| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. ឧបក្កិលេសសុត្តវណ្ណនា
10. Upakkilesasuttavaṇṇanā
៥០. ទសមេ ឧបក្កិលេសាតិ វិរោចិតុំ អទត្វា ឧបក្កិលិដ្ឋភាវករណេន ឧបក្កិលេសា។ មហិកាតិ ហិមំ។ ធូមោ រជោតិ ធូមោ ច រជោ ច។ រាហូតិ បុរិមា តយោ អសម្បត្តឧបក្កិលេសា, រាហុ បន សម្បត្តឧបក្កិលេសវសេន កថិតោតិ វេទិតព្ពោ។ សមណព្រាហ្មណា ន តបន្តិ ន ភាសន្តិ ន វិរោចន្តីតិ គុណប្បតាបេន ន តបន្តិ, គុណោភាសេន ន ភាសន្តិ, គុណវិរោចនេន ន វិរោចន្តិ។ សុរាមេរយបានា អប្បដិវិរតាតិ បញ្ចវិធាយ សុរាយ ចតុព្ពិធស្ស មេរយស្ស ច បានតោ អវិរតា។
50. Dasame upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo rajoti dhūmo ca rajo ca. Rāhūti purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇappatāpena na tapanti, guṇobhāsena na bhāsanti, guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa merayassa ca pānato aviratā.
អវិជ្ជានិវុតាតិ អវិជ្ជាយ និវារិតា បិហិតា។ បិយរូបាភិនន្ទិនោតិ បិយរូបំ សាតរូបំ អភិនន្ទមានា តុស្សមានា។ សាទិយន្តីតិ គណ្ហន្តិ។ អវិទ្ទសូតិ អន្ធពាលា។ សនេត្តិកាតិ តណ្ហាយោត្តេនេវ សយោត្តា។ កដសិន្តិ អត្តភាវំ។ ឃោរន្តិ កក្ខឡំ។ ឥមស្មិំ សុត្តេបិ គាថាសុបិ វដ្ដមេវ កថិតន្តិ។
Avijjānivutāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sanettikāti taṇhāyotteneva sayottā. Kaṭasinti attabhāvaṃ. Ghoranti kakkhaḷaṃ. Imasmiṃ suttepi gāthāsupi vaṭṭameva kathitanti.
រោហិតស្សវគ្គោ បញ្ចមោ។
Rohitassavaggo pañcamo.
បឋមបណ្ណាសកំ និដ្ឋិតំ។
Paṭhamapaṇṇāsakaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. ឧបក្កិលេសសុត្តំ • 10. Upakkilesasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. ឧបក្កិលេសសុត្តវណ្ណនា • 10. Upakkilesasuttavaṇṇanā
