| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৮. উপক্কিলেসসুত্তৰণ্ণনা
8. Upakkilesasuttavaṇṇanā
২৩৬. তস্মাতি অত্থকামত্তা এৰমাহ, ন ভগৰতো ৰচনং অনাদিযন্তো। যে পন তদা সত্থুৰচনং ন গণ্হিংসু, তে কিঞ্চি অৰত্ৰা তুণ্হীভূতা মঙ্কুভূতা অট্ঠংসু, তস্মা উভযেসম্পি সত্থরি অগারৰপটিপত্তি নাহোসি।
236.Tasmāti atthakāmattā evamāha, na bhagavato vacanaṃ anādiyanto. Ye pana tadā satthuvacanaṃ na gaṇhiṃsu, te kiñci avatvā tuṇhībhūtā maṅkubhūtā aṭṭhaṃsu, tasmā ubhayesampi satthari agāravapaṭipatti nāhosi.
যেনপি জনেন ন দিট্ঠোতি যেন উভযজনেন অঞ্ঞৰিহিততায কুড্ডকৰাটাদিঅন্তরিকতায ৰা ন দিট্ঠো। দমনত্থন্তি তেহি উপাসকেহি নিম্মদভাৰং আপাদিতানং তেসং ভিক্খূনং দমনত্থং। ঠপযিংসূতি যো ইমেসং ভিক্খূনং দেতি, তস্স সতং দণ্ডোতি, সহস্সন্তি চ ৰদন্তি।
Yenapi janena na diṭṭhoti yena ubhayajanena aññavihitatāya kuḍḍakavāṭādiantarikatāya vā na diṭṭho. Damanatthanti tehi upāsakehi nimmadabhāvaṃ āpāditānaṃ tesaṃ bhikkhūnaṃ damanatthaṃ. Ṭhapayiṃsūti yo imesaṃ bhikkhūnaṃ deti, tassa sataṃ daṇḍoti, sahassanti ca vadanti.
২৩৭. ৰগ্গভাৰেনেৰ (সারত্থ॰ টী॰ মহাৰগ্গো ৩.৪৬৪) নানাসদ্দো অস্সাতি পুথুসদ্দো। সমজনোতি ভণ্ডনে সমজ্ঝাসযো জনো। বাললক্খণে ঠিতোপি ‘‘অহং বালো’’তি ন মঞ্ঞতি। ভিয্যো চাতি অত্তনো বালভাৰস্স অজাননতোপি ভিয্যো চ ভণ্ডনস্স উপরি ফোটো ৰিয সঙ্ঘভেদস্স অত্তনো কারণভাৰম্পি উপ্পজ্জমানং ন মঞ্ঞি নঞ্ঞাসি।
237. Vaggabhāveneva (sārattha. ṭī. mahāvaggo 3.464) nānāsaddo assāti puthusaddo. Samajanoti bhaṇḍane samajjhāsayo jano. Bālalakkhaṇe ṭhitopi ‘‘ahaṃ bālo’’ti na maññati. Bhiyyo cāti attano bālabhāvassa ajānanatopi bhiyyo ca bhaṇḍanassa upari phoṭo viya saṅghabhedassa attano kāraṇabhāvampi uppajjamānaṃ na maññi naññāsi.
কলহৰসেন পৰত্তৰাচাযেৰ গোচরো এতেসন্তি ৰাচাগোচরা হুত্ৰা। মুখাযামন্তি ৰিৰাদৰসেন মুখং আযমেত্ৰা ভাণিনো। ন তং জানন্তীতি তং কলহং ন জানন্তি। কলহং করোন্তো চ তং ন জানন্তো নাম নত্থি। যথা পন ন জানন্তি, তং দস্সেতুং আহ – ‘‘এৰং সাদীনৰো অয’’ন্তি। অযং কলহো নাম অত্তনো পরেসঞ্চ অত্থজাপনতো অনত্থুপ্পাদনতো দিট্ঠেৰ ধম্মে সম্পরাযে চ সাদীনৰো, সদোসোতি অত্থো।
Kalahavasena pavattavācāyeva gocaro etesanti vācāgocarā hutvā. Mukhāyāmanti vivādavasena mukhaṃ āyametvā bhāṇino. Na taṃ jānantīti taṃ kalahaṃ na jānanti. Kalahaṃ karonto ca taṃ na jānanto nāma natthi. Yathā pana na jānanti, taṃ dassetuṃ āha – ‘‘evaṃ sādīnavo aya’’nti. Ayaṃ kalaho nāma attano paresañca atthajāpanato anatthuppādanato diṭṭheva dhamme samparāye ca sādīnavo, sadosoti attho.
উপনয্হন্তীতি উপনাহৰসেন অনুবন্ধন্তি। পোরাণোতি পুরিমেহি বুদ্ধাদীহি আচিণ্ণসমাচিণ্ণতায পুরাতনো।
Upanayhantīti upanāhavasena anubandhanti. Porāṇoti purimehi buddhādīhi āciṇṇasamāciṇṇatāya purātano.
ন জানন্তীতি অনিচ্চসঞ্ঞং ন পচ্চুপট্ঠাপেন্তি।
Na jānantīti aniccasaññaṃ na paccupaṭṭhāpenti.
তথা পৰত্তৰেরানন্তি অট্ঠিছিন্নাদিভাৰং নিস্সায উপনযৰসেন চিরকালং পৰত্তৰেরানং।
Tathā pavattaverānanti aṭṭhichinnādibhāvaṃ nissāya upanayavasena cirakālaṃ pavattaverānaṃ.
বালসহাযতায ইমে ভিক্খূ কলহপসুতা, পণ্ডিতসহাযানং পন ইদং ন সিযাতি পণ্ডিতসহাযস্স বালসহাযস্স চ ৰণ্ণাৰণ্ণদীপনত্থং ৰুত্তা। সীহব্যগ্ঘাদিকে পাকটপরিস্সযে রাগদোসাদিকে পটিচ্ছন্নপরিস্সযে চ অভিভৰিত্ৰা।
Bālasahāyatāya ime bhikkhū kalahapasutā, paṇḍitasahāyānaṃ pana idaṃ na siyāti paṇḍitasahāyassa bālasahāyassa ca vaṇṇāvaṇṇadīpanatthaṃ vuttā. Sīhabyagghādike pākaṭaparissaye rāgadosādike paṭicchannaparissaye ca abhibhavitvā.
মাতঙ্গো অরঞ্ঞে মাতঙ্গরঞ্ঞেতি সরলোপেন সন্ধি। মাতঙ্গসদ্দেনেৰ হত্থিভাৰস্স ৰুত্তত্তা নাগৰচনং তস্স মহত্তৰিভাৰনত্থন্তি আহ – ‘‘নাগোতি মহন্তাধিৰচনমেত’’ন্তি। মহন্তপরিযাযোপি হি নাগ-সদ্দো হোতি ‘‘এৰং নাগস্স নাগেন, ঈসাদন্তস্স হত্থিনো’’তিআদীসু (উদা॰ ২৫; মহাৰ॰ ৪৬৭)।
Mātaṅgo araññe mātaṅgaraññeti saralopena sandhi. Mātaṅgasaddeneva hatthibhāvassa vuttattā nāgavacanaṃ tassa mahattavibhāvanatthanti āha – ‘‘nāgoti mahantādhivacanameta’’nti. Mahantapariyāyopi hi nāga-saddo hoti ‘‘evaṃ nāgassa nāgena, īsādantassa hatthino’’tiādīsu (udā. 25; mahāva. 467).
২৩৮. কিরসদ্দো অনুস্সৰসূচনত্থো নিপাতো। তেন অযমেত্থ সুতিপরম্পরাতি দস্সেতি। ভগৰতা হি সো আদীনৰো পগেৰ পরিঞ্ঞাতো, ন তেন সত্থা নিব্বিণ্ণো হোতি; তস্মিং পন অন্তোৰস্সে কেচি বুদ্ধৰেনেয্যা নাহেসুং; তেন অঞ্ঞত্থ গমনং তেসং ভিক্খূনং দমনুপাযোতি পালিলেয্যকং উদ্দিস্স গচ্ছন্তো একৰিহারিং আযস্মন্তং ভগুং, সমগ্গৰাসং ৰসন্তে চ অনুরুদ্ধত্থেরাদিকে সম্পহংসেতুং অনুরুদ্ধত্থেরস্স চ। ইমং উপক্কিলেসোৰাদং দাতুং তত্থ গতো, তস্মা কলহকারকে কিরস্সাতি এত্থাপি কিরসদ্দগ্গহণে এসেৰ নযো। ৰুত্তনযমেৰ গোসিঙ্গসালসুত্তে (ম॰ নি॰ ১.৩২৫ আদযো)।
238.Kirasaddo anussavasūcanattho nipāto. Tena ayamettha sutiparamparāti dasseti. Bhagavatā hi so ādīnavo pageva pariññāto, na tena satthā nibbiṇṇo hoti; tasmiṃ pana antovasse keci buddhaveneyyā nāhesuṃ; tena aññattha gamanaṃ tesaṃ bhikkhūnaṃ damanupāyoti pālileyyakaṃ uddissa gacchanto ekavihāriṃ āyasmantaṃ bhaguṃ, samaggavāsaṃ vasante ca anuruddhattherādike sampahaṃsetuṃ anuruddhattherassa ca. Imaṃ upakkilesovādaṃ dātuṃ tattha gato, tasmā kalahakārake kirassāti etthāpi kirasaddaggahaṇe eseva nayo. Vuttanayameva gosiṅgasālasutte (ma. ni. 1.325 ādayo).
২৪১. ‘‘যথা কথং পনা’’তি ৰুত্তপুচ্ছানং পচ্ছিমভাৰতো ‘‘অত্থি পন ৰোতি পচ্ছিমপুচ্ছাযা’’তি ৰুত্তং, ন পুন ‘‘অত্থি পন ৰো’’তি পৰত্তনস্স পুচ্ছনস্স অত্থিভাৰতো। সো পন লোকুত্তরধম্মো। থেরানন্তি অনুরুদ্ধত্থেরাদীনং নত্থি। পরিকম্মোভাসং পুচ্ছতীতি দিব্বচক্খুঞাণে কতাধিকারত্তা তস্স উপ্পাদনত্থং পরিকম্মোভাসং পুচ্ছতি। পরিকম্মোভাসন্তি পরিকম্মসমাধিনিব্বত্তং ওভাসং, উপচারজ্ঝানসঞ্জনিতং ওভাসন্তি অত্থো। চতুত্থজ্ঝানলাভী হি দিব্বচক্খুপরিকম্মত্থং ওভাসকসিণং ভাৰেত্ৰা উপচারে ঠপিতো সমাধি পরিকম্মসমাধি, তত্থ ওভাসো পরিকম্মোভাসোতি ৰুত্তো। তং সন্ধাযাহ – ‘‘ওভাসঞ্চেৰ সঞ্জানামাতি পরিকম্মোভাসং সঞ্জানামা’’তি। যত্তকে হি ঠানে দিব্বচক্খুনা রূপগতং দট্ঠুকামো, তত্তকং ঠানং ওভাসকসিণং ফরিত্ৰা ঠিতো। তং ওভাসং তত্থ চ রূপগতং দিব্বচক্খুঞাণেন পস্সতি, থেরা চ তথা পটিপজ্জিংসু। তেন ৰুত্তং – ‘‘ওভাসঞ্চেৰ সঞ্জানাম দস্সনঞ্চ রূপান’’ন্তি। যস্মা পন তেসং রূপগতং পস্সন্তানং পরিকম্মৰারো অতিক্কমি, ততো ওভাসো অন্তরধাযি, তস্মিং অন্তরহিতে রূপগতম্পি ন পঞ্ঞাযতি। পরিকম্মন্তি হি যথাৰুত্তকসিণারম্মণং উপচারজ্ঝানং, রূপগতং পস্সন্তানং কসিণোভাসৰসেন রূপগতদস্সনং, কসিণোভাসো চ পরিকম্মৰসেনাতি তদুভযম্পি পরিকম্মস্স অপ্পৰত্তিযা নাহোসি, তযিদং কারণং আদিকম্মিকভাৰতো থেরা ন মঞ্ঞিংসু, তস্মা ৰুত্তং ‘‘নপ্পটিৰিজ্ঝামা’’তি।
241. ‘‘Yathā kathaṃ panā’’ti vuttapucchānaṃ pacchimabhāvato ‘‘atthi pana voti pacchimapucchāyā’’ti vuttaṃ, na puna ‘‘atthi pana vo’’ti pavattanassa pucchanassa atthibhāvato. So pana lokuttaradhammo. Therānanti anuruddhattherādīnaṃ natthi. Parikammobhāsaṃ pucchatīti dibbacakkhuñāṇe katādhikārattā tassa uppādanatthaṃ parikammobhāsaṃ pucchati. Parikammobhāsanti parikammasamādhinibbattaṃ obhāsaṃ, upacārajjhānasañjanitaṃ obhāsanti attho. Catutthajjhānalābhī hi dibbacakkhuparikammatthaṃ obhāsakasiṇaṃ bhāvetvā upacāre ṭhapito samādhi parikammasamādhi, tattha obhāso parikammobhāsoti vutto. Taṃ sandhāyāha – ‘‘obhāsañceva sañjānāmāti parikammobhāsaṃ sañjānāmā’’ti. Yattake hi ṭhāne dibbacakkhunā rūpagataṃ daṭṭhukāmo, tattakaṃ ṭhānaṃ obhāsakasiṇaṃ pharitvā ṭhito. Taṃ obhāsaṃ tattha ca rūpagataṃ dibbacakkhuñāṇena passati, therā ca tathā paṭipajjiṃsu. Tena vuttaṃ – ‘‘obhāsañceva sañjānāma dassanañca rūpāna’’nti. Yasmā pana tesaṃ rūpagataṃ passantānaṃ parikammavāro atikkami, tato obhāso antaradhāyi, tasmiṃ antarahite rūpagatampi na paññāyati. Parikammanti hi yathāvuttakasiṇārammaṇaṃ upacārajjhānaṃ, rūpagataṃ passantānaṃ kasiṇobhāsavasena rūpagatadassanaṃ, kasiṇobhāso ca parikammavasenāti tadubhayampi parikammassa appavattiyā nāhosi, tayidaṃ kāraṇaṃ ādikammikabhāvato therā na maññiṃsu, tasmā vuttaṃ ‘‘nappaṭivijjhāmā’’ti.
নিমিত্তং পটিৰিজ্ঝিতব্বন্তি কারণং পচ্চক্খতো দস্সেত্ৰা সুৰিসুদ্ধদিব্বচক্খুঞাণে থেরং পতিট্ঠাপেতুকামো সত্থা ৰদতি। কিং ন আল়ুলেস্সন্তীতি কিং ন ব্যামোহেস্সন্তি, ব্যামোহেস্সন্তি এৰাতি অত্থো। ৰিচিকিচ্ছা উদপাদীতি দিব্বচক্খুনো যথাউপট্ঠিতেসু রূপগতেসু অপুব্বতায, ‘‘ইদং নু খো রূপগতং কিং, ইদং নু খো কি’’ন্তি মগ্গেন অসমুচ্ছিন্নত্তা ৰিচিকিচ্ছা সংসযো উপ্পজ্জি। সমাধি চৰীতি ৰিচিকিচ্ছায উপ্পন্নত্তা পরিকম্মসমাধি ৰিগচ্ছি। ততো এৰ হি পরিকম্মোভাসোপি অন্তরধাযি, দিব্বচক্খুনাপি রূপং ন পস্সি। ন মনসি করিস্সামীতি মনসিকারৰসেন মে রূপানি উপট্ঠহিংসু, রূপানি পস্সতো ৰিচিকিচ্ছা উপ্পজ্জতি, তস্মা ইদানি কিঞ্চি ন মনসি করিস্সামীতি তুণ্হী অহোসি তং পন তুণ্হীভাৰপ্পত্তিং সন্ধাযাহ ‘‘অমনসিকারো উদপাদী’’তি।
Nimittaṃ paṭivijjhitabbanti kāraṇaṃ paccakkhato dassetvā suvisuddhadibbacakkhuñāṇe theraṃ patiṭṭhāpetukāmo satthā vadati. Kiṃ na āḷulessantīti kiṃ na byāmohessanti, byāmohessanti evāti attho. Vicikicchā udapādīti dibbacakkhuno yathāupaṭṭhitesu rūpagatesu apubbatāya, ‘‘idaṃ nu kho rūpagataṃ kiṃ, idaṃ nu kho ki’’nti maggena asamucchinnattā vicikicchā saṃsayo uppajji. Samādhi cavīti vicikicchāya uppannattā parikammasamādhi vigacchi. Tato eva hi parikammobhāsopi antaradhāyi, dibbacakkhunāpi rūpaṃ na passi. Na manasi karissāmīti manasikāravasena me rūpāni upaṭṭhahiṃsu, rūpāni passato vicikicchā uppajjati, tasmā idāni kiñci na manasi karissāmīti tuṇhī ahosi taṃ pana tuṇhībhāvappattiṃ sandhāyāha ‘‘amanasikāro udapādī’’ti.
তথাভূতস্স অমনসিকারস্স অভাৰং আগম্ম উপ্পিলং উদপাদি। ৰীরিযং গাল়্হং পগ্গহিতন্তি থিনমিদ্ধছম্ভিতত্তানং ৰূপসমনত্থং অচ্চারদ্ধৰীরিযং অহোসি, তেন চিত্তে সমাধিদূসিকা গেহস্সিতা বলৰপীতি উপ্পন্না। তেনাহ ‘‘উপ্পিলং উপ্পন্ন’’ন্তি। ততোতি সিথিলৰীরিযত্তা। পতমেয্যাতি অতিৰিয খিন্নং ভৰেয্য। তং মমাতি পত্থনাঅভিভৰনীযমনসীসেন জপ্পেতীতি অভিজপ্পা, তণ্হা। নানত্তা নানাসভাৰা সঞ্ঞা নানত্তসঞ্ঞা। অতিৰিয উপরি কত্ৰা নিজ্ঝানং পেক্খনং অতিনিজ্ঝাযিতত্তং।
Tathābhūtassa amanasikārassa abhāvaṃ āgamma uppilaṃ udapādi. Vīriyaṃ gāḷhaṃ paggahitanti thinamiddhachambhitattānaṃ vūpasamanatthaṃ accāraddhavīriyaṃ ahosi, tena citte samādhidūsikā gehassitā balavapīti uppannā. Tenāha ‘‘uppilaṃ uppanna’’nti. Tatoti sithilavīriyattā. Patameyyāti ativiya khinnaṃ bhaveyya. Taṃ mamāti patthanāabhibhavanīyamanasīsena jappetīti abhijappā, taṇhā. Nānattā nānāsabhāvā saññā nānattasaññā. Ativiya upari katvā nijjhānaṃ pekkhanaṃ atinijjhāyitattaṃ.
২৪৩. পরিকম্মোভাসমেৰাতি পরিকম্মসমুট্ঠিতং ওভাসমেৰ। ন চ রূপানি পস্সামীতি ওভাসমনসিকারপসুততায দিব্বচক্খুনা রূপানি ন পস্সামি। ৰিসযরূপমেৰাতি তেন ফরিত্ৰা ঠিতট্ঠানেৰ দিব্বচক্খুনো ৰিসযভূতং রূপগতমেৰ মনসি করোমি।
243.Parikammobhāsamevāti parikammasamuṭṭhitaṃ obhāsameva. Na ca rūpāni passāmīti obhāsamanasikārapasutatāya dibbacakkhunā rūpāni na passāmi. Visayarūpamevāti tena pharitvā ṭhitaṭṭhāneva dibbacakkhuno visayabhūtaṃ rūpagatameva manasi karomi.
কসিণরূপানং ৰসেনেত্থ ওভাসস্স পরিত্ততাতি আহ ‘‘পরিত্তট্ঠানে ওভাস’’ন্তি। পরিত্তানি রূপানীতি কতিপযানি, সা চ নেসং পরিত্ততা ঠানৰসেনেৰাতি আহ ‘‘পরিত্তকট্ঠানে রূপানী’’তি। ‘‘অপ্পমাণঞ্চেৰা’’তিআদিনা ৰুত্তো দুতিযৰারো। ওভাসপরিত্ততং সন্ধায পরিকম্মসমাধি ‘‘পরিত্তো’’তি ৰুত্তো তস্সেৰ ওভাসস্স অপ্পমাণতায অপ্পমাণসমাধীতি ৰচনতো। তস্মিং সমযেতি তস্মিং পরিত্তসমাধিনো উপ্পন্নসমযে। দিব্বচক্খুপি পরিত্তকং হোতি পরিত্তরূপগতদস্সনতো।
Kasiṇarūpānaṃ vasenettha obhāsassa parittatāti āha ‘‘parittaṭṭhāne obhāsa’’nti. Parittāni rūpānīti katipayāni, sā ca nesaṃ parittatā ṭhānavasenevāti āha ‘‘parittakaṭṭhāne rūpānī’’ti. ‘‘Appamāṇañcevā’’tiādinā vutto dutiyavāro. Obhāsaparittataṃ sandhāya parikammasamādhi ‘‘paritto’’ti vutto tasseva obhāsassa appamāṇatāya appamāṇasamādhīti vacanato. Tasmiṃ samayeti tasmiṃ parittasamādhino uppannasamaye. Dibbacakkhupi parittakaṃ hoti parittarūpagatadassanato.
২৪৫. দুকতিকজ্ঝানসমাধিন্তি চতুক্কনযে দুকজ্ঝানসমাধিং, পঞ্চকনযে তিকজ্ঝানসমাধিন্তি যোজনা। দুকজ্ঝানসমাধিন্তি চতুক্কনযে ততিযচতুত্থৰসেন দুকজ্ঝানসমাধিং, পঞ্চকনযে চতুত্থপঞ্চমৰসেন দুকজ্ঝানসমাধিং। তিকচতুক্কজ্ঝানসমাধিন্তি চতুক্কনযে তিকজ্ঝানসমাধিং, পঞ্চকনযে চতুক্কজ্ঝানসমাধিন্তি যোজনা।
245.Dukatikajjhānasamādhinti catukkanaye dukajjhānasamādhiṃ, pañcakanaye tikajjhānasamādhinti yojanā. Dukajjhānasamādhinti catukkanaye tatiyacatutthavasena dukajjhānasamādhiṃ, pañcakanaye catutthapañcamavasena dukajjhānasamādhiṃ. Tikacatukkajjhānasamādhinti catukkanaye tikajjhānasamādhiṃ, pañcakanaye catukkajjhānasamādhinti yojanā.
তিৰিধন্তি সপ্পীতিকৰসেন তিপ্পকারং সমাধিং। তদন্তোগধাতি সপ্পীতিকাদিসভাৰা। কামং ভগৰা পুরিমযামে পুব্বেনিৰাসানুস্সতিঞাণং, পচ্ছিমযামে দিব্বচক্খুঞাণং নিব্বত্তেন্তোপি ইমানি ঞাণানি ভাৰেসিযেৰ। ৰিপস্সনাপাদকানি পন ঞাণানি সন্ধায, ‘‘পচ্ছিমযামে’’তি ৰুত্তং, তেনাহ ‘‘ভগৰতো হী’’তিআদি। পঞ্চমজ্ঝানস্সাতি পঞ্চমজ্ঝানিকস্স ৰসেন পঠমজ্ঝানিকো মগ্গো নত্থি। সোতি পঞ্চকনযো ভগৰতো লোকিযো অহোসি। এতন্তি এতং, ‘‘সৰিতক্কম্পি সৰিচারং সমাধিং ভাৰেমী’’তিআদিৰচনং। লোকিযলোকুত্তরমিস্সকং সন্ধায ৰুত্তং, ন ‘‘লোকিযং ৰা লোকুত্তরমেৰ ৰা’’তি। সেসং সুৰিঞ্ঞেয্যমেৰাতি।
Tividhanti sappītikavasena tippakāraṃ samādhiṃ. Tadantogadhāti sappītikādisabhāvā. Kāmaṃ bhagavā purimayāme pubbenivāsānussatiñāṇaṃ, pacchimayāme dibbacakkhuñāṇaṃ nibbattentopi imāni ñāṇāni bhāvesiyeva. Vipassanāpādakāni pana ñāṇāni sandhāya, ‘‘pacchimayāme’’ti vuttaṃ, tenāha ‘‘bhagavato hī’’tiādi. Pañcamajjhānassāti pañcamajjhānikassa vasena paṭhamajjhāniko maggo natthi. Soti pañcakanayo bhagavato lokiyo ahosi. Etanti etaṃ, ‘‘savitakkampi savicāraṃ samādhiṃ bhāvemī’’tiādivacanaṃ. Lokiyalokuttaramissakaṃ sandhāya vuttaṃ, na ‘‘lokiyaṃ vā lokuttarameva vā’’ti. Sesaṃ suviññeyyamevāti.
উপক্কিলেসসুত্তৰণ্ণনায লীনত্থপ্পকাসনা সমত্তা।
Upakkilesasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৮. উপক্কিলেসসুত্তং • 8. Upakkilesasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৮. উপক্কিলেসসুত্তৰণ্ণনা • 8. Upakkilesasuttavaṇṇanā
