| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. உபக்கிலேஸஸுத்தவண்ணனா
3. Upakkilesasuttavaṇṇanā
23. ததியே ந ச பப⁴ஸ்ஸரந்தி ந ச பபா⁴வந்தங். பப⁴ங்கு³ சாதி பபி⁴ஜ்ஜனஸபா⁴வங். அயோதி காளலோஹங். லோஹந்தி ட²பெத்வா இத⁴ வுத்தானி சத்தாரி அவஸேஸங் லோஹங். ஸஜ்ஜ²ந்தி ரஜதங். சித்தஸ்ஸாதி சாதுபூ⁴மககுஸலசித்தஸ்ஸ. தேபூ⁴மகஸ்ஸ தாவ உபக்கிலேஸா ஹொந்து, லோகுத்தரஸ்ஸ கத²ங் ஹொந்தீதி? உப்பஜ்ஜிதுங் அப்பதா³னேன. யத³க்³கே³ன ஹி உப்பஜ்ஜிதுங் ந தெ³ந்தி, தத³க்³கே³னேவ தே லோகியஸ்ஸபி லோகுத்தரஸ்ஸபி உபக்கிலேஸா நாம ஹொந்தி. பப⁴ங்கு³ சாதி ஆரம்மணே சுண்ணவிசுண்ணபா⁴வூபக³மனேன பி⁴ஜ்ஜனஸபா⁴வங். ஸம்மா ஸமாதி⁴யதி ஆஸவானங் க²யாயாதி ஆஸவானங் க²யஸங்கா²தஸ்ஸ அரஹத்தஸ்ஸ அத்தா²ய ஹேதுனா காரணேன ஸமாதி⁴யதி. எத்தாவதா சித்தங் விஸோதெ⁴த்வா அரஹத்தே பதிட்டி²தங் கீ²ணாஸவங் த³ஸ்ஸேதி. இதா³னிஸ்ஸ அபி⁴ஞ்ஞாபடிவேத⁴ங் த³ஸ்ஸெந்தோ யஸ்ஸ யஸ்ஸ சாதிஆதி³மாஹ. தங் உத்தானத்த²மேவாதி.
23. Tatiye na ca pabhassaranti na ca pabhāvantaṃ. Pabhaṅgu cāti pabhijjanasabhāvaṃ. Ayoti kāḷalohaṃ. Lohanti ṭhapetvā idha vuttāni cattāri avasesaṃ lohaṃ. Sajjhanti rajataṃ. Cittassāti cātubhūmakakusalacittassa. Tebhūmakassa tāva upakkilesā hontu, lokuttarassa kathaṃ hontīti? Uppajjituṃ appadānena. Yadaggena hi uppajjituṃ na denti, tadaggeneva te lokiyassapi lokuttarassapi upakkilesā nāma honti. Pabhaṅgu cāti ārammaṇe cuṇṇavicuṇṇabhāvūpagamanena bhijjanasabhāvaṃ. Sammāsamādhiyati āsavānaṃ khayāyāti āsavānaṃ khayasaṅkhātassa arahattassa atthāya hetunā kāraṇena samādhiyati. Ettāvatā cittaṃ visodhetvā arahatte patiṭṭhitaṃ khīṇāsavaṃ dasseti. Idānissa abhiññāpaṭivedhaṃ dassento yassa yassa cātiādimāha. Taṃ uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. உபக்கிலேஸஸுத்தங் • 3. Upakkilesasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. உபக்கிலேஸஸுத்தாதி³வண்ணனா • 3-4. Upakkilesasuttādivaṇṇanā
