| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. ဥပက္ကိလေသသုတ္တဝဏ္ဏနာ
10. Upakkilesasuttavaṇṇanā
၅၀. ဒသမေ ဥပက္ကိလေသာတိ ဝိရောစိတုံ အဒတ္ဝာ ဥပက္ကိလိဋ္ဌဘာဝကရဏေန ဥပက္ကိလေသာ။ မဟိကာတိ ဟိမံ။ ဓူမော ရဇောတိ ဓူမော စ ရဇော စ။ ရာဟူတိ ပုရိမာ တယော အသမ္ပတ္တဥပက္ကိလေသာ, ရာဟု ပန သမ္ပတ္တဥပက္ကိလေသဝသေန ကထိတောတိ ဝေဒိတဗ္ဗော။ သမဏဗ္ရာဟ္မဏာ န တပန္တိ န ဘာသန္တိ န ဝိရောစန္တီတိ ဂုဏပ္ပတာပေန န တပန္တိ, ဂုဏောဘာသေန န ဘာသန္တိ, ဂုဏဝိရောစနေန န ဝိရောစန္တိ။ သုရာမေရယပာနာ အပ္ပဋိဝိရတာတိ ပဉ္စဝိဓာယ သုရာယ စတုဗ္ဗိဓသ္သ မေရယသ္သ စ ပာနတော အဝိရတာ။
50. Dasame upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo rajoti dhūmo ca rajo ca. Rāhūti purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇappatāpena na tapanti, guṇobhāsena na bhāsanti, guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa merayassa ca pānato aviratā.
အဝိဇ္ဇာနိဝုတာတိ အဝိဇ္ဇာယ နိဝာရိတာ ပိဟိတာ။ ပိယရူပာဘိနန္ဒိနောတိ ပိယရူပံ သာတရူပံ အဘိနန္ဒမာနာ တုသ္သမာနာ။ သာဒိယန္တီတိ ဂဏ္ဟန္တိ။ အဝိဒ္ဒသူတိ အန္ဓဗာလာ။ သနေတ္တိကာတိ တဏ္ဟာယောတ္တေနေဝ သယောတ္တာ။ ကဋသိန္တိ အတ္တဘာဝံ။ ဃောရန္တိ ကက္ခဠံ။ ဣမသ္မိံ သုတ္တေပိ ဂာထာသုပိ ဝဋ္ဋမေဝ ကထိတန္တိ။
Avijjānivutāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sanettikāti taṇhāyotteneva sayottā. Kaṭasinti attabhāvaṃ. Ghoranti kakkhaḷaṃ. Imasmiṃ suttepi gāthāsupi vaṭṭameva kathitanti.
ရောဟိတသ္သဝဂ္ဂော ပဉ္စမော။
Rohitassavaggo pañcamo.
ပဌမပဏ္ဏာသကံ နိဋ္ဌိတံ။
Paṭhamapaṇṇāsakaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. ဥပက္ကိလေသသုတ္တံ • 10. Upakkilesasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. ဥပက္ကိလေသသုတ္တဝဏ္ဏနာ • 10. Upakkilesasuttavaṇṇanā
