| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੮. ਉਪਕ੍ਕਿਲੇਸਸੁਤ੍ਤવਣ੍ਣਨਾ
8. Upakkilesasuttavaṇṇanā
੨੩੬. ਏવਂ ਮੇ ਸੁਤਨ੍ਤਿ ਉਪਕ੍ਕਿਲੇਸਸੁਤ੍ਤਂ। ਤਤ੍ਥ ਏਤਦવੋਚਾਤਿ ਨੇવ ਭੇਦਾਧਿਪ੍ਪਾਯੇਨ ਨ ਪਿਯਕਮ੍ਯਤਾਯ, ਅਥ ਖ੍વਾਸ੍ਸ ਏਤਦਹੋਸਿ – ‘‘ਇਮੇ ਭਿਕ੍ਖੂ ਮਮ વਚਨਂ ਗਹੇਤ੍વਾ ਨ ਓਰਮਿਸ੍ਸਨ੍ਤਿ, ਬੁਦ੍ਧਾ ਚ ਨਾਮ ਹਿਤਾਨੁਕਮ੍ਪਕਾ, ਅਦ੍ਧਾ ਨੇਸਂ ਭਗવਾ ਏਕਂ ਕਾਰਣਂ ਕਥੇਸ੍ਸਤਿ, ਤਂ ਸੁਤ੍વਾ ਏਤੇ ਓਰਮਿਸ੍ਸਨ੍ਤਿ, ਤਤੋ ਤੇਸਂ ਫਾਸੁવਿਹਾਰੋ ਭવਿਸ੍ਸਤੀ’’ਤਿ। ਤਸ੍ਮਾ ਏਤਂ ‘‘ਇਧ, ਭਨ੍ਤੇ’’ਤਿਆਦਿવਚਨਮવੋਚ। ਮਾ ਭਣ੍ਡਨਨ੍ਤਿਆਦੀਸੁ ‘‘ਅਕਤ੍ਥਾ’’ਤਿ ਪਾਠਸੇਸਂ ਗਹੇਤ੍વਾ ‘‘ਮਾ ਭਣ੍ਡਨਂ ਅਕਤ੍ਥਾ’’ਤਿ ਏવਂ ਅਤ੍ਥੋ ਦਟ੍ਠਬ੍ਬੋ। ਅਞ੍ਞਤਰੋਤਿ ਸੋ ਕਿਰ ਭਿਕ੍ਖੁ ਭਗવਤੋ ਅਤ੍ਥਕਾਮੋ, ਅਯਂ ਕਿਰਸ੍ਸ ਅਧਿਪ੍ਪਾਯੋ – ‘‘ਇਮੇ ਭਿਕ੍ਖੂ ਕੋਧਾਭਿਭੂਤਾ ਸਤ੍ਥੁ વਚਨਂ ਨ ਗਣ੍ਹਨ੍ਤਿ, ਮਾ ਭਗવਾ ਏਤੇ ਓવਦਨ੍ਤੋ ਕਿਲਮੀ’’ਤਿ, ਤਸ੍ਮਾ ਏવਮਾਹ।
236.Evaṃme sutanti upakkilesasuttaṃ. Tattha etadavocāti neva bhedādhippāyena na piyakamyatāya, atha khvāssa etadahosi – ‘‘ime bhikkhū mama vacanaṃ gahetvā na oramissanti, buddhā ca nāma hitānukampakā, addhā nesaṃ bhagavā ekaṃ kāraṇaṃ kathessati, taṃ sutvā ete oramissanti, tato tesaṃ phāsuvihāro bhavissatī’’ti. Tasmā etaṃ ‘‘idha, bhante’’tiādivacanamavoca. Mā bhaṇḍanantiādīsu ‘‘akatthā’’ti pāṭhasesaṃ gahetvā ‘‘mā bhaṇḍanaṃ akatthā’’ti evaṃ attho daṭṭhabbo. Aññataroti so kira bhikkhu bhagavato atthakāmo, ayaṃ kirassa adhippāyo – ‘‘ime bhikkhū kodhābhibhūtā satthu vacanaṃ na gaṇhanti, mā bhagavā ete ovadanto kilamī’’ti, tasmā evamāha.
ਪਿਣ੍ਡਾਯ ਪਾવਿਸੀਤਿ ਨ ਕੇવਲਂ ਪਾવਿਸਿ, ਯੇਨਪਿ ਜਨੇਨ ਨ ਦਿਟ੍ਠੋ, ਸੋ ਮਂ ਪਸ੍ਸਤੂਤਿਪਿ ਅਧਿਟ੍ਠਾਸਿ। ਕਿਮਤ੍ਥਂ ਅਧਿਟ੍ਠਾਸੀਤਿ? ਤੇਸਂ ਭਿਕ੍ਖੂਨਂ ਦਮਨਤ੍ਥਂ। ਭਗવਾ ਹਿ ਤਦਾ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ‘‘ਪੁਥੁਸਦ੍ਦੋ ਸਮਜਨੋ’’ਤਿਆਦਿਗਾਥਾ ਭਾਸਿਤ੍વਾ ਕੋਸਮ੍ਬਿਤੋ ਬਾਲਕਲੋਣਕਾਰਗਾਮਂ ਗਤੋ। ਤਤੋ ਪਾਚੀਨવਂਸਦਾਯਂ, ਤਤੋ ਪਾਲਿਲੇਯ੍ਯਕવਨਸਣ੍ਡਂ ਗਨ੍ਤ੍વਾ ਪਾਲਿਲੇਯ੍ਯਹਤ੍ਥਿਨਾਗੇਨ ਉਪਟ੍ਠਹਿਯਮਾਨੋ ਤੇਮਾਸਂ વਸਿ। ਨਗਰવਾਸਿਨੋਪਿ – ‘‘ਸਤ੍ਥਾ વਿਹਾਰਂ ਗਤੋ, ਗਚ੍ਛਾਮ ਧਮ੍ਮਸ੍ਸવਨਾਯਾ’’ਤਿ ਗਨ੍ਧਪੁਪ੍ਫਹਤ੍ਥਾ વਿਹਾਰਂ ਗਨ੍ਤ੍વਾ ‘‘ਕਹਂ, ਭਨ੍ਤੇ, ਸਤ੍ਥਾ’’ਤਿ ਪੁਚ੍ਛਿਂਸੁ। ‘‘ਕਹਂ ਤੁਮ੍ਹੇ ਸਤ੍ਥਾਰਂ ਦਕ੍ਖਥ, ਸਤ੍ਥਾ ‘ਇਮੇ ਭਿਕ੍ਖੂ ਸਮਗ੍ਗੇ ਕਰਿਸ੍ਸਾਮੀ’ਤਿ ਆਗਤੋ, ਸਮਗ੍ਗੇ ਕਾਤੁਂ ਅਸਕ੍ਕੋਨ੍ਤੋ ਨਿਕ੍ਖਮਿਤ੍વਾ ਗਤੋ’’ਤਿ। ‘‘ਮਯਂ ਸਤਮ੍ਪਿ ਸਹਸ੍ਸਮ੍ਪਿ ਦਤ੍વਾ ਸਤ੍ਥਾਰਂ ਆਨੇਤੁਂ ਨ ਸਕ੍ਕੋਮ, ਸੋ ਨੋ ਅਯਾਚਿਤੋ ਸਯਮੇવ ਆਗਤੋ, ਮਯਂ ਇਮੇ ਭਿਕ੍ਖੂ ਨਿਸ੍ਸਾਯ ਸਤ੍ਥੁ ਸਮ੍ਮੁਖਾ ਧਮ੍ਮਕਥਂ ਸੋਤੁਂ ਨ ਲਭਿਮ੍ਹਾ। ਇਮੇ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤਾ, ਤਸ੍ਮਿਮ੍ਪਿ ਸਾਮਗ੍ਗਿਂ ਕਰੋਨ੍ਤੇ ਸਮਗ੍ਗਾ ਨ ਜਾਤਾ, ਕਸ੍ਸਾਞ੍ਞਸ੍ਸ વਚਨਂ ਕਰਿਸ੍ਸਨ੍ਤਿ। ਅਲਂ ਨ ਇਮੇਸਂ ਭਿਕ੍ਖਾ ਦਾਤਬ੍ਬਾ’’ਤਿ ਸਕਲਨਗਰੇ ਦਣ੍ਡਂ ਠਪਯਿਂਸੁ। ਤੇ ਪੁਨਦਿવਸੇ ਸਕਲਨਗਰਂ ਪਿਣ੍ਡਾਯ ਚਰਿਤ੍વਾ ਕਟਚ੍ਛੁਮਤ੍ਤਮ੍ਪਿ ਭਿਕ੍ਖਂ ਅਲਭਿਤ੍વਾ વਿਹਾਰਂ ਆਗਮਂਸੁ। ਉਪਾਸਕਾਪਿ ਤੇ ਪੁਨ ਆਹਂਸੁ – ‘‘ਯਾવ ਸਤ੍ਥਾਰਂ ਨ ਖਮਾਪੇਥ, ਤਾવ વੋ ਤਮੇવ ਦਣ੍ਡਕਮ੍ਮ’’ਨ੍ਤਿ। ਤੇ ‘‘ਸਤ੍ਥਾਰਂ ਖਮਾਪੇਸ੍ਸਾਮਾ’’ਤਿ ਭਗવਤਿ ਸਾવਤ੍ਥਿਯਂ ਅਨੁਪ੍ਪਤ੍ਤੇ ਤਤ੍ਥ ਅਗਮਂਸੁ। ਸਤ੍ਥਾ ਤੇਸਂ ਅਟ੍ਠਾਰਸ ਭੇਦਕਰવਤ੍ਥੂਨਿ ਦੇਸੇਸੀਤਿ ਅਯਮੇਤ੍ਥ ਪਾਲ਼ਿਮੁਤ੍ਤਕਕਥਾ।
Piṇḍāya pāvisīti na kevalaṃ pāvisi, yenapi janena na diṭṭho, so maṃ passatūtipi adhiṭṭhāsi. Kimatthaṃ adhiṭṭhāsīti? Tesaṃ bhikkhūnaṃ damanatthaṃ. Bhagavā hi tadā piṇḍapātappaṭikkanto ‘‘puthusaddo samajano’’tiādigāthā bhāsitvā kosambito bālakaloṇakāragāmaṃ gato. Tato pācīnavaṃsadāyaṃ, tato pālileyyakavanasaṇḍaṃ gantvā pālileyyahatthināgena upaṭṭhahiyamāno temāsaṃ vasi. Nagaravāsinopi – ‘‘satthā vihāraṃ gato, gacchāma dhammassavanāyā’’ti gandhapupphahatthā vihāraṃ gantvā ‘‘kahaṃ, bhante, satthā’’ti pucchiṃsu. ‘‘Kahaṃ tumhe satthāraṃ dakkhatha, satthā ‘ime bhikkhū samagge karissāmī’ti āgato, samagge kātuṃ asakkonto nikkhamitvā gato’’ti. ‘‘Mayaṃ satampi sahassampi datvā satthāraṃ ānetuṃ na sakkoma, so no ayācito sayameva āgato, mayaṃ ime bhikkhū nissāya satthu sammukhā dhammakathaṃ sotuṃ na labhimhā. Ime satthāraṃ uddissa pabbajitā, tasmimpi sāmaggiṃ karonte samaggā na jātā, kassāññassa vacanaṃ karissanti. Alaṃ na imesaṃ bhikkhā dātabbā’’ti sakalanagare daṇḍaṃ ṭhapayiṃsu. Te punadivase sakalanagaraṃ piṇḍāya caritvā kaṭacchumattampi bhikkhaṃ alabhitvā vihāraṃ āgamaṃsu. Upāsakāpi te puna āhaṃsu – ‘‘yāva satthāraṃ na khamāpetha, tāva vo tameva daṇḍakamma’’nti. Te ‘‘satthāraṃ khamāpessāmā’’ti bhagavati sāvatthiyaṃ anuppatte tattha agamaṃsu. Satthā tesaṃ aṭṭhārasa bhedakaravatthūni desesīti ayamettha pāḷimuttakakathā.
੨੩੭. ਇਦਾਨਿ ਪੁਥੁਸਦ੍ਦੋਤਿਆਦਿਗਾਥਾਸੁ ਪੁਥੁ ਮਹਾਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ। ਸਮਜਨੋਤਿ ਸਮਾਨੋ ਏਕਸਦਿਸੋ ਜਨੋ, ਸਬ੍ਬੋવਾਯਂ ਭਣ੍ਡਨਕਾਰਕਜਨੋ ਸਮਨ੍ਤਤੋ ਸਦ੍ਦਨਿਚ੍ਛਰਣੇਨ ਪੁਥੁਸਦ੍ਦੋ ਚੇવ ਸਦਿਸੋ ਚਾਤਿ વੁਤ੍ਤਂ ਹੋਤਿ। ਨ ਬਾਲੋ ਕੋਚਿ ਮਞ੍ਞਥਾਤਿ ਤਤ੍ਰ ਕੋਚਿ ਏਕੋਪਿ ਅਹਂ ਬਾਲੋਤਿ ਨ ਮਞ੍ਞਤਿ, ਸਬ੍ਬੇਪਿ ਪਣ੍ਡਿਤਮਾਨਿਨੋਯੇવ। ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਨ੍ਤਿ ਕੋਚਿ ਏਕੋਪਿ ਅਹਂ ਬਾਲੋਤਿ ਨ ਚ ਮਞ੍ਞਿ, ਭਿਯ੍ਯੋ ਚ ਸਙ੍ਘਸ੍ਮਿਂ ਭਿਜ੍ਜਮਾਨੇ ਅਞ੍ਞਮ੍ਪਿ ਏਕਂ ‘‘ਮਯ੍ਹਂ ਕਾਰਣਾ ਸਙ੍ਘੋ ਭਿਜ੍ਜਤੀ’’ਤਿ ਇਦਂ ਕਾਰਣਂ ਨ ਮਞ੍ਞੀਤਿ ਅਤ੍ਥੋ।
237. Idāni puthusaddotiādigāthāsu puthu mahāsaddo assāti puthusaddo. Samajanoti samāno ekasadiso jano, sabbovāyaṃ bhaṇḍanakārakajano samantato saddaniccharaṇena puthusaddo ceva sadiso cāti vuttaṃ hoti. Na bālo koci maññathāti tatra koci ekopi ahaṃ bāloti na maññati, sabbepi paṇḍitamāninoyeva. Nāññaṃ bhiyyo amaññarunti koci ekopi ahaṃ bāloti na ca maññi, bhiyyo ca saṅghasmiṃ bhijjamāne aññampi ekaṃ ‘‘mayhaṃ kāraṇā saṅgho bhijjatī’’ti idaṃ kāraṇaṃ na maññīti attho.
ਪਰਿਮੁਟ੍ਠਾਤਿ ਮੁਟ੍ਠਸ੍ਸਤਿਨੋ। વਾਚਾਗੋਚਰਭਾਣਿਨੋਤਿ ਰਾਕਾਰਸ੍ਸ ਰਸ੍ਸਾਦੇਸੋ ਕਤੋ; વਾਚਾਗੋਚਰਾવ , ਨ ਸਤਿਪਟ੍ਠਾਨਗੋਚਰਾ, ਭਾਣਿਨੋ ਚ, ਕਥਂ ਭਾਣਿਨੋ? ਯਾવਿਚ੍ਛਨ੍ਤਿ ਮੁਖਾਯਾਮਂ, ਯਾવ ਮੁਖਂ ਪਸਾਰੇਤੁਂ ਇਚ੍ਛਨ੍ਤਿ, ਤਾવ ਪਸਾਰੇਤ੍વਾ ਭਾਣਿਨੋ, ਏਕੋਪਿ ਸਙ੍ਘਗਾਰવੇਨ ਮੁਖਸਙ੍ਕੋਚਨਂ ਨ ਕਰੋਤੀਤਿ ਅਤ੍ਥੋ। ਯੇਨ ਨੀਤਾਤਿ ਯੇਨ ਕਲਹੇਨ ਇਮਂ ਨਿਲ੍ਲਜ੍ਜਭਾવਂ ਨੀਤਾ। ਨ ਤਂ વਿਦੂ ਨ ਤਂ ਜਾਨਨ੍ਤਿ ‘‘ਏવਂ ਸਾਦੀਨવੋ ਅਯ’’ਨ੍ਤਿ।
Parimuṭṭhāti muṭṭhassatino. Vācāgocarabhāṇinoti rākārassa rassādeso kato; vācāgocarāva , na satipaṭṭhānagocarā, bhāṇino ca, kathaṃ bhāṇino? Yāvicchanti mukhāyāmaṃ, yāva mukhaṃ pasāretuṃ icchanti, tāva pasāretvā bhāṇino, ekopi saṅghagāravena mukhasaṅkocanaṃ na karotīti attho. Yena nītāti yena kalahena imaṃ nillajjabhāvaṃ nītā. Na taṃ vidū na taṃ jānanti ‘‘evaṃ sādīnavo aya’’nti.
ਯੇ ਚ ਤਂ ਉਪਨਯ੍ਹਨ੍ਤੀਤਿ ਤਂ ਅਕ੍ਕੋਚ੍ਛਿ ਮਨ੍ਤਿਆਦਿਕਂ ਆਕਾਰਂ ਯੇ ਉਪਨਯ੍ਹਨ੍ਤਿ। ਸਨਨ੍ਤਨੋਤਿ ਪੋਰਾਣੋ।
Ye ca taṃ upanayhantīti taṃ akkocchi mantiādikaṃ ākāraṃ ye upanayhanti. Sanantanoti porāṇo.
ਪਰੇਤਿ ਪਣ੍ਡਿਤੇ ਠਪੇਤ੍વਾ ਤਤੋ ਅਞ੍ਞੇ ਭਣ੍ਡਨਕਾਰਕਾ ਪਰੇ ਨਾਮ। ਤੇ ਏਤ੍ਥ ਸਙ੍ਘਮਜ੍ਝੇ ਕਲਹਂ ਕਰੋਨ੍ਤਾ ‘‘ਮਯਂ ਯਮਾਮਸੇ ਉਪਯਮਾਮ ਨਸ੍ਸਾਮ ਸਤਤਂ ਸਮਿਤਂ ਮਚ੍ਚੁਸਨ੍ਤਿਕਂ ਗਚ੍ਛਾਮਾ’’ਤਿ ਨ ਜਾਨਨ੍ਤਿ। ਯੇ ਚ ਤਤ੍ਥ વਿਜਾਨਨ੍ਤੀਤਿ ਯੇ ਚ ਤਤ੍ਥ ਪਣ੍ਡਿਤਾ ‘‘ਮਯਂ ਮਚ੍ਚੁਨੋ ਸਮੀਪਂ ਗਚ੍ਛਾਮਾ’’ਤਿ વਿਜਾਨਨ੍ਤਿ। ਤਤੋ ਸਮ੍ਮਨ੍ਤਿ ਮੇਧਗਾਤਿ ਏવਞ੍ਹਿ ਤੇ ਜਾਨਨ੍ਤਾ ਯੋਨਿਸੋਮਨਸਿਕਾਰਂ ਉਪ੍ਪਾਦੇਤ੍વਾ ਮੇਧਗਾਨਂ ਕਲਹਾਨਂ વੂਪਸਮਾਯ ਪਟਿਪਜ੍ਜਨ੍ਤਿ।
Pareti paṇḍite ṭhapetvā tato aññe bhaṇḍanakārakā pare nāma. Te ettha saṅghamajjhe kalahaṃ karontā ‘‘mayaṃ yamāmase upayamāma nassāma satataṃ samitaṃ maccusantikaṃ gacchāmā’’ti na jānanti. Ye ca tattha vijānantīti ye ca tattha paṇḍitā ‘‘mayaṃ maccuno samīpaṃ gacchāmā’’ti vijānanti. Tato sammanti medhagāti evañhi te jānantā yonisomanasikāraṃ uppādetvā medhagānaṃ kalahānaṃ vūpasamāya paṭipajjanti.
ਅਟ੍ਠਿਚ੍ਛਿਨ੍ਨਾਤਿ ਅਯਂ ਗਾਥਾ ਜਾਤਕੇ (ਜਾ॰ ੧.੯.੧੬) ਆਗਤਾ, ਬ੍ਰਹ੍ਮਦਤ੍ਤਞ੍ਚ ਦੀਘਾવੁਕੁਮਾਰਞ੍ਚ ਸਨ੍ਧਾਯ વੁਤ੍ਤਾ। ਅਯਞ੍ਹੇਤ੍ਥ ਅਤ੍ਥੋ – ਤੇਸਮ੍ਪਿ ਤਥਾ ਪવਤ੍ਤવੇਰਾਨਂ ਹੋਤਿ ਸਙ੍ਗਤਿ, ਕਸ੍ਮਾ ਤੁਮ੍ਹਾਕਂ ਨ ਹੋਤਿ, ਯੇਸਂ વੋ ਨੇવ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਨਾਨਿ, ਨ ਪਾਣਾ ਹਟਾ ਨ ਗવਾਸ੍ਸਧਨਾਨਿ ਹਟਾਨੀਤਿ।
Aṭṭhicchinnāti ayaṃ gāthā jātake (jā. 1.9.16) āgatā, brahmadattañca dīghāvukumārañca sandhāya vuttā. Ayañhettha attho – tesampi tathā pavattaverānaṃ hoti saṅgati, kasmā tumhākaṃ na hoti, yesaṃ vo neva mātāpitūnaṃ aṭṭhīni chinnāni, na pāṇā haṭā na gavāssadhanāni haṭānīti.
ਸਚੇ ਲਭੇਥਾਤਿਆਦਿਗਾਥਾ ਪਣ੍ਡਿਤਸਹਾਯਸ੍ਸ ਚ ਬਾਲਸਹਾਯਸ੍ਸ ਚ વਣ੍ਣਾવਣ੍ਣਦੀਪਨਤ੍ਥਂ વੁਤ੍ਤਾ। ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨੀਤਿ ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭવਿਤ੍વਾ ਤੇਨ ਸਦ੍ਧਿਂ ਅਤ੍ਤਮਨੋ ਸਤਿਮਾ ਚਰੇਯ੍ਯਾਤਿ।
Sacelabhethātiādigāthā paṇḍitasahāyassa ca bālasahāyassa ca vaṇṇāvaṇṇadīpanatthaṃ vuttā. Abhibhuyya sabbāni parissayānīti pākaṭaparissaye ca paṭicchannaparissaye ca abhibhavitvā tena saddhiṃ attamano satimā careyyāti.
ਰਾਜਾવ ਰਟ੍ਠਂ વਿਜਿਤਨ੍ਤਿ ਯਥਾ ਅਤ੍ਤਨੋ વਿਜਿਤਰਟ੍ਠਂ ਮਹਾਜਨਕਰਾਜਾ ਚ ਅਰਿਨ੍ਦਮਮਹਾਰਾਜਾ ਚ ਪਹਾਯ ਏਕਕਾ વਿਚਰਿਂਸੁ, ਏવਂ વਿਚਰੇਯ੍ਯਾਤਿ ਅਤ੍ਥੋ। ਮਾਤਙ੍ਗਰਞ੍ਞੇવ ਨਾਗੋਤਿ ਮਾਤਙ੍ਗੋ ਅਰਞ੍ਞੇ ਨਾਗੋવ। ਮਾਤਙ੍ਗੋਤਿ ਹਤ੍ਥਿ વੁਚ੍ਚਤਿ। ਨਾਗੋਤਿ ਮਹਨ੍ਤਾਧਿવਚਨਮੇਤਂ। ਯਥਾ ਹਿ ਮਾਤੁਪੋਸਕੋ ਮਾਤਙ੍ਗਨਾਗੋ ਅਰਞ੍ਞੇ ਏਕੋ ਚਰਿ, ਨ ਚ ਪਾਪਾਨਿ ਅਕਾਸਿ, ਯਥਾ ਚ ਪਾਲਿਲੇਯ੍ਯਕੋ, ਏવਂ ਏਕੋ ਚਰੇ, ਨ ਚ ਪਾਪਾਨਿ ਕਯਿਰਾਤਿ વੁਤ੍ਤਂ ਹੋਤਿ।
Rājāva raṭṭhaṃ vijitanti yathā attano vijitaraṭṭhaṃ mahājanakarājā ca arindamamahārājā ca pahāya ekakā vicariṃsu, evaṃ vicareyyāti attho. Mātaṅgaraññeva nāgoti mātaṅgo araññe nāgova. Mātaṅgoti hatthi vuccati. Nāgoti mahantādhivacanametaṃ. Yathā hi mātuposako mātaṅganāgo araññe eko cari, na ca pāpāni akāsi, yathā ca pālileyyako, evaṃ eko care, na ca pāpāni kayirāti vuttaṃ hoti.
੨੩੮. ਬਾਲਕਲੋਣਕਾਰਗਾਮੋਤਿ ਉਪਾਲਿਗਹਪਤਿਸ੍ਸ ਭੋਗਗਾਮੋ। ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਗਣੇ ਕਿਰਸ੍ਸ ਆਦੀਨવਂ ਦਿਸ੍વਾ ਏਕવਿਹਾਰਿਂ ਭਿਕ੍ਖੁਂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦੀਹਿ ਪੀਲ਼ਿਤੋ ਉਣ੍ਹਾਦੀਨਿ ਪਤ੍ਥਯਮਾਨੋ વਿਯ ਉਪਸਙ੍ਕਮਿ। ਧਮ੍ਮਿਯਾ ਕਥਾਯਾਤਿ ਏਕੀਭਾવੇ ਆਨਿਸਂਸਪ੍ਪਟਿਸਂਯੁਤ੍ਤਾਯ। ਯੇਨ ਪਾਚੀਨવਂਸਦਾਯੋ, ਤਤ੍ਥ ਕਸ੍ਮਾ ਉਪਸਙ੍ਕਮਿ? ਕਲਹਕਾਰਕੇ ਕਿਰਸ੍ਸ ਦਿਟ੍ਠਾਦੀਨવਤ੍ਤਾ ਸਮਗ੍ਗવਾਸਿਨੋ ਭਿਕ੍ਖੂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦੀਹਿ ਪੀਲ਼ਿਤੋ ਉਣ੍ਹਾਦੀਨਿ ਪਤ੍ਥਯਮਾਨੋ વਿਯ ਤਤ੍ਥ ਉਪਸਙ੍ਕਮਿ। ਆਯਸ੍ਮਾ ਚ ਅਨੁਰੁਦ੍ਧੋਤਿਆਦਿ વੁਤ੍ਤਨਯਮੇવ।
238.Bālakaloṇakāragāmoti upāligahapatissa bhogagāmo. Tenupasaṅkamīti kasmā upasaṅkami? Gaṇe kirassa ādīnavaṃ disvā ekavihāriṃ bhikkhuṃ passitukāmatā udapādi, tasmā sītādīhi pīḷito uṇhādīni patthayamāno viya upasaṅkami. Dhammiyā kathāyāti ekībhāve ānisaṃsappaṭisaṃyuttāya. Yena pācīnavaṃsadāyo, tattha kasmā upasaṅkami? Kalahakārake kirassa diṭṭhādīnavattā samaggavāsino bhikkhū passitukāmatā udapādi, tasmā sītādīhi pīḷito uṇhādīni patthayamāno viya tattha upasaṅkami. Āyasmā ca anuruddhotiādi vuttanayameva.
੨੪੧. ਅਤ੍ਥਿ ਪਨ વੋਤਿ ਪਚ੍ਛਿਮਪੁਚ੍ਛਾਯ ਲੋਕੁਤ੍ਤਰਧਮ੍ਮਂ ਪੁਚ੍ਛੇਯ੍ਯ। ਸੋ ਪਨ ਥੇਰਾਨਂ ਨਤ੍ਥਿ, ਤਸ੍ਮਾ ਤਂ ਪੁਚ੍ਛਿਤੁਂ ਨ ਯੁਤ੍ਤਨ੍ਤਿ ਪਰਿਕਮ੍ਮੋਭਾਸਂ ਪੁਚ੍ਛਤਿ। ਓਭਾਸਞ੍ਚੇવ ਸਞ੍ਜਾਨਾਮਾਤਿ ਪਰਿਕਮ੍ਮੋਭਾਸਂ ਸਞ੍ਜਾਨਾਮ। ਦਸ੍ਸਨਞ੍ਚ ਰੂਪਾਨਨ੍ਤਿ ਦਿਬ੍ਬਚਕ੍ਖੁਨਾ ਰੂਪਦਸ੍ਸਨਞ੍ਚ ਸਞ੍ਜਾਨਾਮ। ਤਞ੍ਚ ਨਿਮਿਤ੍ਤਂ ਨਪ੍ਪਟਿવਿਜ੍ਝਾਮਾਤਿ ਤਞ੍ਚ ਕਾਰਣਂ ਨ ਜਾਨਾਮ, ਯੇਨ ਨੋ ਓਭਾਸੋ ਚ ਰੂਪਦਸ੍ਸਨਞ੍ਚ ਅਨ੍ਤਰਧਾਯਤਿ।
241.Atthi pana voti pacchimapucchāya lokuttaradhammaṃ puccheyya. So pana therānaṃ natthi, tasmā taṃ pucchituṃ na yuttanti parikammobhāsaṃ pucchati. Obhāsañceva sañjānāmāti parikammobhāsaṃ sañjānāma. Dassanañca rūpānanti dibbacakkhunā rūpadassanañca sañjānāma. Tañca nimittaṃ nappaṭivijjhāmāti tañca kāraṇaṃ na jānāma, yena no obhāso ca rūpadassanañca antaradhāyati.
ਤਂ ਖੋ ਪਨ વੋ ਅਨੁਰੁਦ੍ਧਾ ਨਿਮਿਤ੍ਤਂ ਪਟਿવਿਜ੍ਝਿਤਬ੍ਬਨ੍ਤਿ ਤਂ વੋ ਕਾਰਣਂ ਜਾਨਿਤਬ੍ਬਂ। ਅਹਮ੍ਪਿ ਸੁਦਨ੍ਤਿ ਅਨੁਰੁਦ੍ਧਾ ਤੁਮ੍ਹੇ ਕਿਂ ਨ ਆਲ਼ੁਲੇਸ੍ਸਨ੍ਤਿ, ਅਹਮ੍ਪਿ ਇਮੇਹਿ ਏਕਾਦਸਹਿ ਉਪਕ੍ਕਿਲੇਸੇਹਿ ਆਲ਼ੁਲਿਤਪੁਬ੍ਬੋਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ। વਿਚਿਕਿਚ੍ਛਾ ਖੋ ਮੇਤਿਆਦੀਸੁ ਮਹਾਸਤ੍ਤਸ੍ਸ ਆਲੋਕਂ વਡ੍ਢੇਤ੍વਾ ਦਿਬ੍ਬਚਕ੍ਖੁਨਾ ਨਾਨਾવਿਧਾਨਿ ਰੂਪਾਨਿ ਦਿਸ੍વਾ ‘‘ਇਦਂ ਖੋ ਕਿ’’ਨ੍ਤਿ વਿਚਿਕਿਚ੍ਛਾ ਉਦਪਾਦਿ। ਸਮਾਧਿ ਚવੀਤਿ ਪਰਿਕਮ੍ਮਸਮਾਧਿ ਚવਿ। ਓਭਾਸੋਤਿ ਪਰਿਕਮ੍ਮੋਭਾਸੋਪਿ ਅਨ੍ਤਰਧਾਯਿ, ਦਿਬ੍ਬਚਕ੍ਖੁਨਾਪਿ ਰੂਪਂ ਨ ਪਸ੍ਸਿ। ਅਮਨਸਿਕਾਰੋਤਿ ਰੂਪਾਨਿ ਪਸ੍ਸਤੋ વਿਚਿਕਿਚ੍ਛਾ ਉਪ੍ਪਜ੍ਜਤਿ, ਇਦਾਨਿ ਕਿਞ੍ਚਿ ਨ ਮਨਸਿਕਰਿਸ੍ਸਾਮੀਤਿ ਅਮਨਸਿਕਾਰੋ ਉਦਪਾਦਿ।
Taṃ kho pana vo anuruddhā nimittaṃ paṭivijjhitabbanti taṃ vo kāraṇaṃ jānitabbaṃ. Ahampi sudanti anuruddhā tumhe kiṃ na āḷulessanti, ahampi imehi ekādasahi upakkilesehi āḷulitapubboti dassetuṃ imaṃ desanaṃ ārabhi. Vicikicchā kho metiādīsu mahāsattassa ālokaṃ vaḍḍhetvā dibbacakkhunā nānāvidhāni rūpāni disvā ‘‘idaṃ kho ki’’nti vicikicchā udapādi. Samādhi cavīti parikammasamādhi cavi. Obhāsoti parikammobhāsopi antaradhāyi, dibbacakkhunāpi rūpaṃ na passi. Amanasikāroti rūpāni passato vicikicchā uppajjati, idāni kiñci na manasikarissāmīti amanasikāro udapādi.
ਥਿਨਮਿਦ੍ਧਨ੍ਤਿ ਕਿਞ੍ਚਿ ਅਮਨਸਿਕਰੋਨ੍ਤਸ੍ਸ ਥਿਨਮਿਦ੍ਧਂ ਉਦਪਾਦਿ।
Thinamiddhanti kiñci amanasikarontassa thinamiddhaṃ udapādi.
ਛਮ੍ਭਿਤਤ੍ਤਨ੍ਤਿ ਹਿਮવਨ੍ਤਾਭਿਮੁਖਂ ਆਲੋਕਂ વਡ੍ਢੇਤ੍વਾ ਦਾਨવਰਕ੍ਖਸਅਜਗਰਾਦਯੋ ਅਦ੍ਦਸ, ਅਥਸ੍ਸ ਛਮ੍ਭਿਤਤ੍ਤਂ ਉਦਪਾਦਿ।
Chambhitattanti himavantābhimukhaṃ ālokaṃ vaḍḍhetvā dānavarakkhasaajagarādayo addasa, athassa chambhitattaṃ udapādi.
ਉਪ੍ਪਿਲਨ੍ਤਿ ‘‘ਮਯਾ ਦਿਟ੍ਠਭਯਂ ਪਕਤਿਯਾ ਓਲੋਕਿਯਮਾਨਂ ਨਤ੍ਥਿ। ਅਦਿਟ੍ਠੇ ਕਿਂ ਨਾਮ ਭਯ’’ਨ੍ਤਿ ਚਿਨ੍ਤਯਤੋ ਉਪ੍ਪਿਲਾવਿਤਤ੍ਤਂ ਉਦਪਾਦਿ। ਸਕਿਦੇવਾਤਿ ਏਕਪਯੋਗੇਨੇવ ਪਞ੍ਚ ਨਿਧਿਕੁਮ੍ਭਿਯੋਪਿ ਪਸ੍ਸੇਯ੍ਯ।
Uppilanti ‘‘mayā diṭṭhabhayaṃ pakatiyā olokiyamānaṃ natthi. Adiṭṭhe kiṃ nāma bhaya’’nti cintayato uppilāvitattaṃ udapādi. Sakidevāti ekapayogeneva pañca nidhikumbhiyopi passeyya.
ਦੁਟ੍ਠੁਲ੍ਲਨ੍ਤਿ ਮਯਾ વੀਰਿਯਂ ਗਾਲ਼੍ਹਂ ਪਗ੍ਗਹਿਤਂ, ਤੇਨ ਮੇ ਉਪ੍ਪਿਲਂ ਉਪ੍ਪਨ੍ਨਨ੍ਤਿ વੀਰਿਯਂ ਸਿਥਿਲਮਕਾਸਿ, ਤਤੋ ਕਾਯਦਰਥੋ ਕਾਯਦੁਟ੍ਠੁਲ੍ਲਂ ਕਾਯਾਲਸਿਯਂ ਉਦਪਾਦਿ।
Duṭṭhullanti mayā vīriyaṃ gāḷhaṃ paggahitaṃ, tena me uppilaṃ uppannanti vīriyaṃ sithilamakāsi, tato kāyadaratho kāyaduṭṭhullaṃ kāyālasiyaṃ udapādi.
ਅਚ੍ਚਾਰਦ੍ਧવੀਰਿਯਨ੍ਤਿ ਮਮ વੀਰਿਯਂ ਸਿਥਿਲਂ ਕਰੋਤੋ ਦੁਟ੍ਠੁਲ੍ਲਂ ਉਪ੍ਪਨ੍ਨਨ੍ਤਿ ਪੁਨ વੀਰਿਯਂ ਪਗ੍ਗਣ੍ਹਤੋ ਅਚ੍ਚਾਰਦ੍ਧવੀਰਿਯਂ ਉਦਪਾਦਿ। ਪਤਮੇਯ੍ਯਾਤਿ ਮਰੇਯ੍ਯ।
Accāraddhavīriyanti mama vīriyaṃ sithilaṃ karoto duṭṭhullaṃ uppannanti puna vīriyaṃ paggaṇhato accāraddhavīriyaṃ udapādi. Patameyyāti mareyya.
ਅਤਿਲੀਨવੀਰਿਯਨ੍ਤਿ ਮਮ વੀਰਿਯਂ ਪਗ੍ਗਣ੍ਹਤੋ ਏવਂ ਜਾਤਨ੍ਤਿ ਪੁਨ વੀਰਿਯਂ ਸਿਥਿਲਂ ਕਰੋਤੋ ਅਤਿਲੀਨવੀਰਿਯਂ ਉਦਪਾਦਿ।
Atilīnavīriyanti mama vīriyaṃ paggaṇhato evaṃ jātanti puna vīriyaṃ sithilaṃ karoto atilīnavīriyaṃ udapādi.
ਅਭਿਜਪ੍ਪਾਤਿ ਦੇવਲੋਕਾਭਿਮੁਖਂ ਆਲੋਕਂ વਡ੍ਢੇਤ੍વਾ ਦੇવਸਙ੍ਘਂ ਪਸ੍ਸਤੋ ਤਣ੍ਹਾ ਉਦਪਾਦਿ।
Abhijappāti devalokābhimukhaṃ ālokaṃ vaḍḍhetvā devasaṅghaṃ passato taṇhā udapādi.
ਨਾਨਤ੍ਤਸਞ੍ਞਾਤਿ ਮਯ੍ਹਂ ਏਕਜਾਤਿਕਂ ਰੂਪਂ ਮਨਸਿਕਰੋਨ੍ਤਸ੍ਸ ਅਭਿਜਪ੍ਪਾ ਉਪ੍ਪਨ੍ਨਾ, ਨਾਨਾવਿਧਰੂਪਂ ਮਨਸਿ ਕਰਿਸ੍ਸਾਮੀਤਿ ਕਾਲੇਨ ਦੇવਲੋਕਾਭਿਮੁਖਂ ਕਾਲੇਨ ਮਨੁਸ੍ਸਲੋਕਾਭਿਮੁਖਂ વਡ੍ਢੇਤ੍વਾ ਨਾਨਾવਿਧਾਨਿ ਰੂਪਾਨਿ ਮਨਸਿਕਰੋਤੋ ਨਾਨਤ੍ਤਸਞ੍ਞਾ ਉਦਪਾਦਿ।
Nānattasaññāti mayhaṃ ekajātikaṃ rūpaṃ manasikarontassa abhijappā uppannā, nānāvidharūpaṃ manasi karissāmīti kālena devalokābhimukhaṃ kālena manussalokābhimukhaṃ vaḍḍhetvā nānāvidhāni rūpāni manasikaroto nānattasaññā udapādi.
ਅਤਿਨਿਜ੍ਝਾਯਿਤਤ੍ਤਨ੍ਤਿ ਮਯ੍ਹਂ ਨਾਨਾવਿਧਾਨਿ ਰੂਪਾਨਿ ਮਨਸਿਕਰੋਨ੍ਤਸ੍ਸ ਨਾਨਤ੍ਤਸਞ੍ਞਾ ਉਦਪਾਦਿ, ਇਟ੍ਠਂ વਾ ਅਨਿਟ੍ਠਂ વਾ ਏਕਜਾਤਿਕਮੇવ ਮਨਸਿ ਕਰਿਸ੍ਸਾਮੀਤਿ ਤਥਾ ਮਨਸਿਕਰੋਤੋ ਅਤਿਨਿਜ੍ਝਾਯਿਤਤ੍ਤਂ ਰੂਪਾਨਂ ਉਦਪਾਦਿ।
Atinijjhāyitattanti mayhaṃ nānāvidhāni rūpāni manasikarontassa nānattasaññā udapādi, iṭṭhaṃ vā aniṭṭhaṃ vā ekajātikameva manasi karissāmīti tathā manasikaroto atinijjhāyitattaṃ rūpānaṃ udapādi.
੨੪੩. ਓਭਾਸਨਿਮਿਤ੍ਤਂ ਮਨਸਿ ਕਰੋਮੀਤਿ ਪਰਿਕਮ੍ਮੋਭਾਸਮੇવ ਮਨਸਿ ਕਰੋਮਿ। ਨ ਚ ਰੂਪਾਨਿ ਪਸ੍ਸਾਮੀਤਿ ਦਿਬ੍ਬਚਕ੍ਖੁਨਾ ਰੂਪਾਨਿ ਨ ਪਸ੍ਸਾਮਿ। ਰੂਪਨਿਮਿਤ੍ਤਂ ਮਨਸਿ ਕਰੋਮੀਤਿ ਦਿਬ੍ਬਚਕ੍ਖੁਨਾ વਿਸਯਰੂਪਮੇવ ਮਨਸਿ ਕਰੋਮਿ।
243.Obhāsanimittaṃmanasi karomīti parikammobhāsameva manasi karomi. Na ca rūpāni passāmīti dibbacakkhunā rūpāni na passāmi. Rūpanimittaṃ manasi karomīti dibbacakkhunā visayarūpameva manasi karomi.
ਪਰਿਤ੍ਤਞ੍ਚੇવ ਓਭਾਸਨ੍ਤਿ ਪਰਿਤ੍ਤਕਟ੍ਠਾਨੇ ਓਭਾਸਂ। ਪਰਿਤ੍ਤਾਨਿ ਚ ਰੂਪਾਨੀਤਿ ਪਰਿਤ੍ਤਕਟ੍ਠਾਨੇ ਰੂਪਾਨਿ। વਿਪਰਿਯਾਯੇਨ ਦੁਤਿਯવਾਰੋ વੇਦਿਤਬ੍ਬੋ। ਪਰਿਤ੍ਤੋ ਸਮਾਧੀਤਿ ਪਰਿਤ੍ਤਕੋ ਪਰਿਕਮ੍ਮੋਭਾਸੋ, ਓਭਾਸਪਰਿਤ੍ਤਤਞ੍ਹਿ ਸਨ੍ਧਾਯ ਇਧ ਪਰਿਕਮ੍ਮਸਮਾਧਿ ‘‘ਪਰਿਤ੍ਤੋ’’ਤਿ વੁਤ੍ਤੋ। ਪਰਿਤ੍ਤਂ ਮੇ ਤਸ੍ਮਿਂ ਸਮਯੇਤਿ ਤਸ੍ਮਿਂ ਸਮਯੇ ਦਿਬ੍ਬਚਕ੍ਖੁਪਿ ਪਰਿਤ੍ਤਕਂ ਹੋਤਿ। ਅਪ੍ਪਮਾਣવਾਰੇਪਿ ਏਸੇવ ਨਯੋ।
Parittañceva obhāsanti parittakaṭṭhāne obhāsaṃ. Parittāni ca rūpānīti parittakaṭṭhāne rūpāni. Vipariyāyena dutiyavāro veditabbo. Paritto samādhīti parittako parikammobhāso, obhāsaparittatañhi sandhāya idha parikammasamādhi ‘‘paritto’’ti vutto. Parittaṃ me tasmiṃ samayeti tasmiṃ samaye dibbacakkhupi parittakaṃ hoti. Appamāṇavārepi eseva nayo.
੨੪੫. ਅવਿਤਕ੍ਕਮ੍ਪਿ વਿਚਾਰਮਤ੍ਤਨ੍ਤਿ ਪਞ੍ਚਕਨਯੇ ਦੁਤਿਯਜ੍ਝਾਨਸਮਾਧਿਂ। ਅવਿਤਕ੍ਕਮ੍ਪਿ ਅવਿਚਾਰਨ੍ਤਿ ਚਤੁਕ੍ਕਨਯੇਪਿ ਪਞ੍ਚਕਨਯੇਪਿ ਝਾਨਤ੍ਤਯਸਮਾਧਿਂ। ਸਪ੍ਪੀਤਿਕਨ੍ਤਿ ਦੁਕਤਿਕਜ੍ਝਾਨਸਮਾਧਿਂ। ਨਿਪ੍ਪੀਤਿਕਨ੍ਤਿ ਦੁਕਜ੍ਝਾਨਸਮਾਧਿਂ। ਸਾਤਸਹਗਤਨ੍ਤਿ ਤਿਕਚਤੁਕ੍ਕਜ੍ਝਾਨਸਮਾਧਿਂ। ਉਪੇਕ੍ਖਾਸਹਗਤਨ੍ਤਿ ਚਤੁਕ੍ਕਨਯੇ ਚਤੁਤ੍ਥਜ੍ਝਾਨਸਮਾਧਿਂ ਪਞ੍ਚਕਨਯੇ ਪਞ੍ਚਮਜ੍ਝਾਨਸਮਾਧਿਂ।
245.Avitakkampi vicāramattanti pañcakanaye dutiyajjhānasamādhiṃ. Avitakkampi avicāranti catukkanayepi pañcakanayepi jhānattayasamādhiṃ. Sappītikanti dukatikajjhānasamādhiṃ. Nippītikanti dukajjhānasamādhiṃ. Sātasahagatanti tikacatukkajjhānasamādhiṃ. Upekkhāsahagatanti catukkanaye catutthajjhānasamādhiṃ pañcakanaye pañcamajjhānasamādhiṃ.
ਕਦਾ ਪਨ ਭਗવਾ ਇਮਂ ਤਿવਿਧਂ ਸਮਾਧਿਂ ਭਾવੇਤਿ? ਮਹਾਬੋਧਿਮੂਲੇ ਨਿਸਿਨ੍ਨੋ ਪਚ੍ਛਿਮਯਾਮੇ। ਭਗવਤੋ ਹਿ ਪਠਮਮਗ੍ਗੋ ਪਠਮਜ੍ਝਾਨਿਕੋ ਅਹੋਸਿ, ਦੁਤਿਯਾਦਯੋ ਦੁਤਿਯਤਤਿਯਚਤੁਤ੍ਥਜ੍ਝਾਨਿਕਾ । ਪਞ੍ਚਕਨਯੇ ਪਞ੍ਚਮਜ੍ਝਾਨਸ੍ਸ ਮਗ੍ਗੋ ਨਤ੍ਥੀਤਿ ਸੋ ਲੋਕਿਯੋ ਅਹੋਸੀਤਿ ਲੋਕਿਯਲੋਕੁਤ੍ਤਰਮਿਸ੍ਸਕਂ ਸਨ੍ਧਾਯੇਤਂ વੁਤ੍ਤਂ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
Kadā pana bhagavā imaṃ tividhaṃ samādhiṃ bhāveti? Mahābodhimūle nisinno pacchimayāme. Bhagavato hi paṭhamamaggo paṭhamajjhāniko ahosi, dutiyādayo dutiyatatiyacatutthajjhānikā . Pañcakanaye pañcamajjhānassa maggo natthīti so lokiyo ahosīti lokiyalokuttaramissakaṃ sandhāyetaṃ vuttaṃ. Sesaṃ sabbattha uttānamevāti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਉਪਕ੍ਕਿਲੇਸਸੁਤ੍ਤવਣ੍ਣਨਾ ਨਿਟ੍ਠਿਤਾ।
Upakkilesasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੮. ਉਪਕ੍ਕਿਲੇਸਸੁਤ੍ਤਂ • 8. Upakkilesasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੮. ਉਪਕ੍ਕਿਲੇਸਸੁਤ੍ਤવਣ੍ਣਨਾ • 8. Upakkilesasuttavaṇṇanā
