe, anuruddhā, appamattā ātāpino pahitattā viharathā’’ti? ‘‘Idha, bhante, amhākaṃ yo paṭhamaṃ gāmato piṇḍāya paṭikkamati, so āsanāni paññapeti, pānīyaṃ paribhojanīyaṃ upaṭṭhāpeti, avakkārapātiṃ upaṭṭhāpeti. Yo pacchā gāmato piṇḍāya paṭikkamati – sace hoti bhuttāvaseso, sace ākaṅkhati, bhuñjati; no ce ākaṅkhati, appaharite vā chaḍḍeti apāṇake vā udake opilāpeti – so āsanāni paṭisāmeti, pānīyaṃ paribhojanīyaṃ paṭisāmeti, avakkārapātiṃ dhovitvā paṭisāmeti, bhattaggaṃ sammajjati. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeti. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpema 10, na tveva mayaṃ, bhante, tappaccayā vācaṃ bhindāma. Pañcāhikaṃ kho pana mayaṃ, bhante, sabbarattiṃ dhammiyā kathāya sannisīdāma. Evaṃ kho mayaṃ, bhante, appamattā ātāpino pahitattā viharāmā’’ti.
241. ‘‘саад̇ху, саад̇ху, ануруд̣̇д̇хаа! ад̇т̇и бана во, ануруд̣̇д̇хаа, звам̣ аббамад̇д̇аанам̣ аад̇аабийнам̣ бахид̇ад̇д̇аанам̣ вихарад̇ам̣ уд̇д̇аримануссад̇хаммаа аламарияан̃аан̣ад̣̇ассанависзсо ад̇хиг̇ад̇о паасувихааро’’д̇и? ‘‘ид̇ха маяам̣, бханд̇з, аббамад̇д̇аа аад̇аабино бахид̇ад̇д̇аа вихаранд̇аа обхаасан̃жзва сан̃ж̇аанаама д̣̇ассанан̃жа руубаанам̣. со ко бана но обхаасо нажирассзва анд̇арад̇хааяад̇и д̣̇ассанан̃жа руубаанам̣; д̇ан̃жа нимид̇д̇ам̣ наббадивиж̇жхаамаа’’д̇и.
241. ‘‘Sādhu, sādhu, anuruddhā! Atthi pana vo, anuruddhā, evaṃ appamattānaṃ ātāpīnaṃ pahitattānaṃ viharataṃ uttarimanussadhammā alamariyañāṇadassanaviseso adhigato phāsuvihāro’’ti? ‘‘Idha mayaṃ, bhante, appamattā ātāpino pahitattā viharantā obhāsañceva sañjānāma dassanañca rūpānaṃ. So kho pana no obhāso nacirasseva antaradhāyati dassanañca rūpānaṃ; tañca nimittaṃ nappaṭivijjhāmā’’ti.
‘‘д̇ам̣ ко бана во, ануруд̣̇д̇хаа, нимид̇д̇ам̣ бадивиж̇жхид̇аб̣б̣ам̣. ахамби суд̣̇ам̣, ануруд̣̇д̇хаа, буб̣б̣зва самб̣од̇хаа анабхисамб̣уд̣̇д̇хо б̣од̇хисад̇д̇ова самаано обхаасан̃жзва сан̃ж̇аанаами д̣̇ассанан̃жа руубаанам̣. со ко бана мз обхаасо нажирассзва анд̇арад̇хааяад̇и д̣̇ассанан̃жа руубаанам̣. д̇асса маяхам̣, ануруд̣̇д̇хаа, зд̇ад̣̇ахоси – ‘го ну ко хзд̇у го бажжаяо язна мз обхаасо анд̇арад̇хааяад̇и д̣̇ассанан̃жа руубаана’нд̇и? д̇асса маяхам̣, ануруд̣̇д̇хаа, зд̇ад̣̇ахоси – ‘вижигижчаа ко мз уд̣̇абаад̣̇и, вижигижчаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇ий’’’д̇и.
‘‘Taṃ kho pana vo, anuruddhā, nimittaṃ paṭivijjhitabbaṃ. Ahampi sudaṃ, anuruddhā, pubbeva sambodhā anabhisambuddho bodhisattova samāno obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ, anuruddhā, etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti? Tassa mayhaṃ, anuruddhā, etadahosi – ‘vicikicchā kho me udapādi, vicikicchādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissatī’’’ti.
‘‘со ко ахам̣, ануруд̣̇д̇хаа, аббамад̇д̇о аад̇аабий бахид̇ад̇д̇о вихаранд̇о обхаасан̃жзва сан̃ж̇аанаами д̣̇ассанан̃жа руубаанам̣. со ко бана мз обхаасо нажирассзва анд̇арад̇хааяад̇и д̣̇ассанан̃жа руубаанам̣. д̇асса маяхам̣, ануруд̣̇д̇хаа, зд̇ад̣̇ахоси – ‘го ну ко хзд̇у го бажжаяо язна мз обхаасо анд̇арад̇хааяад̇и д̣̇ассанан̃жа руубаана’нд̇и? д̇асса маяхам̣, ануруд̣̇д̇хаа, зд̇ад̣̇ахоси – ‘аманасигааро ко мз уд̣̇абаад̣̇и, аманасигаараад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и на аманасигааро’’’д̇и.
‘‘So kho ahaṃ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ, anuruddhā, etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti? Tassa mayhaṃ, anuruddhā, etadahosi – ‘amanasikāro kho me udapādi, amanasikārādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro’’’ti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘т̇инамид̣̇д̇хам̣ ко мз уд̣̇абаад̣̇и, т̇инамид̣̇д̇хаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и на аманасигааро на т̇инамид̣̇д̇ха’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘thinamiddhaṃ kho me udapādi, thinamiddhādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro na thinamiddha’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘чамбхид̇ад̇д̇ам̣ ко мз уд̣̇абаад̣̇и, чамбхид̇ад̇д̇аад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сзяяат̇ааби, ануруд̣̇д̇хаа, бурисо ад̣̇д̇хаанамаг̇г̇аббадибанно, д̇асса убхад̇обассз ваддагаа 11 уббад̇зяяум̣, д̇асса д̇ад̇онид̣̇аанам̣ чамбхид̇ад̇д̇ам̣ уббаж̇ж̇зяяа; звамзва ко мз, ануруд̣̇д̇хаа, чамбхид̇ад̇д̇ам̣ уд̣̇абаад̣̇и, чамбхид̇ад̇д̇аад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и на аманасигааро на т̇инамид̣̇д̇хам̣ на чамбхид̇ад̇д̇а’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘chambhitattaṃ kho me udapādi, chambhitattādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso addhānamaggappaṭipanno, tassa ubhatopasse vaṭṭakā 12 uppateyyuṃ, tassa tatonidānaṃ chambhitattaṃ uppajjeyya; evameva kho me, anuruddhā, chambhitattaṃ udapādi, chambhitattādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati na amanasikāro na thinamiddhaṃ na chambhitatta’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘уббилам̣ 13 ко мз уд̣̇абаад̣̇и, уббилаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣ . сзяяат̇ааби, ануруд̣̇д̇хаа, бурисо згам̣ нид̇химукам̣ г̇авзсанд̇о сагид̣̇зва бан̃жанид̇химукаани ад̇хиг̇ажчзяяа, д̇асса д̇ад̇онид̣̇аанам̣ уббилам̣ уббаж̇ж̇зяяа; звамзва ко мз, ануруд̣̇д̇хаа, уббилам̣ уд̣̇абаад̣̇и, уббилаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббила’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘uppilaṃ 14 kho me udapādi, uppilādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ . Seyyathāpi, anuruddhā, puriso ekaṃ nidhimukhaṃ gavesanto sakideva pañcanidhimukhāni adhigaccheyya, tassa tatonidānaṃ uppilaṃ uppajjeyya; evameva kho me, anuruddhā, uppilaṃ udapādi, uppilādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppila’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘д̣̇удтуллам̣ ко мз уд̣̇абаад̣̇и, д̣̇удтуллаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтулла’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘duṭṭhullaṃ kho me udapādi, duṭṭhullādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhulla’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘ажжаарад̣̇д̇хавийрияам̣ ко мз уд̣̇абаад̣̇и, ажжаарад̣̇д̇хавийрияаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сзяяат̇ааби, ануруд̣̇д̇хаа, бурисо убхохи хад̇т̇зхи ваддагам̣ г̇аал̣хам̣ г̇ан̣хзяяа, со д̇ад̇т̇зва бад̇амзяяа 15; звамзва ко мз, ануруд̣̇д̇хаа, ажжаарад̣̇д̇хавийрияам̣ уд̣̇абаад̣̇и, ажжаарад̣̇д̇хавийрияаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтуллам̣, на ажжаарад̣̇д̇хавийрияа’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘accāraddhavīriyaṃ kho me udapādi, accāraddhavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso ubhohi hatthehi vaṭṭakaṃ gāḷhaṃ gaṇheyya, so tattheva patameyya 16; evameva kho me, anuruddhā, accāraddhavīriyaṃ udapādi, accāraddhavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriya’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘ад̇илийнавийрияам̣ ко мз уд̣̇абаад̣̇и , ад̇илийнавийрияаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сзяяат̇ааби, ануруд̣̇д̇хаа, бурисо ваддагам̣ сит̇илам̣ г̇ан̣хзяяа, со д̇асса хад̇т̇ад̇о уббад̇зяяа; звамзва ко мз, ануруд̣̇д̇хаа, ад̇илийнавийрияам̣ уд̣̇абаад̣̇и, ад̇илийнавийрияаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтуллам̣, на ажжаарад̣̇д̇хавийрияам̣, на ад̇илийнавийрияа’’’нд̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘atilīnavīriyaṃ kho me udapādi , atilīnavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Seyyathāpi, anuruddhā, puriso vaṭṭakaṃ sithilaṃ gaṇheyya, so tassa hatthato uppateyya; evameva kho me, anuruddhā, atilīnavīriyaṃ udapādi, atilīnavīriyādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriya’’’nti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘абхиж̇аббаа ко мз уд̣̇абаад̣̇и, абхиж̇аббаад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтуллам̣, на ажжаарад̣̇д̇хавийрияам̣, на ад̇илийнавийрияам̣, на абхиж̇аббаа’’’д̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘abhijappā kho me udapādi, abhijappādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā’’’ti.
‘‘со ко ахам̣, ануруд̣̇д̇хаа…бз… д̇асса маяхам̣, ануруд̣̇д̇хаа, зд̇ад̣̇ахоси – ‘наанад̇д̇асан̃н̃аа ко мз уд̣̇абаад̣̇и, наанад̇д̇асан̃н̃аад̇хигаран̣ан̃жа бана мз самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтуллам̣, на ажжаарад̣̇д̇хавийрияам̣, на ад̇илийнавийрияам̣, на абхиж̇аббаа, на наанад̇д̇асан̃н̃аа’’’д̇и.
‘‘So kho ahaṃ, anuruddhā…pe… tassa mayhaṃ, anuruddhā, etadahosi – ‘nānattasaññā kho me udapādi, nānattasaññādhikaraṇañca pana me samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā, na nānattasaññā’’’ti.
‘‘со ко ахам̣, ануруд̣̇д̇хаа, аббамад̇д̇о аад̇аабий бахид̇ад̇д̇о вихаранд̇о обхаасан̃жзва сан̃ж̇аанаами д̣̇ассанан̃жа руубаанам̣. со ко бана мз обхаасо нажирассзва анд̇арад̇хааяад̇и д̣̇ассанан̃жа руубаанам̣. д̇асса маяхам̣ ануруд̣̇д̇хаа зд̇ад̣̇ахоси – ‘го ну ко хзд̇у го бажжаяо язна мз обхаасо анд̇арад̇хааяад̇и д̣̇ассанан̃жа руубаана’нд̇и. д̇асса маяхам̣, ануруд̣̇д̇хаа, зд̇ад̣̇ахоси – ‘ад̇иниж̇жхааяид̇ад̇д̇ам̣ ко мз руубаанам̣ уд̣̇абаад̣̇и, ад̇иниж̇жхааяид̇ад̇д̇аад̇хигаран̣ан̃жа бана мз руубаанам̣ самаад̇хи жави. самаад̇химхи жуд̇з обхаасо анд̇арад̇хааяад̇и д̣̇ассанан̃жа руубаанам̣. сохам̣ д̇ат̇аа гариссаами яат̇аа мз буна на вижигижчаа уббаж̇ж̇иссад̇и, на аманасигааро, на т̇инамид̣̇д̇хам̣, на чамбхид̇ад̇д̇ам̣, на уббилам̣, на д̣̇удтуллам̣, на ажжаарад̣̇д̇хавийрияам̣, на ад̇илийнавийрияам̣, на абхиж̇аббаа, на наанад̇д̇асан̃н̃аа, на ад̇иниж̇жхааяид̇ад̇д̇ам̣ руубаана’’’нд̇и.
‘‘So kho ahaṃ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṃ. So kho pana me obhāso nacirasseva antaradhāyati dassanañca rūpānaṃ. Tassa mayhaṃ anuruddhā etadahosi – ‘ko nu kho hetu ko paccayo yena me obhāso antaradhāyati dassanañca rūpāna’nti. Tassa mayhaṃ, anuruddhā, etadahosi – ‘atinijjhāyitattaṃ kho me rūpānaṃ udapādi, atinijjhāyitattādhikaraṇañca pana me rūpānaṃ samādhi cavi. Samādhimhi cute obhāso antaradhāyati dassanañca rūpānaṃ. Sohaṃ tathā karissāmi yathā me puna na vicikicchā uppajjissati, na amanasikāro, na thinamiddhaṃ, na chambhitattaṃ, na uppilaṃ, na duṭṭhullaṃ, na accāraddhavīriyaṃ, na atilīnavīriyaṃ, na abhijappā, na nānattasaññā, na atinijjhāyitattaṃ rūpāna’’’nti.
242. ‘‘со ко ахам̣, ануруд̣̇д̇хаа, ‘вижигижчаа жид̇д̇асса убаггилзсо’д̇и – ид̇и вид̣̇ид̇ваа вижигижчам̣ жид̇д̇асса убаггилзсам̣ баж̇ахим̣, ‘аманасигааро жид̇д̇асса убаггилзсо’д̇и – ид̇и вид̣̇ид̇ваа аманасигаарам̣ жид̇д̇асса убаггилзсам̣ баж̇ахим̣, ‘т̇инамид̣̇д̇хам̣ жид̇д̇асса убаггилзсо’д̇и – ид̇и вид̣̇ид̇ваа т̇инамид̣̇д̇хам̣ жид̇д̇асса убаггилзсам̣ баж̇ахим̣, ‘чамбхид̇ад̇д̇ам̣ жид̇д̇асса убаггилзсо’д̇и – ид̇и вид̣̇ид̇ваа чамбхид̇ад̇д̇ам̣ жид̇д̇асса убаггилзсам̣ баж̇ахим̣, ‘уббилам̣ жид̇д̇асса убаггилзсо’д̇и – ид̇и вид̣̇ид̇ваа уббилам̣ жид̇д̇асса убаггилзсам̣ баж̇ахим̣, ‘д̣̇удтуллам̣ жид̇д̇асса убаггилзсо’д̇и – ид̇и вид̣̇ид̇ваа д̣̇удтуллам̣ жид̇д̇асса убаггилзсам̣ баж̇ахим̣, ‘ажжаарад̣̇д̇хавийрияам̣ жид̇д̇асса убаггилзсо’д̇и – ид̇и вид̣̇ид̇ваа ажжаарад̣̇д̇хавийрияам̣ жид̇д̇асса убаггилзсам̣ баж̇ахим̣, ‘ад̇илийнавийрияам̣ жид̇д̇асса убаггилзсо’д̇и – ид̇и вид̣̇ид̇ваа ад̇илийнавийрияам̣ жид̇д̇асса убаггилзсам̣ баж̇ахим̣, ‘абхиж̇аббаа жид̇д̇асса убаггилзсо’д̇и – ид̇и вид̣̇ид̇ваа абхиж̇аббам̣ жид̇д̇асса убаггилзсам̣ баж̇ахим̣, ‘наанад̇д̇асан̃н̃аа жид̇д̇асса убаггилзсо’д̇и – ид̇и вид̣̇ид̇ваа наанад̇д̇асан̃н̃ам̣ жид̇д̇асса убаггилзсам̣ баж̇ахим̣, ‘ад̇иниж̇жхааяид̇ад̇д̇ам̣ руубаанам̣ жид̇д̇асса убаггилзсо’д̇и – ид̇и вид̣̇ид̇ваа ад̇иниж̇жхааяид̇ад̇д̇ам̣ руубаанам̣ жид̇д̇асса убаггилзсам̣ баж̇ахим̣.
242. ‘‘So kho ahaṃ, anuruddhā, ‘vicikicchā cittassa upakkileso’ti – iti viditvā vicikicchaṃ cittassa upakkilesaṃ pajahiṃ, ‘amanasikāro cittassa upakkileso’ti – iti viditvā amanasikāraṃ cittassa upakkilesaṃ pajahiṃ, ‘thinamiddhaṃ cittassa upakkileso’ti – iti viditvā thinamiddhaṃ cittassa upakkilesaṃ pajahiṃ, ‘chambhitattaṃ cittassa upakkileso’ti – iti viditvā chambhitattaṃ cittassa upakkilesaṃ pajahiṃ, ‘uppilaṃ cittassa upakkileso’ti – iti viditvā uppilaṃ cittassa upakkilesaṃ pajahiṃ, ‘duṭṭhullaṃ cittassa upakkileso’ti – iti viditvā duṭṭhullaṃ cittassa upakkilesaṃ pajahiṃ, ‘accāraddhavīriyaṃ cittassa upakkileso’ti – iti viditvā accāraddhavīriyaṃ cittassa upakkilesaṃ pajahiṃ, ‘atilīnavīriyaṃ cittassa upakkileso’ti – iti viditvā atilīnavīriyaṃ cittassa upakkilesaṃ pajahiṃ, ‘abhijappā cittassa upakkileso’ti – iti viditvā abhijappaṃ cittassa upakkilesaṃ pajahiṃ, ‘nānattasaññā cittassa upakkileso’ti – iti viditvā nānattasaññaṃ cittassa upakkilesaṃ pajahiṃ, ‘atinijjhāyitattaṃ rūpānaṃ cittassa upakkileso’ti – iti viditvā atinijjhāyitattaṃ rūpānaṃ cittassa upakkilesaṃ pajahiṃ.
243. ‘‘со ко ахам̣, ануруд̣̇д̇хаа, аббамад̇д̇о аад̇аабий бахид̇ад̇д̇о вихаранд̇о обхаасан̃хи ко сан̃ж̇аанаами, на жа руубаани бассаами; руубаани хи ко бассаами, на жа обхаасам̣ сан̃ж̇аанаами – ‘гзваламби рад̇д̇им̣, гзваламби д̣̇ивам̣ 17, гзваламби рад̇д̇инд̣̇ивам̣’ 18. д̇асса маяхам̣, ануруд̣̇д̇хаа, зд̇ад̣̇ахоси – ‘го ну ко хзд̇у го бажжаяо яваахам̣ обхаасан̃хи ко сан̃ж̇аанаами на жа руубаани бассаами; руубаани хи ко 19 бассаами на жа обхаасам̣ сан̃ж̇аанаами – гзваламби рад̇д̇им̣, гзваламби д̣̇ивам̣, гзваламби рад̇д̇инд̣̇ива’нд̇и. д̇асса маяхам̣, ануруд̣̇д̇хаа, зд̇ад̣̇ахоси – ‘яасмин̃хи ко ахам̣ самаяз руубанимид̇д̇ам̣ аманасигарид̇ваа обхаасанимид̇д̇ам̣ манаси гароми, обхаасан̃хи ко д̇асмим̣ самаяз сан̃ж̇аанаами, на жа руубаани бассаами. яасмим̣ банаахам̣ самаяз обхаасанимид̇д̇ам̣ аманасигарид̇ваа руубанимид̇д̇ам̣ манаси гароми, руубаани хи ко д̇асмим̣ самаяз бассаами на жа обхаасам̣ сан̃ж̇аанаами – гзваламби рад̇д̇им̣, гзваламби д̣̇ивам̣, гзваламби рад̇д̇инд̣̇ива’’’нд̇и.
243. ‘‘So kho ahaṃ, anuruddhā, appamatto ātāpī pahitatto viharanto obhāsañhi kho sañjānāmi, na ca rūpāni passāmi; rūpāni hi kho passāmi, na ca obhāsaṃ sañjānāmi – ‘kevalampi rattiṃ, kevalampi divaṃ 20, kevalampi rattindivaṃ’ 21. Tassa mayhaṃ, anuruddhā, etadahosi – ‘ko nu kho hetu ko paccayo yvāhaṃ obhāsañhi kho sañjānāmi na ca rūpāni passāmi; rūpāni hi kho 22 passāmi na ca obhāsaṃ sañjānāmi – kevalampi rattiṃ, kevalampi divaṃ, kevalampi rattindiva’nti. Tassa mayhaṃ, anuruddhā, etadahosi – ‘yasmiñhi kho ahaṃ samaye rūpanimittaṃ amanasikaritvā obhāsanimittaṃ manasi karomi, obhāsañhi kho tasmiṃ samaye sañjānāmi, na ca rūpāni passāmi. Yasmiṃ panāhaṃ samaye obhāsanimittaṃ amanasikaritvā rūpanimittaṃ manasi karomi, rūpāni hi kho tasmiṃ samaye passāmi na ca obhāsaṃ sañjānāmi – kevalampi rattiṃ, kevalampi divaṃ, kevalampi rattindiva’’’nti.
‘‘со ко ахам̣, ануруд̣̇д̇хаа, аббамад̇д̇о аад̇аабий бахид̇ад̇д̇о вихаранд̇о барид̇д̇ан̃жзва обхаасам̣ сан̃ж̇аанаами, барид̇д̇аани жа руубаани бассаами; аббамаан̣ан̃жзва обхаасам̣ сан̃ж̇аанаами, аббамаан̣аани жа руубаани бассаами – гзваламби рад̇д̇им̣, гзваламби д̣̇ивам̣, гзваламби рад̇д̇инд̣̇ивам̣. д̇асса маяхам̣, ануруд̣̇д̇хаа, зд̇ад̣̇ахоси – ‘го ну ко хзд̇у го бажжаяо яваахам̣ барид̇д̇ан̃жзва обхаасам̣ сан̃ж̇аанаами, барид̇д̇аани жа руубаани бассаами ; аббамаан̣ан̃жзва обхаасам̣ сан̃ж̇аанаами, аббамаан̣аани жа руубаани бассаами – гзваламби рад̇д̇им̣, гзваламби д̣̇ивам̣, гзваламби рад̇д̇инд̣̇ива’нд̇и. д̇асса маяхам̣, ануруд̣̇д̇хаа, зд̇ад̣̇ахоси – ‘яасмим̣ ко мз самаяз барид̇д̇о самаад̇хи ход̇и, барид̇д̇ам̣ мз д̇асмим̣ самаяз жагку ход̇и. сохам̣ барид̇д̇зна жагкунаа барид̇д̇ан̃жзва обхаасам̣ сан̃ж̇аанаами, барид̇д̇аани жа руубаани бассаами. яасмим̣ бана мз самаяз аббамаан̣о самаад̇хи ход̇и, аббамаан̣ам̣ мз д̇асмим̣ самаяз жагку ход̇и. сохам̣ аббамаан̣зна жагкунаа аббамаан̣ан̃жзва обхаасам̣ сан̃ж̇аанаами, аббамаан̣аани жа руубаани бассаами – гзваламби рад̇д̇им̣, гзваламби д̣̇ивам̣, гзваламби рад̇д̇инд̣̇ива’’’нд̇и.
‘‘So kho ahaṃ, anuruddhā, appamatto ātāpī pahitatto viharanto parittañceva obhāsaṃ sañjānāmi, parittāni ca rūpāni passāmi; appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindivaṃ. Tassa mayhaṃ, anuruddhā, etadahosi – ‘ko nu kho hetu ko paccayo yvāhaṃ parittañceva obhāsaṃ sañjānāmi, parittāni ca rūpāni passāmi ; appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindiva’nti. Tassa mayhaṃ, anuruddhā, etadahosi – ‘yasmiṃ kho me samaye paritto samādhi hoti, parittaṃ me tasmiṃ samaye cakkhu hoti. Sohaṃ parittena cakkhunā parittañceva obhāsaṃ sañjānāmi, parittāni ca rūpāni passāmi. Yasmiṃ pana me samaye appamāṇo samādhi hoti, appamāṇaṃ me tasmiṃ samaye cakkhu hoti. Sohaṃ appamāṇena cakkhunā appamāṇañceva obhāsaṃ sañjānāmi, appamāṇāni ca rūpāni passāmi – kevalampi rattiṃ, kevalampi divaṃ, kevalampi rattindiva’’’nti.
244. яад̇о ко мз , ануруд̣̇д̇хаа, ‘вижигижчаа жид̇д̇асса убаггилзсо’д̇и – ид̇и вид̣̇ид̇ваа вижигижчаа жид̇д̇асса убаггилзсо бахийно ахоси, ‘аманасигааро жид̇д̇асса убаггилзсо’д̇и – ид̇и вид̣̇ид̇ваа аманасигааро жид̇д̇асса убаггилзсо бахийно ахоси, ‘т̇инамид̣̇д̇хам̣ жид̇д̇асса убаггилзсо’д̇и – ид̇и вид̣̇ид̇ваа т̇инамид̣̇д̇хам̣ жид̇д̇асса убаггилзсо бахийно ахоси, ‘чамбхид̇ад̇д̇ам̣ жид̇д̇асса убаггилзсо’д̇и – ид̇и вид̣̇ид̇ваа чамбхид̇ад̇д̇ам̣ жид̇д̇асса убаггилзсо бахийно ахоси, ‘уббилам̣ жид̇д̇асса убаггилзсо’д̇и – ид̇и вид̣̇ид̇ваа уббилам̣ жид̇д̇асса убаггилзсо бахийно ахоси, ‘д̣̇удтуллам̣ жид̇д̇асса убаггилзсо’д̇и – ид̇и вид̣̇ид̇ваа д̣̇удтуллам̣ жид̇д̇асса убаггилзсо бахийно ахоси, ‘ажжаарад̣̇д̇хавийрияам̣ жид̇д̇асса убаггилзсо’д̇и – ид̇и вид̣̇ид̇ваа ажжаарад̣̇д̇хавийрияам̣ жид̇д̇асса убаггилзсо бахийно ахоси, ‘ад̇илийнавийрияам̣ жид̇д̇асса убаггилзсо’д̇и – ид̇и вид̣̇ид̇ваа ад̇илийнавийрияам̣ жид̇д̇асса убаггилзсо бахийно ахоси, ‘абхиж̇аббаа жид̇д̇асса убаггилзсо’д̇и – ид̇и вид̣̇ид̇ваа абхиж̇аббаа жид̇д̇асса убаггилзсо бахийно ахоси, ‘наанад̇д̇асан̃н̃аа жид̇д̇асса убаггилзсо’д̇и – ид̇и вид̣̇ид̇ваа наанад̇д̇асан̃н̃аа жид̇д̇асса убаггилзсо бахийно ахоси, ‘ад̇иниж̇жхааяид̇ад̇д̇ам̣ руубаанам̣ жид̇д̇асса убаггилзсо’д̇и – ид̇и вид̣̇ид̇ваа ад̇иниж̇жхааяид̇ад̇д̇ам̣ руубаанам̣ жид̇д̇асса убаггилзсо бахийно ахоси.
244. Yato kho me , anuruddhā, ‘vicikicchā cittassa upakkileso’ti – iti viditvā vicikicchā cittassa upakkileso pahīno ahosi, ‘amanasikāro cittassa upakkileso’ti – iti viditvā amanasikāro cittassa upakkileso pahīno ahosi, ‘thinamiddhaṃ cittassa upakkileso’ti – iti viditvā thinamiddhaṃ cittassa upakkileso pahīno ahosi, ‘chambhitattaṃ cittassa upakkileso’ti – iti viditvā chambhitattaṃ cittassa upakkileso pahīno ahosi, ‘uppilaṃ cittassa upakkileso’ti – iti viditvā uppilaṃ cittassa upakkileso pahīno ahosi, ‘duṭṭhullaṃ cittassa upakkileso’ti – iti viditvā duṭṭhullaṃ cittassa upakkileso pahīno ahosi, ‘accāraddhavīriyaṃ cittassa upakkileso’ti – iti viditvā accāraddhavīriyaṃ cittassa upakkileso pahīno ahosi, ‘atilīnavīriyaṃ cittassa upakkileso’ti – iti viditvā atilīnavīriyaṃ cittassa upakkileso pahīno ahosi, ‘abhijappā cittassa upakkileso’ti – iti viditvā abhijappā cittassa upakkileso pahīno ahosi, ‘nānattasaññā cittassa upakkileso’ti – iti viditvā nānattasaññā cittassa upakkileso pahīno ahosi, ‘atinijjhāyitattaṃ rūpānaṃ cittassa upakkileso’ti – iti viditvā atinijjhāyitattaṃ rūpānaṃ cittassa upakkileso pahīno ahosi.
245. ‘‘д̇асса маяхам̣, ануруд̣̇д̇хаа, зд̇ад̣̇ахоси – ‘яз ко мз жид̇д̇асса убаггилзсаа д̇з мз бахийнаа. ханд̣̇а, д̣̇аанаахам̣ д̇ивид̇хзна самаад̇хим̣ бхаавзмий’д̇и 23. со ко ахам̣, ануруд̣̇д̇хаа, савид̇аггамби савижаарам̣ самаад̇хим̣ бхаавзсим̣ 24, авид̇аггамби вижаарамад̇д̇ам̣ самаад̇хим̣ бхаавзсим̣, авид̇аггамби авижаарам̣ самаад̇хим̣ бхаавзсим̣, саббийд̇игамби самаад̇хим̣ бхаавзсим̣, ниббийд̇игамби самаад̇хим̣ бхаавзсим̣, саад̇асахаг̇ад̇амби самаад̇хим̣ бхаавзсим̣, убзгкаасахаг̇ад̇амби самаад̇хим̣ бхаавзсим̣. яад̇о ко мз, ануруд̣̇д̇хаа, савид̇аггоби савижааро самаад̇хи бхаавид̇о ахоси, авид̇аггоби вижаарамад̇д̇о самаад̇хи бхаавид̇о ахоси, авид̇аггоби авижааро самаад̇хи бхаавид̇о ахоси, саббийд̇игоби самаад̇хи бхаавид̇о ахоси, ниббийд̇игоби самаад̇хи бхаавид̇о ахоси, саад̇асахаг̇ад̇оби самаад̇хи бхаавид̇о ахоси, убзгкаасахаг̇ад̇оби самаад̇хи бхаавид̇о ахоси. н̃аан̣ан̃жа бана мз д̣̇ассанам̣ уд̣̇абаад̣̇и, агуббаа мз жзд̇овимуд̇д̇и. аяаманд̇имаа ж̇аад̇и, над̇т̇и д̣̇аани бунаб̣бхаво’’д̇и.
245. ‘‘Tassa mayhaṃ, anuruddhā, etadahosi – ‘ye kho me cittassa upakkilesā te me pahīnā. Handa, dānāhaṃ tividhena samādhiṃ bhāvemī’ti 25. So kho ahaṃ, anuruddhā, savitakkampi savicāraṃ samādhiṃ bhāvesiṃ 26, avitakkampi vicāramattaṃ samādhiṃ bhāvesiṃ, avitakkampi avicāraṃ samādhiṃ bhāvesiṃ, sappītikampi samādhiṃ bhāvesiṃ, nippītikampi samādhiṃ bhāvesiṃ, sātasahagatampi samādhiṃ bhāvesiṃ, upekkhāsahagatampi samādhiṃ bhāvesiṃ. Yato kho me, anuruddhā, savitakkopi savicāro samādhi bhāvito ahosi, avitakkopi vicāramatto samādhi bhāvito ahosi, avitakkopi avicāro samādhi bhāvito ahosi, sappītikopi samādhi bhāvito ahosi, nippītikopi samādhi bhāvito ahosi, sātasahagatopi samādhi bhāvito ahosi, upekkhāsahagatopi samādhi bhāvito ahosi. Ñāṇañca pana me dassanaṃ udapādi, akuppā me cetovimutti. Ayamantimā jāti, natthi dāni punabbhavo’’ti.
ид̣̇амавожа бхаг̇аваа. ад̇д̇амано ааяасмаа ануруд̣̇д̇хо бхаг̇авад̇о бхаасид̇ам̣ абхинанд̣̇ийд̇и.
Idamavoca bhagavā. Attamano āyasmā anuruddho bhagavato bhāsitaṃ abhinandīti.
убаггилзсасуд̇д̇ам̣ нидтид̇ам̣ адтамам̣.
Upakkilesasuttaṃ niṭṭhitaṃ aṭṭhamaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 8. убаггилзсасуд̇д̇аван̣н̣анаа • 8. Upakkilesasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 8. убаггилзсасуд̇д̇аван̣н̣анаа • 8. Upakkilesasuttavaṇṇanā
