| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༨. ཨུཔཀྐིལེསསུཏྟཝཎྞནཱ
8. Upakkilesasuttavaṇṇanā
༢༣༦. ཨེཝཾ མེ སུཏནྟི ཨུཔཀྐིལེསསུཏྟཾ། ཏཏྠ ཨེཏདཝོཙཱཏི ནེཝ བྷེདཱདྷིཔྤཱཡེན ན པིཡཀམྱཏཱཡ, ཨཐ ཁྭཱསྶ ཨེཏདཧོསི – ‘‘ཨིམེ བྷིཀྑཱུ མམ ཝཙནཾ གཧེཏྭཱ ན ཨོརམིསྶནྟི, བུདྡྷཱ ཙ ནཱམ ཧིཏཱནུཀམྤཀཱ, ཨདྡྷཱ ནེསཾ བྷགཝཱ ཨེཀཾ ཀཱརཎཾ ཀཐེསྶཏི, ཏཾ སུཏྭཱ ཨེཏེ ཨོརམིསྶནྟི, ཏཏོ ཏེསཾ ཕཱསུཝིཧཱརོ བྷཝིསྶཏཱི’’ཏི། ཏསྨཱ ཨེཏཾ ‘‘ཨིདྷ, བྷནྟེ’’ཏིཨཱདིཝཙནམཝོཙ། མཱ བྷཎྜནནྟིཨཱདཱིསུ ‘‘ཨཀཏྠཱ’’ཏི པཱཋསེསཾ གཧེཏྭཱ ‘‘མཱ བྷཎྜནཾ ཨཀཏྠཱ’’ཏི ཨེཝཾ ཨཏྠོ དཊྛབྦོ། ཨཉྙཏརོཏི སོ ཀིར བྷིཀྑུ བྷགཝཏོ ཨཏྠཀཱམོ, ཨཡཾ ཀིརསྶ ཨདྷིཔྤཱཡོ – ‘‘ཨིམེ བྷིཀྑཱུ ཀོདྷཱབྷིབྷཱུཏཱ སཏྠུ ཝཙནཾ ན གཎྷནྟི, མཱ བྷགཝཱ ཨེཏེ ཨོཝདནྟོ ཀིལམཱི’’ཏི, ཏསྨཱ ཨེཝམཱཧ།
236.Evaṃme sutanti upakkilesasuttaṃ. Tattha etadavocāti neva bhedādhippāyena na piyakamyatāya, atha khvāssa etadahosi – ‘‘ime bhikkhū mama vacanaṃ gahetvā na oramissanti, buddhā ca nāma hitānukampakā, addhā nesaṃ bhagavā ekaṃ kāraṇaṃ kathessati, taṃ sutvā ete oramissanti, tato tesaṃ phāsuvihāro bhavissatī’’ti. Tasmā etaṃ ‘‘idha, bhante’’tiādivacanamavoca. Mā bhaṇḍanantiādīsu ‘‘akatthā’’ti pāṭhasesaṃ gahetvā ‘‘mā bhaṇḍanaṃ akatthā’’ti evaṃ attho daṭṭhabbo. Aññataroti so kira bhikkhu bhagavato atthakāmo, ayaṃ kirassa adhippāyo – ‘‘ime bhikkhū kodhābhibhūtā satthu vacanaṃ na gaṇhanti, mā bhagavā ete ovadanto kilamī’’ti, tasmā evamāha.
པིཎྜཱཡ པཱཝིསཱིཏི ན ཀེཝལཾ པཱཝིསི, ཡེནཔི ཛནེན ན དིཊྛོ, སོ མཾ པསྶཏཱུཏིཔི ཨདྷིཊྛཱསི། ཀིམཏྠཾ ཨདྷིཊྛཱསཱིཏི? ཏེསཾ བྷིཀྑཱུནཾ དམནཏྠཾ། བྷགཝཱ ཧི ཏདཱ པིཎྜཔཱཏཔྤཊིཀྐནྟོ ‘‘པུཐུསདྡོ སམཛནོ’’ཏིཨཱདིགཱཐཱ བྷཱསིཏྭཱ ཀོསམྦིཏོ བཱལཀལོཎཀཱརགཱམཾ གཏོ། ཏཏོ པཱཙཱིནཝཾསདཱཡཾ, ཏཏོ པཱལིལེཡྻཀཝནསཎྜཾ གནྟྭཱ པཱལིལེཡྻཧཏྠིནཱགེན ཨུཔཊྛཧིཡམཱནོ ཏེམཱསཾ ཝསི། ནགརཝཱསིནོཔི – ‘‘སཏྠཱ ཝིཧཱརཾ གཏོ, གཙྪཱམ དྷམྨསྶཝནཱཡཱ’’ཏི གནྡྷཔུཔྥཧཏྠཱ ཝིཧཱརཾ གནྟྭཱ ‘‘ཀཧཾ, བྷནྟེ, སཏྠཱ’’ཏི པུཙྪིཾསུ། ‘‘ཀཧཾ ཏུམྷེ སཏྠཱརཾ དཀྑཐ, སཏྠཱ ‘ཨིམེ བྷིཀྑཱུ སམགྒེ ཀརིསྶཱམཱི’ཏི ཨཱགཏོ, སམགྒེ ཀཱཏུཾ ཨསཀྐོནྟོ ནིཀྑམིཏྭཱ གཏོ’’ཏི། ‘‘མཡཾ སཏམྤི སཧསྶམྤི དཏྭཱ སཏྠཱརཾ ཨཱནེཏུཾ ན སཀྐོམ, སོ ནོ ཨཡཱཙིཏོ སཡམེཝ ཨཱགཏོ, མཡཾ ཨིམེ བྷིཀྑཱུ ནིསྶཱཡ སཏྠུ སམྨུཁཱ དྷམྨཀཐཾ སོཏུཾ ན ལབྷིམྷཱ། ཨིམེ སཏྠཱརཾ ཨུདྡིསྶ པབྦཛིཏཱ, ཏསྨིམྤི སཱམགྒིཾ ཀརོནྟེ སམགྒཱ ན ཛཱཏཱ, ཀསྶཱཉྙསྶ ཝཙནཾ ཀརིསྶནྟི། ཨལཾ ན ཨིམེསཾ བྷིཀྑཱ དཱཏབྦཱ’’ཏི སཀལནགརེ དཎྜཾ ཋཔཡིཾསུ། ཏེ པུནདིཝསེ སཀལནགརཾ པིཎྜཱཡ ཙརིཏྭཱ ཀཊཙྪུམཏྟམྤི བྷིཀྑཾ ཨལབྷིཏྭཱ ཝིཧཱརཾ ཨཱགམཾསུ། ཨུཔཱསཀཱཔི ཏེ པུན ཨཱཧཾསུ – ‘‘ཡཱཝ སཏྠཱརཾ ན ཁམཱཔེཐ, ཏཱཝ ཝོ ཏམེཝ དཎྜཀམྨ’’ནྟི། ཏེ ‘‘སཏྠཱརཾ ཁམཱཔེསྶཱམཱ’’ཏི བྷགཝཏི སཱཝཏྠིཡཾ ཨནུཔྤཏྟེ ཏཏྠ ཨགམཾསུ། སཏྠཱ ཏེསཾ ཨཊྛཱརས བྷེདཀརཝཏྠཱུནི དེསེསཱིཏི ཨཡམེཏྠ པཱལི༹མུཏྟཀཀཐཱ།
Piṇḍāya pāvisīti na kevalaṃ pāvisi, yenapi janena na diṭṭho, so maṃ passatūtipi adhiṭṭhāsi. Kimatthaṃ adhiṭṭhāsīti? Tesaṃ bhikkhūnaṃ damanatthaṃ. Bhagavā hi tadā piṇḍapātappaṭikkanto ‘‘puthusaddo samajano’’tiādigāthā bhāsitvā kosambito bālakaloṇakāragāmaṃ gato. Tato pācīnavaṃsadāyaṃ, tato pālileyyakavanasaṇḍaṃ gantvā pālileyyahatthināgena upaṭṭhahiyamāno temāsaṃ vasi. Nagaravāsinopi – ‘‘satthā vihāraṃ gato, gacchāma dhammassavanāyā’’ti gandhapupphahatthā vihāraṃ gantvā ‘‘kahaṃ, bhante, satthā’’ti pucchiṃsu. ‘‘Kahaṃ tumhe satthāraṃ dakkhatha, satthā ‘ime bhikkhū samagge karissāmī’ti āgato, samagge kātuṃ asakkonto nikkhamitvā gato’’ti. ‘‘Mayaṃ satampi sahassampi datvā satthāraṃ ānetuṃ na sakkoma, so no ayācito sayameva āgato, mayaṃ ime bhikkhū nissāya satthu sammukhā dhammakathaṃ sotuṃ na labhimhā. Ime satthāraṃ uddissa pabbajitā, tasmimpi sāmaggiṃ karonte samaggā na jātā, kassāññassa vacanaṃ karissanti. Alaṃ na imesaṃ bhikkhā dātabbā’’ti sakalanagare daṇḍaṃ ṭhapayiṃsu. Te punadivase sakalanagaraṃ piṇḍāya caritvā kaṭacchumattampi bhikkhaṃ alabhitvā vihāraṃ āgamaṃsu. Upāsakāpi te puna āhaṃsu – ‘‘yāva satthāraṃ na khamāpetha, tāva vo tameva daṇḍakamma’’nti. Te ‘‘satthāraṃ khamāpessāmā’’ti bhagavati sāvatthiyaṃ anuppatte tattha agamaṃsu. Satthā tesaṃ aṭṭhārasa bhedakaravatthūni desesīti ayamettha pāḷimuttakakathā.
༢༣༧. ཨིདཱནི པུཐུསདྡོཏིཨཱདིགཱཐཱསུ པུཐུ མཧཱསདྡོ ཨསྶཱཏི པུཐུསདྡོ། སམཛནོཏི སམཱནོ ཨེཀསདིསོ ཛནོ, སབྦོཝཱཡཾ བྷཎྜནཀཱརཀཛནོ སམནྟཏོ སདྡནིཙྪརཎེན པུཐུསདྡོ ཙེཝ སདིསོ ཙཱཏི ཝུཏྟཾ ཧོཏི། ན བཱལོ ཀོཙི མཉྙཐཱཏི ཏཏྲ ཀོཙི ཨེཀོཔི ཨཧཾ བཱལོཏི ན མཉྙཏི, སབྦེཔི པཎྜིཏམཱནིནོཡེཝ། ནཱཉྙཾ བྷིཡྻོ ཨམཉྙརུནྟི ཀོཙི ཨེཀོཔི ཨཧཾ བཱལོཏི ན ཙ མཉྙི, བྷིཡྻོ ཙ སངྒྷསྨིཾ བྷིཛྫམཱནེ ཨཉྙམྤི ཨེཀཾ ‘‘མཡ྄ཧཾ ཀཱརཎཱ སངྒྷོ བྷིཛྫཏཱི’’ཏི ཨིདཾ ཀཱརཎཾ ན མཉྙཱིཏི ཨཏྠོ།
237. Idāni puthusaddotiādigāthāsu puthu mahāsaddo assāti puthusaddo. Samajanoti samāno ekasadiso jano, sabbovāyaṃ bhaṇḍanakārakajano samantato saddaniccharaṇena puthusaddo ceva sadiso cāti vuttaṃ hoti. Na bālo koci maññathāti tatra koci ekopi ahaṃ bāloti na maññati, sabbepi paṇḍitamāninoyeva. Nāññaṃ bhiyyo amaññarunti koci ekopi ahaṃ bāloti na ca maññi, bhiyyo ca saṅghasmiṃ bhijjamāne aññampi ekaṃ ‘‘mayhaṃ kāraṇā saṅgho bhijjatī’’ti idaṃ kāraṇaṃ na maññīti attho.
པརིམུཊྛཱཏི མུཊྛསྶཏིནོ། ཝཱཙཱགོཙརབྷཱཎིནོཏི རཱཀཱརསྶ རསྶཱདེསོ ཀཏོ; ཝཱཙཱགོཙརཱཝ , ན སཏིཔཊྛཱནགོཙརཱ, བྷཱཎིནོ ཙ, ཀཐཾ བྷཱཎིནོ? ཡཱཝིཙྪནྟི མུཁཱཡཱམཾ, ཡཱཝ མུཁཾ པསཱརེཏུཾ ཨིཙྪནྟི, ཏཱཝ པསཱརེཏྭཱ བྷཱཎིནོ, ཨེཀོཔི སངྒྷགཱརཝེན མུཁསངྐོཙནཾ ན ཀརོཏཱིཏི ཨཏྠོ། ཡེན ནཱིཏཱཏི ཡེན ཀལཧེན ཨིམཾ ནིལླཛྫབྷཱཝཾ ནཱིཏཱ། ན ཏཾ ཝིདཱུ ན ཏཾ ཛཱནནྟི ‘‘ཨེཝཾ སཱདཱིནཝོ ཨཡ’’ནྟི།
Parimuṭṭhāti muṭṭhassatino. Vācāgocarabhāṇinoti rākārassa rassādeso kato; vācāgocarāva , na satipaṭṭhānagocarā, bhāṇino ca, kathaṃ bhāṇino? Yāvicchanti mukhāyāmaṃ, yāva mukhaṃ pasāretuṃ icchanti, tāva pasāretvā bhāṇino, ekopi saṅghagāravena mukhasaṅkocanaṃ na karotīti attho. Yena nītāti yena kalahena imaṃ nillajjabhāvaṃ nītā. Na taṃ vidū na taṃ jānanti ‘‘evaṃ sādīnavo aya’’nti.
ཡེ ཙ ཏཾ ཨུཔནཡ྄ཧནྟཱིཏི ཏཾ ཨཀྐོཙྪི མནྟིཨཱདིཀཾ ཨཱཀཱརཾ ཡེ ཨུཔནཡ྄ཧནྟི། སནནྟནོཏི པོརཱཎོ།
Ye ca taṃ upanayhantīti taṃ akkocchi mantiādikaṃ ākāraṃ ye upanayhanti. Sanantanoti porāṇo.
པརེཏི པཎྜིཏེ ཋཔེཏྭཱ ཏཏོ ཨཉྙེ བྷཎྜནཀཱརཀཱ པརེ ནཱམ། ཏེ ཨེཏྠ སངྒྷམཛ྄ཛྷེ ཀལཧཾ ཀརོནྟཱ ‘‘མཡཾ ཡམཱམསེ ཨུཔཡམཱམ ནསྶཱམ སཏཏཾ སམིཏཾ མཙྩུསནྟིཀཾ གཙྪཱམཱ’’ཏི ན ཛཱནནྟི། ཡེ ཙ ཏཏྠ ཝིཛཱནནྟཱིཏི ཡེ ཙ ཏཏྠ པཎྜིཏཱ ‘‘མཡཾ མཙྩུནོ སམཱིཔཾ གཙྪཱམཱ’’ཏི ཝིཛཱནནྟི། ཏཏོ སམྨནྟི མེདྷགཱཏི ཨེཝཉྷི ཏེ ཛཱནནྟཱ ཡོནིསོམནསིཀཱརཾ ཨུཔྤཱདེཏྭཱ མེདྷགཱནཾ ཀལཧཱནཾ ཝཱུཔསམཱཡ པཊིཔཛྫནྟི།
Pareti paṇḍite ṭhapetvā tato aññe bhaṇḍanakārakā pare nāma. Te ettha saṅghamajjhe kalahaṃ karontā ‘‘mayaṃ yamāmase upayamāma nassāma satataṃ samitaṃ maccusantikaṃ gacchāmā’’ti na jānanti. Ye ca tattha vijānantīti ye ca tattha paṇḍitā ‘‘mayaṃ maccuno samīpaṃ gacchāmā’’ti vijānanti. Tato sammanti medhagāti evañhi te jānantā yonisomanasikāraṃ uppādetvā medhagānaṃ kalahānaṃ vūpasamāya paṭipajjanti.
ཨཊྛིཙྪིནྣཱཏི ཨཡཾ གཱཐཱ ཛཱཏཀེ (ཛཱ॰ ༡.༩.༡༦) ཨཱགཏཱ, བྲཧྨདཏྟཉྩ དཱིགྷཱཝུཀུམཱརཉྩ སནྡྷཱཡ ཝུཏྟཱ། ཨཡཉྷེཏྠ ཨཏྠོ – ཏེསམྤི ཏཐཱ པཝཏྟཝེརཱནཾ ཧོཏི སངྒཏི, ཀསྨཱ ཏུམྷཱཀཾ ན ཧོཏི, ཡེསཾ ཝོ ནེཝ མཱཏཱཔིཏཱུནཾ ཨཊྛཱིནི ཚིནྣཱནི, ན པཱཎཱ ཧཊཱ ན གཝཱསྶདྷནཱནི ཧཊཱནཱིཏི།
Aṭṭhicchinnāti ayaṃ gāthā jātake (jā. 1.9.16) āgatā, brahmadattañca dīghāvukumārañca sandhāya vuttā. Ayañhettha attho – tesampi tathā pavattaverānaṃ hoti saṅgati, kasmā tumhākaṃ na hoti, yesaṃ vo neva mātāpitūnaṃ aṭṭhīni chinnāni, na pāṇā haṭā na gavāssadhanāni haṭānīti.
སཙེ ལབྷེཐཱཏིཨཱདིགཱཐཱ པཎྜིཏསཧཱཡསྶ ཙ བཱལསཧཱཡསྶ ཙ ཝཎྞཱཝཎྞདཱིཔནཏྠཾ ཝུཏྟཱ། ཨབྷིབྷུཡྻ སབྦཱནི པརིསྶཡཱནཱིཏི པཱཀཊཔརིསྶཡེ ཙ པཊིཙྪནྣཔརིསྶཡེ ཙ ཨབྷིབྷཝིཏྭཱ ཏེན སདྡྷིཾ ཨཏྟམནོ སཏིམཱ ཙརེཡྻཱཏི།
Sacelabhethātiādigāthā paṇḍitasahāyassa ca bālasahāyassa ca vaṇṇāvaṇṇadīpanatthaṃ vuttā. Abhibhuyya sabbāni parissayānīti pākaṭaparissaye ca paṭicchannaparissaye ca abhibhavitvā tena saddhiṃ attamano satimā careyyāti.
རཱཛཱཝ རཊྛཾ ཝིཛིཏནྟི ཡཐཱ ཨཏྟནོ ཝིཛིཏརཊྛཾ མཧཱཛནཀརཱཛཱ ཙ ཨརིནྡམམཧཱརཱཛཱ ཙ པཧཱཡ ཨེཀཀཱ ཝིཙརིཾསུ, ཨེཝཾ ཝིཙརེཡྻཱཏི ཨཏྠོ། མཱཏངྒརཉྙེཝ ནཱགོཏི མཱཏངྒོ ཨརཉྙེ ནཱགོཝ། མཱཏངྒོཏི ཧཏྠི ཝུཙྩཏི། ནཱགོཏི མཧནྟཱདྷིཝཙནམེཏཾ། ཡཐཱ ཧི མཱཏུཔོསཀོ མཱཏངྒནཱགོ ཨརཉྙེ ཨེཀོ ཙརི, ན ཙ པཱཔཱནི ཨཀཱསི, ཡཐཱ ཙ པཱལིལེཡྻཀོ, ཨེཝཾ ཨེཀོ ཙརེ, ན ཙ པཱཔཱནི ཀཡིརཱཏི ཝུཏྟཾ ཧོཏི།
Rājāva raṭṭhaṃ vijitanti yathā attano vijitaraṭṭhaṃ mahājanakarājā ca arindamamahārājā ca pahāya ekakā vicariṃsu, evaṃ vicareyyāti attho. Mātaṅgaraññeva nāgoti mātaṅgo araññe nāgova. Mātaṅgoti hatthi vuccati. Nāgoti mahantādhivacanametaṃ. Yathā hi mātuposako mātaṅganāgo araññe eko cari, na ca pāpāni akāsi, yathā ca pālileyyako, evaṃ eko care, na ca pāpāni kayirāti vuttaṃ hoti.
༢༣༨. བཱལཀལོཎཀཱརགཱམོཏི ཨུཔཱལིགཧཔཏིསྶ བྷོགགཱམོ། ཏེནུཔསངྐམཱིཏི ཀསྨཱ ཨུཔསངྐམི? གཎེ ཀིརསྶ ཨཱདཱིནཝཾ དིསྭཱ ཨེཀཝིཧཱརིཾ བྷིཀྑུཾ པསྶིཏུཀཱམཏཱ ཨུདཔཱདི, ཏསྨཱ སཱིཏཱདཱིཧི པཱིལི༹ཏོ ཨུཎྷཱདཱིནི པཏྠཡམཱནོ ཝིཡ ཨུཔསངྐམི། དྷམྨིཡཱ ཀཐཱཡཱཏི ཨེཀཱིབྷཱཝེ ཨཱནིསཾསཔྤཊིསཾཡུཏྟཱཡ། ཡེན པཱཙཱིནཝཾསདཱཡོ, ཏཏྠ ཀསྨཱ ཨུཔསངྐམི? ཀལཧཀཱརཀེ ཀིརསྶ དིཊྛཱདཱིནཝཏྟཱ སམགྒཝཱསིནོ བྷིཀྑཱུ པསྶིཏུཀཱམཏཱ ཨུདཔཱདི, ཏསྨཱ སཱིཏཱདཱིཧི པཱིལི༹ཏོ ཨུཎྷཱདཱིནི པཏྠཡམཱནོ ཝིཡ ཏཏྠ ཨུཔསངྐམི། ཨཱཡསྨཱ ཙ ཨནུརུདྡྷོཏིཨཱདི ཝུཏྟནཡམེཝ།
238.Bālakaloṇakāragāmoti upāligahapatissa bhogagāmo. Tenupasaṅkamīti kasmā upasaṅkami? Gaṇe kirassa ādīnavaṃ disvā ekavihāriṃ bhikkhuṃ passitukāmatā udapādi, tasmā sītādīhi pīḷito uṇhādīni patthayamāno viya upasaṅkami. Dhammiyā kathāyāti ekībhāve ānisaṃsappaṭisaṃyuttāya. Yena pācīnavaṃsadāyo, tattha kasmā upasaṅkami? Kalahakārake kirassa diṭṭhādīnavattā samaggavāsino bhikkhū passitukāmatā udapādi, tasmā sītādīhi pīḷito uṇhādīni patthayamāno viya tattha upasaṅkami. Āyasmā ca anuruddhotiādi vuttanayameva.
༢༤༡. ཨཏྠི པན ཝོཏི པཙྪིམཔུཙྪཱཡ ལོཀུཏྟརདྷམྨཾ པུཙྪེཡྻ། སོ པན ཐེརཱནཾ ནཏྠི, ཏསྨཱ ཏཾ པུཙྪིཏུཾ ན ཡུཏྟནྟི པརིཀམྨོབྷཱསཾ པུཙྪཏི། ཨོབྷཱསཉྩེཝ སཉྫཱནཱམཱཏི པརིཀམྨོབྷཱསཾ སཉྫཱནཱམ། དསྶནཉྩ རཱུཔཱནནྟི དིབྦཙཀྑུནཱ རཱུཔདསྶནཉྩ སཉྫཱནཱམ། ཏཉྩ ནིམིཏྟཾ ནཔྤཊིཝིཛ྄ཛྷཱམཱཏི ཏཉྩ ཀཱརཎཾ ན ཛཱནཱམ, ཡེན ནོ ཨོབྷཱསོ ཙ རཱུཔདསྶནཉྩ ཨནྟརདྷཱཡཏི།
241.Atthi pana voti pacchimapucchāya lokuttaradhammaṃ puccheyya. So pana therānaṃ natthi, tasmā taṃ pucchituṃ na yuttanti parikammobhāsaṃ pucchati. Obhāsañceva sañjānāmāti parikammobhāsaṃ sañjānāma. Dassanañca rūpānanti dibbacakkhunā rūpadassanañca sañjānāma. Tañca nimittaṃ nappaṭivijjhāmāti tañca kāraṇaṃ na jānāma, yena no obhāso ca rūpadassanañca antaradhāyati.
ཏཾ ཁོ པན ཝོ ཨནུརུདྡྷཱ ནིམིཏྟཾ པཊིཝིཛ྄ཛྷིཏབྦནྟི ཏཾ ཝོ ཀཱརཎཾ ཛཱནིཏབྦཾ། ཨཧམྤི སུདནྟི ཨནུརུདྡྷཱ ཏུམྷེ ཀིཾ ན ཨཱལུ༹ལེསྶནྟི, ཨཧམྤི ཨིམེཧི ཨེཀཱདསཧི ཨུཔཀྐིལེསེཧི ཨཱལུ༹ལིཏཔུབྦོཏི དསྶེཏུཾ ཨིམཾ དེསནཾ ཨཱརབྷི། ཝིཙིཀིཙྪཱ ཁོ མེཏིཨཱདཱིསུ མཧཱསཏྟསྶ ཨཱལོཀཾ ཝཌྜྷེཏྭཱ དིབྦཙཀྑུནཱ ནཱནཱཝིདྷཱནི རཱུཔཱནི དིསྭཱ ‘‘ཨིདཾ ཁོ ཀི’’ནྟི ཝིཙིཀིཙྪཱ ཨུདཔཱདི། སམཱདྷི ཙཝཱིཏི པརིཀམྨསམཱདྷི ཙཝི། ཨོབྷཱསོཏི པརིཀམྨོབྷཱསོཔི ཨནྟརདྷཱཡི, དིབྦཙཀྑུནཱཔི རཱུཔཾ ན པསྶི། ཨམནསིཀཱརོཏི རཱུཔཱནི པསྶཏོ ཝིཙིཀིཙྪཱ ཨུཔྤཛྫཏི, ཨིདཱནི ཀིཉྩི ན མནསིཀརིསྶཱམཱིཏི ཨམནསིཀཱརོ ཨུདཔཱདི།
Taṃ kho pana vo anuruddhā nimittaṃ paṭivijjhitabbanti taṃ vo kāraṇaṃ jānitabbaṃ. Ahampi sudanti anuruddhā tumhe kiṃ na āḷulessanti, ahampi imehi ekādasahi upakkilesehi āḷulitapubboti dassetuṃ imaṃ desanaṃ ārabhi. Vicikicchā kho metiādīsu mahāsattassa ālokaṃ vaḍḍhetvā dibbacakkhunā nānāvidhāni rūpāni disvā ‘‘idaṃ kho ki’’nti vicikicchā udapādi. Samādhi cavīti parikammasamādhi cavi. Obhāsoti parikammobhāsopi antaradhāyi, dibbacakkhunāpi rūpaṃ na passi. Amanasikāroti rūpāni passato vicikicchā uppajjati, idāni kiñci na manasikarissāmīti amanasikāro udapādi.
ཐིནམིདྡྷནྟི ཀིཉྩི ཨམནསིཀརོནྟསྶ ཐིནམིདྡྷཾ ཨུདཔཱདི།
Thinamiddhanti kiñci amanasikarontassa thinamiddhaṃ udapādi.
ཚམྦྷིཏཏྟནྟི ཧིམཝནྟཱབྷིམུཁཾ ཨཱལོཀཾ ཝཌྜྷེཏྭཱ དཱནཝརཀྑསཨཛགརཱདཡོ ཨདྡས, ཨཐསྶ ཚམྦྷིཏཏྟཾ ཨུདཔཱདི།
Chambhitattanti himavantābhimukhaṃ ālokaṃ vaḍḍhetvā dānavarakkhasaajagarādayo addasa, athassa chambhitattaṃ udapādi.
ཨུཔྤིལནྟི ‘‘མཡཱ དིཊྛབྷཡཾ པཀཏིཡཱ ཨོལོཀིཡམཱནཾ ནཏྠི། ཨདིཊྛེ ཀིཾ ནཱམ བྷཡ’’ནྟི ཙིནྟཡཏོ ཨུཔྤིལཱཝིཏཏྟཾ ཨུདཔཱདི། སཀིདེཝཱཏི ཨེཀཔཡོགེནེཝ པཉྩ ནིདྷིཀུམྦྷིཡོཔི པསྶེཡྻ།
Uppilanti ‘‘mayā diṭṭhabhayaṃ pakatiyā olokiyamānaṃ natthi. Adiṭṭhe kiṃ nāma bhaya’’nti cintayato uppilāvitattaṃ udapādi. Sakidevāti ekapayogeneva pañca nidhikumbhiyopi passeyya.
དུཊྛུལླནྟི མཡཱ ཝཱིརིཡཾ གཱལ༹ྷཾ པགྒཧིཏཾ, ཏེན མེ ཨུཔྤིལཾ ཨུཔྤནྣནྟི ཝཱིརིཡཾ སིཐིལམཀཱསི, ཏཏོ ཀཱཡདརཐོ ཀཱཡདུཊྛུལླཾ ཀཱཡཱལསིཡཾ ཨུདཔཱདི།
Duṭṭhullanti mayā vīriyaṃ gāḷhaṃ paggahitaṃ, tena me uppilaṃ uppannanti vīriyaṃ sithilamakāsi, tato kāyadaratho kāyaduṭṭhullaṃ kāyālasiyaṃ udapādi.
ཨཙྩཱརདྡྷཝཱིརིཡནྟི མམ ཝཱིརིཡཾ སིཐིལཾ ཀརོཏོ དུཊྛུལླཾ ཨུཔྤནྣནྟི པུན ཝཱིརིཡཾ པགྒཎྷཏོ ཨཙྩཱརདྡྷཝཱིརིཡཾ ཨུདཔཱདི། པཏམེཡྻཱཏི མརེཡྻ།
Accāraddhavīriyanti mama vīriyaṃ sithilaṃ karoto duṭṭhullaṃ uppannanti puna vīriyaṃ paggaṇhato accāraddhavīriyaṃ udapādi. Patameyyāti mareyya.
ཨཏིལཱིནཝཱིརིཡནྟི མམ ཝཱིརིཡཾ པགྒཎྷཏོ ཨེཝཾ ཛཱཏནྟི པུན ཝཱིརིཡཾ སིཐིལཾ ཀརོཏོ ཨཏིལཱིནཝཱིརིཡཾ ཨུདཔཱདི།
Atilīnavīriyanti mama vīriyaṃ paggaṇhato evaṃ jātanti puna vīriyaṃ sithilaṃ karoto atilīnavīriyaṃ udapādi.
ཨབྷིཛཔྤཱཏི དེཝལོཀཱབྷིམུཁཾ ཨཱལོཀཾ ཝཌྜྷེཏྭཱ དེཝསངྒྷཾ པསྶཏོ ཏཎྷཱ ཨུདཔཱདི།
Abhijappāti devalokābhimukhaṃ ālokaṃ vaḍḍhetvā devasaṅghaṃ passato taṇhā udapādi.
ནཱནཏྟསཉྙཱཏི མཡ྄ཧཾ ཨེཀཛཱཏིཀཾ རཱུཔཾ མནསིཀརོནྟསྶ ཨབྷིཛཔྤཱ ཨུཔྤནྣཱ, ནཱནཱཝིདྷརཱུཔཾ མནསི ཀརིསྶཱམཱིཏི ཀཱལེན དེཝལོཀཱབྷིམུཁཾ ཀཱལེན མནུསྶལོཀཱབྷིམུཁཾ ཝཌྜྷེཏྭཱ ནཱནཱཝིདྷཱནི རཱུཔཱནི མནསིཀརོཏོ ནཱནཏྟསཉྙཱ ཨུདཔཱདི།
Nānattasaññāti mayhaṃ ekajātikaṃ rūpaṃ manasikarontassa abhijappā uppannā, nānāvidharūpaṃ manasi karissāmīti kālena devalokābhimukhaṃ kālena manussalokābhimukhaṃ vaḍḍhetvā nānāvidhāni rūpāni manasikaroto nānattasaññā udapādi.
ཨཏིནིཛ྄ཛྷཱཡིཏཏྟནྟི མཡ྄ཧཾ ནཱནཱཝིདྷཱནི རཱུཔཱནི མནསིཀརོནྟསྶ ནཱནཏྟསཉྙཱ ཨུདཔཱདི, ཨིཊྛཾ ཝཱ ཨནིཊྛཾ ཝཱ ཨེཀཛཱཏིཀམེཝ མནསི ཀརིསྶཱམཱིཏི ཏཐཱ མནསིཀརོཏོ ཨཏིནིཛ྄ཛྷཱཡིཏཏྟཾ རཱུཔཱནཾ ཨུདཔཱདི།
Atinijjhāyitattanti mayhaṃ nānāvidhāni rūpāni manasikarontassa nānattasaññā udapādi, iṭṭhaṃ vā aniṭṭhaṃ vā ekajātikameva manasi karissāmīti tathā manasikaroto atinijjhāyitattaṃ rūpānaṃ udapādi.
༢༤༣. ཨོབྷཱསནིམིཏྟཾ མནསི ཀརོམཱིཏི པརིཀམྨོབྷཱསམེཝ མནསི ཀརོམི། ན ཙ རཱུཔཱནི པསྶཱམཱིཏི དིབྦཙཀྑུནཱ རཱུཔཱནི ན པསྶཱམི། རཱུཔནིམིཏྟཾ མནསི ཀརོམཱིཏི དིབྦཙཀྑུནཱ ཝིསཡརཱུཔམེཝ མནསི ཀརོམི།
243.Obhāsanimittaṃmanasi karomīti parikammobhāsameva manasi karomi. Na ca rūpāni passāmīti dibbacakkhunā rūpāni na passāmi. Rūpanimittaṃ manasi karomīti dibbacakkhunā visayarūpameva manasi karomi.
པརིཏྟཉྩེཝ ཨོབྷཱསནྟི པརིཏྟཀཊྛཱནེ ཨོབྷཱསཾ། པརིཏྟཱནི ཙ རཱུཔཱནཱིཏི པརིཏྟཀཊྛཱནེ རཱུཔཱནི། ཝིཔརིཡཱཡེན དུཏིཡཝཱརོ ཝེདིཏབྦོ། པརིཏྟོ སམཱདྷཱིཏི པརིཏྟཀོ པརིཀམྨོབྷཱསོ, ཨོབྷཱསཔརིཏྟཏཉྷི སནྡྷཱཡ ཨིདྷ པརིཀམྨསམཱདྷི ‘‘པརིཏྟོ’’ཏི ཝུཏྟོ། པརིཏྟཾ མེ ཏསྨིཾ སམཡེཏི ཏསྨིཾ སམཡེ དིབྦཙཀྑུཔི པརིཏྟཀཾ ཧོཏི། ཨཔྤམཱཎཝཱརེཔི ཨེསེཝ ནཡོ།
Parittañceva obhāsanti parittakaṭṭhāne obhāsaṃ. Parittāni ca rūpānīti parittakaṭṭhāne rūpāni. Vipariyāyena dutiyavāro veditabbo. Paritto samādhīti parittako parikammobhāso, obhāsaparittatañhi sandhāya idha parikammasamādhi ‘‘paritto’’ti vutto. Parittaṃ me tasmiṃ samayeti tasmiṃ samaye dibbacakkhupi parittakaṃ hoti. Appamāṇavārepi eseva nayo.
༢༤༥. ཨཝིཏཀྐམྤི ཝིཙཱརམཏྟནྟི པཉྩཀནཡེ དུཏིཡཛ྄ཛྷཱནསམཱདྷིཾ། ཨཝིཏཀྐམྤི ཨཝིཙཱརནྟི ཙཏུཀྐནཡེཔི པཉྩཀནཡེཔི ཛྷཱནཏྟཡསམཱདྷིཾ། སཔྤཱིཏིཀནྟི དུཀཏིཀཛ྄ཛྷཱནསམཱདྷིཾ། ནིཔྤཱིཏིཀནྟི དུཀཛ྄ཛྷཱནསམཱདྷིཾ། སཱཏསཧགཏནྟི ཏིཀཙཏུཀྐཛ྄ཛྷཱནསམཱདྷིཾ། ཨུཔེཀྑཱསཧགཏནྟི ཙཏུཀྐནཡེ ཙཏུཏྠཛ྄ཛྷཱནསམཱདྷིཾ པཉྩཀནཡེ པཉྩམཛ྄ཛྷཱནསམཱདྷིཾ།
245.Avitakkampi vicāramattanti pañcakanaye dutiyajjhānasamādhiṃ. Avitakkampi avicāranti catukkanayepi pañcakanayepi jhānattayasamādhiṃ. Sappītikanti dukatikajjhānasamādhiṃ. Nippītikanti dukajjhānasamādhiṃ. Sātasahagatanti tikacatukkajjhānasamādhiṃ. Upekkhāsahagatanti catukkanaye catutthajjhānasamādhiṃ pañcakanaye pañcamajjhānasamādhiṃ.
ཀདཱ པན བྷགཝཱ ཨིམཾ ཏིཝིདྷཾ སམཱདྷིཾ བྷཱཝེཏི? མཧཱབོདྷིམཱུལེ ནིསིནྣོ པཙྪིམཡཱམེ། བྷགཝཏོ ཧི པཋམམགྒོ པཋམཛ྄ཛྷཱནིཀོ ཨཧོསི, དུཏིཡཱདཡོ དུཏིཡཏཏིཡཙཏུཏྠཛ྄ཛྷཱནིཀཱ ། པཉྩཀནཡེ པཉྩམཛ྄ཛྷཱནསྶ མགྒོ ནཏྠཱིཏི སོ ལོཀིཡོ ཨཧོསཱིཏི ལོཀིཡལོཀུཏྟརམིསྶཀཾ སནྡྷཱཡེཏཾ ཝུཏྟཾ། སེསཾ སབྦཏྠ ཨུཏྟཱནམེཝཱཏི།
Kadā pana bhagavā imaṃ tividhaṃ samādhiṃ bhāveti? Mahābodhimūle nisinno pacchimayāme. Bhagavato hi paṭhamamaggo paṭhamajjhāniko ahosi, dutiyādayo dutiyatatiyacatutthajjhānikā . Pañcakanaye pañcamajjhānassa maggo natthīti so lokiyo ahosīti lokiyalokuttaramissakaṃ sandhāyetaṃ vuttaṃ. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཨུཔཀྐིལེསསུཏྟཝཎྞནཱ ནིཊྛིཏཱ།
Upakkilesasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༨. ཨུཔཀྐིལེསསུཏྟཾ • 8. Upakkilesasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༨. ཨུཔཀྐིལེསསུཏྟཝཎྞནཱ • 8. Upakkilesasuttavaṇṇanā
