| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. உபக்கிலேஸஸுத்தவண்ணனா
8. Upakkilesasuttavaṇṇanā
236. தஸ்மாதி அத்த²காமத்தா ஏவமாஹ, ந ப⁴க³வதோ வசனங் அனாதி³யந்தோ. யே பன ததா³ ஸத்து²வசனங் ந க³ண்ஹிங்ஸு, தே கிஞ்சி அவத்வா துண்ஹீபூ⁴தா மங்குபூ⁴தா அட்ட²ங்ஸு, தஸ்மா உப⁴யேஸம்பி ஸத்த²ரி அகா³ரவபடிபத்தி நாஹோஸி.
236.Tasmāti atthakāmattā evamāha, na bhagavato vacanaṃ anādiyanto. Ye pana tadā satthuvacanaṃ na gaṇhiṃsu, te kiñci avatvā tuṇhībhūtā maṅkubhūtā aṭṭhaṃsu, tasmā ubhayesampi satthari agāravapaṭipatti nāhosi.
யேனபி ஜனேன ந தி³ட்டோ²தி யேன உப⁴யஜனேன அஞ்ஞவிஹிததாய குட்³ட³கவாடாதி³அந்தரிகதாய வா ந தி³ட்டோ². த³மனத்த²ந்தி தேஹி உபாஸகேஹி நிம்மத³பா⁴வங் ஆபாதி³தானங் தேஸங் பி⁴க்கூ²னங் த³மனத்த²ங். ட²பயிங்ஸூதி யோ இமேஸங் பி⁴க்கூ²னங் தே³தி, தஸ்ஸ ஸதங் த³ண்டோ³தி, ஸஹஸ்ஸந்தி ச வத³ந்தி.
Yenapi janena na diṭṭhoti yena ubhayajanena aññavihitatāya kuḍḍakavāṭādiantarikatāya vā na diṭṭho. Damanatthanti tehi upāsakehi nimmadabhāvaṃ āpāditānaṃ tesaṃ bhikkhūnaṃ damanatthaṃ. Ṭhapayiṃsūti yo imesaṃ bhikkhūnaṃ deti, tassa sataṃ daṇḍoti, sahassanti ca vadanti.
237. வக்³க³பா⁴வேனேவ (ஸாரத்த²॰ டீ॰ மஹாவக்³கோ³ 3.464) நானாஸத்³தோ³ அஸ்ஸாதி புது²ஸத்³தோ³. ஸமஜனோதி ப⁴ண்ட³னே ஸமஜ்ஜா²ஸயோ ஜனோ. பா³லலக்க²ணே டி²தோபி ‘‘அஹங் பா³லோ’’தி ந மஞ்ஞதி. பி⁴ய்யோ சாதி அத்தனோ பா³லபா⁴வஸ்ஸ அஜானநதோபி பி⁴ய்யோ ச ப⁴ண்ட³னஸ்ஸ உபரி போ²டோ விய ஸங்க⁴பே⁴த³ஸ்ஸ அத்தனோ காரணபா⁴வம்பி உப்பஜ்ஜமானங் ந மஞ்ஞி நஞ்ஞாஸி.
237. Vaggabhāveneva (sārattha. ṭī. mahāvaggo 3.464) nānāsaddo assāti puthusaddo. Samajanoti bhaṇḍane samajjhāsayo jano. Bālalakkhaṇe ṭhitopi ‘‘ahaṃ bālo’’ti na maññati. Bhiyyo cāti attano bālabhāvassa ajānanatopi bhiyyo ca bhaṇḍanassa upari phoṭo viya saṅghabhedassa attano kāraṇabhāvampi uppajjamānaṃ na maññi naññāsi.
கலஹவஸேன பவத்தவாசாயேவ கோ³சரோ ஏதேஸந்தி வாசாகோ³சரா ஹுத்வா. முகா²யாமந்தி விவாத³வஸேன முக²ங் ஆயமெத்வா பா⁴ணினோ. ந தங் ஜானந்தீதி தங் கலஹங் ந ஜானந்தி. கலஹங் கரொந்தோ ச தங் ந ஜானந்தோ நாம நத்தி². யதா² பன ந ஜானந்தி, தங் த³ஸ்ஸேதுங் ஆஹ – ‘‘ஏவங் ஸாதீ³னவோ அய’’ந்தி. அயங் கலஹோ நாம அத்தனோ பரேஸஞ்ச அத்த²ஜாபனதோ அனத்து²ப்பாத³னதோ தி³ட்டே²வ த⁴ம்மே ஸம்பராயே ச ஸாதீ³னவோ, ஸதோ³ஸோதி அத்தோ².
Kalahavasena pavattavācāyeva gocaro etesanti vācāgocarā hutvā. Mukhāyāmanti vivādavasena mukhaṃ āyametvā bhāṇino. Na taṃ jānantīti taṃ kalahaṃ na jānanti. Kalahaṃ karonto ca taṃ na jānanto nāma natthi. Yathā pana na jānanti, taṃ dassetuṃ āha – ‘‘evaṃ sādīnavo aya’’nti. Ayaṃ kalaho nāma attano paresañca atthajāpanato anatthuppādanato diṭṭheva dhamme samparāye ca sādīnavo, sadosoti attho.
உபனய்ஹந்தீதி உபனாஹவஸேன அனுப³ந்த⁴ந்தி. போராணோதி புரிமேஹி பு³த்³தா⁴தீ³ஹி ஆசிண்ணஸமாசிண்ணதாய புராதனோ.
Upanayhantīti upanāhavasena anubandhanti. Porāṇoti purimehi buddhādīhi āciṇṇasamāciṇṇatāya purātano.
ந ஜானந்தீதி அனிச்சஸஞ்ஞங் ந பச்சுபட்டா²பெந்தி.
Na jānantīti aniccasaññaṃ na paccupaṭṭhāpenti.
ததா² பவத்தவேரானந்தி அட்டி²சி²ன்னாதி³பா⁴வங் நிஸ்ஸாய உபனயவஸேன சிரகாலங் பவத்தவேரானங்.
Tathā pavattaverānanti aṭṭhichinnādibhāvaṃ nissāya upanayavasena cirakālaṃ pavattaverānaṃ.
பா³லஸஹாயதாய இமே பி⁴க்கூ² கலஹபஸுதா, பண்டி³தஸஹாயானங் பன இத³ங் ந ஸியாதி பண்டி³தஸஹாயஸ்ஸ பா³லஸஹாயஸ்ஸ ச வண்ணாவண்ணதீ³பனத்த²ங் வுத்தா. ஸீஹப்³யக்³கா⁴தி³கே பாகடபரிஸ்ஸயே ராக³தோ³ஸாதி³கே படிச்ச²ன்னபரிஸ்ஸயே ச அபி⁴ப⁴வித்வா.
Bālasahāyatāya ime bhikkhū kalahapasutā, paṇḍitasahāyānaṃ pana idaṃ na siyāti paṇḍitasahāyassa bālasahāyassa ca vaṇṇāvaṇṇadīpanatthaṃ vuttā. Sīhabyagghādike pākaṭaparissaye rāgadosādike paṭicchannaparissaye ca abhibhavitvā.
மாதங்கோ³ அரஞ்ஞே மாதங்க³ரஞ்ஞேதி ஸரலோபேன ஸந்தி⁴. மாதங்க³ஸத்³தே³னேவ ஹத்தி²பா⁴வஸ்ஸ வுத்தத்தா நாக³வசனங் தஸ்ஸ மஹத்தவிபா⁴வனத்த²ந்தி ஆஹ – ‘‘நாகோ³தி மஹந்தாதி⁴வசனமேத’’ந்தி. மஹந்தபரியாயோபி ஹி நாக³-ஸத்³தோ³ ஹோதி ‘‘ஏவங் நாக³ஸ்ஸ நாகே³ன, ஈஸாத³ந்தஸ்ஸ ஹத்தி²னோ’’திஆதீ³ஸு (உதா³॰ 25; மஹாவ॰ 467).
Mātaṅgo araññe mātaṅgaraññeti saralopena sandhi. Mātaṅgasaddeneva hatthibhāvassa vuttattā nāgavacanaṃ tassa mahattavibhāvanatthanti āha – ‘‘nāgoti mahantādhivacanameta’’nti. Mahantapariyāyopi hi nāga-saddo hoti ‘‘evaṃ nāgassa nāgena, īsādantassa hatthino’’tiādīsu (udā. 25; mahāva. 467).
238. கிரஸத்³தோ³ அனுஸ்ஸவஸூசனத்தோ² நிபாதோ. தேன அயமெத்த² ஸுதிபரம்பராதி த³ஸ்ஸேதி. ப⁴க³வதா ஹி ஸோ ஆதீ³னவோ பகே³வ பரிஞ்ஞாதோ, ந தேன ஸத்தா² நிப்³பி³ண்ணோ ஹோதி; தஸ்மிங் பன அந்தோவஸ்ஸே கேசி பு³த்³த⁴வேனெய்யா நாஹேஸுங்; தேன அஞ்ஞத்த² க³மனங் தேஸங் பி⁴க்கூ²னங் த³மனுபாயோதி பாலிலெய்யகங் உத்³தி³ஸ்ஸ க³ச்ச²ந்தோ ஏகவிஹாரிங் ஆயஸ்மந்தங் ப⁴கு³ங், ஸமக்³க³வாஸங் வஸந்தே ச அனுருத்³த⁴த்தே²ராதி³கே ஸம்பஹங்ஸேதுங் அனுருத்³த⁴த்தே²ரஸ்ஸ ச. இமங் உபக்கிலேஸோவாத³ங் தா³துங் தத்த² க³தோ, தஸ்மா கலஹகாரகே கிரஸ்ஸாதி எத்தா²பி கிரஸத்³த³க்³க³ஹணே ஏஸேவ நயோ. வுத்தனயமேவ கோ³ஸிங்க³ஸாலஸுத்தே (ம॰ நி॰ 1.325 ஆத³யோ).
238.Kirasaddo anussavasūcanattho nipāto. Tena ayamettha sutiparamparāti dasseti. Bhagavatā hi so ādīnavo pageva pariññāto, na tena satthā nibbiṇṇo hoti; tasmiṃ pana antovasse keci buddhaveneyyā nāhesuṃ; tena aññattha gamanaṃ tesaṃ bhikkhūnaṃ damanupāyoti pālileyyakaṃ uddissa gacchanto ekavihāriṃ āyasmantaṃ bhaguṃ, samaggavāsaṃ vasante ca anuruddhattherādike sampahaṃsetuṃ anuruddhattherassa ca. Imaṃ upakkilesovādaṃ dātuṃ tattha gato, tasmā kalahakārake kirassāti etthāpi kirasaddaggahaṇe eseva nayo. Vuttanayameva gosiṅgasālasutte (ma. ni. 1.325 ādayo).
241. ‘‘யதா² கத²ங் பனா’’தி வுத்தபுச்சா²னங் பச்சி²மபா⁴வதோ ‘‘அத்தி² பன வோதி பச்சி²மபுச்சா²யா’’தி வுத்தங், ந புன ‘‘அத்தி² பன வோ’’தி பவத்தனஸ்ஸ புச்ச²னஸ்ஸ அத்தி²பா⁴வதோ. ஸோ பன லோகுத்தரத⁴ம்மோ. தே²ரானந்தி அனுருத்³த⁴த்தே²ராதீ³னங் நத்தி². பரிகம்மோபா⁴ஸங் புச்ச²தீதி தி³ப்³ப³சக்கு²ஞாணே கதாதி⁴காரத்தா தஸ்ஸ உப்பாத³னத்த²ங் பரிகம்மோபா⁴ஸங் புச்ச²தி. பரிகம்மோபா⁴ஸந்தி பரிகம்மஸமாதி⁴னிப்³ப³த்தங் ஓபா⁴ஸங், உபசாரஜ்ஜா²னஸஞ்ஜனிதங் ஓபா⁴ஸந்தி அத்தோ². சதுத்த²ஜ்ஜா²னலாபீ⁴ ஹி தி³ப்³ப³சக்கு²பரிகம்மத்த²ங் ஓபா⁴ஸகஸிணங் பா⁴வெத்வா உபசாரே ட²பிதோ ஸமாதி⁴ பரிகம்மஸமாதி⁴, தத்த² ஓபா⁴ஸோ பரிகம்மோபா⁴ஸோதி வுத்தோ. தங் ஸந்தா⁴யாஹ – ‘‘ஓபா⁴ஸஞ்சேவ ஸஞ்ஜானாமாதி பரிகம்மோபா⁴ஸங் ஸஞ்ஜானாமா’’தி. யத்தகே ஹி டா²னே தி³ப்³ப³சக்கு²னா ரூபக³தங் த³ட்டு²காமோ, தத்தகங் டா²னங் ஓபா⁴ஸகஸிணங் ப²ரித்வா டி²தோ. தங் ஓபா⁴ஸங் தத்த² ச ரூபக³தங் தி³ப்³ப³சக்கு²ஞாணேன பஸ்ஸதி, தே²ரா ச ததா² படிபஜ்ஜிங்ஸு. தேன வுத்தங் – ‘‘ஓபா⁴ஸஞ்சேவ ஸஞ்ஜானாம த³ஸ்ஸனஞ்ச ரூபான’’ந்தி. யஸ்மா பன தேஸங் ரூபக³தங் பஸ்ஸந்தானங் பரிகம்மவாரோ அதிக்கமி, ததோ ஓபா⁴ஸோ அந்தரதா⁴யி, தஸ்மிங் அந்தரஹிதே ரூபக³தம்பி ந பஞ்ஞாயதி. பரிகம்மந்தி ஹி யதா²வுத்தகஸிணாரம்மணங் உபசாரஜ்ஜா²னங், ரூபக³தங் பஸ்ஸந்தானங் கஸிணோபா⁴ஸவஸேன ரூபக³தத³ஸ்ஸனங், கஸிணோபா⁴ஸோ ச பரிகம்மவஸேனாதி தது³ப⁴யம்பி பரிகம்மஸ்ஸ அப்பவத்தியா நாஹோஸி, தயித³ங் காரணங் ஆதி³கம்மிகபா⁴வதோ தே²ரா ந மஞ்ஞிங்ஸு, தஸ்மா வுத்தங் ‘‘நப்படிவிஜ்ஜா²மா’’தி.
241. ‘‘Yathā kathaṃ panā’’ti vuttapucchānaṃ pacchimabhāvato ‘‘atthi pana voti pacchimapucchāyā’’ti vuttaṃ, na puna ‘‘atthi pana vo’’ti pavattanassa pucchanassa atthibhāvato. So pana lokuttaradhammo. Therānanti anuruddhattherādīnaṃ natthi. Parikammobhāsaṃ pucchatīti dibbacakkhuñāṇe katādhikārattā tassa uppādanatthaṃ parikammobhāsaṃ pucchati. Parikammobhāsanti parikammasamādhinibbattaṃ obhāsaṃ, upacārajjhānasañjanitaṃ obhāsanti attho. Catutthajjhānalābhī hi dibbacakkhuparikammatthaṃ obhāsakasiṇaṃ bhāvetvā upacāre ṭhapito samādhi parikammasamādhi, tattha obhāso parikammobhāsoti vutto. Taṃ sandhāyāha – ‘‘obhāsañceva sañjānāmāti parikammobhāsaṃ sañjānāmā’’ti. Yattake hi ṭhāne dibbacakkhunā rūpagataṃ daṭṭhukāmo, tattakaṃ ṭhānaṃ obhāsakasiṇaṃ pharitvā ṭhito. Taṃ obhāsaṃ tattha ca rūpagataṃ dibbacakkhuñāṇena passati, therā ca tathā paṭipajjiṃsu. Tena vuttaṃ – ‘‘obhāsañceva sañjānāma dassanañca rūpāna’’nti. Yasmā pana tesaṃ rūpagataṃ passantānaṃ parikammavāro atikkami, tato obhāso antaradhāyi, tasmiṃ antarahite rūpagatampi na paññāyati. Parikammanti hi yathāvuttakasiṇārammaṇaṃ upacārajjhānaṃ, rūpagataṃ passantānaṃ kasiṇobhāsavasena rūpagatadassanaṃ, kasiṇobhāso ca parikammavasenāti tadubhayampi parikammassa appavattiyā nāhosi, tayidaṃ kāraṇaṃ ādikammikabhāvato therā na maññiṃsu, tasmā vuttaṃ ‘‘nappaṭivijjhāmā’’ti.
நிமித்தங் படிவிஜ்ஜி²தப்³ப³ந்தி காரணங் பச்சக்க²தோ த³ஸ்ஸெத்வா ஸுவிஸுத்³த⁴தி³ப்³ப³சக்கு²ஞாணே தே²ரங் பதிட்டா²பேதுகாமோ ஸத்தா² வத³தி. கிங் ந ஆளுலெஸ்ஸந்தீதி கிங் ந ப்³யாமோஹெஸ்ஸந்தி, ப்³யாமோஹெஸ்ஸந்தி ஏவாதி அத்தோ². விசிகிச்சா² உத³பாதீ³தி தி³ப்³ப³சக்கு²னோ யதா²உபட்டி²தேஸு ரூபக³தேஸு அபுப்³ப³தாய, ‘‘இத³ங் நு கோ² ரூபக³தங் கிங், இத³ங் நு கோ² கி’’ந்தி மக்³கே³ன அஸமுச்சி²ன்னத்தா விசிகிச்சா² ஸங்ஸயோ உப்பஜ்ஜி. ஸமாதி⁴ சவீதி விசிகிச்சா²ய உப்பன்னத்தா பரிகம்மஸமாதி⁴ விக³ச்சி². ததோ ஏவ ஹி பரிகம்மோபா⁴ஸோபி அந்தரதா⁴யி, தி³ப்³ப³சக்கு²னாபி ரூபங் ந பஸ்ஸி. ந மனஸி கரிஸ்ஸாமீதி மனஸிகாரவஸேன மே ரூபானி உபட்ட²ஹிங்ஸு, ரூபானி பஸ்ஸதோ விசிகிச்சா² உப்பஜ்ஜதி, தஸ்மா இதா³னி கிஞ்சி ந மனஸி கரிஸ்ஸாமீதி துண்ஹீ அஹோஸி தங் பன துண்ஹீபா⁴வப்பத்திங் ஸந்தா⁴யாஹ ‘‘அமனஸிகாரோ உத³பாதீ³’’தி.
Nimittaṃ paṭivijjhitabbanti kāraṇaṃ paccakkhato dassetvā suvisuddhadibbacakkhuñāṇe theraṃ patiṭṭhāpetukāmo satthā vadati. Kiṃ na āḷulessantīti kiṃ na byāmohessanti, byāmohessanti evāti attho. Vicikicchā udapādīti dibbacakkhuno yathāupaṭṭhitesu rūpagatesu apubbatāya, ‘‘idaṃ nu kho rūpagataṃ kiṃ, idaṃ nu kho ki’’nti maggena asamucchinnattā vicikicchā saṃsayo uppajji. Samādhi cavīti vicikicchāya uppannattā parikammasamādhi vigacchi. Tato eva hi parikammobhāsopi antaradhāyi, dibbacakkhunāpi rūpaṃ na passi. Na manasi karissāmīti manasikāravasena me rūpāni upaṭṭhahiṃsu, rūpāni passato vicikicchā uppajjati, tasmā idāni kiñci na manasi karissāmīti tuṇhī ahosi taṃ pana tuṇhībhāvappattiṃ sandhāyāha ‘‘amanasikāro udapādī’’ti.
ததா²பூ⁴தஸ்ஸ அமனஸிகாரஸ்ஸ அபா⁴வங் ஆக³ம்ம உப்பிலங் உத³பாதி³. வீரியங் கா³ள்ஹங் பக்³க³ஹிதந்தி தி²னமித்³த⁴ச²ம்பி⁴தத்தானங் வூபஸமனத்த²ங் அச்சாரத்³த⁴வீரியங் அஹோஸி, தேன சித்தே ஸமாதி⁴தூ³ஸிகா கே³ஹஸ்ஸிதா ப³லவபீதி உப்பன்னா. தேனாஹ ‘‘உப்பிலங் உப்பன்ன’’ந்தி. ததோதி ஸிதி²லவீரியத்தா. பதமெய்யாதி அதிவிய கி²ன்னங் ப⁴வெய்ய. தங் மமாதி பத்த²னாஅபி⁴ப⁴வனீயமனஸீஸேன ஜப்பேதீதி அபி⁴ஜப்பா, தண்ஹா. நானத்தா நானாஸபா⁴வா ஸஞ்ஞா நானத்தஸஞ்ஞா. அதிவிய உபரி கத்வா நிஜ்ஜா²னங் பெக்க²னங் அதினிஜ்ஜா²யிதத்தங்.
Tathābhūtassa amanasikārassa abhāvaṃ āgamma uppilaṃ udapādi. Vīriyaṃ gāḷhaṃ paggahitanti thinamiddhachambhitattānaṃ vūpasamanatthaṃ accāraddhavīriyaṃ ahosi, tena citte samādhidūsikā gehassitā balavapīti uppannā. Tenāha ‘‘uppilaṃ uppanna’’nti. Tatoti sithilavīriyattā. Patameyyāti ativiya khinnaṃ bhaveyya. Taṃ mamāti patthanāabhibhavanīyamanasīsena jappetīti abhijappā, taṇhā. Nānattā nānāsabhāvā saññā nānattasaññā. Ativiya upari katvā nijjhānaṃ pekkhanaṃ atinijjhāyitattaṃ.
243. பரிகம்மோபா⁴ஸமேவாதி பரிகம்மஸமுட்டி²தங் ஓபா⁴ஸமேவ. ந ச ரூபானி பஸ்ஸாமீதி ஓபா⁴ஸமனஸிகாரபஸுததாய தி³ப்³ப³சக்கு²னா ரூபானி ந பஸ்ஸாமி. விஸயரூபமேவாதி தேன ப²ரித்வா டி²தட்டா²னேவ தி³ப்³ப³சக்கு²னோ விஸயபூ⁴தங் ரூபக³தமேவ மனஸி கரோமி.
243.Parikammobhāsamevāti parikammasamuṭṭhitaṃ obhāsameva. Na ca rūpāni passāmīti obhāsamanasikārapasutatāya dibbacakkhunā rūpāni na passāmi. Visayarūpamevāti tena pharitvā ṭhitaṭṭhāneva dibbacakkhuno visayabhūtaṃ rūpagatameva manasi karomi.
கஸிணரூபானங் வஸேனெத்த² ஓபா⁴ஸஸ்ஸ பரித்ததாதி ஆஹ ‘‘பரித்தட்டா²னே ஓபா⁴ஸ’’ந்தி. பரித்தானி ரூபானீதி கதிபயானி, ஸா ச நேஸங் பரித்ததா டா²னவஸேனேவாதி ஆஹ ‘‘பரித்தகட்டா²னே ரூபானீ’’தி. ‘‘அப்பமாணஞ்சேவா’’திஆதி³னா வுத்தோ து³தியவாரோ. ஓபா⁴ஸபரித்ததங் ஸந்தா⁴ய பரிகம்மஸமாதி⁴ ‘‘பரித்தோ’’தி வுத்தோ தஸ்ஸேவ ஓபா⁴ஸஸ்ஸ அப்பமாணதாய அப்பமாணஸமாதீ⁴தி வசனதோ. தஸ்மிங் ஸமயேதி தஸ்மிங் பரித்தஸமாதி⁴னோ உப்பன்னஸமயே. தி³ப்³ப³சக்கு²பி பரித்தகங் ஹோதி பரித்தரூபக³தத³ஸ்ஸனதோ.
Kasiṇarūpānaṃ vasenettha obhāsassa parittatāti āha ‘‘parittaṭṭhāne obhāsa’’nti. Parittāni rūpānīti katipayāni, sā ca nesaṃ parittatā ṭhānavasenevāti āha ‘‘parittakaṭṭhāne rūpānī’’ti. ‘‘Appamāṇañcevā’’tiādinā vutto dutiyavāro. Obhāsaparittataṃ sandhāya parikammasamādhi ‘‘paritto’’ti vutto tasseva obhāsassa appamāṇatāya appamāṇasamādhīti vacanato. Tasmiṃ samayeti tasmiṃ parittasamādhino uppannasamaye. Dibbacakkhupi parittakaṃ hoti parittarūpagatadassanato.
245. து³கதிகஜ்ஜா²னஸமாதி⁴ந்தி சதுக்கனயே து³கஜ்ஜா²னஸமாதி⁴ங், பஞ்சகனயே திகஜ்ஜா²னஸமாதி⁴ந்தி யோஜனா. து³கஜ்ஜா²னஸமாதி⁴ந்தி சதுக்கனயே ததியசதுத்த²வஸேன து³கஜ்ஜா²னஸமாதி⁴ங், பஞ்சகனயே சதுத்த²பஞ்சமவஸேன து³கஜ்ஜா²னஸமாதி⁴ங். திகசதுக்கஜ்ஜா²னஸமாதி⁴ந்தி சதுக்கனயே திகஜ்ஜா²னஸமாதி⁴ங், பஞ்சகனயே சதுக்கஜ்ஜா²னஸமாதி⁴ந்தி யோஜனா.
245.Dukatikajjhānasamādhinti catukkanaye dukajjhānasamādhiṃ, pañcakanaye tikajjhānasamādhinti yojanā. Dukajjhānasamādhinti catukkanaye tatiyacatutthavasena dukajjhānasamādhiṃ, pañcakanaye catutthapañcamavasena dukajjhānasamādhiṃ. Tikacatukkajjhānasamādhinti catukkanaye tikajjhānasamādhiṃ, pañcakanaye catukkajjhānasamādhinti yojanā.
திவித⁴ந்தி ஸப்பீதிகவஸேன திப்பகாரங் ஸமாதி⁴ங். தத³ந்தோக³தா⁴தி ஸப்பீதிகாதி³ஸபா⁴வா. காமங் ப⁴க³வா புரிமயாமே புப்³பே³னிவாஸானுஸ்ஸதிஞாணங், பச்சி²மயாமே தி³ப்³ப³சக்கு²ஞாணங் நிப்³ப³த்தெந்தோபி இமானி ஞாணானி பா⁴வேஸியேவ. விபஸ்ஸனாபாத³கானி பன ஞாணானி ஸந்தா⁴ய, ‘‘பச்சி²மயாமே’’தி வுத்தங், தேனாஹ ‘‘ப⁴க³வதோ ஹீ’’திஆதி³. பஞ்சமஜ்ஜா²னஸ்ஸாதி பஞ்சமஜ்ஜா²னிகஸ்ஸ வஸேன பட²மஜ்ஜா²னிகோ மக்³கோ³ நத்தி². ஸோதி பஞ்சகனயோ ப⁴க³வதோ லோகியோ அஹோஸி. ஏதந்தி ஏதங், ‘‘ஸவிதக்கம்பி ஸவிசாரங் ஸமாதி⁴ங் பா⁴வேமீ’’திஆதி³வசனங். லோகியலோகுத்தரமிஸ்ஸகங் ஸந்தா⁴ய வுத்தங், ந ‘‘லோகியங் வா லோகுத்தரமேவ வா’’தி. ஸேஸங் ஸுவிஞ்ஞெய்யமேவாதி.
Tividhanti sappītikavasena tippakāraṃ samādhiṃ. Tadantogadhāti sappītikādisabhāvā. Kāmaṃ bhagavā purimayāme pubbenivāsānussatiñāṇaṃ, pacchimayāme dibbacakkhuñāṇaṃ nibbattentopi imāni ñāṇāni bhāvesiyeva. Vipassanāpādakāni pana ñāṇāni sandhāya, ‘‘pacchimayāme’’ti vuttaṃ, tenāha ‘‘bhagavato hī’’tiādi. Pañcamajjhānassāti pañcamajjhānikassa vasena paṭhamajjhāniko maggo natthi. Soti pañcakanayo bhagavato lokiyo ahosi. Etanti etaṃ, ‘‘savitakkampi savicāraṃ samādhiṃ bhāvemī’’tiādivacanaṃ. Lokiyalokuttaramissakaṃ sandhāya vuttaṃ, na ‘‘lokiyaṃ vā lokuttarameva vā’’ti. Sesaṃ suviññeyyamevāti.
உபக்கிலேஸஸுத்தவண்ணனாய லீனத்த²ப்பகாஸனா ஸமத்தா.
Upakkilesasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. உபக்கிலேஸஸுத்தங் • 8. Upakkilesasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. உபக்கிலேஸஸுத்தவண்ணனா • 8. Upakkilesasuttavaṇṇanā
