| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. උපක්‌කිලෙසසුත්‌තවණ්‌ණනා
3. Upakkilesasuttavaṇṇanā
23. තතියෙ න ච පභස්‌සරන්‌ති න ච පභාවන්‌තං. පභඞ්‌ගු චාති පභිජ්‌ජනසභාවං. අයොති කාළලොහං. ලොහන්‌ති ඨපෙත්‌වා ඉධ වුත්‌තානි චත්‌තාරි අවසෙසං ලොහං. සජ්‌ඣන්‌ති රජතං. චිත්‌තස්‌සාති චාතුභූමකකුසලචිත්‌තස්‌ස. තෙභූමකස්‌ස තාව උපක්‌කිලෙසා හොන්‌තු, ලොකුත්‌තරස්‌ස කථං හොන්‌තීති? උප්‌පජ්‌ජිතුං අප්‌පදානෙන. යදග්‌ගෙන හි උප්‌පජ්‌ජිතුං න දෙන්‌ති, තදග්‌ගෙනෙව තෙ ලොකියස්‌සපි ලොකුත්‌තරස්‌සපි උපක්‌කිලෙසා නාම හොන්‌ති. පභඞ්‌ගු චාති ආරම්‌මණෙ චුණ්‌ණවිචුණ්‌ණභාවූපගමනෙන භිජ්‌ජනසභාවං. සම්‌මා සමාධියති ආසවානං ඛයායාති ආසවානං ඛයසඞ්‌ඛාතස්‌ස අරහත්‌තස්‌ස අත්‌ථාය හෙතුනා කාරණෙන සමාධියති. එත්‌තාවතා චිත්‌තං විසොධෙත්‌වා අරහත්‌තෙ පතිට්‌ඨිතං ඛීණාසවං දස්‌සෙති. ඉදානිස්‌ස අභිඤ්‌ඤාපටිවෙධං දස්‌සෙන්‌තො යස්‌ස යස්‌ස චාතිආදිමාහ. තං උත්‌තානත්‌ථමෙවාති.
23. Tatiye na ca pabhassaranti na ca pabhāvantaṃ. Pabhaṅgu cāti pabhijjanasabhāvaṃ. Ayoti kāḷalohaṃ. Lohanti ṭhapetvā idha vuttāni cattāri avasesaṃ lohaṃ. Sajjhanti rajataṃ. Cittassāti cātubhūmakakusalacittassa. Tebhūmakassa tāva upakkilesā hontu, lokuttarassa kathaṃ hontīti? Uppajjituṃ appadānena. Yadaggena hi uppajjituṃ na denti, tadaggeneva te lokiyassapi lokuttarassapi upakkilesā nāma honti. Pabhaṅgu cāti ārammaṇe cuṇṇavicuṇṇabhāvūpagamanena bhijjanasabhāvaṃ. Sammāsamādhiyati āsavānaṃ khayāyāti āsavānaṃ khayasaṅkhātassa arahattassa atthāya hetunā kāraṇena samādhiyati. Ettāvatā cittaṃ visodhetvā arahatte patiṭṭhitaṃ khīṇāsavaṃ dasseti. Idānissa abhiññāpaṭivedhaṃ dassento yassa yassa cātiādimāha. Taṃ uttānatthamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. උපක්‌කිලෙසසුත්‌තං • 3. Upakkilesasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-4. උපක්‌කිලෙසසුත්‌තාදිවණ්‌ණනා • 3-4. Upakkilesasuttādivaṇṇanā
